"ﺧﻮﺗﻪﻥ ﻗﻪﻏﯩﺰﻯ" ﻧﯩﯔ ﺋﺎﺧﯩﺮﻗﻰ ﯞﺍﺭﯨﺴﻠﯩﺮﯨﻨﻰ ﺋﯩﺰﺩﻩﺵ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

"ﺧﻮﺗﻪﻥ ﻗﻪﻏﯩﺰﻯ" ﺋﯘﻳﻐﯘﺭﻻﺭﻧﯩﯔ ﺋﯩﻜﻜﻰ ﻣﯩﯔ ﻳﯩﻠﺪﯨﻨﻤﯘ ﺋﺎﺭﺗﯘﻕ ﺗﺎﺭﯨﺨﻘﺎ ﺋﯩﮕﻪ ﻣﻪﺩﻩﻧﯩﻴﻪﺕ ﻣﯩﺮﺍﺳﻠﯩﺮﯨﻨﯩﯔ ﺑﯩﺮﻯ، ﺋﻪﻣﻤﺎ ﺩﻩﯞﺭﯨﻤﯩﺰﺩﻩ ﺧﻮﺗﻪﻥ ﻗﻪﻏﯩﺰﻯ ﻳﺎﺳﺎﺷﺘﯩﻦ ﺋﯩﺒﺎﺭﻩﺕ ﻗﻪﺩﯨﻤﯩﻲ ﻫﯜﻧﻪﺭﻧﻰ ﺑﯩﻠﯩﺪﯨﻐﺎﻧﻼﺭ ﺳﺎﻧﺎﻗﻠﯩﻘﻼ ﻗﺎﻟﺪﻯ. ﺧﻮﺗﻪﻥ ﯞﯨﻼﻳﯩﺘﻰ ﻗﺎﺭﯨﻘﺎﺵ ﻧﺎﻫﯩﻴﯩﻨﯩﯔ ﭘﯘﺭﭼﺎﻗﭽﻰ ﻳﯧﺰﯨﺴﻰ ﺑﯘﺩﺩﺍ ﻛﻪﻧﺘﯩﺪﻩ ﺋﻮﻟﺘﯘﺭﯗﺷﻠﯘﻕ 80 ﻳﺎﺷﺘﯩﻦ ﻫﺎﻟﻘﯩﻐﺎﻥ ﺗﻮﺧﺘﻰ ﺑﺎﻗﻰ ، ﺋﻪﻧﻪ ﺷﯘ ﺗﻪﯞﻩﺭﯛﻙ ﺋﺎﺗﺎ ﻛﻪﺳﭙﯩﻨﻰ ﺩﺍﯞﺍﻣﻼﺷﺘﯘﺭﯗﭖ ﻛﻪﻟﮕﻪﻥ 10 - ﺋﻪﯞﻻﺩ ﺧﻮﺗﻪﻥ ﻗﻪﻏﯩﺰﻯ ﺋﯘﺳﺘﯩﺴﻰ ﻫﯧﺴﺎﺑﻠﯩﻨﯩﺪﯗ.

