ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺸﺘﯩﻜﻰ ﻗﯩﻴﯩﻨﭽﯩﻠﯩﻘﻠﯩﺮﻯ

• ﻣﯘﺧﺒﯩﺮﯨﻤﯩﺰ ﺋﯚﻣﻪﺭﺟﺎﻥ ﺗﻮﺧﺘﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯘﻳﻐﯘﺭﻻﺭﻧﯩﯔ ﺋﻪﺟﺪﺍﺩﻟﯩﺮﻯ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺶ ﻣﻪﺳﯩﻠﯩﺴﯩﮕﻪ ﻧﺎﻫﺎﻳﯩﺘﻰ ﺯﻭﺭ ﺋﻪﻫﻤﯩﻴﻪﺕ ﺑﯧﺮﯨﭗ ﻛﻪﻟﮕﻪﻥ. ﻫﻪﺗﺘﺎ ﺋﯘﻻﺭ ﻣﺎﻧﺠﯘﻻﺭﻧﯩﯔ ﺋﯘﻳﻐﯘﺭ ﻳﯧﺰﺍ - ﻗﯩﺸﻼﻗﻠﯩﺮﯨﺪﺍ ﺋﺎﭼﻘﺎﻥ ﻣﻪﺧﺴﯘﺱ ﺗﯩﻞ ﻣﻪﻛﺘﻪﺑﻠﯩﺮﯨﮕﯩﻤﯘ ﺑﺎﻟﯩﻠﯩﺮﯨﻨﻰ ﺑﯧﺮﯨﺸﻨﻰ ﺧﺎﻟﯩﻤﯩﻐﺎﻥ. ﺋﯘﻻﺭ ﻣﺎﻧﺠﯘﻻﺭﻧﯩﯔ ﺋﯚﺯ ﻣﻪﻛﺘﻪﺑﻠﯩﺮﯨﺪﻩ ﺋﻮﻗﯘﭖ ﭼﯩﻘﻘﺎﻥ ﺋﯘﻳﻐﯘﺭ ﺑﺎﻟﯩﻠﯩﺮﯨﻐﺎ ﺋﺎﻟﯩﻲ ﻣﻪﻧﺴﻪﭖ ﯞﻩ ﻳﺎﺧﺸﻰ ﺋﯩﺶ ﺋﻮﺭﻧﻰ ﺑﯧﺮﯨﺶ ﯞﻩﺩﯨﻠﯩﺮﯨﮕﯩﻤﯘ ﺋﺎﻟﺪﺍﻧﻤﯩﻐﺎﻥ. ﭼﯜﻧﻜﻰ ﺋﯘﻳﻐﯘﺭﻻﺭﻧﯩﯔ ﺋﻪﻗﯩﻠﻠﯩﻖ ﺋﻪﺟﺪﺍﺩﻟﯩﺮﻯ ﺑﺎﻟﯩﻠﯩﺮﯨﻨﯩﯔ ﺑﺎﺷﻘﺎ ﻣﯩﻠﻠﻪﺗﻠﻪﺭﮔﻪ ﺋﺎﺳﺴﯩﻤﯩﻠﯩﻴﺎﺗﺴﯩﻴﻪ ﺑﻮﻟﯘﭖ ﻛﯧﺘﯩﺸﻨﯩﯔ ﺋﺎﻟﺪﯨﻨﻘﻰ ﺳﻪﯞﻩﺑﻠﯩﺮﯨﺪﯨﻦ ﺑﯩﺮﻯ ﺋﯚﺯ ﺗﯩﻠﯩﻨﻰ ﺋﯘﻧﺘﯘﭖ ﻛﯧﺘﯩﺶ ﺋﯩﻜﻪﻧﻠﯩﻜﯩﻨﻰ ﺑﯩﻠﻪﺗﺘﻰ. ﺷﯘﯕﯩﻤﯘ ﺋﯘﻻﺭ ﺋﯚﺯ ﺗﯩﻠﯩﻨﻰ ﻗﻪﺩﯨﺮﻟﻪﺵ ﯞﻩ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺸﻨﯩﯔ ﺯﯙﺭﯛﺭﻟﯩﻜﯩﻨﻰ ﻗﻪﺗﺌﯩﻲ ﺗﯜﺭﺩﻩ ﺗﻪﺷﻪﺑﺒﯘﺱ ﻗﯩﻼﺗﺘﻰ. ﺋﯘﻻﺭ ﺋﻪﯓ ﺋﺎﯞﯞﺍﻝ، ﻫﻪﺭ ﻗﺎﻧﺪﺍﻕ ﺑﯩﺮ ﻣﯩﻠﻠﻪﺗﻨﯩﯔ ﻣﯩﻠﻠﻪﺕ ﺑﻮﻟﯘﭖ ﺗﯘﺭﯗﺷﻰ ﺋﯜﭼﯜﻥ ﭼﻮﻗﯘﻡ ﺋﯚﺯ ﺗﯩﻠﯩﻨﻰ ﺑﯩﻠﯩﺸﻰ ﺷﻪﺭﺕ ﺋﯩﻜﻪﻧﻠﯩﻜﯩﻨﻰ ﻳﺎﺧﺸﻰ ﺑﯩﻠﻪﺗﺘﻰ.

