ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﯞﻩ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻱ ﺋﯩﺸﻼﺭ ﺑﯩﺮﻟﻪﺷﻤﻪ ﻛﻮﻣﯩﺘﯧﺘﻰ 2007- ﻳﯩﻠﻠﯩﻖ ﻛﯩﺸﯩﻠﯩﻚ ﻫﻮﻗﯘﻕ ﺩﻭﻛﻼﺗﻰ ﺋﯧﻼﻥ ﻗﯩﻠﺪﻯ (1)

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﻣﯧﺮﯨﻜﺎ ﻗﻮﺷﻤﺎ ﺷﺘﺎﺗﻠﯩﺮﻯ ﺩﯙﻟﻪﺕ ﻣﻪﺟﻠﯩﺴﻰ ﯞﻩ ﻫﯚﻛﯜﻣﯩﺘﯩﻨﯩﯔ ﺧﯩﺘﺎﻱ ﺋﯩﺸﻼﺭ ﺑﯩﺮﻟﻪﺷﻤﻪ ﻛﻮﻣﯩﺘﯧﺘﻰ ﻣﯘﺷﯘ ﺋﺎﻳﻨﯩﯔ 10- ﻛﯜﻧﻰ ﺧﯩﺘﺎﻳﺪﺍ ﺑﺎﺭﻏﺎﻧﭽﻪ ﺋﯧﻐﯩﺮﻟﯩﺸﯩﭗ ﻛﯧﺘﯩﯟﺍﺗﻘﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﻰ ﻫﻪﻗﻘﯩﺪﻩ ﺑﯩﺮ ﺗﻪﭘﺴﯩﻠﯩﻲ ﺩﻭﻛﻼﺕ ﺗﻪﻳﻴﺎﺭﻻﭖ ﺋﯧﻼﻥ ﻗﯩﻠﺪﻯ.

ﺩﻭﻛﻼﺕ ﺟﻪﻣﺌﯩﻲ 300 ﺑﻪﺗﻠﯩﻚ ﺑﻮﻟﯘﭖ، 6 ﺑﯚﻟﻪﻛﺘﯩﻦ ﺗﻪﺭﻛﯩﭗ ﺗﺎﭘﻘﺎﻥ. ﺋﺎﻣﯧﺮﯨﻜﯩﻨﯩﯔ ﻗﺎﻧﯘﻧﻰ ﺑﻮﻳﯩﭽﻪ ﺷﯘ ﺧﯩﻠﺪﯨﻜﻰ ﺩﻭﻛﻼﺗﻼﺭ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﯞﻩ ﺩﯙﻟﻪﺕ ﻣﻪﺟﻠﯩﺴﯩﮕﻪ ﺗﺎﭘﺸﯘﺭﯗﻟﯩﺪﯨﻜﻪﻥ.