ﺑﻪﺯﯨﻠﻪﺭ ﺑﯘ ﻛﯩﺸﯩﻨﻰ ﺧﻮﺗﻪﻥ ﻗﻪﻏﯩﺰﯨﻨﻰ ﻳﺎﺳﯩﻴﺎﻻﻳﺪﯨﻐﺎﻥ ﺋﻪﯓ ﺋﺎﺧﯩﺮﻗﻰ ﺋﻪﯞﻻﺩ ﺑﻮﻟﯘﭖ ﻗﯧﻠﯩﺸﻰ ﻣﯘﻣﻜﯩﻦ ﺩﯦﮕﻪﻥ ﺋﻪﻧﺪﯨﺸﯩﻠﻪﺭﻧﻰ ﺋﻮﺗﺘﯘﺭﯨﻐﺎ ﻗﻮﻳﻤﺎﻗﺘﺎ. ﺋﻪﺟﯩﺒﺎ ﺑﯘ ﺑﻮﯞﺍﻳﺪﯨﻦ ﻛﯧﻴﯩﻦ ﺧﻮﺗﻪﻥ ﻗﻪﻏﯩﺰﻯ ﻳﺎﺳﯩﻴﺎﻻﻳﺪﯨﻐﺎﻥ ﻛﯩﺸﻰ ﺗﯧﭙﯩﻠﻤﺎﺳﻤﯘ ؟ ﺑﯘﻧﯩﯔ ﺑﯩﻠﻪﻥ ﺋﯘﻳﻐﯘﺭﻻﺭ ﺧﻮﺗﻪﻥ ﻗﻪﻏﯩﺰﯨﺪﯨﻦ ﺋﯩﺒﺎﺭﻩﺕ ﻧﻪﭼﭽﻪ ﻣﯩﯔ ﻳﯩﻠﻼﺭ ﺳﺎﻗﻠﯩﻨﯩﭗ ﻛﻪﻟﮕﻪﻥ ﺑﯘ ﻗﯩﻤﻤﻪﺗﻠﯩﻚ ﻣﻪﺩﻩﻧﯩﻴﻪﺕ ﻣﯩﺮﺍﺳﯩﺪﯨﻦ ﺋﺎﻳﺮﯨﻠﯩﭗ ﻗﺎﻻﺭﻣﯘ؟ ﺑﯩﺰ ﺑﯘ ﻳﺎﺷﺎﻧﻐﺎﻥ ﺑﻮﯞﺍﻳﻨﯩﯔ ﻫﺎﺯﯨﺮﻗﻰ ﺋﻪﻫﯟﺍﻟﻰ ﻫﻪﻣﺪﻩ ﺋﯘﻧﯩﯔ ﻳﺎﺳﯩﻐﺎﻥ ﻗﻪﻏﻪﺯﻟﯩﺮﯨﻨﯩﯔ ﺑﺎﺯﺍﺭ ﺋﻪﻫﯟﺍﻟﻰ ﻫﻪﻡ ﺷﺎﮔﯩﺮﺕ ﻳﯧﺘﯩﺸﺘﯜﺭﯛﺵ ﺋﯩﺸﻠﯩﺮﻯ ﻫﻪﻗﻘﯩﺪﻩ ﺗﻪﭘﺴﯩﻠﯩﻲ ﻣﻪﻟﯘﻣﺎﺕ ﺋﯧﻠﯩﺶ ﺋﯜﭼﯜﻥ ﺗﯩﺮﯨﺸﺘﯘﻕ، ﺋﻪﭘﺴﯘﺱ ﺑﯘﺩﺩﺍ ﻛﻪﻧﺘﯩﺪﻩ ﺗﯧﻠﯧﻔﻮﻧﻤﯘ ﺑﻮﻟﻤﯩﻐﺎﭼﻘﺎ ، ﺑﯘ ﻛﯩﺸﻰ ﺑﯩﻠﻪﻥ ﺋﺎﻻﻗﯩﻠﯩﺸﯩﺶ ﺋﯘﻧﭽﻪ ﺋﺎﺳﺎﻥ ﺗﻮﺧﺘﯩﻤﯩﺪﻯ.

