ﻛﺎﻧﺎﺩﺍﻧﯩﯔ 47 ﻧﻪﭘﻪﺭ ﭘﯘﻗﺮﺍﺳﻰ ﺧﯩﺘﺎﻳﺪﺍ ﻗﻮﻟﻐﺎ ﺋﯧﻠﯩﻨﺪﻯ

• ﻣﯘﺧﺒﯩﺮﯨﻤﯩﺰ ﻛﺎﻣﯩﻞ ﺗﯘﺭﺳﯘﻧﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻛﺎﻧﺎﺩﺍ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻜﯩﻨﯩﯔ 27-ﻛﯜﻧﻰ ﺋﺎﺷﻜﺎﺭﯨﻠﯩﺸﯩﭽﻪ،ﻧﯚﯞﻩﺗﺘﻪ ﺧﯩﺘﺎﻱ ﻫﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﺗﯜﺭﻟﯜﻙ ﺑﺎﻧﺎ-ﺳﻪﯞﻩﭘﻠﻪﺭ ﺑﯩﻠﻪﻥ ﺧﯩﺘﺎﻳﺪﺍ ﺗﯘﺗﯘﭖ ﺗﯘﺭﯗﻟﻐﺎﻥ ﯞﻩ ﻗﻮﻟﻐﺎ ﺋﯧﻠﯩﻨﻐﺎﻥ ﻛﺎﻧﺎﺩﺍﻟﯩﻘﻼﺭﻧﯩﯔ ﺳﺎﻧﻰ 50 ﻛﻪ ﻳﯧﻘﯩﻨﻼﺷﻘﺎﻥ.ﻛﺎﻧﺎﺩﺍ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻜﻰ ﺑﯘ ﺧﯩﻞ ﺋﻪﻫﯟﺍﻝ ﺋﺎﺳﺘﯩﺪﺍ ﻗﻮﺵ ﺩﯙﻟﻪﺕ ﭘﯘﻗﺮﺍﺳﻰ ﺳﺎﻻﻫﯩﻴﯩﺘﯩﮕﻪ ﺋﯩﮕﻪ ﻛﺎﻧﺎﺩﺍ ﭘﯘﻗﺮﺍﻟﯩﺮﯨﻨﯩﯔ ﺧﯩﺘﺎﻱ ﭼﻮﯓ ﻗﯘﺭﯗﻗﻠﯘﻗﻰ ﺑﯩﻠﻪﻥ ﺧﻮﯕﻜﻮﯕﻨﻰ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ، ﻛﺎﻧﺎﺩﺍ ﭘﺎﺳﭙﻮﺭﺗﯩﻨﻰ ﺋﯩﺸﻠﯩﺘﯩﺸﻰ ﻛﯧﺮﻩﻛﻠﯩﮕﯩﻨﻰ،ﺋﯘﻧﺪﺍﻕ ﺑﻮﻟﻤﯩﻐﺎﻧﺪﺍ ﺋﯘﻻﺭ ﺑﻪﻫﺮﯨﻤﻪﻥ ﺑﻮﻟﯩﺪﯨﻐﺎﻥ ﻛﻮﻧﺴﯘﻝ ﻣﯘﻻﺯﯨﻤﯩﺘﯩﺪﻩ ﭼﻪﻛﻠﯩﻤﯩﮕﻪ ﺋﯘﭼﺮﺍﻳﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﺘﻰ.

ﻛﺎﻧﺎﺩﺍ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺗﻮﺭ ﺑﯧﺘﯩﺪﯨﻤﯘ، ﺋﻪﺳﻠﯩﺪﻩ ﺧﯩﺘﺎﻱ ﭘﯘﻗﺮﺍﺳﻰ ﺑﻮﻟﻐﺎﻥ ﻛﺎﻧﺎﺩﺍﻟﯩﻘﻼﺭﻧﯩﯔ ﺧﯩﺘﺎﻳﻨﻰ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ،ﺧﯘﺳﯘﺳﻲ ﺑﯩﺨﻪﺗﻪﺭﻟﯩﻜﻜﻪ ﺋﺎﻻﻫﯩﺪﻩ ﺩﯨﻘﻘﻪﺕ ﻗﯩﻠﯩﺸﻰ ﻛﯧﺮﻩﻛﻠﯩﮕﯩﻨﻰ،ﺧﯩﺘﺎﻱ ﭘﯘﺧﺮﺍﻟﯩﻘﯩﺪﯨﻦ ﻛﺎﻧﺎﺩﺍ ﭘﯘﻗﺮﺍﻟﯩﻘﯩﻐﺎ ﺋﯚﺗﻜﻪﻥ ﻗﻮﺵ ﺩﯙﻟﻪﺕ ﭘﯘﻗﺮﺍﺳﻰ ﺳﺎﻻﻫﯩﻴﯩﺘﯩﮕﻪ ﺋﯩﮕﻪ ﻛﺎﻧﺎﺩﺍﻟﯩﻘﻼﺭﻧﯩﯔ، ﺧﯩﺘﺎﻳﻐﺎ ﻛﯩﺮﮔﻪﻧﺪﻩ ﺗﯜﺭﻟﯜﻙ ﻗﯩﻴﯩﻨﭽﯩﻠﯩﻘﻼﺭﻏﺎ ﺩﯗﭺ ﻛﯧﻠﯩﯟﺍﺗﻘﺎﻧﻠﯩﻘﻰ ﯞﻩ ﺧﯩﺘﺎﻱ ﺩﺍﺋﯩﺮﻟﯩﺮﯨﻨﯩﯔ ﺋﯘﻻﺭﻧﯩﯔ ﻛﺎﻧﺎﺩﺍ ﺗﻪﯞﻩﻟﯩﻜﯩﻨﻰ ﺋﯧﺘﯩﺮﺍﭖ ﻗﯩﻠﻤﺎﻳﯟﺍﺗﻘﺎﻧﻠﯩﻘﻰ ﺋﺎﻻﻫﯩﺪﻩ ﺗﻪﻛﯩﺘﻠﻪﻧﮕﻪﻥ.