ﺋﯘﻳﻐﯘﺭ ﺋﯧﻠﻰ ﯞﻩ ﺗﯩﺒﻪﺗﻠﻪﺭﺩﻩ، ﺳﯩﻴﺎﺳﯩﻲ ﺑﯧﺴﯩﻤﻼﺭ ﻛﯜﻧﺴﺎﻳﯩﻦ ﺋﯧﻐﯩﺮﻟﯩﺸﯩﭗ ﺑﺎﺭﻣﺎﻗﺘﺎ

ﺩﻭﻛﻼﺗﺘﺎ، 2006- ﻳﯩﻠﯩﺪﯨﻦ ﺑﯘﻳﺎﻥ ﺧﯩﺘﺎﻳﺪﺍ ﻗﺎﻧﯘﻥ ﺑﯩﻠﻪﻥ ﺋﯩﺪﺍﺭﻩ ﻗﯩﻠﯩﺶ ﺟﻪﻫﻪﺗﺘﻪ ﺋﺎﻻﻫﯩﺪﻩ ﺋﯩﻠﮕﯩﺮﯨﻠﻪﺷﻠﻪﺭﻧﯩﯔ ﻛﯚﺭﯛﻟﻤﯩﮕﻪﻧﻠﯩﻜﻰ، ﺋﻪﻛﺴﯩﭽﻪ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﻯ ﺋﯩﺰﭼﯩﻞ ﻳﯜﺯ ﺑﯧﺮﯨﭗ ﺗﯘﺭﻏﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ ﺑﻮﻟﯘﭖ، ﺋﯘﻳﻐﯘﺭ ﺋﯧﻠﻰ ﯞﻩ ﺗﯩﺒﻪﺗﻠﻪﺭﺩﻩ ﻛﯜﻧﺴﺎﻳﯩﻦ ﺋﯧﻐﯩﺮﻟﯩﺸﯩﭗ ﺑﯧﺮﯨﯟﺍﺗﻘﺎﻥ ﺳﯩﻴﺎﺳﯩﻲ ﺑﯧﺴﯩﻤﻼﺭ ﺋﺎﻻﻫﯩﺪﻩ ﺗﯩﻠﻐﺎ ﺋﯧﻠﯩﻨﻐﺎﻥ.

ﺩﯨﻘﻘﻪﺕ ﻗﯩﻠﯩﺸﻘﺎ ﺋﻪﺭﺯﯨﻴﺪﯨﻐﺎﻥ ﻳﯧﺮﻯ ﺷﯘﻛﻰ، ﻣﻪﺯﻛﯘﺭ ﺩﻭﻛﻼﺗﺘﺎ ﺋﯩﻠﮕﯩﺮﯨﻜﯩﮕﻪ ﺋﻮﺧﺸﯩﻤﺎﻳﺪﯨﻐﺎﻥ ﻫﺎﻟﺪﺍ ﺋﯘﻳﻐﯘﺭﻻﺭﻏﺎ ﺋﺎﻻﻗﯩﺪﺍﺭ ﻣﻪﺯﻣﯘﻧﻼﺭ ﺋﺎﻻﻫﯩﺪﻩ ﻛﯚﭖ ﺑﻮﻟﯘﭖ، ﺋﯘﻳﻐﯘﺭﻻﺭﻧﯩﯔ ﻗﺎﻧﯘﻧﻰ، ﺋﯩﻨﺴﺎﻧﯩﻲ ﻫﻮﻗﯘﻗﻠﯩﺮﯨﻨﯩﯔ ﻫﻪﺭﺧﯩﻞ ﺩﻩﺧﻠﻰ-ﺗﻪﺭﯛﺯﮔﻪ ﺋﯘﭼﺮﺍﯞﺍﺗﻘﺎﻧﻠﯩﻘﻰ، ﺋﯘﻳﻐﯘﺭﻻﺭ ﺩﯗﭺ ﻛﯧﻠﯩﯟﺍﺗﻘﺎﻥ ﺗﯩﻞ ﯞﻩ ﻣﻪﺩﻩﻧﯩﻴﻪﺕ ﻛﺮﯨﺰﯨﺴﻠﯩﺮﻯ ﯞﻩ ﻫﻪﺭﺧﯩﻞ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﻯ ﻫﻪﺭ ﺗﻪﺭﻩﭘﺘﯩﻦ ﺗﻪﭘﺴﯩﻠﯩﻲ ﻳﻮﺭﯗﺗﯘﭖ ﺑﯧﺮﯨﻠﮕﻪﻥ.

