ﻛﻠﯩﻨﺘﻮﻥ ﺧﺎﻧﯩﻢ ﻧﯘﺗﻘﯩﺪﺍ، ﺑﺎﺭﻟﯩﻖ ﺩﯦﻤﻮﻛﺮﺍﺗﻼﺭﻧﻰ ﺋﯚﺯ ﭘﺎﺭﺗﯩﻴﯩﺴﯩﺪﯨﻦ ﭘﺮﯦﺰﯨﺪﯦﻨﺘﻠﯩﻖ ﻧﺎﻣﺰﺍﺗﻠﯩﻘﯩﻐﺎ ﻛﯚﺭﺳﯩﺘﯩﻠﯩﺶ ﺋﺎﻟﺪﯨﺪﺍ ﺗﯘﺭﻏﺎﻥ ﺑﺮﺍﻙ ﺋﻮﺑﺎﻣﺎﻧﻰ ﻗﻮﻟﻼﺷﻘﺎ ﭼﺎﻗﯩﺮﺩﻯ.

ﻗﯘﺭﯗﻟﺘﺎﻱ ﯞﻩﻛﯩﻠﻠﯩﺮﻯ ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻤﯩﻨﯩﯔ 26 - ﺋﺎﯞﻏﯘﺳﺖ ﻛﻪﭼﺘﯩﻜﻰ ﻧﯘﺗﻘﯩﻨﯩﯔ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﻰ ﺑﯩﺮﻟﯩﻜﻜﻪ ﻛﻪﻟﺘﯜﺭﯛﺷﺘﻪ ﺋﯩﻨﺘﺎﻳﯩﻦ ﻣﯘﻫﯩﻢ ﺋﻪﻫﻤﯩﻴﻪﺗﻜﻪ ﺋﯩﻜﻪﻧﻠﯩﻜﻰ ﺑﯩﻠﺪﯛﺭﯛﺷﻜﻪﻥ ﯞﻩ ﻛﻠﯩﻨﺘﻮﻥ ﺧﺎﻧﯩﻤﯩﻨﯩﯔ ﺷﯘﻧﺪﺍﻕ ﻣﯘﻫﯩﻢ ﺋﻪﻫﻤﯩﻴﻪﺗﻜﻪ ﺋﯩﮕﻪ ﺑﺎﻳﺎﻧﺎﺕ ﺑﯧﺮﯨﺪﯨﻐﺎﻧﻠﯩﻘﯩﻨﻰ ﻛﯜﺗﯜﺷﻜﻪﻥ ﺋﯩﺪﻯ.

ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﺑﯜﮔﯜﻧﻜﻰ ﻧﯘﺗﻘﯩﻨﯩﯔ ﺯﻭﺭ ﺋﻪﻫﻤﯩﻴﻪﺗﻜﻪ ﺋﯩﮕﻪ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﮔﻪﻥ ﻧﻴﯘ - ﻳﻮﺭﻙ ﺷﺘﺎﺗﻠﯩﻖ ﺩﯦﻤﻮﻛﺮﺍﺗﻼﺭ ﯞﻩﻛﯩﻠﻰ ﻫﻪﻣﺪﻩ ﻧﻴﯘ - ﻳﻮﺭﻙ ﺷﺘﺎﺗﯩﻐﺎ ﺟﺎﻳﻼﺷﻘﺎﻥ ﺳﻜﻪﻧﻪﻛﺘﻪﺩﻱ ﺷﻪﻫﯩﺮﯨﻨﯩﯔ ﺷﻪﻫﻪﺭ ﺑﺎﺷﻠﯩﻘﻰ ﯞﻩ ﻛﻠﯩﻨﺘﻮﻥ ﺧﺎﻧﯩﻤﻨﻰ ﻗﻮﻟﻼﭖ ﺑﯩﻠﻪ ﺗﺎﺷﻠﯩﻐﺎﻥ ﺋﺎﻟﯩﻲ ﯞﻩﻛﯩﻞ ﺑﺮﺍﻳﯩﻦ ﺳﺘﺮﺍﺗﻮﻥ، ﮔﻪﺭﭼﻪ ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﻧﺎﻣﺰﺍﺕ ﺑﻮﻟﯘﭖ ﺳﺎﻳﻠﯩﻨﺎﻟﻤﯩﻐﺎﻧﻠﯩﻘﯩﺪﯨﻦ ﺋﯘﻧﯩﯔ ﺑﺎﺷﻘﺎ ﻗﻮﻟﻠﯩﻐﯘﭼﯩﻠﯩﺮﯨﻐﺎ ﺋﻮﺧﺸﺎﺵ ﻛﯚﯕﯜﻟﺴﯩﺰﻟﯩﻚ ﻫﯧﺲ ﻗﯩﻠﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺋﯚﺯ ﭘﺎﺭﺗﯩﻴﯩﺴﯩﻨﻰ ﻣﻪﻧﭙﻪﺋﻪﺗﻰ ﯞﻩ ﺩﯙﻟﻪﺗﻨﯩﯔ ﻛﻪﻟﮕﯜﺳﻰ ﺋﯜﭼﯜﻥ ﺑﺎﺭﺍﻙ ﺋﻮﺑﺎﻣﺎﻧﻰ ﻗﻮﻟﻼﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﺩﻯ ﯞﻩ ﻛﻠﯩﻨﺘﻮﻥ ﺧﺎﻧﯩﻤﺪﯨﻦ ﺑﯜﮔﯜﻥ ﻛﻪﭼﺘﻪ ﻗﺎﻧﺪﺍﻕ ﺳﯩﮕﻨﺎﻝ ﻛﯜﺗﯜﺩﯨﻐﺎﻧﻠﯩﻘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ: " ﻣﻪﻥ ﺋﺎﻟﺪﻯ ﺑﯩﻠﻪﻥ ﺋﯘﻧﯩﯔ ﺋﯚﺯﻯ ﺋﯜﭼﯜﻥ ﺟﺎﭘﺎﻟﯩﻖ ﺋﯩﺸﻠﯩﮕﻪﻧﻠﻪﺭﮔﻪ ﻗﯩﺴﻘﯩﻐﯩﻨﺎ ﺭﻩﻫﻤﻪﺕ ﺋﯧﻴﺘﯩﺸﯩﻨﻰ ﻛﯜﺗﯩﻤﻪﻥ ﻫﻪﻣﺪﻩ ﻣﻪﻥ ﻳﻪﻧﻪ ﺋﯘﻧﯩﯖﺪﯨﻦ ﺋﯩﻨﺘﺎﻳﯩﻦ ﻛﯜﭼﻠﯜﻙ ﯞﻩ ﻛﻪﺳﻜﯩﻦ ﻫﺎﻟﺪﺍ ﻧﯧﻤﻪ ﺋﯘﭼﯘﻥ ﺑﯘ ﺩﯙﻟﻪﺗﻨﯩﯔ ﺋﯚﺯﮔﯩﺮﯨﺸﻜﻪ ﻣﻮﻫﺘﺎﺝ ﺋﯩﻜﻪﻧﻠﯩﻜﯩﻨﻰ، ﻧﯧﻤﻪ ﺋﯜﭼﯜﻥ ﻫﻪﻣﻤﻪﻳﻠﻪﻧﻨﯩﯔ ﺑﺎﺭﺍﻙ ﺋﻮﺑﺎﻣﺎﻧﻰ ﻗﻮﻟﻠﯩﺸﯩﻤﯩﺰ ﻛﯧﺮﻩﻛﻠﯩﻜﻰ ﻫﻪﻗﻘﯩﺪﻩ ﺑﺎﻳﺎﺕ ﺑﯧﺮﯨﺸﯩﻨﻰ ﻛﯜﺗﯩﻤﻪﻥ."

