5-ﻧﯚﯞﻩﺗﻠﯩﻚ ﺧﻪﻟﻘﺌﺎﺭﺍ ﺋﯩﻨﺴﺎﻥ ﻫﻪﻗﻠﯩﺮﻯ ﻛﯩﻨﻮ ﺑﺎﻳﺮﯨﻤﻰ ﺋﯚﺗﻜﯜﺯﯛﻟﺪﻯ

• ﻣﯘﺧﺒﯩﺮﯨﻤﯩﺰ ﺋﻪﻛﺮﻩﻣﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

10 - ﺋﺎﻳﻨﯩﯔ 1 - ﻛﯜﻧﻰ 5-ﻧﯚﯞﻩﺗﻠﯩﻚ ﺧﻪﻟﻘﺌﺎﺭﺍ ﺋﯩﻨﺴﺎﻥ ﻫﻪﻗﻠﯩﺮﻯ ﻛﯩﻨﻮ ﺑﺎﻳﺮﯨﻤﻰ ﮔﯧﺮﻣﺎﻧﯩﻴﯩﻨﯩﯔ ﻧﯜﺭﻧﺒﻪﺭﮒ ﺷﻪﻫﺮﯨﺪﻩ ﺑﺎﺷﻼﻧﻐﺎﻥ. ﺑﯘ ﭘﺎﺋﺎﻟﯩﻴﻪﺕ 10 - ﺋﺎﻳﻨﯩﯔ 10 - ﻛﯜﻧﯩﮕﻪ ﻗﻪﺩﻩﺭ ﺩﺍﯞﺍﻡ ﻗﯩﻠﯩﺪﯨﻜﻪﻥ. ﺑﯘ ﻛﯩﻨﻮ ﺑﺎﻳﺮﯨﻤﻰ ﺟﻪﺭﻳﺎﻧﯩﺪﺍ ﺩﯗﻧﻴﺎﻧﯩﯔ ﻫﻪﺭ ﻗﺎﻳﺴﻰ ﺋﻪﻟﻠﯩﺮﯨﺪﻩ ﺋﯩﺸﻠﻪﻧﮕﻪﻥ ﺋﯩﻨﺴﺎﻥ ﻫﻪﻗﻠﯩﺮﻯ ﯞﻩ ﺩﯦﻤﻮﻛﺮﺍﺗﯩﻴﯩﻨﻰ ﺋﺎﺳﺎﺳﻰ ﺗﯧﻤﺎ ﻗﯩﻠﻐﺎﻥ ﻳﯜﺯﮔﻪ ﻳﯧﻘﯩﻦ ﻛﯩﻨﻮ ﻓﯩﻠﯩﻤﻰ ﻳﯩﻐﯩﻦ ﺋﻪﻫﻠﯩﻨﯩﯔ ﺩﯨﻘﻘﯩﺘﯩﮕﻪ ﺗﻪﻗﺪﯨﻢ ﻗﯩﻠﯩﻨﯩﭗ، ﻳﺎﺧﺸﻰ ﺑﺎﻫﺎﻏﺎ ﺋﯧﺮﯨﺸﻜﻪﻥ ﻓﯩﻠﯩﻤﻠﻪﺭ ﺗﻪﻗﺪﯨﺮﻟﯩﻨﯩﺪﯨﻜﻪﻥ.

ﺧﻪﻟﻘﺌﺎﺭﺍ ﺋﯩﻨﺴﺎﻥ ﻫﻪﻗﻠﯩﺮﻯ ﺗﻪﺷﻜﯩﻼﺗﻠﯩﺮﻯ ﺗﻪﺭﯨﭙﯩﺪﯨﻦ ﺋﯘﻳﯘﺷﺘﯘﺭﯗﻟﯩﺪﯨﻐﺎﻥ ﺑﯘ ﺧﯩﻠﺪﯨﻜﻰ ﭘﺎﺋﺎﻟﯩﻴﻪﺗﻠﻪﺭﮔﻪ ﻗﺎﺗﻨﺎﺷﺘﯘﺭﯨﻠﯩﺪﯨﻐﺎﻥ ﻓﯩﻠﯩﻤﻠﻪﺭ، ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﯞﻩ ﺩﯦﻤﻮﻛﺮﺍﺗﯩﻴﻪ ﺑﺎﺳﺘﯘﺭﯗﻟﯘﺷﻼﺭﻏﺎ ﺋﯘﭼﺮﺍﯞﺍﺗﻘﺎﻥ ﺩﯙﻟﻪﺗﻠﻪﺭﻧﯩﯔ ﻣﯘﺳﺘﻪﺑﯩﺖ ﺗﯜﺯﯛﻟﻤﯩﻠﯩﺮﯨﻨﻰ ﭘﺎﺵ ﻗﯩﻠﯩﺸﺘﺎ ﻫﯚﺟﺠﻪﺕ ﺧﺎﺭﺍﻛﺘﯧﺮﻟﯩﻚ ﺋﻪﻫﻤﯩﻴﻪﺗﻜﻪ ﺋﯩﮕﻪ ﺑﻮﻟﯩﺪﯨﻜﻪﻥ. ﺑﯘ ﭘﺎﺋﺎﻟﯩﻴﻪﺗﻜﻪ ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﻓﯩﻠﯩﻤﻠﻪﺭﻣﯘ ﻗﺎﺗﻨﺎﺷﺘﯘﺭﯗﻟﻐﺎﻥ.