ﺧﯩﺘﺎﻱ ﻫﯚﻛﯜﻣﯩﺘﻰ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﺎﺋﯩﻠﻪ -ﺗﺎﯞﺍﺑﯩﺌﺎﺗﻠﯩﺮﯨﻨﻰ ﺋﯩﺰ ﭼﯩﻞ ﭘﺎﺭﺍﻛﻪﻧﺪﻩ ﻗﯩﻠﯩﭗ ﻛﻪﻟﺪﻯ

ﺩﻭﻛﻼﺗﻨﯩﯔ ﻛﯩﺮﯨﺶ ﻗﯩﺴﯩﻤﺪﺍ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﺎﻣﻤﯩﯟﻯ ﺗﻪﺷﻜﯩﻼﺗﻼﺭ ﯞﻩ ﭘﯘﻗﺮﺍﻻﺭﻧﯩﯔ ﺳﯩﻴﺎﺳﯩﻲ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺑﺎﺳﺘﯘﺭﻏﺎﻧﻠﯩﻘﻰ ﻫﻪﻗﻘﯩﺪﯨﻜﻰ ﺑﯚﻟﯩﻜﯩﺪﻩ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﯩﯔ ﺋﺎﺋﯩﻠﻪ- ﺗﺎﯞﺍﺑﯩﺌﺎﺗﻠﯩﺮﯨﻐﺎ ﻫﻪﺭﺧﯩﻞ ﺷﻪﻛﯩﻠﺪﯨﻜﻰ ﭘﺎﺭﺍﻛﻪﻧﺪﯨﭽﯩﻠﯩﻜﻠﻪﺭﻧﻰ ﺳﯧﻠﯩﭗ ﻛﻪﻟﮕﻪﻧﻠﯩﻜﻰ ﻛﯚﺭﺳﯩﺘﯩﻠﯩﭗ، ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ، ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﯩﯔ ﺋﺎﺋﯩﻠﻪ ﺗﺎﯞﺍﺑﯩﺌﺎﺗﻠﯩﺮﯨﻨﯩﯔ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﭘﺎﺭﺍﻛﻪﻧﺪﻩ ﺳﯧﻠﯩﺸﯩﻐﺎ ﺋﯩﺰﭼﯩﻞ ﺋﯘﭼﺮﺍﭖ ﻛﻪﻟﮕﻪﻧﻠﯩﻜﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﺑﺎﻳﺮﻭﻥ ﺩﻭﺭﮔﺎﻥ: ﺩﻭﻛﻼﺗﻨﻰ ﺋﻮﻗﯘﺳﺎ ﻛﯩﺸﯩﻨﯩﯔ ﻛﯚﯕﻠﻰ ﻏﻪﺵ ﺑﻮﻟﯩﺪﯗ

ﺋﺎﻣﯧﺮﯨﻜﺎ ﺋﺎﯞﺍﺯﻯ ﺭﺍﺩﯨﺌﻮﺳﯩﺪﺍ، ﻛﯚﺭﺳﯩﺘﯩﻠﯩﺸﯩﭽﻪ، ﻣﻪﺯﻛﯘﺭ ﺩﻭﻛﻼﺗﻨﻰ ﺗﻪﻳﻴﺎﺭﻟﯩﻐﺎﻥ ﻛﻮﻣﯩﺘﯧﺖ ﺭﻩﺋﯩﺴﻰ، ﺋﺎﻣﯧﺮﯨﻜﺎ ﻛﯧﯖﻪﺵ ﭘﺎﻻﺗﺎ ﺋﻪﺯﺍﺳﻰ، ﺑﺎﻳﺮﻭﻥ ﺩﻭﺭﮔﺎﻥ ﺋﻪﭘﻪﻧﺪﻯ، ﺩﻭﻛﻼﺗﻨﻰ ﺋﻮﻗﯘﺳﺎ ﻛﯩﺸﯩﻨﯩﯔ ﻛﯚﯕﻠﯩﻨﯩﯔ ﻏﻪﺵ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ. ﺩﻩﯞﺭ ﺟﯘﺭﻧﯩﻠﯩﺪﺍ ﺑﯘ ﺩﻭﻛﻼﺕ ﻫﻪﻗﻘﯩﺪﻩ ﺑﯧﺮﯨﻠﮕﻪﻥ ﺧﻪﯞﻩﺭﺩﻩ، ﮔﻪﺭﭼﻪ ﺧﯩﺘﺎﻱ ﻫﯚﻛﯜﻣﯩﺘﻰ ﺋﻮﻟﯩﻤﭙﯩﻜﺘﯩﻦ ﺋﯩﻠﮕﯩﺮﻯ ﺋﯩﺴﻼﻫﺎﺕ ﺋﯧﻠﯩﭗ ﺑﯧﺮﯨﺸﻘﺎ ﯞﻩﺩﻩ ﺑﻪﺭﮔﻪﻥ ﺑﻮﻟﺴﯩﻤﯘ، ﺋﻪﻣﻤﺎ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺩﻩﭘﺴﻪﻧﺪﻩ ﻗﯩﻠﯩﺸﻨﻰ ﺑﺎﺭﻏﺎﻧﭽﻪ ﺋﯧﻐﯩﺮﻻﺷﺘﯘﺭﻣﺎﻗﺘﺎ، ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﺧﯩﺘﺎﻱ ﻗﺎﻧﯘﻥ- ﺗﯜﺯﯛﻟﻤﯩﺴﻰ ﺳﯩﻴﺎﺳﯩﻲ ﻣﻪﻗﺴﻪﺗﻨﻰ ﺋﯩﺸﻘﺎ ﺋﺎﺷﯘﺭﯗﺷﺘﯩﻜﻰ ﺑﯩﺮ ﺧﯩﻞ ﯞﺍﺳﯩﺘﻪ

