Sékrétar: atushta pasport bérilishte 3 ewlad siyasiy arqa körünüsh tekshürülidu

Muxbirimiz shöhret hoshur
2017-04-10
Élxet
Pikir
Hembehr
Print
  • Print
  • Hembehr
  • Pikir
  • Élxet
Uyghurlarning pasport élish üchün zörür bolghan tamghilar.
Uyghurlarning pasport élish üchün zörür bolghan tamghilar.
RFA/Erkin Tarim

Yéqinda atushning siyasiy weziyiti heqqide radiyomizgha yollan'ghan mektupta atushtiki da'irilerning pasport ishleshte 3 ewlad siyasiy arqa körünüshni tekshürüwatqanliqi, üch ewladning herqandaq biride mesile körülgenlerge pasport bérilmeywatqanliqi pash qilin'ghan idi. Muxbirimizning bu heqtiki éniqlishi dawamida, atushning yuqiri ishtachi kentide yéqinda 280 pasport yighiwélin'ghanliqi we yighiwélin'ghan pasportlarni qayta bérishte, a'iliside 3 ewlad kishiler arisida siyasiy mesile körülmigen bolush shert qilin'ghanliqi delillendi.

Radi'omizgha kelgen mektupta, yéqinda atushta, chetelde tijaret qiliwatqanlarni der hal qaytip kélishke ündigen bir uqturush tarqitilghanliqi we alaqidar a'ililerning a'ile ezalirini qayturup ekélish heqqide bésimgha uchrawatqanliqi bayan qilin'ghan idi. Éniqlishimiz dawamida, kent sékrétari bundaq bir mejburlashning bolghanliqini ret qilghan bolsimu, emma 280 kishining pasporti yighiwélin'ghanliqini yoshurmidi. Uning déyishiche kent boyiche pasporti barlarning hemmisining dégüdek pasporti yighiwélin'ghan. Bularning ichide peqet siyasiy arqa körünüshide mesile bolmighan az sandiki kishilerge pasporti qayturup bérilgen.

Mektupta bayan qilinishiche, atushta chetelde tijaret qiliwatqanlarning köpinchisi chégridash qirghizistanda tijaret qilidu, pasportining yighiwélinishi, yalghuz ularni qiliwatqan tirikchilik yolidinla emes, belki hayati boyi yighqanliri, yeni pütün mal- bisatidin ayrip tashlighan. Sékrétar, öz kentidiki tijaretchilerning tajikistanda tijaret qilidighanliqi we tijaritining pesillik ikenliki, shunga pasport yighiwélinishta ularning iqtisadiy jehettin unchiwala zerbige uchrimighanliqini ilgiri sürdi.

Yene mektupta bayan qilinishiche, nöwette atushta, yashta 55din ashqanlar salametliki seweb körsitilip, 18din töwenler oqush yéshi bahane körsitilip, 18 bilen 45 yash arisidikiler siyasiy heriketlerge qétilip qélish éhtimali közde tutulup pasport iltimasi ret qilinmaqta. Kent sékrétari bu mektuptiki bu bayanlarningmu asassiz emeslikini delillidi.

Mektupta yene atushta yolgha qoyulghan 3 ewlad siyasiy arqa körünüsh tekshürülüsh shertining, mahiyette uyghurlargha pasport bérilmeslik sherti ikenlikini, chünki nöwette mutleq köp sandiki kishilerning jümlidin yéza ahalilirining chetelge chiqishqa iqtisadiy shara'iti yar bermeydighanliqini, bu jehette imkan yar bergen az sandiki kishilerge 3 ewlad siyasiy arqa körünüsh sherti qoyulush bilen, uyghurlar arisida pasport élishqa layaqetlik kishilerning asasen dégüdek qalmighanliqini ilgiri sürülgen.

Emma mektupta, 3 ewlad siyasiy arqa körünüsh tekshürülüsh shertining konkrét qandaq shert ikenliki tilgha élinmighan؛ emma ilgiriki jemiyet xewerliride, mehbuslar a'ile-tawabi'atigha 3 ewladqa qeder pasport bérilmeydighanliqi tilgha élin'ghan idi. Mektuptin hem éniqlishimizdin bu shertning yalghuz atushta yaki uyghur rayoni boyiche omumyüzlük yolgha qoyuluwatqanliqi téxi aydinglashmidi.

Yuqiridiki awaz ulinishidin muxbirimizning bu heqte teyyarlighan programmisining tepsilatini anglighaysiler.

Toluq bet