ﻗﯩﻤﻤﻪﺗﻠﯩﻚ ﻣﯩﺮﺍﺱ - ﺧﻮﺗﻪﻥ ﻗﻪﻏﯩﺰﻯ

ﺋﯜﮊﻣﻪ ﻗﻮﯞﺯﺍﻗﻠﯩﺮﻯ ﻗﺎﺗﺎﺭﻟﯩﻖ ﭘﯜﺗﯜﻧﻠﻪﻱ ﺗﻪﺑﺌﯩﻲ ﺧﺎﻡ ﺋﻪﺷﻴﺎﻻﺭﻧﻰ ﺋﺎﺳﺎﺳﻠﯩﻖ ﻣﺎﺗﯧﺮﯨﻴﺎﻝ ﻗﯩﻠﯩﭗ ﻗﻪﺩﯨﻤﯩﻲ ﺋﯘﺳﯘﻟﺪﺍ ﻳﺎﺳﯩﻠﯩﺪﯨﻐﺎﻥ ﺧﻮﺗﻪﻥ ﻗﻪﻏﯩﺰﻯ،ﺋﯘﻳﻐﯘﺭ ﻗﻮﻝ ﻫﯚﻧﻪﺭﯞﻩﻧﭽﯩﻠﯩﻜﯩﻨﯩﯔ ﺋﯧﺴﯩﻞ ﻧﻪﻣﯘﻧﯩﺴﻰ، ﺧﻮﺗﻪﻥ ﻗﻪﻏﯩﺰﻯ ﺋﺎﺳﺎﻧﻠﯩﻘﭽﻪ ﻳﯩﺮﺗﯩﻠﻤﺎﻳﺪﯗ ، ﭼﯩﺮﯨﻤﺎﻳﺪﯗ ، ﺋﻪﯞﺭﯨﺸﯩﻤﻠﯩﻜﻜﻪ ﺋﯩﮕﻪ، ﻗﺎﺗﻠﯩﺸﯩﭗ ﻛﻪﺗﺴﯩﻤﯘ ﺗﯜﺯﻟﻪﭖ ﺋﯩﺸﻠﯩﺘﯩﺸﻜﻪ ﺋﻪﭘﻠﯩﻚ ،ﻛﯜﻥ ﻧﯘﺭﻯ ﻳﺎﻛﻰ ﻧﻪﻣﻠﯩﻜﺘﯩﻦ ﺋﯚﺯﮔﻪﺭﻣﻪﻳﺪﯗ، ﺭﻩﯕﮕﻰ ﺋﺎﻕ ﺳﯜﭘﻪﺗﻠﯩﻚ ﺑﻮﻟﯘﭖ ﻗﺎﺵ ﺗﯧﺸﻰ ﺳﯜﺭﻛﻪﭖ ﭘﺎﺗﻼﻧﻐﺎﻧﺪﯨﻦ ﻛﯧﻴﯩﻦ ﻳﯜﺯﻯ ﺳﯩﻠﯩﻘﻠﯩﺸﯩﺪﯗ، ﺋﯘﻧﯩﯖﻐﺎ ﻫﻪﺭ ﻗﺎﻧﺪﺍﻕ ﻗﻪﻟﻪﻡ ﺑﯩﻠﻪﻥ ﺧﻪﺕ ﻳﺎﻛﻰ ﺭﻩﺳﯩﻢ ﺳﯩﺰﻏﺎﻧﺪﺍ ﺭﻩﯓ ﻳﯧﻴﯩﻠﻤﺎﻳﺪﯨﻐﺎﻥ ، ﺋﯘﺯﺍﻕ ﻳﯩﻠﻼﺭﻏﯩﭽﻪ ﺭﻩﯕﮕﻰ ﺋﯚﯕﻤﻪﻳﺪﯨﻐﺎﻥ ﺋﺎﻻﻫﯩﺪﯨﻠﯩﻜﻠﻪﺭﮔﻪ ﺋﯩﮕﻪ.

ﺋﯘﻳﻐﯘﺭﻻﺭ ﺋﯘﺯﺍﻕ ﺗﺎﺭﯨﺨﯩﻲ ﻣﻪﺩﻩﻧﯩﻴﯩﺘﯩﺪﻩ ﺧﻮﺗﻪﻥ ﻗﻪﻏﯩﺰﯨﻨﻰ ،ﺧﻪﺕ -ﭼﻪﻙ، ﺩﯨﻨﯩﻲ ﯞﻩ ﺋﻪﺩﻩﺑﯩﻲ ﺧﺎﺗﯩﺮﯨﻠﻪﺭﻧﻰ ﻳﯧﺰﯨﺶ، ﯞﻩﺳﯩﻘﯩﻠﻪﺭﻧﻰ ﻳﯧﺰﯨﺸﻘﺎ ﺋﻮﺧﺸﺎﺵ ﻣﻪﺗﺒﻪﺩﻩ ﺋﯩﺸﻠﻪﺗﻜﻪﻧﺪﯨﻦ ﺳﯩﺮﺕ ، ﻛﯩﻴﯩﻢ ﻛﯧﭽﻪﻙ، ﺩﻭﭘﭙﺎ ﺗﯩﻜﯩﺸﺘﻪ ﻗﺎﺗﯘﺭﻣﺎ ﻗﯩﻠﯩﺶ ﻫﻪﻡ ﻣﯩﻠﻠﯩﻲ ﺗﯩﺒﺎﺑﻪﺕ ﺩﻭﺭﯨﻠﯩﺮﯨﻨﻰ ،ﻗﻪﻥ- ﻧﺎﯞﺍﺕ ، ﺗﺎﺗﻠﯩﻖ ﮔﯧﺰﻩﻛﻠﻪﺭﻧﻰ ﺋﻮﺭﺍﺵ، ﺋﯩﺸﯩﻚ ، ﺩﯦﺮﯨﺰﻩ ﻛﯜﺯﻧﻪﻛﻠﯩﺮﯨﻨﯩﯔ ﻳﯧﺮﯨﻘﻠﯩﺮﯨﻐﺎ ﭼﺎﭘﻼﭖ ﺗﻮﭘﺎ ‏- ﭼﺎﯕﺪﯨﻦ ﺳﺎﻗﻠﯩﻨﯩﺶ ...ﻗﺎﺗﺎﺭﻟﯩﻖ ﻫﻪﺭ ﺳﺎﻫﻪﻟﻪﺭﺩﻩ ﻛﻪﯓ ﻗﻮﻟﻼﻧﻐﺎﻥ.

ﺷﯘ ﯞﻩﺟﯩﺪﯨﻦ ﺧﻮﺗﻪﻥ ﻗﻪﻏﯩﺰﻯ ﻳﯩﭙﻪﻙ ﻳﻮﻟﻰ ﺳﻮﺩﯨﺴﯩﺪﺍ ﻳﯘﻗﯩﺮﻯ ﺗﺎﯞﺍﺭ ﻗﯩﻤﻤﯩﺘﯩﮕﻪ ﺋﯩﮕﻪ ، ﻣﻪﺷﻬﯘﺭ ﺑﻮﻟﻐﺎﻥ ﻗﻮﻝ ﻫﯜﻧﻪﺭﯞﻩﻧﭽﯩﻠﯩﻚ ﻣﻪﻫﺴﯘﻻﺗﻰ ،ﮔﻪﺭﭼﻪ ﺋﯘﺯﺍﻕ ﺗﺎﺭﯨﺨﺘﯩﻦ ﺑﯘﻳﺎﻥ ﺋﯘﻳﻐﯘﺭ ﻣﻪﺩﻩﻧﯩﻲ ﻫﺎﻳﺎﺗﯩﺪﺍ ﻫﻪﻡ ﻛﯜﻧﺪﯨﻠﯩﻚ ﺗﯘﺭﻣﯘﺷﺘﯩﻤﯘ ﻛﻪﯓ ﻗﻮﻟﻠﯩﻨﯩﻠﻐﺎﻥ ﻗﻪﻏﻪﺯ ﺑﻮﻟﺴﯩﻤﯘ ، ﺑﯩﺮﺍﻕ ﻫﺎﺯﯨﺮﻗﻰ ﺯﺍﻣﺎﻥ ﺳﺎﻧﺎﺋﯩﺘﯩﻨﯩﯔ ﺗﻪﻫﺪﯨﺘﯩﮕﻪ ﺋﯘﭼﺮﺍﭖ ﻛﻪﯓ ﻛﯚﻟﻪﻣﺪﻩ ﺋﯩﺸﻠﻪﭘﭽﯩﻘﯩﺮﯨﻠﯩﺸﺘﯩﻦ ﺗﻮﺧﺘﯩﻐﺎﻥ ﻫﻪﻣﺪﻩ ﺑﺎﺭﻏﺎﻧﭽﻪ ﺗﺎﺭ ﺩﺍﺋﯩﺮﯨﺪﻩ ﻗﻮﻟﻠﯩﻨﯩﻠﯩﺪﯨﻐﺎﻥ ﺑﯩﺮ ﺧﯩﻞ ﻳﻪﺭﻟﯩﻚ ﺧﺎﺭﺍﻛﺘﯧﺮﯨﮕﻪ ﺋﯩﮕﻪ ﺑﻮﻳﯘﻡ ﺑﻮﻟﯘﭖ ﺧﻮﺗﻪﻧﻨﻰ ﻣﻪﺭﻛﻪﺯ ﻗﯩﻠﯩﭗ ﺋﯘﺷﺸﺎﻕ ﻗﻮﻝ ﻫﯜﻧﻪﺭﯞﻩﻧﭽﯩﻠﯩﻚ ﺷﻪﻛﻠﻰ ﺑﯩﻠﻪﻥ ﺳﺎﻗﻠﯩﻨﯩﭗ ﻗﺎﻟﻐﺎﻥ.

