ﺩﯗﻧﻴﺎ ﺋﻪﻳﺪﯨﺰ ﻛﯜﻧﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺩﻭﻛﺘﻮﺭ ﻣﯘﻫﻪﻣﻤﻪﺕ ﺋﯩﻤﯩﻦ ﺋﻪﭘﻪﻧﺪﯨﻨﻰ ﺯﯨﻴﺎﺭﻩﺕ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

2006 – ﻳﯩﻠﻰ 1 – ﺩﯦﻜﺎﺑﯩﺮ ﻛﯜﻧﻰ ﺧﯩﺘﺎﻳﻨﯩﯔ ﺷﯧﻨﻴﺎﯕﺸﻪﻫﯩﺮﯨﺪﻩ ﺑﯩﺮ ﺭﺍﻫﯩﺒﻪ ﭼﻮﯓ ﺑﯩﺮ ﻗﯩﺰﯨﻞ ﻟﯧﻨﺘﺎ ﺗﻪﻳﻴﺎﺭﻟﯩﻤﺎﻗﺘﺎ. AFP

ﺑﯘ ﻳﯩﻠﻘﻰ ﺩﯗﻧﻴﺎ ﺋﻪﻳﺪﯨﺰ ﻛﯜﻧﯩﻨﯩﯔ ﺑﺎﺵ ﺗﯧﻤﯩﺴﻰ "ﺋﻪﻳﺪﯨﺰﻧﻰ ﺗﯩﺰﮔﯩﻨﻠﻪﭖ، ﯞﻩﺩﯨﻤﯩﺰﺩﻩ ﺗﯘﺭﺍﻳﻠﻰ" ﺩﯦﮕﻪﻥ ﺷﯘﺋﺎﺭ ﺑﻮﻟﯘﭖ، ﺑﯘ ﻛﯜﻧﻨﯩﯔ ﻳﯧﺘﯩﭗ ﻛﯧﻠﯩﺸﻰ ﺑﯩﻠﻪﻥ، ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﯩﻨﯩﯔ ﺑﺎﺵ ﻛﺎﺗﯩﭙﻰ ﻛﻮﻓﻰ ﺋﺎﻧﻨﺎﻥ ﻫﻪﺭﻗﺎﻳﺴﻰ ﺩﯙﻟﻪﺕ ﺭﻩﻫﺒﻪﺭﻟﯩﺮﯨﻨﻰ ﺋﯚﺯ ﯞﻩﺩﯨﻠﯩﺮﯨﺪﻩ ﺗﯘﺭﯗﭖ، ﺋﻪﻳﺪﯨﺰﻧﻰ ﺗﯩﺰﮔﯩﻨﻠﻪﭖ، ﺋﯘﻧﯩﯔ ﺋﺎﻟﺪﯨﻨﻰ ﺋﯧﻠﯩﭗ، ﺟﻪﻣﺌﯩﻴﻪﺗﺘﯩﻜﻰ ﺋﺎﺟﯩﺰ ﺗﻪﺑﯩﻘﯩﻠﻪﺭﻧﻰ ﻗﻮﻏﺪﺍﺷﻘﺎ ﭼﺎﻗﯩﺮﺩﻯ.

ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﺩﯗﻧﻴﺎ ﺋﻪﻳﺪﯨﺰ ﻛﯜﻧﻰ ﺋﯧﻼﻥ ﻗﯩﻠﻐﺎﻥ 2006 ‏- ﻳﯩﻠﻠﯩﻖ ﺩﻭﻛﻼﺗﯩﺪﺍ، ﺋﻪﻳﺪﯨﺰ ﻛﯧﺴﯩﻠﯩﻨﯩﯔ ﺋﺎﺳﯩﻴﺎ ﺩﯙﻟﻪﺗﻠﯩﺮﯨﺪﯨﻜﻰ ﺗﺎﺭﻗﯩﻠﯩﺶ ﺋﻪﻫﯟﺍﻟﯩﻨﯩﯔ ﺋﯩﻨﺘﺎﻳﯩﻦ ﺋﯧﻐﯩﺮ ﺑﻮﻟﯘﯞﺍﺗﻘﺎﻧﻠﯩﻘﻰ، ﺑﻮﻟﯘﭘﻤﯘ ﺧﯩﺘﺎﻳﺪﯨﻜﻰ ﺋﻪﻳﺪﯨﺰ ﯞﻩﺯﯨﻴﯩﺘﯩﻨﯩﯔ ﺗﯧﺨﯩﻤﯘ ﺟﯩﺪﺩﯨﻲ ﻫﺎﻟﻪﺗﻜﻪ ﻳﻪﺗﻜﻪﻧﻠﯩﻜﻰ ﺋﺎﻻﻫﯩﺪﻩ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﺑﻮﻟﯘﭖ، ﺑﯘ ﻫﻪﻗﺘﻪ ﺧﯩﺘﺎﻱ ﻫﯚﻛﯜﻣﯩﺘﻰ ﻗﯩﻠﯩﺸﻘﺎ ﺗﯧﮕﯩﺸﻠﯩﻚ ﺋﯩﺸﻼﺭﻧﯩﯔ ﺗﯧﺨﯩﻤﯘ ﻛﯚﭖ ﺋﯩﻜﻪﻧﻠﯩﻜﻰ ﺋﺎﻻﻫﯩﺪﻩ ﺗﻪﻛﯩﺘﻠﻪﻧﮕﻪﻥ.

