ﻛﻪﻟﻜﯜﻥ ﺋﺎﭘﯩﺘﻰ ﺋﺎﻟﺘﺎﻱ ﯞﯨﻼﻳﯩﺘﯩﮕﻪ ﺋﯧﻐﯩﺮ ﺋﯩﻘﺘﯩﺴﺎﺩﯨﻲ ﺯﯨﻴﺎﻥ ﺋﯧﻠﯩﭗ ﻛﻪﻟﺪﻯ

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﮭﺮﻩﻧﯩﯔ ﺑﯘ ﮬﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﺋﺎﻟﺘﺎﻱ ﯞﯨﻼﻳﯩﺘﯩﺪﻩ ﻣﯘﺷﯘ ﺋﺎﻳﻨﯩﯔ 1 - ﻛﯜﻧﯩﺪﯨﻦ ﺑﺎﺷﻼﭖ ﺑﯩﺮ ﻗﺎﻧﭽﻪ ﻛﯜﻥ ﺋﯘﺩﺍ ﻳﺎﻗﻘﺎﻥ، ﻗﺎﺗﺘﯩﻖ ﻗﺎﺭ- ﻳﺎﻣﻐﯘﺭ ﻛﻪﻟﻜﯜﻥ ﮬﺎﺳﯩﻞ ﻗﯩﻠﯩﭗ، ﺋﺎﻟﺘﺎﻱ ﺷﻪﮬﻪﺭ ﺋﯩﭽﯩﺪﯨﻦ ﺑﺎﺷﻘﺎ ﻳﻪﻧﻪ، ﻗﺎﺑﺎ، ﺑﯘﺭﭼﯩﻦ، ﭼﯩﯖﮕﯩﻞ، ﻛﯚﻛﺘﻮﻗﺎﻱ ﻗﺎﺗﺎﺭﻟﯩﻖ ﻧﺎﮬﯩﻴﯩﻠﻪﺭﺩﻩ ﺋﯧﻐﯩﺮ ﺋﺎﭘﻪﺕ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺋﯩﺪﻯ.ﻧﯚﯞﻩﺗﺘﻪ ﺋﺎﭘﻪﺕ ﻳﯜﺯ ﺑﻪﺭﮔﻪﻥ ﺟﺎﻳﻼﺭﺩﺍ ﺋﺎﭘﻪﺗﺘﯩﻦ ﻗﯘﺗﻘﯘﺯﯗﺵ ﺋﯩﺸﻠﯩﺮﻯ ﺩﺍﯞﺍﻡ ﻗﯩﻠﻤﺎﻗﺘﺎ ﺋﯩﻜﻪﻥ.

ﺋﺎﻟﺘﺎﻳﻨﯩﯔ ﻳﻪﺭﻟﯩﻚ ﻣﻪﺗﺒﯘﺋﺎﺗﻠﯩﺮﯨﺪﯨﻦ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﻧﯚﯞﻩﺗﺘﻪ ﻛﻪﻟﻜﯜﻥ ﺋﺎﺳﺎﺳﻪﻥ ﺗﯩﺰﮔﯩﻨﻠﻪﻧﮕﻪﻥ ﺑﻮﻟﯘﭖ، ﻛﻪﻟﻜﯜﻥ ﺋﺎﭘﯩﺘﯩﮕﻪ ﺋﯘﭼﺮﯨﻐﺎﻥ ﺭﺍﻳﻮﻧﻼﺭﺩﺍ ﮔﻪﺭﭼﻪ ﺋﺎﺩﻩﻡ ﺋﯚﻟﯜﺵ ﯞﻩﻗﻪﻟﯩﺮﻯ ﻳﯜﺯ ﺑﻪﺭﻣﯩﮕﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯚﺭﯛﻟﮕﻪﻥ ﺋﯚﻳﻠﻪﺭ ﮬﻪﻡ ﺯﻩﻳﻠﻪﺷﻜﻪﻥ ﺋﯚﻳﻠﻪﺭﻧﯩﯔ ﺳﺎﻧﻰ ﺑﺎﺭﻏﺎﻧﭽﻪ ﻛﯚﭘﻪﻳﻤﻪﻛﺘﻪ ﺋﯩﻜﻪﻥ. ﺋﯩﮕﯩﻠﯩﺸﯩﻤﯩﺰﭼﻪ ﻛﯚﻛﺘﻮﻗﺎﻳﻨﯩﯔ ﺗﯧﻤﯧﻜﻰ ﻳﯧﺰﯨﺴﯩﺪﯨﻼ 60٪ ﺗﯩﻦ ﻛﯚﭘﺮﻩﻙ ﺋﺎﺋﯩﻠﯩﻠﯩﻜﻨﯩﯔ ﺋﯚﻳﻰ ﺋﯚﺭﯛﻟﮕﻪﻥ.

