ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﯩﻨﯩﯔ 17 ‏- ﻗﯘﺭﯗﻟﺘﯧﻴﯩﺪﯨﻦ ﺑﯘﺭﯗﻧﻘﻰ ﺋﺎﻻﻣﻪﺗﻠﻪﺭ (3)

• ﻣﯘﺧﺒﯩﺮﯨﻤﯩﺰ ﯞﻩﻟﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯘ ﺟﯩﻨﺘﺎﯞ، ﯞﯦﻦ ﺟﻴﺎﺑﺎﯞ ﯞﻩ ﺯﯦﯔ ﭼﯩﯖﺨﻮﯕﻼﺭ 3 - ﺋﺎﻳﻨﯩﯔ 16 - ﻛﯜﻧﯩﺪﯨﻜﻰ، ﺧﯩﺘﺎﻱ ﻣﻪﻣﻠﯩﻜﻪﺗﻠﯩﻚ ﺧﻪﻟﯩﻖ ﻗﯘﺭﯗﻟﺘﯩﻴﯩﻨﯩﯔ ﻳﯧﭙﯩﻠﯩﺶ ﻣﯘﺭﺍﺳﯩﻤﯩﺪﺍ. AFP Photo

ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﭼﻮﯓ ﻗﯘﺭﯗﻟﺘﯧﻴﻰ ﻫﻪﺭ ﺑﻪﺵ ﻳﯩﻠﺪﺍ ﺑﯩﺮ ﻗﯧﺘﯩﻢ ﺋﯧﭽﯩﻠﯩﺪﯗ، ﻫﻪﺭ ﻗﯧﺘﯩﻢ ﺋﯧﭽﯩﻠﯩﺸﺘﯩﻦ ﺑﯘﺭﯗﻥ، ﺳﯩﻴﺎﺳﯩﻲ ﻛﯚﺯ ﻗﺎﺭﯨﺸﻰ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺑﯩﻠﻪﻥ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺩﯙﻟﻪﺕ ﭘﯘﻗﺮﺍﻟﯩﺮﯨﻨﻰ ﻗﺎﺗﺘﯩﻖ ﺑﺎﺳﺘﯘﺭﯗﭖ ﻛﯧﻠﯩﯟﺍﺗﯩﺪﯗ. ﻛﯧﻠﻪﺭ ﺋﺎﻳﺪﺍ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ 17 ‏- ﻗﯘﺭﯗﻟﺘﯧﻴﻰ ﺋﯧﭽﯩﻠﯩﺶ ﺋﺎﻟﺪﯨﺪﺍ ﻳﻪﻧﻪ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺳﯩﻴﺎﺳﯩﻲ ﺑﻴﯘﺭﻭﺳﯩﻨﯩﯔ ﺋﻪﺯﺍﺳﻰ، ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻚ ﻣﯩﻨﯩﺴﺘﯩﺮﻯ ﺟﯘ ﻳﯘﯕﻜﺎﯓ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ ﺩﯙﻟﻪﺕ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﺩﯛﺷﻤﻪﻧﻠﯩﺮﯨﮕﻪ ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﭗ ﺟﻪﻣﺌﯩﻴﻪﺗﻨﻰ ﺗﯩﻨﭽﻼﻧﺪﯗﺭﯗﺵ ﭘﯩﻼﻧﯩﻨﻰ ﺋﯧﻼﻥ ﻗﯩﻠﻐﺎﻥ ﺋﯩﺪﻯ.