ﺧﯩﺘﺎﻱ ﺑﯘ ﺋﻪﻫﺪﯨﻨﺎﻣﯩﮕﻪ ﻗﻮﻝ ﻗﻮﻳﻐﺎﻥ

ﻛﺎﻧﺎﺩﺍ ﺑﯩﻠﻪﻥ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﺍ 1999-ﻳﯩﻠﻰ ﺋﯩﻤﺰﺍﻻﻧﻐﺎﻥ "ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﻰ"ﺩﺍ ﻛﺎﻧﺎﺩﺍ ﯞﻩ ﺧﯩﺘﺎﻳﺪﯨﻦ ﺋﯩﺒﺎﺭﻩﺕ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﯩﮕﻪ ﺋﯩﮕﻪ ﻛﯩﺸﯩﻠﻪﺭ ﻛﺎﻧﺎﺩﺍ ﭘﺎﺳﭙﻮﺭﺗﻰ ﺑﯩﻠﻪﻥ ﺧﯩﺘﺎﻳﻨﻰ ﺯﯨﻴﺎﺭﻩﺕ ﻗﯩﻠﻐﺎﻧﺪﺍ، ﻛﺎﻧﺎﺩﺍ ﭘﯘﻗﺮﺍﺳﻰ ﻣﯘﺋﺎﻣﯩﻠﯩﺴﯩﺪﯨﻦ ﺑﻪﻫﺮﯨﻤﻪﻥ ﺑﻮﻟﯩﺪﯗ،ﺩﯦﻴﯩﻠﮕﻪﻥ.

ﻛﺎﻧﺎﺩﺍ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﯩﻨﻰ ﺋﯧﺘﯩﺮﺍﭖ ﻗﯩﻠﯩﺪﯗ. ﻛﺎﻧﺎﺩﺍﻧﯩﯔ ﻗﻮﺵ ﺩﯙﻟﻪﺕ ﭘﯘﻗﺮﺍﻟﯩﻘﻰ ﺳﯩﻴﺎﺳﯩﺘﻰ ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﻛﺎﻧﺎﺩﺍ ﻫﯚﻛﯜﻣﯩﺘﯩﮕﻪ ﻧﯘﺭﻏﯘﻥ ﺋﺎﯞﺍﺭﯨﭽﯩﻠﯩﻘﻼﺭﻧﻰ ﺋﯧﻠﯩﭗ ﻛﻪﻟﻤﻪﻛﺘﻪ. ﺷﯘﯕﺎ ﻛﺎﻧﺎﺩﺍﺩﺍ ﻗﻮﺵ ﺩﯙﻟﻪﺕ ﭘﯘﺧﺮﺍﻟﯩﻖ ﺳﯩﻴﺎﺳﯩﺘﯩﻨﻰ ﺋﻪﻣﻪﻟﺪﯨﻦ ﻗﺎﻟﺪﯗﺭﯗﺵ ﯞﻩ ﻗﺎﻟﺪﯗﺭﯗﻟﻤﺎﺳﻠﯩﻖ ﻣﻪﺳﯩﻠﯩﺴﻰ ﺋﯩﺰﭼﯩﻞ ﻣﯘﻧﺎﺯﯨﺮﻩ ﺗﯧﻤﯩﺴﻰ ﺑﻮﻟﻤﺎﻗﺘﺎ.

ﺗﻪﻫﻠﯩﻠﭽﯩﻠﻪﺭ، ﺧﯩﺘﺎﻱ ﻫﯚﻛﯜﻣﯩﺘﻰ ﻫﯜﺳﻪﻳﯩﻦ ﺟﯧﻠﯩﻠﻨﯩﯔ ﻛﺎﻧﺎﺩﺍ ﭘﯘﻗﺮﺍﻟﯩﻘﻰ ﺳﺎﻻﻫﯩﻴﯩﺘﻰ ﺭﻩﺕ ﻗﯩﻠﯩﭗ، ﺋﯘﻧﯩﯖﻐﺎ ﻣﯘﺩﺩﻩﺗﺴﯩﺰ ﻗﺎﻣﺎﻕ ﺟﺎﺯﺍﺳﻰ ﺑﻪﺭﮔﻪﻥ ﯞﻩ ﻛﺎﻧﺎﺩﺍ ﺩﯨﭙﻠﻮﻣﺎﺗﻠﯩﺮﯨﻨﯩﯔ ﺋﯘﻧﻰ ﻳﻮﻗﻠﯩﺸﯩﻐﺎ ﻳﻮﻝ ﻗﻮﻳﻤﯩﻐﺎﻧﺪﯨﻦ ﻛﯧﻴﯩﻦ ﻛﺎﻧﺎﺩﺍ ﺧﯩﺘﺎﻱ ﺋﻮﺗﺘﯘﺭﯨﺴﯩﺪﯨﻜﻰ ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﻰ ﺋﺎﺳﺎﺳﻪﻥ ﻗﺎﻧﯘﻧﻰ ﻛﯜﭼﯩﻨﻰ ﻳﻮﻗﺎﺗﺘﻰ، ﺩﻩﭖ ﻗﺎﺭﯨﻤﺎﻗﺘﺎ.