ﭼﻪﺗﺌﻪﻟﻠﻪﺭﺩﻩ ﻳﻪﺭﻟﯩﺸﯩﭗ ﻗﺎﻟﻐﺎﻥ ﺋﯘﻳﻐﯘﺭ ﻗﯧﺮﯨﻨﺪﺍﺷﻼﺭﻧﯩﯔ ﺋﺎﻟﺪﯨﺪﺍ ﺋﯚﺯﻟﯩﺮﯨﻨﯩﯔ ﺳﺎﭖ ﺋﯘﻳﻐﯘﺭ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺶ ﻣﻪﺳﯩﻠﯩﺴﻰ ﺋﯘﻻﺭﺩﯨﻦ ﺗﯩﺮﯨﺸﭽﺎﻧﻠﯩﻖ ﺗﻪﻟﻪﭖ ﻗﯩﻠﯩﭗ ﺗﯘﺭﻣﺎﻗﺘﺎ. ﺋﻪﮔﻪﺭ ﺋﯘﻻﺭ ﺑﺎﻟﯩﻠﯩﺮﯨﻐﺎ ﺋﯚﺯﻟﯩﺮﯨﻨﯩﯔ ﮔﯜﺯﻩﻝ ﺋﯘﻳﻐﯘﺭ ﺗﯩﻠﯩﻨﻰ ﺋﯚﮔﯩﺘﯩﭗ، ﺑﯘ ﺗﯩﻠﻨﻰ ﺳﺎﻗﻼﭖ ﻗﺎﻟﻤﯩﻐﺎﻧﺪﺍ، ﭼﻪﺗﺌﻪﻟﻠﻪﺭﺩﯨﻜﻰ ﻛﯧﻴﯩﻨﻜﻰ ﺋﯘﻳﻐﯘﺭ ﺋﻪﯞﻻﺩﻟﯩﺮﯨﻨﯩﯔ ﺋﯚﺯﻟﯩﺮﯨﻨﻰ ﺋﯘﻳﻐﯘﺭ ﻣﯩﻠﻠﯩﺘﯩﮕﻪ ﻣﻪﻧﺴﯘﭖ ﻗﯩﻠﯩﺶ ﺋﯩﺸﯩﻤﯘ ﺋﺎﺳﺎﻧﻐﺎ ﺗﻮﺧﺘﯩﻤﺎﻳﺪﯗ. ﺋﯧﻨﯩﻘﻜﻰ، ﺑﯘ ﻫﺎﻟﺪﺍ ﺋﯘﻻﺭ ﻳﺎﺷﺎﯞﺍﺗﻘﺎﻥ ﺩﯙﻟﻪﺗﻠﯩﺮﯨﺪﯨﻜﻰ ﻣﯩﻠﻠﻪﺗﻠﻪﺭﮔﯩﻤﯘ ﻣﻪﻧﺴﯘﭖ ﺑﻮﻻﻟﻤﺎﻳﺪﯗ. ﺑﯘ ﻳﺎ ﺋﯚﺯ ﻣﯩﻠﻠﯩﺘﯩﮕﻪ ﻳﺎﻛﻰ ﺑﺎﺷﻘﺎ ﻣﯩﻠﻠﻪﺗﻜﻪ ﻣﻪﻧﺴﯘﭖ ﺑﻮﻻﻟﻤﺎﺳﺘﯩﻦ ﺋﻮﺗﺘﯘﺭﯨﺪﺍ ﻗﯧﻠﯩﺶ ﺩﯦﮕﻪﻧﻠﯩﻜﺘﯘﺭ. ﺑﯘ ﺋﻪﯓ ﺋﯧﭽﯩﻨﯩﺸﻠﯩﻖ ﺋﻪﻫﯟﺍﻟﺪﯗﺭ.

ﺋﺎﺑﺪﯗﺭﻩﺋﯘﭖ ﻫﺎﺟﯩﻢ ﺑﯩﻠﻪﻥ ﺳﯚﻫﺒﻪﺕ

ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻨﯩﯔ ﻣﻪﺩﯨﻨﻪ ﻣﯘﻧﻪﯞﯞﻩﺭﻩ ﺷﻪﻫﯩﺮﯨﺪﻩ ﺗﯘﺭﯗﺷﻠﯘﻕ ﺋﺎﺑﺪﯗﺭﻩﺋﯘﭖ ﻫﺎﺟﯩﻤﻨﯩﯔ ﺋﯧﻴﺘﯩﺸﯩﭽﻪ، ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻐﺎ ﻛﯧﻠﯩﭗ ﻳﻪﺭﻟﯩﺸﯩﭗ ﻗﺎﻟﻐﺎﻥ ﺋﯘﻳﻐﯘﺭﻻﺭﺩﯨﻦ ﺑﯩﻠﯩﻤﻠﯩﻚ ﯞﻩ ﺋﺎﯕﻠﯩﻖ ﻛﯩﺸﯩﻠﻪﺭ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺶ ﻣﻪﺳﯩﻠﯩﺴﯩﮕﻪ ﻫﯧﻠﯩﻬﻪﻡ ﺋﻪﻫﻤﯩﻴﻪﺕ ﺑﯧﺮﯨﭗ ﻛﻪﻟﻤﻪﻛﺘﻪ. ﺷﯘﻧﺪﺍﻗﺘﯩﻤﯘ ﻳﻪﻧﻪ ﻛﯚﭖ ﺳﺎﻧﻠﯩﻖ ﻛﯩﺸﯩﻠﻪﺭﻧﯩﯔ ﺑﯘ ﻣﯘﻫﯩﻢ ﻣﻪﺳﯩﻠﯩﮕﻪ ﻳﯧﺘﻪﺭﻟﯩﻚ ﺋﻪﻫﻤﯩﻴﻪﺕ ﺑﯧﺮﻩﻟﻤﯩﮕﻪﻧﻠﯩﻜﻰ ﻣﻪﻟﯘﻡ. ﺑﯘﻧﺪﺍﻕ ﺑﻮﻟﯘﺷﯩﻨﯩﯔ ﺳﻪﯞﻩﺑﻠﯩﺮﯨﻤﯘ ﻛﯚﭖ. ﺋﯚﺗﻤﯜﺷﻠﻪﺭﺩﻩ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻐﺎ ﻛﻪﻟﮕﻪﻥ ﺋﯘﻳﻐﯘﺭﻻﺭﻧﯩﯔ ﻣﯘﺗﻠﻪﻕ ﻛﯚﭖ ﺳﺎﻧﻠﯩﻘﻰ ﻫﯩﻨﺪﯨﺴﺘﺎﻥ ﯞﻩ ﻣﯩﺴﯩﺮﻏﺎ ﺋﻮﺧﺸﯩﻐﺎﻥ ﻣﻪﻣﻠﯩﻜﻪﺗﻠﻪﺭﺩﯨﻜﻰ ﺑﯩﻠﯩﻢ ﻳﯘﺭﺗﻠﯩﺮﯨﺪﺍ ﺋﯩﻠﯩﻢ ﺗﻪﻫﺴﯩﻞ ﻗﯩﻠﯩﺶ ﺋﯜﭼﯜﻥ ﯞﻩﺗﯩﻨﯩﺪﯨﻦ ﺋﺎﻳﺮﯨﻠﯩﭗ ﭼﯩﻘﻘﺎﻥ ﻛﯩﺸﯩﻠﻪﺭﺩﯗﺭ.

