ﺗﻪﯕﺮﯨﺘﺎﻍ ﻣﯘﺯ ﭼﻮﻗﻘﯩﻠﯩﺮﯨﻤﯘ ﺳﺎﻳﺎﮬﻪﺗﭽﯩﻠﻪﺭ ﺗﻪﺭﯨﭙﯩﺪﯨﻦ ﺑﯘﻟﻐﺎﻧﺪﻯ

ﺋﯘﻳﻐﯘﺭ ﺋﯧﻠﯩﺪﯨﻜﻰ ﺗﻪﯕﺮﯨﺘﺎﻍ ﻣﯘﺯ ﭼﻮﻗﻘﯩﻠﯩﺮﯨﻨﻰ ﻛﯚﺯﯛﺗﯜﺵ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﯨﻦ ﺋﯩﮕﯩﻠﯩﺸﯩﻤﯩﺰﭼﻪ، ﻣﯘﺯ ﭼﻮﻗﻘﯩﻠﯩﺮﯨﻨﻰ ﻛﯚﺯﯛﺗﯜﺵ ﻣﻪﺭﻛﯩﺰﯨﻨﯩﯔ ﺧﺎﺩﯨﻤﻠﯩﺮﻯ ﻳﯧﻘﯩﻨﺪﺍ، ﺗﻪﯕﺮﯨﺘﺎﻍ ﭼﻮﻗﻘﯩﻠﯩﺮﯨﺪﯨﻜﻰ ﻗﺎﺭ- ﻣﯘﺯﻻﺭﻧﯩﯔ ﺋﯧﺮﯨﺶ ﺳﯜﺭﺋﯩﺘﻰ ﮬﻪﻗﻘﯩﺪﯨﻜﻰ ﺳﺎﻧﻠﯩﻖ ﻣﻪﻟﯘﻣﺎﺗﻼﺭﻧﻰ ﻳﯩﻘﻘﯩﻠﻰ ﭼﯩﻘﻘﯩﻨﯩﺪﺍ، ﺩﯦﯖﯩﺰ ﻳﯜﺯﯨﺪﯨﻦ 4 ﻣﯩﯔ ﺑﯩﺮ ﻳﯜﺯ ﻣﯧﺘﯩﺮ ﺋﯩﮕﯩﺰﻟﯩﻜﺘﯩﻜﻰ ﺑﯩﺮﯨﻨﭽﻰ ﻧﻮﻣﯘﺭﻟﯘﻕ ﻣﯘﺯ ﭼﻮﻗﻘﺎ ﺩﻩﭖ ﻧﺎﻡ ﺋﺎﻟﻐﺎﻥ ﺑﯘﻏﺪﺍ ﭼﻮﻗﻘﯩﺴﯩﻐﺎ ﺋﻮﺭﻧﺎﺗﻘﺎﻥ ﺗﻪﺟﺮﯨﺒﻪ، ﺗﻪﺗﻘﯩﻘﺎﺕ ﺋﯜﺳﻜﯜﻧﯩﻠﯩﺮﯨﻨﯩﯖﻤﯘ ﺳﺎﻳﺎﮬﻪﺗﭽﯩﻠﻪﺭ ﺗﻪﺭﯨﭙﯩﺪﯨﻦ ﻗﻮﻣﯘﺭﯗﻟﯘﭖ ﻛﯧﺘﯩﻠﮕﻪﻧﻠﯩﻜﯩﻨﻰ، ﺑﻪﺯﯨﻠﯩﺮﻯ ﺳﯘﻧﺪﯗﺭﯗﻟﯘﭖ ﺋﯧﻐﯩﺮ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﯨﻐﺎﻧﻠﯩﻘﯩﻨﻰ، ﮬﻪﻣﺪﻩ ﺋﻪﯓ ﻣﯘﮬﯩﻤﻰ ﻣﯘﺯﻟﯘﻗﻼﺭﻧﯩﯔ ﺗﻪﺗﻘﯩﻘﺎﺗﯩﺪﺍ ﻗﯩﻤﻤﻪﺗﻠﯩﻚ ﺑﻮﻟﻐﺎﻥ ﺗﻪﺗﻘﯩﻘﺎﺕ ﻧﻪﺗﯩﺠﯩﻠﯩﺮﯨﻨﯩﯔ ﻳﻮﻗﺎﭖ ﻛﻪﺗﻜﻪﻧﻠﯩﻜﯩﻨﻰ ﺑﺎﻳﻘﯩﻐﺎﻥ. ﺑﯘﻧﯩﯔ ﺑﯩﻠﻪﻥ ﻧﻪﭼﭽﻪ ﺋﻮﻥ ﻳﯩﻠﺪﯨﻦ ﺑﯘﻳﺎﻥ ﺋﯧﻠﯩﭗ ﺑﯧﺮﯨﻠﯩﯟﺍﺗﻘﺎﻥ ﺗﻪﯕﺮﯨﺘﺎﻍ ﻣﯘﺯ ﭼﻮﻗﻘﯩﻠﯩﺮﯨﻨﯩﯔ ﺋﯧﺮﯨﺶ ﮬﺎﻟﯩﺘﻰ ﮬﻪﻗﻘﯩﺪﻩ ﻣﯘﮬﯩﻢ ﺑﯩﺮ ﺋﯩﺴﺘﺎﺗﯩﺴﺘﯩﻜﯩﻠﯩﻖ ﺗﻪﺗﻘﯩﻘﺎﺕ ﻣﺎﺗﯧﺮﯨﻴﺎﻟﯩﺪﺍ ﺑﻮﺷﻠﯘﻕ ﭘﻪﻳﺪﺍ ﺑﻮﻟﻐﺎﻥ.