ﻳﯩﺮﺍﻕ ﻳﯧﺰﯨﺪﯨﻜﻰ ﺩﺍﯕﻠﯩﻖ ﻫﯜﻧﻪﺭﯞﻩﻥ

2002 - ﻳﯩﻠﻰ ﺋﺎﻣﯧﺮﯨﻜﺎ ﺳﯩﻤﯩﺘﺴﻮﻧﯩﻴﻮﻥ ﻣﯘﺯﯨﻴﯩﻨﯩﯔ ﯞﺍﺷﯩﻨﮕﺘﻮﻧﺪﺍ ﺋﻮﻳﯘﺷﺘﯘﺭﻏﺎﻥ ﻳﯩﭙﻪﻙ ﻳﻮﻟﯩﺪﯨﻜﻰ ﻣﯩﻠﻠﻪﺗﻠﻪﺭﻧﯩﯔ ﻣﻪﺩﻩﻧﯩﻴﻪﺕ ﻓﯧﺴﺘﯩﯟﺍﻟﯩﺪﺍ ،ﺧﻮﺗﻪﻧﻨﯩﯔ ﻳﯩﺮﺍﻕ ﻳﯧﺰﯨﺴﯩﺪﯨﻦ ﻛﻪﻟﮕﻪﻥ ﺑﯧﺸﯩﻐﺎ ﭼﯩﺮﺍﻳﻠﯩﻖ ﮔﯜﻟﻠﯜﻙ ﺩﻭﭘﭙﺎ ﻛﯩﻴﮕﻪﻥ 80 ﻳﺎﺷﻼﺭﺩﯨﻜﻰ ﺑﯩﺮ ﺑﻮﯞﺍﻳﻨﯩﯔ ﻳﺎﺷﯩﻨﯩﭗ ﻗﺎﻟﻐﯩﻨﯩﻐﺎ ﻗﺎﺭﯨﻤﺎﻱ ﭼﺎﻗﻘﺎﻧﻠﯩﻖ ﺑﯩﻠﻪﻥ ﺷﺎﺥ ‏- ﺷﯘﻣﺒﺎ ، ﻗﻪﺩﯨﻤﯩﻲ ، ﺋﯩﭙﺘﯩﺪﺍﺋﯩﻲ ﺋﻪﺳﯟﺍﺑﻼﺭ ﺑﯩﻠﻪﻥ ﺑﯩﺮ ﺩﻩﻣﺪﯨﻼ ﺋﯚﺯﮔﯩﭽﻪ ﻗﻪﻏﻪﺯ ﯞﺍﺭﺍﻗﭽﯩﻠﯩﺮﯨﻨﻰ ﻳﺎﺳﺎﭖ ﺋﯘﻳﻐﯘﺭﻻﺭﻧﯩﯔ ﻗﻪﺩﯨﻤﯩﻲ ﻗﻪﻏﻪﺯﭼﯩﻠﯩﻚ ﻫﯜﻧﯩﺮﯨﻨﻰ ﻛﯚﺭﺳﯩﺘﯩﺸﻰ ﻛﯩﺸﯩﻠﻪﺭﻧﯩﯔ ﺋﻪﻗﻠﯩﻨﻰ ﻻﻝ ﻗﯩﻠﺪﻯ. ﻣﺎﻧﺎ ﺑﯘ ﺧﻮﺗﻪﻧﻨﯩﯔ ﻗﺎﺭﺍﻗﺎﺵ ﻧﺎﻫﯩﻴﯩﺴﻰ ﭘﯘﺭﭼﺎﻗﭽﻰ ﻳﯧﺰﺍ ﺑﯘﺩﺩﺍ ﻛﻪﻧﺘﯩﺪﻩ ﻳﺎﺷﺎﭖ ،ﺧﻮﺗﻪﻥ ﻗﻪﻏﯩﺰﻯ ﻳﺎﺳﺎﺷﺘﯩﻦ ﺋﯩﺒﺎﺭﻩﺕ ﺋﺎﺗﺎ ﻛﻪﺳﭙﯩﻨﻰ ﺩﺍﯞﺍﻣﻼﺷﺘﯘﺭﯗﭖ ﻛﻪﻟﮕﻪﻥ ﺋﻮﻧﯩﻨﭽﻰ ﺋﻪﯞﻻﺩ ، ﺧﻮﺗﻪﻥ ﻗﻪﻏﯩﺰﻯ ﺋﯘﺳﺘﯩﺴﻰ ﺗﻮﺧﺘﻰ ﺑﺎﻗﻰ ﺋﺎﻛﺎ ﺋﯩﺪﻯ.

