ﺩﻭﻛﺘﻮﺭ ﻗﺎﻫﺎﺭ ﺑﺎﺭﺍﺗﻨﯩﯔ ﻛﯘﭼﺎﺭﺩﺍ ﺑﺎﻳﻘﺎﻟﻐﺎﻥ ﻗﻪﺩﯨﻤﻘﻰ ﻗﻪﺑﺮﯨﻠﻪﺭ ﯞﻩ ﺧﯩﺘﺎﻳﻨﯩﯔ ﺷﯩﻴﯜﺩﯗﺧﯘﻓﯘﺳﻰ ﻫﻪﻗﻘﯩﺪﯨﻜﻰ ﻣﯘﻻﻫﯩﺰﯨﺴﻰ

• ﻣﯘﺧﺒﯩﺮﯨﻤﯩﺰ ﯞﻩﻟﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻛﯘﭼﺎﺭﻧﯩﯔ ﺷﻪﻫﻪﺭ ﺋﯩﭽﯩﺪﻩ ﻳﻪﺭ ﺋﺎﺳﺘﻰ ﺳﻮﺩﺍ ﺑﺎﺯﯨﺮﻯ ﺑﯩﻨﺎ ﻗﯩﻠﯩﻨﯩﯟﺍﺗﻘﺎﻧﺪﺍ، 8 ‏- ﺋﺎﻳﻨﯩﯔ 19 ‏- ﻛﯜﻧﻰ ﻳﻪﺭ ﻗﺎﺗﻼﻣﻠﯩﺮﯨﺪﯨﻦ ﻗﻪﺩﯨﻤﻘﻰ ﻛﯘﭼﺎﺭ ﻗﻪﺑﺮﯨﻠﯩﺮﻯ ﺑﺎﻳﻘﺎﻟﻐﺎﻥ. ﻛﯘﭼﺎﺭﺩﺍ ﺑﺎﻳﻘﺎﻟﻐﺎﻥ ﮔﯜﻣﺒﻪﺯ ﺷﻪﻛﯩﻠﻠﯩﻚ ﻗﻪﺩﯨﻤﻘﻰ ﺧﯩﺶ ﻗﻪﺑﺮﯨﻠﻪﺭ، ﺋﺎﺧﯩﺮﻩﺗﻠﯩﻚ ﺳﺎﭘﺎﻝ ﻗﺎﭼﯩﻼﺭ ﯞﻩ ﻗﻪﺑﺮﻩ ﺗﯧﻤﯩﺪﯨﻜﻰ ﺗﯘﻟﭙﺎﺭ (ﺋﯘﭼﺎﺭ ﺋﺎﺕ) ﻧﯘﺳﺨﯩﺴﻰ ﻛﯘﭼﺎﺭﻧﯩﯔ ﺗﯩﭙﯩﻚ ﻣﻪﺩﻩﻧﯩﻲ ﻳﺎﺩﯨﻜﺎﺭﻟﯩﻘﯩﻠﯩﺮﻯ ﺋﯩﺪﻯ. ﺋﻪﻣﻤﺎ ﺋﺎﻗﺴﯘ ﯞﯨﻼﻳﻪﺗﻠﯩﻚ ﭘﺎﺭﺗﻜﻮﻣﻨﯩﯔ ﺳﯧﻜﺮﯨﺘﺎﺭﻯ، ﺗﻪﺷﯟﯨﻘﺎﺕ ﺑﯚﻟﯜﻡ ﺑﺎﺷﻠﯩﻘﻠﯩﺮﻯ ﻗﯘﺭﻏﺎﻥ ﺭﻩﻫﺒﻪﺭﻟﯩﻚ ﺋﻮﺭﮔﺎﻥ ﺑﯘ ﻣﻪﺩﻩﻧﯩﻲ ﻳﺎﺩﯨﻜﺎﺭﻟﯩﻘﻼﺭﻧﻰ ﻣﯩﻼﺩﯨﺪﯨﻦ ﺋﯩﻠﮕﯩﺮﻯ 60 ‏- ﻳﯩﻠﯩﺪﺍ ﺧﯩﺘﺎﻳﻨﯩﯔ ﺧﻪﻥ ﺳﯘﻻﻟﯩﺴﻰ ﺗﻪﺳﯩﺲ ﻗﯩﻠﻐﺎﻥ 'ﺷﯩﻴﯜﺩﯗﺧﯘﻓﯘ' ﺩﻩﭖ ﺋﺎﺗﺎﻟﻐﺎﻥ ﻫﻪﺭﺑﯩﻲ ﺋﻮﺭﮔﺎﻧﻨﯩﯔ ﻛﯘﭼﺎﺭﻧﻰ ﺋﯩﺪﺍﺭﻩ ﻗﯩﻠﻐﺎﻧﻠﯩﻘﯩﻨﯩﯔ ﺑﯩﯟﺍﺳﺘﻪ ﭘﺎﻛﯩﺘﻰ، ﺩﻩﭖ ﺗﻪﺷﯟﯨﻖ ﻗﯩﻠﺪﻯ.

ﻫﺎﺯﯨﺮ ﺋﺎﻣﯧﺮﯨﻜﯩﺪﺍ ﺗﯘﺭﯗﯞﺍﺗﻘﺎﻥ ﺗﺎﺭﯨﺦ ﭘﻪﻧﻠﯩﺮﻯ ﺑﯘﻳﯩﭽﻪ ﺩﻭﻛﺘﻮﺭ ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﻯ ﺑﯘ ﻫﻪﻗﺘﻪ ﻣﯘﻻﻫﯩﺰﻩ ﺋﯧﻼﻥ ﻗﯩﻠﯩﭗ، ﺑﯘ ﻗﯧﺘﯩﻢ ﻛﯘﭼﺎﺭﺩﯨﻦ ﺗﯧﭙﯩﻠﻐﺎﻥ ﻗﻪﺩﯨﻤﻘﻰ ﻗﻪﺑﺮﯨﻠﻪﺭ ﯞﻩ ﺋﯘﻧﯩﯖﺪﺍ ﺳﺎﻗﻠﯩﻨﯩﭗ ﻗﺎﻟﻐﺎﻥ ﻣﻪﺩﻩﻧﯩﻲ ﻳﺎﺩﯨﻜﺎﺭﻟﯩﻘﻼﺭﻧﯩﯔ ﺗﻪﺗﻘﯩﻘﺎﺕ ﻗﯩﻤﻤﯩﺘﻰ ﻧﺎﻫﺎﻳﯩﺘﻰ ﻳﯘﻗﯩﺮﻯ ﺋﯩﻜﻪﻧﻠﯩﻜﯩﻨﻰ ﻣﯘﻗﯩﻤﻼﭘﻼ ﻗﺎﻟﻤﺎﻱ، ﺑﻪﻟﻜﻰ ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﻰ ﺗﯩﻠﻐﺎﻥ ﺋﺎﻟﻐﺎﻥ ﺧﯩﺘﺎﻳﻨﯩﯔ ﺧﻪﻥ ﺳﯘﻻﻟﯩﺴﻰ ﺩﻩﯞﺭﯨﺪﯨﻜﻰ 'ﺷﯩﻴﯜﺩﯗﺧﯘﻓﯘ' ﺩﯦﮕﻪﻥ ﺋﻮﺭﮔﺎﻧﻨﯩﯔ ﻗﺎﻧﺪﺍﻕ ﺋﻮﺭﮔﺎﻥ ﺋﯩﻜﻪﻧﻠﯩﻜﻰ ﻫﻪﻗﻘﯩﺪﻩ ﻣﯘﻻﻫﯩﺰﯨﺴﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﯨﻨﯩﯔ ﻗﺎﺭﯨﺸﯩﭽﻪ، ﻛﯘﭼﺎﺭﺩﯨﻦ ﺑﺎﻳﻘﺎﻟﻐﺎﻥ ﻗﻪﺩﯨﻤﻘﻰ ﻣﻪﺩﻩﻧﯩﻴﻪﺗﻠﻪﺭﻧﯩﯔ ﻫﯧﭽﻘﺎﻳﺴﯩﺴﯩﻨﻰ ﺧﯩﺘﺎﻳﻨﯩﯔ 'ﺷﯩﻴﯜ ﺩﯗﺧﯘﻓﯘ' ﻳﺎﺭﺍﺗﻘﺎﻥ ﺋﻪﻣﻪﺱ، ﺑﻪﻟﻜﻰ ﻛﯘﭼﺎﺭﻧﯩﯔ ﻳﻪﺭﻟﯩﻚ ﺧﻪﻟﻘﻰ ﺋﯚﺯﻟﯩﺮﻯ ﻳﺎﺭﺍﺗﻘﺎﻥ ﻣﻪﺩﻩﻧﯩﻴﻪﺕ.

ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﯨﻨﯩﯔ ﻗﺎﺭﯨﺸﯩﭽﻪ، ﺧﻪﻥ ﺳﯘﻻﻟﯩﺴﯩﻨﯩﯔ 'ﺷﯩﻴﯜﺩﯗﺧﯘﻓﯘ'ﺳﻰ ﺋﺎﺳﺎﺳﻪﻥ ﻫﯘﻧﻼﺭﻏﺎ ﺯﻩﺭﺑﻪ ﺑﯧﺮﯨﺸﻜﻪ ﻗﺎﺭﯨﺘﯩﻠﻐﺎﻥ ﺋﻮﺭﮔﺎﻥ، ﻳﻪﺭﻟﯩﻚ ﻣﻪﺩﻩﻧﯩﻴﻪﺗﻠﻪﺭﻧﻰ ﺋﯘﻧﯩﯖﻐﺎ ﻣﯘﻧﺎﺳﯩﯟﻩﺗﻠﯩﻚ ﺩﻩﭖ ﻗﺎﺭﺍﺵ ﺋﻪﺧﻤﯩﻘﺎﻧﯩﻠﯩﻖ.

ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﻯ ﺧﻪﻥ ﺳﯘﻻﻟﯩﺴﯩﻨﯩﯔ ﻫﯘﻧﻼﺭﻏﺎ ﺳﻪﺩﺩﯨﭽﯩﻨﺪﯨﻼ ﻗﺎﺭﺷﯩﻠﯩﻖ ﺑﯩﻠﺪﯛﺭﯛﭖ ﻗﺎﻟﻤﺎﻱ، ﺑﻪﻟﻜﻰ ﺳﯩﺮﺗﻘﺎ ﭼﯩﻘﯩﺸﻘﺎ ﻣﻪﺟﺒﯘﺭ ﺑﻮﻟﻐﺎﻧﻠﯩﻘﯩﻨﯩﯔ ﺳﻪﯞﻩﺑﻠﯩﺮﯨﻨﻰ ﯞﻩ ﺳﺮﺗﻘﺎ ﭼﯩﻘﻘﺎﻧﺪﯨﻦ ﻛﯧﻴﯩﻦ ﻫﻪﺭﺩﺍﺋﯩﻢ ﻳﻪﺭﻟﯩﻚ ﺧﻪﻟﻘﻠﻪﺭﻧﯩﯔ ﯞﻩ ﻫﯘﻧﻼﺭﻧﯩﯔ ﻗﺎﺭﺷﯩﻠﯩﻘﯩﻐﺎ ﺋﯘﭼﺮﺍﭖ ﻫﺎﻟﺴﯩﺮﯨﻐﺎﻥ ﺋﺎﻗﯩﯟﯨﺘﯩﻨﻰ ﺑﺎﻳﺎﻥ ﻗﯩﻠﺪﻯ.

ﻗﺎﻫﺎﺭ ﺑﺎﺭﺍﺕ ﺋﻪﭘﻪﻧﺪﻯ ﻳﻪﻧﻪ، ﺗﺎﯓ ﺳﯘﻻﻟﯩﺴﻰ ﺩﻩﯞﺭﯨﺪﯨﻤﯘ ﺑﯘﻧﺪﺍﻕ 'ﺷﯩﻴﯜﺩﯗﺧﯘﻓﯘ' ﻗﯘﺭﯗﻟﻐﺎﻧﻠﯩﻘﯩﻨﻰ، ﺋﯘﻧﯩﯔ ﻳﻪﻧﻪ ﻣﻪﻏﻠﯘﭖ ﺑﻮﻟﻐﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﺪﻯ ﯞﻩ ﺧﯩﺘﺎﻱ ﻗﯘﺭﻏﺎﻥ ﺑﯘﻧﺪﺍﻕ ﺋﻮﺭﮔﺎﻧﻨﻰ، ﺋﻪﻣﻪﻟﯩﻴﻪﺗﺘﻪ ﺧﯩﺘﺎﻳﻼﺭﻧﯩﯔ ﺳﯩﺮﺗﻘﺎ ﺗﺎﺟﺎﯞﯗﺯﭼﯩﻠﯩﻖ ﻗﯩﻠﻐﺎﻧﻠﯩﻘﯩﻨﯩﯔ ﭘﺎﻛﯩﺘﻰ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻫﺎﺯﯨﺮ ﺑﯘ ﻫﻪﻗﺘﻪ ﺩﻩﯞﺍﺗﻘﺎﻥ ﮔﻪﭘﻠﯩﺮﻯ ﺑﻮﻟﺴﺎ، ﭘﻪﻗﻪﺕ ﺑﯩﺮ ﺳﯩﻴﺎﺳﯩﻲ ﺗﻪﺷﯟﯨﻘﺎﺕ، ﻣﯘﺳﺘﻪﻣﻠﯩﻜﯩﭽﯩﻠﯩﻚ ﺳﯩﻴﺎﺳﻪﺕ، ﺩﻩﭖ ﻛﯚﺭﺳﻪﺗﺘﻰ. (ﯞﻩﻟﻰ)