ﺋﯘﻳﻐﯘﺭ ﺋﯧﻠﯩﻨﯩﯔ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﭼﺎﺭﯞﺍ - ﻣﺎﻟﻼﺭﻏﺎ ﻏﻪﻳﺮﻯ ﻛﯧﺴﻪﻟﻠﯩﻚ ﺗﺎﺭﻗﺎﻟﺪﻯ

ﺭﺍﺩﯨﺌﻮﻣﯩﺰﻏﺎ ﻛﻪﻟﮕﻪﻥ ﺋﯩﻨﻜﺎﺳﻼﺭﻏﺎ ﺋﺎﺳﺎﺳﻪﻥ ﺋﯩﻠﻰ ﺭﺍﻳﻮﻧﯩﺪﯨﻦ ﺋﯩﮕﯩﻠﯩﺸﯩﻤﯩﺰﭼﻪ، ﺋﯩﻠﯩﻨﻰ ﺋﺎﺳﺎﺱ ﻗﯩﻠﻐﺎﻥ ﺋﯘﻳﻐﯘﺭ ﺋﯧﻠﯩﻨﯩﯔ ﺷﯩﻤﺎﻟﯩﺪﯨﻜﻰ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﯨﻜﻰ ﭼﺎﺭﯞﺍ ﻣﺎﻟﻼﺭﺩﺍ ﻏﻪﻳﺮﻯ ﻳﯘﻗﯘﻣﻠﯘﻕ ﻛﯧﺴﻪﻟﻠﯩﻚ ﺗﺎﺭﻗﺎﻟﻐﺎﻥ ﺑﻮﻟﯘﭖ، ﮔﻪﺭﭼﻪ ﺑﯘ ﻏﻪﻳﺮﻯ ﻳﯘﻗﯘﻣﻠﯘﻕ ﻛﯧﺴﻪﻟﻠﯩﻚ ﺗﺎﺭﻗﺎﻟﻐﺎﻧﻐﺎ ﺑﯩﺮ ﺋﺎﻳﭽﻪ ﺑﻮﻟﻐﺎﻥ ﺑﻮﻟﺴﯩﻤﯘ ﺧﯩﺘﺎﻱ ﮬﯚﻛﯜﻣﯩﺘﻰ ﺗﻪﺭﯨﭙﯩﺪﯨﻦ ﻣﻪﺧﭙﻰ ﺗﯘﺗﯘﻟﻤﺎﻗﺘﺎ ﺋﯩﻜﻪﻥ،