ﻛﺎﻧﺎﺩﺍ ﭘﯘﻗﺮﺍﻟﯩﺮﻨﻰ ﺧﯩﺘﺎﻳﻨﻰ ﺯﯨﻴﺎﺭﻩﺕ ﻗﯩﻠﯩﺸﺘﺎ ﺋﺎﮔﺎﻫﻼﻧﺪﯗﺭﺩﻯ

ﻛﺎﻧﺎﺩﺍ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻟﯩﻜﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﺑﯧﺮﻧﺎﺭﺩ ﯕﯘﻳﻪﻧﻨﯩﯔ ﻛﺎﻧﺎﺩﺍ ﻣﻪﺗﺒﯘﺋﺎﺗﻠﯩﺮﯨﻐﺎ ﺋﺎﺷﻜﺎﺭﯨﻠﯩﺸﯩﭽﻪ،ﻫﺎﺯﯨﺮ 47 ﻧﻪﭘﻪﺭ ﻛﺎﻧﺎﺩﺍ ﭘﯘﻗﺮﺍﺳﻰ ﺧﯩﺘﺎﻱ ﺩﺍﺋﯩﺮﻟﯩﺮﻯ ﺗﻪﺭﯨﭙﯩﺪﯨﻦ ﺗﯘﺗﯘﭖ ﺗﯘﺭﯗﻟﻐﺎﻥ ﯞﻩ ﻗﻮﻟﻐﺎ ﺋﯧﻠﯩﻨﻐﺎﻥ.ﺋﺎﻣﻤﺎ ﺑﯘ ﺑﺎﻳﺎﻧﺎﺗﭽﻰ ﺑﯘﻧﯩﯔ ﺋﯩﭽﯩﺪﻩ ﻗﺎﻧﭽﻪ ﻧﻪﭘﯩﺮﯨﻨﯩﯔ ﺧﯩﺘﺎﻱ ﭘﯘﺧﺮﺍﻟﯩﻘﯩﺪﯨﻦ ﻛﺎﻧﺎﺩﺍ ﺗﻪﯞﻩﻟﯩﻜﯩﮕﻪ ﺋﯚﺗﻜﻪﻥ ﻛﺎﻧﺎﺩﺍﻟﯩﻖ ﺋﯩﻜﻪﻧﻠﯩﻜﯩﻨﻰ ﺋﺎﺷﻜﺎﺭﯨﻼﺷﻨﻰ ﺭﻩﺕ ﻗﯩﻠﺪﻯ.ﺋﯘ ﺑﯘ 47 ﻧﻪﭘﻪﺭ ﻛﯩﺸﯩﻨﯩﯔ ﻗﻮﻟﻐﺎ ﺋﯧﻠﯩﻨﯩﺶ ﺳﻪﯞﻩﭘﻠﯩﺮﯨﻨﯩﯔ ﻗﺎﻧﯘﻧﺴﯩﺰ ﺑﯘﻳﯘﻣﻼﺭﻧﻰ ﺧﯩﺘﺎﻱ ﭼﯧﮕﺮﯨﺴﯩﺪﯨﻦ ﺋﻪﻛﯩﺮﯨﺶ،ﺋﻮﻣﯘﻣﻨﯩﯔ ﻣﯜﻟﻜﯩﮕﻪ ﺯﯨﻴﺎﻥ ﺳﯧﻠﯩﺶ،ﻗﺎﻧﯘﻧﺴﯩﺰ ﺋﯘﺳﯘﻟﺪﺍ ﭘﯘﻝ ﺋﺎﻟﻤﺎﺷﺘﯘﺭﯗﺵ ﺩﯦﮕﻪﻧﺪﻩﻙ ﺟﯩﻨﺎﻳﻪﺗﻠﻪﺭ ﺋﯩﻜﻪﻧﻠﯩﻜﯩﻨﻰ ﺗﯩﻠﻐﺎ ﺋﺎﻟﺪﻯ.

