ﺧﯩﺘﺎﻳﺪﯨﻜﻰ ﻣﯘﻫﯩﺖ ﻣﻪﺳﯩﻠﯩﻠﯩﺮﻯ ﻛﯩﺸﯩﻨﻰ ﭼﯜﭼﯜﺗﯩﺪﯗ

ﺧﯩﺘﺎﻱ ﻣﯘﻫﯩﺖ ﻗﻮﻏﺪﺍﺵ ﻣﯩﻨﺴﺘﯩﺮﻟﯩﻘﯩﻨﯩﯔ ﻣﯘﺋﺎﯞﯨﻦ ﻣﯩﻨﯩﺴﺘﯩﺮﻯ ﭘﻪﻥ ﻳﯜ، "ﺩﻩﺭ ﺷﯩﭙﯩﮕﻪﻝ" ﮊﻭﺭﻧﯩﻠﻰ ﻣﯘﺧﺒﯩﺮﻯ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﺪﻩ ﺧﯩﺘﺎﻳﻨﯩﯔ ﻛﻪﻟﮕﯜﺳﯩﻨﻰ ﻧﺎﻫﺎﻳﯩﺘﻰ ﻗﺎﺭﺍﯕﻐﯘ ﺗﻪﺳﯟﯨﺮﻟﯩﮕﻪﻥ.

ﭘﻪﻥ ﻳﯜ، ﻣﯘﺧﺒﯩﺮﻧﯩﯔ ﺧﯩﺘﺎﻳﻨﯩﯔ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻰ ﯞﻩ ﺧﯩﺘﺎﻳﺪﯨﻜﻰ ﻣﯘﻫﯩﺖ ﺑﯘﻟﻐﯩﻨﯩﺸﻰ ﻣﻪﺳﯩﻠﺴﻰ ﺗﻮﻏﺮﺳﯩﺪﯨﻜﻰ ﺳﻮﺋﺎﻟﻠﯩﺮﯨﻐﺎ ﺟﺎﯞﺍﭖ ﺑﯧﺮﯨﭗ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﺋﻪﻟﯟﻩﺗﺘﻪ ﺧﯩﺘﺎﻱ ﺋﯩﻘﺘﯩﺴﺎﺩﯨﻨﯩﯔ ﺗﯧﺰ ﺗﻪﺭﻩﻗﻘﻰ ﻗﯩﻠﯩﯟﺍﺗﻘﺎﻧﻠﯩﻘﯩﺪﯨﻦ ﺧﯘﺭﺳﻪﻧﻤﻪﻥ.ﺋﻪﻣﻤﺎ ﺋﯩﻘﺘﯩﺴﺎﺩﯨﻲ ﺟﻪﻫﻪﺗﺘﻜﻰ ﺗﯧﺰ ﺗﻪﺭﻩﻗﻘﯩﻴﺎﺗﻨﯩﯔ ﻣﯩﻨﻰ ﻗﺎﺗﺘﯩﻖ ﺋﻪﻧﺪﯨﺸﯩﻠﻪﻧﺪﯛﺭﯨﯟﺍﺗﻘﺎﻥ ﺗﻪﺭﻩﭘﻠﯩﺮﯨﻤﯘ ﺑﺎﺭ. ﭼﯜﻧﻜﻰ ﺑﯩﺰ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﺩﺍﯞﺍﻣﻼﺷﺘﯘﺭﯗﺵ ﺋﯜﭼﯜﻥ ﻧﺎﻫﺎﻳﯩﺘﻰ ﻛﯚﭖ ﺧﺎﻡ ﺋﻪﺷﻴﺎﻟﯩﺮﯨﻤﯩﺰﻧﻰ ﻗﯘﺭﺑﺎﻥ ﻗﯩﻠﻤﺎﻗﺘﯩﻤﯩﺰ. ﻣﻪﺳﯩﻠﻪﻥ، ﺑﯩﺰ 10 ﺩﻭﻟﻼﺭﻟﯩﻖ ﺗﺎﯞﺍﺭ ﺋﯩﺸﻠﻪﭘﭽﯩﻘﯩﺮﯨﺶ ﺋﯜﭼﯜﻥ ﻳﺎﭘﻮﻧﯩﻴﯩﺪﯨﻦ ﻳﻪﺗﺘﻪ ﻫﻪﺳﺴﻪ، ﺋﺎﻣﯧﺮﯨﻜﯩﺪﯨﻦ 6 ﻫﻪﺳﺴﻪ ﻫﻪﺗﺘﺎ ﻫﯩﻨﺪﯨﺴﺘﺎﻧﺪﯨﻦ ﺋﯜﭺ ﻫﻪﺳﺴﻪ ﻛﯚﭖ ﺧﺎﻡ ﺋﻪﺷﻴﺎ ﺋﯩﺸﻠﯩﺘﯩﯟﺍﺗﯩﻤﯩﺰ. ﯞﻩﺯﯨﻴﻪﺗﻨﯩﯔ ﺑﯘﻧﺪﺍﻕ ﺩﺍﯞﺍﻣﻠﯩﺸﯩﺸﻰ ﻣﯘﻣﻜﯩﻦ ﺋﻪﻣﻪﺱ.

ﺧﯩﺘﺎﻱ: ﻧﻮﭘﯘﺳﯩﻤﯩﺰ ﻛﯚﭖ، ﺧﺎﻡ ﺋﻪﺷﻴﺎ ﻛﻪﻣﭽﯩﻞ

ﺧﯩﺘﺎﻳﻨﯩﯔ ﺧﺎﻡ ﺋﻪﺷﻴﺎ ﻣﻪﻧﺒﻪﻟﯩﺮﯨﻨﯩﯔ ﭼﻪﻛﻠﯩﻚ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﯩﮕﻪﻥ ﺧﯩﺘﺎﻱ ﻣﯘﻫﯩﺘﻨﻰ ﻗﻮﻏﺪﺍﺵ ﻣﯩﻨﺴﯩﺘﯩﺮﻟﯩﻘﯩﻨﯩﯔ ﻣﯘﺋﺎﯞﯨﻦ ﻣﯩﻨﺴﺘﯩﺮﻯ ﭘﻪﻥ ﻳﯜ ﻣﯘﻧﺪﺍﻕ ﺩﻩﻳﺪﯗ: "ﺑﯩﺰﻧﯩﯔ ﻧﻮﭘﯘﺳﯩﻤﯩﺰ ﺋﯩﺰﭼﯩﻞ ﻛﯚﭘﯩﻴﯩﯟﺍﺗﯩﺪﯗ. ﻟﯧﻜﯩﻦ ﻳﻪﺭ ﻣﻪﻳﺪﺍﻧﯩﻤﯩﺰ ﭼﻪﻛﻠﯩﻚ. ﻫﺎﺯﯨﺮ ﺧﯩﺘﺎﻳﺪﺍ 1 ﻣﯩﻠﻴﺎﺭﺩ 300 ﻣﯩﻠﻴﻮﻥ ﻛﯩﺸﻰ ﻳﺎﺷﺎﻳﺪﯗ. ﺑﯘ ﺳﺎﻥ 50 ﻳﯩﻞ ﺑﯘﺭﯗﻧﻘﯩﻐﺎ ﺳﯧﻠﯩﺸﺘﯘﺭﻏﺎﻧﺪﺍ ﺑﯩﺮ ﻫﻪﺳﺴﻪ ﻛﯚﭖ. 2020‏- ﻳﯩﻠﯩﺪﺍ ﺧﯩﺘﺎﻳﻨﯩﯔ ﻧﻮﭘﯘﺳﻰ ﺑﯩﺮ ﻣﯩﻠﻴﺎﺭﺩ 500 ﻣﯩﻠﻴﻮﻥ ﻛﯩﺸﯩﮕﻪ ﻳﯧﺘﯩﺪﯗ. ﺷﻪﻫﻪﺭﻟﻪﺭ ﻛﯧﯖﯩﻴﯩﺸﻰ ﺑﯩﻠﻪﻥ ﺑﯩﺮﻟﯩﻜﺘﻪ ﭼﯚﻟﻠﯩﺸﯩﺸﻤﯘ ﻛﯧﯖﯩﻴﯩﭗ، ﺋﯚﺗﻜﻪﻥ 50 ﻳﯩﻞ ﺋﯩﭽﯩﺪﻩ ﺧﯩﺘﺎﻳﺪﯨﻜﻰ ﺗﯩﺮﯨﻠﻐﯘ ﻳﻪﺭ ﻣﯩﻘﺪﺍﺭﻯ 50% ﺋﺎﺯﺍﻳﻐﺎﻥ.

