Сиясий вәзийәт қәшқәр бәшкерәмдә 32 миң мо бағниң үзүм содисини суға чилаштурған

Мухбиримиз шөһрәт һошур
2017.12.01
shayar-yepiq-terbiyelesh-orni.jpg Уйғур районидики тәрбийәләш мәркәзлириниң бири. 2016-Йили яз, шаяр.
Oqurmen teminligen

Йеқинда үндидарда тарқалған бир мураҗиәтнамидә қәшқәр бәшкерәмдә үзүм содигәрлири азийип кәткәнлики үчүн 10 миң мо бағдики үзүмниң сетилмай бесилип қалғанлиқи тилға елинған вә уйғур аптоном райониниң ичи-сиртидики мевә-чевә содигәрлирини бу үзүмләрни бир тәрәп қилиш үчүн ярдәмгә чақирилған иди. Мухбиримизниң бу һәқтики ениқлашлири давамида, қәшқәр бәшкерәмдә растинила зор миқдарда үзүмниң бесилип қалғанлиқи вә бир қисминиң сесиғанлиқи, буниңға 19 ‏-қурултай вә “йепиқ тәрбийиләш мәркәзлири” ниң сәвәб болғанлиқи айдиңлашти.

Үндидарда тарқалған мәзкур мураҗиәттә, қәшқәр бәшкерәм аһалилириниң асаслиқ кириминиң үзүм содиси икәнлики әскәртилгән вә әгәр бу үзүмләр сетилмиса, аһалиләрниң турмушиға еғир тәсир көрситидиғанлиқи тәкитләнгән. Қәшқәр бәшкерәмдики аһалиләрдин бири, өзиниң 5 пуң йеридики үзүминиң сетилмай бесилип қалғанлиқини ашкарилиди. Униң йәнә баян қилишичә, бу йил бәшкерәмдә көп сандики кишиләр үзүмини саталмиған. Буниңға бир тәрәптин мәһәллидә үзүм сатидиған тиҗарәтчиләрниң йоқ болуши сәвәб болған болса, йәнә бир тәрәптин, 19‏-қурултай сәвәблик кишиләрниң мәһәллидин сиртқа чиқалмаслиқи сәвәб болған.

Бәйду учур амбирида көрситилишичә, бәшкерәм йезисиниң ишләпчиқириши бағвәнчиликни асас қилиду. Бағвәнчиликтә болса асаслиқ, үзүм, әнҗүр вә қара өрүк йетиштүрүлиду. 2003‏-Йили бәшкерәмдә бағвәнчилик көлими 43 миң моға йетип, йеза терилғу йериниң 95 пирсәнтини игилигән. 36 Миң нопуслуқ бәшкерәм йезисида үзүм содиси бу йил суға чилашқан. Бәшкерәмниң аяғ сайбағ кәнтиниң аманлиқ мудири, нөвәттә бәшкерәмдә көрүлгән үзүмләрниң бесилип қелиш әһвалини йошурмиди. Бәшкерәм йеза ават кәнтиниң аманлиқ мудириму үзүм содисиниң еғир дәхлигә учришиға мәһәллидә әр әмгәк күчиниң аз қелиш, җүмлидин үзүм тиҗарәтчилири қалмаслиқ әһвалиниң сәвәб болғанлиқини ашкарилиди. 

Хитайниң соху торида бу йил бәшкерәмдә 32 миң мо бағда үзүм йетиштүрүлгәнлики вә үзүмдин мол һосул елинғанлиқи хәвәр қилинған. Әмма үзүмләрниң сетилмай бесилип қалғанлиқи вә бир қисминиң сесиғанлиқи тилға елинмиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.