Peyziwat nahiyisidiki “Muqimliq boyiche chatma jawabkarliq mes'uliyetnamisi” resmiy yolgha qoyulghan

Muxbirimiz eziz
2015.11.13
peyziwat-chatma-jawabkarliq-mesuliyet-uqturush-1.jpg Peyziwat nahiyisidiki “Muqimliq boyiche chatma jawabkarliq mes'uliyetnamisi” uqturushi
RFA/Aziz


Uyghurlar diyaridiki siyasiy bésimning künséri éghirlawatqanliqi türlük menbelerdin dawamliq melum bolmaqta. Peyziwat nahiyisige qarashliq qizilsu yézisi 2014 - yili 8 - ayda tarqatqan “Muqimliqni saqlash boyiche chatma jawabkarliqni ortaq üstige élish mes'uliyetnamisi” shu yézidiki kishilerge tarqitilip uzun ötmey radi'omiz arqiliq xewer qilin'ghan idi.

Mezkur mes'uliyetnamidiki belgilimiler boyiche öz aldigha tighliq eswab sétiwalghanlar, sirttin kelgenlerni melum qilmighanlar, diniy mezmundiki teshwiqat buyumlirini satqan yaki sétiwalghanlar, bashqilarni islam dinigha dewet qilghanlar we bashqilargha diniy telim terbiye bergenler, hökümet teyinligen imamlar imamliq qilidighan meschitte namaz oqushni tosqanlar, turmushta haram we halalliq ölchimi boyiche yashighanlar, hökümet tarqatqan gézitler we zhurnallarni oqumighanlar, radi'o anglimighan yaki téléwizor körmigenler, tamaka we haraq tashlighanlar, bashqilarni haraq yaki tamaka tashlashqa dewet qilghanlar, diniy kiyimlerni tikkenler we satqanlar, en'eniwi shekilde toy yaki nezir qilmighanlar we buninggha alaqidar bashqa mezmundiki jem'iy ottuz maddiliq mezmun'gha ri'aye qilmighanlar “Chatma jawabkarliq” mes'uliyiti boyiche bayqalghan haman yéziliq hökümetke melum qilinishi lazim iken.

Buningda herqaysi kent we mehellilerdiki ahaliler a'ile birliki boyiche guruppilargha ayrilidiken we bir - birini nazaret qilidiken. Her bir guruppidiki kishiler öz guruppisidiki melum a'ilide yuqirida éytilghan ehwallar körülse buni derhal kent we yéza mes'ullirigha melum qilishi lazim iken.

“Mes'uliyetname” de éytilishiche, muhim uchurlar bilen teminligüchiler mexpiyetlikini saqlash aldinqi sherti astida uchurning qimmitige qarap mukapatlinidiken. Eger birer a'ile yuqirida éytilghan mezmunlardin birerini melum qilmay yoshursa, shu guruppidiki hemme a'ililikler buning mes'uliyitini ortaq üstige alidiken we birlikte jazagha uchraydiken. Jazaning xaraktéri hökümettin bérilidighan toluqlima teminatni toxtitishtin tartip taki qanuniy jawabkarliqni ortaq chétildurup sürüshte qilishqiche bolghan da'iride bolidiken.

Peyziwat nahiyisidiki “Muqimliq boyiche chatma jawabkarliq mes'uliyetnamisi” uqturushi (2-bet)
Peyziwat nahiyisidiki “Muqimliq boyiche chatma jawabkarliq mes'uliyetnamisi” uqturushi (2-bet)

Yéqinda peyzawatning qizilsu yézisidiki munasiwetlik kishiler bilen qayta alaqilishish arqiliq mezkur “Mes'uliyetname” ning resmiy ijra qiliniwatqanliqi melum boldi. Yézidiki bir kadirning qizi bu mes'uliyetname yolgha qoyulghandin kéyinki bezi ehwallarni qisqiche tonushturup ötti.

Qizilsu yézisi bilen peyziwat nahiyisi ariliqidiki dölet igilikidiki melum idarining bir xizmetchisi bu xildiki mes'uliyetnamining hazir üch terep otturisida imzalan'ghanliqini, muqimliq weziyitining nahayiti yaxshi ikenlikini, shundaqla hazir yézining 1 - derijilik mudapi'e we jeng halitide turuwatqanliqini, mes'uliyetnamidiki mezmunlar boyiche her sahe kishilirining töwen'ge chüshüp munasip teshwiqat pa'aliyetlirini teshkillewatqanliqini tilgha aldi.

Qizilsu yézisidiki melum kentning partiye sékrétari hazir muqimliq ehwalining yaxshi ikenlikini éytip, mes'uliyetnamige xilapliq qiliwatqanlarning yoq dégüdek ikenlikini, xilapliq qilghuchilarning tégishlik qanuniy jazagha tartilidighanliqini éytti.

Axirida biz mezkur mes'uliyetname heqqide téximu ilgirilep melumat élish üchün qizilsu yéziliq xelq qurultiyi da'imiy komitét mudiri abla memetke téléfon qilduq. Emma u téléfon ékranida kelgen téléfonning nomuri körünmigenlikini, igisi éniq bolmighan bundaq téléfondiki so'allargha jawab bérelmeydighanliqini éytti.

Herqaysi sahedikilerning melumatlirigha asaslan'ghanda, peyziwat nahiyisidiki “Muqimliq boyiche chatma jawabkarliq mes'uliyetnamisi” resmiy yolgha qoyulghan, shundaqla yéza tewesidin halqip bashqa idare we organlargha kéngeygen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.