ﺑﺎﻳﺎﻧﺎﺗﭽﻰ ﺧﯩﺘﺎﻳﺪﺍ ﺗﯘﺗﯘﭖ ﺗﯘﺭﯨﻠﯩﯟﺍﺗﻘﺎﻥ ﻛﺎﻧﺎﺩﺍ ﭘﯘﻗﺮﺍﻟﯩﺮﻯ ﺋﯩﭽﯩﺪﻩ ﻗﺎﻧﭽﯩﺴﯩﻨﯩﯔ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﯩﮕﻪ ﺋﯩﮕﻪ ﺋﯩﻜﻪﻧﻠﯩﮕﯩﻨﻰ ﯞﻩ ﺑﯘﻻﺭ ﺋﯩﭽﯩﺪﯨﻦ ﻗﺎﻧﭽﻪ ﻧﻪﭘﯩﺮﻯ ﺋﯜﺳﺘﯩﺪﯨﻦ ﺟﯩﻨﺎﻳﻰ ﻫﯚﻛﯜﻡ ﺋﯧﻼﻥ ﻗﯩﻠﯩﻨﻐﺎﻧﻠﯩﻘﯩﻨﻰ ﺋﺎﺷﻜﺎﺭﯨﻼﺷﻨﻰ ﺭﻩﺕ ﻗﯩﻠﺪﻯ.ﺋﺎﻣﻤﺎ ﺋﯘ ﭼﻪﺗﺌﻪﻟﻠﻪﺭﺩﻩ ﭘﯧﺸﻜﻪﻟﻠﯩﻜﻜﻪ ﻳﻮﻟﯘﻗﻘﺎﻥ ﻛﺎﻧﺎﺩﺍ ﭘﯘﻗﺮﺍﻟﯩﺮﯨﻨﯩﯔ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﻰ ﺑﻮﻟﯘﺷﯩﺪﯨﻦ ﻗﻪﺗﺌﻰ ﻧﻪﺯﻩﺭ، ﺋﯘﻻﺭﻧﯩﯔ ﻛﻮﻧﺴﯘﻝ ﻫﻮﻗﯘﻗﯩﺪﯨﻦ ﺑﻪﻫﺮﯨﻤﻪﻥ ﺑﻮﻟﯩﯟﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ:" ﺑﯩﺮﺍﻕ ﺑﯩﺰﻧﯩﯔ ﭘﯘﻗﺮﺍﻟﯩﺮﯨﻤﯩﺰﻧﯩﯔ ﺋﻪﺳﻠﯩﺪﯨﻜﻰ ﺩﯙﻟﯩﺘﯩﮕﻪ ﺑﺎﺭﻏﺎﻧﺪﺍ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﻰ ﺋﯧﺘﯩﺮﺍﭖ ﻗﯩﻠﯩﻨﻤﺎﻳﺪﯨﻐﺎﻥ ﺋﻪﻫﯟﺍﻟﻼﺭ ﻛﯚﺭﯛﻟﯩﯟﺍﺗﯩﺪﯗ..ﺑﯘ ﺩﯙﻟﻪﺗﻠﻪﺭﺩﻩ ﻗﻮﺵ ﺩﯙﻟﻪﺕ ﺗﻪﯞﻩﻟﯩﻜﯩﮕﻪ ﺋﯩﮕﻪ ﭘﯘﻗﺮﺍﻟﯩﺮﯨﻤﯩﺰﻏﺎ ﻛﻮﻧﺴﯘﻝ ﻫﻮﻗﯘﻗﻰ ﺟﻪﻫﻪﺗﺘﻪ ﻳﺎﺭﺩﻩﻡ ﻗﯩﻠﯩﺸﺘﺎ ﭼﻪﻛﻠﯩﻤﯩﮕﻪ ﺋﯘﭼﺮﺍﯞﺍﺗﯩﻤﯩﺰ. ﺷﯘﯕﺎ ﻛﺎﻧﺎﺩﺍ ﭘﯘﻗﺮﺍﻟﯩﺮﻯ ﺧﯩﺘﺎﻱ ﯞﻩ ﺧﻮﯕﻜﻮﯕﻐﺎ ﺑﺎﺭﻣﺎﻗﭽﻰ ﺑﻮﻟﺴﺎ،ﻛﺎﻧﺎﺩﺍ ﭘﺎﺳﭙﻮﺭﺗﯩﻨﻰ ﺋﯩﺸﻠﯩﺘﯩﺸﻰ ﻛﯧﺮﻩﻙ.ﻛﺎﻧﺎﺩﺍ ﭘﺎﺳﭙﻮﺭﺗﯩﻨﻰ ﻗﻮﻟﻼﻧﻐﺎﻧﻼﺭ ﭘﯧﺸﻜﻪﻟﻠﯩﻜﻜﻪ ﻳﻮﻟﯘﻗﻘﺎﻧﺪﺍ،ﻛﺎﻧﺎﺩﺍﻧﯩﯔ ﻛﻮﻧﺴﯘﻝ ﻳﺎﺭﺩﯨﻤﯩﮕﻪ ﺋﯧﺮﯨﺸﻪﻟﻪﻳﺪﯗ.ﮔﻪﺭﭼﻪ ﺋﯘﻻﺭ ﯞﯨﺰﺍ ﺟﻪﻫﻪﺗﻠﻪﺭﺩﻩ ﺋﺎﯞﺍﺭﯨﭽﯩﻠﯩﻘﻼﺭﻏﺎ ﻳﻮﻟﯘﻗﺴﯩﻤﯘ،" ﺩﯦﺪﻯ.

