ﮔﯧﺮﻣﺎﻧﯩﻴﯩﺪﻩ ﺋﯘﻳﻐﯘﺭﻻﺭ ﯞﻩ ﺗﯩﺒﻪﺗﻠﯩﻜﻠﻪﺭﻧﯩﯔ ﺧﯩﺘﺎﻳﻐﺎ ﻗﺎﺭﺷﻰ ﻧﺎﻣﺎﻳﯩﺸﻰ

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

3 - ﺋﺎﻳﻨﯩﯔ 18 - ﻛﯜﻧﻰ ﭼﯜﺷﺘﯩﻦ ﺑﯘﺭﯗﻥ ﺳﺎﺋﻪﺕ 9:00 ﺩﯨﻦ 12:00 ﮔﻪ ﻗﻪﺩﻩﺭ، ﮔﯧﺮﻣﺎﻧﯩﻴﯩﻨﯩﯔ ﻣﻴﯘﻧﺨﯧﻦ ﺷﻪﻫﯩﺮﯨﺪﻩ ﺋﯘﻳﻐﯘﺭﻻﺭ ﯞﻩ ﺗﯩﺒﻪﺗﻠﯩﻜﻠﻪﺭﻧﯩﯔ ﺧﯩﺘﺎﻳﻐﺎ ﻗﺎﺭﺷﻰ ﺑﯩﺮﻟﻪﺷﻤﻪ ﻧﺎﻣﺎﻳﯩﺸﻰ ﺋﯧﻠﯩﭗ ﺑﯧﺮﯨﻠﺪﻯ. ﻧﺎﻣﺎﻳﯩﺸﻘﺎ ﻛﯚﭖ ﺳﺎﻧﺪﯨﻜﻰ ﭼﻪﺗﺌﻪﻟﻠﯩﻜﻠﻪﺭﻣﯘ ﺋﯩﺸﺘﯩﺮﺍﻙ ﻗﯩﻠﻐﺎﻥ ﺑﻮﻟﯘﭖ، ﮔﯧﺮﻣﺎﻧﯩﻴﯩﻨﯩﯔ ﻫﻪﺭ ﺳﺎﻫﻪ ﮔﯧﺰﯨﺖ ﯞﻩ ﺕ ﯞ ﻗﺎﻧﺎﻟﻠﯩﺮﯨﻨﯩﯔ ﻣﯘﺧﺒﯩﺮﻟﯩﺮﻯ ﺑﯘ ﻧﺎﻣﺎﻳﯩﺸﻨﻰ ﺟﯩﺪﺩﯨﻲ ﺩﯨﻘﻘﯩﺘﯩﮕﻪ ﺋﺎﻟﺪﻯ. ﺋﺎﻱ - ﻳﯘﻟﺘﯘﺯﻟﯘﻕ ﻛﯚﻙ ﺑﺎﻳﺮﺍﻕ ﯞﻩ ﺗﯩﺒﻪﺕ ﺑﺎﻳﺮﯨﻘﻰ ﺋﻪﺗﺮﺍﭘﺘﯩﻜﻰ ﺋﺎﻣﻤﯩﻨﻰ ﺋﯚﺯﻟﯩﺮﯨﮕﻪ ﺟﻪﻟﯩﭗ ﻗﯩﻠﺪﻯ.