ﺋﺎﻟﺘﺎﻳﺪﺍ ﻛﻪﻟﻜﯜﻥ ﺋﺎﭘﯩﺘﯩﺪﻩ ﻗﺎﻟﻐﺎﻥ ﺋﺎﻣﻤﯩﻨﻰ ﺯﯨﻴﺎﺭﻩﺕ ﻗﯩﻠﻐﯩﻨﯩﻤﯩﺰﺩﺍ، ﺋﯘﻻﺭ ﺑﯩﺮﺩﻩﻙ ﺑﯘ ﻗﯧﺘﯩﻤﻘﻰ ﻛﻪﻟﻜﯜﻧﻨﯩﯔ ﺋﺎﻟﺘﺎﻱ ﺗﻪﯞﻩﺳﯩﺪﻩ ﺋﻮﻥ - ﻳﯩﮕﯩﺮﻣﻪ ﻳﯩﻠﺪﯨﻦ ﺑﯘﻳﺎﻥ ﻛﯚﺭﯛﻟﯜﭘﺒﺎﻗﻤﯩﻐﺎﻥ ﺑﯩﺮ ﻗﯧﺘﯩﻤﻠﯩﻖ ﺋﺎﭘﻪﺕ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﻛﻪﻟﻜﯜﻥ ﺋﺎﭘﯩﺘﯩﺪﻩ ﻧﯘﺭﻏﯘﻥ ﺋﯧﺘﯩﺰ ﮬﻪﻡ ﻳﺎﻳﻼﻕ ﯞﻩﻳﺮﺍﻥ ﺑﻮﻟﻐﺎﻥ

ﺋﺎﻟﺘﺎﻱ ﯞﯨﻼﻳﻪﺗﻠﯩﻚ ﻣﯘﻧﺎﺳﯩﯟﻩﺗﻠﯩﻚ ﺩﺍﺋﯩﺮﯨﻠﻪﺭﻧﯩﯔ ﺑﯘ ﻗﯧﺘﯩﻤﻠﯩﻖ ﻛﻪﻟﻜﯜﻥ ﺋﺎﭘﯩﺘﯩﻨﯩﯔ ﻛﻪﻟﺘﯜﺭﮔﻪﻥ ﺋﯩﻘﺘﯩﺴﺎﺩﯨﻲ ﺯﯨﻴﺎﻧﻠﯩﺮﯨﻨﻰ ﺳﺘﺎﺗﯩﺴﺘﯩﻜﺎ ﻗﯩﻠﯩﭗ ﻛﯚﺭﺳﯩﺘﯩﺸﯩﭽﻪ، ﺋﺎﻟﺘﺎﻱ ﺷﻪﮬﻪﺭ ﺋﯩﭽﻰ ﮬﻪﻡ ﻗﺎﺑﺎ، ﺑﯘﺭﭼﯩﻦ ﻗﺎﺗﺎﺭﻟﯩﻖ ﺑﻪﺵ ﻧﺎﮬﯩﻴﯩﺴﯩﻨﯩﯔ ﺋﺎﭘﻪﺕ ﺯﻩﺭﺑﯩﺴﯩﮕﻪ ﺋﯘﭼﺮﯨﻐﺎﻧﺪﯨﻦ ﻛﯧﻴﯩﻦ، ﮬﺎﺯﯨﺮﻏﯩﭽﻪ ﺋﯚﺭﯛﻟﮕﻪﻥ ﺋﯚﻱ، ﺳﯘ ﺑﺎﺳﻘﺎﻥ ﺗﯧﺮﯨﻠﻐﯘ ﺟﺎﻳﻼﺭ، ﯞﻩﻳﺮﺍﻥ ﻗﯩﻠﯩﻨﻐﺎﻥ ﺋﯧﺘﯩﺰ ﮬﻪﻣﺪﻩ ﻳﺎﻳﻼﻗﻼﺭﻧﻰ ﮬﯩﺴﺎﭘﻠﯩﻐﺎﻧﺪﺍ، ﺑﯩﯟﺍﺳﺘﻪ ﺋﯩﻘﺘﯩﺴﺎﺩﯨﻲ ﺯﯨﻴﺎﻥ 54 ﻣﯩﻠﻴﻮﻥ 240 ﻣﯩﯔ ﻳﯘﺋﻪﻧﮕﻪ ﻳﯧﺘﯩﺪﯨﻜﻪﻥ.

ﺑﯘﻧﯩﯔ ﺋﯩﭽﯩﺪﻩ ﺋﺎﭘﻪﺗﻨﯩﯔ ﺯﯨﻴﯩﻨﻰ ﺋﻪﯓ ﺋﯧﻐﯩﺮ ﺑﻮﻟﻐﯩﻨﻰ ﺋﺎﻟﺘﺎﻱ ﺷﻪﮬﻪﺭ ﺋﯩﭽﻰ ﺑﻮﻟﯘﭖ، ﻛﯧﻠﯩﭗ ﭼﯩﻘﻘﺎﻥ ﺑﯩﯟﺍﺳﺘﻪ ﺋﯩﻘﺘﯩﺴﺎﺩﻯ ﺯﯨﻴﺎﻥ 19ﻣﯩﻠﻴﻮﻥ ﻳﯘﺋﻪﻧﮕﻪ ﺑﺎﺭﻏﺎﻥ.

ﻳﻪﺭﻟﯩﻜﻠﻪﺭﺩﯨﻦ ﺋﯩﮕﯩﻠﯩﺸﯩﻤﯩﺰﭼﻪ، ﺑﯘ ﻛﻪﻟﻜﯜﻥ ﺋﺎﭘﯩﺘﯩﺪﻩ ﺩﯦﮭﻘﺎﻥ، ﭼﺎﺭﯞﯨﭽﯩﻼﺭ ﮬﻪﻣﻤﯩﺪﯨﻦ ﺑﻪﻙ ﺋﯧﻐﯩﺮ ﺋﻪﮬﯟﺍﻟﺪﺍ ﻗﺎﻟﻐﺎﻥ ﺑﻮﻟﯘﭖ، ﺋﯘﻻﺭ ﺗﯘﻳﯘﻗﺴﯩﺰ ﻳﯜﺯ ﺑﻪﺭﮔﻪﻥ ﻛﻪﻟﻜﯜﻥ ﺋﺎﭘﯩﺘﯩﺪﻩ ﺋﯚﻳﻠﯩﺮﻯ ﺋﯚﺭﯛﻟﯜﭖ ﻣﺎﻛﺎﻧﺴﯩﺰ ﻗﺎﻟﻐﺎﻧﺪﯨﻦ ﺑﺎﺷﻘﺎ، ﺋﻪﻣﺪﯨﻼ ﮬﻮﺳﯘﻝ ﺑﯧﺮﯨﺶ ﺋﺎﻟﺪﯨﺪﺍ ﺗﯘﺭﻏﺎﻥ ﺗﯧﺮﯨﻠﻐﯘ ﺋﯧﺘﯩﺰﻟﯩﺮﻯ ﻛﻪﻟﻜﯜﻧﺪﻩ ﯞﻩﻳﺮﺍﻧﭽﯩﻠﯩﻘﻘﺎ ﺋﯘﭼﺮﺍﭖ ﺋﯧﻐﯩﺮ ﺯﯨﻴﺎﻥ ﺗﺎﺭﺗﻘﺎﻥ. ﺑﻪﺯﻯ ﺟﺎﻳﻼﺭﺩﺍ 90٪ﺋﯧﺘﯩﺰﻟﯩﻖ ﯞﻩﻳﺮﺍﻥ ﻗﯩﻠﯩﻨﻐﺎﻥ، ﺟﯩﻤﯩﻨﻪﻳﺪﻩ ﻳﺎﻣﻐﯘﺭ ﻗﺎﺭﻏﺎ ﺋﺎﻳﻠﯩﻨﯩﭗ، ﺋﻪﻣﺪﯨﻼ ﺧﻪﻣﻪﻛﻠﯩﮕﻪﻥ ﺑﺎﺭﻟﯩﻖ ﺗﺎﯞﯗﺯ- ﻗﻮﻏﯘﻧﻼﺭ ﺋﯜﺷﺸﯜﭖ ﻛﻪﺗﻜﻪﻥ.