47 ﻧﻪﭘﻪﺭ ﻛﺎﻧﺎﺩﺍﻟﯩﻘﻨﯩﯔ ﺧﯩﺘﺎﻳﺪﺍ ﻗﻮﻟﻐﺎ ﺋﯧﻠﯩﻨﯩﺸﻰ ﻛﺎﻧﺎﺩﺍ ﺋﯜﭼﯜﻥ ﻳﺎﺧﺸﻰ ﺧﻪﯞﻩﺭ ﺋﻪﻣﻪﺱ

ﻛﺎﻧﺎﺩﺍﺩﯨﻜﻰ ﺳﯩﻴﺎﺳﻰ ﺋﺎﻧﺎﻟﯩﺰﭼﻰ ﺷﯧﯔ ﺷﯜﺋﯧﻨﯩﯔ ﻗﺎﺭﯨﺸﯩﭽﻪ 47 ﻧﻪﭘﻪﺭ ﻛﺎﻧﺎﺩﺍ ﭘﯘﻗﺮﺍﺳﯩﻨﯩﯔ ﺧﯩﺘﺎﻳﺪﺍ ﻗﻮﻟﻐﺎ ﺋﯧﻠﯩﻨﯩﺸﻰ ﯞﻩ ﺗﯘﺗﯘﭖ ﺗﯘﺭﯗﻟﯘﺷﻰ ﻛﺎﻧﺎﺩﺍﻧﯩﯔ ﺩﯙﻟﻪﺕ ﺋﻮﺑﺮﺍﺯﯨﻐﺎ ﺗﺎﻗﯩﻠﯩﺪﯨﻐﺎﻥ ﻣﻪﺳﯩﻠﻪ ﺑﻮﻟﯘﭖ، ﺑﯘ ﻳﻪﻧﻪ ﺑﯩﺮ ﺗﻪﺭﻩﭘﺘﯩﻦ ﺧﯩﺘﺎﻳﺪﯨﻜﻰ ﺑﯩﺮ ﭘﺎﺭﺗﯩﻴﯩﻠﯩﻚ ﺩﯨﻜﺘﺎﺗﻮﺭ ﺗﯜﺯﯛﻣﻨﯩﯔ ﻣﺎﻫﯩﻴﯩﺘﯩﻨﻰ ﻛﯚﺭﺳﯩﺘﯩﭗ ﺑﯧﺮﯨﺪﯨﻜﻪﻥ: "ﻣﯧﻨﯩﯖﭽﻪ،ﺑﯘ ﻣﻪﺳﯩﻠﻪ ﺧﯩﺘﺎﻱ ﻛﺎﻧﺎﺩﺍ ﻣﯘﻧﺎﺳﯩﯟﻩﺗﻠﯩﺮﯨﮕﻪ ﺟﯩﺪﺩﻯ ﺗﻪﺳﯩﺮ ﻛﯚﺭﺳﯩﺘﯩﺪﯗ. ﻛﺎﻧﺎﺩﺍ ﺑﯘ ﻣﻪﺳﯩﻠﯩﺪﻩ ﺧﯩﺘﺎﻳﻐﺎ ﻛﯜﭼﻠﯜﻙ ﺋﯩﻨﻜﺎﺱ ﻗﺎﻳﺘﯘﺭﯨﺸﻰ ﻛﯧﺮﻩﻙ. ﻛﺎﻧﺎﺩﺍ ﭘﯘﻗﺮﺍﻟﯩﺮﯨﻨﯩﯔ ﭼﻪﺗﺌﻪﻟﺪﻩ ﺑﯘﻧﺪﺍﻕ ﺋﯧﻐﯩﺮ ﻣﯘﺋﺎﻣﯩﻠﯩﮕﻪ ﺋﯘﭼﺮﯨﺸﻰ ﺋﻪﻣﯩﻠﻴﻪﺗﺘﻪ ﻛﺎﻧﺎﺩﺍﻧﯩﯔ ﺋﯩﺰﺯﻩﺕ-ﻫﯚﺭﻣﯩﺘﯩﮕﻪ،ﺋﯘﻧﯩﯔ ﺩﯙﻟﻪﺕ ﺋﻮﺑﺮﺍﺯﯨﻐﺎ ﺯﯨﻴﺎﻥ ﻳﻪﺗﻜﯜﺯﯨﺪﯗ.ﺧﯩﺘﺎﻳﻨﯩﯔ ﺋﻮﺑﺮﺍﺯﯨﻐﯩﻤﯘ ﻫﯧﭽﻘﺎﭼﺎﻥ ﭘﺎﻳﺪﺍ ﺋﯧﻠﯩﭗ ﻛﻪﻟﻤﻪﻳﺪﯗ. ﺑﯘ ﻛﻮﻣﭙﺎﺭﺗﯩﻴﻪ ﻫﯚﻛﯜﻣﺮﺍﻧﻠﯩﻘﯩﺪﯨﻜﻰ ﺗﯜﺯﯛﻣﻨﯩﯔ ﻣﺎﻫﯩﻴﯩﺘﯩﻨﻰ ﺗﯧﺨﯩﻤﯘ ﺋﺎﺷﻜﺎﺭﯨﻼﻳﺪﯗ،" ﺩﻩﻳﺪﯗ.

ﺧﯩﺘﺎﻱ ﺋﯚﺯﻯ ﻗﻮﻝ ﻗﻮﻳﻐﺎﻥ ﺧﻪﻟﻘﺌﺎﺭﺍﻟﯩﻖ ﺋﻪﻫﺪﯨﻨﺎﻣﯩﻐﺎ ﺧﯩﻼﭘﻠﯩﻖ ﻗﯩﻠﺪﻯ

ﺧﯩﺘﺎﻱ ﺩﺍﺋﯩﺮﻟﯩﺮﯨﻨﯩﯔ ﻛﺎﻧﺎﺩﺍ ﭘﯘﻗﺮﺍﺳﻰ ﻫﯜﺳﻪﻳﯩﻦ ﺟﯧﻠﯩﻠﻨﯩﯔ ﻛﺎﻧﺎﺩﺍ ﭘﯘﺧﺮﺍﻟﯩﻖ ﺳﺎﻻﻫﯩﻴﯩﺘﯩﻨﻰ ﯞﻩ ﺋﯘﻧﯩﯔ ﻛﻮﻧﺴﯘﻝ ﻫﻮﻗﯘﻗﯩﻨﻰ ﺭﻩﺕ ﻗﯩﻠﯩﺶ ﺑﯩﻠﻪﻥ ﺋﯩﻜﻜﻰ ﺩﯙﻟﻪﺕ ﺋﻮﺗﺘﯘﺭﯨﺴﯩﺪﯨﻜﻰ ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﻰ ﻫﻪﻗﻘﯩﺪﻩ ﺗﺎﻻﺵ- ﺗﺎﺭﺗﯩﺶ ﻛﻪﺳﻜﯩﻨﻠﻪﺷﺘﻰ.