ﺟﯘ ﻳﯘﯕﻜﺎﯓ ﺑﯘ ﻫﻪﻗﺘﻪ ﻗﯩﻠﻐﺎﻥ ﺳﯚﺯﯨﺪﻩ، ﺑﻮﻟﯘﭘﻤﯘ ﺷﯩﻨﺠﺎﯓ، ﺗﯧﺒﻪﺕ ﻗﺎﺗﺎﺭﻟﯩﻖ ﺟﺎﻳﻼﺭﺩﯨﻜﻰ ﻣﯘﺳﺘﻪﻗﯩﻠﻠﯩﻖ ﻫﻪﺭﯨﻜﻪﺗﻠﯩﺮﯨﮕﻪ ﻗﺎﺗﺘﯩﻖ ﺯﻩﺭﺑﻪ ﺑﯧﺮﯨﺸﻨﻰ ﺋﺎﻻﻫﯩﺪﻩ ﺗﻪﻛﯩﺘﻠﯩﮕﻪﻥ ﺋﯩﺪﻯ. ﻫﺎﺯﯨﺮ ﺧﯩﺘﺎﻳﺪﺍ ﺳﯩﻴﺎﺳﯩﻲ ﻛﯚﺯ ﻗﺎﺭﯨﺸﻰ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺑﯩﻠﻪﻥ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺩﯙﻟﻪﺕ ﭘﯘﻗﺮﺍﻟﯩﺮﯨﻨﻰ ﻗﺎﺗﺘﯩﻖ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﻰ ﺩﺍﯞﺍﻣﻠﯩﺸﯩﯟﺍﺗﯩﺪﯗ. ﺋﻪﻣﻤﺎ ﺧﯘ ﺟﯩﻨﺘﺎﯞ ﺑﯩﺮ ﻣﯘﻧﭽﻪ ﻗﯧﻴﯩﻦ ﻣﻪﺳﯩﻠﯩﮕﻪ ﺩﯗﭺ ﻛﻪﻟﻤﻪﻛﺘﻪ. ﺑﯘﻧﯩﯔ ﺋﺎﻻﻣﻪﺗﻠﯩﺮﻯ ﺗﯚﯞﻩﻧﺪﯨﻜﯩﭽﻪ:

7‏- ﺧﯘ ﺟﯩﻨﺘﺎﯞﻧﯩﯔ 'ﺷﺎﯕﺨﻪﻱ ﮔﯘﺭﯗﻫﻰ'ﻏﺎ ﻗﻮﺯﻏﯩﻐﺎﻥ ﻫﯘﺟﯘﻣﻰ

ﺋﺎﻣﯧﺮﯨﻜﯩﺪﺍ ﺧﯩﺘﺎﻳﭽﻪ ﭼﯩﻘﯩﺪﯨﻐﺎﻥ Tycool ﻧﺎﻣﻠﯩﻖ ﺋﯧﻠﯧﻜﺘﺮﻭﻧﻠﯘﻕ ﮔﯧﺰﯨﺘﺘﻪ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، 1989 ‏- ﻳﯩﻠﻰ ﺑﯧﻴﺠﯩﯖﺪﺍ ﻳﯜﺯ ﺑﻪﺭﮔﻪﻥ ﺗﻴﻪﻧﺌﻪﻧﻤﯧﻦ ﯞﻩﻗﻪﺳﯩﺪﯨﻦ ﻛﯧﻴﯩﻦ ﻫﻮﻗﯘﻕ ﺗﯘﺗﻘﺎﻥ ﺟﺎﯓ ﺯﯦﻤﯩﻨﻨﯩﯔ، ﻳﺎﯓ ﻓﺎﻣﯩﻠﯩﻠﯩﻚ ﮔﯧﻨﯧﺮﺍﻟﻼﺭﻧﻰ ﯞﻩ ﺑﯧﻴﺠﯩﯔ ﺷﻪﻫﯩﺮﯨﻨﯩﯔ ﺑﺎﺷﻠﯩﻘﻰ ﭼﯧﻦ ﺷﯩﺘﻮﯕﻨﻰ ﺋﻮﺭﻧﯩﺪﯨﻦ ﻳﯚﺗﻜﯩﯟﯨﺘﯩﭗ، ﺋﯚﺯﯨﻨﯩﯔ ﻫﻮﻗﯘﻗﯩﻨﻰ ﻣﯘﺳﺘﻪﻫﻜﻪﻣﻠﯩﺸﻰ ﺋﯜﭼﯜﻥ ﺋﺎﻻﻫﯩﺪﻩ ﺧﯩﺰﻣﻪﺕ ﻛﯚﺭﺳﻪﺗﻜﻪﻥ ﺯﯦﯔ ﭼﯩﯖﺨﯘﯓ ﻣﯘﺋﺎﯞﯨﻦ ﺩﯙﻟﻪﺕ ﺭﻩﺋﯩﺴﯩﻠﯩﻜﻜﻪ ﺋﯧﺮﯨﺸﻜﻪﻥ ﺋﯩﺪﻯ. ﺧﯘ ﺟﯩﻨﺘﺎﯞ ﺑﯘ ﻗﯧﺘﯩﻢ ﺋﺎﻟﻠﯩﻘﺎﭼﺎﻥ ﺋﯚﻟﮕﻪﻥ ﭼﻮﯓ ﺋﻪﻣﻪﻟﺪﺍﺭﻻﺭﻧﯩﯔ ﺑﺎﻟﯩﻠﯩﺮﻯ ﺗﺎﻣﺎﻣﻪﻥ ﺋﻮﺭﯗﻥ ﺋﺎﻟﻐﺎﻥ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ 'ﻗﺎﻧﺪﺍﺷﻠﯩﻖ ﺗﻮﺭﻯ' ﻧﻰ ﺷﻪﻛﯩﻠﻠﻪﻧﺪﯛﺭﺩﻯ. ﺧﯘ ﺟﯩﻨﺘﺎﯞﻧﯩﯔ 17 ‏- ﻗﯘﺭﯗﻟﺘﺎﻳﺪﺍ ﻫﻮﻗﯘﻕ ﺗﻪﻗﺴﯩﻤﺎﺗﯩﻐﺎ ﺋﯩﮕﻪ ﺑﻮﻟﯩﺪﯨﻐﺎﻧﻼﺭ ﺋﯜﭼﯜﻥ ﺑﻪﻟﮕﯩﻠﯩﮕﻪﻥ ﻳﺎﺵ ﭼﻪﻛﻠﯩﻤﯩﺴﻰ ﯞﻩ ﺧﯩﻴﺎﻧﻪﺗﭽﻰ ﺋﻪﻣﻪﺳﻠﯩﻜﻰ ﺩﯦﮕﻪﻥ ﺷﻪﺭﺗﻰ 68 ﻳﺎﺷﻠﯩﻖ ﺯﯦﯔ ﭼﯩﯖﺨﯘﯕﻨﻰ ﯞﻩﺯﯨﭙﯩﺴﯩﺪﯨﻦ ﺋﯩﺴﺘﯩﭙﺎ ﺑﯧﺮﯨﺸﻜﻪ ﻗﯩﺴﺘﺎﺷﻘﺎ، ﺟﺎﯓ ﺯﯦﻤﯩﻨﻨﯩﯔ ﺷﺎﯕﺨﻪﻱ ﮔﯘﺭﯗﻫﯩﻐﺎ ﻫﯘﺟﯘﻡ ﻗﻮﺯﻏﯩﺸﻰ ﺋﯜﭼﯜﻥ ﻳﻮﻝ ﺋﺎﭼﺘﻰ.

'ﺋﺎﺳﯩﻴﺎ ﻫﻪﭘﺘﯩﻠﯩﻚ ﮔﯧﺰﯨﺘﻰ'ﺩﻩ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﻣﻪﺭﻛﯩﺰﻯ ﺋﯩﻨﺘﯩﺰﺍﻡ ﺗﻪﻛﺸﯜﺭﯛﺵ ﻛﻮﻣﯩﺘﯧﺘﯩﻨﯩﯔ ﺷﺎﯕﺨﻪﻳﺪﻩ ﺗﻪﻛﺸﯜﺭﯛﯞﺍﺗﻘﺎﻥ ﺩﯦﻠﻮﻟﯩﺮﻯ ﻫﺎﺯﯨﺮﻏﯩﭽﻪ ﺟﯩﺪﺩﯨﻲ ﺩﺍﯞﺍﻡ ﻗﯩﻠﯩﯟﺍﺗﯩﺪﯗ. ﻫﯚﻛﯜﻣﻪﺕ ﺩﺍﺋﯩﺮﯨﻠﯩﺮﻯ ﻫﺎﺯﯨﺮ ﻳﯧﻘﯩﻨﺪﺍ ﺋﯚﻟﯜﭖ ﻛﻪﺗﻜﻪﻥ ﺳﯩﻴﺎﺳﯩﻲ ﺑﻴﯘﺭﻭﻧﯩﯔ ﺩﺍﺋﯩﻤﯩﻲ ﺋﻪﺯﺍﺳﻰ ﺧﯘﺍﯕﺠﯜﻧﯩﯔ ﺋﺎﺋﯩﻠﻪ -ﺗﻪﯞﻩﻟﯩﺮﯨﻨﯩﯖﻤﯘ ﭼﻪﺗﺌﻪﻟﮕﻪ ﺑﯧﺮﯨﺸﯩﻨﻰ ﭼﻪﻛﻠﯩﮕﻪﻥ. ﺧﻮﯕﻜﻮﯕﺪﺍ ﭼﯩﻘﯩﺪﯨﻐﺎﻥ 'ﺷﻪﭘﻪ' ﮊﯗﺭﻧﯩﻠﯩﺪﺍ ﺑﺎﻳﺎﻥ ﻗﯩﻠﯩﻨﯩﺸﯩﭽﯩﻤﯘ، ﺟﺎﯓ ﺯﯦﻤﯩﻨﻨﯩﯔ ﺧﻮﺗﯘﻧﯩﻨﯩﯔ ﺟﯩﻴﻪﻧﻰ، ﺷﺎﯕﺨﻪﻱ ﺟﺎﻣﺎﺋﻪﺕ ﺧﻪﯞﭘﺴﯩﺰﻟﯩﻜﻰ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻰ ﯞﯗ ﺟﮋﻣﯩﯖﻤﯘ ﺋﺎﻟﻠﯩﻘﺎﭼﺎﻥ ﺧﯩﻴﺎﻧﻪﺗﭽﯩﻠﯩﻚ ﺩﯦﻠﻮﺳﻰ ﺩﺍﺋﯩﺮﯨﺴﯩﺪﻩ ﺗﻪﻛﺸﯜﺭﯛﻟﻤﻪﻛﺘﻪ. ﻣﯘﻻﻫﯩﺰﯨﭽﯩﻠﻪﺭﻧﯩﯔ ﺋﺎﺳﺎﺳﻪﻥ ﺑﯩﺮﻟﯩﻜﻜﻪ ﻛﻪﻟﮕﻪﻥ ﻛﯚﺯ ﻗﺎﺭﺷﻰ ﺑﯘﻳﯩﭽﻪ ﺋﯧﻴﺘﻘﺎﻧﺪﺍ، ﺑﯘ ﺧﯘ ﺟﯩﻨﺘﺎﯞ ﺑﯩﻠﻪﻥ ﺑﯘﻧﯩﯖﺪﯨﻦ ﺑﯩﺮﻧﻪﭼﭽﻪ ﻳﯩﻞ ﺑﯘﺭﯗﻥ ﺧﯩﺘﺎﻳﻨﯩﯔ 3 ‏- ﺋﻪﯞﻻﺩ ﺭﻩﻫﺒﻪﺭﻟﯩﻚ ﻳﺎﺩﺭﻭﺳﻰ ﺑﻮﻟﻐﺎﻥ، ﻫﺎﺯﯨﺮﻏﯩﭽﻪ ﺗﯧﺨﻰ ﻫﺎﻳﺎﺕ ﺗﯘﺭﯗﯞﺍﺗﻘﺎﻥ ﺟﺎﯓ ﺯﯦﻤﯩﻦ ﻳﻪﻧﻰ ﺷﺎﯕﺨﻪﻱ ﮔﯘﺭﯗﻫﻰ ﺋﻮﺗﺘﯘﺭﯨﺴﯩﺪﯨﻜﻰ ﺟﯩﺪﺩﯨﻲ ﺋﯩﭽﻜﻰ ﺋﯘﺭﯗﺷﻨﯩﯔ ﺋﯩﻨﻜﺎﺳﻰ. ﺑﻪﺯﻯ ﻣﯘﻻﻫﯩﺰﯨﭽﯩﻠﻪﺭﻧﯩﯔ ﭘﻪﺭﻩﺯ ﻗﯩﻠﯩﺸﯩﭽﻪ، ﺷﯩﻨﺠﺎﯕﺪﯨﻜﻰ ﯞﺍﯓ ﻟﯧﭽﯘﻩﻧﻨﯩﯔ ﺋﻮﺭﻧﯩﻤﯘ ﺑﯘ ﺋﯩﭽﻜﻰ ﺋﯘﺭﯗﺷﻨﯩﯔ ﺗﻪﺭﻩﻗﻘﯩﻴﺎﺗﯩﻐﺎ ﺑﺎﻏﻠﯩﻖ.

