17 ‏- ﻗﯘﺭﯗﻟﺘﺎﻳﻨﯩﯔ ﺳﯩﮕﻨﺎﻟﻰ: ﺧﯩﺘﺎﻱ ﻏﻪﺭﺏ ﻳﻮﻟﯩﺪﺍ ﻣﺎﯕﻤﺎﻳﺪﯗ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻱ ﭘﺮﯦﺰﯨﺪﯦﻨﺘﻰ ﺧﯘ ﺟﯩﻨﺘﺎﯞ، 17 - ﻗﯘﺭﯗﻟﺘﺎﻳﺪﺍ ﺳﯚﺯ ﺑﻪﺭﻣﻪﻛﺘﻪ. AFP Photo

15 ‏- ﺋﯚﻛﺘﻪﺑﯩﺮ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ 17 ‏- ﻗﯘﺭﯗﻟﺘﯩﻴﻰ ﺭﻩﺳﻤﯩﻲ ﺋﯧﭽﯩﻠﺪﻯ. ﻳﯩﻐﯩﻨﻐﺎ 2213 ﻧﻪﭘﻪﺭ ﺭﻩﺳﻤﯩﻲ ﯞﻩﻛﯩﻞ، 57 ﻧﻪﭘﻪﺭ ﺗﻪﻛﻠﯩﭗ ﻗﯩﻠﯩﻨﻐﺎﻥ ﺋﺎﻻﻫﯩﺪﻩ ﯞﻩﻛﯩﻞ ﺑﻮﻟﯘﭖ ﺟﻪﻣﺌﯩﻲ 2270 ﻛﯩﺸﻰ ﻗﺎﺗﻨﺎﺷﺘﻰ. ﻳﯩﻐﯩﻨﺪﺍ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﻣﻪﺭﻛﯩﺰﻯ ﻛﻮﻣﯩﺘﯧﺘﯩﻨﯩﯔ ﺭﻩﺋﯩﺴﻰ، ﺧﯘ ﺟﯩﻨﺘﺎﯞ ، ﭘﺎﺭﺗﯩﻴﯩﺴﯩﻨﯩﯔ ﺋﯚﺗﻜﻪﻥ ﺑﻪﺵ ﻳﯩﻠﻠﯩﻖ ﺧﯩﺰﻣﻪﺗﻠﯩﺮﯨﺪﯨﻦ ﺩﻭﻛﻼﺕ ﺑﻪﺭﺩﻯ ﯞﻩ ﻛﯧﻠﻪﺭ ﺑﻪﺵ ﻳﯩﻠﻠﯩﻖ ﺧﯩﺰﻣﻪﺕ ﭘﯩﻼﻧﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺧﯘﻧﯩﯔ ﺩﻭﻛﻼﺗﯩﺪﺍ ﻧﯩﻤﻪ ﻳﯧﯖﯩﻠﯩﻖ؟

ﺋﯩﻜﻜﻰ ﻳﯧﺮﯨﻢ ﺳﺎﺋﻪﺕ ﺩﺍﯞﺍﻡ ﻗﯩﻠﻐﺎﻥ ﺩﻭﻛﻼﺗﺘﺎ، ﻧﯘﻗﺘﯩﻠﯩﻖ ﻫﺎﻟﺪﺍ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﻳﻪﻧﯩﻼ ﺑﯩﺮﯨﻨﭽﻰ ﺋﻮﺭﯗﻧﻐﺎ ﻗﻮﻳﯩﺪﯨﻐﺎﻧﻠﯩﻘﻰ، ﺑﯘﻧﯩﯖﻐﺎ ﻣﺎﺱ ﻗﻪﺩﻩﻣﺪﻩ، ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﯩﻨﯩﯖﻤﯘ ﺩﺍﯞﺍﻣﻠﯩﺸﯩﺪﯨﻐﺎﻧﻠﯩﻘﻰ،ﺋﻪﻣﻤﺎ ﺑﯘ ﺋﯩﺴﻼﻫﺎﺗﻨﯩﯔ ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﯩﻨﯩﯔ ﺭﻩﻫﺒﻪﺭﻟﯩﻜﯩﺪﻩ ﻛﯚﭖ ﭘﺎﺭﺗﯩﻴﻪ ﻫﻪﻣﻜﺎﺭﻟﯩﻘﻰ ﺑﯩﻠﻪﻥ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﺪﻯ . ﺑﯘﻧﯩﯖﺪﯨﻦ ﺑﺎﺷﻘﺎ ﺩﻭﻛﻼﺗﺘﺎ، ﺗﻪﻳﯟﻩﻥ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﺘﻪ ، ﺧﯩﺘﺎﻳﻨﯩﯔ ﭘﯜﺗﯜﻧﻠﯜﻛﯩﻨﻰ ﺷﻪﺭﺕ ﻗﯩﻠﻐﺎﻥ ﺋﺎﺳﺎﺳﺘﺎ ﺗﯧﻨﭽﻠﯩﻖ ﺳﯚﻫﺒﯩﺘﯩﻨﻰ ﺋﯧﻠﯩﭗ ﺑﯧﺮﯨﭗ، ﺗﻪﻳﯟﻩﻥ -ﺧﯩﺘﺎﻱ ﻣﯘﻧﺎﺳﯩﯟﯨﺘﯩﻨﻰ ﺗﯧﻨﭻ ﺑﯩﺮ ﺗﻪﺭﻩﭖ ﻗﯩﻠﯩﺸﻘﺎ ﺗﯩﺮﯨﺸﯩﺪﯨﻐﺎﻧﻠﯩﻘﻰ ﺑﯩﻠﺪﯛﺭﯛﻟﮕﻪﻥ.