ﺧﯩﺘﺎﻱ ﻫﯚﻛﯜﻣﯩﺘﻰ ﻫﯜﺳﻪﻳﯩﻦ ﺟﯧﻠﯩﻠﻐﺎ ﻣﯘﺩﺩﻩﺗﺴﯩﺰ ﻗﺎﻣﺎﻕ ﺟﺎﺯﺍﺳﻰ ﺋﯧﻼﻥ ﻗﯩﻠﻐﺎﻧﺪﺍ، ﻛﺎﻧﺎﺩﺍ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﭘﯧﺘﯧﺮ ﻣﺎﻛﻜﺎﻱ ﺑﯘ ﻫﯚﻛﯜﻣﻨﯩﯔ ﺋﯩﻜﻜﻰ ﺩﯙﻟﻪﺕ ﺋﻮﺗﺘﯘﺭﯨﺴﯩﺪﯨﻜﻰ ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﯩﮕﻪ ﺧﯩﻴﺎﻧﻪﺕ ﺋﯩﻜﻪﻧﻠﯩﻜﯩﻨﻰ ،ﻛﺎﻧﺎﺩﺍﻧﯩﯔ 1999-ﻳﯩﻠﻰ ﺧﯩﺘﺎﻱ ﺑﯩﻠﻪﻥ ﺋﯩﻤﺰﺍﻟﯩﻐﺎﻥ ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﯩﻨﻰ ﻗﺎﻳﺘﯩﺪﯨﻦ ﻛﯚﺯﺩﯨﻦ ﻛﻪﭼﯜﺭﯨﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻧﯩﺪﻯ.

1999 ﻳﯩﻠﻰ ﺋﯩﻜﻜﻰ ﺩﯙﻟﻪﺕ ﺋﻮﺗﺘﯘﺭﯨﺴﯩﺪﺍ ﺋﯩﻤﺰﺍﻻﻧﻐﺎﻥ ﻛﻮﻧﺴﯘﻝ ﺋﻪﻫﺪﯨﻨﺎﻣﯩﺴﯩﻨﯩﯔ 7-ﻣﺎﺩﺩﯨﺴﯩﺪﺍ ﻛﺎﻧﺎﺩﺍ ﭘﯘﻗﺮﺍﻟﯩﺮﻯ ﺧﯩﺘﺎﻱ ﺩﺍﺋﯩﺮﻟﯩﺮﻯ ﺗﻪﺭﯨﭙﯩﺪﯨﻦ ﺗﯘﺗﯘﭖ ﺗﯘﺭﯗﻟﻐﺎﻥ،ﻗﻮﻟﻐﺎ ﺋﯧﻠﯩﻨﻐﺎﻥ ﯞﻩ ﺋﻪﺭﻛﯩﻨﻠﯩﻜﯩﺪﯨﻦ ﻣﻪﺭﻫﯘﻡ ﻗﯩﻠﯩﻨﻐﺎﻧﺪﺍ، ﺩﺍﺋﯩﺮﻻﺭ ﻧﯩﻤﻪ ﺋﯜﭼﯜﻥ ﺷﯘﻧﺪﺍﻕ ﺑﻮﻟﻐﺎﻧﻠﯩﻘﻰ ﻫﻪﻗﻘﯩﺪﻩ ﺩﻩﺭﻫﺎﻝ ﻛﺎﻧﺎﺩﺍ ﺋﻪﻟﭽﯩﺨﺎﻧﯩﺴﯩﻐﺎ ﻣﻪﻟﯘﻣﺎﺕ ﺑﯧﺮﯨﺪﯗ.

