ﺧﯩﺘﺎﻳﻨﯩﯔ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯧﻴﻰ ﻫﻪﻗﻘﯩﺪﻩ ﺧﻪﻟﻘﺌﺎﺭﺍ ﺋﯘﭼﯘﺭ ﯞﺍﺳﺘﯩﻠﯩﺮﯨﻨﯩﯔ ﯞﻩ ﺋﯘﻳﻐﯘﺭﻻﺭﻧﯩﯔ ﺋﯩﻨﻜﺎﺳﻰ

• ﻣﯘﺧﺒﯩﺮﯨﻤﯩﺰ ﯞﻩﻟﯩﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻳﺪﺍ ﺑﯜﮔﯜﻥ 3 ‏- ﺋﺎﻳﻨﯩﯔ 4 ‏- ﻛﯜﻧﻰ، ﺑﯧﻴﺠﯩﯖﺪﯨﻜﻰ ﺑﯜﻳﯜﻙ ﺧﻪﻟﻖ ﺳﺎﺭﯨﻴﯩﺪﺍ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯧﻴﯩﻨﯩﯔ ﺋﺎﺧﺒﺎﺭﺍﺕ ﻳﯩﻐﯩﻨﻰ ﺋﯧﭽﯩﻠﺪﻯ. ﻳﯩﻐﯩﻨﻨﯩﯔ ﺑﺎﻳﺎﻧﺎﺗﭽﯩﺴﻰ ﺟﺎﯓ ﺟﯩﺠﯘﻧﯩﯔ ﺟﺎﻛﺎﺭﻟﯩﺸﯩﭽﻪ، ﺑﯘ ﻳﯩﻐﯩﻦ 3 ‏- ﺋﺎﻳﻨﯩﯔ 5 ‏- ﻛﯜﻧﯩﺪﯨﻦ 18 ‏- ﻛﯜﻧﯩﮕﯩﭽﻪ ﺟﻪﻣﺌﻰ 13 ﻳﯧﺮﯨﻢ ﻛﯜﻥ ﺩﺍﯞﺍﻡ ﻗﯩﻠﯩﺪﯨﻜﻪﻥ. ﻳﯩﻐﯩﻨﺪﺍ ﺩﯙﻟﻪﺕ ﺭﻩﺋﯩﺴﻰ، ﺑﺎﺵ ﻣﯩﻨﯩﺴﯩﺘﯩﺮﻯ، ﻣﻪﺭﻛﯩﺰﻯ ﻫﻪﺭﺑﯩﻲ ﻛﻮﻣﯩﺘﯧﺖ ﺭﻩﺋﯩﺴﻰ ﻗﺎﺗﺎﺭﻟﯩﻖ ﺭﻩﻫﺒﻪﺭﻟﻪﺭ ﺳﺎﻳﻼﭖ ﭼﯩﻘﯩﻠﯩﺪﯨﻜﻪﻥ ﯞﻩ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ ﺳﻮﺗﺴﯩﺌﺎﻟﯩﺴﺘﯩﻚ ﺩﯦﻤﻮﻛﺮﺍﺗﯩﻴﯩﻨﻰ ﺋﯩﻠﮕﯩﺮﻯ ﺳﯜﺭﯛﺵ ﻫﻪﻗﻘﯩﺪﯨﻜﻰ ﭘﯩﻜﯩﺮﻯ ﺋﻪﻣﻪﻟﯩﻴﻠﻪﺷﺘﯜﺭﯨﻠﯩﺪﯨﻜﻪﻥ ﯞﻩ ﺩﯙﻟﻪﺕ ﻛﺎﺑﯩﻨﯩﺘﻰ ﺋﻮﺭﮔﺎﻧﻠﯩﺮﯨﻐﺎ ﻗﺎﺭﯨﺘﯩﻠﻐﺎﻥ ﺋﯩﺴﻼﻫﺎﺕ، ﺩﯙﻟﻪﺗﻨﯩﯔ ﺧﺎﻣﭽﻮﺗﻰ ﻗﺎﺗﺎﺭﻟﯩﻘﻼﺭ ﻣﺎﻗﯘﻟﻠﯩﻨﯩﺪﯨﻜﻪﻥ.

ﺑﯘ ﻳﯩﻐﯩﻦ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﯩﻨﯩﯔ 'ﺳﻮﺗﺴﯩﻴﺎﻟﯩﺴﺘﯩﻚ ﺩﯦﻤﻮﻛﺮﺍﺗﯩﻴﻪ' ﺗﯜﺯﯛﻣﯩﻨﻰ ﺋﻪﻣﻪﻟﯩﻴﻠﻪﺷﺘﯜﺭﯨﺪﯗ

ﺑﯩﺮﻟﻪﺷﻤﻪ ﺋﺎﮔﯧﻨﺘﻠﯩﻘﯩﻨﯩﯔ ﻳﺎﺯﻏﯘﭼﯩﺴﻰ ﻛﺮﯨﺴﺘﻮﻓﯧﺮ ﺑﻮﺩﯨﻴﻦ ﺋﻪﭘﻪﻧﺪﯨﻨﯩﯔ ﺑﯜﮔﯜﻥ ﺑﯧﻴﺠﯩﯖﺪﯨﻦ ﺧﻪﯞﻩﺭ ﻗﯩﻠﯩﺸﯩﭽﻪ، ﺧﯩﺘﺎﻳﺪﺍ ﺋﯧﭽﯩﻠﯩﯟﺍﺗﻘﺎﻥ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯧﻴﯩﻨﯩﯔ ﻳﯩﻠﻠﯩﻖ ﻳﯩﻐﯩﻨﻰ ﺧﯩﺘﺎﻱ ﻛﻮﻣﻤﯘﻧﯩﺴﺖ ﭘﺎﺭﺗﯩﻴﻪ ﻣﻪﺭﻛﯩﺰﻯ ﻛﻮﻣﯩﺘﯧﺘﯩﻨﯩﯔ ﺋﯚﺗﻜﻪﻥ ﻳﯩﻠﻰ ﺋﯚﻛﺘﻪﺑﯩﺮﺩﻩ ﺋﻮﺗﺘﯘﺭﯨﻐﺎ ﻗﻮﻳﯘﻟﻐﺎﻥ 'ﺳﻮﺗﺴﯩﻴﺎﻟﯩﺴﺘﯩﻚ ﺩﯦﻤﻮﻛﺮﺍﺗﯩﻴﻪ' ﺩﻩﭖ ﺋﺎﺗﺎﻟﻐﺎﻥ ﺗﯜﺯﯛﻡ ﻫﻪﻗﻘﯩﺪﯨﻜﻰ ﭘﯩﻜﯩﺮﯨﻨﻰ ﺋﻪﻣﻪﻟﯩﻴﻠﻪﺷﺘﯜﺭﯛﺷﻜﻪ ﺷﯘﻧﺪﺍﻗﻼ ﺧﯩﺘﺎﻳﻨﯩﯔ ﻫﻪﺭﺑﯩﻲ ﺧﺎﻣﭽﻮﺗﻰ، ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﻰ ﯞﻩ ﻣﻪﻣﯘﺭﻯ ﺋﻮﺭﮔﺎﻥ ﺋﯩﺴﻼﻫﺎﺗﻰ ﻫﻪﻗﻘﯩﺪﯨﻜﻰ ﭘﯩﻜﺮﯨﻨﻰ ﻣﺎﻗﯘﻟﻼﺷﻘﺎ ﻣﻪﺭﻛﻪﺯﻟﯩﺸﯩﺪﯗ.