ﺩﻭﻛﻼﺗﻨﯩﯔ ﺧﯩﺘﺎﻱ ﻗﺎﻧﯘﻥ- ﺗﯜﺯﯛﻟﻤﯩﺴﯩﻨﻰ ﺳﯩﻴﺎﺳﯩﻲ ﻣﻪﻗﺴﻪﺗﻨﻰ ﺋﯩﺸﻘﺎ ﺋﺎﺷﯘﺭﯗﺷﺘﯩﻜﻰ ﺑﯩﺮ ﺧﯩﻞ ﯞﺍﺳﯩﺘﻪ ﺳﯜﭘﯩﺘﯩﺪﻩ ﺋﯩﺸﻠﯩﺘﯩﻠﯩﺪﯨﻐﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ ﻗﯩﺴﻤﯩﺪﺍ، ﺧﯩﺘﺎﻳﺪﺍ "ﺩﯙﻟﻪﺗﻨﻰ ﭘﺎﺭﭼﯩﻼﺵ " ،"ﺟﻪﻣﺌﯩﻴﻪﺕ ﻣﯘﻗﯩﻤﻠﯩﻘﯩﻨﻰ ﺑﯘﺯﯗﺵ" ﯞﻩ "ﺋﺎﻏﺪﯗﺭﻣﯩﭽﯩﻠﯩﻖ" ﻗﺎﺗﺎﺭﻟﯩﻖ ﺟﯩﻨﺎﻳﻪﺗﻠﻪﺭ ﺑﯩﻠﻪﻥ ﺋﻪﻳﯩﺒﻠﻪﻧﮕﻪﻥ ﺟﯩﻨﺎﻳﻪﺗﭽﯩﻠﻪﺭﻧﯩﯔ ﺋﺎﺩﯞﻭﻛﺎﺕ ﺗﯘﺗﯘﺷﻰ ﻗﯩﻴﯩﻦ ﺑﻮﻟﯩﺪﯨﻐﺎﻧﻠﯩﻘﻰ، ﺋﯘﻻﺭ ﺋﯜﺳﺘﯩﺪﯨﻦ ﺋﻮﭼﯘﻕ ﺳﻮﺕ ﺋﯧﭽﯩﻠﻤﺎﻳﺪﯨﻐﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ ﺑﻮﻟﺴﺎ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﺎﻟﺪﯨﻨﻘﻰ ﺑﯩﺮ ﻧﻪﭼﭽﻪ ﻳﯩﻠﻼﺭﺩﯨﻦ ﺑﯘﻳﺎﻥ ﺳﯩﻴﺎﺳﯩﻲ ﭘﺎﺋﺎﻟﯩﻴﻪﺗﭽﯩﻠﻪﺭﻧﻰ "ﺩﯙﻟﻪﺕ ﺑﯩﺨﻪﺗﻪﺭﻟﯩﻜﯩﮕﻪ ﺩﻩﺧﻠﻰ ﻳﻪﺗﻜﯜﺯﯛﺵ ﻗﯩﻠﻤﯩﺸﻠﯩﺮﻯ" ﺑﯩﻠﻪﻥ ﺋﻪﻣﻪﺱ، ﺑﻪﻟﻜﻰ "ﺋﺎﻟﺪﺍﻣﭽﯩﻠﯩﻖ ﻗﯩﻠﯩﺶ"، "ﺑﺎﺝ ﺋﻮﻏﺮﯨﻼﺵ" ﯞﻩ "ﭼﯧﮕﺮﯨﺪﯨﻦ ﻗﺎﻧﯘﻧﺴﯩﺰ ﺋﯚﺗﯜﺵ" ﺩﯦﮕﻪﻧﮕﻪ ﺋﻮﺧﺸﺎﺵ ﺟﯩﻨﺎﻳﻪﺗﻠﻪﺭ ﺑﯩﻠﻪﻥ ﺟﺎﺯﺍﻻﭖ ﻛﯧﻠﯩﯟﺍﺗﻘﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ.