ﺳﺎﻳﺎﮬﻪﺗﻨﯩﯔ ﺋﻪﻛﺲ ﺭﻭﻟﻰ

ﺗﻪﺗﻘﯩﻘﺎﺗﭽﻰ ﺋﯩﻨﺠﯧﻨﯧﺮﻻﺭ، ﺑﯘ ﻣﯘﺯ ﭼﻮﻗﻘﯩﻐﺎ ﭼﯩﻘﯩﺶ ﺟﻪﺭﻳﺎﻧﯩﺪﺍ، ﺳﺎﻳﺎﮬﻪﺗﭽﯩﻠﻪﺭﻧﯩﯔ ﺗﺎﺷﻠﯩﻐﺎﻥ ﻗﯘﺭﯗﻕ ﺑﻮﺗﯘﻟﻜﺎ، ﭘﯩﻼﺳﺘﯩﻚ ﺧﺎﻟﺘﺎ، ﺗﺎﻣﺎﻛﺎ ﻗﯘﺗﯩﺴﻰ، ﻗﻪﻏﻪﺯ ﺩﯦﮕﻪﻧﺪﻩﻙ ﺋﻪﺧﻠﻪﺗﻠﻪﺭﻧﻰ ﻳﻮﻝ ﺑﻮﻳﻰ ﺋﯘﭼﺮﺍﺗﻘﺎﻥ.

