ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭﻧﯩﯔ ﻛﻪﺳﭗ ﯞﻩ ﻣﻪﻛﺘﻪﭖ ﺗﺎﻟﻼﺷﺘﺎ ﻛﯚﭖ ﺗﻪﺭﻩﭘﻠﯩﻤﻪ ﭼﻪﻛﻠﯩﻤﯩﮕﻪ ﺋﯘﭼﺮﯨﺸﻰ ﻫﻪﻗﻘﯩﺪﻩ ﻗﺎﺭﺍﺷﻼﺭ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﻬﺮﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺑﯘ ﻳﯩﻠﻠﯩﻖ ﺋﺎﻟﯩﻲ ﻣﻪﻛﺘﻪﭘﻠﻪﺭﮔﻪ ﺗﺎﻟﻼﺵ ﺋﯩﻤﺘﯩﻬﺎﻧﻰ ﺋﺎﺧﯩﺮﻻﺷﻘﺎﻧﺪﯨﻦ ﻛﯧﻴﯩﻦ, ﺋﻮﻗﯘﻏﯘﭼﯩﻼﺭ ﻫﻪﻣﺪﻩ ﺋﯘﻻﺭﻧﯩﯔ ﺋﺎﺗﺎ- ﺋﺎﻧﯩﻠﯩﺮﻯ ﻳﻪﻧﻪ ﻣﻪﻛﺘﻪﭖ ﻫﻪﻣﺪﻩ ﻛﻪﺳﭗ ﺗﺎﻟﻼﺷﺘﻪﻙ ﺋﯩﻜﻜﯩﻠﯩﻨﯩﺪﯨﻐﺎﻥ ﻗﺎﻳﻤﯘﻗﯘﺷﻠﯘﻕ ﺑﯩﺮ ﻣﻪﺯﮔﯩﻠﻨﻰ ﺑﺎﺷﺘﯩﻦ ﻛﻪﭼﯜﺭﯨﺪﯗ . ﮔﻪﺭﭼﻪ ﺋﯘﻳﻐﯘﺭ ﯞﻩ ﺑﺎﺷﻘﺎ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﺋﻮﻗﯘﻏﯘﭼﯩﻠﯩﺮﻯ ﺧﯩﺘﺎﻱ ﺋﻮﻗﯘﻏﯘﭼﯩﻼﺭ ﺑﯩﻠﻪﻥ ﺑﯩﺮﻻ ﯞﺍﻗﯩﺘﺘﺎ ﺋﻮﺧﺸﺎﺵ ﺗﻪﻟﻪﭖ ﺑﻮﻳﯩﭽﻪ ﺋﯩﻤﺘﯩﻬﺎﻥ ﺑﻪﺭﺳﯩﻤﯘ, ﺋﻪﻣﻤﺎ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭ ﺋﯩﻤﺘﯩﻬﺎﻥ ﻧﻪﺗﯩﺠﻪ ﭼﻪﻛﻠﯩﻤﯩﺴﯩﺪﯨﻦ ﺑﺎﺷﻘﺎ ﻳﻪﻧﻪ ﻣﻪﻛﺘﻪﭖ ﻫﻪﻣﺪﻩ ﻛﻪﺳﭗ ﺗﺎﻟﻼﺵ ﻳﻮﻟﻠﯩﺮﯨﺪﯨﻤﯘ ﺗﻮﺳﺎﻟﻐﯘ , ﺷﯘﻧﯩﯖﺪﻩﻙ ﺗﯜﺭﻟﯜﻙ ﭼﻪﻛﻠﯩﻤﯩﻠﻪﺭﮔﻪ ﺋﯘﭼﺮﺍﭖ ﻛﻪﻟﻤﻪﻛﺘﻪ.

