ﺧﯩﺘﺎﻱ ﻳﻪﺭ ﺷﺎﺭﻯ ﻛﯩﻠﯩﻤﺎﺗﯩﻨﯩﯔ ﺋﯩﺴﺴﯩﭗ ﻛﯧﺘﯩﺸﯩﺪﯨﻦ ﻗﺎﺗﺘﯩﻖ ﺋﻪﻧﺪﯨﺸﻪ ﻗﯩﻠﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﺑﯩﻠﺪﯛﺭﯛﺷﯩﭽﻪ، ﻫﺎﯞﺍ ﻛﯩﻠﯩﻤﺎﺗﻰ ﺗﯜﭘﻪﻳﻠﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ ﺋﺎﭘﻪﺗﻨﯩﯔ ﺑﺎﺷﻘﺎ ﺋﺎﭘﻪﺗﻠﻪﺭﮔﻪ ﻗﺎﺭﯨﻐﺎﻧﺪﺍ، ﺧﯩﺘﺎﻱ ﺋﯩﻘﺘﯩﺴﺎﺩﯨﻐﺎ ﺋﯧﻠﯩﭗ ﻛﯧﻠﯩﺪﯨﻐﺎﻥ ﺯﯨﻴﯩﻨﻰ ﺗﯧﺨﯩﻤﯘ ﺯﻭﺭ ﺋﯩﻜﻪﻥ. ﻳﯧﻘﯩﻨﺪﺍ، ﺧﯩﺘﺎﻱ ﻫﺎﯞﺍﺭﺍﻳﻰ ﺋﯩﺪﺍﺭﯨﺴﻰ ﯞﻩ ﺧﯩﺘﺎﻱ ﭘﻪﻥ ‏-ﺗﯧﺨﻨﯩﻜﺎ ﻣﯩﻨﯩﺴﺘﯩﺮﻟﯩﻜﻰ ﺑﯩﺮﻟﯩﻜﺘﻪ ﺋﺎﭼﻘﺎﻥ ﺋﺎﺧﺒﺎﺭﺍﺕ ﺋﯧﻼﻥ ﻗﯩﻠﯩﺶ ﻳﯩﻐﯩﻨﯩﺪﺍ ﯞﻩ ﺷﯘﻧﺪﺍﻗﻼ ﺑﯩﺮﻟﯩﻜﺘﻪ ﺋﯧﻼﻥ ﻗﯩﻠﻐﺎﻥ ﺑﯘ ﻫﻪﻗﺘﯩﻜﻰ ﺑﯘ ﻫﻪﻗﺘﯩﻜﻰ ﺩﻭﻛﻼﺗﯩﺪﺍ، ﻳﻪﺭﺷﺎﺭﻯ ﻫﺎﯞﺍ ﻛﯧﻠﯩﻤﺎﺗﯩﻨﯩﯔ ﺋﯩﺴﺴﯩﭗ ﻛﯧﺘﯩﺸﻰ ﺧﯩﺘﺎﻳﺪﯨﻜﻰ ﺗﻪﺑﯩﺌﯩﻲ ﺋﺎﭘﻪﺕ ﯞﻩ ﺳﯘ ﻣﻪﻧﺒﻪﺳﯩﻨﯩﯔ ﻛﻪﻣﭽﯩﻠﻠﯩﻜﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯨﻐﺎﻧﻠﯩﻘﻰ ﺗﻪﻛﯩﺘﻠﯩﻨﯩﭗ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﺧﯩﻞ ﻫﺎﻟﻪﺗﺘﯩﻦ ﻗﺎﺗﺘﯩﻖ ﺋﻪﻧﺪﯨﺸﻪ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ.