8‏- ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺑﯩﻠﻪﻥ ﺩﯦﻬﻘﺎﻧﻼﺭ ﺋﻮﺗﺘﯘﺭﯨﺴﯩﺪﯨﻜﻰ ﺗﻮﻗﯘﻧﯘﺵ

ﺏ ﺏ ﺱ ﻧﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ، 17 ‏- ﻗﯘﺭﯗﻟﺘﺎﻱ ﺋﯧﭽﯩﻠﯩﺸﺘﯩﻦ ﺑﯘﺭﯗﻥ، ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺳﺘﺎﺗﯩﺴﺘﯩﻜﺎ ﺋﯩﺪﺍﺭﯨﺴﻰ، ﮔﻪﺭﭼﻪ ﺧﯩﺘﺎﻳﻨﯩﯔ ﺋﯩﻘﺘﯩﺴﺎﺩﯨﻲ ﻛﯜﭼﻰ ﻫﺎﺯﯨﺮ ﺩﯗﻧﻴﺎ ﺑﯘﻳﯩﭽﻪ 4 ‏- ﺋﻮﺭﯗﻧﺪﺍ ﺗﯘﺭﯨﺪﯨﻐﺎﻥ ﺩﯙﻟﻪﺗﻜﻪ ﺋﺎﻳﻼﻧﺪﻯ، ﺩﯙﻟﻪﺕ ﺑﯘﻳﯩﭽﻪ ﺋﺎﺩﻩﻡ ﺑﯧﺸﯩﻐﺎ ﺗﻮﻏﺮﺍ ﻛﯧﻠﯩﺪﯨﻐﺎﻥ ﻛﯩﺮﯨﻢ ﻣﯩﻘﺪﺍﺭﻯ ﺋﯧﺸﯩﭗ ﺑﯩﺮ ﻗﺎﺗﻼﻧﺪﻯ، ﺧﻪﻟﻖ ﻫﺎﺯﯨﺮ ﭘﯘﻟﻨﻰ ﺳﺎﻧﺎﭖ ﺋﻪﻣﻪﺱ، ﺑﻪﻟﻜﻰ ﺗﯘﺗﺎﻣﻼﭖ ﺧﻪﺟﻠﻪﻳﺪﯨﻐﺎﻥ ﺑﻮﻟﺪﻯ، ﺩﻩﭖ ﺋﯧﻼﻥ ﻗﯩﻠﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﻳﯧﻘﯩﻨﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺭﺍﻱ ﺳﯩﻨﺎﺷﺘﺎ ﻣﻪﻟﯘﻡ ﺑﻮﻟﯘﺷﯩﭽﻪ، ﺧﯩﺘﺎﻳﺪﺍ ﺑﺎﻟﯩﻼﺭﻧﻰ ﺋﻮﻗﯘﺗﯘﺵ، ﻛﯧﺴﻪﻝ ﻛﯚﺭﯛﻧﯜﺵ ﯞﻩ ﺗﻮﺭﺍﻟﻐﯘ ﻣﻪﺳﯩﻠﯩﺴﻰ ﺧﻪﻟﻘﻨﯩﯔ ﺑﯧﺸﯩﺪﯨﻜﻰ 'ﺋﯜﭺ ﭼﻮﯓ ﺗﺎﻍ' ﺑﻮﻟﯘﭖ ﻗﺎﻟﺪﻯ ﺩﻩﭖ ﻗﺎﺭﯨﻐﯘﭼﯩﻼﺭﻧﯩﯔ ﻧﯧﺴﺒﯩﺘﻰ %76 ﮔﻪ ﻳﻪﺗﻜﻪﻥ. ﺑﯘﻧﯩﯔ ﺋﯩﭽﯩﺪﻩ ﺩﯦﻬﻘﺎﻧﻼﺭﻧﯩﯔ ﺋﯩﻨﻜﺎﺳﻰ ﺋﻪﯓ ﻛﯜﭼﻠﯜﻙ.