ﺑﯘ ﺧﻪﯞﻩﺭﺩﻩ ﺋﯧﻴﺘﯩﻠﯩﺸﯩﭽﻪ، ﻛﻮﻣﻤﯘﻧﯩﺴﺖ ﺧﯩﺘﺎﻱ ﻫﯚﻛﯜﻣﯩﺘﻰ ﻳﯧﻘﯩﻨﺪﺍ ﺧﯩﺘﺎﻳﻨﯩﯔ ﻫﻪﺭﺑﯩﻲ ﺧﺎﻣﭽﻮﺗﯩﻨﻰ 17.6% ﺋﺎﺷﯘﺭﯗﺷﻨﻰ، ﻳﻪﻧﻰ 1990 ‏- ﻳﯩﻠﻼﺭﺩﯨﻜﯩﺪﯨﻦ ﺋﯩﻜﻜﻰ ﻫﻪﺳﺴﻪ ﺋﺎﺷﯘﺭﯗﺷﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺋﯩﺪﻯ. ﺧﯩﺘﺎﻳﻨﯩﯔ ﻫﻪﺭﺑﯩﻲ ﺧﺎﻣﭽﻮﺗﯩﻨﻰ ﺋﺎﺷﯘﺭﯗﺷﻰ، ﺋﺎﺳﺎﺳﻪﻥ 1949 ‏- ﻳﯩﻠﯩﺪﯨﻦ ﺑﯘﻳﺎﻥ ﺋﯩﺰﭼﯩﻞ ﻫﺎﻟﺪﺍ ﺋﯚﺯﯨﻨﯩﯔ ﺗﻪﻗﺪﯨﺮﯨﻨﻰ ﺋﯚﺯﻯ ﺑﻪﻟﮕﯩﻠﻪﭖ ﻛﯧﻠﯩﯟﺍﺗﻘﺎﻥ ﺗﻪﻳﯟﻩﻧﮕﻪ ﻗﺎﺭﯨﺘﯩﻠﻐﺎﻥ.

ﻧﯘ ﺑﻪﻛﺮﯨﻨﯩﯔ ﺋﯧﻴﺘﯩﺸﯩﭽﻪ، ﺋﻪﮔﻪﺭ ﺋﺎﺳﺎﺳﯩﻲ ﺗﯩﻞ-ﻳﯧﺰﯨﻘﻨﻰ ﺋﯚﮔﻪﻧﻤﯩﺴﻪ ﭼﻪﺗﻠﯩﺸﯩﭗ ﻛﯧﺘﯩﺪﯗ'

