Yawropa parlaménti wekili d u q ni ziyaret qildi

Ixtiyariy muxbirimiz ekrem
2016.05.09
yawropa-parlamenti-barbara-lohbihler-duq-ziyaret.jpg Yawropa parlaménti kishilik hoquq komitétining mu'awin re'isi barbara lohbihlér xanim d u q ni mexsus ziyaret qildi. Sürette: ongdin solgha esqerjan, barbara lohbihlér, dolqun eysa we enwerjan. 2016-Yili 6-may, myunxén.
RFA/Ekrem

6-May yawropa parlaménti kishilik hoquq komitétining mu'awin re'isi barbara xanim d u q ni mexsus ziyaret qilip, Uyghurlar mesilisi toghriliq söhbet élip bardi.

D u q bash shtabida 6-may ötküzülgen bu söhbetke yawropa parlaménti kishilik hoquq komitétining mu'awin re'isi barbara xanim we uning katipi, qurultay rehberliridin dolqun eysa, eniwerjan, esqerjan, pétér qatarliq kishiler qatnashti. Söhbette Uyghurlarning kishilik heq-hoquqigha da'ir mesililer omumyüzlük tilgha élindi.

D u q rehberlirining bildürüshiche, yawropa parlaméntining orunlashturushigha bina'en 6-may küni alayiten bélgiye paytexti biryusséldin myunxén'gha kélip d u q bash shtabini ziyaret qilghan barbara lohbihlér xanim 2009-yilidin 2014-yilighiche yawropa parlaménti kishilik hoquq komitétining re'islikini ötigen, 2014-yilidin hazirgha qeder mezkur komitétning mu'awin re'islikini ötep kéliwatqan meshhur diplomat bolupla qalmay, u yene yawropa parlaménti yéshillar partiyisining tashqi ishlar bayanatchisi wezipisinimu ötimektiken. U eslide bawariye yéshillar partiyisining yawropa parlaméntidiki wekili bolup hésablinidiken.

Barbara lohbihlér xanimning d u q bash shtabini ziyaret qilishtiki meqsitining Uyghurlar toghriliq qurultay rehberliridin biwasite melumat élish ikenlikini eskertken qurultay mu'awin re'isi esqerjan ependi izahat bérip, uning ilgiri yawropa parlaméntida Uyghurlar toghriliq qarar qobul qilish ishliridimu zor hessisi bolghanliqini tekitlidi.

Yawropa sherqiy türkistan birliki teshkilatining re'isi, ilham toxti guruppisining mes'uli eniwerjan ependi bu heqte ziyaritimizni qobul qilghanda, aldi bilen bu qétimqi söhbetning ehmiyitini tilgha aldi. U sözide, söhbet jeryanida Uyghurlarning insan heqliri depsendichilikige a'it köpligen mesililerni barbara lohbihlér xanimgha etrapliq chüshendürüshke térishqanliqini qeyt qildi.

D u q ijra'iye komitéti re'isi dolqun eysa ependi bolsa aldi bilen bu qétimqi söhbette otturigha qoyulghan mesililerni tilgha élip ötti. U sözide yene, bu qétimqi söhbetning Uyghur dewasini yawropa parlaméntida küchlendürüsh nuqtisidin köp ehmiyetke ige ikenlikini tekitlidi.

Enwerjan ependi barbara xanimning biryusséldin d u q bash shtabigha kélip Uyghur teshkilat rehberliri bilen mexsus söhbet élip bérishini bolsa, yawropa birlikining Uyghurlar mesilisige alahide köngül bölüshke bashlighanliqining béshariti teriqiside chüshinishke bolidighanliqini tilgha aldi.

Bu qétimqi söhbet d u q ishxanisida 6-may chüshtin kéyin sa'et 14:00 te bashlinip sa'et 15:00 etrapida axirlashti. Söhbettin kéyin barbara lohbihlér xanim d u q rehberliri bilen xatire süretke chüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.