Хотәндә өйини дин өгәнгүчиләргә бәргән нурнисагүл 6 йиллиқ қамаққа һөкүм қилинған

Мухбиримиз шөһрәт һошур
2017.11.06
cheqiwetilgen-meschit-jame.JPG Шаяр наһийәсидә чеқиветилгән мәсчит. 2016-Йили күз.
Oqurmen Teminligen

Хотәнниң илчи йезисидики тиҗарәтчи нурнисагүл ханим хотән шәһәр ичидики бир өйини дин өгиниватқан оқуғучиларға бәргәнлики үчүн 6 йиллиқ кесилгән.

Мушу хил җазалар һәққидә бүгүн пикир баян қилған америкидики доктор қаһар барат әпәнди, хитайниң уйғурларни җазалаш үчүн пәқәт баһанә-сәвәб издәватқанлиқини, буниң бу дөләтниң күчлүклүкини әмәс, әксичә аҗизлиқини ипадиләйдиғанлиқини илгири сүрди.

Уйғур районида давам қиливатқан кәң көләмлик тутқун вә еғир кесим һәққидә ениқлашлиримиз давамида хотәнниң илчи йеза 4 ‏- кәнтидики нурнисагүл исимлик бир аялниңму 6 йиллиқ кесилгәнлики ашкариланди. Мәзкур кәнт аманлиқ мудириниң баян қилишичә, тиҗарәтчи нурнисагүл ханим 4 балиниң аниси; у хотән шәһәр ичидики бир өйини дин өгиниватқан оқуғучиларға бәргән икән.

Униң бу қилмиши “қанунсиз диний паалийәтләрни қоллаш” дәп әйибләнгән. Йәнә аһалиләрниң паш қилишичә, нурнисагүлниң хотәндики өйини дин өгиниватқан оқуғучиларға бериши буниңдин 7 йилниң аввалқи иш икән.

Америкада яшаватқан қаһар барат әпәнди, нурнисагүлниң әслидә җазалинидиған әмәс, мукапатлинишқа мунасип киши икәнликини әскәртти. Хитайниң уйғурлар ичидики мукапатлашқа тегишлик кишиләрни җазалаш, җазалинишқа тегишлик кишиләрни әтиварлаш вә өстүрүш қатарлиқ йоллар билән уйғур районидики һакимийитини дәврләрдин қоғдап келиватқанлиқини илгири сүрди. Қаһар әпәнди йәнә йеңисарда оғлини һарақтин тосқан турсун мәмәтниң 10 йиллиқ кесилгәнлики һәққидики вәқә үстидиму тохтилип, хитай даирилириниң районда йиллардин бери шәкилләндүргән зиддийәтни һәл қилишниң орниға йәнә йеңи зиддийәтләрни туғдуруватқанлиқини әскәртти. Қаһар барат әпәндиниң қаришичә, хитай даирилири бу хил җазалар арқилиқ уйғурларға қарита һәйвә вә күч көрсәтмәктикән. Әмма қаһар әпәндиниң тәкитлишичә, бу қудрәтлик бир дөләтниң чариси әмәс. Бу бу түрдики чариләр пәқәт аҗизлиқниң ипадиси, йәни қанунсиз тутқун вә җазалар, райондики хитай һакимийитиниң қануний асасиниң йоқлуқиниң васитилик һалда етирап қилиниши икән.

Юқиридики аваз улинишидин хотәндә нурнисагүл исимлик бир тиҗарәтчи аялниң буниңдин 7 йил бурун өйини дин өгәнгүчиләргә бәргәнлики үчүн 6 йил кесилгәнлики һәққидә учур вә мулаһизиләрниң тәпсилатини аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.