'ﺷﯩﻨﺠﺎﯓ ﺧﻪﯞﻩﺭ ﺗﻮﺭﻯ'ﻧﯩﯔ ﺑﺎﻳﺎﻥ ﻗﯩﻠﯩﻨﯩﺸﯩﭽﻪ، ﺧﯩﺘﺎﻳﺪﺍ ﻣﻪﻣﻠﯩﻜﻪﺗﻠﯩﻚ ﺧﻪﻟﻖ ﻗﯘﺭﯗﻟﺘﯧﻴﯩﻨﯩﯔ ﻳﯩﻠﻠﯩﻖ ﻳﯩﻐﯩﻨﻰ ﺋﯧﭽﯩﻠﯩﺸﻘﺎ ﺑﺎﺷﻠﯩﻐﺎﻧﺪﺍ، ﺷﯩﻨﺨﯘﺋﺎ ﺋﺎﮔﯧﻨﺘﻠﯩﻘﯩﻨﯩﯔ ﻟﻰ ﺩﯦﺨﯘﺋﺎ ﻗﺎﺗﺎﺭﻟﯩﻖ ﺋﯩﻜﻜﻰ ﻣﯘﺧﺒﯩﺮﻯ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻥ ﺭﻩﺋﯩﺴﻰ ﻧﯘﺭ ﺑﻪﻛﺮﻯ ﺋﻪﭘﻪﻧﺪﯨﻨﻰ ﺯﯨﻴﺎﺭﻩﺕ ﻗﯩﻠﻐﺎﻥ. ﻣﯘﺧﺒﯩﺮﻻﺭ ﻳﺎﺯﻏﺎﻥ ﺧﻪﯞﻩﺭﺩﻩ، ﺧﯩﺘﺎﻱ ﻫﯚﻛﯜﻣﯩﺘﻰ ﺷﯩﻨﺠﺎﯕﺪﺍ 60 ﻳﯩﻠﯩﺪﯨﻦ ﻛﯧﻴﯩﻦ ﻣﻪﻧﺴﻪﭘﻜﻪ ﻗﻮﻳﻐﺎﻥ ﺧﯩﺘﺎﻳﭽﻪ ﺗﯩﻠﻨﻰ ﺭﺍﯞﺍﻥ ﺳﯚﺯﻟﻪﻳﺪﯨﻐﺎﻥ، ﺑﻮﻱ-ﺗﯘﺭﻗﻰ ﻛﯧﻠﯩﺸﻜﻪﻥ، 10 ﻳﯩﻞ ﻣﻪﺧﺴﯘﺱ ﺳﯩﻴﺎﺳﯩﻲ ﺗﻪﻟﯩﻢ ﺋﺎﻟﻐﺎﻥ، ﺷﯩﻨﺠﺎﯕﻨﻰ ﻛﻪﯓ ﻛﯚﻟﻪﻣﺪﻩ ﺋﯧﭽﯩﭗ، ﺯﻭﺭ ﺩﻩﺭﯨﺠﯩﺪﻩ ﺗﻪﺭﻩﻗﻘﻰ ﻗﯩﻠﺪﯗﺭﯗﭖ ﻫﻪﺭ ﻣﯩﻠﻠﻪﺕ ﺧﻪﻟﻘﯩﻐﻪ ﺑﻪﺧﯩﺖ ﻳﺎﺭﯨﺘﯩﺪﯨﻐﺎﻥ ﺋﻪﯓ ﻳﺎﺵ ﺋﯚﻟﻜﻪ ﺩﻩﺭﯨﺠﯩﻠﯩﻚ ﺭﻩﻫﺒﻪﺭ ﻧﯘﺭ ﺑﻪﻛﺮﻯ ﺋﻪﭘﻪﻧﺪﻯ ﺷﯩﺨﯘﺋﺎ ﺋﺎﮔﯧﻨﺘﻠﯩﻘﻰ ﻣﯘﺧﺒﯩﺮﻟﯩﺮﯨﻨﯩﯔ ﺳﻮﺋﺎﻟﻠﯩﺮﯨﻐﺎ ﺟﺎﯞﺍﺏ ﺑﻪﺭﮔﻪﻧﺪﻩ، ﺷﯩﻨﺠﺎﯕﻨﯩﯔ ﺑﺎﻳﻠﯩﻘﻰ ﻣﻮﻝ ﺋﯩﻜﻪﻧﻠﯩﻜﯩﻨﻰ، ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭙﻨﻰ ﻳﻮﻟﻐﺎ ﻗﻮﻳﯘﺷﻨﯩﯔ ﺯﯙﺭﯛﺭﻟﯩﻜﯩﻨﻰ ﺗﻪﻛﯩﺘﻠﻪﭖ 'ﺟﻮﯕﺨﯘﺋﺎ ﺧﻪﻟﻖ ﺟﯘﻣﻬﯘﺭﯨﻴﯩﺘﯩﻨﯩﯔ ﺑﯩﺮ ﺋﻪﺯﺍﺳﻰ ﺑﻮﻟﻐﺎﻥ ﻛﯩﺸﻰ، ﺋﻪﮔﻪﺭ ﺋﺎﺳﺎﺳﯩﻲ ﺗﯩﻞ-ﻳﯧﺰﯨﻘﻨﻰ ﺑﯩﻠﻤﯩﺴﻪ ﭼﻪﺗﻠﯩﺸﯩﭗ ﻛﯧﺘﯩﺪﯗ' ﺩﯦﮕﻪﻥ ﻧﻪﺯﯨﺮﯨﻴﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ.