ﺷﯘﻧﺪﯨﻦ ﻛﯧﻴﯩﻦ ﺧﻮﺗﻪﻥ ﻗﻪﻏﯩﺰﻯ ﺑﺎﺭﻏﺎﻧﭽﻪ ﻣﻪﺩﻩﻧﯩﻴﻪﺕ ﺗﻪﺗﻘﯩﻘﺎﺗﭽﯩﻠﯩﺮﯨﻨﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﺘﻰ، ﻣﻪﺧﺴﯘﺱ ﺧﻮﺗﻪﻥ ﻗﻪﻏﯩﺰﻯ ﺋﯜﺳﺘﯩﺪﻩ، ﺋﯘﻳﻐﯘﺭﻻﺭﻧﯩﯔ ﻗﻪﻏﻪﺯﭼﯩﻠﯩﻚ ﻣﻪﺩﻩﻧﯩﻴﯩﺘﻰ ﺋﯜﺳﺘﯩﺪﻩ ﺋﯩﺰﺩﯨﻨﯩﺪﯨﻐﺎﻧﻼﺭ ﺧﻮﺗﻪﻧﻨﯩﯔ ﻳﯩﺮﺍﻕ ﻳﯧﺰﯨﻠﯩﺮﯨﻨﻰ ﺋﺎﺭﯨﻼﭖ ، ﺩﻩﯞﺭﯨﻤﯩﺰﺩﯨﻜﻰ ﺋﺎﺧﯩﺮﻗﻰ ﺋﻪﯞﻻﺩ ﻗﻪﻏﻪﺯ ﺋﯘﺳﺘﯩﺴﻰ ﺗﻮﺧﺘﻰ ﺑﺎﻗﯩﻨﻰ ﺋﯩﺰﺩﻩﭖ ﺳﻮﺭﺍﻳﺪﯨﻐﺎﻥ ﺋﯘﻧﯩﯔ ﻳﺎﺳﯩﻐﺎﻥ ﻗﻪﻏﻪﺯﻟﯩﺮﯨﻨﻰ ﻗﯩﻤﻤﻪﺗﻠﯩﻚ ﺑﻮﻳﯘﻡ ﺋﻮﺭﻧﯩﺪﺍ ﺳﺎﻗﻼﻳﺪﯨﻐﺎﻥ ﺑﻮﻟﺪﻯ. ﺷﯘﻧﯩﯔ ﺑﯩﻠﻪﻥ ﺧﻮﺗﻪﻧﻨﯩﯔ ﻳﯩﺮﺍﻕ ﻳﯧﺰﯨﺴﯩﺪﺍ ﺳﺎﻗﻠﯩﻨﯩﭗ ﻗﺎﻟﻐﺎﻥ ﺧﻮﺗﻪﻥ ﻗﻪﻏﯩﺰﻯ ﺗﻮﺧﺘﻰ ﺋﺎﻛﯩﻨﯩﯔ ﺩﺍﯕﻘﻰ ﺑﯩﻠﻪﻥ ﺗﻪﯓ ﻗﺎﻳﺘﺎ ﺋﯧﺘﯩﺒﺎﺭﻏﺎ ﺋﯧﻠﯩﻨﯩﺸﻘﺎ ﺑﺎﺷﻠﯩﺪﻯ.