ﺗﻪﯕﺮﯨﺘﺎﻍ ﻣﯘﺯ ﭼﻮﻗﻘﯩﻠﯩﺮﯨﻨﻰ ﻛﯚﺯﯛﺗﯜﺵ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﯨﻜﻰ ﺑﯘ ﺧﺎﺩﯨﻤﻨﯩﯔ ﺋﯧﻴﺘﯩﭗ ﺑﯧﺮﯨﺸﯩﭽﻪ، ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﺋﯘﻳﻐﯘﺭ ﺋﯧﻠﯩﻐﺎ ﻛﯧﻠﯩﯟﺍﺗﻘﺎﻥ ﺳﺎﻳﺎﮬﻪﺗﭽﯩﻠﻪﺭﻧﯩﯔ ﻛﯚﭘﯩﻴﯩﺸﯩﮕﻪ ﺋﻪﮔﯩﺸﯩﭗ ﺗﻪﯕﺮﯨﺘﺎﻍ ﺋﯧﺘﻪﻛﻠﯩﺮﯨﺪﯨﻜﻰ ﺳﺎﻳﺎﮬﻪﺕ ﺋﻮﺭﯗﻧﻠﯩﺮﯨﻨﯩﯖﻼ ﺋﯧﻜﻮﻟﻮﮔﯩﻴﯩﻠﯩﻚ ﻣﯘﮬﯩﺘﯩﺪﺍ ﺋﯧﻐﯩﺮ ﺑﯘﻟﻐﯩﻨﯩﺸﻼﺭ ﻛﯚﺭﯛﻧﯜﭘﻼ ﻗﺎﻟﻤﺎﻱ، ﻗﺎﺭ ﻣﯘﺯ ﭼﻮﻗﻘﯩﻠﯩﺮﯨﻨﯩﯖﻤﯘ ﻗﺎﺭﺍ ﻗﻮﻳﯘﻕ ﺳﺎﻳﺎﮬﻪﺗﭽﯩﻠﯩﻜﻜﻪ ﺋﯧﭽﯩﯟﯦﺘﯩﻠﯩﺸﻰ، ﺋﯘﻳﻐﯘﺭ ﺋﯧﻠﯩﻨﯩﯔ ﻣﯘﮬﯩﻢ ﺳﯘ ﻣﻪﻧﺒﻪﺳﻰ ﺑﻮﻟﻐﺎﻥ ﺑﯘ ﻣﯘﺯ ﭼﻮﻗﻘﯩﻼﺭﻧﯩﻤﯘ ﺋﻪﺳﻠﯩﮕﻪ ﻛﻪﻟﺘﯜﺭﮔﯜﺳﯩﺰ ﺯﯨﻴﺎﻧﻐﺎ ﺋﯘﭼﺮﺍﺗﻤﺎﻗﺘﺎ ﺋﯩﻜﻪﻥ. ﺑﻮﻟﯘﭘﻤﯘ ﺋﯜﺭﯛﻣﭽﯩﮕﻪ ﻳﯧﻘﯩﻦ ﺑﻮﻟﻐﺎﻥ ﺑﯘﻏﺪﺍ ﭼﻮﻗﻘﯩﺴﯩﻨﯩﯔ ﺑﯘﺯﻏﯘﻧﭽﯩﻠﯩﻘﻘﺎ ﺋﯘﭼﺮﯨﺸﻰ ﮬﻪﻣﻤﯩﺪﯨﻦ ﺋﯧﻐﯩﺮ ﺑﻮﻟﻤﺎﻗﺘﺎ ﺋﯩﻜﻪﻥ.

