Yopurghidiki bir kentte téléfonidin sezgür uchurlar bayqalghan 53 kishi tutup soraq qilinmaqta

Muxbirimiz shöhret hoshur
2017-08-07
Élxet
Pikir
Hembehr
Print
  • Print
  • Hembehr
  • Pikir
  • Élxet
Sheher puqralirining yanfonlirini tekshüriwatqan saqchilar. Ürümchi. 2017-Yili iyul.
Sheher puqralirining yanfonlirini tekshüriwatqan saqchilar. Ürümchi. 2017-Yili iyul.
Social Media

Muxbirimizning misirdin qaytqan oqughuchi we ularning aile-Tawabiatining ehwali heqqide élip barghan éniqlashliri dawamida, yopurgha yekshenbe bazardiki bir kentning özidinla 53 kishining téléfonida sezgür uchurlar yeni atalmish qanunsiz uchurlar bayqalghanliqi üchünla tutulghanliqi we soraq qiliniwatqanliqi ashkarilandi.

Ashkarilinishiche, tutulghanlarning köpinchisi déhqanlar bolup, ular xitayche xet bilmigenliki üchün téléfon qollanghanda diqqetsizliktin cheklengen uchurlargha baghlinip qalghan. Shundaq turuqluq, déhqanlar jazadin xali bolalmighan. Melum bolushiche, téléfonini xata qollanghanliqi üchün tutup soraq qiliniwatqanlar ichide, yéqinda misirdin qaytip kelgen oqughuchi imamhüsenningmu dadisi bar iken.

Uchurlardin melum bolushiche, dunyada insanlarning turmushigha ghayet zor qolayliqni ata qilghan eqilliq téléfonlar, uyghur rayonida az bolmighan birqisim ahalilerge chong awarichilik hetta palaketlerni élip kelgen. Bu ehwal xitayda uchur bixeterlik tedbirliri kücheygen yéqinqi aylarda téximu shundaq bolghan. Yopurgha nahiye yekshenbebazar 3-Kent amanliq mudirining pash qilishiche, mezkur kentte nöwette téléfonidin sezgür uchurlar bayqalghan 53 kishi tutup soralmaqta. Uning déyishiche, alaqidar organlar bu yil 1-Aydin bashlap bir qisim téléfonlarni mulazimettin toxtatqan. Téléfon sahibliri deslepte buning sewebini bilelmigen. Yéqinda saqchilar téléfoni toxtitilghan kishilerni soraq qilip, ularning bezilirini qamaqqa alghan, bezilirini terbiyilesh merkizige ewetken, bezilirini bolsa dawamliq halda soraq qilmaqta. Beziliri bolsa soraq qilinish üchün öchiret saqlimaqta.

Mezkur kentte téléfonini xata ishletkenliki seweblik béshigha awarichilik kelgen kishilerning sani jemiy 53 neper bolup, bularning ichidiki 5 oqughuchi we bir oqutquchi kent mesulliri teripidin képillikke élip chiqilghan. Melum bolushiche, bularning ichide téléfonini xata qollanghanlar, yeni hökümet chekligen uchurlarni körgen yaki qachilighanlarning köpinchisi déhqanlar, uchur we matériyallar xitayche bolup, kent amanliq mudirining déyishiche, mezkur déhqanlar eslide xitay tili bilmesliki seweblik bu uchurlarni chüshinish iqtidarighimu ige emes. Ularning téléfonining atalmish qanunsiz uchurlargha baghlinip qélish sewebi bir tasadipiyliq yaki diqqetsizlik.

Ashkarilinishiche, yuqiriqi kentte téléfoni chetelge urulghanliqi üchün toxtitilghan we soraqqa tartiliwatqanlar ichide bu yil 2-Ayda misirdin qaytip kelgen oqughuchi imamhüsenning dadisimu bar. Uning hökümetning buyruqini qobul qilip oghli imamhüsenni misirdin qayturup ekélishimu, uni jaza we soraqtin qutuldurup qalalmighan. U dawamliq soraq qilinmaqta. Melum bolushiche, imamhüsen misirda xitay dairilirining testiqisiz turghinidin bashqa, yene téléfonni atalmish qanunsiz qollanghanliqiningmu hésabini bermekte.

Ilgiriki éniqlashrimiz dawamida, qaghiliqning bir yézisidiki kent sékrétarimu ahalilerni awarichiliktin uzaq turush, bolupmu yashlarni eqilliq téléfon ishletmeslik heqqide agahlandurghanliqi we buning netijiside kentte eqilliq téléfon qollanghuchilarning asasen qalmighanliqini bayan qilghan.

Muhajirettiki uyghur közetküchilerning beziliri, uyghur rayonida 5-Iyul namayishining asasen qol téléfonigha tayinip teshkillengenlikini, shunga dairilerning yene hakimiyetke qarshi weqe chiqishning aldini élip, qol téléfonni qattiq kontrol qilghanliqini ilgiri sürse, yene beziler, rayonida dawam qiliwatqan siyasiy we diniy basturush heriketliride asasiy qatlamdiki bixeterlik xadimlirining wezipe orundash üchünla, yuqiridikige oxshash téléfonini diqqetsiz qollanghanlarnimu tutuwatqanliqini we soraq qiliwatqanliqini ilgiri sürmekte.

Yuqirida yopurgha yekshenbe bazar 3-Kentide köpinchisi déhqanlardin bolghan 53 kishining téléfonini atalmish qanunsiz qollanghanliqi üchün tutqun qilinghanliqi heqqide anglitish berduq.

Toluq bet