• ﻣﯘﺧﺒﯩﺮﯨﻤﯩﺰ ﮔﯜﻟﭽﯧﮭﺮﻩﻧﯩﯔ ﺑﯘ ﮬﻪﻗﺘﯩﻜﻰ ﭘﺮﻭﮔﺮﺍﻣﻤﯩﺴﯩﻨﻰ ﺋﺎﯕﻼﯓ
• Download story audio

ﭼﺎﺭﯞﯦﭽﯩﻼﺭ ﺗﻪﺷﯟﯦﺸﻠﻪﻧﻤﻪﻛﺘﻪ

ﺋﯩﻠﻰ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﺧﯩﺘﺎﻱ ﮬﯚﻛﯜﻣﻪﺕ ﺗﺎﺭﻣﺎﻗﻠﯩﺮﻯ ﺟﯩﺪﺩﻯ ﯞﻩ ﻣﻪﺧﭙﯩﻲ ﮬﺎﻟﺪﺍ ﻏﻪﻳﺮﻯ ﺑﯩﺮ ﺧﯩﻞ ﻛﯧﺴﻪﻟﻠﯩﻚ ﺑﯩﻠﻪﻥ ﺋﯚﻟﯜﯞﺍﺗﻘﺎﻥ ﭼﺎﺭﯞﺍ -ﻣﺎﻟﻼﺭﻧﻰ ﻛﯚﻣﯜﭖ ﻛﯚﻳﺪﯛﺭﯛﭖ ﺑﯩﺮ ﺗﻪﺭﻩﭖ ﻗﯩﻠﯩﯟﺍﺗﻘﺎﻥ ﺑﻮﻟﯘﭖ. ﺑﯘ ﮬﻪﻗﺘﻪ ﺭﺍﺩﯨﺌﻮﻣﯩﺰﻏﺎ ﺋﯩﻨﻜﺎﺱ ﻗﯩﻠﻐﺎﻥ ﺑﯩﺮ ﻛﯩﺸﻰ ﺋﯩﻠﯩﻨﯩﯔ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﻗﻮﻱ ﻛﺎﻟﯩﻼﺭﻏﺎ ﺑﯩﺮ ﺧﯩﻞ ﻛﯧﺴﻪﻟﻠﯩﻚ ﺗﺎﺭﻗﺎﭖ ﻛﯚﭘﻠﻪﭖ ﺋﯚﻟﯜﯞﺍﺗﻘﺎﻧﻠﯩﻘﯩﻨﻰ، ﺋﻪﻣﻤﺎ ﮬﯚﻛﯜﻣﻪﺕ ﺋﻮﺭﯗﻧﻠﯩﺮﯨﻨﯩﯔ ﭼﺎﺭﯞﺍ ﻣﺎﻟﻼﺭﺩﺍ ﺗﺎﺭﻗﺎﻟﻐﺎﻥ ﺑﯘ ﻛﯧﺴﻪﻟﻠﯩﻜﻨﻰ ﻣﻪﺗﺒﯘﺋﺎﺗﻼﺭﺩﯨﻦ، ﺋﺎﻣﻤﯩﺪﯨﻦ ﻣﻪﺧﭙﻰ ﺗﯘﺗﯩﯟﺍﺗﻘﺎﻧﻠﯩﻘﯩﻨﻰ، ﭼﺎﺭﯞﯨﭽﻰ ﯞﻩ ﺩﯦﮭﻘﺎﻧﻼﺭﻧﯩﯔ ﺑﯘ ﺧﯩﻞ ﺋﻪﮬﯟﺍﻟﺪﯨﻦ ﺋﻪﻧﺪﯨﺸﻪ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﯧﻴﺘﺘﻰ.

ﻛﯩﺸﯩﻠﻪﺭﻧﯩﯔ ﺗﻪﺳﯟﯨﺮﻟﯩﺸﯩﮕﻪ ﻗﺎﺭﯨﻐﺎﻧﺪﺍ ﺑﯘ ﺧﯩﻞ ﻏﻪﻳﺮﻯ ﻛﯧﺴﻪﻟﻠﯩﻚ ﻛﯚﺭﯛﻟﮕﻪﻥ ﭼﺎﺭﯞﺍ ﻣﺎﻟﻼﺭﺩﺍ ﺋﺎﻏﺰﯨﺪﯨﻦ ﻛﯚﭘﯜﻙ ﭼﯩﻘﯩﭗ، ﺗﯩﻠﻰ ﺳﺎﯕﮕﯩﻼﭖ ﺋﯚﻟﯜﭖ ﻗﺎﻟﯩﺪﯨﻜﻪﻥ ﮬﻪﻣﺪﻩ ﺑﯘﺧﯩﻞ ﻛﯧﺴﻪﻝ، ﭼﺎﺭﯞﺍ ﻣﺎﻟﻼﺭﻏﺎ ﺗﯧﺰ ﺳﯜﺭﺋﻪﺗﺘﻪ ﯞﻩ ﻛﻪﯓ ﺩﺍﺋﯩﺮﯨﺪﻩ ﺗﺎﺭﻗﯩﻠﯩﯟﺍﺗﻘﺎﻥ ﺑﻮﻟﯘﭖ، ﺑﻪﺯﻯ ﭼﺎﺭﯞﯨﭽﯩﻼﺭ ﻣﯘﻧﺎﺳﯩﯟﻩﺗﻠﯩﻚ ﮬﯚﻛﯜﻣﻪﺕ ﻣﻪﺗﺒﯘﺋﺎﺕ ﺋﻮﺭﯗﻧﻠﯩﺮﯨﻐﺎ، ﺑﯘ ﺋﻪﮬﯟﺍﻟﻨﻰ ﻣﻪﻟﯘﻡ ﻗﯩﻠﻐﺎﻧﺪﺍ، ﻣﻪﺗﺒﯘﺋﺎﺕ ﺋﻮﺭﯗﻧﻠﯩﺮﻯ ﺋﯘﻻﺭﻏﺎ " ﺑﯘ ﺗﻮﻏﺮﯨﻠﯩﻖ ﮬﯚﻛﯜﻣﻪﺗﻨﯩﯔ ﺭﯗﺧﺴﯩﺘﯩﺴﯩﺰ ﺧﻪﯞﻩﺭ ﺑﯧﺮﻩﻟﻤﻪﻳﻤﯩﺰ" ﺩﯨﮕﻪﻥ.

ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻣﺎﻝ ﭼﺎﺭﯞﯦﻼﺭﻏﺎ ﻛﯧﺴﻪﻟﻠﯩﻚ ﺗﺎﺭﻗﺎﻟﻐﺎﻧﻠﯩﻘﯩﻨﻰ ﻳﯘﺷﯘﺭﻣﺎﻗﺘﺎ

ﻣﻪﺯﻛﯘﺭ ﻏﻪﻳﺮﻯ ﻛﯧﺴﻪﻟﻠﯩﻜﻨﯩﯔ ﺗﯧﺨﯩﻤﯘ ﻛﻪﯓ ﺗﺎﺭﻗﯩﻠﯩﺸﯩﺪﯨﻦ ﺋﻪﻧﺪﯨﺸﻪ ﻗﯩﻠﻐﺎﻥ ﺋﺎﻣﻤﺎ ﺭﺍﺩﯨﺌﻮﻣﯩﺰﺩﯨﻦ ﺑﯘ ﮬﻪﻗﺘﻪ ﻣﯘﻧﺎﺳﯩﯟﻩﺗﻠﯩﻚ ﺋﻮﺭﯗﻧﻼﺭﺩﯨﻦ ﺋﻪﻣﯩﻠﯩﻲ ﺋﻪﮬﯟﺍﻝ ﺋﯩﮕﯩﻠﻪﭖ ﻛﯚﺭﯛﺷﯩﻤﯩﺰﻧﻰ ﺋﯜﺗﯜﻧﮕﻪﻧﺪﯨﻦ ﻛﯧﻴﯩﻦ. ﺑﯩﺰﺋﯘﻻﺭﻧﯩﯔ ﭘﯩﻜﺮﯨﮕﻪ ﺋﺎﺳﺎﺳﻪﻥ ﺋﯩﻠﯩﻨﯩﯔ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﯨﻦ ﺋﻪﮬﯟﺍﻝ ﺋﯩﮕﯩﻠﻪﺷﻜﻪ ﺗﯩﺮﯨﺸﺘﯘﻕ ﻧﯩﻠﻘﯩﻨﯩﯔ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﯩﺪﯨﻦ ﺑﯩﺮ ﻗﺎﻧﭽﻪ ﭼﺎﺭﯞﯨﭽﻰ ﺑﯘ ﮬﻪﻗﺘﻪ ﺑﯩﺰﮔﻪ ﻣﻪﻟﯘﻣﺎﺕ ﺑﻪﺭﺩﻯ :

--- ﺑﯘ ﻧﯩﻠﻘﯩﻤﯘ؟ ﺑﯘ ﻳﻪﺭﺩﻩ ﻣﺎﻝ ﭼﺎﺭﯞﯨﻼﺭﺩﺍ ﻛﯧﺴﻪﻝ ﺗﺎﺭﻗﺎﭘﺘﯘ ﺩﻩﭖ ﺋﺎﯕﻠﯩﻐﺎﻧﺘﯘﻕ، ﺑﯘ ﻛﯧﺴﻪﻝ ﻗﺎﭼﺎﻧﺪﯨﻦ ﺑﺎﺷﻼﭖ ﺗﺎﺭﻗﺎﻟﺪﻯ؟

--- ﻛﺎﻻ، ﻗﻮﻳﻼﺭﻧﯩﯔ ﮬﻪﻣﻤﯩﺴﯩﺪﻩ ﺑﺎﺭ، ﺑﯩﺮ ﺋﺎﻳﺪﻩﻙ ﺑﻮﻟﺪﻯ، ﻛﯧﺴﻪﻝ ﺗﺎﺭﻗﺎﭖ ﺋﯚﻟﯜﭖ ﻛﯧﺘﯩﭗ ﺑﺎﺭﯨﺪﯗ، ﺋﯚﻟﻤﯩﮕﯩﻨﻰ ﺋﺎﺯﺍ ﻗﺎﻟﺪﻯ.

--- ﻧﯩﻤﻪ ﻛﯧﺴﻪﻟﻠﯩﻜﯩﻨﻰ ﺑﯩﻠﺪﯨﯖﻼﺭﻣﯘ ؟

--- ﺑﯩﻠﻤﯩﺪﯗﻕ، ﮬﯚﻛﯜﻣﻪﺕ ﺑﯘ ﺋﯩﺸﻨﻰ ﺑﻪﻙ ﭼﯩﯔ ﺗﯘﺗﯘﯞﺍﺗﯩﺪﯗ، ﮬﻪﻣﻤﻪ ﻳﻪﺭﺩﻩ ﺋﺎﻕ ﻛﯩﻴﯩﻢ ﻛﯩﻴﯩﯟﺍﻟﻐﺎﻥ ﺩﯦﺰﯨﻨﻔﯩﻜﺴﯩﻴﻪ ﻗﯩﻠﯩﺪﯨﻐﺎﻧﻼﺭ ﺩﻭﺭﺍ ﭼﯧﭽﯩﭗ ﻳﯜﺭﯨﺪﯗ.

