Хотәндә гумпа мәшиқ қилған уйғур яш 20 йиллиқ кесилгән

Йеқинда муһаҗирәттики аңлиғучилиримиздин бири радиомизға учур йоллап, хотәнниң илчи вә мәкитниң шеһитдөң йезисида гумпа өгиниватқан бир түркүм тәнтәрбийә һәвәскарлириниң террорлуқини мәшиқ қилиш гумани билән тутулғанлиқи вә бир қисминиң кесилгәнликини мәлум қилди.

Мухбиримизниң бу йип учиға асасән ениқлашлири давамида, хотәнниң илчи йеза ара мәһәллә кәнтидики 21 яшлиқ аблимит мәтясинниң гумпа өгәнгән қилмиши сәвәблик 20 йиллиқ кесилгәнлики, униң аниси һаҗиниса мәмтиминниң болса нөвәттә тәрбийиләш мәркизидә икәнлики ашкариланди.

Радиомизға кәлгән инкаста хотән вә қәшқәрдә бир түркүм яшларниң өйидин бокс пәлийи тепилғанлиқи үчүн тутулған вә кесилгәнлики йезилған. Биз аввал мәкитниң шеһитдөң йезисиға телефон қилип, бу хил әһвалниң бар-йоқлуқи һәққидә мәлумат соридуқ. Телефонимизни алған сақчи хадими, өзиниң хизмәт орниға йеңилиқини әскәртип, бу хил әһвалдин хәвәрсизликини ейтти.

Инкаста йәнә гумпа өгәнгәнлики үчүн тутулған яшларниң әслидә тәнтәрбийә һәвәскарлири икәнлики, әмма даириләрниң уларни “террорлуқ гумани” билән тутқанлиқи йезилған.

Хотәнниң илчи йеза ара мәһәллә кәнт секретари өз кәнтидин тутулуп кесилгәнләр ичидә, 21 яшлиқ аблимит мәтясинниң, гумпа өгәнгәнлики үчүн тутулғанлиқи вә 20 йиллиқ кесилгәнликини ашкарилиди.

Радиомизға кәлгән мәзкур инкаста, уйғур районида нөвәттә өйидин қум халтиси тепилған, өзи тәнтәрбийә саһәсидә хизмәт қилмиған туруқлуқ, тәнтәрбийә кийими кийивалған вә сәһәр туруп чениққан кишиләрниңму тутқун қилиниватқанлиқи йезилған.

Юқириқи кәнт секретари, гумпа өгәнгәнлики үчүн кесилгән аблимит мәтясинниң ялғуз әмәсликини, униң қәшқәр пәйзиватта шериклири барлиқини ейтти.

Униң баян қилишичә йәнә, сақчилар униңға аблимит мәтясинни пәқәт тутуп беришкә һәмкарлишишқа чақирған, әмма делосиниң тәпсилатидин мәлумат бәрмигән.

Биз бу һәқтә пәйзиваттики бир сақчиханидинму мәлумат соридуқ.

Илчи арамәһәллә секретари, даириләрниң гумпа өгәнгән тәнтәрбийә һәвәскари аблимит мәтясиннила әмәс, униң аниси һаҗиниса мәмтиминниму бош қоймиғанлиқини билдүрди.

Мәлум болушичә, һаҗиниса мәмтимин “оғлини яхши тәрбийилимәслик”, “гумпа өгиниватқанлиқини һөкүмәткә вақтида мәлум қилмаслиқ” қатарлиқ аталмиш гунаһлар билән тутқун қилған. Бу йил 44 яшлиқ һаҗиниса мәмтимин нөвәттә хотән шәһәрлик йепиқ тәрбийә мәркизидә тәрбийиләнмәктә.