ﺷﯘﻧﯩﯔ ﺋﯜﭼﯜﻥ، ‏- ﺩﻩﻳﺪﯗ ﭘﻪﻥ ﻳﯜ ﮔﯧﺮﻣﺎﻧﯩﻴﯩﻨﯩﯔ ﺩﻩﺭ ﺷﯩﭙﯩﮕﻪﻝ ﮊﻭﺭﻧﯩﻠﻰ ﺑﯩﻠﻪﻥ ﺋﯚﺗﻜﯜﺯﮔﻪﻥ ﺳﯚﻫﺒﯩﺘﯩﺪﻩ،‏ ﺑﯜﮔﯜﻧﻜﻰ ﺋﯩﻘﺘﯩﺴﺎﺩﯨﻲ ﺟﻪﻫﻪﺗﺘﯩﻜﻰ ﺗﯧﺰ ﺗﻪﺭﻩﻗﻘﯩﻴﺎﺕ ﺋﯘﺯﯗﻧﻐﺎ ﺑﺎﺭﻣﺎﻱ ﺗﻮﺧﺘﺎﻳﺪﯗ. ﭼﯜﻧﻜﻰ ﺧﯩﺘﺎﻳﻨﯩﯔ ﻣﯘﻫﯩﺖ ﺷﺎﺭﺍﺋﯩﺘﻰ ﺑﯘﻧﻰ ﻛﯜﺗﯜﺭﻩﻟﻤﻪﻳﺪﯗ. ﻧﯚﯞﻩﺗﺘﻪ ﺧﯩﺘﺎﻱ ﺯﯦﻤﯩﻨﯩﻨﯩﯔ ﺋﯜﭼﺘﯩﻦ ﺑﯩﺮ ﻗﯩﺴﯩﻤﯩﺪﺍ ﻛﯩﺴﻼﺗﺎﻟﯩﻖ ﻳﺎﻣﻐﯘﺭ ﻳﯧﻐﯩﺸﻘﺎ ﺑﺎﺷﻠﯩﺪﻯ. ﺧﯩﺘﺎﻳﺪﯨﻜﻰ 7 ﭼﻮﯓ ﺩﻩﺭﻳﺎ ﺳﯜﻳﯩﻨﯩﯔ ﻳﯧﺮﯨﻤﻰ ﭘﯜﺗﯜﻧﻠﻪﻱ ﺑﯘﻟﻐﺎﻧﻐﺎﻥ ﺑﻮﻟﯘﭖ، ﺋﯘﻧﻰ ﺋﯩﺸﻠﯩﺘﯩﺶ ﻣﯘﻣﻜﯩﻦ ﺋﻪﻣﻪﺱ. ﺧﯩﺘﺎﻱ ﺷﻪﻫﻪﺭﻟﯩﺮﯨﺪﯨﻜﻰ ﺋﺎﻫﺎﻟﯩﻨﯩﯔ ﺋﯜﭼﺘﯩﻦ ﺑﯩﺮﻯ ﺯﻩﻫﻪﺭﻟﯩﻚ ﻫﺎﯞﺍﺩﯨﻦ ﻧﻪﭘﻪﺋﯩﺴﻠﯩﻨﯩﯟﺍﺗﯩﺪﯗ. ﺷﯘﻧﺪﺍﻗﻼ ﺧﯩﺘﺎﻳﺪﺍ ﺋﻪﺧﻠﻪﺗﻠﻪﺭﻧﯩﯔ ﭘﻪﻗﻪﺕ 20% ﺗﯩﻦ ﺋﺎﺯ ﺑﯩﺮ ﻗﯩﺴﻤﻰ ﻣﯘﻫﯩﺖ ﻗﻮﻏﺪﺍﺵ ﻗﺎﺋﯩﺪﯨﻠﯩﺮﯨﮕﻪ ﻣﯘﯞﺍﭘﯩﻖ ﺑﯩﺮ ﺗﻪﺭﻩﭖ ﻗﯩﻠﯩﻨﯩﯟﺍﺗﯩﺪﯗ.

150 ﻣﯩﻠﻴﻮﻥ ﻛﯩﺸﯩﻨﻰ ﺋﻮﺭﯗﻧﻼﺷﺘﯘﺭﯗﺩﯨﻐﺎﻥ ﺟﺎﻱ ﻳﻮﻕ

ﺧﯩﺘﺎﻳﺪﯨﻜﻰ ﻣﯘﻫﯩﺖ ﺑﻮﻟﻐﯩﻨﯩﺶ ﺋﻪﻫﯟﺍﻟﯩﻨﯩﯔ ﺟﯩﺪﺩﯨﻲ ﺑﯩﺮ ﻣﻪﺳﯩﻠﯩﮕﻪ ﺋﺎﻳﻼﻧﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ ﺧﯩﺘﺎﻱ ﻣﯘﻫﯩﺖ ﻗﻮﻏﺪﺍﺵ ﻣﯩﻨﺴﯩﺘﯩﺮﻟﯩﻘﯩﻨﯩﯔ ﻣﯘﺋﺎﯞﯨﻦ ﻣﯩﻨﺴﺘﯩﺮﻯ، ﺧﯩﺘﺎﻳﺪﺍ ﻫﺎﯞﺍ ﯞﻩ ﺳﯘﻧﯩﯔ ﺟﯩﺪﺩﯨﻲ ﺩﻩﺭﯨﺠﯩﺪﻩ ﺑﯘﻟﻐﺎﻧﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﺧﯩﺘﺎﻳﻨﯩﯔ ﻳﯩﻠﻠﯩﻖ ﻣﯩﻠﻠﯩﻲ ﻛﯩﺮﯨﻤﯩﻨﯩﯔ 15% ﻛﻪ ﻳﯧﻘﯩﻦ ﻗﯩﺴﯩﻤﻰ ﻣﯘﻫﯩﺖ ﺑﯘﻟﻐﯩﻨﯩﺸﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ ﻣﻪﺳﯩﻠﯩﻠﻪﺭ ﺋﯜﭼﯜﻥ ﺳﻪﺭﭖ ﻗﯩﻠﯩﻨﯩﯟﺍﺗﯩﺪﯗ، ﺩﯦﺪﻯ.

ﺋﯘﻧﯩﯔ ﺋﯧﻴﺘﯩﺸﯩﭽﻪ، ﭘﻪﻗﻪﺕ ﺑﯧﻴﺠﯩﯖﺪﯨﻼ ﺭﺍﻙ ﻛﯩﺴﻪﻟﻠﯩﻜﯩﻨﯩﯔ 70% -80% ﺋﻰ ﻣﯘﻫﯩﺖ ﺑﯘﻟﻐﯩﻨﯩﺸﯩﺪﯨﻦ ﻛﯧﻠﯩﭗ ﭼﯩﻘﻘﺎﻥ ﺋﯩﻜﻪﻥ.

ﺧﯩﺘﺎﻱ ﻣﯘﻫﯩﺘﻨﻰ ﻗﻮﻏﺪﺍﺵ ﻣﯩﻨﺴﯩﺘﯩﺮﻟﯩﻘﯩﻨﯩﯔ ﻣﯘﺋﺎﯞﯨﻦ ﻣﯩﻨﺴﺘﯩﺮﻯ ﭘﻪﻥ ﻳﯜ ﻳﻪﻧﻪ ﻣﯘﻧﯘﻻﺭﻧﻰ ﺩﯦﮕﻪﻥ: "ﻫﻪﺗﺘﺎ ﻫﺎﺯﯨﺮﻣﯘ ﻣﻪﻣﻠﯩﻜﯩﺘﯩﻤﯩﺰﻧﯩﯔ ﻏﻪﺭﺑﯩﻲ ﺗﻪﺭﯨﭙﻰ ﺋﯧﻜﻮﻟﻮﮔﯩﻴﻪ ﺟﻪﻫﻪﺗﺘﯩﻦ ﻗﺎﺗﺘﯩﻖ ﺑﯧﺴﯩﻢ ﺋﺎﺳﺘﯩﺪﺍ ﻗﺎﻟﻐﺎﻥ ﺭﺍﻳﻮﻧﻼﺭ، ﺑﯘ ﺭﺍﻳﻮﻧﻼﺭﺩﯨﻜﻰ ﺋﺎﻫﺎﻟﯩﻼﺭ ﺋﯧﻬﺘﯩﻴﺎﺟﻠﯩﺮﯨﻨﻰ ﻗﺎﻣﺪﯨﻴﺎﻟﻤﺎﻳﺪﯨﻐﺎﻥ ﺋﻪﻫﯟﺍﻟﻐﺎ ﭼﯜﺷﯜﭖ ﻗﺎﻟﻐﺎﻥ. ﻛﻪﻟﮕﯜﺳﯩﺪﻩ ﺑﯩﺰ 22 ﺋﯚﻟﻜﻪ ﯞﻩ ﺷﻪﻫﻪﺭﺩﯨﻦ 186 ﻣﯩﻠﻴﻮﻥ ﻛﯩﺸﯩﻨﻰ ﺑﺎﺷﻘﺎ ﺭﺍﻳﻮﻧﻼﺭﻏﺎ ﻳﯚﺗﻜﻪﺷﻜﻪ ﻣﻪﺟﺒﯘﺭ ﺑﻮﻟﯩﻤﯩﺰ. ﻟﯧﻜﯩﻦ ﺧﯩﺘﺎﻳﺪﯨﻜﻰ ﺑﺎﺷﻘﺎ ﺋﯚﻟﻜﻪ ﯞﻩ ﺷﻪﻫﻪﺭﻟﻪﺭﮔﻪ ﭘﻪﻗﻪﺕ 33 ﻣﯩﻠﻴﻮﻥ ﻛﯩﺸﯩﻨﻰ ﺋﻮﺭﯗﻧﻼﺷﺘﯘﺭﯗﺵ ﻣﯘﻣﻜﯩﻦ. ﺩﯦﻤﻪﻙ ﻗﺎﻟﻐﺎﻥ 150 ﻣﯩﻠﻴﻮﻥ ﻛﯩﺸﯩﻨﻰ ﺋﻮﺭﯗﻧﻼﺷﺘﯘﺭﯗﺩﯨﻐﺎﻥ ﺟﺎﻱ ﻳﻮﻕ.