ﺋﻮﻗﯘﻏﯘﭼﯩﻼﺭ ﻣﻪﻛﺘﻪﭘﻠﻪﺭﻧﻰ ﺗﺎﻟﻼﺷﻨﻰ ﺋﺎﺧﯩﺮﻻﺷﺘﯘﺭﺩﻯ

ﺑﯘ ﻳﯩﻠﻠﯩﻖ ﺋﺎﻟﯩﻲ ﻣﻪﻛﺘﻪﭘﻠﻪﺭﮔﻪ ﻗﻮﺑﯘﻝ ﻗﯩﻠﯩﺶ ﻣﻪﻣﻠﯩﻜﻪﺗﻠﯩﻚ ﺑﯩﺮ ﺗﯘﺗﺎﺵ ﺋﯩﻤﺘﯩﻬﺎﻧﻰ ﺧﯩﺘﺎﻳﺪﺍ 7 - ﺋﯩﻴﯘﻥ ﯞﻩ 8 -ﺋﯩﻴﯘﻥ ﺋﯩﻜﻜﻰ ﻛﯜﻥ ﺩﺍﯞﺍﻣﻼﺷﺘﻰ . 10 - ﺋﯩﻴﯘﻧﺪﯨﻦ ﺑﺎﺷﻼﭖ 12 - ﺋﯩﻴﯘﻧﻐﯩﭽﻪ ﺑﻮﻟﺴﺎ ﺋﻮﻗﯘﻏﯘﭼﯩﻼﺭ ﺋﯚﺯ ﺋﺎﺭﺯﯗﻟﯩﺮﻯ ﺑﻮﻳﯩﭽﻪ ﻛﻪﺳﭗ ﻫﻪﻣﺪﻩ ﻣﻪﻛﺘﻪﭘﻠﻪﺭﻧﻰ ﺗﺎﻟﻼﺷﻨﻰ ﺋﺎﺧﯩﺮﻻﺷﺘﯘﺭﺩﻯ. ﺋﻪﻣﺪﯨﻠﯩﻜﺘﻪ ﺋﯘﻻﺭ ﺋﯩﻤﺘﯩﻬﺎﻥ ﻧﻪﺗﯩﺠﯩﺴﯩﻨﻰ ﺗﻪﻗﻪﺯﺯﺍﻟﯩﻖ ﺑﯩﻠﻪﻥ ﻛﯜﺗﻤﻪﻛﺘﻪ.

25 - ﺋﯩﻴﯘﻥ ﻛﯜﻧﻰ ﻣﻪﻣﻠﯩﻜﻪﺕ ﺑﻮﻳﯩﭽﻪ ﺋﺎﻟﯩﻲ ﻣﻪﻛﺘﻪﭘﻠﻪﺭﮔﻪ ﻗﻮﺑﯘﻝ ﻗﯩﻠﯩﺶ ﺋﯩﻤﺘﯩﻬﺎﻥ ﭼﯧﻜﻰ ﻫﻪﻣﺪﻩ ﺋﯩﻤﺘﯩﻬﺎﻥ ﻧﻪﺗﯩﺠﯩﻠﯩﺮﻯ ﺑﯩﺮﺍﻗﻼ ﺋﯧﻼﻥ ﻗﯩﻠﯩﻨﻤﺎﻗﭽﻰ. ﺧﯩﺘﺎﻱ, ﺟﯜﻣﻠﯩﺪﯨﻦ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﺩﻩﺗﺘﯩﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭ 6 - ﺋﯩﻴﯘﻟﺪﯨﻦ ﺑﺎﺷﻼﭖ ﺭﻩﺳﻤﻰ ﺋﻮﻗﯘﻏﯘﭼﻰ ﻗﻮﺑﯘﻝ ﻗﯩﻠﯩﺸﻘﺎ ﺑﺎﺷﻼﻳﺪﯗ.