--- ﻗﺎﻳﺴﻰ ﺟﺎﻳﻼﺭﺩﺍ ﺋﯧﻐﯩﺮﻟﯩﻘﯩﻨﻰ ﺑﯩﻠﻪﻣﺴﯩﺰ؟

--- ﺋﯧﻨﯩﻖ ﺑﯩﻠﻤﻪﻳﻤﻪﻥ، ﺋﺎﯕﻠﯩﺸﯩﻤﭽﻪ ﻧﺎﮬﺎﻳﯩﺘﻰ ﺟﯩﻖ ﺟﺎﻳﻼﺭﺩﺍ ﻣﯘﺷﯘﻧﺪﺍﻕ ﻛﯧﺴﻪﻝ ﺗﺎﺭﻗﺎﭘﺘﯘ. ﺑﺎﺷﻘﯩﻨﻰ ﺑﯩﻠﻤﯩﺪﯨﻢ.

ﻳﻪﻧﻪ ﺑﯩﺮ ﺋﯘﻳﻐﯘﺭ ﻗﯩﺰ ﺑﯘ ﮬﻪﻗﺘﻪ ﺑﯩﻠﯩﺪﯨﻐﺎﻧﻠﯩﺮﯨﻨﻰ ﺳﯚﺯﻟﻪﭖ ﺑﻪﺭﺩﻯ:

• ﺋﯘ ﻣﯘﻧﺪﺍﻕ ﺩﯦﺪﻯ
• Download story audio

ﻣﺎﻝ ﭼﺎﺭﯞﯨﻼﺭﺩﯨﻜﻰ ﻏﻪﻳﺮﻯ ﻛﯧﺴﻪﻟﻠﯩﻜﻨﯩﯔ ﻛﻪﯓ ﺩﺍﺋﯩﺮﯨﺪﻩ ﺗﺎﺭﻗﺎﻟﻐﺎﻧﻠﯩﻘﻰ ﺋﺎﺷﻜﺎﺭﯨﻼﻧﺪﻯ

ﺑﯩﺰ ﺋﯘﻳﻐﯘﺭ ﺋﺎﭘﺘﻮﻧﯘﻡ ﺭﺍﻳﻮﻧﻠﯘﻕ ﭼﺎﺭﯞﯨﭽﯩﻠﯩﻖ ﻧﺎﺯﺍﺭﯨﺘﯩﻨﯩﯔ ﺑﯘﻧﯩﯖﺪﯨﻦ ﺧﻪﯞﯨﺮﻯ ﺑﺎﺭﻣﯘ ﻳﻮﻕ ؟ ﻣﻪﻟﯘﻣﺎﺕ ﺋﯧﻠﯩﺶ ﺋﯜﭼﯜﻥ ﭼﺎﺭﯞﯨﭽﯩﻠﯩﻖ ﻧﺎﺯﺍﺭﯨﺘﯩﻨﯩﯔ ﺋﯩﺸﺨﺎﻧﯩﺴﯩﻐﺎ ﺗﯧﻠﯧﻔﻮﻥ ﻗﯩﻠﻐﯩﻨﯩﻤﯩﺰﺩﺍ، ﭼﺎﺭﯞﯨﭽﻰ ﺋﺎﻣﻤﯩﻨﻰ ﺋﻪﻧﺪﯨﺸﯩﮕﻪ ﺳﺎﻟﻐﺎﻥ ﺑﯘ ﻗﻮﺭﻗﯘﻧﭽﻠﯘﻕ ﻛﯧﺴﻪﻟﻠﯩﻜﻨﯩﯔ ﭘﻪﻗﻪﺕ ﺋﯩﻠﻰ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﯨﻼ ﺋﻪﻣﻪﺱ ﭘﯜﺗﯜﻥ ﺋﯘﻳﻐﯘﺭ ﺋﯧﻠﯩﺪﯨﻜﻰ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﺋﻮﺧﺸﺎﺷﻼ ﺑﺎﺭﻟﯩﻘﻰ ﺋﺎﺷﻜﺎﺭﻻﻧﺪﻯ :

