Кәнт аманлиқ мудири: «чәтәлгә чиқип киргәнләр зәһәрлиниду, тәрбийәлишимиз шәрт»

Мухбиримиз шөһрәт һошур
2017-10-02
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Түрмигә елип кириливатқан уйғур сийасий мәһбуслар.
Түрмигә елип кириливатқан уйғур сийасий мәһбуслар.
Social Media

Мәлум болушичә, уйғур аптоном районидики даириләр йеқинқи айларда чәтәлдә сайаһәт қилип киргәнләрни өзини мәлум қилишқа буйруған вә өзини мәлум қилғанларниң кәңчилик билән бир тәрәп қилинидиғанлиқини уқтурған иди. Әмма ениқлишимиз давамида корланиң қара йулғун йеза арабуғра кәнтидин илгири чәтәлгә сайаһәткә чиққан 13 киши өзлирини мәлум қилған болсиму, йәнила «йепиқ тәрбийәләш мәркизи» гә қамап қойулған. Зийаритимизни қобул қилған бир кәнт секретари чәтәлгә чиққанларниң идийә җәһәттин зәһәрлинидиғанлиқини, шуңа тәрбийәлинишиниң шәрт икәнликини илгири сүрди.

Уйғур районидики даириләр бу йилниң бешида чәтәлдә оқуватқан оқуғучиларни йуртиға қайтишқа буйруш билән бирликтә, йәнә чәтәлдә сайаһәттә болуп кәлгәнләрниму өзини мәлум қилишқа буйруған. Әң йеқинда ашкариланған бир уқтурушта өзини мәлум қилғучиларға кәңчилик қилинидиғанлиқи әскәртилгән.

Игилишимизчә, даириләр вәдисидә турмиған. Чәтәлгә сайаһәткә чиқипла киргән һәрқандақ бир уйғурни «тәрбийәләш мәркизи» гә апарған вә «мәсилә тапшуруш» қа қистиған. Корла шәһиригә қарашлиқ қара йулғун йезисиниң ара буғра кәнтидә түркийә қатарлиқ дөләтләргә сайаһәткә берип кәлгән 13 киши тутқун қилинған вә «тәрбийәләш мәркизи» гә апирилған.

Арабуғра кәнт секретари, чәтәлгә чиқип киргәнләрдин шикайәт қилип мундақ дәйду: «булар чәтәлгә чиқип кирип раст гепини демәйду. У йәрниң йаман тәрәплирини тилға алмастин, йахши тәрәплирини махтишиду. Өзлириниң бешидин кәчүргән йаман күнлирини йошуриду, бу арқилиқ чүшиниш сәвийиси йетәрлик болмиған пуқраларни қаймуқтуриду».

Бу секретар йәнә чәтәлгә чиқип киргән сайаһәтчиниң чоқум бәлгилик дәриҗидә йаман идийә билән йуқумлинидиғанлиқини вә шу сәвәбтин аз дегәндә 15 күн тәрбийәлиниши шәрт икәнликини илгири сүрди. Әмма ашкарилинишичә, мәзкур кәнттики сабиқ сайаһәтчи икки ай аввал «тәрбийәләш мәркизи» гә апирилған болсиму, техичә қойуп берилмигән؛ уларниң ичидики өз алдиға сайаһәт қилғанлириму, сайаһәт ширкитиниң йетәкчиликидә сайаһәт қилғанлириму охшашла аталмиш тәрбийәлиниш қисмитидин халий болалмиған.

Мәлум болушичә, корланиң қара йулғун йеза арабуғра кәнтидә тутуп турулуп тәрбийәлиниватқан 80 нәччә кишидин 13 нәпири сабиқ сайаһәтчи؛ корла бойичә «йепиқ тәрбийәләш мәркизи» гә йиғивелинған 2100 чә киши ичидә қанчә нәпәр сабиқ сайаһәтчи барлиқи мәлум әмәс.

Пикирләр (0)
  • Принт
  • Һәмбәһр
  • Елхәт
Толуқ бәт