ﺑﯘ ﻗﯧﺘﯩﻢ ﻧﺎﻣﺎﻳﯩﺶ ﺗﻪﺭﺗﯩﭙﯩﻨﻰ ﺳﺎﻗﻼﺵ ﺋﯜﭼﯜﻥ ﻛﻪﻟﮕﻪﻥ ﺳﺎﻗﭽﯩﻼﺭﻧﯩﯔ ﺳﺎﻧﻰ ﻫﻪﺭ ﻗﺎﭼﺎﻧﻘﯩﺪﯨﻦ ﺋﺎﻻﻫﯩﺪﻩ ﻛﯚﭖ ﺋﯩﺪﻯ. ﺑﯘﻧﺪﺍﻕ ﺑﻮﻟﯘﺷﻰ 17 - ﻣﺎﺭﺕ ﻛﯜﻧﻰ ﻳﯜﺯ ﺑﻪﺭﮔﻪﻥ ﯞﻩﻗﻪ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﺴﺎ ﻛﯧﺮﻩﻙ. ﺧﻪﯞﻩﺭﻟﻪﺭﮔﻪ ﺋﺎﺳﺎﺳﻼﻧﻐﺎﻧﺪﺍ، 3- ﺋﺎﻳﻨﯩﯔ 17 - ﻛﯜﻧﻰ 26 ﻧﻪﭘﻪﺭ ﺗﯩﺒﻪﺗﻠﯩﻚ ﻣﯩﻴﯘﻧﺨﯧﻨﺪﯨﻜﻰ ﺧﯩﺘﺎﻱ ﻛﻮﻧﺴﯘﻟﺨﺎﻧﯩﺴﯩﻐﺎ ﺑﯧﺴﯩﭗ ﻛﯩﺮﯨﭗ، ﺯﻭﺭ ﭘﺎﺭﺍﻛﻪﻧﺪﯨﭽﯩﻠﯩﻚ ﺗﯘﻏﺪﯗﺭﻏﺎﻥ. ﺷﯘﻧﯩﯔ ﺋﯜﭼﯜﻧﻤﯘ ﺑﯘ ﻧﺎﻣﺎﻳﯩﺸﻨﻰ ﺧﯩﺘﺎﻱ ﻛﻮﻧﺴﯘﻟﯩﻨﯩﯔ ﺋﺎﻟﺪﯨﺪﺍ ﺋﯚﺗﻜﯜﺯﯛﺷﻜﻪ ﺭﯗﺧﺴﻪﺕ ﻗﯩﻠﻤﺎﻱ، ﻛﻮﻧﺴﯘﻟﺨﺎﻧﯩﺪﯨﻦ 200 ﻣﯧﺘﯩﺮ ﻳﯩﺮﺍﻗﻠﯩﻘﺘﯩﻜﻰ ﺭﻭﻣﺎﻥ ﭘﻼﺗﺰ ﻣﻪﻳﺪﺍﻧﯩﻐﺎ ﺋﻮﺭﯗﻧﻼﺷﺘﯘﺭﻏﺎﻥ. ﺷﯘﺋﺎﺭ ﺗﻮﯞﻻﺷﻘﺎ ﺭﯗﺧﺴﻪﺕ ﻗﯩﻠﯩﻨﻤﯩﻐﯩﻨﯩﻐﺎ ﻗﺎﺭﯨﻤﺎﻱ، ﺋﯘﻳﻐﯘﺭﻻﺭ ﯞﻩ ﺗﯩﺒﻪﺗﻠﯩﻜﻠﻪﺭ "ﺧﯩﺘﺎﻳﻼﺭ ﭼﯩﻘﯩﭗ ﻛﻪﺗﺴﯘﻥ، ﺋﯘﻳﻐﯘﺭﻻﺭﻏﺎ ﺋﻪﺭﻛﯩﻨﻠﯩﻚ، ﺗﯩﺒﻪﺗﻜﻪ ﺋﻪﺭﻛﯩﻨﻠﯩﻚ!" ﺩﯦﮕﻪﻧﺪﻩﻙ ﺷﯘﺋﺎﺭﻻﺭﻧﻰ ﺋﯜﺯﻣﻪﻱ ﺗﻮﯞﻻﭖ ﺗﯘﺭﺩﻯ.

ﻳﺎﯞﺭﯗﭘﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﺭﻩﺋﯩﺴﻰ، ﺩ ﺋﯘ ﻕ ﺑﺎﺵ ﻛﺎﺗﯩﭙﻰ ﺩﻭﻟﻘﯘﻥ ﺋﻪﻳﺴﺎ ﺋﻪﭘﻪﻧﺪﻯ، ﺑﯘ ﻗﯧﺘﯩﻤﻘﻰ ﻧﺎﻣﺎﻳﯩﺶ ﻫﻪﻗﻘﯩﺪﻩ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ، ﻧﺎﻣﺎﻳﯩﺸﻨﯩﯔ ﻣﻪﻗﺴﯩﺘﻰ ﯞﻩ ﺑﯘﻧﺪﯨﻦ ﻛﯧﻴﯩﻨﻜﻰ ﭘﺎﺋﺎﻟﯩﻴﻪﺗﻠﻪﺭ ﺗﻮﻏﺮﯨﺴﯩﺪﺍ ﭼﯜﺷﻪﻧﭽﻪ ﺑﯧﺮﯨﭗ ﺋﯚﺗﺘﻰ.

ﺑﯘ ﻗﯧﺘﯩﻤﻘﻰ ﻧﺎﻣﺎﻳﯩﺸﻘﺎ ﻗﺎﺗﻨﺎﺷﻘﺎﻥ ﻳﺎﯞﺭﯗﭘﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﺑﺎﺵ ﺗﻪﭘﺘﯩﺸﻰ ﺋﺎﺑﺪﯗﺳﺎﻻﻡ ﺋﻪﭘﻪﻧﺪﻯ، ﺋﯘﻳﻐﯘﺭﻻﺭ ﺑﯩﻠﻪﻥ ﺗﯩﺒﻪﺗﻠﯩﻜﻠﻪﺭﻧﯩﯔ ﺋﻮﺭﺗﺎﻕ ﺗﻪﻗﺪﯨﺮﮔﻪ ﺋﯩﮕﻪ ﺋﯩﻜﻪﻧﻠﯩﻜﯩﻨﻰ، ﺧﯩﺘﺎﻳﻐﺎ ﻗﺎﺭﺷﻰ ﺑﯘ ﻛﯜﺭﻩﺷﻨﻰ ﺗﺎﻛﻰ ﯞﻩﺗﻪﻥ ﺋﺎﺯﺍﺕ ﺑﻮﻟﻐﺎﻧﻐﺎ ﻗﻪﺩﻩﺭ ﺩﺍﯞﺍﻣﻼﺷﺘﯘﺭﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ. (ﺋﻪﻛﺮﻩﻡ)