ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻗﻰ ﺧﺎﺗﯩﺮﯨﺴﯩﻨﯩﯔ 2007 ‏- ﻳﯩﻠﻘﻰ ﺋﻪﻫﯟﺍﻟﯩﻨﻰ ﺗﻪﻧﻘﯩﺪ ﻗﯩﻠﺪﻯ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻨﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻣﻪﺭﻛﯩﺰﻯ ﺋﺎﻣﯧﺮﯨﻜﯩﻨﯩﯔ ﻧﻴﯘ ﻳﻮﺭﻙ ﺷﻪﻫﯩﺮﯨﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﭘﻪﻳﺸﻪﻧﺒﻪ ﻛﯜﻧﻰ ﺩﯗﻧﻴﺎﺩﯨﻜﻰ ﻫﻪﺭ ﻗﺎﻳﺴﻰ ﺩﯙﻟﻪﺗﻠﻪﺭﻧﯩﯔ 2007 ‏- ﻳﯩﻠﻘﻰ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﻰ ﺗﻮﻏﺮﯨﺴﯩﺪﺍ ﺩﻭﻛﻼﺕ ﺋﯧﻼﻥ ﻗﯩﻠﯩﭗ، ﺧﯩﺘﺎﻳﻨﻰ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻳﯩﻐﯩﻨﻰ ﺋﯚﺗﻜﯜﺯﯛﺷﻜﻪ ﺋﺎﺯ ﻗﺎﻟﻐﺎﻥ ﺑﻮﻟﺴﯩﻤﯘ، ﻟﯧﻜﯩﻦ ﭘﯘﻗﺮﺍﻻﺭﻧﯩﯔ ﺋﺎﺳﺎﺳﻰ ﻛﯩﺸﯩﻠﯩﻚ ﻫﻮﻗﯘﻗﻰ، ﺟﯜﻣﻠﯩﺪﯨﻦ ﺋﯩﭙﺎﺩﻩ ﺋﻪﺭﻛﯩﻨﻠﯩﻜﻰ، ﻳﯩﻐﯩﻠﯩﺶ ﺋﻪﺭﻛﯩﻨﻠﯩﻜﻰ ﯞﻩ ﺩﯨﻨﯩﻲ ﺋﯧﺘﯩﻘﺎﺩ ﺋﻪﺭﻛﯩﻨﻠﯩﻜﻰ ﺋﯜﺯﻟﯜﻛﺴﯩﺰ ﭼﻪﻛﻠﻪﺷﻜﻪ ﺋﯘﭼﺮﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺑﻮﻟﯘﭘﻤﯘ ﺑﯘ ﺳﺎﻫﻪﻟﻪﺭﺩﯨﻜﻰ ﭼﻪﻛﻠﯩﻤﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﺗﯧﺨﯩﻤﯘ ﻗﺎﺗﺘﯩﻖ ﻳﻮﻟﻐﺎ ﻗﻮﻳﯘﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ

ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﭘﻪﻳﺸﻪﻧﺒﻪ ﻛﯜﻧﻰ ﺋﯧﻼﻥ ﻗﯩﻠﻐﺎﻥ ﺩﻭﻛﻼﺗﻨﯩﯔ ﺧﯩﺘﺎﻳﻐﺎ ﺩﺍﺋﯩﺮ ﻗﯩﺴﻤﯩﺪﺍ ﺧﯩﺘﺎﻱ ﭼﻮﯓ ﻗﯘﺭﯗﻗﻠﯘﻗﯩﻨﯩﯔ 2007 ‏- ﻳﯩﻠﻘﻰ ﻛﯩﺸﯩﻠﯩﻚ ﻫﻮﻗﯘﻕ ﯞﻩﺯﯨﻴﯩﺘﻰ ﺷﯘﻧﺪﺍﻗﻼ ﺗﯩﺒﻪﺕ، ﺋﯘﻳﻐﯘﺭ ﺋﯩﻠﻰ ﯞﻩ ﺧﻮﯕﻜﻮﯕﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﻰ ﺋﯜﺳﺘﯩﺪﻩ ﺋﺎﻳﺮﯨﻢ - ﺋﺎﻳﺮﯨﻢ ﺗﻮﺧﺘﯩﻠﯩﭗ، ﺑﯧﻴﺠﯩﯔ ﺩﺍﺋﯩﺮﯨﻠﯩﺮﯨﻨﯩﯔ ﺋﯩﭙﺎﺩﻩ ﺋﻪﺭﻛﯩﻨﻠﯩﻜﻰ، ﻣﻪﺗﺒﯘﺋﺎﺕ، ﺩﯨﻨﯩﻲ ﺋﯧﺘﯩﻘﺎﺩ ﯞﻩ ﻳﯩﻐﯩﻠﯩﺶ ﺋﻪﺭﻛﯩﻨﻠﯩﻜﯩﮕﻪ ﭼﻪﻛﻠﯩﻤﻪ ﻗﻮﻳﻐﺎﻧﻠﯩﻘﯩﻨﻰ ﺋﻪﻳﯩﺒﻠﯩﺪﻯ. ﺩﻭﻛﻼﺗﻨﯩﯔ ﻛﯩﺮﯨﺶ ﻗﯩﺴﻤﯩﺪﺍ ﻣﯘﻧﺪﺍﻕ ﺩﻩﻳﺪﯗ،" ﺧﯩﺘﺎﻱ ﺩﺍﺋﯩﺮﯨﻠﯩﺮﻯ 2008 ‏- ﻳﯩﻠﻘﻰ ﺋﻮﻟﯩﻤﭙﯩﻚ ﻳﯩﻐﯩﻨﯩﻨﯩﯔ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﻰ ﺋﯩﻠﮕﯩﺮﻯ ﺳﯜﺭﯛﺷﻜﻪ ﻳﺎﺭﺩﯨﻤﻰ ﺗﯧﮕﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﭘﯘﻗﺮﺍﻟﯩﺮﯨﻨﯩﯔ ﺋﺎﺳﺎﺳﻰ ﻛﯩﺸﯩﻠﯩﻚ ﻫﻮﻗﯘﻗﯩﻨﻰ، ﺟﯜﻣﻠﯩﺪﯨﻦ ﺋﯩﭙﺎﺩﻩ ﺋﻪﺭﻛﯩﻨﻠﯩﻜﻰ، ﻳﯩﻐﯩﻠﯩﺶ ﯞﻩ ﺩﯨﻨﯩﻲ -ﺋﯧﺘﯩﻘﺎﺩ ﺋﻪﺭﻛﯩﻨﻠﯩﻜﯩﻨﻰ ﺋﯜﺯﻟﯜﻛﺴﯩﺰ ﺭﻩﺕ ﻗﯩﻠﺪﻯ ﻳﺎﻛﻰ ﭼﻪﻛﻠﯩﺪﻯ." ﺩﻭﻛﻼﺗﺘﺎ ﺋﺎﺧﺒﺎﺭﺍﺕ ﺋﻪﺭﻛﯩﻨﻠﯩﻜﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﻮﻟﯩﻤﭙﯩﻚ ﻳﯩﻐﯩﻨﻰ ﺟﻪﺭﻳﺎﻧﯩﺪﺍ ﭼﻪﺗﺌﻪﻟﻠﯩﻚ ﻣﯘﺧﺒﯩﺮﻻﺭﻧﯩﯔ ﺧﯩﺘﺎﻳﺪﺍ ﺋﯩﺨﺘﯩﻴﺎﺭﻯ ﺯﯨﻴﺎﺭﻩﺕ ﺋﯧﻠﯩﭗ ﺑﺎﺭﺍﻻﻳﺪﯨﻐﺎﻧﻠﯩﻘﯩﻐﺎ ﯞﻩﺩﻩ ﻗﯩﻠﻐﺎﻧﻠﯩﻘﯩﻨﻰ، ﻟﯧﻜﯩﻦ ﻣﯘﺧﺒﯩﺮﻻﺭﻧﯩﯔ ﺑﯘ ﺟﻪﺭﻳﺎﻧﺪﺍ ﺗﻪﻫﺪﯨﺖ ﺳﯧﻠﯩﺶ، ﺗﯘﺗﻘﯘﻥ ﻗﯩﻠﯩﺶ ﻳﺎﻛﻰ ﺋﯩﻐﯟﺍﮔﻪﺭﭼﯩﻠﯩﻜﻜﻪ ﺋﯘﭼﺮﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﯩﻨﯩﯔ ﻣﻪﺳﺌﯘﻟﻰ ﻛﯧﻨﻨﯧﺲ ﺭﻭﺱ، ﭘﻪﻳﺸﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﺎ ﻣﯩﻠﻠﯩﻲ ﺋﺎﺧﺒﺎﺭﺍﺕ ﻛﯘﻟﯘﺑﯩﺪﺍ ﺋﯚﺗﻜﯜﺯﮔﻪﻥ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﯩﺪﺍ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﻰ ﺋﯚﺯ ﯞﺍﻗﺘﯩﺪﺍ ﺑﯩﺮ ﻗﺎﺗﺎﺭ ﯞﻩﺩﯨﻠﻪﺭﻧﻰ ﺑﻪﺭﮔﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺑﯘ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ، ﺩﻩﭖ ﺋﻪﻳﯩﺒﻠﯩﺪﻯ. ﺋﯘ" ﺧﯩﺘﺎﻱ ﺋﻮﻟﯩﻤﭙﯩﻚ ﺟﻪﺭﻳﺎﻧﯩﺪﺍ ﻛﯩﺸﯩﻠﯩﻚ ﻫﻮﻗﯘﻗﻘﺎ ﻫﯚﺭﻣﻪﺕ ﻗﯩﻠﯩﺶ ﺗﻮﻏﺮﯨﺴﯩﺪﺍ ﺑﯩﺮ ﻗﺎﺗﺎﺭ ﯞﻩﺩﯨﻠﻪﺭﻧﻰ ﺑﻪﺭﮔﻪﻥ، ﺑﻮﻟﯘﭘﻤﯘ ﭼﻪﺗﺌﻪﻟﻠﯩﻚ ﻣﯘﺧﺒﯩﺮﻻﺭﻧﯩﯔ ﺋﯩﺨﺘﯩﻴﺎﺭﻯ ﺯﯨﻴﺎﺭﻩﺕ ﺋﯧﻠﯩﭗ ﺑﯧﺮﯨﺸﯩﻐﺎ ﺭﯗﺧﺴﻪﺕ ﻗﯩﻠﯩﺶ ﻣﻪﺳﯩﻠﯩﺴﯩﺪﻩ ﯞﻩﺩﻩ ﺑﻪﺭﮔﻪﻥ ﺋﯩﺪﻯ. ﻟﯧﻜﯩﻦ ﺑﯘ ﯞﻩﺩﯨﺴﯩﺪﻩ ﺗﯘﺭﻣﯩﺪﻯ. ﺋﯘﻧﯩﯔ ﺋﯜﺳﺘﯩﮕﻪ ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻳﯩﻐﯩﻨﻰ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﺑﯩﺮ ﻗﺎﺗﺎﺭ ﺯﯨﻴﺎﻧﻜﻪﺷﻠﯩﻚ ﯞﻩﻗﻪﻟﯩﺮﯨﺪﻩ ﻣﻪﺳﺌﯘﻟﯩﻴﯩﺘﻰ ﺑﺎﺭ. ﺑﯘ ﯞﻩﻗﻪﻟﻪﺭ ﺋﺎﻗﻘﯘﻥ ﺋﯩﺸﭽﯩﻼﺭﻧﻰ ﺗﺎﺯﯨﻼﺵ، ﺋﻮﻟﯩﻤﭙﯩﻚ ﻗﯘﺭﯗﻟﯘﺷﯩﻨﻰ ﺑﺎﻫﺎﻧﻪ ﻗﯩﻠﯩﭗ، ﭘﯘﻗﺮﺍﻻﺭﻧﯩﯔ ﺋﯚﻱ-ﻣﺎﻛﺎﻧﻰ ﯞﻩ ﻳﻪﺭ - ﺯﯦﻤﯩﻨﻠﯩﺮﯨﻨﻰ ﻫﻪﻗﺴﯩﺰ ﺗﺎﺭﺗﯩﯟﯦﻠﯩﺶ، ﻛﯩﺸﯩﻠﯩﻚ ﻫﻮﻗﯘﻕ ﯞﻩ ﺋﻮﻟﯩﻤﭙﯩﻚ ﺗﻮﻏﺮﯨﺴﯩﺪﺍ ﭘﯩﻜﯩﺮ ﺑﻪﺭﮔﻪﻥ ﺋﯚﻛﺘﯩﭽﯩﻠﻪﺭ ﻫﻪﻡ ﺗﻮﺭ ﺑﯧﺘﯩﺪﻩ ﭘﯩﻜﯩﺮ ﺑﺎﻳﺎﻥ ﻗﯩﻠﻐﯘﭼﯩﻼﺭﻧﻰ ﺗﯘﺗﻘﯘﻥ ﻗﯩﻠﯩﺶ ﻗﺎﺗﺎﺭﻟﯩﻘﻼﺭ" ﺩﻩﭖ ﻛﯚﺭﺳﻪﺗﺘﻰ.

ﺋﯘﻳﻐﯘﺭ ﺋﯧﻠﯩﺪﻩ ﺋﻪﺭﻛﯩﻨﻠﯩﻚ ﺑﯘﺭﯗﻧﻘﯩﻐﺎ ﻗﺎﺭﯨﻐﺎﻧﺪﺍ ﯞﻩﻫﯩﻤﯩﻠﯩﻚ ﺗﯜﺱ ﺋﺎﻟﺪﻯ

ﺩﻭﻛﻼﺗﻨﯩﯔ ﺋﯘﻳﻐﯘﺭﻻﺭ ﻫﻪﻗﻘﯩﺪﯨﻜﻰ ﭘﺎﺭﺍﮔﺮﺍﭘﯩﺪﺍ ﺋﯘﻳﻐﯘﺭ ﺋﯩﻠﻰ ﻳﯧﻘﯩﻨﻘﻰ ﺋﻮﻥ ﻳﯩﻠﺪﺍ ﻣﯩﻠﻴﻮﻧﻠﯩﻐﺎﻥ ﺧﯩﺘﺎﻱ ﻛﯚﭼﻤﻪﻧﻠﯩﺮﯨﻨﯩﯔ ﻛﯚﭼﯜﭖ ﻛﻪﻟﮕﯩﻨﯩﮕﻪ ﻗﺎﺭﯨﻤﺎﻱ،ﺧﯩﺘﺎﻱ ﻣﯩﻠﻠﯩﺘﻰ ﻛﯚﭖ ﺳﺎﻧﻠﯩﻘﻨﻰ ﺋﯩﮕﯩﻠﯩﻤﻪﻳﺪﯨﻐﺎﻥ ﺗﯩﺒﻪﺗﺘﯩﻦ ﺑﺎﺷﻘﺎ ﺑﯩﺮﺩﯨﻦ ‏- ﺑﯩﺮ ﺭﺍﻳﻮﻥ ﻫﯧﺴﺎﺑﻠﯩﻨﯩﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ،2007 ‏- ﻳﯩﻠﻰ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﻣﯘﺳﯘﻟﻤﺎﻧﻼﺭﻏﺎ ﻗﺎﺭﯨﺘﯩﻠﻐﺎﻥ ﺩﯨﻨﯩﻲ، ﻣﻪﺩﻩﻧﯩﻴﻪﺕ ﯞﻩ ﺳﯩﻴﺎﺳﻰ ﺟﻪﻫﻪﺗﺘﯩﻜﻰ ﻛﻮﻧﺘﺮﻭﻟﻨﯩﯔ ﺷﯩﺪﺩﻩﺗﻠﯩﻚ ﺗﯜﺱ ﺋﺎﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺩﻭﻛﻼﺗﺘﺎ"ﻫﯚﻛﯜﻣﻪﺕ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﭘﻪﻗﻪﺕ ﺩﯙﻟﻪﺕ ﻛﻮﻧﺘﺮﻭﻟﻠﯩﻘﯩﺪﯨﻜﻰ ﺩﯨﻨﯩﻲ ﺳﻮﺭﯗﻧﻼﺭ ﯞﻩ ﺋﯚﻟﯩﻤﺎﻻﺭﻧﯩﯔ ﭘﺎﺋﺎﻟﯩﻴﯩﺘﯩﮕﯩﻼ ﺭﯗﺧﺴﻪﺕ ﻗﯩﻠﯩﭗ، ﻳﺎﺵ ﺋﯚﺳﻤﯜﺭﻟﻪﺭﻧﯩﯔ ﺩﯨﻨﯩﻲ ﭘﺎﺋﺎﻟﯩﻴﻪﺗﻜﻪ ﻗﺎﺗﻨﯩﺸﯩﺸﯩﻨﻰ، ﺑﻪﺯﻯ ﺟﺎﻳﻼﺭﺩﺍ ﻣﻪﺳﭽﯩﺘﻜﻪ ﻛﯩﺮﯨﺸﯩﻨﻰ ﭼﻪﻛﻠﯩﺪﻯ" ﺩﻩﻳﺪﯗ.

ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﯩﻨﯩﯔ ﺋﺎﺳﯩﻴﺎ ﺋﯩﺸﻠﯩﺮﻯ ﻣﻪﺳﺌﯘﻟﻰ ﺳﻮﻓﯩﻴﻪ ﺭﯨﭽﺎﺭﺩﺳﻮﻥ، ﻣﯘﺧﺒﯩﺮﯨﻤﯩﺰﻧﯩﯔ ﺑﯘ ﻫﻪﻗﺘﯩﻜﻰ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﯩﭗ، ﺋﯘﻳﻐﯘﺭ ﺋﯧﻠﯩﺪﻩ ﺑﺎﺳﺘﯘﺭﯗﺷﻨﯩﯔ ﺗﯩﺒﻪﺗﻜﻪ ﻗﺎﺭﯨﻐﺎﻧﺪﺍ ﺷﯩﺪﺩﻩﺗﻠﯩﻚ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﺘﻰ. ﺳﻮﻓﯩﻴﻪ ﺭﯨﭽﺎﺭﺩﺳﻮﻥ،"ﺷﯩﻨﺠﺎﯕﻨﯩﯔ ﯞﻩﺯﯨﻴﯩﺘﻰ ﺗﯩﺒﻪﺗﻜﻪ ﻗﺎﺭﯨﻐﺎﻧﺪﺍ ﺑﯩﺮ ﺋﺎﺯ ﭘﻪﺭﻗﻠﯩﻨﯩﺪﯗ. ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺑﯘ ﻳﻪﺭﺩﯨﻜﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﻰ ﺑﯩﺮ ﻗﻪﺩﻩﺭ ﺷﯩﺪﺩﻩﺗﻠﯩﻚ ﺋﯧﻠﯩﭗ ﺑﯧﺮﯨﻠﻤﺎﻗﺘﺎ. ﺑﯩﺰ ﺩﯨﻨﯩﻲ، ﻣﻪﺩﻩﻧﯩﻴﻪﺕ، ﺳﯩﻴﺎﺳﻰ ﺟﻪﻫﻪﺗﺘﯩﻜﻰ ﺋﯩﭙﺎﺩﻩ ﺋﻪﺭﻛﯩﻨﻠﯩﻜﯩﻨﯩﯔ ﺑﯘﺭﯗﻧﻘﯩﻐﺎ ﻗﺎﺭﯨﻐﺎﻧﺪﺍ ﯞﻩﻫﯩﻤﯩﻠﯩﻚ ﺗﯜﺱ ﺋﺎﻟﻐﺎﻧﻠﯩﻘﯩﻨﻰ ﻛﯚﺭﯛﯞﺍﺗﯩﻤﯩﺰ" ﺩﻩﭖ ﻛﯚﺭﺳﻪﺗﺘﻰ. ﺭﯨﭽﺎﺭﺩﺳﻮﻥ ﺧﺎﻧﯩﻢ ﻳﻪﻧﻪ،" ﺷﯩﻨﺠﺎﯓ ﺗﯩﺒﻪﺗﻜﻪ ﺋﻮﺧﺸﺎﺵ ﺧﯩﺘﺎﻱ ﻫﯚﻛﯜﻣﯩﺘﻰ ﺩﯨﻨﯩﻲ ﺋﻪﺭﻛﯩﻨﻠﯩﻜﻨﻰ، ﺟﯜﻣﻠﯩﺪﯨﻦ ﺩﯨﻨﯩﻲ، ﺑﯚﻟﮕﯜﻧﭽﻰ ﯞﻩ ﻗﯘﺗﺮﺍﺗﻘﯘ ﺳﯚﺯ ﺋﯩﺒﺎﺭﯨﻠﻪﺭﻧﻰ ﻛﻪﺳﻜﯩﻦ ﺑﺎﺳﺘﯘﺭﯨﯟﺍﺗﻘﺎﻥ ﺟﺎﻳﻼﺭﻧﯩﯔ ﺑﯩﺮﻯ" ﺩﻩﭖ ﺋﻪﺳﻜﻪﺭﺗﯩﭗ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻳﺎﺵ - ﺋﯚﺳﻤﯜﺭﻟﻪﺭﻧﯩﯔ ﺩﯨﻨﯩﻲ ﺋﯩﺒﺎﺩﻩﺕ ﻗﯩﻠﯩﺸﯩﻨﻰ، ﺑﻮﻟﯘﭘﻤﯘ ﻣﻪﺳﭽﯩﺘﻜﻪ ﻛﯩﺮﯨﺸﯩﻨﻰ ﭼﻪﻛﻠﯩﮕﻪﻧﻠﯩﻜﯩﻨﻰ ﺋﻪﻳﯩﺒﻠﯩﺪﻯ.

ﺩﻭﻛﻼﺗﺘﺎ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ 2007 ‏- ﻳﯩﻠﻰ 6 ‏- ﺋﺎﻳﺪﺍ ﺋﯘﻳﻐﯘﺭﻻﺭﻧﯩﯔ ﭘﺎﺳﭙﻮﺭﺗﯩﻨﻰ ﻣﯘﺳﺎﺩﯨﺮﻩ ﻗﯩﻠﻐﺎﻧﻠﯩﻘﯩﻨﻰ ﺋﺎﻻﻫﯩﺪﻩ ﺗﻪﻛﯩﺘﻠﻪﭖ، ﻣﯘﺳﯘﻟﻤﺎﻧﻼﺭﻧﯩﯔ ﺗﺎﺭﻗﺎﻕ ﻫﻪﺝ ﻗﯩﻠﯩﺸﯩﻨﻰ ﭼﻪﻛﻠﯩﻤﻪﻛﭽﻰ ﺑﻮﻟﻐﺎﻧﻠﯩﻘﯩﻨﻰ ﺋﻪﻳﯩﺒﻠﯩﺪﻯ ﺷﯘﻧﺪﺍﻗﻼ ﺧﯩﺘﺎﻱ 2007 ‏- ﻳﯩﻠﻰ ﻳﺎﻧﯟﺍﺭﺩﺍ ﺋﯧﻼﻥ ﻗﯩﻠﻐﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﻫﻪﺭﯨﻜﯩﺘﯩﻨﯩﯔ ﻻﮔﯩﺮﯨﻨﻰ ﺗﺎﺯﯨﻼﺵ ﯞﻩﻗﻪﺳﻰ ﻫﻪﻗﻘﯩﺪﻩ ﺗﻮﺧﺘﺎﻟﺪﻯ ﯞﻩ ﺗﻪﺭﻩﭘﺴﯩﺰ ﺋﺎﻧﺎﻟﯩﺰﭼﯩﻼﺭﻧﯩﯔ ﺑﯘ ﯞﻩﻗﻪﮔﻪ ﮔﯘﻣﺎﻥ ﺑﯩﻠﻪﻥ ﻗﺎﺭﺍﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﺭﯨﭽﺎﺭﺩﺳﻮﻥ ﺧﺎﻧﯩﻢ ﺑﯘ ﯞﻩﻗﻪ ﺗﻮﻏﺮﯨﺴﯩﺪﺍ ﻣﯘﻧﺪﺍﻕ ﺩﻩﻳﺪﯗ،" ﺑﯩﺰ ﻫﯚﻛﯜﻣﻪﺕ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﺴﻼﻡ ﻫﻪﺭﯨﻜﯩﺘﻰ ﺗﯧﺮﺭﻭﺭﭼﻰ ﺗﻪﺷﻜﯩﻼﺗﯩﻨﯩﯔ ﻻﮔﯧﺮﻯ، ﺩﻩﭖ ﺋﯧﻼﻥ ﻗﯩﻠﻐﺎﻥ ﺑﯘ ﯞﻩﻗﻪﺩﻩ 18 ﺋﺎﺩﻩﻡ ﺋﯚﻟﮕﻪﻧﻠﯩﻜﯩﻨﻰ، 17 ﺋﺎﺩﻩﻣﻨﯩﯔ ﺋﻪﺳﯩﺮ ﺋﯧﻠﯩﻨﻐﺎﻧﻠﯩﻘﯩﻨﻰ ﺑﯩﻠﯩﻤﯩﺰ. ﻟﯧﻜﯩﻦ ﺑﯘ ﺗﻪﺷﻜﯩﻼﺗﻨﯩﯔ 2001 ‏- ﻳﯩﻠﺪﯨﻦ ﻛﯧﻴﯩﻦ ﻣﻪﯞﺟﯘﺕ ﻳﺎﻛﻰ ﺋﻪﻣﻪﺳﻠﯩﻜﻰ ﺗﻪﺭﻩﭘﺴﯩﺰ ﺋﺎﻧﺎﻟﯩﺰﭼﯩﻼﺭ ﺗﻪﺭﯨﭙﯩﺪﯨﻦ ﮔﯘﻣﺎﻥ ﺑﯩﻠﻪﻥ ﻗﺎﺭﺍﻟﻤﺎﻗﺘﺎ ." ﺋﯘ، 2007 ‏- ﻳﯩﻠﻰ ﻧﻮﻳﺎﺑﯩﺮﺩﺍ ﺋﻪﺳﯩﺮﻟﻪﺭﻧﯩﯔ 5 ﯨﻨﯩﯔ ﺋﯚﻟﯜﻡ ﺟﺎﺯﺍﺳﯩﻐﺎ، ﺑﯩﺮﯨﻨﯩﯔ ﻣﯘﺩﺩﻩﺗﺴﯩﺰ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﻐﺎﻧﻠﯩﻘﯩﻨﻰ ﺗﻪﻧﻘﯩﺪ ﻗﯩﻠﺪﻯ.

ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ ﺋﻮﻟﯩﻤﭙﯩﻜﻨﻰ ﺳﯩﻴﺎﺳﯩﻴﻼﺷﺘﯘﺭﯗﯞﺍﺗﯩﺪﯗ

ﺩﻭﻛﻼﺗﺘﺎ ﻳﻪﻧﻪ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺋﺎﻳﺮﯨﻢ ﯞﻩﻗﻪﻟﻪﺭﻧﻰ ﺑﺎﻫﺎﻧﻪ ﻗﯩﻠﯩﭗ، ﺋﺎﻣﻤﯩﯟﻯ ﭘﯩﻜﯩﺮﻟﻪﺭﻧﻰ ﺗﯧﺮﺭﻭﺭﭼﯩﻠﯩﻖ ﯞﻩ ﺑﯚﻟﮕﯜﻧﭽﯩﻠﯩﻜﻜﻪ ﺑﺎﻏﻼﭖ ﺟﺎﺯﺍﻻﯞﺍﺗﻘﺎﻧﻠﯩﻘﯩﻨﻰ، ﺑﻮﻟﯘﭘﻤﯘ ﻧﻮﺑﯩﻞ ﻣﯘﻛﺎﭘﺎﺗﯩﻨﯩﯔ ﻧﺎﻣﺰﺍﺗﻰ ﺭﺍﺑﯩﻴﻪ ﻗﺎﺩﯨﺮﻧﻰ" ﺗﯧﺮﺭﻭﺭﭼﻰ" ﺩﻩﭖ ﺋﯧﻼﻥ ﻗﯩﻠﯩﭗ، ﺋﯘﻧﯩﯔ 2 ﺋﻮﻏﻠﯩﻨﻰ ﺗﯜﺭﻣﯩﮕﻪ ﺗﺎﺷﻠﯩﻐﺎﻧﻠﯩﻘﯩﻨﻰ، ﺑﯩﺮﯨﻨﻰ" ﺑﯚﻟﮕﯜﻧﭽﯩﻠﯩﻚ" ﺑﯩﻠﻪﻥ، ﻳﻪﻧﻪ ﺑﯩﺮﯨﻨﻰ"ﺑﺎﺝ ﺋﻮﻏﺮﯨﻼﺵ" ﺑﯩﻠﻪﻥ ﺟﺎﺯﺍﻟﯩﻐﺎﻧﻠﯩﻘﯩﻨﻰ ﺗﻪﻧﻘﯩﺪ ﻗﯩﻠﺪﻯ.

ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﻣﻪﺯﻛﯘﺭ ﺩﻭﻛﻼﺗﯩﺪﺍ ﻳﻪﻧﻪ، ﺧﯩﺘﺎﻱ ﺋﯩﺸﭽﯩﻠﯩﺮﯨﻨﯩﯔ ﺋﯘﻳﯘﺷﻤﺎ ﻗﯘﺭﯗﺵ ﻫﻮﻗﯘﻗﻰ ﭼﻪﻛﻠﯩﻨﯩﯟﺍﺗﻘﺎﻧﻠﯩﻘﯩﻨﻰ، ﺋﺎﻳﺎﻟﻼﺭ ﻫﻮﻗﯘﻗﻰ ﺩﻩﭘﺴﻪﻧﺪﻩ ﻗﯩﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﯞﻩ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﺋﻪﻣﮕﻪﻛﻜﻪ ﺳﯧﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﺗﻪﻧﻘﯩﺪ ﻗﯩﻠﺪﻯ. ﻟﯧﻜﯩﻦ ﺧﯩﺘﺎﻱ ﻫﯚﻛﯜﻣﯩﺘﻰ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﻮﻟﯩﻤﭙﯩﻚ ﺟﻪﺭﻳﺎﻧﯩﺪﺍ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻗﻰ ﺧﺎﺗﯩﺮﯨﺴﯩﻨﻰ ﻳﺎﺧﺸﯩﻼﺵ ﻫﻪﻗﻘﯩﺪﯨﻜﻰ ﺑﯧﺴﯩﻤﯩﻨﻰ ﺋﻮﻟﯩﻤﭙﯩﻜﻨﻰ ﺳﯩﻴﺎﺳﯩﻴﻼﺷﺘﯘﺭﯗﺵ، ﺩﻩﭖ ﺋﻪﻳﯩﺒﻠﯩﻤﻪﻛﺘﻪ. ﺋﺎﻟﺪﯨﻨﻘﻰ ﻛﯜﻧﻰ ﺧﯩﺘﺎﻱ ﺗﺎﺷﻘﯩﻲ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻘﻰ ﺋﯧﻼﻥ ﻗﯩﻠﻐﺎﻥ ﺑﯘ ﻫﻪﻗﺘﯩﻜﻰ ﺑﺎﻳﺎﻧﺎﺗﯩﺪﺍ ﺧﯩﺘﺎﻳﻨﯩﯔ ﺑﯘ ﺗﯜﺭﺩﯨﻜﻰ ﺑﯧﺴﯩﻤﻼﺭﻏﺎ ﻫﻪﺭﮔﯩﺰ ﺗﯩﺰ ﭘﯜﻛﻤﻪﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. (ﺋﻪﺭﻛﯩﻦ)