ﺩﯦﮭﻘﺎﻧﭽﯩﻠﯩﻘﻨﯩﯔ ﺳﯘ ﻣﻪﻧﺒﻪﺳﻰ

ﺋﯘﻳﻐﯘﺭ ﺋﯧﻠﯩﻨﯩﯔ ﺳﯩﻤﯟﻭﻟﻰ ﺑﻮﻟﻐﺎﻥ ﮬﻪﻳﯟﻩﺗﻠﯩﻚ ﺗﻪﯕﺮﯨﺘﺎﻏﻠﯩﺮﯨﻨﯩﯔ ﭘﻪﻗﻪﺕ 4000 ﻣﯧﺘﯩﺮﺩﯨﻦ ﺋﯩﮕﯩﺰ ﭼﻮﻗﻘﯩﻠﯩﺮﯨﻼ ﻗﯩﺸﻤﯘ ﻳﺎﺯ ﻗﺎﺭ-ﻣﯘﺯﻻﺭ ﺑﯩﻠﻪﻥ ﻗﺎﭘﻠﯩﻨﯩﭗ ﺗﯘﺭﯨﺪﯗ. ﺋﯘﻳﻐﯘﺭ ﺋﯧﻠﯩﻨﯩﯔ ٪ 60 ﺋﻪﺗﺮﺍﭘﯩﺪﯨﻜﻰ ﺩﯦﮭﻘﺎﻧﭽﯩﻠﯩﻖ ﻣﻪﻳﺪﺍﻧﻠﯩﺮﻯ ﺗﻪﯕﺮﯨﺘﯧﻐﯩﻨﯩﯔ ﻣﯘﺷﯘ ﻗﺎﺭ ﻣﯘﺯ ﺳﯘﻟﯩﺮﯨﻐﺎ ﺗﺎﻳﯩﻨﯩﺪﯗ. ﺗﻪﯕﺮﯨﺘﺎﻍ ﺳﯩﺴﺘﯧﻤﯩﺴﯩﻨﯩﯔ ﺷﻪﺭﻗﯩﻲ ﻗﯩﺴﯩﻢ ﺗﯧﻐﻰ ﺑﻮﻟﻐﺎﻥ، ﺑﯘﻏﺪﺍ ﭼﻮﻗﻘﯩﺴﯩﻨﯩﯔ ﺋﻪﯓ ﺋﯩﮕﯩﺰ ﻧﻮﻗﺘﯩﺴﻰ 5445 ﻣﯧﺘﯩﺮ ﺑﻮﻟﯘﭖ، ﺋﯘﻧﯩﯖﻐﺎ 1- ﻧﻮﻣﯘﺭﻟﯘﻕ ﻣﯘﺯ ﭼﻮﻗﻘﺎ ﺩﯨﮕﻪﻥ ﻧﺎﻡ ﺑﯧﺮﯨﻠﮕﻪﻥ. ﺑﯘﻏﺪﺍ ﺗﯧﻐﻰ ﺑﺎﻏﺮﯨﻐﺎ ﻳﻪﻧﻪ ﺩﯗﻧﻴﺎﻏﺎ ﻣﻪﺷﮭﯘﺭ ﺑﯘﻏﺪﺍ ﻛﯚﻟﻰ ﺟﺎﻳﻼﺷﻘﺎﻥ ﺑﻮﻟﻐﺎﭼﻘﺎ، ﺑﯘ ﺟﺎﻱ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﻪﯓ ﻧﯘﻗﺘﯩﻠﯩﻖ ﺳﺎﻳﺎﮬﻪﺕ ﺋﻮﺭﯗﻧﻠﯩﺮﯨﺪﯨﻦ ﺑﻮﻟﯘﭖ ﻛﻪﻟﻤﻪﻛﺘﻪ.

ﻳﻪﺭﻟﯩﻚ ﺳﺎﻳﺎﮬﻪﺕ ﺋﻮﺭﯗﻧﻠﯩﺮﻯ ﺑﯘﻏﺪﺍ ﺳﺎﻳﺎﮬﻪﺕ ﺭﺍﻳﻮﻧﯩﺪﯨﻦ ﻳﯧﻘﯩﻨﻘﻰ ﻳﯩﻠﻼﺭﺩﯨﻦ ﺑﯧﺮﻯ ﻛﯚﭖ ﺋﯩﻘﺘﯩﺴﺎﺩﯨﻲ ﻗﯩﻤﻤﻪﺕ ﻳﺎﺭﯨﺘﯩﭗ ﻛﯧﻠﯩﯟﺍﺗﻘﺎﻥ ﺑﻮﻟﺴﯩﻤﯘ، ﺋﻪﻣﻤﺎ، ﺑﯘ ﺟﺎﻳﻨﯩﯔ ﺗﺎﺯﯨﻠﯩﻖ ﻣﯘﮬﯩﺖ ﺋﺎﺳﺮﺍﺵ ﺋﻪﺳﻠﯩﮭﻪﻟﯩﺮﻯ ﯞﻩ ﺗﯜﺯﯛﻟﻤﯩﻠﯩﺮﻯ ﻧﺎﮬﺎﻳﯩﺘﻰ ﻛﻪﻣﭽﯩﻞ ﺋﯩﻜﻪﻥ.