ﺏ ﺏ ﺱ ﻧﯩﯔ ﺋﻪﺭﻛﯩﻦ ﻣﯘﻧﺎﺯﯨﺮﻩ ﺑﯧﺘﯩﮕﻪ ﻳﯧﺰﯨﻠﻐﺎﻥ ﺋﻮﺑﺰﻭﺭﻻﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻫﺎﺯﯨﺮ ﺧﯩﺘﺎﻳﺪﺍ ﺋﻪﻣﻪﻟﺪﺍﺭﻻﺭﻧﯩﯔ ﻳﻪﺭ-ﺯﯦﻤﯩﻦ ﯞﻩ ﺑﺎﻳﻠﯩﻘﻼﺭﻧﻰ ﻫﻪﻗﺴﯩﺰ ﺋﯩﺸﻠﯩﺘﯩﺸﻰ ﺑﯩﻠﻪﻥ ﺋﻪﻣﮕﻪﻙ ﻛﯜﭼﻠﯩﺮﯨﺪﯨﻦ ﺋﻪﺭﺯﺍﻥ ﭘﺎﻳﺪﯨﻠﯩﻨﯩﺸﻰ ‏، ﺟﯘﯕﮕﻮ ﺋﯩﻘﺘﯩﺴﺎﺩﯨﻨﻰ ﺗﯧﺰ ﺋﺎﺷﯘﺭﯗﺷﻨﯩﯔ ﺑﯩﺮﯨﺪﯨﻦ - ﺑﯩﺮ ﻫﻪﺭﯨﻜﻪﺗﻠﻪﻧﺪﯛﺭﮔﯜﭺ ﻛﯜﭼﻰ ﺑﻮﻟﯘﭖ ﻗﺎﻟﻐﺎﻥ.

ﺗﻪﻳﯟﻩﻧﺪﯨﻦ ﻳﻮﻟﻼﻧﻐﺎﻥ ﺋﻮﺑﺰﻭﺭﺩﺍ ﻣﯘﻧﺪﺍﻕ ﺩﻩﭖ ﻳﯧﺰﯨﻠﯩﺪﯗ: ﭼﻮﯓ ﻗﯘﺭﯗﻗﻠﯘﻗﺘﺎ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺋﯚﺯﯨﻨﯩﯔ 17 ‏- ﻗﯘﺭﯗﻟﺘﯧﻴﯩﺪﯨﻦ ﺑﯘﺭﯗﻥ، ﺳﯩﻴﺎﺳﯩﻲ ﻛﯚﺯ ﻗﺎﺭﯨﺸﻰ ﺋﻮﺧﺸﯩﻤﯩﻐﺎﻧﻠﯩﻜﻰ ﺋﺎﺩﻩﻣﻨﻰ ﺑﺎﺳﺘﯘﺭﯨﯟﺍﺗﯩﺪﯗ. ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯚﺗﻜﯜﺯﯛﺵ ﺋﯜﭼﯜﻥ ﺧﻪﻟﻘﻨﯩﯔ ﻳﻪﺭ -ﺯﯦﻤﯩﻨﯩﻨﻰ ﺑﯘﻻﯞﺍﺗﯩﺪﯗ. ﺧﯩﻴﺎﻧﻪﺗﭽﯩﻠﯩﻜﻜﻪ ﻗﺎﺭﺷﻰ ﺗﯘﺭﯗﺵ ﺩﯦﮕﻪﻥ ﻫﻪﺭﯨﻜﻪﺗﺘﯩﻤﯘ 'ﺋﻮﻏﺮﯨﻨﻰ ﻗﺎﺭﺍﻗﭽﻰ ﺑﯘﻻﺵ' ﺋﻮﻳﯘﻧﯩﻨﻰ ﺋﺎﺷﻜﺎﺭﺍ ﺋﻮﻳﻨﺎﯞﺍﺗﯩﺪﯗ. ﭘﺎﺭﺗﯩﻴﯩﮕﻪ ﺩﻩﺭﺕ ﺋﯧﻴﺘﻘﯩﻠﻰ ﻛﻪﻟﮕﻪﻥ ﺧﻪﻟﯩﻘﻨﯩﻤﯘ ﻗﻮﻏﻼﯞﺍﺗﯩﺪﯗ. ﻫﺎﺯﯨﺮ ﺧﯩﺘﺎﻳﺪﺍ ﺧﻪﻟﻘﻨﯩﯔ ﻫﻪﻣﻤﻪ ﻧﻪﺭﺳﯩﺴﻰ ﻛﻮﻣﻤﯘﻧﯩﺴﺘﻼﺭﻧﯩﯔ ﻗﻮﻟﯩﺪﺍ. 1 ﻣﯩﻠﻴﺎﺭﺩ 300 ﻣﯩﻠﻴﻮﻥ ﺋﺎﺩﻩﻣﻨﯩﯔ ﺟﯧﻨﯩﻤﯘ ﻣﯘﺷﯘ ﺑﯩﺮ ﭘﺎﺭﺗﯩﻴﯩﻨﯩﯔ ﻗﻮﻟﯩﺪﺍ. ﺋﻪﻣﺪﻯ ﺑﯘ 'ﺟﯘﯕﮕﻮﭼﻪ ﺳﻮﺗﺴﯩﻴﺎﻟﯩﺰﻡ' ﮔﯘﻣﺮﺍﻥ ﺑﻮﻟﺴﺎ، ﺧﻪﻟﻖ ﻗﺎﻳﺘﯩﺪﯨﻦ ﻳﻪﺭ ﺋﯩﺴﻼﻫﺎﺗﻰ ﺋﯧﻠﯩﭗ ﺑﺎﺭﯨﺪﯗ.

