Или деһқанлири йәрләрни қайта тизимлашниң давамлишиватқанлиқини билдүрди

Мухбиримиз меһрибан
2017-09-26
Елхәт
Пикир
Һәмбәһр
Принт
  • Принт
  • Һәмбәһр
  • Пикир
  • Елхәт
Қәшқәр нәзәрбағ йеза қазриқ кәнтидики уйғур деһқанларниң қолдин кәткән йәрлирини қайтурувелиш йаки төләм елиш үчүн йазған йүзлигән әрзлиридин бир өрнәк.
Қәшқәр нәзәрбағ йеза қазриқ кәнтидики уйғур деһқанларниң қолдин кәткән йәрлирини қайтурувелиш йаки төләм елиш үчүн йазған йүзлигән әрзлиридин бир өрнәк.
Social Media

Йеқинда хитай йеза-Игилик министирлиқи «йезилардики һөддә йәрләрниң һоқуқ тәвәликини бекитиш уқтуруши» ни елан қилип, бундин кейин терилғу йәрләрниң деһқанларниң «муқим мүлки» гә айлинидиғанлиқини билдүргән. Мәлум болушичә, нөвәттә уйғур дийариниң җәнуп-Шималидики йезиларда деһқанларниң йәрлирини қайта тизимлаш иши җиддий давамлашмақтикән. Көзәткүчиләр, уйғур деһқанлириниң терилғу йәрлири «тәрәққийат райони» дегән намда хитай ширкәтлиригә мәҗбури сетип берилгән, көп қисим уйғур деһқанлири йәрсиз қелип «йалланма әмгәк күчи» гә айланған бир шараитта, хитайниң бу сийасәтни оттуриға чиқиришидин қаттиқ әндишә һес қилмақта.

«Шинҗаң гезити» ниң бу йил 1-Апирилдики хәвиридә уйғур аптоном районидики деһқан-Чарвичилар һөддигә алған терилғу йәрләрниң һоқуқ тәвәлики бекитилип, йәр кинишкиси тарқитилидиғанлиқи елан қилинған иди.

Мәзкур хәвәрдә йәнә 2011-Йилидин 2014-Йилиғичә болған арилиқта йезилардики терилғу йәрләрниң һоқуқ тәвәликини бекитип ройхәткә алдуруш хизмитиниң санҗи, манас, бортала вә ақсу қатарлиқ 9 җайда синақ қилинғанлиқи тилға елинған.

Радийомиз зийаритини қобул қилған деһқанларниң билдүрүшичә, или дийарида деһқанларниң терилғу йәрлирини тизимлаш иши бу йил әтийазда башланған икән.

Бу һәқтики тәшвиқат хәвәрлиридә бу қетимқи йәр тизимлашниң 2018-Йилиниң ахириғичә тамамлинидиғанлиқи тилға елинған. Әмма уйғур аптоном райониниң бәзи районлиридики терилғу йәрләрниң һоқуқ тәвәликини бекитиш хизмитиниң 2019-Йили йеңи йилғичә тамамлинидиғанлиқи мөлчәрләнмәктикән.

Хәвәрдә йәнә йәрләрниң һоқуқ тәвәликини бекитиштики мәқсәт изаһлинип, йиллардин буйан йәрниң һоқуқ тәвәлики ениқ болмаслиқ сәвәбидин келип чиққан маҗираларни йахши бир тәрәп қилиш вә алдини елиш үчүн бу сийасәт йолға қойулғанлиқи тәкитләнгән.

Ғулҗа наһийисидин зийаритимизни қобул қилған деһқанларниң билдүрүшичә, 2009-Йилдин 2012-Йилғичә ғулҗа наһийисидә давамлашқан чиңхва көмүр ширкити қатарлиқ хитай ширкәтлириниң йәр игиләш һәрикитидә деһқанларниң йәрлири мәҗбури сетивелинған икән.

Илгири өз кимликини ашкарилимаслиқ шәрти билән зийаритимизни қобул қилған бир ханимниң билдүрүшичә, 2010-Йили ғулҗа наһийисидики пиличихаң көмүр кени бейҗиң чиңхва көмүр ширкитигә өткүзүп берилгән. Шундин кейин, мәзкур көмүркан җайлашқан пәнҗим йезисиниң йуқириқи қисмидики қарийағач кәнтидә бақмичилиқ билән шуғуллинидиған қазақ чарвичилар билән бир қисим уйғурлар пүтүнләй көчүрүветилгән икән.

Шаһитларниң билдүрүшичә, тағдики йайлақлири билән бақмичилиқидин айрилған чарвичилар вә бир қисим уйғур деһқанлири нөвәттә йәрсиз қалған. Уларниң йәрлири мәҗбурий сетилғанда еришкән азғина пуллириму хәҗлинип түгигән. Нөвәттә бәзи деһқан-Чарвичиларниң күндилик турмушини қамдишиму зор бир мәсилигә айланған икән.

Зийаритимизни қобул қилған бир ханим, ғулҗа наһийәсиниң пәнҗим, чолуқай қатарлиқ йезилиридики деһқанларниң көп қисим терилғу йәрлири билән мевилик бағлириниң игидарчилиқ һоқуқидин аллиқачан айрилип қалғанлиқини, уйғур деһқанлири йәрдин айрилғандин кейин чиқирилған бу сийасәтниң или деһқанлириға һәқиқий мәнпәәт елип келишигә гуман билән қарайдиғанлиқини билдүрди.

Ақсу шәһәрлик йеза һәмкарлиқ игиликини башқуруш идарисиниң башлиқи шйав чүнлин илгири «шинҗаң гезити» ниң зийаритини қобул қилғинидиму йеридин айрилип қалған деһқан-Чарвичилар мәсилисиниң еғирлиқини тилға алған иди.

Биз нөвәттә уйғур елида давамлишиватқан терилғу йәрләрни қайта тизимлаш шундақла йеңи йәр хетидики йәрниң игилик һоқуқиниң йәр игисигә мәңгүлүк тәвә болидиғанлиқи һәққидики мәсилиләрни ениқлаш үчүн ғулҗа наһийилик һөкүмәт вә наһийилик йәр башқуруш идариси қатарлиқ җайларға телефон қилдуқ. Һалбуки, наһийәлик йәр башқуруш идарисигә қилған телефонимиз җавабсиз қалди.

Ғулҗа наһийәлик һөкүмәт ишханисиға қилған телефонимиз уланған болсиму, әмма өзиниң мәзкур ишханида катип икәнликини билдүргән хитай кадир, йәрниң игидарчилиқ һоқуқиға аит бундақ инчикә мәсилиләрни йәр башқуруш идарисидин соришимиз керәкликини тәкитләп телефонни қойувәтти.

Пикирләр (0)
  • Принт
  • Һәмбәһр
  • Елхәт
Толуқ бәт