ﺩﺍﺋﯩﻤﻠﯩﻖ ﺋﯩﺶ

ﺋﯩﻴﻮﻧﺪﺍ ﺗﻪﯕﺮﯨﺘﺎﻍ ﺗﻮﺭ ﺑﯧﺘﯩﺪﻩ ﺑﯘﻏﺪﺍ ﭼﻮﻗﻘﯩﺴﯩﺪﯨﻦ 6 ﺗﻮﻧﻨﺎ ﺋﻪﺗﺮﺍﭘﯩﺪﺍ ﺳﺎﻳﺎﮬﻪﺗﭽﯩﻠﻪﺭ ﺗﺎﺷﻠﯩﻐﺎﻥ ﺋﻪﺧﻠﻪﺗﻠﻪﺭ ﺑﺎﻳﻘﺎﻟﻐﺎﻧﻠﯩﻘﻰ ﮬﻪﻗﻘﯩﺪﻩ ﺧﻪﯞﻩﺭ ﺋﯧﻼﻥ ﻗﯩﻠﻐﺎﻥ ﺋﯩﺪﻯ. ﮔﻪﺭﭼﻪ ﺋﯘ ﻧﯚﯞﻩﺕ ﺑﯘ ﺋﻪﺧﻠﻪﺗﻠﻪﺭﻧﯩﯔ ﻣﯘﻧﺎﺳﯩﯟﻩﺗﻠﯩﻚ ﺋﻮﺭﯗﻧﻼﺭ ﯞﻩ ﺑﻪﺯﻯ ﺧﺎﻟﯩﺲ ﻛﯩﺸﯩﻠﻪﺭﻧﯩﯔ ﻳﺎﺭﺩﯨﻤﻰ ﺑﯩﻠﻪﻥ ﺗﺎﺯﯨﻼﻧﻐﺎﻧﻠﯩﻘﻰ ﻗﻪﻳﺖ ﻗﯩﻠﯩﻨﻐﺎﻥ ﺑﻮﻟﺴﯩﻤﯘ ﺋﻪﻣﻤﺎ، ﺋﯘﻧﯩﯖﺪﯨﻦ ﻛﯧﻴﯩﻦ ﺑﯘﻏﺪﺍ ﺋﯧﺘﻪﻛﻠﯩﺮﻯ ﮬﻪﺗﺘﺎ ﻣﯘﺯ ﭼﻮﻗﻘﻠﯩﺮﯨﺪﯨﻜﻰ ﻣﯘﮬﯩﺖ ﺑﯘﻟﻐﯩﻨﯩﺶ ﻳﻪﻧﻪ ﺩﺍﯞﺍﻣﻼﺷﻤﺎﻗﺘﺎ ﺋﯩﻜﻪﻥ.

ﺑﯘ ﮬﻪﻗﺘﻪ ﺋﯜﺭﯛﻣﭽﯩﺪﯨﻦ ﺯﯨﻴﺎﺭﯨﺘﯩﻤﯩﺰﻧﻰ ﻗﻮﺑﯘﻝ ﻗﯩﻠﻐﺎﻥ ﺑﯩﺮ ﻳﺎﺵ ﺋﯘﻳﻐﯘﺭ ﺋﯧﻠﯩﻨﯩﯔ ﺳﺎﻳﺎﮬﻪﺕ ﺋﻮﺭﯗﻧﻠﯩﺮﯨﻨﯩﯔ ﻣﯘﮬﯩﺖ ﺑﯘﺯﻏﯘﻧﭽﯩﻠﯩﻘﯩﻐﺎ ﺋﯘﭼﺮﯨﺸﯩﻐﺎ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﯨﻦ ﻛﯚﭘﻠﻪﭖ ﻛﯧﻠﯩﯟﺍﺗﻘﺎﻥ ﺳﺎﻳﺎﮬﻪﺗﭽﯩﻠﻪﺭ ﺳﻪﯞﻩﺑﭽﻰ ﺋﯩﻜﻪﻧﻠﯩﻜﯩﻨﻰ ﺑﯩﻠﺪﯛﺭﺩﻯ.