ﻛﺎﻧﺎﺩﺍ ﻛﻮﻧﺴﯘﻟﺨﺎﻧﺎ ﺧﺎﺩﯨﻤﻠﯩﺮﯨﻨﯩﯔ ﺧﯩﺘﺎﻱ ﺩﺍﺋﯩﺮﻟﯩﺮﻯ ﺗﻪﺭﯨﭙﯩﺪﯨﻦ ﻗﻮﻟﻐﺎ ﺋﯧﻠﯩﻨﻐﺎﻥ،ﺗﯘﺗﯘﭖ ﺗﯘﺭﯗﻟﻐﺎﻥ ﯞﻩ ﺋﻪﺭﻛﯩﻨﻠﯩﻜﯩﺪﯨﻦ ﻣﻪﻫﺮﯛﻡ ﻗﯩﻠﯩﻨﻐﺎﻥ ﻛﺎﻧﺎﺩﺍ ﭘﯘﻗﺮﺍﻟﯩﺮﯨﻨﻰ ﻳﻮﻗﻼﺵ ﺋﯘﻻﺭ ﺑﯩﻠﻪﻥ ﺳﯚﺯﻟﯩﺸﯩﺶ، ﺋﻪﻫﯟﺍﻝ ﺋﯩﮕﻪﻟﻠﻪﺵ ﯞﻩ ﺋﯘﻻﺭﻧﻰ ﺗﻪﺭﺟﯩﻤﺎﻥ ﻫﻪﻡ ﻗﺎﻧﯘﻧﻰ ﻣﻪﺳﻠﯩﻬﻪﺗﭽﻰ ﺑﯩﻠﻪﻥ ﺗﻪﻣﯩﻨﻠﻪﺵ ﻫﻮﻗﯘﻗﻰ ﺑﻮﻟﯩﺪﯗ،ﺩﯦﻴﯩﻠﮕﻪﻥ. ﺋﻪﻫﺪﯨﻨﺎﻣﯩﺪﺍ ﻛﺎﻧﺎﺩﺍ ﻛﻮﻧﺴﯘﻟﺨﺎﻧﺎ ﺧﺎﺩﯨﻤﻠﯩﺮﯨﻨﯩﯔ ﻳﻪﻧﻪ ﺋﻪﺭﻛﯩﻨﻠﯩﻜﯩﺪﯨﻦ ﻣﻪﻫﺮﯗﻡ ﻗﯩﻠﯩﻨﻐﺎﻥ ﻛﺎﻧﺎﺩﺍ ﭘﯘﻗﺮﺍﻟﯩﺮﯨﻨﻰ ﻳﯧﻤﻪﻛﻠﯩﻚ،ﻛﯩﻴﯩﻢ-ﻛﯧﭽﻪﻙ،ﺩﻭﺭﺍ ﺑﻮﻳﯘﻣﻠﯩﺮﻯ، ﺋﻮﻗﯘﺷﻠﯘﻕ ﯞﻩ ﻳﯧﺰﯨﻘﭽﯩﻠﯩﻖ ﻣﺎﺗﯧﺮﯨﻴﺎﻟﻠﯩﺮﻯ ﺑﯩﻠﻪﻥ ﺗﻪﻣﯩﻨﻠﻪﺷﻜﻪ ﺋﻮﺧﺸﺎﺵ ﻫﻮﻗﯘﻗﻠﯩﺮﯨﻨﯩﯖﻤﯘ ﺑﺎﺭﻟﯩﻘﻰ ﺋﻪﺳﻜﻪﺭﺗﯩﻠﮕﻪﻥ.

ﺧﯩﺘﺎﻱ ﺋﯚﺯ ﻣﻪﻧﭙﻪﺋﻪﺗﻰ ﺋﯜﭼﯜﻥ ﺋﯚﺯ ﻗﺎﻧﯘﻧﻠﯩﺮﯨﻨﯩﻤﯘ ﺋﺎﻳﺎﻕ-ﺋﺎﺳﺘﻰ ﻗﯩﻠﺪﻯ

ﺋﺎﻣﻤﺎ ﺧﯩﺘﺎﻱ ﺩﺍﺋﯩﺮﻟﯩﺮﻯ ﻫﯜﺳﻪﻳﯩﻦ ﺟﯧﻠﯩﻠﻨﯩﯔ ﺧﯩﺘﺎﻱ ﭘﯘﻗﺮﺍﻟﯩﻘﯩﺪﺍ ﭼﯩﯔ ﺗﯘﺭﯗﭖ، ﺋﯘﻧﯩﯔ ﻛﻮﻧﺴﯘﻝ ﻣﯘﻻﺯﯨﻤﯩﺘﯩﺪﯨﻦ ﺑﻪﻫﺮﯨﻤﻪﻥ ﺑﻮﻟﯘﺵ ﻫﻮﻗﯘﻗﯩﻨﻰ ﺋﯩﺰﭼﯩﻞ ﺭﻩﺕ ﻗﯩﻠﯩﭗ ﻛﻪﻟﻤﻪﻛﺘﻪ.

ﺳﯩﻴﺎﺳﻰ ﺋﺎﻧﺎﻟﯩﺰﭼﻰ ﺷﯧﯔ ﺷﯜﺋﯥ ﺑﯘﻧﻰ ﺧﯩﺘﺎﻳﻨﯩﯔ ﺋﯘﭼﯩﻐﺎ ﭼﯩﻘﻘﺎﻥ ﻣﯘﺗﻪﻫﻪﻣﻠﯩﻚ،ﺩﻩﭖ ﺑﺎﻫﺎﻻﻳﺪﯗ: "ﺧﯩﺘﺎﻳﻨﯩﯔ ﺋﺎﺳﺎﺳﻰ ﻗﺎﻧﯘﻧﯩﺪﺍ ﻗﻮﺵ ﺩﯙﻟﻪﺕ ﭘﯘﻗﺮﺍﻟﯩﻘﻰ ﺋﯧﺘﯩﺮﺍﭖ ﻗﯩﻠﯩﻨﻤﺎﻳﺪﯗ.1980- ﻳﯩﻠﻰ ﺋﯧﻼﻥ ﻗﯩﻠﯩﻨﻐﺎﻥ ﺧﯩﺘﺎﻱ ﺧﻪﻟﻖ ﺟﯘﻣﻬﯘﺭﯨﻴﯩﺘﯩﻨﯩﯔ ﺋﺎﺳﺎﺳﻰ ﻗﺎﻧﯘﻧﯩﻨﯩﯔ 9-ﻣﺎﺩﺩﯨﺴﯩﺪﺍ ﭼﻪﺗﺌﻪﻟﺪﻩ ﺗﯘﺭﯨﯟﺍﺗﻘﺎﻥ ﺧﯩﺘﺎﻱ ﭘﯘﻗﺮﺍﻟﯩﺮﻯ ﺋﯚﺯ ﺋﯩﺨﺘﯩﻴﺎﺭﻟﯩﻘﻰ ﺑﯩﻠﻪﻥ ﺑﺎﺷﻘﺎ ﺩﯙﻟﻪﺗﻨﯩﯔ ﺗﻪﯞﻩﻟﯩﻜﯩﮕﻪ ﺋﯚﺗﺴﻪ، ﺧﯩﺘﺎﻱ ﭘﯘﺧﺮﺍﻟﯩﻖ ﺳﺎﻻﻫﯩﻴﯩﺘﯩﺪﯨﻦ ﺋﯚﺯﻟﯩﮕﯩﺪﯨﻦ ﻣﻪﻫﺮﯗﻡ ﺑﻮﻟﯩﺪﯗ،" ﺩﯦﻴﯩﻠﯩﺪﯗ.