ﺩﻭﻛﻼﺗﺘﺎ ﻣﯘﻧﺪﺍﻕ ﺩﯦﻴﯩﻠﮕﻪﻥ: "ﺧﯩﺘﺎﻱ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﺴﻰ ﺋﯚﺯﯨﻨﯩﯔ ﺋﺎﻟﯩﻲ ﺋﻮﺭﻧﯩﻐﺎ ﺗﻪﻫﺪﯨﺖ ﺩﻩﭖ ﻗﺎﺭﯨﻐﺎﻥ ﻛﯩﺸﯩﻠﻪﺭﮔﻪ ﻧﯩﺴﺒﻪﺗﻪﻥ، ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﻗﺎﻧﯘﻧﯩﻲ ﺳﯩﺴﺘﯧﻤﯩﻨﻰ ﺑﯩﺮ ﺧﯩﻞ ﻗﺎﺗﺘﯩﻖ ﻗﻮﺭﺍﻝ ﺳﯜﭘﯩﺘﯩﺪﻩ ﺋﯩﺸﻠﯩﺘﯩﺪﯗ."

ﺧﯩﺘﺎﻳﺪﺍ، ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﺭﯨﻘﺎﺑﻪﺕ ﺋﯧﻠﯩﭗ ﻛﯧﻠﯩﺪﯗ ﺩﻩﭖ ﻗﺎﺭﺍﻟﻐﺎﻥ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭ ﻫﻮﻗﯘﻗﻰ ﺑﺎﺳﺘﯘﺭﯗﻟﯩﺪﯗ

ﺩﻭﻛﻼﺗﻨﯩﯔ ﺧﯩﺘﺎﻳﺪﯨﻜﻰ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﻣﯩﻠﻠﯩﻲ ﻫﻮﻗﯘﻗﯩﻐﺎ ﺋﺎﺋﯩﺖ ﻗﯩﺴﻤﯩﺪﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺑﻪﺯﻯ ﻫﻮﻗﯘﻗﻠﯩﺮﯨﻨﻰ ﺗﻮﻧﯘﻳﺪﯨﻐﺎﻧﻠﯩﻘﯩﻨﻰ ﯞﻩ ﻗﻮﻟﻼﻳﺪﯨﻐﺎﻧﻠﯩﻘﯩﻨﻰ ﺋﻪﻣﻤﺎ، ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﺭﯨﻘﺎﺑﻪﺕ ﺋﯧﻠﯩﭗ ﻛﯧﻠﯩﺪﯗ ﺩﻩﭖ ﻗﺎﺭﺍﻟﻐﺎﻥ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭ ﻫﻮﻗﯘﻗﯩﻨﯩﯔ ﺑﺎﺳﺘﯘﺭﯗﻟﯩﺪﯨﻐﺎﻧﻠﯩﻘﯩﻨﻰ ﻛﯚﺭﺳﯩﺘﯩﭗ: "ﺷﯩﻨﺠﺎﯓ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ، ﺋﯩﭽﻜﻰ ﻣﻮﯕﻐﯘﻝ ﺋﺎﭘﺘﻮﻧﻮﻡ، ﺗﯩﺒﻪﺕ ﺋﺎﭘﺘﻮﻧﻮﻡ ﺭﺍﻳﻮﻧﻰ ﻗﺎﺗﺎﺭﻟﯩﻖ ﺭﺍﻳﻮﻧﻼﺭﺩﺍ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﻫﻮﻗﯘﻗﻠﯩﺮﯨﻨﯩﯔ ﺧﯩﺘﺎﻱ ﻫﺎﻛﯩﻤﯩﻴﯩﺘﯩﮕﻪ ﺭﯨﻘﺎﺑﻪﺕ ﺋﯧﻠﯩﭗ ﻛﯧﻠﯩﺪﯨﻐﺎﻥ ﺗﻪﺭﻩﭘﻠﯩﺮﻯ، ﺑﺎﺳﺘﯘﺭﯗﻟﯩﺪﯗ" ﺩﻩﭖ ﺗﻪﻛﯩﺘﻠﻪﻧﮕﻪﻥ.

ﺩﻭﻛﻼﺗﻨﯩﯔ ﺑﯘ ﻗﯩﺴﻤﯩﺪﺍ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺗﯧﺮﺭﻭﺭﻟﯘﻗﻘﺎ ﻗﺎﺭﺷﻰ ﺋﯘﺭﯗﺷﻨﻰ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺋﯚﺯ ﻫﻪﻕ-ﻫﻮﻗﯘﻗﻠﯩﺮﯨﻨﻰ ﺗﻪﻟﻪﭖ ﻗﯩﻠﯩﭗ ﺋﯧﻠﯩﭗ ﺑﺎﺭﻏﺎﻥ ﺗﯩﻨﭻ ﻳﻮﺳﯘﻧﺪﯨﻜﻰ ﻧﺎﻣﺎﻳﯩﺸﻠﯩﺮﯨﻨﻰ ﻗﺎﺗﺘﯩﻖ ﺑﺎﺳﺘﯘﺭﯗﺷﺘﯩﻜﻰ ﻛﻮﺯﯨﺮ ﻗﯩﻠﯩﭗ ﺋﯩﺸﻠﻪﺗﻜﻪﻧﻠﯩﻜﻰ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺷﯘ ﺧﯩﻠﺪﯨﻜﻰ ﻫﻪﺭﯨﻜﻪﺗﻠﯩﺮﯨﻨﻰ "ﺑﯚﻟﮕﯜﻧﭽﯩﻠﯩﻚ" ﻳﺎﻛﻰ " ﺩﯙﻟﻪﺕ ﻫﺎﻛﯩﻤﯩﻴﯩﺘﯩﮕﻪ ﺗﻪﻫﺪﯨﺖ" ﺩﻩﭖ ﺳﯜﺭﻩﺗﻠﻪﭖ ﺑﻪﺯﻯ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺭﻏﯩﺒﺎﺗﭽﯩﻠﯩﺮﯨﻨﻰ ﺗﯜﺭﻣﯩﮕﻪ ﺗﺎﺷﻠﯩﻐﺎﻧﻠﯩﻘﻰ ﻛﯚﺭﺳﯩﺘﯩﻠﮕﻪﻥ.

" ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﻯ ﺋﯘﻳﻐﯘﺭ ﻣﯩﻠﻠﯩﻲ ﻛﯩﻤﻠﯩﻜﯩﻨﯩﯔ ﻛﯚﭖ ﺗﻪﺭﻩﭘﻠﯩﺮﯨﮕﻪ ﭼﻮﯕﻘﯘﺭ ﺳﯩﯖﯩﭗ ﻛﻪﺗﻜﻪﻥ"

ﺩﻭﻛﻼﺗﺘﺎ ﻣﯘﻧﺪﺍﻕ ﻛﯚﺭﺳﯩﺘﯩﻠﮕﻪﻥ: "ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﻣﯩﻠﻠﯩﻲ ﻛﯩﻤﻠﯩﻜﯩﻨﻰ ﺋﯩﭙﺎﺩﯨﻠﻪﻳﺪﯨﻐﺎﻥ ﺳﯩﻴﺎﺳﯩﻲ ﻛﯚﺯ ﻗﺎﺭﺍﺷﻠﯩﺮﯨﻨﻰ ﺑﯩﺘﭽﯩﺖ ﻗﯩﻠﯩﺶ ﺋﯜﭼﯜﻥ، 1990 - ﻳﯩﻠﻼﺭﺩﯨﻦ ﺑﺎﺷﻼﭖ ﻫﻪﺭﺧﯩﻞ ﻫﻪﺭﯨﻜﻪﺗﻠﯩﺮﯨﻨﻰ ﺋﯧﻠﯩﭗ ﺑﺎﺭﻏﺎﻥ ﺧﯩﺘﺎﻱ ﻫﯚﻛﯜﻣﯩﺘﻰ، 2001- ﻳﯩﻠﯩﺪﯨﻦ ﺑﯘﻳﺎﻥ ﺷﯩﻨﺠﺎﯓ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﯨﻨﻰ ﺗﯧﺨﯩﻤﯘ ﺋﯧﻐﯩﺮﻻﺷﺘﯘﺭﺩﻯ. ﺑﯘ ﺭﺍﻳﻮﻧﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻠﯩﺮﻯ ﯞﻩ ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﻯ ﺋﯘﻳﻐﯘﺭ ﻣﯩﻠﻠﯩﻲ ﻛﯩﻤﻠﯩﻜﯩﻨﯩﯔ ﻛﯚﭖ ﺗﻪﺭﻩﭘﻠﯩﺮﯨﮕﻪ ﭼﻮﯕﻘﯘﺭ ﺳﯩﯖﯩﭗ ﻛﻪﺗﻜﻪﻥ."

ﺩﻭﻛﻼﺗﻨﯩﯔ ﺑﯘ ﻗﯩﺴﯩﻤﺪﺍ، ﺧﯩﺘﺎﻱ ﻳﻪﺭﻟﯩﻚ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﻣﯩﻠﻠﯩﻲ ﺗﯩﻞ ﻣﺎﺋﺎﺭﯨﭙﯩﻨﯩﯔ ﻛﯚﻟﯩﻤﯩﻨﻰ ﺑﺎﺭﻏﺎﻧﭽﻪ ﺋﺎﺯﺍﻳﺘﯩﭗ، ﺋﺎﺯ ﺳﺎﻧﻠﯩﻖ ﻣﯩﻠﻠﻪﺕ ﺋﻮﻗﯘﺗﻘﯘﭼﯩﻼﺭ ﻗﻮﺷﯘﻧﯩﻨﻰ ﻛﯧﺮﻩﻛﺴﯩﺰ ﻗﯩﻠﻐﺎﻧﻠﯩﻘﻰ، ﺋﯚﺯﯨﻨﯩﯔ ﻧﺎﺭﺍﺯﯨﻠﯩﻖ ﭘﯩﻜﯩﺮﻟﯩﺮﯨﻨﻰ ﺗﯩﻨﭻ ﻳﻮﺳﯘﻧﺪﺍ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺋﯘﻳﻐﯘﺭﻻﺭﻧﯩﯔ ﺋﯩﺰ ﭼﯩﻞ ﺗﯜﺭﻣﯩﮕﻪ ﺗﺎﺷﻠﯩﻨﯩﭗ ﻛﯧﻠﯩﻨﮕﻪﻧﻠﯩﻜﻰ ﻛﯚﺭﺳﯩﺘﯩﻠﮕﻪﻥ.