ﻳﯘﻗﯩﺮﯨﻘﯩﺴﻰ ﻣﯩﺸﯩﮕﺎﻥ ﺷﺘﺎﺗﻰ ﻳﯘﺭﯨﻦ ﺋﻮﺑﻼﺳﺘﻰ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﯩﯔ ﺭﻩﺋﯩﺴﻰ ﻛﯧﻦ ﭘﯧﺸﻪﺕ ﺑﻮﻟﯘﭖ، ﺋﯘ ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﻰ ﺑﯩﺮﻟﯩﻜﻜﻪ ﻛﻪﻟﺘﯜﺭﯨﺪﯨﻐﺎﻥ ﻧﯘﺗﯘﻕ ﺋﯧﻼﻥ ﻗﯩﻠﯩﺸﯩﻨﻰ، ﻫﻪﻣﺪﻩ ﻣﻜﯧﻴﯩﻦ ﺋﻪﭘﻪﻧﺪﯨﮕﻪ ﻧﯩﺴﺒﻪﺗﻪﻥ ﻗﺎﺗﺘﯩﻖ ﺗﯧﮕﯩﺸﯩﻨﻰ ﻛﯜﺗﯩﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺩﻩﺭﯞﻩﻗﻪ ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﺑﯜﮔﯜﻧﻜﻰ ﻧﯘﺗﻘﻰ " ﺑﯩﺮﻟﯩﻚ"ﻧﻰ ﺑﺎﺵ ﺗﯧﻤﺎ ﻗﯩﻠﻐﺎﻥ ﺋﯩﺪﻯ. ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻤﻨﻰ ﺋﯘﻧﯩﯔ ﻗﯩﺰﻯ ﭼﻪﻟﺴﯩﻲ ﻛﻠﯩﻨﺘﻮﻥ ﺗﻮﻧﯘﺷﺘﯘﺭﺩﻯ، ﺧﯩﻼﺭﯨﻲ ﻛﻠﯩﻨﺘﻮﻥ ﻧﯘﺗﯘﻕ ﺳﻪﻫﻨﯩﺴﯩﮕﻪ ﭼﯩﻘﻘﺎﻧﺪﺍ ﺋﺎﻟﻘﯩﺶ ﺳﺎﺩﺍﻟﯩﺮﻯ ﺑﯩﺮ ﻧﻪﭼﭽﻪ ﻣﯩﻨﯘﺕ ﺩﺍﯞﺍﻡ ﺋﻪﺗﺘﻰ.

ﻛﻠﯩﻨﺘﻮﻥ ﺧﺎﻧﯩﻢ ﺋﺎﻟﺪﻯ ﺑﯩﻠﻪﻥ ﺋﯚﺯﯨﻨﯩﯔ ﺑﯩﺮ ﭘﻪﺧﯩﺮﻟﯩﻚ ﺋﺎﻧﺎ، ﭘﻪﺧﯩﺮﻟﯩﻚ ﺩﯦﻤﻮﻛﺮﺍﺕ ﯞﻩ ﻧﻴﯘ - ﻳﻮﺭﻛﻨﯩﯔ ﭘﻪﺧﯩﺮﻟﯩﻚ ﭘﺎﻻﺗﺎ ﺋﻪﺯﺍﺳﻰ ﺋﯩﻜﻪﻧﻠﯩﻜﯩﻨﻰ ﻫﻪﻣﺪﻩ ﺋﯚﺯ ﭘﺎﺭﺗﯩﻴﯩﺴﯩﺪﯨﻦ ﭘﺮﯦﺰﯨﺪﯦﻨﺘﻠﯩﻖ ﻧﺎﻣﺰﺍﺗﻠﯩﻘﯩﻐﺎ ﻛﯚﺭﺳﯩﺘﯩﻠﯩﺪﯨﻐﺎﻥ ﺑﺎﺭﺍﻙ ﺋﻮﺑﺎﻣﺎﻧﯩﯔ ﭘﻪﺧﯩﺮﻟﯩﻚ ﻗﻮﻟﻠﯩﻐﯘﭼﯩﺴﻰ ﺋﯩﻜﻪﻧﻠﯩﻜﯩﻨﻰ ﺟﺎﻛﺎﺭﻟﯩﺪﻯ.

ﺋﯘ ﻧﯘﺗﯘﻗﻨﻰ ﺩﺍﯞﺍﻣﻼﺷﺘﯘﺭﯗﭖ ﻣﯘﻧﺪﺍﻕ ﺩﯦﺪﻯ: " ﺩﻭﺳﺘﻼﺭ، ﺑﯩﺰ ﺳﯚﻳﮕﻪﻥ ﺋﺎﻧﺎ ﯞﻩﺗﻪﻧﻨﻰ ﻗﺎﻳﺘﯘﺭﯗﯞﺍﻟﯩﺪﯨﻐﺎﻥ ﭘﻪﻳﺖ ﻛﻪﻟﺪﻯ. ﻣﻪﻳﻠﻰ ﺳﯩﻠﻪﺭ ﻣﺎﯕﺎ ﺑﯩﻠﻪﺕ ﺗﺎﺷﻠﯩﻐﺎﻥ ﺑﻮﻟﯘﯕﻼﺭ، ﯞﻩ ﻣﻪﻳﻠﻰ ﺑﺎﺭﺍﻙ ﺋﻮﺑﺎﻣﺎﻏﺎ ﺑﯧﻠﻪﺕ ﺗﺎﺷﻠﯩﻐﺎﻥ ﺑﻮﻟﯘﯕﻼﺭ، ﺑﯩﺮﻟﯩﻜﻜﻪ ﻛﻪﻟﮕﻪﻥ ﭘﺎﺭﺗﯩﻴﻪ ﯞﻩ ﺋﻮﺭﺗﺎﻕ ﻣﻪﻗﺴﻪﺕ ﺋﯜﭼﯜﻥ ﺑﯩﺮﻟﯩﻜﻜﻪ ﻛﯧﻠﯩﺪﯨﻐﺎﻥ ﭘﻪﻳﺖ ﻛﻪﻟﺪﻯ."

ﻛﻠﯩﻨﺘﻮﻥ ﺧﺎﻧﯩﻢ ﻳﻪﻧﻪ ﺑﯘ ﻗﯧﺘﯩﻤﻘﻰ ﭘﺮﯦﺰﯨﺪﯦﻨﺘﻠﯩﻖ ﺳﺎﻳﻠﯩﻤﯩﻨﯩﯔ ﻣﯘﻫﯩﻤﻠﯩﻖ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ: " ﺑﯩﺰ ﻫﻪﻣﻤﯩﻤﯩﺰ ﺋﻮﺧﺸﺎﺵ ﺳﻪﭘﺘﻪ. ﻫﯧﭽﻘﺎﻳﺴﯩﻤﯩﺰ ﭼﻪﺗﺘﻪ ﻗﺎﺭﺍﭖ ﺗﯘﺭﺍﻟﻤﺎﻳﻤﯩﺰ. ﺑﯘ ﻛﻪﻟﮕﯜﺳﯩﻤﯩﺰ ﺋﯜﭼﯜﻥ ﻗﯩﻠﯩﻨﯩﯟﺍﺗﻘﺎﻥ ﻛﯜﺭﻩﺵ ﻫﻪﻣﺪﻩ ﺑﯩﺰ ﺋﯘﺗﻤﯩﺴﺎﻕ ﺑﻮﻟﻤﺎﻳﺪﯨﻐﺎﻥ ﻛﯜﺭﻩﺵ."

