Ramizanliq tedbir boyiche xotende her bir a'ilide bir kadir yétip -qopmaqta

Muxbirimiz gülchéhre
2017-05-31
Élxet
Pikir
Hembehr
Print
  • Print
  • Hembehr
  • Pikir
  • Élxet
Xitay uyghurlarning yaghliq chigish, saqal qoyush we roza tutushlirini cheklewatqan mezgilde, meschitte namaz ötewatqan uyghurlar. 2015-Yili 16-aprél, xoten.
Xitay uyghurlarning yaghliq chigish, saqal qoyush we roza tutushlirini cheklewatqan mezgilde, meschitte namaz ötewatqan uyghurlar. 2015-Yili 16-aprél, xoten.
AFP

Her yili ramizan mezgili xitay hökümitining uyghurlarning diniy étiqad pa'aliyetlirini hessilep teqib qilidighan we chekleydighan peyti.

Xitay da'irilirining bu ramizanda alghan tedbirliri téximu qattiq we qobul qilghusiz derijige yetken bolup, hetta déhqan, charwichilarningmu roza tutushini cheklesh üchün her a'ilige birdin nazaretchi kadirni sepligen, da'iriler kentte turidighan bu kadirlargha ramizanning aldinqi 10 künide déhqanlar bilen "5 te bille bolush " qa kapaletlik qilish wezipisini bergen. Buning bilen ramizan harpisidin bashlap her bir uyghur déhqan mushundaq kütülmigen méhmandin birni öyide qondurushqa mejbur bolmaqta iken.

Ramizan kirishi bilen xitay da'irilirining her sahedikilerni xitayning qizil bayriqi astida kolléktip pozitsiye bildürüsh pa'aliyitige orunlashturup partiye ezaliri, kadirlar we ammining "üch xil küch" ke qarshi küresh qilishtiki meydanini ipadileshke séliwatqanliqi we mushu mezgildiki muqimliqni jan tikip qoghdash telipi qoyuwatqanliqi melum. Tengritagh tori qatarliq xitay uchur wasitilirining xewirige qarighanda, nöwette uyghur aptonom rayonida "elrayini bilish, elge nep yetküzüsh, elni mayil qilish" boyiche kentte turushluq xizmet etretlirining 50 nechche ming ezasi bar bolup, 5-ayning 29-küni chüshtin burun ürümchi waqti sa'et 7de, aptonom rayonluq "elrayini bilish, elge nep yetküzüsh, elni mayil qilish" boyiche kentte turush xizmitige rehberlik qilish guruppisi ishxanisining orunlashturushi bilen pütün rayon tewesidiki kent (mehelle)te turushluq xizmet etretlirining 53 ming ezasi, kent (mehelle) partiye yachéykilirining 11 ming sékrétari birla waqitta heywetlik beshyultuzluq qizil bayraq astida kolléktip pozitsiye bildürüsh pa'aliyitige qatnashturulghan. Bolupmu ular aptonom rayonning ijtima'iy muqimliqni qoghdash toghrisidiki orunlashturma-teleplirini emeliyleshtürüp, "üch xil küch" ning singdürmichilikige qet'iy qarshi turush üchün küch qoshidighanliqi heqqide wede bergen.

Xewerde yene shu küni, aptonom rayoni boyiche 6 milyon 270 mingdin köprek partiye ezasi, kadir we amma kent(mehelle) lerdiki bayraq chiqirish nuqtilirigha yighilip, bu pa'aliyetke qatnashqanliqi körsitildi.

Kentte turushluq xizmet etretlirining 6-nöwetliki yéqinda her qaysi kentlerge chüshken idi. Biz ramizanda bu kentlerde turushluq kadirlarning bu qeder jiddiy ipade bildürüp yene qandaq alahide wezipilerni ötüwatqanliqini igilesh üchün, siyasiy, ijtima'iy weziyiti eng jiddiy we eng küchlük muqimliq tedbirliri yürgüzülüwatqan xotendin melumat élishqa tirishtuq. Melum nahiyidiki bir saqchixanidin, bu jayda yürgüzüwatqan ramizanliq muqimliq tedbirliri heqqide so'allirimizgha jawab bergen bir saqchi, saqchi we kadirlarning nöwettiki muqimliq weziyiti jiddiy peytte, shenbe, yekshenbilirimu dem almay xizmet qiliwatqanliqini, bolupmu ramizanda her bir dölet memuri we kadirlarning déhqanlar bilen 5 te bille bolush wezipisini ishqa ashurush üchün, özige wezipe qilin'ghan a'ililerde 10 kün'giche yétip -qopidighanliqini bildürdi.

Bu saqchidin ashkarilan'ghan "5 bille bolush" tedbiri heqqide xotenning yene bir yéziliq hökümet ishxanisidin sorighinimizda, téléfon alghan kadir tepsiliy jawab bérishtin özini qachurup, buning déhqanlarning iqtisadiy kirimini ashurushni meqset qilghan namratlarni yölesh tedbiri ikenlikini qeyt qilghan bolsimu, del ramizanning aldinqi 10 künide élin'ghan bu tedbirning déhqanlarning diniy pa'aliyetlirini közitish we chekleshni hem terbiye qilishni meqset qilidighanliqini yoshurup qalalmidi.

Qaraqashtiki bir déhqan ramizan bashlanmay turupla özining öyide bir emes‏, bir nechche kadirning almiship turuwatqanliqini we déhqanlar bu tüzümge mejburiy köndürülüwatqanliqini ipadilidi.

Toluq bet