ﺩﻭﻛﻼﺗﻨﯩﯔ ﺑﯘ ﻗﯩﺴﻤﯩﺪﺍ ﻳﻪﻧﻪ، ﮔﻪﺭﭼﻪ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﻣﯩﻠﻠﯩﻲ ﻫﻪﺭﯨﻜﯩﺘﯩﻨﯩﯔ ﺭﻩﻫﺒﯩﺮﻯ، ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻨﻰ 2005 - ﻳﯩﻠﻰ ﺋﺎﻣﯧﺮﯨﻜﯩﻐﺎ ﺑﯧﺮﯨﭗ ﺩﺍﯞﺍﻟﯩﻨﯩﺶ ﺷﻪﺭﺗﻰ ﺑﯩﻠﻪﻥ ﻛﯧﭙﯩﻠﻠﯩﻜﻜﻪ ﻗﻮﻳﯘﭖ ﺑﻪﺭﮔﻪﻥ ﺑﻮﻟﺴﯩﻤﯘ، ﻟﯧﻜﯩﻦ، ﺭﺍﺑﯩﻴﻪ ﺧﺎﻧﯩﻤﻨﯩﯔ ﺋﺎﻣﯧﺮﯨﻜﯩﺪﺍ ﺋﯧﻠﯩﭗ ﺑﺎﺭﻏﺎﻥ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﻠﯩﺮﯨﮕﻪ ﻗﺎﺭﯨﺘﺎ ﺋﯚﭺ ﺋﯧﻠﯩﺶ ﻣﻪﻗﺴﯩﺘﯩﺪﻩ ﺋﯘﻧﯩﯔ ﺗﯧﺨﯩﭽﻪ ﺋﯘﻳﻐﯘﺭ ﺋﯧﻠﯩﺪﻩ ﻳﺎﺷﺎﯞﺍﺗﻘﺎﻥ ﺋﺎﺋﯩﻠﻪ- ﺗﺎﯞﺍﺑﯩﺌﺎﺗﻠﯩﺮﯨﻨﻰ ﭘﺎﺭﺍﻛﻪﻧﺪﻩ ﻗﯩﻠﯩﺶ ﻫﻪﺭﯨﻜﯩﺘﯩﻨﻰ ﺑﺎﺷﻠﯩﯟﻩﺗﻜﻪﻧﻠﯩﻜﯩﻨﻰ ﯞﻩ 2007- ﻳﯩﻠﻰ ﺧﺎﻧﯩﻤﻨﯩﯔ ﺋﻮﻏﯘﻟﻠﯩﺮﯨﺪﯨﻦ ﺋﺎﺑﻠﯩﻜﯩﻢ ﺋﺎﺑﺪﯗﺭﯦﻬﯩﻢ ﯞﻩ ﺋﺎﻟﯩﻢ ﺋﺎﺑﺪﯗﺭﯦﻬﯩﻤﻼﺭﻧﻰ ﻗﻮﻟﻐﺎ ﺋﯧﻠﯩﭗ ﺋﺎﻳﺮﯨﻢ - ﺋﺎﻳﺮﯨﻐﺎﻧﺪﺍ 9 ﯞﻩ 7 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﻐﺎﻧﻠﯩﻘﻰ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ.

ﺩﻭﻛﻼﺗﺘﺎ، ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﮕﻪ ﯞﻩ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﯨﻐﺎ 4 ﺗﯜﺭﻟﯜﻙ ﺗﻪﻛﻠﯩﭗ ﺑﯧﺮﯨﻠﮕﻪﻥ. (ﺟﯜﻣﻪ)