ﻛﻠﯩﻨﺘﻮﻥ ﺧﺎﻧﯩﻢ ﺑﯘ ﻗﯘﺭﻻﺭﻧﻰ ﺳﯚﺯﻟﻪﭖ ﺋﯚﺗﻜﻪﻧﺪﻩ ﭘﻪﭘﺴﯩﻲ ﻣﻪﺭﻛﯩﺰﯨﺪﯨﻜﻰ 20 ﻣﯩﯖﺪﯨﻦ ﺋﺎﺭﺗﯘﻕ ﺋﺎﻣﻤﯩﻨﯩﯔ ﻫﻪﻣﻤﯩﺴﻰ ﺩﯦﮕﯜﺩﻩﻙ ﺋﻮﺭﯗﻧﻠﯩﺮﯨﺪﯨﻦ ﺗﯘﺭﯗﭖ ﻛﯧﺘﯩﺸﺘﻰ. ﺋﺎﻟﯩﻲ ﻣﯧﻬﻤﺎﻧﻼﺭ ﺳﻪﻫﻨﯩﺴﯩﺪﯨﻦ ﺋﻮﺭﯗﻥ ﺋﺎﻟﻐﺎﻥ ﺳﺎﺑﯩﻖ ﭘﺮﯦﺰﯨﺪﯦﻨﺖ ﺑﯩﻞ ﻛﻠﯩﻨﺘﻮﻥ، ﺑﺎﺭﺍﻙ ﺋﻮﺑﺎﻣﺎﻧﯩﯔ ﺧﺎﻧﯩﻤﻰ ﻣﯩﺸﯧﻞ ﺋﻮﺑﺎﻣﺎ، ﯞﻩ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﺪﯨﻦ ﻣﯘﺋﺎﯞﯨﻦ ﭘﺮﯦﺰﯨﺪﯦﻨﺘﻠﯩﻖ ﻧﺎﻣﺰﺍﺗﻠﯩﻘﯩﻐﺎ ﺗﺎﻟﻼﻧﻐﺎﻥ ﭘﺎﻻﺗﺎ ﺋﻪﺯﺍﺳﻰ ﺟﻮ ﺑﺎﻳﺪﯨﻦ ﻗﺎﺗﺎﺭﻟﯩﻘﻼﺭﻣﯘ ﺋﻮﺭﯗﻧﻠﯩﺮﯨﺪﯨﻦ ﺗﯘﺭﯗﭖ ﺋﯘﺯﺍﻗﻘﯩﭽﻪ ﭼﺎﯞﺍﻙ ﭼﯧﻠﯩﺸﺘﻰ، ﻗﺎﺭﯨﻤﺎﻗﻘﺎ ﺳﺎﺑﯩﻖ ﭘﺮﯦﺰﯨﺪﯦﻨﺖ ﯞﻩ ﺧﯩﻼﺭﯨﻲ ﺧﺎﻧﯩﻤﻨﯩﯔ ﻳﻮﻟﺪﯨﺸﻰ ﺑﯩﻞ ﻛﻠﯩﻨﺘﻮﻥ ﺗﯧﺨﯩﻤﯘ ﻫﺎﻳﺎﺟﺎﻧﻼﻧﻐﺎﻧﺪﻩﻙ ﻗﯩﻼﺗﺘﻰ.

ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻢ ﺋﯚﺯﯨﻨﯩﯔ 35 ﻳﯩﻠﺪﯨﻦ ﺑﯘﻳﺎﻥ ﺋﯚﺳﻤﯜﺭﻟﻪﺭ ﺋﯜﭼﯜﻥ، ﺋﯘﻧﯩﯟﯦﺮﺳﺎﻝ ﺳﺎﻻﻣﻪﺗﻠﯩﻚ ﺳﯘﻏﯘﺭﺗﯩﺴﻰ ﺋﯜﭼﯜﻥ، ﺩﯙﻟﻪﺕ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﺋﺎﻳﺎﻟﻼﺭﻧﯩﯔ ﻫﻮﻗﯘﻗﻰ ﺋﯜﭼﯜﻥ ﻛﯜﺭﻩﺵ ﻗﯩﻠﯩﭗ ﻛﻪﻟﮕﻪﻧﻠﯩﻜﯩﻨﻰ ﺑﯘ ﻛﯜﺭﻩﺷﻠﯩﺮﯨﻨﯩﯔ ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺖ ﺳﺎﺭﯨﻴﯩﺪﺍ ﻳﻪﻧﻪ ﺑﯩﺮ ﺟﯘﻣﻬﯘﺭﯨﻴﻪﺗﭽﻰ ﭘﺮﯦﺰﯨﺪﯦﻨﺘﻨﻰ ﺗﯘﺭﻏﯘﺯﯗﺵ ﺋﯜﭼﯜﻥ ﺋﻪﻣﻪﺳﻠﯩﻜﯩﻨﻰ ﺗﻪﻛﯩﺘﻠﯩﺪﻯ ﯞﻩ ﻣﯘﻧﺪﺍﻕ ﺩﯦﺪﻯ : " ﺋﯚﺗﻜﻪﻥ 18 ﺋﺎﻱ ﺟﻪﺭﻳﺎﻧﯩﺪﺍ ﻳﺎﻛﻰ ﺋﯚﺗﻜﻪﻥ 8 ﻳﯩﻞ ﺟﻪﺭﻳﺎﻧﯩﺪﺍ ﺳﯩﻠﻪﺭﻧﯩﯔ ﻗﯩﻠﻐﺎﻥ ﻗﺎﺭﺍﺷﻠﯩﺮﯨﯖﻼﺭﻣﯘ ﻣﻪﻏﻠﯘﭖ ﺑﻮﻟﻐﺎﻥ ﻳﯩﭙﻪﻛﭽﯩﻠﻪﺭ ﺋﯜﭼﯜﻥ ﺑﻪﺩﻩﻝ ﺗﯚﻟﻪﺵ ﺋﻪﻣﻪﺱ ﺋﯩﺪﻯ. ﻗﺎﻧﺪﺍﻕ ﺑﻮﻟﯘﺷﯩﺪﯨﻦ ﻗﻪﺗﺌﯩﻲ ﻧﻪﺯﻩﺭ ﻣﻜﯧﻴﯩﻨﻨﻰ ﭘﺮﯦﺰﯨﺪﯦﻨﺖ ﻗﯩﻠﯩﺸﻘﺎ ﺑﻮﻟﻤﺎﻳﺪﯗ. ﺑﺎﺭﺍﻙ ﺋﻮﺑﺎﻣﺎ ﻣﯧﻨﯩﯔ ﻛﺎﻧﺪﯨﺪﺍﺗﯩﻢ ﻫﻪﻣﺪﻩ ﺋﯘ ﺑﯩﺰﻧﯩﯔ ﭘﺮﯦﺰﯨﺪﯦﻨﺘﯩﻤﯩﺰ ﺑﻮﻟﯘﺷﻰ ﻛﯧﺮﻩﻙ."