ﺩﻭﻛﻼﺗﺘﺎ ﺋﯧﻴﺘﯩﻠﯩﺸﯩﭽﻪ، 25 ﻳﯩﻠﺪﯨﻦ ﺑﯘﻳﺎﻥ، ﺩﯗﻧﻴﺎﺩﺍ 25 ﻣﯩﻠﻴﻮﻥ ﺋﺎﺩﻩﻡ ﺋﻪﻳﺪﯨﺰ ﻛﯧﺴﯩﻠﻰ ﺗﯜﭘﻪﻳﻠﯩﺪﯨﻦ ﺋﯚﻟﮕﻪﻥ ﻫﻪﻣﺪﻩ 40 ﻣﯩﻠﻴﻮﻥ ﺋﺎﺩﻩﻡ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﺎﻥ. ﺋﺎﺳﯩﻴﺎ ﺭﺍﻳﻮﻧﯩﺪﺍ ﺑﻮﻟﺴﺎ، ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺳﺎﻧﻰ8 ﻣﯩﻠﻴﻮﻥ 600 ﻣﯩﯖﻐﺎ ﻳﻪﺗﻜﻪﻥ ﺑﻮﻟﯘﭖ، ﺧﯩﺘﺎﻳﺪﯨﻜﻰ ﺋﻪﻳﺪﯨﺰ ﯞﯨﺮﯗﺳﻰ ﺑﯩﻠﻪﻥ ﻳﯘﻗﯘﻣﻼﻧﻐﯘﭼﯩﻼﺭ ﺳﺎﻧﯩﻨﯩﯔ ﺋﯚﺯﯨﻼ 650 ﻣﯩﯖﺪﯨﻦ ﺋﺎﺷﻘﺎﻥ ﻫﻪﻣﺪﻩ ﻛﯚﭘﯩﻴﯩﺶ ﻧﯩﺴﺒﯩﺘﻰ ﺑﯩﺮ ﻳﯩﻞ ﺋﯩﭽﯩﺪﻩ 30 % ﺋﯚﺭﻟﯩﮕﻪﻥ.

ﺑﯘ ﻗﯧﺘﯩﻤﻘﻰ ﺩﯗﻧﻴﺎ ﺋﻪﻳﺪﯨﺰ ﻛﯜﻧﻰ ﻳﯧﺘﯩﭗ ﻛﯧﻠﯩﺶ ﺋﺎﻟﺪﯨﺪﺍ، ﺧﯩﺘﺎﻱ ﻫﯚﻛﯜﻣﯩﺘﻰ ﺋﯚﺯﯨﻤﯘ ﻣﻪﺯﻛﯘﺭ ﺩﯙﻟﻪﺗﺘﯩﻜﻰ ﺋﻪﻳﺪﯨﺰ ﺋﺎﭘﯩﺘﯩﻨﯩﯔ ﻫﻪﻗﯩﻘﻪﺗﻪﻥ ﻧﺎﻫﺎﻳﯩﺘﻰ ﺋﯧﻐﯩﺮ ﻫﺎﻟﻪﺗﺘﻪ ﺋﯩﻜﻪﻧﻠﯩﻜﯩﮕﻪ ﺋﯩﻘﺮﺍﺭ ﺑﻮﻟﻐﺎﻥ ﻫﻪﻣﺪﻩ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﻪﻳﺪﯨﺰ ﺋﺎﭘﯩﺘﯩﻨﯩﯖﻤﯘ ﺋﯩﻠﮕﯩﺮﯨﻜﻰ ﻳﯩﻠﻼﺭﻏﺎ ﻗﺎﺭﯨﻐﺎﻧﺪﺍ ﺗﯧﺨﯩﻤﯘ ﺑﻪﻙ ﺋﻪﯞﺝ ﺋﯧﻠﯩﭗ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ ﺋﯧﺘﯩﺮﺍﭖ ﻗﯩﻠﻐﺎﻥ.

ﻧﻴﯘﻳﻮﺭﻛﺘﯩﻜﻰ ﻣﯧﺪﯨﺘﺴﯩﻨﺎ ﺗﻪﺗﻘﯩﻘﺎﺗﭽﯩﺴﻰ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﻪﻳﺪﯨﺰ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺋﯩﺰﭼﯩﻞ ﺗﻪﺗﻘﯩﻘﺎﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺩﻭﻛﺘﻮﺭ ﻣﯘﻫﻪﻣﻤﻪﺕ ﺋﯩﻤﯩﻦ ﺋﻪﭘﻪﻧﺪﻯ ﺩﯗﻧﻴﺎ ﺋﻪﻳﺪﯨﺰ ﻛﯜﻧﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﺪﻯ.