ﻛﯩﺸﯩﻠﯩﻚ ﻫﻮﻗﯘﻗﻰ ﺗﻪﺷﻜﯩﻼﺗﻠﯩﺮﻯ: ﺋﻮﻟﯩﻤﭙﯩﻚ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﯩﯔ ﻳﺎﺧﺸﯩﻠﯩﻨﯩﺸﯩﺪﺍ ﻛﺎﺗﺎﻟﯩﺰﺍﺗﻮﺭ ﺭﻭﻟﯩﻨﻰ ﺋﻮﻳﻨﯩﻤﯩﺪﻯ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻨﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻳﻨﯩﯔ ﺗﯩﺒﻪﺕ ﻧﺎﻣﺎﻳﯩﺸﭽﯩﻠﯩﺮﯨﻨﻰ ﯞﻩ ﺋﯚﻛﺘﯩﭽﻰ ﺯﺍﺗﻼﺭﻧﻰ ﺑﯩﺮ ﺗﻪﺭﻩﭖ ﻗﯩﻠﯩﺶ ﺋﯘﺳﯘﻟﯩﺪﯨﻦ ﺋﯜﻣﯩﺪﺳﯩﺰﻟﻪﻧﮕﻪﻥ ﺑﻪﺯﻯ ﺧﻪﻟﻘﺌﺎﺭﺍ ﺗﻪﺷﻜﯩﻼﺗﻼﺭ، ﺧﯩﺘﺎﻳﻨﻰ ﻛﯩﺸﯩﻠﯩﻚ ﻫﻮﻗﯘﻕ ﯞﻩﺩﯨﺴﯩﺪﻩ ﺳﺎﺧﺘﯩﭙﻪﺯﻟﯩﻚ ﻗﯩﻠﯩﺶ ﺑﯩﻠﻪﻥ ﺋﻪﻳﯩﭙﻠﯩﺴﻪ، ﻳﻪﻧﻪ ﺑﻪﺯﻯ ﺗﻪﺷﻜﯩﻼﺗﻼﺭ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﻰ ﺗﻪﻧﻘﯩﺪﻟﯩﻤﻪﻛﺘﻪ. ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﻮﻟﯩﻤﭙﯩﻚ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﯩﯔ ﻳﺎﺧﺸﯩﻠﯩﻨﯩﺸﯩﺪﺍ ﻛﺎﺗﺎﻟﯩﺰﺍﺗﻮﺭ ﺭﻭﻟﯩﻨﻰ ﺋﻮﻳﻨﺎﻳﺪﯗ، ﺩﯦﮕﯜﭼﯩﻠﻪﺭﻧﯩﯔ ﺧﺎﺗﺎﻻﺷﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ. ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﺑﻮﻟﺴﺎ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﻰ ﺋﻪﻳﯩﺒﻠﯩﻤﻪﻛﺘﻪ.

ﺧﯩﺘﺎﻱ، " ﺋﻮﻟﯩﻤﭙﯩﻚ ﺑﯩﺰﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻠﯩﺸﯩﻤﯩﺰﻏﺎ ﺗﯜﺭﺗﻜﻪ ﺑﻮﻟﯩﺪﯗ،" ﺩﯦﮕﻪﻥ

ﺧﯩﺘﺎﻱ 2001 ‏- ﻳﯩﻠﻰ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯚﺗﻜﯜﺯﯛﺵ ﻫﻮﻗﯘﻗﯩﻨﻰ ﺗﺎﻻﺷﻘﺎﻧﺪﺍ ﺑﯧﻴﺠﯩﯔ ﺷﻪﻫﻪﺭ ﺑﺎﺷﻠﯩﻘﻰ ﻟﻴﯘ ﭼﻰ، ﺋﻪﮔﻪﺭ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺑﯧﻴﺠﯩﯖﺪﺍ ﺋﯚﺗﻜﯜﺯﯛﻟﺴﻪ " ﺑﯘ ﺑﯩﺰﻧﯩﯔ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻠﯩﺸﯩﻤﯩﺰﻏﺎ ﺗﯜﺭﺗﻜﻪ ﺑﻮﻟﯩﺪﯗ " ﺩﻩﭖ ﯞﻩﺩﻩ ﺑﻪﺭﮔﻪﻥ ﯞﻩ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺧﻪﻟﻘﺌﺎﺭﺍ ﺋﻮﺭﮔﺎﻧﻼﺭ، ﺷﻪﺧﺴﻠﻪﺭ ﯞﻩ ﺩﯙﻟﻪﺗﻠﻪﺭ ﺋﻮﻟﯩﻤﭙﯩﻜﻨﯩﯔ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﯩﻨﯩﯔ ﻳﺎﺧﺸﯩﻠﯩﻨﯩﺸﯩﺪﺍ ﻛﺎﺗﺎﻟﯩﺰﺍﺗﻮﺭ ﺭﻭﻟﻰ ﺋﻮﻳﻨﺎﻳﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺋﯩﺪﻯ. ﻟﯧﻜﯩﻦ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﺎﻟﺪﯨﻨﻘﻰ ﻛﯜﻧﻰ ﺋﯧﻼﻥ ﻗﯩﻠﻐﺎﻥ ﺑﯩﺮ ﺩﻭﻛﻼﺗﯩﺪﺍ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻳﯧﻘﯩﻨﻘﻰ ﯞﻩﻗﻪﻟﻪﺭﮔﻪ ﺗﯘﺗﻘﺎﻥ ﭘﻮﺯﯨﺘﺴﯩﻴﯩﺴﻰ ﯞﻩ ﺗﯩﺒﻪﺕ ﻧﺎﻣﺎﻳﯩﺸﭽﯩﻼﺭﻧﻰ ﺑﺎﺳﺘﯘﺭﯗﺵ ﻫﻪﺭﯨﻜﯩﺘﻰ ﺋﻮﻟﯩﻤﭙﯩﻜﻨﯩﯔ " ﻛﺎﺗﺎﻟﯩﺰﺍﺗﻮﺭ "ﻟﯘﻕ ﺭﻭﻝ ﺋﻮﻳﻨﺎﺵ ﺋﺎﺭﺯﯗﺳﯩﻨﻰ ﻳﻮﻗﻘﺎ ﭼﯩﻘﺎﺭﻏﺎﻧﻠﯩﻘﯩﻨﻰ، ﻛﯩﺸﯩﻠﻪﺭﺩﻩ ﺧﯩﺘﺎﻳﻨﯩﯔ ﯞﻩﺩﯨﺴﻰ ﺳﺎﺧﺘﺎ ﺋﯩﻜﻪﻧﻠﯩﻚ ﺗﯘﻳﻐﯘﺳﻰ ﻳﺎﺭﺍﺗﻘﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺩﻭﻛﻼﺗﯩﺪﺍ ﺋﻪﮔﻪﺭ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ، ﭼﻪﺗﺌﻪﻟﻠﯩﻚ ﺭﻩﻫﺒﻪﺭﻟﻪﺭ ﯞﻩ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻐﺎ ﻗﺎﺗﻨﯩﺸﯩﺪﯨﻐﺎﻥ ﭼﻪﺗﺌﻪﻟﻠﯩﻚ ﻛﺎﺭﺧﺎﻧﯩﻼﺭ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﻨﻰ ﺗﻪﻧﻘﯩﺪ ﻗﯩﻠﻤﯩﺴﺎ، ﺩﻩﭘﺴﻪﻧﺪﯨﭽﯩﻠﯩﻜﻜﻪ ﻫﻪﻣﺸﯧﺮﯨﻚ ﺑﻮﻟﻐﺎﻥ ﺑﻮﻟﯘﭖ ﻗﺎﻟﯩﺪﯗ، ﺩﻩﭖ ﺋﺎﮔﺎﻫﻼﻧﺪﯗﺭﯨﺪﯗ. ﺩﻭﻛﻼﺗﺘﺎ ﺧﯩﺘﺎﻳﻨﯩﯔ ﺋﻪﺳﻠﻰ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﺪﺍ ﺋﯩﻘﺘﯩﺴﺎﺩﻯ ﺗﻪﺭﻩﻗﻘﯩﻴﺎﺗﻰ ﯞﻩ ﺧﻪﻟﻘﻨﯩﯔ ﺋﯩﻨﺎﻗﻠﯩﻘﯩﻨﻰ ﻧﺎﻣﺎﻳﻪﻥ ﻗﯩﻠﻤﺎﻗﭽﻰ ﺑﻮﻟﻐﺎﻧﻠﯩﻘﻰ، ﻟﯧﻜﯩﻦ ﺳﯘﺩﺍﻥ ﻫﯚﻛﯜﻣﯩﺘﯩﻨﻰ ﻗﻮﻟﻼﺵ، ﻣﻪﻣﻠﯩﻜﻪﺕ ﺋﯩﭽﯩﺪﯨﻜﻰ ﻛﯩﺸﯩﻠﯩﻚ ﻫﻮﻗﯘﻕ ﯞﻩﺯﯨﻴﯩﺘﻰ ﺗﯜﭘﻪﻳﻠﻰ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﯩﯔ ﺋﯧﻐﯩﺮ ﺑﯧﺴﯩﻤﯩﻐﺎ ﺩﯗﭺ ﻛﻪﻟﮕﻪﻧﻠﯩﻜﯩﻨﻰ، ﺗﯩﺒﻪﺗﺘﯩﻜﻰ ﯞﻩﻗﻪ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﻨﯩﯔ ﺗﯩﭙﯩﻚ ﻣﯩﺴﺎﻟﻰ ﻫﯧﺴﺎﺑﻠﯩﻨﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ.

ﺑﯘ ﺗﻮﻏﺮﯨﺴﯩﺪﺍ ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺋﺎﺳﯩﻴﺎ ﺑﯚﻟﯜﻣﯩﻨﯩﯔ ﻣﻪﺳﺌﯘﻟﻰ ﻛﯧﺴﯩﻠﯩﻦ ﺑﯧﻠﺒﻮﺭ ﺧﺎﻧﯩﻢ ﻣﯘﻧﺪﺍﻕ ﺩﻩﻳﺪﯗ، " ﺋﻮﻟﯩﻤﭙﯩﻜﻨﯩﯔ ﻳﯧﺘﯩﭗ ﻛﯧﻠﯩﺸﯩﮕﻪ ﺋﻪﮔﯩﺸﯩﭗ، ﺧﯩﺘﺎﻱ ﻫﯚﻛﯜﻣﯩﺘﻰ ﻛﯩﺸﯩﻠﯩﻚ ﻫﻮﻗﯘﻗﻰ ﭘﺎﺋﺎﻟﯩﻴﻪﺗﭽﯩﻠﯩﺮﯨﮕﻪ ﺯﻩﺭﺑﻪ ﺑﯧﺮﯨﺸﻨﻰ ﻛﯜﭼﻪﻳﺘﺘﻰ. ﻳﯧﻘﯩﻨﻘﻰ ﺑﻪﺯﻯ ﯞﻩﻗﻪﻟﻪﺭﮔﻪ ﻗﺎﺭﯨﻐﺎﻧﺪﺍ ﺋﻮﻟﯩﻤﭙﯩﻚ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﭘﺎﺋﺎﻟﯩﻴﻪﺗﭽﯩﻠﻪﺭ ﯞﻩ ﺯﺍﺗﻼﺭﻏﯩﻤﯘ ﺳﻪﯞﺭ ﺗﺎﻗﻪﺕ ﻗﯩﻠﯩﻨﻤﯩﻐﺎﻥ. ﻳﺎﯓ ﭼﯜﻧﻠﯩﻦ ﯞﻩﻗﻪﺳﻰ ﺑﯘﻧﯩﯔ ﺑﯩﺮ ﻣﯩﺴﺎﻟﻰ. ﭼﯜﻧﻜﻰ ﺋﯘ "ﺋﻮﻟﯩﻤﭙﯩﻚ ﻛﯧﺮﻩﻙ ﺋﻪﻣﻪﺱ، ﻛﯩﺸﯩﻠﯩﻚ ﻫﻮﻗﯘﻕ ﻛﯧﺮﻩﻙ،"ﺩﻩﭖ ﻗﻮﻳﻐﺎﻧﻠﯩﻘﻰ ﺋﯜﭼﯜﻥ 5 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﯩﻨﺪﻯ. ﻳﯧﻘﯩﻨﺪﺍ ﺗﯩﺒﻪﺕ ﻧﺎﻣﺎﻳﯩﺸﭽﯩﻠﯩﺮﯨﻨﯩﯔ ﺷﯩﺪﺩﻩﺗﻠﯩﻚ ﺑﺎﺳﺘﯘﺭﯗﻟﯘﺷﻰ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﮕﻪ ﺩﺍﺋﯩﺮ ﻳﻪﻧﻪ ﺑﯩﺮ ﺗﯩﭙﯩﻚ ﻣﯩﺴﺎﻟﺪﯗﺭ ."

" ﺧﯩﺘﺎﻳﻨﯩﯔ ﺧﻮﺗﻪﻧﺪﯨﻜﻰ ﺋﺎﻳﺎﻟﻼﺭ ﻧﺎﻣﺎﻳﯩﺸﯩﻨﻰ ﺑﺎﺳﺘﯘﺭﻏﺎﻧﻠﯩﻘﻰ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﯩﻨﯩﯔ ﺗﯩﭙﯩﻚ ﻣﯩﺴﺎﻟﻰ"

ﻳﺎﯓ ﭼﯜﻧﻠﯩﻦ ﺧﯧﻴﻠﯘﯕﺠﻴﺎﯓ ﺋﯚﻟﻜﯩﺴﯩﺪﯨﻜﻰ ﺩﯦﻬﻘﺎﻧﻼﺭ ﻫﻮﻗﯘﻗﯩﻨﻰ ﻗﻮﻏﺪﯨﻐﯘﭼﻰ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻕ ﺋﺎﻛﺘﯩﭙﻠﯩﺮﯨﻨﯩﯔ ﺑﯩﺮﻯ ﺋﯩﺪﻯ. ﺋﯘﻧﯩﯔ ﺟﯘﯕﮕﻮﻟﯘﻗﻼﺭﻏﺎ " ﺋﻮﻟﯩﻤﭙﯩﻚ ﻛﯧﺮﻩﻙ ﺋﻪﻣﻪﺱ، ﻛﯩﺸﯩﻠﯩﻚ ﻫﻮﻗﯘﻕ ﻻﺯﯨﻢ " ﺩﯦﮕﻪﻥ ﺳﯚﺯﻯ ﺋﯜﭼﯜﻥ ﺧﯧﻴﻠﻮﯕﺠﻴﺎﯕﺪﯨﻜﻰ ﺑﯩﺮ ﺳﻮﺕ ﻣﻪﻫﻜﯩﻤﯩﺴﻰ ﺋﯘﻧﻰ"ﻫﺎﻛﯩﻤﯩﻴﻪﺗﻨﻰ ﺋﺎﻏﺪﯗﺭﯗﺷﻘﺎ ﻛﯜﺷﻜﯜﺭﺗﯜﺵ" ﺟﯩﻨﺎﻳﯩﺘﻰ ﺑﯩﻠﻪﻥ ﺋﻪﻳﯩﺒﻠﻪﭖ، 5 ﻳﯩﻠﻠﯩﻖ ﻗﺎﻣﺎﻕ ﺟﺎﺯﺍﺳﯩﻐﺎ ﻫﯚﻛﯜﻡ ﻗﯩﻠﻐﺎﻥ. ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺋﻮﻟﯩﻤﭙﯩﻚ ﻫﺎﺭﭘﯩﺴﯩﺪﯨﻜﻰ " ﺗﺎﺯﯨﻼﺵ ﻫﻪﺭﯨﻜﯩﺘﻰ"ﺩﻩ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﻰ ﺟﯩﻤﯩﻘﺘﯘﺭﯗﯞﺍﺗﻘﺎﻧﻠﯩﻘﻰ ﯞﻩ ﺗﯜﺭﻣﯩﮕﻪ ﺗﺎﺷﻼﯞﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ ﺷﯘﻧﺪﺍﻗﻼ ﺗﯩﺒﻪﺕ ﻧﺎﻣﺎﻳﯩﺸﭽﯩﻠﯩﺮﯨﻨﯩﯔ ﺑﺎﺳﺘﯘﺭﯗﻟﯘﺷﯩﻨﻰ ﻛﯩﺸﯩﻠﯩﻚ ﻫﻮﻗﯘﻗﻨﯩﯔ ﺋﯧﻐﯩﺮ ﺩﻩﺭﯨﺠﯩﺪﻩ ﺩﻩﭘﺴﻪﻧﺪﻩ ﻗﯩﻠﯩﻨﯩﺸﻰ، ﺩﻩﭖ ﺋﻪﺳﻜﻪﺭﺗﺘﻰ. ﻛﺎﻧﺎﺩﺍ ﺋﯘﻳﻐﯘﺭ ﺟﻪﻣﺌﯩﻴﯩﺘﯩﻨﯩﯔ ﺭﻩﺋﯩﺴﻰ ﺭﯗﻗﯩﻴﻪ ﺗﯘﺭﺩﯗﺵ ﺧﺎﻧﯩﻢ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﻫﻪﺭﯨﻜﯩﺘﻰ ﻛﯩﺸﯩﻠﻪﺭﺩﻩ ﺑﯧﻴﺠﯩﯔ ﻫﯚﻛﯜﻣﯩﺘﯩﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻼﺵ ﻫﻪﻗﻘﯩﺪﯨﻜﻰ ﺋﻮﻟﯩﻤﭙﯩﻚ ﯞﻩﺩﯨﺴﯩﺪﻩ ﺗﯘﺭﯗﺵ ﻧﯩﻴﯩﺘﻰ ﺑﺎﺭﻟﯩﻘﯩﻐﺎ ﮔﯘﻣﺎﻥ ﭘﻪﻳﺪﺍ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﭗ، ﺩﺍﺋﯩﺮﯨﻠﻪﺭﻧﯩﯔ ﻳﯧﻘﯩﻨﺪﺍ ﺧﻮﺗﻪﻧﺪﯨﻜﻰ ﺋﺎﻳﺎﻟﻼﺭ ﻧﺎﻣﺎﻳﯩﺸﯩﻨﻰ ﺑﺎﺳﺘﯘﺭﻏﺎﻧﻠﯩﻘﻰ ﺑﯘ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﯩﻨﯩﯔ ﺗﯩﭙﯩﻚ ﻣﯩﺴﺎﻟﻰ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﻳﯧﻘﯩﻨﺪﺍ ﺧﻮﺗﻪﻥ ﺷﻪﻫﯩﺮﯨﺪﻩ ﺋﯘﻳﻐﯘﺭ ﺋﺎﻳﺎﻟﻠﯩﺮﯨﻨﯩﯔ ﺯﯨﻴﺎﻧﻜﻪﺷﻠﯩﻜﻜﻪ ﻗﺎﺭﺷﻰ ﺗﯘﺭﯗﺵ، ﺩﯨﻨﯩﻲ ﺋﻪﺭﻛﯩﻨﻠﯩﻚ ﺗﻪﻟﻪﭖ ﻗﯩﻠﯩﺶ ﻧﺎﻣﺎﻳﯩﺸﻰ ﻳﯜﺯ ﺑﻪﺭﮔﻪﻥ ﺋﯩﺪﻯ. ﺩﺍﺋﯩﺮﯨﻠﻪﺭ ﺋﺎﻟﺪﯨﺪﺍ ﺑﯘ ﺧﻪﯞﻩﺭﻧﻰ ﺋﯩﻨﻜﺎﺭ ﻗﯩﻠﺪﻯ، ﻟﯧﻜﯩﻦ ﺳﻪﻳﺸﻪﻧﺒﻪ ﻛﯜﻧﻰ ﻧﺎﻣﺎﻳﯩﺶ ﺗﻮﻏﺮﯨﺴﯩﺪﺍ ﺑﺎﻳﺎﻧﺎﺕ ﺋﯧﻼﻥ ﻗﯩﻠﯩﭗ، ﺧﻮﺗﻪﻥ ﺷﻪﻫﯩﺮﯨﺪﯨﻜﻰ ﭼﻮﯓ ﺑﺎﺯﺍﺭﺩﺍ ﻳﯜﺯ ﺑﻪﺭﮔﻪﻥ ﻧﺎﻣﺎﻳﯩﺸﻨﻰ " ﺋﯜﭺ ﺧﯩﻞ ﻛﯜﭼﻠﻪﺭ"ﻧﯩﯔ ﺋﺎﻣﻤﯩﻨﻰ ﻛﯜﺷﻜﯜﺭﺗﯜﺵ ﻫﻪﺭﯨﻜﯩﺘﻰ، ﺩﻩﭖ ﺋﻪﻳﯩﺒﻠﯩﮕﻪﻥ ﺷﯘﻧﺪﺍﻗﻼ ﺳﺎﻗﭽﯩﻼﺭﻧﯩﯔ ﯞﻩﻗﻪﻧﻰ ﯞﺍﻗﺘﯩﺪﺍ ﺟﯩﻤﯩﻘﺘﯘﺭﻏﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ. ﺏ ﺏ ﺱ ﻧﯩﯔ ﺑﯘ ﻫﻪﻗﺘﯩﻜﻰ ﺧﻪﯞﯨﺮﯨﺪﻩ ﺧﻮﺗﻪﻥ ﻳﻪﺭﻟﯩﻚ ﻫﯚﻛﯜﻣﯩﺘﯩﻨﯩﯔ ﺑﺎﻳﺎﻧﺎﺗﭽﯩﺴﻰ ﯞﻩﻗﻪﻧﻰ ﺑﯩﺮ ﺗﯜﺭﻛﯜﻡ ﻛﯩﺸﯩﻠﻪﺭﻧﯩﯔ ﭼﻮﯓ ﺑﺎﺯﺍﺭﺩﺍ ﺗﻪﺷﯟﯨﻘﺎﺕ ﯞﻩﺭﻩﻗﯩﺴﻰ ﺗﺎﺭﻗﯩﺘﯩﺶ، ﺋﯘﻳﻐﯘﺭﻻﺭﻧﻰ ﺗﯩﺒﻪﺗﻠﻪﺭﺩﯨﻦ ﺋﯜﻟﮕﻪ ﺋﯧﻠﯩﺸﻘﺎ ﭼﺎﻗﯩﺮﯨﺶ ﯞﻩﻗﻪﺳﻰ،ﺩﻩﭖ ﺗﻪﻛﯩﺘﻠﯩﮕﻪﻥ.

" ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯩﻨﺴﺎﻧﻨﯩﯔ ﻗﻪﺩﯨﺮ - ﻗﯩﻤﻤﯩﺘﯩﻨﻰ ﻧﺎﻣﺎﻳﻪﻥ ﻗﯩﻠﯩﺸﻰ ﻛﯧﺮﻩﻙ"

ﻳﻪﻧﻪ ﺑﻪﺯﻯ ﺗﻪﺷﻜﯩﻼﺗﻼﺭ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﻰ ﺧﯩﺘﺎﻳﻨﯩﯔ ﺋﯚﺯ ﯞﻩﺩﯨﺴﯩﺪﻩ ﺗﯘﺭﻣﺎﻱ ﻛﯩﺸﯩﻠﯩﻚ ﻫﻮﻗﯘﻗﻨﻰ ﺋﯜﺯﻟﯜﻛﺴﯩﺰ ﺩﻩﭘﺴﻪﻧﺪﻩ ﻗﯩﻠﯩﺸﯩﻐﺎ ﺳﯜﻛﯜﺕ ﻗﯩﻠﯩﺶ ﺑﯩﻠﻪﻥ ﺋﻪﻳﯩﺒﻠﯩﻤﻪﻛﺘﻪ. ﺑﯘ ﺗﻪﺷﻜﯩﻼﺗﻼﺭﻧﯩﯔ ﺑﯩﺮﻯ ﻣﻪﺭﻛﯩﺰﻯ ﻧﻴﯘ ﻳﻮﺭﻛﺘﯩﻜﻰ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺋﻮﺭﮔﯩﻨﯩﺪﯗﺭ. ﻣﻪﺯﻛﯘﺭ ﺗﻪﺷﻜﯩﻼﺕ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﯩﮕﻪ ﺳﯜﻛﯜﺕ ﻗﯩﻠﯩﺸﻰ ﺋﻮﻟﯩﻤﭙﯩﻚ ﻧﯩﺰﺍﻣﻨﺎﻣﯩﺴﯩﻨﯩﯔ ﺭﻭﻫﯩﻐﺎ ﺳﻪﻝ ﻗﺎﺭﯨﻐﺎﻧﻠﯩﻘﺘﯘﺭ، ﺩﻩﭖ ﺋﻪﻳﯩﺒﻠﯩﻤﻪﻛﺘﻪ. ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﺋﺎﺳﯩﻴﺎ ﺑﯚﻟﯜﻣﯩﻨﯩﯔ ﻣﻪﺳﺌﯘﻟﻰ ﺭﯦﻲ ﺧﻪﭘﻲ، ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻰ ﺋﻪﻣﻪﺱ، ﺋﻪﻣﻤﺎ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﻩ ﻗﯩﻠﯩﻨﻐﺎﻧﺪﺍ ﭼﻮﻗﯘﻡ ﺑﯘﻧﯩﯖﻐﺎ ﺋﯩﻨﻜﺎﺱ ﻗﺎﻳﺘﯘﺭﯗﺷﻰ ﻛﯧﺮﻩﻙ، ﺩﻩﻳﺪﯗ.

ﺋﯘ، " ﺑﯩﺰ ﺋﯜﭼﯜﻥ ﺑﯘ ﻳﻪﺭﺩﯨﻜﻰ ﻣﻪﺳﯩﻠﻪ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﯩﻤﯘ - ﺋﻪﻣﻪﺳﻤﯘ، ﺩﯦﮕﻪﻥ ﻣﻪﺳﯩﻠﻪ ﺋﻪﻣﻪﺱ. ﺑﯩﺰ ﺋﯘﻧﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻰ ﺋﻪﻣﻪﺳﻠﯩﻜﯩﻨﻰ ﺑﯩﻠﯩﻤﯩﺰ. ﺋﻪﻣﻤﺎ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﺋﯩﻨﺴﺎﻧﻨﯩﯔ ﻗﻪﺩﯨﺮ - ﻗﯩﻤﻤﯩﺘﯩﻨﻰ ﻧﺎﻣﺎﻳﻪﻥ ﻗﯩﻠﯩﺸﻰ ﻛﯧﺮﻩﻙ. ﺋﻮﻟﯩﻤﭙﯩﻜﻨﯩﯔ ﺳﺎﻫﯩﺒﺨﺎﻥ ﺩﯙﻟﯩﺘﯩﺪﻩ ﺑﺎﺳﺘﯘﺭﯗﺵ ﯞﻩﻗﻪﺳﻰ ﻳﯜﺯ ﺑﻪﺭﺳﻪ، ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ ﺋﯩﻨﻜﺎﺱ ﻗﺎﻳﺘﯘﺭﯗﺵ ﻛﯧﺮﻩﻛﻤﯘ ‏- ﺋﻪﻣﻪﺳﻤﯘ ؟ ﺋﻪﮔﻪﺭ ﺋﯘ ﺳﯜﻛﯜﺕ ﻗﯩﻠﯩﺶ ﻳﻮﻟﯩﻨﻰ ﺗﺎﻟﻠﯩﯟﺍﻟﺴﺎ، ﺩﯦﻤﻪﻙ ﺋﯘﻧﯩﯔ ﺋﻪﺧﻼﻗﯩﻲ ﺑﻮﺷﻠﯘﻗﻰ ﺑﺎﺭ، ﺩﯦﮕﻪﻧﻠﯩﻜﺘﯘﺭ " ﺩﻩﭖ ﻛﯚﺭﺳﻪﺗﺘﻰ. ﻟﯧﻜﯩﻦ ﺋﯘ، ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﯩﻨﯩﯔ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ ﺑﺎﻳﻘﯘﺕ ﻗﯩﻠﯩﺸﻨﻰ ﻗﻮﻟﻠﯩﻤﺎﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ.

" ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﯩﯔ ﺋﯧﭽﯩﻠﯩﺶ ﻣﯘﺭﺍﺳﯩﻤﻰ ﺑﺎﻳﻘﯘﺕ ﻗﯩﻠﯩﺸﻘﺎ ﺗﯧﮕﯩﺸﻠﯩﻚ "

ﻟﯧﻜﯩﻦ ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﯩﺪﯨﻜﻰ ﺑﻪﺯﻯ ﺋﻪﺯﺍﻻﺭﻧﯩﯔ ﻧﻪﺯﯨﺮﯨﺪﻩ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﯩﯔ ﺋﯧﭽﯩﻠﯩﺶ ﻣﯘﺭﺍﺳﯩﻤﻰ ﺑﺎﻳﻘﯘﺕ ﻗﯩﻠﯩﺸﻘﺎ ﺗﯧﮕﯩﺸﻠﯩﻚ، ﭼﯜﻧﻜﻰ ﺗﯩﺒﻪﺕ ﻧﺎﻣﺎﻳﯩﺸﭽﯩﻠﯩﺮﯨﻨﻰ ﺑﺎﺳﺘﯘﺭﯗﺵ، ﺧﯩﺘﺎﻳﻨﯩﯔ ﺳﯘﺩﺍﻥ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﯨﺘﻰ، ﺩﯨﻨﯩﻲ ﺋﻪﺭﻛﯩﻨﻠﯩﻚ ﯞﻩ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﯨﻨﻰ ﺑﺎﺳﺘﯘﺭﯗﺵ ﺑﯘﻧﯩﯔ ﻳﯧﺘﻪﺭﻟﯩﻚ ﺳﻪﯞﻩﺑﻰ ﺑﻮﻻﻻﻳﺪﯗ. ﺋﺎﻣﯧﺮﯨﻜﺎ ﺩﯙﻟﻪﺕ ﻣﻪﺟﻠﯩﺴﻰ ﺋﺎﯞﺍﻡ ﭘﺎﻻﺗﺎﺳﯩﻨﯩﯔ 15 ﻧﻪﭘﻪﺭ ﺋﻪﺯﺍﺳﻰ ﺳﻪﻳﺸﻪﻧﺒﻪ ﻛﯜﻧﻰ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﯩﻐﺎ ﻳﺎﺯﻏﺎﻥ ﺑﯘ ﻫﻪﻗﺘﯩﻜﻰ ﺑﯩﺮ ﺧﯧﺘﯩﺪﻩ، ﭘﺮﯦﺰﯨﺪﯦﻨﺖ ﺑﯘﺷﻨﯩﯔ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﮕﻪ ﻗﺎﺗﻨﯩﺸﯩﺶ ﭘﯩﻼﻧﻰ ﺋﯜﺳﺘﯩﺪﻩ ﺋﻮﻳﻠﯩﺸﯩﺸﻨﻰ ﺗﻪﻟﻪﭖ ﻗﯩﻠﯩﭗ، "ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﻪﺯﮔﯜﭼﻰ ﺗﻪﺑﯩﺌﯩﺘﻰ ﻛﯜﭼﻪﻳﮕﻪﻥ ﻣﻪﺯﮔﯩﻠﺪﻩ ، ﺳﯩﺰﻧﯩﯔ ﺧﯩﺘﺎﻳﺪﺍ ﺋﯚﺗﻜﯜﺯﯛﻟﯩﺪﯨﻐﺎﻥ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻐﺎ ﻗﺎﺗﻨﯩﺸﯩﺸﯩﯖﯩﺰ ﺗﻮﻏﺮﺍ ﺑﻮﻟﻤﺎﺳﻠﯩﻘﻰ ﻣﯘﻣﻜﯩﻦ " ﺩﻩﭖ ﺗﻪﻛﯩﺘﻠﯩﮕﻪﻥ.

ﺋﺎﻣﯧﺮﯨﻜﺎ ﺋﺎﯞﺍﻡ ﭘﺎﻻﺗﺎﺳﯩﻨﯩﯔ ﻳﻪﻧﻪ ﺋﻪﺯﺍﺳﻰ ﺋﺎﻣﯧﺮﯨﻜﺎ ﺋﻪﻣﻪﻟﺪﺍﺭﻟﯩﺮﯨﻨﯩﯔ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻳﯩﻐﯩﻨﯩﻐﺎ ﻗﺎﺗﻨﯩﺸﯩﺸﯩﻨﻰ ﭼﻪﻛﻠﻪﻳﺪﯨﻐﺎﻥ ﺑﯩﺮ ﻗﺎﻧﯘﻥ ﺗﻪﻛﻠﯩﭗ ﻻﻳﯩﻬﯩﺴﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. ﻣﻪﺯﻛﯘﺭ ﻗﺎﻧﯘﻥ ﺗﻪﻛﻠﯩﭗ ﻻﻳﯩﻬﯩﺴﻰ ﭘﺮﯦﺰﯨﺪﯦﻨﺖ ﺑﯘﺷﻨﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻐﺎ ﻗﺎﺗﻨﯩﺸﯩﺸﯩﻨﻰ ﭼﻪﻛﻠﯩﻤﻪﻳﺪﯗ، ﻟﯧﻜﯩﻦ ﻓﯧﺪﯦﺮﺍﺗﺴﯩﻴﻪ ﻫﯚﻛﯜﻣﻪﺕ ﺋﻪﻣﻪﻟﺪﺍﺭﻟﯩﺮﯨﻨﯩﯔ ﻗﺎﺗﻨﯩﺸﯩﺸﯩﻐﺎ ﭼﻪﻛﻠﯩﻤﻪ ﻗﻮﻳﯘﺷﻨﻰ ﺋﯚﺯ ﺋﯩﭽﯩﮕﻪ ﺋﺎﻟﯩﺪﯗ. ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ 4 ‏- ﺋﺎﻳﻨﯩﯔ 12 ‏- ﻛﯜﻧﯩﮕﻪ ﻗﻪﺩﻩﺭ ﺧﯩﺘﺎﻱ ﻫﯚﻛﯜﻣﯩﺘﻰ ﺑﯩﻠﻪﻥ ﺑﯩﺮ ﻗﺎﺗﺎﺭ ﺋﯘﭼﺮﯨﺸﯩﺸﻼﺭﻧﻰ ﺋﯧﻠﯩﭗ ﺑﺎﺭﯨﺪﯗ. ﻛﯩﺸﯩﻠﯩﻚ ﻫﻮﻗﯘﻗﻨﻰ ﻛﯚﺯﯨﺘﯩﺶ ﺗﻪﺷﻜﯩﻼﺗﻰ ﺑﯘ ﺋﯘﭼﺮﯨﺸﯩﺸﻼﺭﺩﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﺋﯩﭙﺎﺩﻩ ﺑﯩﻠﺪﯛﺭﯛﺷﯩﻨﻰ ﺗﻪﻟﻪﭖ ﻗﯩﻠﺪﻯ. (ﺋﻪﺭﻛﯩﻦ)