ﻛﻠﯩﻨﺘﻮﻥ ﺧﺎﻧﯩﻢ ﻧﯘﺗﻘﻰ ﺩﺍﯞﺍﻣﯩﺪﺍ ﺑﺎﺭﺍﻙ ﺋﻮﺑﺎﻣﺎﻧﯩﯔ ﺋﺎﻣﯧﺮﯨﻜﺎ ﺧﻪﻟﻘﻨﯩﯔ ﺋﻮﺭﺗﺎﻕ ﻣﻪﻧﭙﻪﺋﻪﺗﻰ ﯞﻩ ﺋﺎﺭﺯﯗ - ﺋﯜﻣﯩﺪﻯ ﺋﯘﭼﯘﻥ ﻛﯜﺭﻩﺵ ﻗﯩﻠﯩﺪﯨﻐﺎﻥ ﭘﺮﯦﺰﯨﺪﯦﻨﺖ ﺑﻮﻟﯘﭖ ﻗﺎﻟﯩﺪﯨﻐﺎﻧﻠﯩﻘﯩﻨﻰ ﺋﯘﻧﯩﯔ ﻳﯧﻨﯩﺪﺍ ﻣﯩﺸﯧﻞ ﺋﻮﺑﺎﻣﺎﺩﻩﻙ ﻳﺎﺭﺩﻩﻣﭽﯩﺴﻰ ﯞﻩ ﺟﻮ ﺑﺎﻳﺪﯨﻨﺪﻩﻙ ﺑﻪﺭﺩﻩﻡ، ﺋﺎﻗﯩﻞ ﻫﻪﻣﺪﻩ ﺗﻪﺟﺮﯨﺒﯩﻠﯩﻚ ﻣﯘﺋﺎﯞﯨﻦ ﭘﺮﯦﺰﯨﺪﯦﻨﺖ ﺑﺎﺭﻟﯩﻘﯩﻨﻰ ﻛﯚﺭﺳﻪﺗﺘﻰ.

ﻛﻠﯩﻨﺘﻮﻥ ﺧﺎﻧﯩﻢ ﻧﯘﺗﻘﻰ ﺋﺎﺧﯩﺮﯨﺪﺍ ﻧﻴﯘ - ﻳﻮﺭﻛﻠﯘﻕ ﺋﯧﺰﯨﻠﮕﻪﻥ ﻗﯘﻟﻼﺭﻧﻰ ﺗﻮﻣﯘﺭ ﻳﻮﻝ ﺗﻮﻧﯩﻠﻠﯩﺮﯨﺪﯨﻦ ﺋﯚﺗﻜﯜﺯﯛﭖ ﺋﯘﻻﺭﻧﯩﯔ ﻳﻮﺭﯗﻗﻠﯘﻗﻘﺎ ﭼﯩﺸﯩﻐﺎ ﻳﻮﻝ ﺋﯩﺰﺩﯨﮕﻪﻥ ﺧﻪﺭﯨﻴﻪﺕ ﺗﯘﺑﻤﻪﻥ ﺧﺎﻧﯩﻤﻨﯩﯔ ﻗﯘﻟﻼﺭﻏﺎ ﺋﻪﺭﻛﯩﻨﻠﯩﻚ ﺋﯩﺰﺩﻩﺵ ﻫﯧﻜﺎﻳﯩﺴﯩﻨﻰ ﺑﺎﻳﺎﻥ ﻗﯩﻠﯩﭗ، ﺋﻪﺭﻛﯩﻨﻠﯩﻜﻜﻪ ﭘﻪﻗﻪﺕ ﺩﺍﯞﺍﻡ ﻛﯜﺭﻩﺵ ﻗﯩﻠﻐﺎﻧﺪﯨﻼ ﺋﯧﺮﯨﺸﻜﯩﻠﻰ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺑﯘﻧﯩﯔ ﺩﯦﻤﻮﻛﺮﺍﺗﻼﺭﻧﯩﯔ ﺑﯘ ﻧﯚﯞﻩﺗﻠﯩﻚ ﭘﺮﯦﺰﯨﺪﯦﻨﺘﻠﯩﻖ ﺳﺎﻳﻠﯩﻤﯩﺪﺍ ﻏﻪﻟﯩﺒﻪ ﻗﯩﻠﯩﺸﯩﺪﺍ ﺋﯩﻨﺘﺎﻳﯩﻦ ﻣﯘﻫﯩﻢ ﺋﯩﻜﻪﻧﻠﯩﻜﯩﻨﻰ ﺋﯩﻠﮕﯩﺮﻯ ﺳﯜﺭﺩﻯ ﯞﻩ ﺗﯘﺑﻤﻪﻥ ﺧﺎﻧﯩﻤﻨﯩﯔ ﻣﯘﻧﯘ ﺳﯚﺯﻟﯩﺮﯨﻨﻰ ﻧﻪﻗﯩﻞ ﻛﻪﻟﺘﯜﺭﺩﻯ: " ﺋﻪﮔﻪﺭ ﺋﯩﺘﻼﺭﻧﯩﯔ ﺋﺎﺭﻗﯩﯖﯩﺰﺩﯨﻦ ﻗﺎﯞﯨﻐﺎﻥ ﺋﺎﯞﺍﺯﻧﻰ ﺋﺎﯕﻠﯩﺴﯩﯖﯩﺰﻣﯘ، ﻗﯘﻟﺪﺍﺭﻻﺭﻧﯩﯔ ﺋﺎﺭﻗﯩﯖﯩﺰﺩﯨﻦ ﯞﺍﺭﻗﯩﺮﯨﻐﺎﻥ ﺋﺎﯞﺍﺯﯨﻨﻰ ﺋﺎﯕﻠﯩﺴﯩﯖﯩﺰﻣﯘ، ﻗﺎﺭﺍﯕﻐﯘ ﺋﻮﺭﻣﺎﻧﻼﺭﺩﺍ ﺋﯘﻻﺭﻧﯩﯔ ﻣﻪﺷﺌﻪﻟﻠﯩﺮﻯ ﻛﯚﺭﯛﻧﯜﭖ ﺗﯘﺭﺳﯩﻤﯘ ﺋﺎﻟﻐﺎ ﻗﺎﺭﺍﭖ ﻣﯧﯖﯩﯟﯦﺮﯨﯔ، ﻫﻪﺭﮔﯩﺰ ﺗﻮﺧﺘﯩﻤﺎﯓ. ﺋﻪﮔﻪﺭ ﺳﯩﺰ ﺋﻪﺭﻛﯩﻨﻠﯩﻜﻨﯩﯔ ﺗﻪﻣﯩﻨﻰ ﺋﺎﺯﺭﺍﻕ ﺑﻮﻟﺴﯩﻤﯘ ﺗﯧﺘﯩﻴﻤﻪﻥ ﺩﯦﺴﯩﯖﯩﺰ ﺩﺍﯞﺍﻣﻠﯩﻖ ﺋﺎﻟﻐﺎ ﻗﺎﺭﺍﭖ ﻣﯧﯖﯩﯔ."

ﺧﻪﺭﯨﻴﻪﺕ ﺗﯘﺑﻤﻪﻥ ﺧﺎﻧﯩﻢ ﺋﺎﻓﺮﯨﻘﺎ ﻗﺎﻥ ﺗﯩﭙﯩﺪﯨﻦ ﺑﻮﻟﯘﭖ، ﺋﯘ 1820 ﻳﯩﻠﻰ ﻧﻴﯘ - ﻳﻮﺭﻛﺘﺎ ﺗﯘﻏﯘﻟﻐﺎﻥ. ﺋﯘ ﺋﻪﻳﻨﻰ ﺯﺍﻣﺎﻧﺪﺍ ﻗﯘﻟﻼﺭﻧﻰ ﻗﯘﺗﻘﯘﺯﯗﺵ ﻳﻪﺭﺋﺎﺳﺘﻰ ﻫﻪﺭﯨﻜﯩﺘﯩﻨﻰ ﻗﻮﺯﻏﯩﻐﺎﻥ ﯞﻩ ﺋﯩﭽﻜﻰ ﺋﯘﺭﯗﺵ ﺩﺍﯞﺍﻣﯩﺪﺍ ﻫﯚﻛﯜﻣﻪﺗﻜﻪ ﺧﯩﺰﻣﻪﺕ ﻗﯩﻠﻐﺎﻥ ﺟﻪﺳﯘﺭ ﺋﺎﻳﺎﻝ. ﺧﻪﺭﯨﻴﻪﺕ ﺗﯘﺑﻤﻪﻥ ﺧﺎﻧﯩﻢ 1913 - ﻳﯩﻠﻰ ﯞﺍﭘﺎﺕ ﺑﻮﻟﻐﺎﻥ ﺑﻮﻟﯘﭖ، ﺋﯘ ﻫﺎﺯﯨﺮ ﺋﺎﻣﯧﺮﯨﻜﯩﻨﯩﯔ ﺋﻪﺭﻛﯩﻨﻠﯩﻚ ﻛﯜﺭﻩﺷﻠﯩﺮﻯ ﯞﻩ ﺟﺎﺳﺎﺭﯨﺘﯩﻨﯩﯔ ﺳﯩﻤﯟﻭﻟﻰ ﺳﯜﭘﯩﺘﯩﺪﻩ ﺋﻪﺳﻠﻪﻧﻤﻪﻛﺘﻪ.

 ﻛﻠﯩﻨﺘﻮﻥ ﺧﺎﻧﯩﻢ ﺋﺎﺧﯩﺮﯨﺪﺍ ﺋﺎﻣﯧﺮﯨﻜﯩﻠﯩﻘﻼﺭﻧﯩﯔ ﭘﺎﺭﻻﻕ ﻛﻪﻟﮕﯜﺳﯩﮕﻪ ﻗﺎﺭﺍﭖ ﻳﻮﻝ ﺋﯧﻠﯩﺸﺘﯩﻦ ﺋﯩﻠﮕﯩﺮﻯ ﺑﺎﺭﺍﻙ ﺋﻮﺑﺎﻣﺎﻧﻰ ﭘﺮﯦﺰﯨﺪﯦﻨﺖ ﻗﯩﻠﯩﭗ ﺳﺎﻳﻼﺷﻘﺎ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﯩﺘﯩﺸﯩﻨﯩﯔ ﺑﻪﻛﻤﯘ ﻣﯘﻫﯩﻢ ﺋﯩﻜﻪﻧﻠﯩﻜﯩﻨﻰ ﻗﺎﻳﺘﺎ ﺗﻪﻛﯩﺘﻠﯩﺪﻯ.

ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻢ ﺋﺎﺧﯩﺮﺩﺍ ﻣﯘﻧﺪﺍﻕ ﻣﯘﺭﺍﺟﯩﺌﻪﺕ ﻗﯩﻠﺪﻯ": ﺑﺎﻟﯩﻠﯩﺮﯨﻤﯩﺰﻏﺎ ﭘﺎﺭﻻﻕ ﻛﻪﻟﮕﯜﺳﻰ ﻳﺎﺭﯨﺘﯩﺶ، ﯞﻩ ﺋﯘﻻﺭﻏﺎ ﺋﯩﺮﺍﺩﯨﻠﯩﻚ ﺋﺎﺩﻩﻣﻠﻪﺭ ﺋﯜﭼﯜﻥ ﺗﯧﮕﯩﮕﻪ ﻳﻪﺗﻜﯩﻠﻰ ﺑﻮﻟﻤﺎﻳﺪﯨﻐﺎﻥ ﭼﻮﯕﻘﯘﺭﻟﯘﻕ، ﻳﻪﯕﮕﯩﻠﻰ ﺑﻮﻟﻤﺎﻳﺪﯨﻐﺎﻥ ﻗﯩﻴﯩﻨﭽﯩﻠﯩﻖ، ﺑﻮﻳﺴﯘﻧﺪﯗﺭﻏﯩﻠﻰ ﺑﻮﻟﻤﺎﻳﺪﯨﻐﺎﻥ ﺋﯧﮕﯩﺰﻟﯩﻚ ﻳﻮﻕ ﺋﯩﻜﻪﻧﻠﯩﻜﯩﻨﻰ، ﺧﯘﺩﺍﻏﺎ ﯞﻩ ﺑﯩﺮ - ﺑﯩﺮﯨﻤﯩﺰﮔﻪ ﺋﯩﺸﯩﻨﯩﺸﻨﻰ ﺋﯚﮔﯩﺘﯩﺶ ﺑﯩﺰﻧﯩﯔ ﻣﯘﻗﻪﺩﺩﻩﺱ ﺑﯘﺭﭼﯩﻤﯩﺰ."

ﺑﯜﮔﯜﻧﻜﻰ ﻗﯘﺭﯗﻟﺘﯩﻴﯩﻐﺎ ﻗﺎﺗﻨﺎﺷﻘﺎﻧﻼﺭﻧﯩﯔ ﻫﻪﻣﻤﯩﺴﻰ ﺩﯦﮕﯜﺩﻩﻙ ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﻧﯘﺗﻘﯩﺪﯨﻦ ﺭﺍﺯﻯ ﺑﻮﻟﻐﺎﻧﺪﻩﻙ ﻫﻪﻣﺪﻩ ﺋﯘ ﻳﻪﺗﻜﯜﺯﻣﻪﻛﭽﻰ ﺑﻮﻟﻐﺎﻥ " ﺑﯩﺮﻟﯩﻚ" ﺳﯩﮕﻨﺎﻟﯩﻨﻰ ﻗﻮﺑﯘﻝ ﻗﯩﻠﻐﺎﻧﺪﻩﻙ ﻗﯩﻼﺗﺘﻰ.

 ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﻧﯘﺗﻘﯩﺪﯨﻦ ﺋﯩﻨﺘﺎﻳﯩﻦ ﻫﺎﻳﺎﺟﺎﻧﻼﻧﻐﺎﻥ ﯞﻩ ﺋﯘ ﻳﻪﺗﻜﯜﺯﮔﻪﻥ ﺳﯩﮕﻨﺎﻟﻨﯩﯔ ﺋﯚﺯﻯ ﻛﯜﺗﻜﻪﻧﺪﯨﻨﻤﯘ ﻛﯜﭼﻠﯜﻙ ﺑﻮﻟﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﺋﺎﻟﻴﺎﺳﻜﺎ ﺷﺘﺎﺗﻰ ﺋﺎﻛﯘﺗﺎ ﻧﺎﻫﯩﻴﯩﻠﯩﻚ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﺴﻰ ﯞﻩﻛﯩﻠﻰ ﭘﺎﻣﯧﻼ ﻣﺎﺭﺵ ﺧﺎﻧﯩﻢ ﻛﻠﯩﻨﺘﻮﻥ ﺧﺎﻧﯩﻤﯩﻨﯩﯔ ﺑﯩﺮ ﺳﺎﻻﭘﻪﺗﻠﯩﻚ ﻫﻪﻣﺪﻩ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﮕﻪ ﻧﯩﺴﺒﻪﺗﻪﻥ ﻫﯚﺭﻣﯩﺘﯩﻨﯩﯔ ﭼﻮﯕﻘﯘﺭﻟﯘﻗﯩﻨﻰ، ﺋﯚﺯﯨﻨﯩﯔ ﺋﯘﻧﻰ ﻗﻮﻟﻼﭖ ﺑﯩﻠﻪﻥ ﺗﺎﺷﻠﯩﻐﺎﻧﻠﯩﻘﯩﻨﻰ، ﮔﻪﺭﭼﻪ ﺧﯩﻼﺭﯨﻲ ﺧﺎﻧﯩﻢ ﻧﺎﻣﺰﺍﺕ ﺑﻮﻟﯘﭖ ﺗﺎﻟﻠﯩﻨﺎﻟﻤﯩﻐﺎﻥ ﺑﻮﻟﺴﯩﻤﯘ، ﺋﯘﻧﻰ ﻗﻮﻟﻠﯩﻐﯘﭼﻰ ﺑﺎﺭﻟﯩﻖ ﺋﺎﻳﺎﻟﻼﺭﻧﯩﯔ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﯩﻨﯩﯔ ﻏﻪﻟﯩﺒﯩﺴﻰ ﺋﯜﭼﯜﻥ ﺑﺮﺍﻙ ﺋﻮﺑﺎﻣﺎﻧﻰ ﻗﻮﻟﻠﯩﺸﻰ ﻻﺯﯨﻤﻠﯩﻘﯩﻨﻰ ﺑﯩﻠﺪﯛﺭﺩﻯ.