--- ﻣﻪﻥ ﺋﻪﺭﻛﯩﻦ ﺋﺎﺳﯩﻴﺎ ﺭﺍﺩﯨﺌﻮﺳﯩﻨﯩﯔ ﻣﯘﺧﺒﯩﺮﻯ، ﺑﯩﺰ ﺋﯩﻠﯩﺪﺍ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﺑﯩﺮ ﺧﯩﻞ ﻳﯘﻗﯘﻣﻠﯘﻕ ﻛﯧﺴﻪﻝ ﺗﺎﺭﻗﺎﭘﺘﯘ، ﻧﯘﺭﻏﯘﻥ ﻣﺎﻟﻼﺭ ﺋﯚﻟﯜﭘﺘﯘ ﺩﻩﭖ ﺋﺎﯕﻠﯩﻐﺎﻥ ﺋﯩﺪﯗﻕ، ﺳﯩﻠﻪﺭﻧﯩﯔ ﺑﯘﻧﯩﯖﺪﯨﻦ ﺧﻪﯞﯨﺮﯨﯖﻼﺭ ﺑﺎﺭﻣﯘ ؟

--- ﮬﻪ ﺑﯩﻠﯩﻤﯩﺰ، ﻧﺎﺯﺍﺭﻩﺗﻨﯩﯔ ﺭﻩﮬﺒﻪﺭﻟﯩﺮﻯ ﻣﯘﺷﯘ ﺋﯩﺶ ﺋﯜﭼﯜﻥ ﺋﯩﻠﻰ، ﭼﯚﭼﻪﻙ، ﺑﺎﻳﻨﻐﯘﻟﯩﻦ، ﻗﻪﺷﻘﻪﺭﻟﻪﺭﮔﯩﭽﻪ ﭼﯜﺷﯜﭖ ﻛﻪﺗﺘﻰ.

--- ﺋﯘﻧﺪﺍﻗﺘﺎ ﭼﺎﺭﯞﺍ ﻣﺎﻟﻼﺭﺩﺍ ﺗﺎﺭﻗﺎﻟﻐﺎﻥ ﺑﯘ ﻛﯧﺴﻪﻝ ﭘﻪﻗﻪﺕ ﺋﯩﻠﯩﺪﯨﻼ ﺋﻪﻣﻪﺱ ﮬﻪﻣﻤﻪ ﺟﺎﻳﻼﺭﺩﺍ ﺗﻪﯓ ﺗﺎﺭﻗﺎﭘﺘﯘ-ﺩﻩ؟

--- ﺑﯩﻠﯩﺸﯩﻤﯩﺰﭼﻪ ﮬﻪﻣﻤﻪ ﺟﺎﻳﻼﺭﺩﺍ ﺑﺎﺭﯨﻜﻪﻥ.

--- ﭼﺎﺭﯞﺍ ﻣﺎﻟﻼﺭﻏﺎ ﺗﺎﺭﻗﺎﻟﻐﺎﻥ ﻛﯧﺴﻪﻟﻨﯩﯔ ﺯﺍﺩﻯ ﻗﺎﻧﺪﺍﻕ ﻛﯧﺴﻪﻟﻠﯩﻚ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯨﯖﻼﺭﻣﯘ؟

--- ﮬﺎﺯﯨﺮﭼﻪ ﺗﯧﺨﻰ ﺋﯧﻨﯩﻖ ﺋﻪﻣﻪﺱ.

--- ﺋﯘﻧﺪﺍﻗﺘﺎ ﺑﯘ ﺧﯩﻞ ﻳﯘﻗﯘﻣﻠﯘﻕ ﻛﯧﺴﻪﻟﻨﯩﯔ ﭼﺎﺭﯞﺍ ﻣﺎﻟﻼﺭﻏﺎ ﻗﺎﭼﺎﻧﺪﯨﻦ ﺑﺎﺷﻼﭖ ﺗﺎﺭﻗﺎﻟﻐﺎﻧﻠﯩﻘﯩﻨﻰ ﺑﯩﻠﻪﻣﺴﯩﺰ؟

---ﺑﯘﻧﻰ ﺋﺎﻧﭽﻪ ﺑﯩﻠﻤﻪﻳﺪﯨﻜﻪﻧﻤﻪﻥ، ﺋﯩﺸﻘﯩﻠﯩﭗ ﺑﺎﺷﻠﯩﻘﻼﺭ ﭼﯜﺷﯜﭖ ﻛﻪﺗﻜﯩﻠﻰ ﺋﻮﻥ ﻛﯜﻧﭽﻪ ﺑﻮﻟﺪﻯ.

