Yéngisardiki toqunushta gumandarning ayali érini qoghdash dawamida tayaq yep hayatidin ayrilghan

Muxbirimiz shöhret hoshur
2013.05.23
alim-ebey-ayali-Nurimangul-Hashim-305.jpg Yéngisar nahiyisining uchar yézisida yüz bergen toqunushtiki gumandar alim ebeyning ayali nuriman'gül hashim.
RFA

Biz tünügünki programmimizda yéngisar nahiyisining uchar yézisida yüz bergen 9-may toqunush weqesi heqqide melumat bergen iduq. Nöwettiki programmimizda yene shu toqunush dawamida gumandarning ayali nuriman'gül hashimning érining üstige özini tashlap uni tayaq-toqmaqtin qoghdighanliqi we bu jeryanda öziningmu éghir zeximlinip doxturxanida jan üzgenliki؛ toqunush dawamida xizmet guruppisidiki xitay bashliqlarning Uyghur kent mes'ullirini weqening aldigha ittirip qoyup özliri qéchip ketkenliki we bu ehwalgha ölgüchi kent mes'ulliri a'ile-tawabi'atlirining narazi bolghanliqi qatarliq jeryanlarni diqqitinglargha sunimiz.

Yéngisardiki weqede, 3 er kishidin bashqa yene bir ayal kishimu jan üzgen. Gumandar alim ebeyning ayali nuriman'gül hashim, érining mehelle amanliq xadimliri teripidin qattiq uruluwatqanliqini körgendin kéyin, uning üstige özini étip uni tayaq toqmaqtin qoghdighan. Weqe peseygendin kéyin neq meydan'gha yétip kelgen saqchilar, hoshsiz halette yatqan alim ebeyni doxturxanigha, nuriman'gülni bolsa saqchixanigha élip mangghan.

Saqchilar nuriman'gülning soraq dawamida yürek késili qozghilip, doxturxanida jan üzgenlikini ashkarilighan. Emma yerlik ahaliler, nuriman'gülning yürek késili yoqluqini, uning peqet weqe jeryanida we yaki soraq jeryanida yégen tayaq zerbisi seweblik hayatidin ayrilghanliqini ilgiri sürüshmekte. Melum bolushiche, nuriman'gülning jesiti téxiche uruq-tughqanliri yaki mehelle jama'itige bérilmigen. Da'irilerning nuriman'gülning jesitini téxiche saqlawatqanliqi yaki un-tinsizla kömüwetkenliki hazirche melum emes.

Bu qétimqi weqede diqqetni tartidighan nuqtilardin biri, öy tekshürüsh guruppisidiki xitaylarning ishning aldigha ötmigenliki, Uyghur kent mes'ullirini toqunushta aldigha ittirip qoyghanliqi we weqe chiqqandin kéyin qéchip ketkenliki. Bu ehwal ölgüchi kent mes'ullirining a'ile-tawabi'atlirining naraziliqini qozghighan. Bu naraziliq diniy zatlarning telim we teselliliridin kéyinla peskoygha chüshken.

Yene melum bolushiche, ötken yekshenbe küni yéngisar nahiyiside daghdughiliq matem murasimi ötküzülüp, weqede ölgen ikki kent mes'uligha teziye bildürülgen hem bu murasimda, weqe dawamida gumandar alim ebey we uning ayalini urup ölüshige seweb bolghan 7 neper mehelle amanliq xadimi yeni minbing mukapatlan'ghan. Emma gumandar alim ebeyning qéynanisi gülqiz téxiche qamaqta tutulmaqta.

Ashkarilinishiche, weqedin kéyin gumandar alim ebeyning 22 neper sepdishidin 16 nepiri tutqun qilin'ghan. Emma bu 16 si tutulush dawamida herqaysi jaylarda yene qandaq weqelerning yüz bergenliki melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.