ﺧﯩﺘﺎﻳﺪﺍ ﻫﯧﻠﯩﻤﯘ، ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻨﻰ ﭘﯜﺗﯜﻥ ﻣﻪﺳﯩﻠﯩﻠﻪﺭﻧﯩﯔ ﺋﺎﭼﻘﯘﭼﻰ ﺩﻩﭖ ﻗﺎﺭﺍﻳﺪﯨﻐﺎﻥ ﻛﯩﺸﯩﻠﻪﺭﻧﯩﯔ ﺩﯙﻟﻪﺗﻨﯩﯔ ﺳﯩﻴﺎﺳﯩﺘﯩﻨﻰ ﺑﻪﻟﮕﯩﻠﻪﯞﺍﺗﻘﺎﻧﻠﯩﻘﯩﻨﻰ ﺗﻪﻛﯩﺘﻠﯩﮕﻪﻥ ﭘﻪﻥ ﻳﯜ، ﺋﻪﮔﻪﺭ ﺑﯩﺰ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺗﻘﺎ ﻣﺎﺳﻼﺷﺘﯘﺭﯗﭖ، ﺳﯩﻴﺎﺳﯩﻲ ﺋﯩﺴﻼﻫﺎﺗﻨﻰ ﺑﯩﺮﻟﯩﻜﺘﻪ ﺋﯧﻠﯩﭗ ﺑﺎﺭﻣﯩﺴﺎﻕ، ﺳﯩﻴﺎﺳﯩﻲ ﻛﺮﯨﺰﯨﺲ ﺧﻪﺗﯩﺮﯨﮕﻪ ﺩﯗﭺ ﻛﯧﻠﯩﺸﯩﻤﯩﺰ ﻣﯘﻣﻜﯩﻦ. ﺋﻪﮔﻪﺭ ﻛﻪﻣﺒﻪﻏﻪﻝ ﯞﻩ ﺑﺎﻳﻼﺭ ﺋﻮﺗﺘﯘﺭﯨﺴﯩﺪﯨﺌﯩﻜﻰ ﭘﻪﺭﻕ ﺗﯧﺨﯩﻤﯘ ﻛﯚﭘﻪﻳﺴﻪ، ﺧﯩﺘﺎﻳﺪﯨﻜﻰ ﻫﻪﺭ ﻗﺎﻳﺴﻰ ﺭﺍﻳﻮﻧﻼﺭ ﻫﻪﻣﺪﻩ ﭘﯜﺗﯜﻥ ﺧﯩﺘﺎﻱ ﻣﯘﻗﯩﻤﺴﯩﺰﻟﯩﻖ ﮔﯩﺮﺩﺍﯞﯨﻐﺎ ﭼﯜﺷﯜﭖ ﻛﯧﺘﯩﺪﯗ، ﺩﯦﺪﻯ. (ﻗﺎﻧﺎﺕ)