17 ‏- ﻗﯘﺭﯗﻟﺘﺎﻱ ﯞﻩ ﺋﯘﻳﻐﯘﺭﻻﺭ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺑﯜﮔﯜﻥ، ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ 17 ‏-ﻧﯚﯞﻩﺗﻠﯩﻚ ﻗﯘﺭﯗﻟﺘﯩﻴﯩﻨﯩﯔ 5 ‏- ﻛﯜﻧﻰ. ﺑﯘ ﭘﺮﻭﮔﺮﺍﻣﯩﻤﯩﺰﺩﺍ، ﺋﯘﻳﻐﯘﺭﻻﺭﻧﯩﯔ ﺑﯘ ﻗﯘﺭﯗﻟﺘﺎﻳﻐﺎ ﻗﺎﺭﯨﺘﺎ ﺩﯨﻘﻘﻪﺕ ‏- ﺋﯧﺘﯩﺒﺎﺭﻯ ﻗﺎﻧﭽﯩﻠﯩﻚ؟ ﺩﯨﻘﻘﻪﺕ ﻗﯩﻠﻐﺎﻧﻼﺭ ﻗﯘﺭﯗﻟﺘﺎﻳﺪﯨﻦ ﻧﯧﻤﯩﻠﻪﺭﻧﻰ ﻛﯜﺗﯜﯞﺍﺗﯩﺪﯗ؟ ﺩﯦﮕﻪﻥ ﻣﻪﺯﻣﯘﻧﻼﺭ ﺗﻮﻏﺮﯨﺴﯩﺪﺍ، ﻛﺎﻧﺎﺩﺍﺩﺍ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﻳﺎﺯﻏﯘﭼﻰ ﺯﯗﻟﭙﯩﻘﺎﺭ ﺑﯩﻠﻪﻥ ﺗﯜﺭﻛﯩﻴﯩﺪﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﺋﻮﻏﯘﺯﺧﺎﻥ، ﻣﯘﺧﺒﯩﺮﯨﻤﯩﺰﻧﯩﯔ ﺳﻮﺋﺎﻟﯩﻐﺎ ﺋﯧﻠﺨﻪﺕ ﺋﺎﺭﻗﯩﻠﯩﻖ ﺟﺎﯞﺍﺏ ﻗﺎﻳﺘﯘﺭﯗﭖ، 17 ‏- ﻗﯘﺭﯗﻟﺘﺎﻳﻐﺎ ﺩﯨﻘﻘﯩﺘﯩﻨﻰ ﻫﯧﭻ ﺑﻪﺭﻣﯩﮕﻪﻧﻠﯩﻜﯩﻨﻰ، ﺳﻪﯞﻩﺑﯩﻨﯩﯔ ﺑﻮﻟﺴﺎ، ﺑﯘ ﻗﯘﺭﯗﻟﺘﺎﻳﺪﺍ ﻳﯧﯖﻰ ﮔﻪﭖ ﺑﻮﻟﯩﺪﯨﻐﺎﻧﻠﯩﻘﯩﻐﺎ ﺋﯩﺸﻪﻧﻤﻪﺳﻠﯩﻜﻰ ﺋﯩﻜﻪﻧﻠﯩﮕﯩﻨﻰ ﺑﯩﻠﺪﯛﺭﯛﺷﺘﻰ. ﺑﯘ ﺧﯩﻠﺪﯨﻜﻰ ﺋﯩﻨﻜﺎﺱ، ﯞﻩﺗﻪﻥ ﺋﯩﭽﯩﺪﯨﻜﻰ ﺑﯩﺮ ﺩﯦﻬﻘﺎﻥ ﺗﻪﺭﯨﭙﯩﺪﯨﻨﻤﯘ ﺗﻪﻛﺮﺍﺭﻻﻧﺪﻯ.