ﺑﯘ ﻳﯩﻞ ﭘﯜﺗﯜﻥ ﺧﯩﺘﺎﻱ ﻣﯩﻘﻴﺎﺳﯩﺪﺍ ﻛﻪﻟﻜﯜﻥ ﺋﺎﭘﻪﺗﻠﯩﺮﻯ ﻛﯚﭖ ﻛﯚﺭﯛﻟﻤﻪﻛﺘﻪ

ﺑﯘ ﻳﯩﻞ ﺑﺎﮬﺎﺭﺩﯨﻦ ﺑﺎﺷﻼﭖ ﺋﯘﻳﻐﯘﺭ ﺋﯧﻠﯩﻨﯩﯔ ﺟﻪﻧﯘﭖ ﯞﻩ ﺷﯩﻤﺎﻟﯩﺪﺍ ﺟﯜﻣﻠﯩﺪﯨﻦ ﭘﯜﺗﯜﻥ ﺧﯩﺘﺎﻱ ﻣﯩﻘﻴﺎﺳﯩﺪﺍ ﻛﻪﻟﻜﯜﻥ ﺋﺎﭘﻪﺗﻠﯩﺮﻯ ﺋﺎﺩﻩﺗﺘﯩﻦ ﺗﺎﺷﻘﯩﺮﻯ ﻛﯚﭖ ﻛﯚﺭﯛﻟﻤﻪﻛﺘﻪ. ﺑﯘ ﻛﻪﻟﻜﯜﻥ ﺋﺎﭘﻪﺗﻠﯩﺮﯨﻨﯩﯔ ﻛﯧﻠﯩﭗ ﭼﯩﻘﯩﺶ ﺳﻪﯞﻩﺑﻰ ﺋﺎﺳﺎﺳﻪﻥ ﻛﯧﻠﯩﻤﺎﺕ ﺧﺎﺭﺍﻛﺘﯧﺮﻟﯩﻚ ﺑﻮﻟﯘﭖ، ﮬﺎﯞﺍ ﺗﯧﻤﭙﺮﺍﺗﻮﺳﯩﻨﯩﯔ ﺗﯘﻳﯘﻗﺴﯩﺰ ﻛﯚﺗﯜﺭﯛﻟﯜﺷﻰ ﯞﻩ ﮬﯚﻝ ﻳﯧﻐﯩﻦ ﺗﻪﺳﯩﺮﯨﺪﯨﻦ ﺑﻮﻟﻐﺎﻥ.