ﺧﯩﻼﺭﯨﻲ ﻛﻠﯩﻨﺘﻮﻥ ﺧﺎﻧﯩﻤﻨﯩﯔ ﻧﯘﺗﻘﻰ ﺋﯜﺳﺘﯩﺪﻩ ﺗﻮﺧﺘﺎﻟﻐﺎﻥ ﺟﻮﺭﺟﯩﻴﻪ ﺷﯩﺘﺎﺗﯩﺪﯨﻦ ﻛﻪﻟﮕﻪﻥ ﺩﯦﻤﻮﻛﺮﺍﺗﻼﺭ ﯞﻩﻛﯩﻠﻰ ﺩﺍﯞﯨﺪ ﺟﻪﺭﺭﻯ ﺋﻪﭘﻪﻧﺪﻯ ﻣﯘﻧﺪﺍﻕ ﺩﯦﺪﻯ: " ﺩﯙﻟﻪﺗﻨﯩﯔ ﻳﻪﻧﻪ ﺗﯚﺕ ﻳﯩﻞ ﺋﻮﺧﺸﺎﺵ ﺧﻪﺗﻪﺭﮔﻪ ﺗﻪﯞﻩﻛﻜﯜﻝ ﻗﯩﻠﯩﺸﻘﺎ ﺑﻮﻟﻤﺎﻳﺪﯨﻐﺎﻧﻠﯩﻘﻰ، ﻫﻪﻣﻤﻪﻳﻠﻪﻧﻨﯩﯔ ﺑﺮﺍﻙ ﺋﻮﺑﺎﻣﺎﻧﯩﯔ ﻗﻮﻟﻠﯩﺸﯩﻤﯩﺰ ﻛﯧﺮﻩﻛﻠﯩﻜﻰ ﻫﻪﻣﺪﻩ ﺋﺎﻣﯧﺮﯨﻜﺎ ﭼﯜﺷﯩﻨﯩﯔ ﺑﯘ ﺩﯙﻟﻪﺗﺘﯩﻜﻰ ﻫﻪﻣﻤﻪﻳﻠﻪﻧﮕﻪ ﺋﻮﺭﺗﺎﻕ ﺋﯩﻜﻪﻧﻠﯩﻜﯩﮕﻪ ﭘﯘﺭﺳﻪﺕ ﻳﺎﺭﯨﺘﯩﺸﺘﯩﻦ ﺋﯩﺒﺎﺭﻩﺕ ﺋﯘﭼﯘﺭﻧﻰ ﻫﯧﺲ ﻗﯩﻠﺪﯨﻢ."

ﺋﺎﻣﯧﺮﯨﻜﺎ ﺩﯦﻤﻮﻛﺮﺍﺗﻼﺭ ﭘﺎﺭﺗﯩﻴﯩﺴﻰ ﺩﯙﻟﻪﺗﻠﯩﻚ ﯞﻩﻛﯩﻠﻠﻪﺭ ﭼﻮﯓ ﻗﯘﺭﯗﻟﺘﯩﻴﻰ ﺩﺍﯞﺍﻡ ﻗﯩﻠﻤﺎﻗﺘﺎ. ﺑﯜﮔﯜﻥ ﺑﯘ ﻗﯘﺭﯗﻟﺘﺎﻱ 3 - ﻛﯜﻧﯩﮕﻪ ﻗﻪﺩﻩﻡ ﻗﻮﻳﺪﻯ. ﺑﯜﮔﯜﻥ ﻳﻪﻧﻪ 27 - ﺋﺎﯞﻏﯘﺳﺖ ﻛﻪﭼﺘﻪ ﺟﻮ ﺑﺎﻳﺪﯨﻨﻨﯩﯔ ﻣﯘﺋﺎﯞﯨﻦ ﭘﺮﯦﺰﯨﺪﯦﻨﺖ ﻧﺎﻣﺰﺍﺗﻠﯩﻘﯩﻨﻰ ﺋﯧﻼﻥ ﻗﯩﻠﯩﺶ ﻣﯘﺭﺍﺳﯩﻤﻰ ﺋﯚﺗﻜﯜﺯﯛﻟﯩﺪﯗ. ﺑﯜﮔﯜﻥ ﻛﻪﭼﻘﯘﺭﯗﻥ ﻳﻪﻧﻪ ﺑﯩﻞ ﻛﻠﯩﻨﺘﻮﻥ ﻧﯘﺗﯘﻕ ﺳﯚﺯﻟﻪﻳﺪﯗ.