ﯞﻩﺗﻪﻥ ﺋﯩﭽﻰ ﯞﻩ ﺳﯩﺮﺗﯩﺪﯨﻜﻰ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﺋﯘﻳﻐﯘﺭ ﻣﺎﺋﺎﺭﯨﭙﻰ ﻫﻪﻗﻘﯩﺪﯨﻜﻰ ﻣﯘﻻﻫﯩﺰﯨﻠﯩﺮﻯ

• ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﯩﺴﺘﺎﻧﺴﯩﻤﯩﺰ ﻣﯘﺧﺒﯩﺮﻟﯩﺮﯨﻨﯩﯔ ﺋﯩﮕﯩﻠﯩﺸﯩﭽﻪ، ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﻯ، ﺋﯘﻳﻐﯘﺭ ﺋﯩﻠﻰ ﻣﺎﺋﺎﺭﯨﭙﯩﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﻣﻪﺳﯩﻠﯩﻠﻪﺭ ﻫﻪﻗﻘﯩﺪﻩ ﺋﯚﺯ ﭘﯩﻜﯩﺮﻟﯩﺮﯨﻨﻰ ﻫﯚﻛﯜﻣﻪﺗﻜﻪ ﺑﯩﻠﺪﯛﺭﯛﺷﻜﻪ ﺋﯩﻨﺘﯩﻠﺴﯩﻤﯘ، ﺋﻪﻣﻤﺎ ﻫﯚﻛﯜﻣﻪﺗﻨﯩﯔ ﺗﯜﺭﻟﯜﻙ ﺑﯧﺴﯩﻤﻠﯩﺮﯨﺪﯨﻦ ﺋﻪﻧﺪﯨﺸﻪ ﻗﯩﻠﯩﭗ، ﺑﯘ ﻫﻪﻗﺘﻪ ﺋﯧﻐﯩﺰ ﺋﯧﭽﯩﺸﻘﺎ ﭘﯩﺘﯩﻨﺎﻟﻤﺎﻳﺪﯨﻜﻪﻥ. ﭼﯜﻧﻜﻰ ﺧﯩﺘﺎﻱ ﺩﺍﺋﯩﺮﯨﻠﯩﺮﻯ ﻫﯚﻛﯜﻣﻪﺗﻜﻪ ﻗﺎﺭﺷﻰ ﭘﯩﻜﯩﺮ ﺑﺎﻳﺎﻥ ﻗﯩﻠﻐﺎﻥ ﺋﯚﻛﺘﯩﭽﯩﻠﻪﺭﻧﻰ " ﺑﯚﻟﮕﯜﻧﭽﻰ"، " ﻗﯘﺗﺮﺍﺗﻘﯘﭼﻰ" ﺩﯦﮕﻪﻧﮕﻪ ﺋﻮﺧﺸﺎﺵ ﺟﯩﻨﺎﻳﻪﺗﻠﻪﺭ ﺑﯩﻠﻪﻥ ﺋﻪﻳﯩﺒﻠﻪﭖ، ﺟﺎﺯﺍﻟﯩﻐﺎﻧﺪﯨﻦ ﺳﯩﺮﺕ ﻫﻪﺗﺘﺎ ﺗﯜﺭﻣﯩﻠﻪﺭﮔﻪ ﺗﺎﺷﻼﻳﺪﯨﻜﻪﻥ.