ﺗﻪﻳﯟﻩﻥ ﻣﻪﺭﻛﯩﺰﯨﻲ ﺋﺎﺧﺒﺎﺭﺍﺗﯩﻨﯩﯔ ﺩﯛﺷﻪﻧﺒﻪ ﺧﻪﯞﻩﺭ ﺋﯧﻼﻥ ﻗﯩﻠﯩﺸﯩﭽﻪ، ﮬﺎﺯﯨﺮﻏﺎ ﻗﻪﺩﻩﺭ ﺧﯩﺘﺎﻳﻨﯩﯔ 16 ﺋﯚﻟﻜﻪ، ﺋﺎﭘﺘﻮﻧﯘﻡ ﺭﺍﻳﻮﻥ ﮬﻪﻡ ﺷﻪﮬﻪﺭﻟﯩﺮﯨﺪﻩ ﻛﻪﻟﻜﯜﻥ ﺋﺎﭘﯩﺘﻰ ﻳﯜﺯ ﺑﻪﺭﮔﻪﻥ ﺑﻮﻟﯘﭖ، ﺑﯘ ﺋﺎﭘﻪﺗﻠﻪﺭﺩﻩ ﺟﻪﻣﺌﯩﻲ 204ﺋﺎﺩﻩﻣﻨﯩﯔ ﺋﯚﻟﮕﻪﻧﻠﯩﻜﻰ ﯞﻩ 79ﺋﺎﺩﻩﻣﻨﯩﯔ ﻳﻮﻗﺎﭖ ﻛﻪﺗﻜﻪﻧﻠﯩﻜﻰ ﻣﻪﻟﯘﻡ ﺑﻮﻟﻐﺎﻥ.

ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﯧﺘﯧﺌﻮﺭﻭﻟﻮﮔﯩﻴﻪ ﺩﺍﺋﯩﺮﯨﻠﯩﺮﯨﺪﯨﻦ ﺋﯩﮕﻪ ﺑﻮﻟﯩﺸﯩﻤﯩﺰﭼﻪ، ﺑﯘ ﻳﺎﺯﺩﺍ ﺋﯘﻳﻐﯘﺭ ﺋﯧﻠﯩﻨﯩﯔ ﺷﯩﻤﺎﻟﯩﻲ ﺗﻪﺭﻩﭘﻠﯩﺮﻯ ﻛﯚﭖ ﻳﺎﻣﻐﯘﺭﻟﯘﻕ ﮬﺎﯞﺍﻏﺎ ﻳﯜﺯﻟﯩﻨﯩﺪﯨﻐﺎﻥ ﺑﻮﻟﯘﭖ 7 - ﺋﺎﻳﺪﯨﻦ 8 - ﺋﺎﻱ ﻣﻪﺯﮔﯩﻠﯩﮕﯩﭽﻪ ﻳﻪﻧﯩﻤﯘ ﻛﻪﯓ ﺩﺍﺋﯩﺮﯨﺪﻩ ﻛﻪﻟﻜﯜﻥ ﺋﺎﭘﻪﺗﻠﯩﺮﻯ ﻛﯚﺭﯛﻟﯩﺸﻰ ﻣﯜﻣﻜﯩﻦ ﺋﯩﻜﻪﻥ.

ﻧﯚﯞﻩﺗﺘﻪ ﺋﺎﻟﺘﺎﻳﺪﺍ ﺋﺎﭘﻪﺗﺘﻪ ﻗﺎﻟﻐﺎﻥ ﺧﻪﻟﻖ، ﮬﯚﻛﯜﻣﻪﺕ ﺩﺍﺋﯩﺮﯨﻠﯩﺮﯨﻨﯩﯔ ﺋﺎﭘﻪﺗﻨﻰ ﻛﯚﺯﺩﯨﻦ ﻛﻪﭼﯜﺭﯛﺵ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﻛﯚﭖ ﻗﯧﺘﯩﻢ ﺋﯧﻠﯩﭗ ﺑﺎﺭﺳﯩﻤﯘ ﺋﻪﻣﻤﺎ، ﺋﺎﭘﻪﺗﺘﻪ ﻗﺎﻟﻐﺎﻥ ﺧﻪﻟﻘﻨﻰ ﻗﯘﺗﻘﯘﺯﯗﺵ ﺋﯩﺸﻠﯩﺮﯨﻨﯩﯔ ﺗﯧﺰ ﻳﯜﺭﯛﺷﻤﻪﻳﯟﺍﺗﻘﺎﻧﻠﯩﻘﯩﺪﯨﻦ ﻧﺎﺭﺍﺯﻯ ﺋﯩﻜﻪﻧﻠﯩﻜﯩﻨﻰ ﺋﯩﭙﺎﺩﯨﻠﯩﻤﻪﻛﺘﻪ. (ﮔﯜﻟﭽﯧﮭﺮﻩ)