ﺩﻭﻛﻼﺗﺘﺎ ﻳﻪﻧﻪ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﺩﯗﭺ ﻛﻪﻟﮕﻪﻥ ﺗﻪﻫﺪﯨﺘﻠﻪﺭﺩﯨﻦ ﺑﯩﺮﯨﻨﯩﯔ ﭘﺎﺭﯨﺨﻮﺭﻟﯘﻕ ﺋﯩﻜﻪﻧﻠﯩﻜﻰ ﯞﻩ ﺑﯘﻧﯩﯖﻐﺎ ﺧﺎﺗﯩﻤﻪ ﺑﯧﺮﯨﺪﯨﻐﺎﻧﻠﯩﻘﻰ ﺗﻪﻛﯩﺘﻠﻪﻧﮕﻪﻥ . ﺩﻭﻛﻼﺕ ﺧﯩﺘﺎﻳﻨﯩﯔ ﺩﯙﻟﻪﺕ ﻣﯘﺩﺍﭘﯩﺌﻪ ﺳﯩﻴﺎﺳﯩﺘﯩﺪﻩ، ﻛﯧﯖﻪﻳﻤﯩﭽﯩﻠﯩﻚ ﻳﻮﻟﯩﺪﺍ ﺋﻪﻣﻪﺱ، ﻗﻮﻏﺪﯨﻨﯩﺶ ﭘﺮﯨﻨﺴﯩﭙﯩﺪﺍ ﭼﯩﯔ ﺗﯘﺭﯨﺪﯨﻐﺎﻧﻠﯩﻘﻰ ، ﺑﯘ ﻣﻪﻗﺴﻪﺗﺘﻪ ﻫﻪﺭﺑﯩﻲ ﺳﺎﻫﻪﺩﯨﻜﻰ ﺯﺍﻣﺎﻧﯩﯟﯨﻴﻠﯩﺸﯩﺶ ﻗﻪﺩﯨﻤﯩﻨﻰ ﺩﺍﯞﺍﻣﻼﺷﺘﯘﺭﯨﺪﯨﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

" ﺟﻴﺎﯓ ﺯﯦﻤﯩﻦ ﺩﻩﯞﺭﯨﮕﻪ ﻧﯩﺴﺒﻪﺗﻪﻥ ﺋﯩﻠﮕﯩﺮﯨﻠﻪﺵ ﺑﺎﺭ"

ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﯨﻜﻰ ﺑﯘ ﻣﻪﺯﻣﯘﻧﻼﺭﻏﺎ ﻗﺎﺭﯨﺘﺎ ﺧﯩﺘﺎﻱ ﺋﯩﭽﻰ-ﺳﯩﺮﺗﯩﺪﯨﻜﻰ ﺋﯩﻨﻜﺎﺳﻼﺭ ﻫﻪﺭ ﺧﯩﻞ: ﺑﯘ ﺋﯩﻨﻜﺎﺳﻼﺭ ﺩﻭﻛﻼﺗﺘﺎ، ﭺ ﻙ ﭖ ﻧﯩﯔ ﻛﯧﻠﻪﺭ ﺑﻪﺵ ﻳﯩﻠﻠﯩﻖ ﺳﯩﻴﺎﺳﯩﺘﯩﺪﻩ ﺑﯘﺭﯗﻟﯘﺵ ﺧﺎﺭﺍﻛﺘﯧﺮﻟﯩﻚ ﺋﯚﺯﮔﯩﺮﯨﺸﺘﯩﻦ ﺋﯩﺸﺎﺭﻩﺕ ﺑﻪﺭﻣﯩﮕﻪﻧﻠﯩﻜﯩﺪﻩ ﺋﻮﺭﺗﺎﻕ ﺑﻮﻟﺴﯩﻤﯘ، ﺋﻪﻣﻤﺎ ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﻳﯧﯖﯩﻠﯩﻘﻨﯩﯔ ﻣﻪﯞﺟﯘﺕ ﻳﺎﻛﻰ ﺋﻪﻣﻪﺳﻠﯩﻜﻰ ﻫﻪﻗﻘﯩﺪﻩ ﭘﻪﺭﻗﻠﯩﻖ ﭘﯩﻜﯩﺮﻟﻪﺭ ﺋﻮﺗﺘﯘﺭﯨﻐﺎ ﭼﯩﻘﺘﻰ.

ﺑﯧﻴﺠﯩﯖﺪﯨﻜﻰ ﺑﯩﺮ ﺗﻪﺭﻩﭘﺴﯩﺰ ﺗﻪﺗﻘﯩﻘﺎﺗﭽﻰ ﺩﻩﭖ ﻗﺎﺭﺍﻟﻐﺎﻥ ﺟﯘ ﺩﯗ ﺋﯩﺴﯩﻤﻠﯩﻚ ﺋﺎﻧﺎﻟﯩﺰﭼﻰ ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﻳﯧﯖﻰ ﻧﯘﻗﺘﯩﻼﺭ ﺑﺎﺭ ﺩﻩﭖ ﻗﺎﺭﯨﻐﯘﭼﯩﻼﺭﺩﯨﻦ ﺑﯧﺮﻯ. ﺋﯘ ﺑﯘ ﻳﯧﯖﯩﻠﯩﻖ ﻫﻪﻗﻘﯩﺪﻩ ﻣﯘﻧﺪﺍﻕ ﺩﻩﻳﺪﯗ: "ﺟﻴﺎﯓ ﺯﯦﻤﯩﻦ ﺩﻩﯞﺭﯨﺪﻩ، ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﻰ ﺋﯘﻳﺎﻗﺘﺎ ﺗﯘﺭﺳﯘﻥ، ﺩﯦﻤﻮﻛﺮﺍﺗﯩﻴﯩﻠﯩﺸﯩﺶ ﺩﯦﮕﻪﻥ ﺳﯚﺯﻣﯘ ﺑﯩﺮﻻ ﻳﻪﺭﺩﻩ ﺗﯩﻠﻐﺎ ﺋﯧﻠﯩﻨﻐﺎﻥ ﯞﻩ ﺋﯜﺳﺘﯩﺪﻩ ﺗﻪﭘﺴﯩﻠﯩﻲ ﺗﻮﺧﺘﺎﻟﻤﯩﻐﺎﻥ. ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﺑﻮﻟﺴﺎ، ﺑﯘ ﺋﺎﺗﺎﻟﻐﯘﻻﺭ ﺑﺎﺷﺘﯩﻦ - ﺋﺎﺧﯩﺮ ﻛﯚﭖ ﻗﯧﺘﯩﻢ ﺗﻪﻛﺮﺍﺭﻟﯩﻨﯩﺪﯗ. ﻣﺎﻧﺎ ﺑﯘ ﺗﻪﻛﺮﺍﺭﻻﺵ، ﺧﯘ ﺟﯩﻨﺘﺎﯞﻧﯩﯔ ﺳﯩﻴﺎﺳﯩﻲ ﺋﯩﺴﻼﻫﺎﺗﺘﯩﻜﻰ ﺟﯩﺪﺩﯨﻴﯩﺘﯩﻨﻰ ﻛﯚﺭﺳﯩﺘﯩﺪﯗ."

