Dunya Uyghur qurultiyi hey'iti istanbul waliyliqi qatarliq muhim orunlarni ziyaret qildi

D u q mu'awin re'isi ümid xemit ependi bashchiliqida 8 kishilik bir hey'et aq partiyesi istanbul shöbiside. 2017-Yili 2-féwral, istanbul.

2017-Yili 2-ayning 2-küni peyshenbe dunya Uyghur qurultiyining gérmaniyede turushluq mu'awin re'isi ümid xemit ependi bashchiliqida 8 kishilik bir hey'et istanbul waliyliqi, milletchi heriket partiyisi istanbul shöbisi, adalet we tereqqiyat partiyisi istanbul shöbisi qatarliq orunlarni ziyaret qilip muhim rehberler bilen uchrashti we Uyghurlar toghrisida söhbet élip bardi. Ziyaret jeryanida türkiyede yashawatqan we wetini ichidiki Uyghurlarning nöwette duch kéliwatqan mesililiri toghrisida pikir almashturdi, teklip berdi, iltimas sundi.

Bu hey'etke istanbuldiki sherqiy türkistan wexpining mu'awin re'isi xeyrullah ependi, bash katip doktor ömer qul, sherqiy türkistan ma'arip we hemkarliq jem'iyitining bash katipi abdul'ehed abduraxman ependilermu birlikte qatnashti.

Dunya Uyghur qurultiyining hey'iti aldi bilen milletchi heriket partiyisi istanbul shöbisi ziyaret qildi. Hey'etni milletchi heriket partiyisi istanbul shöbisining mu'awin re'isi salahittin köch arslan bilen bash katipi murat kotra ependiler, “Öz öyingizge xosh keldingiz” dep qizghin kütüwaldi.

2 Sa'et dawam qilghan uchrishishta Uyghur we türklerning tarixi munasiwetliri, Uyghurlarning nöwette duch kéliwatqan mesililiri toghrisida söhbet élip bérildi. Hey'et kéyin yene adalet we tereqqiyat partiyisining istanbul shöbisige ziyaretke bardi. Bu ziyarette adalet we tereqqiyat partiyisining istanbul shöbe re'isi doktor sélim demirji ependi kütüwaldi.

Doktor sélim demirji ependi wetini ichidiki Uyghurlarning ehwalidin xewerdar ikenlikini, emma türkiyede qanchilik Uyghur yashaydighanliqini, qandaq qiyinchiliqlargha duch kéliwatqanliqini soridi. Ümid hamit ependi we doktor ömer qul, abdul'ehed abduraxman we xeyrullah ependigil ependiler bu heqte bir-birlep tepsiliy melumat berdi we Uyghurlarning wetendashliqqa ötüsh, iqamet élish, xizmet tépish, perzentlerni mektepke ötküzüsh, a'ile turmushini qamdash, öy ijare ilish dégendek sahelerde qiyinchiliqqa uchrawatqanliqini we bu mesililerning hel bolushi üchün yardem qilishini telep qildi.

Doktor selim demirji bu heqte tepsiliy bir melumat yézip bérishni we qisqa waqit ichide munasiwetlik yuqiri qatlam rehberlerge yetküzüp bu mesililerni hel qilishqa tirishidighanliqini bildürdi.

Hey'et kéyin yene, istanbul waliyliqini ziyaret qilip, uchrishish waqti aldin belgilen'gen istanbul mu'awin waliysi jamaliddin özdémir ependi bilen uchrashti hemde semimiy söhbet élip bardi.

Mu'awin waliy jamaliddin öz démir ependi kichikidin bashlap Uyghur mesilisige qiziqip köngül qoyup kelgenlikini, yash waqitlirida Uyghurlargha alaqidar köpligen yighin uyushturup jama'et pikri peyda qilishqa tirishqanliqini, intérnét arqiliq ular toghrisida ishlen'gen höjjetlik filimlarni köridighanliqini, ularning derd-elemlirini özlirining derd elemliri dep hés qilidighanliqini, Uyghurlarning yénida bolushqa tirishidighanliqini ipadilidi. Wekiller semimiy söhbet axirida, waliygha ay yultuzluq kök bayraq bilen türk bayriqi jüp halette yasalghan üstel bayriqini we Uyghurlargha alaqidar yézilghan bir qanche parche kitab-zhurnal hediye qildi.

Uyghur hey'et ziyaret jeryanida yene, milletchi heriket partiyesi istanbul shöbisi bash katipi murat kotra ependige, adalet we tereqqiyat partiyisi istanbul shöbe re'isi doktor selim demirji ependilerge ay yultuzluq kök bayraq bilen türk bayriqi jüp halette yasalghan üstel bayriqini we Uyghurlargha alaqidar yézilghan bir qanche parche kitab-zhurnal hediye qildi we xatire resimge chüshti.

Biz bu ziyaretler toghrisida pikir-qarashlirini élish üchün dunya Uyghur qurultiyining mu'awin re'isi ümid xemit ependi, sherqiy türkistan wexpi mu'awin re'isi xeyrullah ependi, dunya Uyghur qurultiyining shiwétsiyediki wekili shundaqla shiwétsiye Uyghur komitéti re'isi abduréshit samsaq ependiler bilen söhbet élip barduq.

Ümid xemit ependi, bu ziyaretning meqsitining türkiyediki Uyghurlarning ehwalidin hal sorash, türkiye rehberlirining Uyghurlargha qarita pozitsiyesini bilish shundaqla ulargha Uyghur mesilisini anglitish we dunya Uyghur qurultiyining salimini yetküzüsh bilen birge, türkler bilen Uyghurlarning munasiwetlirini chingitish ikenlikini bildürdi.

Ular ziyaretning kütkinidek muweppeqiyetlik ötkenlikini ipadilidi.

Yuqiridiki awaz ulinishtin bu heqtiki programmimizning tepsilatini anglighaysiler.