ﺧﻮﺗﻪﻥ ﻗﻪﻏﯩﺰﻯ ﯞﺍﺭﺳﻼﺭﻏﺎ، ﺑﺎﺯﺍﺭﻏﺎ ﻣﯘﻫﺘﺎﺝ

ﺋﺎﺭﯨﺪﯨﻦ ﺑﻪﺵ ‏- ﺋﺎﻟﺘﻪ ﻳﯩﻞ ﺋﯚﺗﺘﻰ ، ﻧﯚﯞﻩﺗﺘﻪ ﺋﯘﻳﻐﯘﺭﻻﺭ ﺋﺎﺭﯨﺴﯩﺪﺍ ﺗﻮﺧﺘﻰ ﺑﺎﻗﯩﻨﯩﯔ ﻗﻪﻏﻪﺯ ﻳﺎﺳﺎﺵ ﻫﯜﻧﯩﺮﯨﮕﻪ ﯞﺍﺭﯨﺴﻠﯩﻖ ﻗﯩﻠﯩﺪﯨﻐﺎﻥ ﺷﺎﮔﯩﺮﺗﻨﯩﯔ ﻳﻮﻗﻠﯘﻗﻰ، ﻳﯧﻘﯩﻦ ﻛﻪﻟﮕﯜﺳﯩﺪﻩ ﺋﯘﻳﻐﯘﺭﻻﺭ ﺧﻮﺗﻪﻥ ﻗﻪﻏﯩﺰﯨﺪﯨﻦ ﺋﯩﺒﺎﺭﻩﺕ ﻣﯩﺮﺍﺳﺘﯩﻦ ﻣﻪﯕﮕﯜﻟﯜﻙ ﺋﺎﻳﺮﯨﻠﯩﭗ ﻗﯧﻠﯩﺶ ﻣﯘﻣﻜﯩﻨﭽﯩﻠﯩﻜﻰ ﺑﺎﺭﻟﯩﻘﻰ ﻫﻪﻗﻘﯩﺪﻩ ﺋﻪﻧﺪﯨﺸﯩﻠﯩﻚ ﮔﻪﭖ ﺳﯚﺯﻟﻪﺭ ﺗﺎﺭﺍﻟﺪﻯ.

ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﺑﯩﺰ ﺗﻮﺧﺘﻰ ﺑﺎﻗﻰ ﺋﺎﻛﯩﻨﻰ ﺗﯧﭙﯩﭗ ﺳﯚﺯﻟﯩﺸﯩﺸﻨﻰ ﺗﻮﻏﺮﺍ ﺗﺎﭘﺘﯘﻕ ، ﺋﻪﻣﻤﺎ ﻳﯩﺮﺍﻕ ﻳﯧﺰﯨﺪﯨﻜﻰ ﺩﺍﯕﻠﯩﻖ ﻛﯩﺸﯩﻨﻰ ﺗﺎﭘﻤﺎﻕ ﺋﺎﺳﻤﺎﻧﻐﯩﻤﯘ ﺗﻮﺧﺘﯩﻤﯩﺪﻯ. 25 - ﺳﯧﻨﺘﻪﺑﯩﺮ ﻛﯜﻧﻰ ،ﺩﻩﺳﻠﻪﭖ ﺑﯩﺰ ﺧﻮﺗﻪﻥ ﯞﯨﻼﻳﻪﺗﻠﯩﻚ ﻣﻪﺩﻩﻧﯩﻴﻪﺕ ﺋﯩﺪﺍﺭﯨﺴﻰ ﺋﺎﺭﻗﯩﻠﯩﻖ ،ﺗﻮﺧﺘﻰ ﺑﺎﻗﻰ ﺗﯘﺭﯗﺷﻠﯘﻕ ﻗﺎﺭﺍﻗﺎﺵ ﻧﺎﻫﯩﻴﻪ ﭘﯘﺭﭼﺎﻗﭽﻰ ﻳﯧﺰﯨﻠﯩﻖ ﻫﯚﻛﯜﻣﻪﺕ ﺑﯩﻠﻪﻥ ﺋﺎﻻﻗﯩﻼﺷﺘﯘﻕ. ﺋﻪﺗﯩﺴﻰ ﻳﻪﻧﻰ26 - ﺳﯧﻨﺘﻪﺑﯩﺮ ﭘﯘﺭﭼﺎﻗﭽﻰ ﻳﯧﺰﯨﻠﯩﻖ ﻫﯚﻛﯜﻣﻪﺗﻜﻪ ﻗﺎﻳﺘﺎ ﺗﯧﻠﯧﻔﻮﻥ ﻗﯩﻠﻐﯩﻨﯩﻤﯩﺰﺩﺍ ﻳﯧﺰﯨﻠﯩﻖ ﻫﯚﻛﯜﻣﻪﺕ ﺋﯩﺸﺨﺎﻧﯩﺴﯩﻨﯩﯔ ﺑﯩﺮ ﺧﺎﺩﯨﻤﻰ ﺋﯚﺯﻯ ﺗﻮﺧﺘﻰ ﺑﺎﻗﯩﻨﯩﯔ ﺋﯚﻳﯩﮕﻪ ﺑﯧﺮﯨﭗ ﺑﯩﺰﻧﯩﯔ ﻗﻮﻝ ﺗﯧﻠﯧﻔﻮﻧﻰ ﺋﺎﺭﻗﯩﻠﯩﻖ ﺗﻮﺧﺘﻰ ﺑﺎﻗﻰ ﺑﯩﻠﻪﻥ ﺋﺎﻻﻗﯩﻠﯩﺸﯩﺸﯩﻤﯩﺰﻏﺎ ﻳﺎﺭﺩﻩﻡ ﻗﯩﻠﺪﻯ.

ﺩﯦﻤﻪﻙ ﺗﻮﺧﺘﻰ ﺑﺎﻗﻰ ﺋﺎﻛﺎ ﺧﻮﺗﻪﻥ ﻗﻪﻏﯩﺰﻯ ﻳﺎﺳﺎﺷﺘﯩﻦ ﺋﯩﺒﺎﺭﻩﺕ ﻗﻪﺩﯨﻤﯩﻲ ﻗﻮﻝ ﻫﯜﻧﻪﺭﻧﻰ ﺑﯩﻠﯩﺪﯨﻐﺎﻥ ﺑﯩﺮﺩﯨﻦ ‏- ﺑﯩﺮ ﻛﯩﺸﻰ ﺑﻮﻟﻤﺎﺳﺘﯩﻦ ، ﺋﯘﻧﯩﯔ ﭘﻪﺭﺯﻩﻧﺘﻠﯩﺮﻯ ﯞﻩ ﺑﺎﺷﻘﯩﻼﺭﻣﯘ ﺑﯘ ﺋﯘﻳﻐﯘﺭ ﻗﻪﺩﯨﻤﯩﻲ ﻣﯩﺮﺍﺳﯩﻐﺎ ﯞﺍﺭﯨﺴﻠﯩﻖ ﻗﯩﻠﯩﺸﻘﺎ ﺗﻪﻳﻴﺎﺭﻟﯩﻨﯩﯟﯦﺘﯩﭙﺘﯘ . ﺋﻪﺗﯩﻜﻰ ﭘﺮﻭﮔﺮﺍﻣﻤﯩﻤﯩﺰﺩﯨﻦ ﺗﻮﺧﺘﻰ ﺑﺎﻗﯩﻨﯩﯔ ﺷﺎﮔﯩﺮﺗﻰ ﺷﯘﻧﺪﺍﻗﻼ ﺋﻮﻏﻠﻰ ﺗﯘﺭﺳﯘﻥ ﺑﺎﻗﻰ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﻤﯩﺰﻧﯩﯔ ﺩﺍﯞﺍﻣﯩﻨﻰ ﺋﺎﯕﻠﯩﻐﺎﻳﺴﯩﻠﻪﺭ. (ﮔﯜﻟﭽﯧﻬﺮﻩ)