ﺑﯩﺮ ﻗﯩﺴﯩﻢ ﺩﺍﺩﯨﻞ، ﺟﯩﮕﻪﺭﻟﯩﻚ ﺯﯨﻴﺎﻟﯩﻴﻼﺭﻧﯩﯔ ﻛﯚﺯ - ﻗﺎﺭﺍﺷﻠﯩﺮﻯ

ﻳﯘﻗﯘﺭﻗﯩﺪﻩﻙ ﺧﻪﺗﻪﺭﻟﻪﺭﮔﻪ ﻗﺎﺭﯨﻤﺎﻱ، ﺋﯘﻳﻐﯘﺭ ﻣﺎﺋﺎﺭﯨﭙﯩﺪﺍ ﯞﻩ ﺟﻪﻣﺌﯩﻴﯩﺘﯩﺪﻩ ﻳﯜﺯ ﺑﯧﺮﯨﯟﺍﺗﻘﺎﻥ ﻣﻪﺳﯩﻠﯩﻠﻪﺭ ﯞﺍﻗﺘﯩﺪﺍ ﻫﻪﻝ ﻗﯩﻠﯩﻨﻤﯩﺴﺎ، ﺋﯩﻨﺘﺎﻳﯩﻦ ﻳﺎﻣﺎﻥ ﺋﺎﻗﯩﯟﻩﺗﻠﻪﺭﻧﯩﯔ ﻣﻪﻳﺪﺍﻧﻐﺎ ﻛﯧﻠﯩﺪﯨﻐﺎﻧﻠﯩﻘﯩﻨﻰ ﻣﯚﻟﭽﻪﺭﻟﯩﮕﻪﻥ ﻳﻪﻧﻪ ﺑﯩﺮ ﻗﯩﺴﯩﻢ ﺯﯨﻴﺎﻟﯩﻴﻼﺭ، ﻳﻪﻧﯩﻼ ﺋﯚﺯ ﭘﯩﻜﯩﺮﻟﯩﺮﯨﻨﻰ ﺩﺍﺩﯨﻠﻠﯩﻖ ﺑﯩﻠﻪﻥ ﺋﻮﺗﺘﯘﺭﯨﻐﺎ ﻗﻮﻳﯘﺷﻘﺎ ﺟﯜﺭﺋﻪﺕ ﻗﯩﻼﻻﻳﺪﯨﻜﻪﻥ.

ﯞﻩﺗﻪﻥ ﺋﯩﭽﯩﺪﯨﻜﻰ ﺑﯩﺮ ﺯﯨﻴﺎﻟﯩﻲ، ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﯩﭗ ﺋﯘﻳﻐﯘﺭﻻﺭﻧﯩﯔ ﻣﺎﺋﺎﺭﯨﭗ ﺳﺎﻫﻪﺳﯩﺪﻩ ﻳﯜﺯ ﺑﯧﺮﯨﯟﺍﺗﻘﺎﻥ ﺋﻪﻫﯟﺍﻟﻼﺭ، ﺗﻪﯕﺴﯩﺰﻟﯩﻚ ﺷﯘﻧﯩﯖﺪﻩﻙ ﺋﯩﺸﺴﯩﺰﻟﯩﻖ ﺋﻪﻫﯟﺍﻟﻠﯩﺮﻯ ﺗﻮﻏﺮﯨﺴﯩﺪﺍ ﺗﻮﺧﺘﺎﻟﺪﻯ.

ﺋﯘﻧﯩﯔ ﺑﯩﻠﺪﯛﺭﯛﺷﯩﭽﻪ، ﺋﯘﻳﻐﯘﺭ ﺋﯧﻠﯩﻨﯩﯔ ﭼﻮﯓ ﺷﻪﻫﻪﺭ ﯞﻩ ﭼﻪﺕ ﻳﯧﺰﺍ ‏- ﻗﯩﺸﻼﻗﻠﯩﺮﯨﻐﯩﭽﻪ، ﺋﯘﻳﻐﯘﺭ ﺋﺎﺗﺎ ‏- ﺋﺎﻧﯩﻼﺭ ﺋﺎﺭﯨﺴﯩﺪﺍ ﭘﻪﺭﺯﻩﻧﺘﻠﯩﺮﯨﻨﻰ ﺧﯩﺘﺎﻳﭽﻪ ﻣﻪﻛﺘﻪﭘﻠﻪﺭﮔﻪ ﺋﻮﻗﯘﺷﻘﺎ ﺑﯧﺮﯨﺪﯨﻐﺎﻥ ﻫﻪﺭﯨﻜﻪﺗﻠﻪﺭ ﺋﻪﯞﺝ ﺋﺎﻟﻐﺎﻥ ﺑﻮﻟﯘﭖ، ﮔﻪﺭﭼﻪ ﺋﺎﺗﺎ - ﺋﺎﻧﯩﻼﺭ ﺑﺎﻟﯩﻠﯩﺮﯨﻨﯩﯔ ﺧﯩﺘﺎﻳﭽﻪ ﺋﻮﻗﯘﺷﯩﻨﻰ ﺋﺎﺭﺯﯗ ﻗﯩﻠﺴﯩﻤﯘ، ﺋﯘﻳﻐﯘﺭ ﺑﺎﻟﯩﻠﯩﺮﯨﻨﯩﯔ ﺧﯩﺘﺎﻱ ﻣﻪﻛﺘﻪﭘﻠﯩﺮﯨﮕﻪ ﺋﺎﺳﺎﻥ ﻗﻮﺑﯘﻝ ﻗﯩﻠﯩﻨﻤﺎﻳﺪﯨﻐﺎﻧﻠﯩﻘﯩﻨﻰ ﺋﯧﻴﺘﺘﻰ.