ﺧﯩﺘﺎﻱ ﻫﺎﯞﺍﺭﺍﻳﻰ ﺋﯩﺪﺍﺭﯨﺴﻰ ﯞﻩ ﺧﯩﺘﺎﻱ ﭘﻪﻥ ‏-ﺗﯧﺨﻨﯩﻜﺎ ﻣﯩﻨﯩﺴﺘﯩﺮﻟﯩﻜﻰ ﺑﯩﺮﻟﯩﻜﺘﻪ ﺋﯧﻼﻥ ﻗﯩﻠﻐﺎﻥ ﻳﻪﺭ ﺷﺎﺭﻯ ﻫﺎﯞﺍ ﻛﯩﻠﯩﻤﺎﺗﻰ ﻫﻪﻗﻘﯩﺪﯨﻜﻰ ﺑﯘ ﺩﻭﻛﻼﺗﺘﺎ ﻳﻪﻧﻪ، ﻫﺎﯞﺍﻧﯩﯔ ﺋﯩﺴﺴﯩﭗ ﻛﯧﺘﯩﺸﻰ ﺧﯩﺘﺎﻳﻨﯩﯔ ﻏﻪﺭﺑﯩﻲ ﺭﺍﻳﻮﻧﯩﺪﯨﻜﻰ ﺳﯘ ﻣﻪﻧﺒﺌﻪﺳﯩﮕﯩﻤﯘ ﺯﻭﺭ ﺗﻪﺳﯩﺮ ﻳﻪﺗﻜﯜﺯﯨﺪﯨﻐﺎﻧﻠﯩﻘﻰ، ﺷﯘﻧﺪﺍﻗﻼ ﻣﻪﺯﻛﯘﺭ ﺭﺍﻳﻮﻧﺪﺍ ﺑﯘﻧﺪﯨﻦ ﻛﯧﻴﯩﻦ ﺋﺎﭘﻪﺕ ﺧﺎﺭﺍﻛﺘﯧﺮﻟﯩﻖ ﻫﺎﯞﺍ ﻛﯩﻠﯩﻤﺎﺗﯩﻨﯩﯔ ﺗﯧﺨﯩﻤﯘ ﻛﯚﭘﯩﻴﯩﺪﯨﻐﺎﻧﻠﯩﻘﻰ، ﻣﯘﺯﺗﺎﻏﻼﺭﻧﯩﯔ ﺋﺎﺯﯨﻴﯩﺸﻰ ﺑﯩﻠﻪﻥ ﺩﻩﺭﻳﺎ ‏-ﺋﯧﻘﯩﻦ ﺳﯘﻟﯩﺮﯨﻨﯩﯔ ﺗﯧﺨﯩﻤﯘ ﺋﺎﺯﯨﻴﯩﭗ ﻛﯧﺘﯩﺪﯨﻐﺎﻧﻠﯩﻘﻰ ﺋﺎﻻﻫﯩﺪﻩ ﺗﻪﻛﯩﺘﻠﻪﻧﮕﻪﻥ.

ﻛﯩﻠﯩﻤﺎﺗﻨﯩﯔ ﺋﯩﺴﺴﯩﺸﻰ ﺧﯩﺘﺎﻳﺪﺍ ﺗﻪﺑﯩﺌﯩﻲ ﺋﺎﭘﻪﺕ ﯞﻩ ﺳﯘ ﻣﻪﻧﺒﻪﺳﯩﻨﯩﯔ ﻛﻪﻣﭽﯩﻠﻠﯩﻜﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯗ

ﯞﺍﺷﯩﻨﮕﺘﻮﻧﺪﯨﻜﻰ ﺧﻪﻟﻘﺌﺎﺭﺍ ﻣﯘﻫﯩﺘﻨﻰ ﻗﻮﻏﺪﺍﺵ ﺋﻮﺭﮔﯩﻨﯩﻨﯩﯔ ﻣﻪﺳﺌﯘﻟﻰ ﺟﯧﻨﻰ ﺧﺎﻧﯩﻢ ﻳﻪﺭ ﺷﺎﺭﻯ ﻫﺎﯞﺍ ﻛﯩﻠﯩﻤﺎﺗﯩﻨﯩﯔ ﺋﯩﺴﺴﯩﭗ ﻛﯧﺘﯩﺸﻰ ﻫﻪﻗﯩﻘﻪﺗﻪﻥ ﺧﯩﺘﺎﻳﺪﯨﻜﻰ ﺗﻪﺑﯩﺌﯩﻲ ﺋﺎﭘﻪﺕ ﯞﻩ ﺳﯘ ﻣﻪﻧﺒﻪﺳﯩﻨﯩﯔ ﻛﻪﻣﭽﯩﻠﻠﯩﻜﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ ﻣﯘﻧﺪﺍﻕ ﺩﯦﺪﻯ:

"ﻳﻪﺭ ﺷﺎﺭﻯ ﻫﺎﯞﺍ ﻛﯩﻠﯩﻤﺎﺗﯩﻨﯩﯔ ﺋﯩﺴﺴﯩﭗ ﻛﯧﺘﯩﺸﻰ ﻫﺎﺯﯨﺮﺩﯨﻦ ﺑﺎﺷﻼﭖ ﻳﺎﻣﺎﻥ ﺋﺎﻗﯩﯟﻩﺗﻠﻪﺭﻧﻰ ﺋﯧﻠﯩﭗ ﻛﯧﻠﯩﺸﻜﻪ ﺑﺎﺷﻠﯩﺪﻯ. ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯘ ﻫﻪﻗﺘﻪ ﺋﯧﻼﻥ ﻗﯩﻠﻐﺎﻥ ﺩﻭﻛﻼﺗﯩﺪﺍ ﭘﻪﺭﻩﺯ ﻗﯩﻠﻐﺎﻧﻠﯩﺮﯨﻨﯩﯔ ﻫﻪﻣﻤﯩﺴﻰ ﺗﻮﻏﺮﺍ. ﺧﯩﺘﺎﻳﻨﯩﯔ ﺩﻩﺭﻳﺎ ﺋﯧﻘﯩﻨﻠﯩﺮﯨﻨﯩﯔ ﺳﯘ ﺋﺎﺳﺎﺳﻪﻥ ﻣﯘﺯ ﺗﺎﻏﻼﺭﺩﯨﻦ ﻛﯧﻠﯩﺪﯗ. ﻟﯧﻜﯩﻦ ﻫﺎﺯﯨﺮ ﺧﯩﺘﺎﻳﺪﯨﻜﻰ ﻣﯘﺯ ﺗﺎﻏﻼﺭ ﺑﺎﺭﻏﺎﻧﺴﯧﺮﻯ ﺋﺎﺯﯨﻴﯩﭗ، ﺧﯩﺘﺎﻳﻨﯩﯔ ﺳﯘ ﻣﻪﻧﺒﻪﺳﯩﻤﯘ ﺋﯩﻨﺘﺎﻳﯩﻦ ﻛﻪﻣﭽﯩﻞ ﻫﺎﻟﻪﺗﺘﻪ ﻗﺎﻟﻐﺎﻥ. ﺑﯘﻧﺪﺍﻕ ﺑﻮﻟﯘﺷﻰ ﺧﯩﺘﺎﻳﺪﯨﻜﻰ ﻳﻪﺭ ﺋﺎﺳﺘﻰ ﺳﯘﻧﻰ ﻗﺎﻻﻳﻤﯩﻘﺎﻥ ﺋﯩﺸﻠﯩﺘﯩﻠﮕﻪﻧﻠﯩﻜﻰ ﯞﻩ ﺋﯧﻐﯩﺮ ﺩﻩﺭﯨﺠﯩﺪﻩ ﺑﯘﻟﻐﯩﻨﯩﭗ ﻛﻪﺗﻜﻪﻧﻠﯩﻜﯩﺪﯨﻦ".