ﻧﯘﺭ ﺑﻪﻛﺮﻯ ﺩﻩﯞﺍﺗﻘﺎﻥ 'ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ' ﺑﯩﻠﻪﻥ ﺋﯘﻳﻐﯘﺭﻻﺭﻧﯩﯔ ﭼﻪﺕ ﺗﯩﻞ ﺋﯚﮔﯩﻨﯩﺶ ﻣﻪﻗﺴﯩﺘﻰ ﺋﻮﺧﺸﺎﺵ ﺋﻪﻣﻪﺱ

ﺧﻪﯞﻩﺭﺩﻩ ﻣﻪﻟﯘﻡ ﺑﻮﻟﯘﺷﯩﭽﻪ، ﻧﯘﺭ ﺑﻪﻛﺮﻯ ﺋﻪﭘﻪﻧﺪﻯ ﻫﻪﺗﺘﺎ ﻫﺎﻳﺎﺟﺎﻧﻠﯩﻨﯩﭗ ﻛﯧﺘﯩﭗ، ﺷﯩﻨﺨﯘﺋﺎ ﺋﺎﮔﯧﻨﺘﻠﯩﻘﯩﻨﯩﯔ ﻣﯘﺧﺒﯩﺮﻟﯩﺮﯨﺪﯨﻦ 'ﻧﯧﻤﻪ ﺋﯜﭼﯜﻥ ﺑﯚﻟﮕﯜﻧﭽﯩﻠﻪﺭ ﭼﻪﺗﺌﻪﻝ ﺗﯩﻠﻠﯩﺮﯨﻨﻰ ﺋﯚﮔﯩﻨﯩﺪﯨﻜﻪﻥ؟' ﺩﻩﭖ ﺳﻮﺋﺎﻝ ﺳﻮﺭﯨﻐﺎﻥ. ﺋﻪﻣﻤﺎ ﺷﯩﻨﺨﯘﺋﺎ ﺋﺎﮔﯧﻨﺘﻠﯩﻘﯩﻨﯩﯔ ﻣﯘﺧﺒﯩﺮﻟﯩﺮﻯ ﺋﯘﻧﯩﯔ ﺑﯘ ﺳﻮﺋﺎﻟﯩﻐﺎ ﺟﺎﯞﺍﺏ ﺑﻪﺭﻣﯩﮕﻪﻥ.

ﻳﺎﯞﺭﻭﭘﺎﺩﺍ ﭼﯩﻘﯩﺪﯨﻐﺎﻥ 'ﻏﻪﺭﺏ ﺷﺎﻣﯩﻠﻰ ﺟﯘﺭﻧﯩﻠﻰ'ﻧﯩﯔ ﺗﻪﻫﺮﯨﺮﻯ، ﻫﺎﺯﯨﺮ ﺷﯩﯟﯦﺘﺴﯩﻴﯩﺪﻩ ﺗﯘﺭﯗﯞﺍﺗﻘﺎﻥ ﺋﺎﺑﺪﯗﺭﯨﺸﯩﺖ ﻫﺎﺟﻰ ﻛﯧﺮﯨﻤﻰ ﺋﻪﭘﻪﻧﺪﻯ ﺋﺎﺳﺎﺳﻰ ﺗﯩﻠﻨﻰ ﺋﯚﮔﻪﻧﻤﯩﺴﻪ ﭼﻪﺗﻠﯩﺸﯩﭗ ﻛﯧﺘﯩﺪﯗ' ﺩﯦﮕﻪﻥ ﻧﻪﺯﯨﺮﯨﻴﻪ ﻫﻪﻗﻘﯩﺪﻩ ﻣﯘﻻﻫﯩﺰﻩ ﺋﯧﻼﻥ ﻗﯩﻠﺪﻯ. (ﯞﻩﻟﻰ)