ﭘﯘﻟﻨﯩﯔ ﺋﻮﺭﻧﻰ

ﻧﯚﯞﻩﺗﺘﻪ ﺗﻪﯕﺮﯨﺘﯧﻐﯩﻨﯩﯔ ﻗﺎﺭﻟﯩﻖ ﭼﻮﻗﻘﯩﻠﯩﺮﯨﻨﯩﯖﻤﯘ ﺳﺎﻳﺎﮬﻪﺗﭽﯩﻠﯩﻜﻜﻪ ﺋﯧﭽﯩﯟﯦﺘﯩﻠﯩﺸﻰ، ﺗﻪﯕﺮﯨﺘﺎﻍ ﻣﯘﺯ ﭼﻮﻗﻘﯩﻠﯩﺮﯨﻨﯩﯔ ﮬﺎﻟﯩﺘﯩﻨﻰ ﺗﻪﺗﻘﯩﻖ ﻗﯩﻠﯩﯟﺍﺗﻘﺎﻥ ﺋﯩﻨﺠﯧﻨﯩﺮﻻﺭﻧﻰ ﺋﻪﻧﺪﯨﺸﯩﮕﻪ ﺳﺎﻟﻐﺎﻥ ﺑﻮﻟﯘﭖ، ﺋﯘﻻﺭ "ﺳﺎﻳﺎﮬﻪﺗﭽﯩﻠﯩﻜﻜﻪ ﻣﻪﺳﺌﯘﻝ ﺋﻮﺭﯗﻧﻼﺭ، ﭘﻪﻗﻪﺕ ﭘﯘﻝ ﺗﯧﭙﯩﺸﻨﯩﻼ ﻛﯚﺯﻟﻪﭖ، ﻣﯘﮬﯩﺘﻨﻰ ﻗﻮﻏﺪﺍﺷﻘﺎ ﺋﻪﮬﻤﯩﻴﻪﺕ ﺑﻪﺭﻣﻪﻳﯟﺍﺗﯩﺪﯗ، ﻧﯚﯞﻩﺗﺘﻪ ﺋﺎﻻﮬﯩﺪﻩ ﻗﻮﻏﺪﯗﻟﯘﺷﻘﺎ ﺗﯧﮕﯩﺸﻠﯩﻚ ﺟﺎﻳﻼﺭﻣﯘ ﻗﺎﺭﺍ ﻗﻮﻳﯘﻕ ﺳﺎﻳﺎﮬﻪﺗﭽﯩﻠﯩﻜﻜﻪ ﺋﯧﭽﯩﯟﯦﺘﯩﻠﯩﭗ، ﺗﻪﺳﯟﯦﺮﻟﯩﮕﯜﺳﯩﺰ ﺯﯨﻴﺎﻥ ﺋﯧﻠﯩﭗ ﻛﻪﻟﻤﻪﻛﺘﻪ، ﺑﯘ ﮬﻪﻗﺘﻪ ﺑﺎﺷﻘﯘﺭﯗﺵ ﻛﯜﭼﻪﻳﺘﯩﻠﻤﯩﺴﻪ ﺋﺎﻗﯩﯟﯦﺘﻰ ﺗﯧﺨﯩﻤﯘ ﺋﯧﻐﯩﺮ ﺑﻮﻟﯩﺪﯗ" ﺩﻩﭖ ﺑﯩﻠﺪﯛﺭﻣﻪﻛﺘﻪ. (ﮔﯜﻟﭽﯧﮭﺮﻩ)