10-ﺋﺎﻳﻨﯩﯔ 3-ﻛﯜﻧﻰ، ﻧﯜﺭﻧﺒﻪﺭﮒ ﺧﻪﻟﻘﺌﺮﺍ ﺋﯩﻨﺴﺎﻥ ﻫﻪﻗﻠﯩﺮﻯ ﻛﯩﻨﻮ ﺑﺎﻳﺮﯨﻤﯩﻨﯩﯔ ﻣﯘﺩﯨﺮﻯ ﺋﺎﻧﺪﺭﻩﺋﺎ ﻛﯘﻫﻦ ﺧﺎﻧﯩﻤﻨﯩﯔ ﺗﻪﻛﻠﯩﭙﯩﮕﻪ ﺑﯩﻨﺎﺋﻪﻥ ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺋﯩﺠﺮﺍﺋﯩﻴﻪ ﻛﻮﻣﯩﺘﯧﺘﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﺋﺎﺑﻠﯩﻜﯩﻢ ﺋﯩﺪﺭﯨﺲ ﺋﻪﭘﻪﻧﺪﻯ ﯞﻩ ﻗﯘﺭﯗﻟﺘﺎﻱ ﺑﺎﺵ ﻛﺎﺗﯩﭙﻰ، ﻳﺎﯞﺭﯗﭘﺎ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺑﯩﺮﻟﯩﻜﻰ ﺗﻪﺷﻜﯩﻼﺗﯩﻨﯩﯔ ﺭﻩﺋﯩﺴﻰ ﺩﻭﻟﻘﯘﻥ ﺋﻪﻳﺴﺎ ﺋﻪﭘﻪﻧﺪﯨﻠﻪﺭ ﺑﯘ ﻛﯩﻨﻮ ﺑﺎﻳﺮﯨﻤﯩﻐﺎ ﻗﺎﺗﻨﺎﺷﻘﺎﻥ.

ﭘﺎﺋﺎﻟﯩﻴﻪﺕ ﺟﻪﺭﻳﺎﻧﯩﺪﺍ، ﺋﯘﻳﻐﯘﺭﻻﺭﻏﺎ ﺋﺎﺋﯩﺖ ﺋﯩﻜﻜﻰ ﻓﯩﻠﯩﻢ ﻳﯩﻐﯩﻦ ﺋﻪﻫﻠﯩﻨﯩﯔ ﺩﯨﻘﻘﯩﺘﯩﮕﻪ ﺳﯘﻧﯘﻟﻐﺎﻥ. ﺑﯩﺮﻯ، ﮔﯧﺮﻣﺎﻧﯩﻴﯩﻨﯩﯔ "ﺳﺎﺕ 3" ﺗﯧﻠﯧﯟﯨﺰﯨﻴﻪ ﻗﺎﻧﯩﻠﻰ ﺗﻪﺭﯨﭙﯩﺪﯨﻦ ﺋﯩﺸﻠﻪﻧﮕﻪﻥ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻐﺎ ﻣﯘﻧﺎﺳﯩﯟﻩﺕ ﻓﯩﻠﯩﻢ ﺑﻮﻟﻐﺎﻥ ﺑﻮﻟﺴﺎ، ﻳﻪﻧﻪ ﺑﯩﺮﻯ ﺋﯘﻳﻐﯘﺭﻻﺭﻧﯩﯔ ﺩﺍﺭﯞﺍﺯﭼﯩﻠﯩﻖ ﺳﻪﻧﺌﯩﺘﯩﮕﻪ ﺋﺎﺋﯩﺖ 60 ﻣﯩﻨﯘﺗﻠﯘﻕ ﺑﯩﺮ ﻓﯩﻠﯩﻢ ﺑﻮﻟﻐﺎﻥ. ﺑﯘ ﻓﯩﻠﯩﻤﻠﻪﺭﺩﻩ ﺋﯘﻳﻐﯘﺭﻻﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﻠﯩﺮﯨﻨﯩﯔ ﺩﻩﭘﺴﻪﻧﺪﯨﭽﯩﻠﯩﻜﻠﻪﺭﮔﻪ ﺋﯘﭼﺮﺍﺵ ﺋﻪﻫﯟﺍﻟﻠﯩﺮﯨﺪﯨﻦ ﻣﻪﻟﯘﻣﺎﺗﻼﺭ ﺑﯧﺮﯨﻠﮕﻪﻥ. (ﺋﻪﻛﺮﻩﻡ)