--- ﺑﯩﻠﯩﺸﯩﻤﯩﺰﭼﻪ ﮬﺎﺯﯨﺮﻏﯩﭽﻪ ﮬﯧﭽﻘﺎﻧﺪﺍﻕ ﮬﯚﻛﯜﻣﻪﺕ ﺋﺎﺧﺒﺎﺭﺍﺗﻠﯩﺮﻯ ﺑﯘ ﮬﻪﻗﺘﻪ ﺧﻪﯞﻩﺭ ﺑﻪﺭﻣﻪﭘﺘﯘ ﺷﯘﻧﺪﺍﻗﻤﯘ؟

--- ﺗﻮﻏﺮﺍ ﺷﯘﻧﺪﺍﻕ، ﺋﻪﮬﯟﺍﻝ ﺋﯩﮕﯩﻠﻪﻳﻤﻪﻥ ﺩﯦﺴﯩﯖﯩﺰ ﺑﺎﺷﻠﯩﻘﻼﺭ ﻗﺎﻳﺘﯩﭗ ﻛﻪﻟﮕﻪﻧﺪﯨﻦ ﻛﯧﻴﯩﻦ ﭼﺎﺭﯞﯨﭽﯩﻠﯩﻖ ﺋﯩﺸﺨﺎﻧﯩﺴﯩﺪﯨﻦ ﺳﻮﺭﯨﺴﯩﯖﯩﺰ ﺑﻮﻟﯩﺪﯗ.

ﻣﻪﻟﯘﻡ ﺑﻮﻟﻐﺎﻥ ﺋﻪﮬﯟﺍﻟﻼﺭﻏﺎ ﻗﺎﺭﯨﻐﺎﻧﺪﺍ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﭼﺎﺭﯞﯨﭽﯩﻠﯩﻖ ﻣﻪﻳﺪﺍﻧﻠﯩﺮﯨﺪﺍ ﻗﻮﻱ ﻛﺎﻟﯩﻼﺭﻏﺎ ﺑﯩﺮ ﺧﯩﻞ ﻧﺎﻣﻪﻟﯘﻡ ﻳﯘﻗﯘﻣﻠﯘﻕ ﻛﯧﺴﻪﻟﻠﯩﻚ ﻛﻪﯓ ﺩﺍﺋﯩﺮﯨﺪﻩ ﺗﺎﺭﻗﯩﻠﯩﯟﺍﺗﻘﺎﻥ ﺑﻮﻟﯘﭖ، ﺧﯩﺘﺎﻱ ﮬﯚﻛﯜﻣﻪﺕ ﺩﺍﺋﯩﺮﯨﻠﯩﺮﯨﻨﯩﯔ ﺑﯘﻧﻰ ﻣﻪﺗﺒﯘﺋﺎﺗﺘﺎ ﺋﯧﻼﻥ ﻗﯩﻠﻤﺎﻱ، ﮬﻪﻣﺪﻩ ﺧﻪﻟﻘﺎﺭﺍﺩﯨﻜﻰ ﻣﯘﻧﺎﺳﯩﯟﻩﺗﻠﯩﻚ ﺩﺍﺋﯩﺮﯨﻠﻪﺭﻧﻰ ﺧﻪﯞﻩﺭﺩﺍﺭ ﻗﯩﻠﻤﺎﻱ، ﺧﯘﺩﺩﻯ ﺳﺎﺭﺱ ﻛﯧﺴﻪﻟﻠﯩﻜﻰ ﮬﻪﻣﺪﻩ ﻗﯘﺵ ﺯﯗﻛﯩﻤﯩﻨﯩﯔ ﺗﺎﺭﻗﺎﻟﻐﺎﻧﻠﯩﻘﯩﻨﻰ ﻳﯘﺷﯘﺭﻏﺎﻧﺪﻩﻙ ﻳﯘﺷﯘﺭﯨﯟﺍﺗﻘﺎﻧﻠﯩﻘﻰ ﻛﯩﺸﯩﻠﻪﺭﺩﻩ ﺗﯜﺭﻟﯜﻙ ﺋﻪﻧﺪﯨﺸﯩﻠﻪﺭﻧﻰ ﻗﻮﺯﻏﯩﻤﺎﻗﺘﺎ. (ﮔﯜﻟﭽﯧﮭﺮﻩ)