ﺋﯩﮕﯩﻠﯩﺸﯩﻤﯩﺰﭼﻪ، ﯞﻩﺗﻪﻥ ﺋﯩﭽﯩﺪﯨﻜﯩﻠﻪﺭ ﭘﻪﻗﻪﺕ ﺋﻮﻳﯘﺷﺘﯘﺭﯗﻟﻐﺎﻥ ﺳﻮﺭﯗﻧﻼﺭﺩﯨﻼ ﻗﯘﺭﯗﻟﺘﺎﻱ ﭘﺮﻭﮔﺮﺍﻣﻤﯩﻠﯩﺮﯨﻨﻰ ﻛﯚﺭﯛﯞﺍﺗﯩﺪﯗ؛ ﺋﻪﻣﻤﺎ ﻣﯘﻧﺪﺍﻕ ﺗﻪﺷﻜﯩﻠﻠﯩﻨﯩﺸﺘﯩﻦ ﺧﺎﻟﯩﻲ ﻛﯩﺸﯩﻠﻪﺭ، ﺑﯘ ﻳﯩﻐﯩﻨﻐﺎ ﺩﯨﻘﻘﻪﺕ ‏- ﺋﯧﺘﯩﺒﺎﺭﯨﻨﻰ ﺑﻪﺭﻣﻪﻳﺪﯗ، ﭘﻪﻗﻪﺕ ﺑﯩﺮ ﻗﯩﺴﯩﻢ ﺯﯨﻴﺎﻟﯩﻴﻼﺭﻻ، ﺑﯘ ﻗﯘﺭﯗﻟﺘﺎﻳﻨﻰ ﺩﯨﻘﻘﻪﺕ ﺑﯩﻠﻪﻥ ﻛﯚﺯﯨﺘﯩﯟﺍﺗﯩﺪﯗ. ﺳﻮﺋﺎﻟﻠﯩﺮﯨﻤﯩﺰﻏﺎ ﺑﯧﺮﯨﻠﮕﻪﻥ ﺟﺎﯞﺍﺑﻼﺭﺩﯨﻦ ﻗﺎﺭﯨﻐﺎﻧﺪﺍ، ﺑﯘﻻﺭﻧﯩﯔ ﻛﯚﺯﯨﺘﯩﺸﯩﻤﯘ، ﻗﯘﺭﯗﻟﺘﺎﻳﺪﯨﻦ، ﺋﺎﻻﻫﯩﺪﻩ ﻧﻪﺗﯩﺠﻪ ﻛﯜﺗﯜﺵ ﺋﻪﻣﻪﺱ، ﭘﻪﻗﻪﺕ، ﯞﻩﺯﯨﻴﻪﺗﻨﻰ ﭼﯜﺷﯩﻨﯩﭗ ﻣﯧﯖﯩﺶ ﻣﻪﻗﺴﯩﺘﯩﺪﻩ ﺑﻮﻟﻐﺎﻥ. ﺑﯘ، ﻳﻪﻧﻪ ﺑﯩﺮ ﺗﯜﺭﺩﯨﻜﻰ ﺋﯩﻨﻜﺎﺱ ﻗﯩﻠﻐﯘﭼﻰ ﻛﯩﺸﯩﻠﻪﺭ ﺑﻮﻟﯘﭖ، ﺑﯘ ﺧﯩﻠﺪﯨﻜﻰ ﻛﯚﺯﻩﺗﻜﯜﭼﻰ ﻛﯩﺸﯩﻠﻪﺭﺩﯨﻦ ﺑﯩﺮﻯ، ﺋﯘﻳﻐﯘﺭ ﺋﯧﻠﯩﺪﻩ 15 ﻳﯩﻞ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺗﻘﯘﭼﯩﺴﻰ ﺑﻮﻟﻐﺎﻥ، ﻫﺎﺯﯨﺮ ﺋﺎﻣﯧﺮﯨﻜﯩﺪﺍ ﻳﺎﺷﺎﯞﺍﺗﻗﺎﻥ، ﺋﯩﻠﺸﺎﺕ ﻫﻪﺳﻪﻧﺠﺎﻥ ﺋﻪﭘﻪﻧﺪﯨﺪﯗﺭ.

ﻫﯚﺭﻣﻪﺗﻠﯩﻚ ﺋﻮﻗﯘﺭﻣﻪﻧﻠﻪﺭ، ﻧﯧﻤﻪ ﺋﯜﭼﯜﻥ ﺋﯘﻳﻐﯘﺭﻻﺭ 17 ‏- ﻗﯘﺭﯗﻟﺘﺎﻳﻐﺎ ﻗﯩﺰﯨﻘﻤﺎﻳﺪﯗ؟ ﺑﯘ ﺳﯩﻴﺎﺳﻪﺗﻜﻪ ﻗﯩﺰﯨﻘﻤﺎﺳﻠﯩﻘﺘﯩﻨﻤﯘ؟ ﻳﺎﻛﻰ ﺋﯚﺯ ﺳﯩﻴﺎﺳﯩﻲ ﺗﻪﻗﺪﯨﺮﻯ ﺋﯜﺳﺘﯩﺪﻩ ﺑﺎﺵ ﻗﺎﺗﯘﺭﻣﯩﻐﯩﻨﻰ ﺋﯜﭼﯜﻧﻤﯘ؟ ﺋﯩﻠﺸﺎﺕ ﻫﻪﺳﻪﻧﺠﺎﻥ ﺋﻪﭘﻪﻧﺪﯨﻨﯩﯔ ﻣﯘﻻﻫﯩﺰﯨﺴﻰ ﻳﯘﻗﯩﺮﻯ ﺳﻮﺋﺎﻟﻼﺭﻏﺎ "ﻳﺎﻕ" ﺩﻩﭖ ﺟﺎﯞﺍﭖ ﺑﯧﺮﯨﺪﯗ.

ﻳﯘﻗﯩﺮﯨﺪﯨﻜﻰ ﺋﯘﻟﯩﻨﯩﺸﺘﯩﻦ، ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﺴﯩﻨﯩﯔ 17 ‏- ﻧﯚﯞﻩﺗﻠﯩﻚ ﻗﯘﺭﯗﻟﺘﯩﻴﯩﻐﺎ ﻗﺎﺭﯨﺘﺎ ﺋﯩﻜﻜﻰ ﺧﯩﻞ ﻛﯚﺯ ﻗﺎﺭﺍﺷﺘﯩﻜﻰ ﻛﯩﺸﯩﻠﻪﺭ ﺑﯩﻠﻪﻥ ﺋﯧﻠﯩﭗ ﺑﺎﺭﻏﺎﻥ ﺳﯚﻫﺒﻪﺗﻠﯩﺮﯨﻨﯩﯔ ﺗﻪﭘﺴﯩﻼﺗﯩﻨﻰ ﺋﺎﯕﻼﻳﺴﯩﻠﻪﺭ.