Uyghurlarning yéqin ikki dosti türkiye bash ministirining bash meslihetchilikige teyinlendi

Ixtiyariy muxbirimiz erkin tarim
2016.01.06
omer-faruq-qorqmaz.jpg Türkiye jumhuriyiti bash ministiri exmet dawut'oghli bash meslihetchi qilip teyinligen diniy ilimler mutexessisi we insan heqliri pa'aliyetchisi tetqiqatchi ömer faruq qorqmaz ependi. 2016-Yili yanwar, türkiye.
RFA/Erkin Tarim

Türkiye jumhuriyiti bash ministiri exmet dawut'oghli yéqinda meslihetchilirini almashturghan bolup ömer faruq qorqmaz qatarliq 9 kishini bash meslihetchi qilip yéngidin teyinligen.

Bash ministirning yéngidin teyinlen'gen bash meslihetchiliri türkiye gézitide bügün élan qilindi. Meslihetchiler arisida yazghuchi we oqutquchi sulayman seyfi, edebiyatshunas iskender pala, sabiq parlamént ezasi muhsin qizil qaya, yilmaz ensar'oghli, xelq'ara munasiwetler mutexessisi mustafa shen ependi, diniy ilimler mutexessisi we insan heqliri pa'aliyetchisi tetqiqatchi ömer faruq qorqmaz ependi, nejdad su bashi, parlamént ezasi exmet doghan qatarliqlar bar.

Saylamdin ilgiri waqitliq qatnash ministiri bolghan feridun bilgin qatarliq 9 kishi bash ministirning yéngi bash meslihetchiliri bolup wezipige teyinlen'gen idi.

Bularning ichide ömer faruq qorqmaz ependi bilen mustafa shen ependiler Uyghurlarning ehwalini yaxshi bilidighan Uyghur mesilisige yéqindin köngül bölüp kéliwatqan Uyghurlarning semimiy dosti bolup ular her da'im Uyghurlarning pa'aliyitige aktip qatniship Uyghurlar duchar boluwatqan insan heq we hoquqliri depsendichiliki toghrisida tetqiqatlar élip barghan idi.

Ömer faruq qorqmaz ependi bilen faruq shen ependi uniwérsitét oqughuchisi bolghan waqtidin tartip türkiyediki ammiwi teshkilatlarda kéyinche siyasiy partiyelerde aktip wezipe ötep kelgen bolup her yili dégüdek türkiyede Uyghurlar toghrisida chaqirilghan yighinlargha qatniship yighinda Uyghur teshkilatlirining we pa'aliyetchilerning ghayide birlishishi, Uyghurlar duchar boluwatqan insan heqliri depsendichilikini qandaq qilip islam dunyasigha anglitish toghrisida doklatlar bergen idi.

Ömer faruq qorqmaz ependi pakistan islam'abadtiki xelq'araliq islam uniwérsitétining islam dini fakultétida dinlar tarixi saheside oqughan we magistirliqnimu shu mektepte püttürgendin kéyin türkiyege qaytip kélip enqerede “Dinlar tarixida bügünki zerdushluq” dégen tetqiqat maqalisi bilen doktorluq unwanigha érishken. Kéyin bir mezgil siwas uniwérsitétida oqutquchiliq qilghan.

Uyghurlarning yéqin ikki dostining türkiye bash ministiri exmet dawut'oshluning bash meslihetchisi bolushi türkiyediki Uyghurlarni qattiq söyündürdi. Uning üstige bu ikki kishining insan heqliri pa'aliyetchisi bolushining Uyghurlargha qandaq paydisi bolar? dégen'ge oxshash so'allargha jawab tépish üchün türkiye sütchü imam uniwérsitéti oqutquchisi doktor alimjan bughda we sherqiy türkistan ma'arip we hemkarliq jem'iyiti bash katipi ablet ependiler bilen téléfon söhbiti élip barduq.

Doktor alimjan bughda ependi türkiye bash ministirining bash meslihetchisi bolup teyinlen'gen ömer faruq qorqmaz ependining pakistanda oquwatqan waqtidin tartip Uyghurlar bilen ariliship ötken, Uyghur mesilisini yaxshi bilidighan bir kishi ikenlikini, bundaq bir kishining bash ministir meslihetchisi bolup teyinlen'genlikining Uyghur mesilisi üchün ijabiy rol oynaydighanliqini bayan qildi.

U, türkiye-xitay munasiwitide Uyghur mesilisining dawamliq kün tertipke kéliwatqanliqini emma xitay hökümitining dawamliq halda türkiye hökümitige yalghan melumat bériwatqanliqini, Uyghur mesilini yaxshi bilidighan birining bash ministirning yénida bolushining Uyghur dewasi üchün paydiliq bolidighanliqini bayan qildi.

Istanbulda pa'aliyet élip bériwatqan sherqiy türkistan ma'arip we hemkarliq teshkilati bash katipi ablet ependi ömer faruq qorqmaz ependining türkiye bash ministiri bash meslihetchisi bolup teyinlen'genlikidin intayin xursen bolghanliqini bayan qildi.

U, bu kishining türkiye -xitay munasiwitide Uyghur mesilisige ijabiy tesir körsitidighanliqini bayan qildi.

Hazirqi yéngi hökümet 4 yil türkiyeni idare qilidighan bolup, bu 4 yil ichide türkiye-xitay munasiwitide Uyghur mesilisining qandaq tereqqiy qilidighanliqi kishilerning diqqitini tartmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.