ﺋﯘﻳﻐﯘﺭ ﺋﯧﻠﯩﺪﯨﻜﻰ ﺧﯩﺘﺎﻱ ﯞﻩ ﺋﯘﻳﻐﯘﺭ ﻣﻪﻛﺘﻪﭘﻠﯩﺮﻯ ﺋﻮﺗﺘﯘﺭﺳﯩﺪﯨﻜﻰ ﭘﻪﺭﻕ

ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺋﯘﻳﻐﯘﺭ ﺋﯧﻠﯩﺪﻩ ﺧﯩﺘﺎﻱ ﻣﻪﻛﺘﻪﭘﻠﯩﺮﻯ ﺑﯩﻠﻪﻥ ﺋﯘﻳﻐﯘﺭ ﻣﻪﻛﺘﻪﭘﻠﯩﺮﻯ ﺋﻮﺗﺘﯘﺭﯨﺴﯩﺪﯨﻜﻰ ﭘﻪﺭﻕ ﺋﯩﻨﺘﺎﻳﯩﻦ ﭼﻮﯓ ﺋﯩﻜﻪﻥ. ﺑﻮﻟﯘﭘﻤﯘ ﺋﻮﻗﯘﺗﯘﺵ ﺷﺎﺭﺍﺋﯩﺘﻰ ﺟﻪﻫﻪﺗﺘﻪ ﺧﯩﺘﺎﻱ ﻣﻪﻛﺘﻪﭘﻠﯩﺮﯨﺪﻩ ﺳﯩﻨﯩﭙﻼﺭ ﭘﺎﻛﯩﺰ، ﺋﺎﺯﺍﺩﻩ، ﺋﯜﺳﺘﻪﻝ - ﺋﻮﺭﯗﻧﺪﯗﻗﻼﺭ ﺋﯚﻟﭽﻪﻣﻠﯩﻚ ﻳﺎﺳﺎﻟﻐﺎﻥ، ﺗﻪﺟﺮﯨﺒﯩﺨﺎﻧﺎ ﺋﯜﺳﻜﯜﻧﯩﻠﯩﺮﻯ ﺗﻮﻟﯘﻕ، ﺋﻮﻗﯘﺗﯘﺵ ﻣﺎﺗﯧﺮﯨﻴﺎﻟﻠﯩﺮﻯ ﺳﻪﺭﺧﯩﻞ ﺗﻪﻳﻴﺎﺭﻻﻧﻐﺎﻥ ﺑﻮﻟﯘﭖ، ﺑﯘﻧﯩﯔ ﺋﻪﻛﺴﯩﭽﻪ ﺋﯘﻳﻐﯘﺭ ﻣﻪﻛﺘﻪﭘﻠﯩﺮﯨﺪﯨﻜﻰ ﺷﺎﺭﺍﺋﯩﺖ ﺋﯩﻨﺘﺎﻳﯩﻦ ﻧﺎﭼﺎﺭ ﺋﯩﻜﻪﻥ. ﻫﻪﺗﺘﺎ ﺑﯩﺮ ﻗﯩﺴﯩﻢ ﻧﺎﻫﯩﻴﻪ ﯞﻩ ﻳﯧﺰﯨﻼﺭﺩﺍ ﺑﺎﻟﯩﻼﺭ ﺋﻮﻗﯘﻳﺪﯨﻐﺎﻥ ﺳﯩﻨﯩﭗ ﺑﻮﻟﻤﯩﻐﺎﭼﻘﺎ، ﻗﯩﺶ ﻛﯜﻧﻠﯩﺮﻯ ﺑﺎﻟﯩﻼﺭﻏﺎ ﺩﻩﺭﺱ ﺑﯧﺮﯨﺪﯨﻐﺎﻥ ﺟﺎﻱ ﺗﯧﭙﯩﻠﻤﺎﻱ ﻗﺎﻟﯩﺪﯨﻜﻪﻥ.