ﺋﯘﻧﺪﺍﻗﺘﺎ ﺧﯩﺘﺎﻱ ﭘﯘﺧﺮﺍﻟﯩﻖ ﺳﺎﻻﻫﯩﻴﯩﺘﯩﺪﯨﻦ ﺋﯚﺯﻟﯩﮕﯩﺪﯨﻦ ﻣﻪﻫﺮﯗﻡ ﺑﻮﻟﯘﺷﻨﯩﯔ ﺋﯚﺯﻯ ﻛﺎﻧﺎﺩﺍ ﭘﯘﻗﺮﺍﺳﻰ ﺑﻮﻟﻐﺎﻥ ﻛﯜﻧﺪﯨﻦ ﺗﺎﺭﺗﯩﭗ،ﺧﯩﺘﺎﻱ ﭘﯘﻗﺮﺍﺳﻰ ﺋﻪﻣﻪﺱ، ﺩﯦﮕﻪﻧﻠﯩﻜﺘﯘﺭ. ﺷﯘﯕﺎ ﺑﯘ ﻫﯜﺳﻪﻳﯩﻦ ﺟﯧﻠﯩﻞ ﻣﻪﺳﯩﻠﯩﺴﯩﺪﯨﻜﻰ ﻫﻪﻝ ﻗﯩﻠﻐﯘﭺ،ﻳﺎﺩﺭﻭﻟﯘﻕ ﻣﻪﺳﯩﻠﯩﺪﯗﺭ.. ﻛﺎﻧﺎﺩﺍ ﻫﯜﺳﻪﻳﯩﻦ ﺟﯧﻠﯩﻠﻨﻰ ﻣﯧﻨﯩﯔ ﭘﯘﺧﺮﺍﻳﯩﻢ ﺩﯨﺴﻪ، ﺧﯩﺘﺎﻳﻨﯩﯔ ﺋﯘ ﺳﯧﻨﯩﯔ ﭘﯘﺧﺮﺍﻳﯩﯔ ﺋﻪﻣﻪﺱ ﺩﯦﻴﯩﺸﻰ ﺋﯘﭼﯩﻐﺎ ﭼﯩﻘﺎﻥ ﻳﻮﻟﺴﯘﺯﻟﯘﻕ ﯞﻩ ﻣﯘﺗﯩﻬﻪﻣﻠﯩﻜﺘﯩﻦ ﺑﺎﺷﻘﺎ ﻧﻪﺭﺳﻪ ﺋﻪﻣﻪﺱ. ﺷﯘﯕﺎ ﻛﺎﻧﺎﺩﺍ ﺧﯩﺘﺎﻳﻐﺎ ﻛﯜﭼﻠﯜﻙ ﺋﯩﻨﻜﺎﺱ ﻗﺎﻳﺘﯘﺭﻏﺎﻧﯩﺪﻯ ﺩﻩﻳﺪﯗ.

47 ﻧﻪﭘﻪﺭ ﻛﺎﻧﺎﺩﺍ ﭘﯘﻗﺮﺍﺳﯩﻨﯩﯔ ﺧﯩﺘﺎﻳﺪﺍ ﻗﻮﻟﻐﺎ ﺋﯧﻠﯩﻨﯩﺸﻰ ﻫﻪﻗﻘﯩﺪﻩ ﻛﺎﻧﺎﺩﺍ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻳﻐﺎ ﻗﺎﻧﺪﺍﻕ ﺋﯩﻨﻜﺎﺱ ﻗﺎﻳﺘﯘﺭﻏﺎﻧﻠﯩﻘﻰ ﻫﺎﺯﯨﺮﭼﻪ ﻧﺎﻣﻪﻟﯘﻡ.

ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯘﻳﺎﻥ ﻛﯚﭼﻤﻪﻧﻠﯩﻚ ﯞﻩ ﺑﺎﺷﻘﺎ ﺳﺎﻻﻫﯩﻴﻪﺕ ﺑﯩﻠﻪﻥ ﻛﺎﻧﺎﺩﺍﻏﺎ ﻳﻪﺭﻟﯩﺸﯩﯟﺍﺗﻘﺎﻥ ﺋﯘﻳﻐﯘﺭﻻﺭﻧﯩﯔ ﺳﺎﻧﯩﻤﯘ ﺑﺎﺭﻏﺎﻧﺴﯩﺮﻯ ﻛﯚﭘﻪﻳﻤﻪﻛﺘﻪ. (ﻛﺎﻣﯩﻞ ﺗﯘﺭﺳﯘﻥ)