ﻛﯧﻴﯩﻦ ﺋﯘﻳﻐﯘﺭ ﺋﯧﻠﯩﻨﻰ ﻛﻮﻣﻤﯘﻧﯩﺴﺘﻼﺭ ﺋﯩﺴﺘﯧﻼ ﻗﯩﻠﻐﺎﻧﻠﯩﻖ ﺳﻪﯞﻩﺑﺘﯩﻦ ﺋﯚﺯ ﻳﯘﺭﺗﯩﻐﺎ ﻗﺎﻳﺘﺎﻟﻤﺎﺳﺘﯩﻦ، ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﻐﺎ ﻛﯧﻠﯩﭗ ﭘﺎﻧﺎﻫﻼﻧﻐﺎﻥ ﺋﯘﻳﻐﯘﺭﻻﺭﻣﯘ ﻛﯚﭖ. ﻣﯘﻧﺪﺍﻗﻼﺭ ﺋﻮﻣﯘﻣﻪﻥ ﺑﻮﻳﺘﺎﻕ ﻛﯩﺸﯩﻠﻪﺭ ﺑﻮﻟﯘﭖ، ﺋﯘ ﯞﺍﻗﯩﺘﻼﺭﺩﺍ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﻰ ﯞﻩ ﺑﺎﺷﻘﺎ ﺋﻪﻟﻠﻪﺭﺩﻩ ﻳﻪﺭﻟﯩﺸﯩﭗ ﻗﺎﻟﻐﺎﻥ ﺋﯘﻳﻐﯘﺭ ﺋﺎﺋﯩﻠﯩﻠﯩﺮﻯ ﻫﺎﺯﯨﺮﻗﯩﺪﻩﻙ ﻛﯚﭖ ﺑﻮﻟﻤﯩﻐﺎﻧﻠﯩﻘﺘﯩﻦ، ﺑﯘ ﻛﯩﺸﯩﻠﻪﺭ ﻣﯩﺴﯩﺮﻟﯩﻖ، ﻫﯩﻨﺪﯨﺴﺘﺎﻧﻠﯩﻖ ﯞﻩ ﺑﯧﻨﮕﺎﻟﻠﯩﻖ ﺋﺎﻳﺎﻟﻼﺭﻏﺎ ﺋﯚﻳﻠﯩﻨﯩﺸﻜﻪ ﻣﻪﺟﺒﯘﺭ ﺑﻮﻟﻐﺎﻥ. ﺋﯧﻨﯩﻘﻜﻰ، ﺗﯩﻠﻰ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺋﯩﻜﻜﻰ ﻣﯩﻠﻠﻪﺗﻨﯩﯔ ﺑﯩﺮ- ﺑﯩﺮﻯ ﺑﯩﻠﻪﻥ ﺳﯚﺯﻟﻪﺷﻜﯩﻨﯩﺪﻩ ﺋﯚﺯﻟﯩﺮﻯ ﺗﯘﺭﯗﯞﺍﺗﻘﺎﻥ ﺋﯜﭼﯩﻨﭽﻰ ﻣﻪﻣﻠﯩﻜﻪﺗﻨﯩﯔ ﺗﯩﻠﯩﺪﺍ ﺳﯚﺯﻟﻪﻳﺪﯨﻐﺎﻧﻠﯩﻘﻰ ﺗﻪﺑﯩﺌﯩﻲ ﺋﻪﻫﯟﺍﻝ. ﺷﯘ ﺳﻪﯞﻩﺑﺘﯩﻦ ﺑﯘ ﺋﯘﻳﻐﯘﺭﻻﺭ ﺋﺎﺋﯩﻠﯩﺴﯩﺪﻩ ﺋﻪﺭﻩﺏ ﺗﯩﻠﻰ ﺑﯩﻠﻪﻥ ﺳﯚﺯﻟﯩﺸﯩﺶ ﻧﻪﺗﯩﺠﯩﺴﯩﺪﻩ، ﺋﯚﺯﻟﯩﺮﯨﻨﯩﯔ ﺋﺎﻧﺎ ﺗﯩﻠﯩﻨﻰ ﺳﯚﺯﻟﻪﺵ ﭘﯘﺭﺳﯩﺘﯩﮕﻪ ﺋﯧﺮﯨﺸﻪﻟﻤﯩﮕﻪﻥ.