" ﻳﯩﮕﯩﺮﻣﻪ ﻳﯩﻞ ﺋﺎﯞﯞﺍﻟﻘﯩﭽﯩﻠﯩﻜﻤﯘ ﺋﯚﺯﮔﯜﺭﯛﺵ ﻳﻮﻕ"

ﻛﺎﺭﻧﯩﮓ ﺧﻪﻟﻘﺌﺎﺭﺍﻟﯩﻖ ﺗﯩﻨﭽﻠﯩﻖ ﯞﻩﺧﭙﯩﻨﯩﯔ ﺗﻪﺗﻘﯩﻘﺎﺗﭽﯩﺴﻰ ﻣﯩﻜﺴﯩﻦ ﭘﯧﻰ، ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﻫﯧﭽﻘﺎﻧﺪﺍﻕ ﺑﯩﺮ ﻳﯧﯖﯩﻠﯩﻖ ﻳﻮﻕ ﺩﻩﭖ ﻗﺎﺭﯨﻐﯘﭼﯩﻼﺭﺩﯨﻦ . ﺋﯘ ﻣﯘﻧﺪﺍﻕ ﺩﻩﻳﺪﯗ: ﺧﯩﺘﺎﻱ ﺑﯜﮔﯜﻥ ﺷﯘﻧﭽﻪ ﻛﯚﭖ ﻣﻪﺳﯩﻠﯩﻠﻪﺭﮔﻪ ﺩﯗﭺ ﻛﻪﻟﺪﻯ، ﺑﯘﻧﯩﯔ ﺑﯩﺮﻗﯩﺴﻤﻰ ﺩﻭﻛﻼﺗﺘﺎ ﺋﺎﺷﻜﺎﺭﺍ ﺗﯩﻠﻐﺎ ﺋﯧﻠﯩﻨﻐﺎﻥ ؛ ﺋﻪﻣﻤﺎ ، ﺑﯘ ﻣﻪﺳﯩﻠﯩﻨﻰ ﻫﻪﻝ ﻗﯩﻠﯩﺸﻨﯩﯔ ﻫﯧﭽﻘﺎﻧﺪﺍﻕ ﭼﺎﺭﯨﺴﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻤﯩﻐﺎﻥ. ﺧﯘ ﺟﯩﻨﺘﺎﯞ ﮔﯘﺭﯗﻫﯩﺪﯨﻦ ﺋﯩﺴﻼﻫﺎﺕ ﻗﻪﺩﯨﻤﯩﻨﻰ ﻛﯜﺗﯜﺵ ﻣﯘﻣﻜﯩﻦ ﺋﻪﻣﻪﺱ. ﺑﯘﻻﺭ ﻫﻪﺗﺘﺎ 20 ﻳﯩﻞ ﺑﯘﺭﯗﻧﻘﻰ ﭘﺎﺭﺗﯩﻴﻪ ﺳﯧﻜﺮﯦﺘﺎﺭﻯ، ﺟﺎﯞ ﺯﯨﻴﺎﯕﭽﯩﻠﯩﻜﻤﯘ ﺋﯩﺴﻼﻫﺎﺗﭽﻰ ﺭﻭﻫﯩﻨﻰ ﻛﯚﺭﺳﯩﺘﻪﻟﻤﯩﺪﻯ.

ﺋﺎﻣﯧﺮﯨﻜﺎ ﺋﺎﯞﺍﺯﻯ ﺭﺍﺩﯨﺌﻮﺳﯩﻨﯩﯔ ﻣﯘﺧﺒﯩﺮﻯ ﺟﺎﯕﻨﻪﻥ، ﺑﯧﻴﺠﯩﯔ ﺋﺎﻫﺎﻟﯩﺴﯩﻨﻰ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ ﺯﯨﻴﺎﺭﻩﺕ ﻗﯩﻠﯩﻨﻐﯘﭼﯩﻼﺭ، ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﺋﻪﻣﻪﻟﯩﻲ ﭼﺎﺭﻩ -ﺗﻪﺩﺑﯩﺮﻟﻪﺭ ﺋﯜﺳﺘﯩﺪﻩ ﺗﻮﺧﺘﺎﻟﻤﺎﻱ، ﻗﯘﺭﯗﻕ ﭼﺎﻗﯩﺮﯨﻖ ﯞﻩ ﻣﻪﯞﻫﯘﻡ ﯞﻩﺩﯨﻠﻪﺭ ﺑﯩﻠﻪﻥ ﺗﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﯛﭖ ﻣﯘﻧﺪﺍﻕ ﺩﯦﮕﻪﻥ " ﺑﯩﺰﮔﻪ ﻛﯧﺮﯨﻜﻰ ﻗﯘﺭﯗﻕ ﻧﻪﺯﻩﺭﯨﻴﻪ ﺋﻪﻣﻪﺱ، ﻗﯘﺭﯗﻕ ﺷﯘﺋﺎﺭ ﺋﻪﻣﻪﺱ، ﻳﺎﻟﻐﺎﻥ ﯞﻩﺩﻩ ﺗﯧﺨﯩﻤﯘ ﺋﻪﻣﻪﺱ، ﺑﯩﺰﮔﻪ ﻛﯧﺮﯨﻜﻰ ﺋﯘﻥ ، ﺑﯩﺰﮔﻪ ﻛﯧﺮﯨﻜﻰ ﺋﯚﻱ ، ﺑﯩﺰﮔﻪ ﻛﯧﺮﯨﻜﻰ ﻛﯚﻣﯜﺭ، ﺑﯩﺰﮔﻪ ﺋﯩﺶ ﻛﯧﺮﻩﻙ ، ﻗﯘﺭﯗﻕ ﯞﻩﺩﻩ ﺋﻪﻣﻪﺱ."

" ﻣﻪﺳﯩﻠﻪ ﺗﯩﻠﻐﺎ ﺋﯧﻠﯩﻨﻐﺎﻥ، ﭼﺎﺭﻩ ﺋﻮﺗﺘﯘﺭﯨﻐﺎ ﻗﻮﻳﯘﻟﻤﯩﻐﺎﻥ"

ﺧﻮﯕﻜﻮﯓ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﭘﺮﻭﻓﯧﺴﺴﻮﺭﻯ، ﺩﺍﯞﯨﺪ ﺯﯦﯩﮓ" ﺧﯘ ﺟﯩﻨﺘﺎﯞﻧﯩﯔ ﭼﯩﺮﯨﻜﻠﯩﻜﻨﻰ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﻰ ﺋﯜﭼﯜﻥ ﺯﻭﺭ ﺗﻪﻫﺪﯨﺖ ﺩﻩﭖ ﺋﯧﺘﯩﺮﺍﭖ ﻗﯩﻠﯩﺸﻰ ﺑﯩﺮ ﺋﯩﻠﮕﯩﺮﯨﻠﻪﺵ ﺩﻩﭖ ﻗﺎﺭﺍﻳﺪﯗ، ﺋﻪﻣﻤﺎ، ﭼﯩﺮﯨﻜﻠﯩﻜﻨﻰ ﺑﯩﺮ ﺗﻪﺭﻩﭖ ﻗﯩﻠﯩﺸﻨﯩﯔ ﻛﻮﻧﻜﺮﯦﺖ ﭼﺎﺭﯨﺴﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻤﺎﺳﻠﯩﻘﯩﻨﻰ ﺑﻮﻟﺴﺎ ﻫﻪﻳﺮﺍﻥ ﻗﺎﻻﺭﻟﯩﻖ ﺋﯩﺶ ﺩﻩﭖ ﺋﻮﺗﺘﯘﺭﯨﻐﺎ ﻗﻮﻳﯩﺪﯗ.

ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ ﻫﯧﭽﺒﯩﺮ ﻳﯧﯖﯩﻠﯩﻖ ﻳﻮﻕ ﺩﻩﭖ ﻗﺎﺭﯨﻐﯘﭼﯩﻼﺭﺩﯨﻦ ﺋﺎﻧﺎﻟﯩﺰﭼﻰ ﭘﯘ ﺟﯩﯔ ، ﺋﻪﮔﻪﺭ ﺑﯩﺮ ﻳﯧﯖﯩﻠﯩﻖ ﺑﺎﺭ ﺩﯦﻴﯩﻠﺴﻪ، ﺋﯘ ﭘﻪﻗﻪﺕ، ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﻨﯩﯔ ، ﻣﺎﺭﻛﯩﺴﯩﺰﻡ- ﻟﯧﻨﯩﻨﯩﺰﻡ ﻧﻪﺯﻩﺭﯨﻴﯩﺴﻰ، ﻣﺎﯞﺯﯦﺪﯗﯓ ﺋﯩﺪﯨﻴﯩﺴﻰ، ﺩﯦﯖﺸﺎﯞﭘﯩﯔ ﻧﻪﺯﻩﺭﯨﻴﯩﺴﻰ ، ﺋﯜﭼﻜﻪ ﯞﻩﻛﯩﻠﻠﯩﻚ ﻗﯩﻠﯩﺶ ﺩﯦﮕﻪﻥ ﺷﯘﺋﺎﺭﻻﺭ ﺯﻩﻧﺠﯩﺮﯨﮕﻪ، ﺋﯩﻨﺎﻕ ﺟﻪﻣﺌﯩﻴﻪﺕ ﺩﯦﮕﻪﻥ ﺑﯩﺮ ﻫﺎﻟﻘﯩﻨﻰ ﻗﯧﺘﯩﺶ" ﺩﻩﭖ ﻛﯚﺭﺳﯩﺘﯩﺪﯗ.

ﭼﺎﻗﯩﺮﯨﻘﻼﺭ ﺑﯩﺮ-ﺑﯩﺮﯨﮕﻪ ﺯﯨﺖ

ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﯨﻜﻰ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﯩﻨﻰ ﭼﻮﯕﻘﯘﺭﻻﺷﺘﯘﺭﯗﺵ ﺩﯦﮕﻪﻥ ﭼﺎﻗﯩﺮﯨﻖ ﺑﯩﻠﻪﻥ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﻨﯩﯔ ﻳﯧﺘﻪﻛﭽﯩﻠﯩﻜﯩﺪﻩ ﻛﯚﭖ ﭘﺎﺭﺗﯩﻴﻪ ﻫﻪﻣﻜﺎﺭﻟﯩﺸﯩﺸﻨﻰ ﺩﺍﯞﺍﻣﻼﺷﺘﯘﺭﯗﺵ ﭼﺎﻗﯩﺮﯨﻘﯩﻨﻰ ﺑﯩﺮ ‏- ﺑﯩﺮﯨﮕﻪ ﺯﯨﺖ ﺩﻩﭖ ﻗﺎﺭﯨﻐﺎﻥ ﺋﺎﻧﺎﻟﯩﺰﭼﯩﻼﺭ، ﺑﯘﻧﻰ ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﯩﻨﯩﯔ 4 ‏-ﺋﻪﯞﻻﺩ ﺭﻩﻫﺒﻪﺭﻟﯩﺮﯨﻨﯩﯖﻤﯘ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ ﺑﯩﺮ ﭘﺎﺭﺗﯩﻴﯩﻠﯩﻚ ﺗﯜﺯﯛﻣﯩﺪﯨﻦ ﯞﺍﺯ ﻛﻪﭼﻤﻪﻳﺪﯨﻐﺎﻧﻠﯩﻘﯩﻨﯩﯔ ﺑﯩﺸﺎﺭﯨﺘﻰ ﺩﻩﭖ ﻗﺎﺭﺍﺷﻤﺎﻗﺘﺎ.

ﺧﯘ ﺟﯩﻨﺘﺎﯞﻧﯩﯔ ﺩﻭﻛﻼﺗﯩﺪﺍ، ﺋﯩﺴﻼﻫﺎﺕ ﺭﻭﻫﻰ ﺑﺎﺭ ﺩﻩﭖ ﻗﺎﺭﯨﻐﯘﭼﻰ ﺋﺎﻧﺎﻟﯩﺰﭼﯩﻼﺭﺩﯨﻦ ﺟﯘﺩﯗ ،ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﯩﻨﻰ ﺋﯚﺯﻟﯩﺮﯨﮕﻪ ﺯﯙﺭﯛﺭ ﺩﻩﭖ ﻗﺎﺭﯨﺸﯩﻨﯩﯔ ﺋﯚﺯﯨﻨﻰ ﺋﯩﺴﻼﻫﺎﺕ ﺭﻭﻫﯩﻨﯩﯔ ﺋﯩﭙﺎﺩﯨﺴﻰ ﺩﻩﭖ ﻗﺎﺭﺍﻳﺪﯗ ﻫﻪﻡ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﻩﻳﺪﯗ: " ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﻰ ﻛﯩﭽﯩﻚ ﺋﯩﺶ ﺋﻪﻣﻪﺱ ، ﺋﺎﺳﺘﺎ ‏- ﺋﺎﺳﺘﺎ ﻗﻪﺩﻩﻡ ﺑﺎﺳﻘﯘﭺ ﺑﯩﻠﻪﻥ ﺑﻮﻟﯩﺪﯗ ، ﺑﯘ ﺗﯜﺭ ﺋﯩﺴﻼﻫﺎﺗﻨﯩﯔ ﺩﺭﺍﻣﺎﺗﯩﻚ ﺷﻪﻛﯩﻠﺪﻩ ﺑﯩﺮﺩﯨﻨﻼ ﺋﻮﺗﺘﯘﺭﯨﻐﺎ ﭼﯩﻘﯩﺸﯩﻨﻰ ﻛﯜﺗﯜﺵ ﺗﻮﻏﺮﺍ ﺋﻪﻣﻪﺱ."