ﺋﻪﻧﮕﯩﻠﯩﻴﯩﺪﯨﻦ ﻳﻮﻟﻼﻧﻐﺎﻥ ﺑﯩﺮ ﺋﻮﺑﺰﻭﺭﺩﺍ ﻣﯘﻧﺪﺍﻕ ﺩﻩﭖ ﻳﯧﺰﯨﻠﯩﺪﯗ: ﺧﯩﺘﺎﻳﺪﯨﻜﻰ ﺋﯘﻗﯘﻡ ﺑﯘﻳﯩﭽﻪ ﺋﯧﻴﺘﻘﺎﻧﺪﺍ، ﺧﯩﺘﺎﻳﺪﺍ ﻳﻪﺭ-ﺯﯦﻤﯩﻦ ﺩﯙﻟﻪﺗﻨﯩﯔ، ﺩﯙﻟﻪﺕ ﺧﻪﻟﻘﻨﯩﯔ، ﺧﻪﻟﻖ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ ﻗﯘﻣﺎﻧﺪﯨﺴﯩﻐﺎ ﺑﻮﻱ ﺳﯘﻧﯩﺪﯗ، ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﭘﯘﻟﻨﯩﯔ ﻗﯘﻣﺎﻧﺪﯨﺴﯩﻐﺎ ﺑﻮﻱ ﺳﯘﻧﯩﺪﯗ، ﭘﯘﻝ ﻫﻮﻗﯘﻗﺘﯩﻦ ﻛﯧﻠﯩﺪﯗ، ﻫﻮﻗﯘﻕ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ ﻗﻮﻟﯩﺪﺍ. ﺧﻪﻟﻖ ﻗﯘﻝ، ﺋﯘﻧﯩﯖﺪﯨﻦ ﻛﻪﻟﮕﻪﻥ ﻗﺎﻟﺪﯗﻕ ﻗﯩﻤﻤﻪﺗﺘﯩﻦ ﻛﻮﻣﻤﯘﻧﯩﺴﺘﻼﺭ ﻫﯘﺯﯗﺭﻟﯩﻨﯩﺪﯗ. ﻳﻪﺭ-ﺯﯦﻤﯩﻦ ﺗﻪﻟﻪﭖ ﻗﯩﻠﻐﺎﻥ ﺧﻪﻟﻖ ﺳﯩﻢ ﺗﻮﺳﺎﻗﻘﺎ ﻛﯩﺮﯨﭗ ﻗﺎﻟﯩﺪﯗ.

ﺟﻴﺎﯕﺴﯘﺩﯨﻦ ﻳﻮﻟﻼﻧﻐﺎﻥ ﺑﯩﺮ ﻗﯩﺴﻘﺎ ﺋﻮﺑﺰﻭﺭﺩﺍ ﭘﻪﻗﻪﺕ "ﺋﻪﻣﺪﻯ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﻰ ﺋﺎﻏﺪﯗﺭﯗﺷﺘﯩﻦ ﺋﯚﺯﮔﻪ ﻳﻮﻝ ﻗﺎﻟﻤﯩﺪﻯ' ﺩﻩﭖ ﻳﯧﺰﯨﻠﻐﺎﻥ. (ﯞﻩﻟﻰ)