Рабийхан аниниң кәлмә десиму келивалидиған “туғқини” - хуң чиҗаң һәққидики шикайәтлири

Мухбиримиз шөһрәт һошур
2017.03.06
rabiyxan-musa-pasport-xoshna.jpg Рабийхан муса ана хошнилири билән
RFA

Уйғур райониниң йеңи секретари чен чүәнгониң рәһбәрликидә елип берилған хәнзу “туғқан” тәқсиматида, борталадики қәйсәр ана рабийхан муса аниға хуң чиҗаң исимлик бир аял сақчи несип болған. Әпсуски, рабийхан муса аниниң күнигә бирқанчә қетим келип, саәтләп олтурувалидиған бу “туғқан” билән пәқәтла пурчиқи пишмиған. У, бу “туғқини”ға мумкин болса кәлмәсликини, болмиғанда аз келишни йүзидин-йүзигә нәччә қетимлап дегән болсиму, у йоқлашни та бүгүнгичә тохтатмиған. Ахири рабийхан ана бу қелин-қаттиқ “туғқан”ға өзиниң бу хил туғқандарчилиқтин көңли елишидиғанлиқини билдүргән, әмма бу “туғқан” бу сөзниму һар алмиған.

Сөһбәттин мәлум болушичә, хуң чиҗаң униңға һәр күни түрлүк йемәк-ичмәкләрни көтүрүп киргән, рабийхан ана өзиниң иқтисадий әһвалиниң яхшилиқини билдүрүп, бу нәрсиләрни қобул қилмиған вә яки башқиларға беривәткән. Хуң чиҗаң қазан бешиға өтүшкә урунғанда рабийхан ана, әгәр униң қоли тегип кәтсә тамақни йемәйдиғанлиқини билдүргән; хуң чиҗаң дәсләптә қолини юйидиғанлиқини тәкитләп җаһиллиқ қилған болсиму, рабийхан аниниң қәтий рәт қилиши билән қазан бешиға келәлмигән. Рабийхан аниниң баян қилишичә, униң билән бир бинада олтурушлуқ башқа уйғурларниңму мушундақ тәқсимләнгән хәнзу “туғқан” лири бар икән. Рабийхан ана қошнилириниң өзигә қариғанда тәләйлик икәнликини, йәни уларниң у “туғқан” лириниң күндә келивалмайдиғанлиқини, өзиниңки болса күнигә аз дегәндә икки вақ “йоқлайдиған” лиқини, бәзидә қараңғу кечидә, бәзидә таң сәһәрдә ишикини чекидиғанлиқини баян қилди. Хуң чиҗаңниң рәт қилинсиму рәнҗимәслики, қопал гәпниму һар алмаслиқи қатарлиқ қелин-қаттиқ миҗәзи сәвәблик рабийхан ана билән хуң чиҗаң арисида бәзидә төвәндикидәк диалогларму болунған:

Хуң чиҗаң: мән сени яхши көримән, сән мени яхши көрәмсән?
Рабийхан: мән сени яхши көрмәймән, сәнму мени яхши көрмәйсән, сән ялған сөзләватисән, сән әмәлийәттә мени чайнап ютувәткүдәк өч көрисән.

Хуң чиҗаң: бундақ ойлима.
Рабийхан: яхши көрсәң, баламни көрүшүмни немишқа тосисән?!

Хуң чиҗаң: сән яшинип қалған болсаңму, мәндин әқиллиқ икәнсән, каллаң бәк тез ишләйдикән.
Рабийхан: әлвәттә. Мениң пәқәт оқуялмай қалған йерим бар.

Юқиридики улиништин, норвегийәдики балисини көрүш арзуси тосқунлуққа учриған вә паспорти тартивелинған 83 яшлиқ рабийхан аниниң бу йил январда өзигә тәқсимләнгән вә бизар қиливатқан хәнзу “туғқини” һәққидики тәсиратлирини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.