Гумадики мукапатланған сақчи абдуреһим төмүр: “14-феврал вәқәсидә хизмәт көрсәттим”

Хитай таратқулири алдинқи күни хитай җ х министирлиқиниң уйғур райониниң сақчи саһәсидики 18 коллектип вә 37 шәхсни мәмликәт бойичә хизмәт көрсәтти дәп мукапатлиғанлиқини хәвәр қилди. Мухбиримиз бүгүн бу йип учиға асасән, мукапатланғанлар тизимликидики гума наһийә чода сақчиханисиниң муавин башлиқи абдуреһим төмүрниң кимлики вә қилмиши һәққидә мәлумат игилиди. Мухбиримизниң телефонини қобул қилған абдуреһим төмүр өзиниң 2015‏-йили гумида йүз бәргән әмма, хитай дуняға ашкарилимиған “14-феврал вәқәси” дә хизмәт көрсәткәнликини ашкарилиди.

Биз, абдуреһим төмүрниң кимлики вә қилмиши һәққидә мәлумат елиш үчүн, гума наһийәсидики һәрқайси сақчиханиларға телефон қилдуқ. Телефонимизни қобул қилған сақчи хадимлириниң көпинчиси абдуреһим төмүрниң иш-излирини өгиниватқанлиқини ейтқан болсиму, әмма униң конкрет қайси ишини яки қайси тәрипини өгиниватқанлиқини дәп берәлмиди.

Зияритимизни толиму ойлишип қобул қилған абдуреһим төмүр, өзиниң 2015-йили йүз бәргән “14-феврал вәқәси” дә хизмәт көрсәткәнликини ашкарилиди. Әмма у, 14-феврал дәп аталған бу вәқәниң қайси вәқә икәнлики вә у вәқәдә өзиниң қандақ рол ойниғанлиқи һәққидә җаваб беришкә җүрәт қилалмиди.

Тордики хәвәр архиплириға қариғинимизда, гума наһийисидә 14-феврал вәқәси намида пәқәт бу йил 2-айда йүз бәргән пичақлиқ һуҗум һәққидә көплигән хәвәрләр көрүлиду, әмма 2015-йили гума наһийисидә 14-феврал вәқәси намида бир вәқәниң йүз бәргәнлики һәққидә һечқандақ учур мәвҗут әмәс. Әгәр абдуреһим өмүрниң бүгүнки баянида бир езиш болмиған болса, хитайниң 2015-йили гумида йүз бәргән йәнә бир чоң вәқәни дунядин йошурғанлиқ еһтималлиқи ашкарилиниду.