ﺋﯘﻳﻐﯘﺭ ﺋﯧﻠﯩﺪﻩ ﻳﯜﺯ ﺑﯧﺮﯨﯟﺍﺗﻘﺎﻥ ﺋﯩﺸﺴﯩﺰﻟﯩﻖ ﻣﻪﺳﯩﻠﯩﺴﻰ، ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﻯ ﺋﻪﻧﺪﯨﺸﻪ ﻗﯩﻠﯩﯟﺍﺗﻘﺎﻥ ﻣﯘﻫﯩﻢ ﺋﺎﻣﯩﻠﻼﺭﻧﯩﯔ ﻳﻪﻧﻪ ﺑﯩﺮﻯ ﻫﯧﺴﺎﺑﻠﯩﻨﯩﺪﯗ. ﯞﻩﺗﻪﻥ ﺋﯩﭽﯩﺪﯨﻜﻰ ﺋﯘﻳﻐﯘﺭ ﺯﯨﻴﺎﻟﯩﻴﻠﯩﺮﯨﻨﯩﯔ ﺋﯩﺸﺴﯩﺰﻟﯩﻖ ﻫﻪﻗﻘﯩﺪﯨﻜﻰ ﻗﺎﺭﺍﺷﻠﯩﺮﻯ ﻗﺎﻧﺪﺍﻕ ؟ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﺑﯘ ﻫﻪﻗﺘﻪ ﻧﯧﻤﻪ ﺩﻩﻳﺪﯗ؟ ﺩﯦﮕﻪﻥ ﺳﯘﺋﺎﻟﻼﺭ ﺗﻮﻏﺮﯨﺴﯩﺪﺍ ﯞﻩ ﺧﯩﺘﺎﻱ ﻣﻪﻛﺘﻪﭘﻠﯩﺮﻯ ﺑﯩﻠﻪﻥ ﺋﯘﻳﻐﯘﺭ ﻣﻪﻛﺘﻪﭘﻠﯩﺮﻯ ﺋﺎﺭﯨﺴﯩﺪﯨﻜﻰ ﭘﻪﺭﻕ ﺗﻮﻏﺮﯨﺴﯩﺪﺍ ﺗﻮﺧﺘﺎﻟﻐﺎﻥ ﺑﯩﺮ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﻛﯚﺯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﻳﺎﯞﺭﯗﭘﺎ ﺋﯘﻳﻐﯘﺭ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﻨﯩﯔ ﺑﺎﺵ ﻛﺎﺗﯩﭙﻰ ﺋﯜﻣﯩﺪ ﺋﺎﮔﺎﻫﻰ ﺋﻪﭘﻪﻧﺪﻯ، ﻧﯚﯞﻩﺗﺘﻪ ﺋﯘﻳﻐﯘﺭ ﻣﺎﺋﺎﺭﯨﭙﯩﺪﺍ ﻳﯜﺯ ﺑﯧﺮﯨﯟﺍﺗﻘﺎﻥ ﻣﻪﺳﯩﻠﻪﺭ ﺋﯜﺳﺘﯩﺪﻩ ﺗﻪﻫﻠﯩﻞ ﻳﯜﺭﮔﯜﺯﯛﭖ ﺋﯚﺗﺘﻰ. (ﺋﻪﻗﯩﺪﻩ)