ﺑﯘ ﺋﻪﻫﯟﺍﻟﺪﺍ ﺋﯘﻻﺭﻧﯩﯔ ﺑﺎﻟﯩﻠﯩﺮﻯ ﻳﺎ ﺋﺎﺗﯩﺴﯩﻨﯩﯔ ﻳﺎﻛﻰ ﺋﺎﻧﯩﺴﯩﻨﯩﯔ ﺋﺎﻧﺎ ﺗﯩﻠﯩﻨﻰ ﺑﯩﻠﻤﻪﺳﺘﯩﻦ، ﺋﯚﺯﻟﯩﺮﻯ ﺗﯘﻏﯘﻟﯘﭖ ﺋﯚﺳﻜﻪﻥ ﻣﻪﻣﻠﯩﻜﻪﺗﻨﯩﯔ ﺗﯩﻠﯩﺪﺍ ﺳﯚﺯﻟﻪﭖ ﭼﻮﯓ ﺑﻮﻟﻐﺎﻥ. ﻳﻪﻧﻪ ﺑﯩﺮ ﺳﻪﯞﻩﺏ ﺷﯘﻛﻰ، ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﺍ ﻳﺎﺷﺎﯞﺍﺗﻘﺎﻥ ﻣﯩﻠﻠﻪﺗﻠﻪﺭﺩﯨﻦ ﻛﯚﭘﯩﻨﭽﯩﺴﯩﻨﯩﯔ ﺋﯚﺯ ﺋﺎﻧﺎ ﺗﯩﻠﯩﻨﻰ ﺋﯚﮔﯩﺘﯩﺪﯨﻐﺎﻥ ﻣﻪﺧﺴﯘﺱ ﻣﻪﻛﺘﻪﭘﻠﯩﺮﻯ ﺑﻮﻟﻐﺎﻥ ﺑﻮﻟﺴﯩﻤﯘ، ﻫﺎﺯﯨﺮﻏﯩﭽﻪ، ﺑﯘ ﺟﺎﻳﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﺋﺎﻧﺎ ﺗﯩﻠﯩﻨﻰ ﺋﯚﮔﯩﺘﯩﺪﯨﻐﺎﻥ ﺑﯩﺮﻩﺭﻣﯘ ﻣﻪﻛﺘﯩﭙﻰ ﻳﻮﻕ. ﺑﯘﻣﯘ ﺑﯘ ﺟﺎﻳﺪﯨﻜﻰ ﺋﯘﻳﻐﯘﺭﻻﺭﻧﯩﯔ ﺋﯚﺯ ﺋﺎﻧﺎ ﺗﯩﻠﯩﻨﻰ ﺑﯩﻠﻤﻪﺳﻠﯩﻜﯩﮕﻪ ﺳﻪﯞﻩﺏ ﺑﻮﻟﻐﺎﻥ ﺋﺎﻣﯩﻠﻼﺭﻧﯩﯔ ﺑﯩﺮﯨﺪﯗﺭ.

ﻳﻪﻧﻪ ﺑﻪﺯﻯ ﺋﯘﻳﻐﯘﺭ ﺋﺎﺋﯩﻠﯩﻠﯩﺮﻯ ﺋﻪﺭ - ﺋﺎﻳﺎﻝ ﻫﻪﺭ ﺋﯩﻜﻜﯩﺴﻰ ﺋﯘﻳﻐﯘﺭ ﺗﯘﺭﯗﭘﻤﯘ، ﺗﯩﻞ ﻣﻪﺳﯩﻠﯩﺴﯩﮕﻪ ﺳﻪﻝ ﻗﺎﺭﯨﻐﺎﻧﻠﯩﻘﺘﯩﻦ، ﺋﯘﻻﺭ ﺋﺎﺋﯩﻠﯩﺴﯩﺪﻩ ﺋﯘﻳﻐﯘﺭ ﺗﯩﻠﯩﺪﺍ ﺳﯚﺯﻟﯩﺸﯩﺸﻨﻰ ﺟﺎﺭﻯ ﻗﯩﻠﺪﯗﺭﻣﯩﻐﺎﻥ. ﻧﻪﺗﯩﺠﯩﺪﻩ، ﺋﯘﻻﺭﻧﯩﯔ ﺑﺎﻟﯩﻠﯩﺮﻯ ﺋﯚﺯ ﺗﯩﻠﯩﺪﯨﻦ ﺑﯩﺮﻩﺭ ﺳﯚﺯﻧﯩﻤﯘ ﺑﯩﻠﻤﻪﻳﺪﯨﻐﺎﻥ ﭘﻪﻗﻪﺗﻼ ﺋﻪﺭﻩﺑﭽﻪ ﺳﯚﺯﻟﻪﻳﺪﯨﻐﺎﻥ ﺑﻮﻟﯘﭖ ﭼﯩﻘﻘﺎﻥ. ﺋﯘﻻﺭ ﻳﻪﻧﯩﻼ ﺑﯘ ﻳﻪﺭﺩﻩ " ﺑﯘ ﺧﺎﺭﻯ" ﻳﺎﻛﻰ " ﺗﯜﺭﻛﯩﺴﺘﺎﻧﯩﻲ" ﺩﻩﭖ ﺋﺎﺗﯩﻠﯩﺪﯗ. ﺋﯘﻻﺭ ﻳﯜﺯ ﻳﯩﻠﺪﯨﻤﯘ ﺋﻪﺭﻩﺏ ﺑﻮﻻﻟﻤﺎﻳﺪﯗ.