4 ‏- ﺋﻪﯞﻻﺩ ﻛﻮﻣﻤﯘﻧﯩﺴﺘﻼﺭﺩﯨﻤﯘ ﺋﯜﻣﯩﺖ ﻳﻮﻕ

ﺑﯘ ﻗﯧﺘﯩﻤﻘﻰ ﻗﯘﺭﯗﻟﺘﺎﻳﺪﺍ ، ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﻨﯩﯔ ﺋﻪﯓ ﺩﯨﻘﻘﯩﺘﯩﻨﻰ ﺗﺎﺭﺗﻘﺎﻥ ﻧﯘﻗﺘﺎ، 17 ‏- ﻗﯘﺭﯗﻟﺘﺎﻱ ﺋﺎﺧﺒﺎﺭﺍﺕ ﺑﺎﻳﺎﻧﺎﺗﭽﯩﺴﻰ ﻟﻰ ﺩﯗﺷﯧﯖﻨﯩﯔ ﻗﯘﺭﯗﻟﺘﺎﻱ ﻫﺎﺭﭘﯩﺴﯩﺪﺍ ﻗﯩﻠﻐﺎﻥ ﺳﯚﺯﯨﺪﯨﻜﻰ ﻣﯘﻧﯘ ﺑﺎﻳﺎﻧﻼﺭ، " ﺧﯩﺘﺎﻱ ﺳﯩﻴﺎﺳﯩﻲ ﺗﯜﺯﯛﻟﻤﻪ ﺋﯩﺴﻼﻫﺎﺗﯩﻨﻰ ﺩﺍﯞﺍﻣﻼﺷﺘﯘﺭﯨﺪﯗ، ﺋﻪﻣﻤﺎ، ﻏﻪﺭﺑﭽﻪ ﺳﯩﻴﺎﺳﯩﻲ ﺗﯜﺯﯛﻟﻤﯩﻨﻰ ﺋﯜﻟﮕﻪ ﺋﺎﻟﻤﺎﻳﺪﯗ ."

ﺋﺎﻧﺎﻟﯩﺰﭼﯩﻼﺭ ﻣﺎﻧﺎ ﺑﯘ ﺑﺎﻳﺎﻧﻨﻰ 17 ‏- ﻗﯘﺭﯗﻟﺘﺎﻳﻨﯩﯔ ﺧﯘﻻﺳﻪ ﺳﯚﺯﻯ ﺩﻩﭖ ﻗﺎﺭﯨﻤﺎﻗﺘﺎ ﯞﻩ 4 ‏- ﺋﻪﯞﻻﺕ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﺭﻩﻫﺒﻪﺭﻟﯩﻜﯩﺪﯨﻦ ﺧﯩﺘﺎﻳﻨﯩﯔ ﺳﯩﻴﺎﺳﯩﻲ ﺗﯜﺯﯛﻟﻤﯩﺴﯩﮕﻪ ﺗﯜﭖ ﺧﺎﺭﺍﻛﺘﯧﺮﻟﯩﻚ ﺋﯚﺯﮔﻪﺭﺗﯩﺶ ﺋﻪﻛﯩﻠﯩﺶ ﺋﯜﻣﯩﺪﯨﻨﻰ ﻛﯜﺗﯜﺷﻜﻪ ﺑﻮﻟﻤﺎﻳﺪﯗ ﺩﻩﭖ ﺧﯘﻻﺳﻪ ﭼﯩﻘﺎﺭﻣﺎﻗﺘﺎ. (ﺷﯚﻫﺮﻩﺕ ﻫﻮﺷﯘﺭ)