ﻫﺎﯞﺍ ﻛﯩﻠﯩﻤﺎﺗﻨﯩﯔ ﺋﯚﺯﮔﯩﺮﯨﺸﻰ ﺧﯩﺘﺎﻳﺪﯨﻜﻰ ﺋﺎﺷﻠﯩﻖ ﺋﯩﺸﻠﻪﭖ ﭼﯩﻘﯩﺮﯨﺶ ﺋﯩﺸﻠﯩﺮﯨﻐﺎ ﺑﯩﯟﺍﺳﺘﻪ ﺗﻪﺳﯩﺮ ﻛﯚﺭﺳﯩﺘﯩﺪﯗ

ﺧﯩﺘﺎﻱ ﺩﯙﻟﻪﺕ ﻣﯘﻫﯩﺘﻨﻰ ﻗﻮﻏﺪﺍﺵ ﺋﯩﺪﺍﺭﯨﺴﯩﻨﯩﯔ ﺑﺎﺷﻠﯩﻘﻰ ﺟﯘﯞ ﺷﯩﯖﺸﻴﻪﻥ ﻳﯧﻘﯩﻨﺪﺍ ﺧﯩﺘﺎﻳﺪﯨﻜﻰ ﺳﯘ ﻣﻪﻧﺒﻪﺳﯩﻨﯩﯔ ﺋﯩﻨﺘﺎﻳﯩﻦ ﻛﻪﻣﭽﯩﻞ ﺑﻮﻟﯘﯞﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، "ﺧﯩﺘﺎﻳﺪﺍ ﻫﺎﺯﯨﺮ ﺋﺎﺯ ﺩﯦﮕﻪﻧﺪﻩ 300 ﻣﯩﻠﻴﻮﻥ ﻳﯧﺰﺍ ﺧﻪﻟﻘﻰ ﺑﯘﻟﻐﺎﻧﻐﺎﻥ ﺳﯘﻧﻰ ﺋﯩﺴﺘﯩﻤﺎﻝ ﻗﯩﻠﯩﯟﺍﺗﯩﺪﯗ" ﺩﻩﭖ ﺑﯩﻠﺪﯛﺭﺩﻯ.

ﺧﯩﺘﺎﻱ ﻫﺎﯞﺍﺭﺍﻳﻰ ﺋﯩﺪﺍﺭﯨﺴﻰ ﯞﻩ ﺧﯩﺘﺎﻱ ﭘﻪﻥ ‏-ﺗﯧﺨﻨﯩﻜﺎ ﻣﯩﻨﯩﺴﺘﯩﺮﻟﯩﻜﻰ ﺑﯩﺮﻟﯩﻜﺘﻪ ﺋﯧﻼﻥ ﻗﯩﻠﻐﺎﻥ ﺩﻭﻛﻼﺗﺘﺎ ﺗﻪﻛﯩﺘﻠﯩﻨﯩﺸﯩﭽﻪ، ﻫﺎﯞﺍ ﻛﯩﻠﯩﻤﺎﺗﻨﯩﯔ ﺋﯚﺯﮔﯩﺮﯨﺸﻰ ﺧﯩﺘﺎﻳﺪﯨﻜﻰ ﺋﺎﺷﻠﯩﻖ ﺋﯩﺸﻠﻪﭖ ﭼﯩﻘﯩﺮﯨﺶ ﺋﯩﺸﻠﯩﺮﯨﻐﺎ ﺑﯩﯟﺍﺳﺘﻪ ﺗﻪﺳﯩﺮ ﻛﯚﺭﺳﯩﺘﯩﺪﯨﻜﻪﻥ. ﺧﯩﺘﺎﻱ ﻫﺎﯞﺍﺭﺍﻳﻰ ﺋﯩﺪﺍﺭﯨﺴﯩﻨﯩﯔ ﻣﻪﺳﺌﯘﻟﻰ ﻟﯘ ﻳﯘﯓ "ﺧﯩﺘﺎﻱ ﻫﺎﺯﯨﺮ ﺋﺎﺷﻠﯩﻖ ﺋﯩﺸﻠﻪﭘﭽﯩﻘﯩﺮﯨﺸﺘﺎ ﺯﻭﺭ ﺧﻪﺗﻪﺭﮔﻪ ﺩﯗﭺ ﻛﻪﻟﻤﻪﻛﺘﻪ. ﭼﯜﻧﻜﻰ ﻫﺎﯞﺍﺭﺍﻳﯩﻨﯩﯔ ﺋﯚﺯﮔﯩﺮﯨﺸﻰ ﺧﯩﺘﺎﻳﺪﯨﻜﻰ ﺋﺎﺷﻠﯩﻖ ﺋﯩﺸﻠﻪﭘﭽﯩﻘﯩﺮﯨﺶ ﺋﯩﺸﻠﯩﺮﯨﻐﺎ ﺋﻪﯓ ﺑﯩﯟﺍﺳﺘﻪ ﺗﻪﺳﯩﺮ ﻛﯚﺭﺳﻪﺗﻤﻪﻛﺘﻪ. ﺑﯘ ﺧﯩﺘﺎﻳﻨﯩﯔ ﻳﯧﺰﺍ ﺋﯩﮕﯩﻠﯩﻚ ﺳﺎﻫﻪﺳﯩﮕﻪ ﺑﻮﻟﻐﺎﻥ ﺑﯩﺮ ﺋﺎﺭﺗﯘﻗﭽﻪ ﺑﯧﺴﯩﻢ ﺑﻮﻟﯘﭖ ﻗﺎﻟﺪﻯ" ﺩﻩﭖ ﺑﯩﻠﺪﯛﺭﺩﻯ.

ﺧﯩﺘﺎﻱ ﭘﻪﻥ -ﺗﯧﺨﻨﯩﻜﺎ ﯞﺍﻗﯩﺖ ﮔﯧﺰﯨﺘﯩﺪﻩ ﺑﯧﺮﯨﻠﮕﻪﻥ ﻣﻪﻟﯘﻣﺎﺗﺘﺎ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﯞﺍ ﻛﻪﻟﯩﻤﺎﺗﯩﻨﯩﯔ ﺋﯩﺴﺴﯩﺸﻰ ﺗﯜﭘﻪﻳﻠﯩﺪﯨﻦ، ﺧﯩﺘﺎﻳﺪﺍ ﺋﯩﺸﻠﻪﭘﭽﯩﻘﯩﺮﯨﻠﯩﺪﯨﻐﺎﻥ ﺩﯦﻬﻘﺎﻧﭽﯩﻠﯩﻖ ﻣﻪﻫﺴﯘﻻﺕ ﺗﯜﺭﻟﯩﺮﯨﺪﯨﻤﯘ ﻛﯚﭖ ﺋﯚﺯﮔﯩﺮﯨﺸﻠﻪﺭ ﺑﻮﻟﯩﺪﯨﻜﻪﻥ. ﻫﺎﺯﯨﺮﻧﯩﯔ ﺋﯚﺯﯨﺪﻩ، ﻳﻪﻧﻰ ﺗﯧﺮﯨﻠﻐﯘ ﻗﺎﻧﯘﻧﯩﻴﯩﺘﻰ ﯞﻩ ﻣﻪﻫﺴﯘﻻﺕ ﺗﯜﺭﻯ ﺋﯚﺯﮔﻪﺭﻣﯩﮕﻪﻥ ﺷﺎﺭﺍﺋﯩﺘﺘﺎ، ﻫﺎﯞﺍﻧﯩﯔ ﺋﯩﺴﺴﯩﭗ ﻛﯧﺘﯩﺸﯩﻨﯩﯔ ﺋﯚﺯﻯ ﺋﺎﺷﻠﯩﻖ ﺋﯩﺸﻠﻪﭖ ﭼﯩﻘﯩﺮﯨﺶ ﻧﯩﺴﺒﯩﺘﯩﻨﻰ 10%ﺋﻪﺗﺮﺍﭘﯩﺪﺍ ﺗﯚﯞﻩﻧﻠﯩﺘﯩﯟﯦﺘﯩﺪﯨﻜﻪﻥ.