ﺋﯘﻳﻐﯘﺭﻻﺭ ﻗﺎﻧﺪﺍﻕ ﻗﯩﻠﻐﺎﻧﺪﺍ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﺎﻻﻻﻳﺪﯗ؟

ﺋﺎﺑﺪﯗﺭﻩﺋﯘﭖ ﻫﺎﺟﯩﻢ ﺋﯘﻳﻐﯘﺭﻻﺭ ﻗﺎﻧﺪﺍﻕ ﻗﯩﻠﻐﺎﻧﺪﺍ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﺎﻻﻻﻳﺪﯗ ﺩﯦﮕﻪﻥ ﺳﻮﺋﺎﻟﻐﺎ ﺟﺎﯞﺍﺏ ﺑﯧﺮﯨﭗ ﻣﯘﻧﺪﺍﻕ ﺩﯦﺪﻯ: " ﺋﻪﯓ ﻣﯘﻫﯩﻤﻰ ﺋﺎﺗﺎ - ﺋﺎﻧﺎ ﺋﯚﺯ ﺋﺎﺋﯩﻠﯩﺴﯩﺪﻩ ﺋﯚﺯﻟﯩﺮﯨﻨﯩﯔ ﺋﯘﻳﻐﯘﺭ ﺗﯩﻠﯩﺪﺍ ﺳﯚﺯﻟﯩﺴﻪ ﯞﻩ ﺑﺎﻟﯩﻠﯩﺮﯨﻐﺎ ﺋﯚﺯ ﺗﯩﻠﯩﻨﻰ ﺋﯚﮔﯩﺘﻪﻟﯩﺴﻪ ﺑﻮﻟﯩﺪﯗ. ﺋﯘﻧﺪﺍﻕ ﺑﻮﻟﻤﯩﻐﺎﻧﺪﺍ، ﺋﯘﻳﻐﯘﺭﻻﺭ ﺑﯘ ﺟﺎﻳﺪﺍ ﺋﯚﺯ ﺗﯩﻠﯩﻨﻰ ﺳﺎﻗﻼﭖ ﻗﯧﻠﯩﺸﯩﻨﯩﯔ ﺑﺎﺷﻘﺎ ﭼﺎﺭﯨﺴﻰ ﻳﻮﻕ. ﺋﯚﺯ ﺗﯩﻠﯩﻨﻰ ﺑﺎﻟﯩﻠﯩﺮﯨﻐﺎ ﺋﯚﮔﯩﺘﯩﺶ ﺋﺎﺗﺎ - ﺋﺎﻧﯩﻼﺭ ﺋﯜﺳﺘﯩﺪﯨﻜﻰ ﺋﺎﻣﺎﻧﻪﺗﺘﯘﺭ. ﻳﻪﻧﻪ ﺑﯩﺮ ﭼﺎﺭﻩ ﺷﯘﻛﻰ، ﺋﯘﻳﻐﯘﺭﻻﺭ ﺑﺎﻟﯩﻠﯩﺮﯨﻨﻰ ﺋﺎﻧﺎ ﯞﻩﺗﻪﻧﮕﻪ ﺋﯧﻠﯩﭗ ﺑﯧﺮﯨﭗ ﺗﯘﺭﻏﯘﺯﯗﭖ ﻛﻪﻟﺴﻪ، ﺷﯘ ﺟﺎﻳﺪﺍ ﺋﯘﻳﻐﯘﺭ ﺗﯩﻠﯩﻨﻰ ﺋﯚﮔﯩﺘﯩﭗ ﻛﻪﻟﺴﻪ ﺑﻮﻟﯩﺪﯗ.