ﻛﻪﺳﯩﭗ ﻫﻪﻣﺪﻩ ﻣﻪﻛﺘﻪﭖ ﺗﺎﻟﻼﺷﺘﯩﻦ ﺋﯩﺒﺎﺭﻩﺕ ﺑﯘ ﺋﯚﺗﻜﻪﻝ ﻳﻪﻧﻪ ﺑﯩﺮ ﻣﯘﻫﯩﻢ ﺳﯩﻨﺎﻕ

ﺋﺎﺭﺯﯗ ﺗﻮﻟﺪﯗﺭﯗﺵ ﻳﻪﻧﻰ ﻛﻪﺳﯩﭗ ﻫﻪﻣﺪﻩ ﻣﻪﻛﺘﻪﭖ ﺗﺎﻟﻼﺷﺘﯩﻦ ﺋﯩﺒﺎﺭﻩﺕ ﺑﯘ ﺋﯚﺗﻜﻪﻝ ، ﺋﺎﻟﯩﻲ ﻣﻪﻛﺘﻪﭘﻜﻪ ﺋﯩﻤﺘﯩﻬﺎﻥ ﺑﻪﺭﮔﻪﻥ ﺋﻮﻗﯘﻏﯘﭼﯩﻼﺭ ﺋﯜﭼﯜﻥ ﻳﻪﻧﻪ ﺑﯩﺮ ﻣﯘﻫﯩﻢ ﺳﯩﻨﺎﻕ ﻫﻪﻣﺪﻩ ﺭﯨﻘﺎﺑﻪﺕ ﻣﻪﻳﺪﺍﻧﻰ ﻫﯧﺴﺎﺑﻠﯩﻨﯩﺪﯗ.

ﺋﺎﺭﺯﯗ ﺗﻮﻟﺪﯗﺭﯗﺵ ﺟﻪﺩﯞﯨﻠﯩﻨﻰ ﺗﻮﻟﺪﯗﺭﯗﺵ ﺋﺎﻟﺪﯨﺪﺍ ﻫﻪﺭ ﻗﺎﻧﺪﺍﻕ ﺑﯩﺮ ﺋﺎﻟﯩﻲ ﻣﻪﻛﺘﻪﭘﻜﻪ ﺋﯩﻤﺘﯩﻬﺎﻥ ﺑﻪﺭﮔﯜﭼﻰ ﺋﻮﻗﯘﻏﯘﭼﻰ ﺋﯩﻜﻜﯩﻠﻪﻧﻤﻪﻱ ﻗﺎﻟﻤﺎﻳﺪﯗ , ﭼﯜﻧﻜﻰ ﺋﯘﻻﺭ ﺋﯚﺯﯨﻨﯩﯔ ﺋﯩﻤﺘﯩﻬﺎﻥ ﻧﻪﺗﯩﺠﯩﺴﯩﻨﻰ ﺗﻪﺧﻤﯩﻦ ﻗﯩﻠﯩﺶ ﺋﺎﺳﺎﺳﯩﺪﺍ ﻗﯩﻴﺎﺱ ﻗﯩﻠﻐﺎﻥ ﻧﻪﺗﯩﺠﯩﺴﻰ ﺩﺍﺋﯩﺮﯨﺴﻰ ﺋﯩﭽﯩﺪﻩ ﻣﻪﻛﺘﻪﭖ ﻫﻪﻣﺪﻩ ﻳﺎﻗﺘﯘﺭﻏﺎﻥ ﻛﻪﺳﯩﭙﻠﯩﺮﯨﻨﻰ ﺗﺎﻟﻼﻳﺪﯗ. ﺑﯩﺮﺍﻕ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭ ﺑﯘ ﺟﻪﺭﻳﺎﻧﺪﺍ ﺗﯧﺨﯩﻤﯘ ﺟﯩﻖ ﺋﯩﻜﻜﯩﻠﯩﻨﯩﺶ ﯞﻩ ﺗﻮﺳﺎﻟﻐﯘﻏﺎ ﺩﯗﭺ ﻛﯧﻠﯩﺪﯗ .

ﺑﯘﻧﯩﯔ ﺳﻪﯞﻩﺑﻠﯩﺮﻯ ﻫﻪﻗﻘﯩﺪﻩ ﻛﺎﻧﺎﺩﺍﺩﺍ ﺗﯘﺭﯗﺷﻠﯘﻕ ﺭﯗﻗﯩﻴﻪ ﺧﺎﻧﯩﻢ ﺑﯩﻠﻪﻥ ﺋﺎﻣﯧﺮﯨﻜﯩﺪﯨﻜﻰ ﺗﺎﺭﯨﺦ ﭘﻪﻧﻠﯩﺮﻯ ﺩﻭﻛﺘﻮﺭﻯ ﻗﺎﻫﺎﺭ ﺑﺎﺭﺍﺕ ﻗﺎﺗﺎﺭﻟﯩﻖ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﻯ ﺋﯚﺯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. (ﮔﯜﻟﭽﯧﻬﺮﻩ)