ﻣﯘﺗﻪﺧﻪﺳﺴﯩﺴﻠﻪﺭﻧﯩﯔ ﻛﯚﺭﺳﯩﺘﯩﺸﯩﭽﻪ، ﺧﯩﺘﺎﻳﺪﯨﻜﻰ ﻫﺎﯞﺍ ﯞﻩ ﺳﯘﻧﯩﯔ ﺑﯘﻟﻐﯩﻨﯩﺶ ﺩﻩﺭﯨﺠﯩﺴﻰ ﻫﻪﻗﯩﻘﻪﺗﻪﻥ ﻧﺎﻫﺎﻳﯩﺘﻰ ﺋﯧﻐﯩﺮ ﺑﻮﻟﯘﭖ، ﺑﯘﻧﺪﯨﻦ ﻛﯧﻴﯩﻦ ﻳﻪﺭ ﺷﺎﺭﻯ ﻫﺎﯞﺍ ﻛﯩﻠﯩﻤﺎﺗﻨﯩﯔ ﺋﯩﺴﺴﯩﭗ ﻛﯧﺘﯩﺸﻰ ﺑﯩﻠﻪﻥ، ﺑﯘ ﺧﯩﻞ ﺋﻪﻫﯟﺍﻝ ﺗﯧﺨﯩﻤﯘ ﺋﯧﻐﯩﺮﻟﯩﺸﯩﺸﻰ ﻣﯘﻣﻜﯩﻦ ﺋﯩﻜﻪﻥ.

ﺋﻪﻧﮕﯩﻠﯩﻴﻪ ﺏ ﺏ ﺱ ﺭﺍﺩﯨﺌﻮ ﺗﯧﻠﯧﯟﯨﺰﯨﻴﻪ ﺷﯩﺮﻛﯩﺘﯩﻨﯩﯔ ﺧﯩﺘﺎﻳﺪﯨﻜﻰ ﻣﯘﻫﯩﺖ ﯞﻩ ﺑﯘﻟﻐﺎﻧﻐﺎﻥ ﺳﯘ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺑﻪﺭﮔﻪﻥ ﻣﻪﻟﯘﻣﺎﺗﯩﺪﺍ، "ﮔﻪﺭﭼﻪ ﺧﯩﺘﺎﻱ ﻫﯚﻛﯜﻣﯩﺘﻰ ﻣﯘﻫﯩﺘﻨﻰ ﺋﺎﺳﺮﺍﺵ ﻣﻪﺳﯩﻠﯩﺴﯩﺪﻩ ﺟﯩﺪﺩﯨﻲ ﭼﺎﺭﻩ ﺗﻪﺩﺑﯩﺮﻟﻪﺭﻧﻰ ﻗﻮﻟﻠﯩﻨﯩﯟﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺑﻮﻟﺴﯩﻤﯘ، ﺧﯩﺘﺎﻳﺪﯨﻜﻰ ﻣﯘﻫﯩﺘﻨﻰ ﻗﻮﻏﺪﺍﺵ ﺋﻪﻣﻪﻟﺪﺍﺭﻟﯩﺮﻯ ﺑﯘﻟﻐﯩﻨﯩﺶ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺑﻪﺭﮔﻪﻥ ﺩﻭﻛﻼﺗﻠﯩﺮﯨﺪﺍ ﺩﺍﯞﺍﻣﻠﯩﻖ ﺳﺎﺧﺘﯩﻠﯩﻖ ﯞﻩ ﻛﯚﺯ ﺑﻮﻳﺎﻣﭽﯩﻠﯩﻖ ﻗﯩﻠﻤﺎﻗﺘﺎ" ﺩﻩﭖ ﺑﯩﻠﺪﯛﺭﯛﻟﮕﻪﻥ. (ﻣﯧﻬﺮﯨﺒﺎﻥ)