ﺋﻪﻳﻨﻰ ﯞﺍﻗﺘﯩﺪﺍ ﭘﻪﻳﻐﻪﻣﺒﻪﺭ ﺋﻪﻟﻪﻳﻬﯩﺴﺴﺎﻻﻣﻨﻰ ﺑﻮﯞﯨﺴﻰ ﺧﺎﻟﯩﺲ ﺋﻪﺭﻩﺏ ﺗﯩﻠﯩﻨﻰ ﯞﻩ ﺋﻪﺭﻩﺏ ﺋﺎﺩﻩﺗﻠﯩﺮﯨﮕﻪ ﻛﯚﻧﺪﯛﺭﯛﺵ ﻣﻪﻗﺴﯩﺘﯩﺪﻩ، ﺳﻪﻫﺮﺍﺩﯨﻜﻰ ﻫﻪﻟﯩﻤﻪ ﺳﻪﺋﺪﯨﻴﻪ ﺩﯦﮕﻪﻥ ﺑﯩﺮ ﺋﺎﻳﺎﻟﻨﯩﯔ ﻳﯧﻨﯩﺪﺍ ﺗﻪﺭﺑﯩﻴﯩﻠﯩﻨﯩﺸﻜﻪ ﺋﻪﯞﻩﺗﻜﻪﻥ. ﺧﯘﺩﺩﻯ ﺷﯘﻧﯩﯖﻐﺎ ﺋﻮﺧﺸﺎﺵ ﺋﯘﻳﻐﯘﺭﻻﺭﻣﯘ ﺑﺎﻟﯩﻠﯩﺮﯨﻨﻰ ﺋﯘﻳﻐﯘﺭ ﺗﯩﻠﯩﻨﯩﯔ ﻣﺎﻛﺎﻧﻰ ﺑﻮﻟﻐﺎﻥ ﺋﺎﻧﺎ ﯞﻩﺗﻪﻧﮕﻪ ﺋﺎﭘﯩﺮﯨﭗ ﺗﯘﺭﻏﯘﺯﺍﻟﯩﺴﺎ ﺑﻮﻟﯩﺪﯗ. ﺑﻮﻟﻤﯩﺴﺎ ﺋﯚﺯ ﺗﯩﻠﯩﻨﻰ ﺑﺎﻟﯩﻠﯩﺮﯨﻐﺎ ﺋﯚﮔﯩﺘﯩﺸﻨﯩﯔ ﺑﺎﺷﻘﺎ ﻳﻮﻟﻰ ﻳﻮﻕ ."

ﺋﺎﺑﺪﯗﺭﻩﺋﯘﭖ ﻫﺎﺟﯩﻤﻨﯩﯔ ﺋﯧﻴﺘﯩﺸﯩﭽﻪ، ﻫﺎﺯﯨﺮ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﺍ ﺑﯩﺮﯨﻨﭽﻰ، ﺋﯩﻜﻜﯩﻨﭽﻰ، ﺋﯜﭼﯩﻨﭽﻰ ﯞﻩ ﺗﯚﺗﯩﻨﭽﻰ ﺋﻪﯞﻻﺩ ﺋﯘﻳﻐﯘﺭﻻﺭ ﺑﺎﺭﺩﯗﺭ. ﺑﯩﺮﯨﻨﭽﻰ ﺋﻪﯞﻻﺩ، ﻳﻪﻧﻰ ﺳﻪﺋﯘﺩﻯ ﺋﻪﺭﻩﺑﯩﺴﺘﺎﻧﯩﺪﺍ ﺗﯘﻏﯘﻟﻐﺎﻥ ﺑﯩﺮﯨﻨﭽﻰ ﺋﻪﯞﻻﺩ ﺋﯘﻳﻐﯘﺭﻻﺭﺩﯨﻦ ﺋﯘﻳﻐﯘﺭ ﺗﯩﻠﯩﻨﻰ ﺑﯩﻠﯩﺪﯨﻐﺎﻧﻼﺭ ﺋﺎﺭﺍﻥ %30ﻧﻰ ﺗﻪﺷﻜﯩﻞ ﻗﯩﻠﯩﺪﯗ. ﻗﺎﻟﻐﺎﻧﻠﯩﺮﻯ ﭘﻪﻗﻪﺕ ﺋﻪﺭﻩﺏ ﺗﯩﻠﯩﺪﺍ ﺳﯚﺯﻟﯩﺸﯩﺪﯗ. (ﺋﯚﻣﻪﺭﺟﺎﻥ ﺗﻮﺧﺘﻰ)