Yerlik dairiler: ahalilerning 40% ni qayta terbiyilesh heqqide uqturush bar

Muxbirimiz shöhret hoshur
2017-10-03
Élxet
Pikir
Hembehr
Print
  • Print
  • Hembehr
  • Pikir
  • Élxet
Héytgah jamesige héyt namizi ötüsh üchün mangghan uyghurlar we charlawatqan xitay saqchiliri. 2017-Yili 26-Iyun, qeshqer.
Héytgah jamesige héyt namizi ötüsh üchün mangghan uyghurlar we charlawatqan xitay saqchiliri. 2017-Yili 26-Iyun, qeshqer.
AFP

Uyghur rayonidiki yépiq terbiyilesh merkezliri heqqide ehwal éniqlashlirimiz dawamida bir qisim yerlik dairiler ahalilerning 40% ni qayta terbiyilesh heqqide uqturush barliqini tilgha aldi. Qaraqash nahiyisining aqsaray yéza bash yulghun kent amanliq mudiri özlirige yuqiridin chüshürülgen ahalilerni qayta terbiyilesh wezipisining 40% ikenlikini, özlirining hazirgha qeder bu wezipini 15% orunlighanliqini bildürse, qara jilgha kent sékrétari, özining bu wezipini emdila 4% orunlighanliqini bildürdi. Peyziwat shaptul saqchixanisining xadimi qayta terbiyileshning san wezipisi heqqide melumati yoqluqini, emma tutqun qilinghanlarning 80% ni jazalash heqqide uqturush barliqini bayan qildi.

Xitay dairiliri bu yil kirgendin buyan herqaysi jaylarda échilghan yépiq terbiyilesh merkezlirini keng kölemde kéngeytken, bezi jaylarda her ikki ailidin bir kishini qamaqqa alghan, bezi mehellilerde öy basturup adem tutqan, bezi aililerdin er-Ayal yaki qérindashlar bolup 5-6 Din kishini tutqun qilghan bolsimu, emma bu daghdughiliq we keng-Kölemlik herikitini heqqide hazirgha qeder héchqandaq bir ashkara höjjet yaki axbarat tarqatmidi. Eksiche, bir tereptin xelqaragha uyghur rayoni weziyitining tinch we ittipaqliqini teshwiq qilsa, yene bir tereptin, bu weziyetni ashkarilighan xewer we pakitlarni inkar qilmaqta. Hetta dairiler kishilerning béshigha qara xalta kiydürülüp ekiliniwatqan, bu yépiq terbiyilesh merkezlirini, «kespiy iqtidar yétildürüsh merkizi», «puqralar mektipi» dégendek namlar bilen orunning esli mahiyitini yoshurmaqta. Biz yépiq merkezler heqqidiki éniqlashlirimiz dawamida, ijraatni élip bériwatqan dairilerning, resmiy höjjet we uqturushliri heqqide melumat élishqa tirishtuq. Yerlik dairiler, bu heqte özlirining resmiy qizil bashliq bir höjjetni körmigenlikini, emma yéza we nahiyede échilghan yighinlarda, aghzaki uqturush arqiliq özlirige ahalilerning 40% ni qayta terbiyilesh heqqide wezipe chüshürülgenlikini ashkarilidi.

Melum bolushiche qaraqash nahiye aqsaray yéza bash yulghun kentide hazirgha qeder 82 kishi terbiyilesh merkizige ewetilgen, 61 kishi qamaqqa höküm qilinghan. Kent sékrétari bu heqtiki söhbitimiz dawamida, özlirining qayta terbiyilesh wezipisini, yuqiri derijilik orunlar kütken derijige élip baralmighan bolsimu, emma bashqa kentlerge nisbeten, wezipisini yaxshi orunlighanliqini, yeni ahaliler nopusining 15% ni terbiyilesh merkizi we türmige yolgha salghanliqini bayan qildi.

Aqsarayning qara jigha kent sékrétarining bayanliridin melum bolushiche, qara jilghindin hazirgha qeder 84 kishi tutulghan we késilgen؛ kentning nopusi 1956 bolup, mezkur wezipini orunlishining 4% gimu yetmigenlikini tilgha alghan kent sékrétari, özining nöwette bu jehette béshi qétiwatqanliqini ipadilidi.

Peyziwatning shaptul saqchixana xadimi, özining qanchilik adem tutush heqqide bir höjjet yaki uqturush tapshuruwalmighanliqi, emma esebiylik alamiti bar birmu kishining tutqunning sirtida qalmasliq, tutulghanlarning 80% ni choqum jazalash heqqide bir saqchi sahesining yighinida mexsus xewerlendürülgenlikini ashkarilidi. Bu saqchi xadimi yene özi tewe kenttin hazirgha 46 kishini tutqanliqi, buning 33 ning késilgenliki, 13 ning bolsa qayta terbiyede ikenlikini melum qildi.

Yuqirida, uyghur rayonining bezi jaylirida ahalining 40% ni qayta terbiyilesh heqqide uqturush chüshürülgenliki heqqide anglitish berduq.

Toluq bet