ﺋﻪﻣﻤﺎ ﻣﺎﻗﺎﻟﻪ ﺋﯘﺯﯗﻥ ﺋﯚﺗﻤﻪﻱ ﺗﻮﺭ ﺑﻪﺗﻠﻪﺭﺩﻩ ﺑﺎﻳﺎﻥ ﻗﯩﻠﯩﻨﻐﺎﻥ ﺑﯩﺮ ﻗﯩﺴﯩﻢ ﺳﻪﻣﯩﻤﯩﻲ ﺗﻪﻧﻘﯩﺪﻟﻪﺭﮔﻪ ﺋﻮﺧﺸﺎﺷﻼ ﺋﯚﭼﯜﺭﯛﻟﯜﺵ ﻗﯩﺴﻤﯩﺘﯩﮕﻪ ﺩﯗﭺ ﻛﻪﻟﺪﻯ.

ﻣﺎﻗﺎﻟﻪ ﺋﺎﻟﺪﻯ ﺑﯩﻠﻪﻥ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﺭﻩﺋﯩﺴﻰ ﻧﯘﺭ ﺑﻪﻛﺮﯨﮕﻪ ﺧﯩﺘﺎﭖ ﻗﯩﻠﯩﭗ ﻣﯘﻧﺪﺍﻕ ﺩﻩﻳﺪﯗ: ﺭﻩﺋﯩﺲ ﺋﻪﭘﻪﻧﺪﯨﻢ، ﺳﯩﺰ ﻳﯩﻐﯩﻨﻼﺭﺩﺍ ﺩﺍﯞﺍﻣﻠﯩﻖ ﺧﻪﻧﺰﯗﭼﻪ ﺳﯚﺯﻟﻪﻳﺴﯩﺰ، ﺳﯩﺰ ﺋﯚﺯﯨﯖﯩﺰ ﺭﻩﺋﯩﺲ ﺑﻮﻟﯘﭖ ﺗﯘﺭﯗﯞﺍﺗﻘﺎﻥ ﺭﺍﻳﻮﻧﻨﯩﯔ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺋﯩﻜﻪﻧﻠﯩﻜﻰ ﺋﯧﺴﯩﯖﯩﺰﺩﻩ ﺑﺎﺭﻣﯘ - ﻳﻮﻕ؟ ﺑﯩﻠﯩﻤﻪﻥ، ﺳﯩﺰ ﺧﯩﺘﺎﻳﭽﻪ ﺋﻮﻗﯘﻏﺎﻥ ﺑﻮﻟﻐﯩﻨﯩﯖﯩﺰ ﺋﯜﭼﯜﻥ، ﺳﯩﺰ ﺳﯚﺯﻟﻪﯞﺍﺗﻘﺎﻥ ﻳﯩﻐﯩﻨﺪﺍ ﻛﺎﺩﯨﺮﻻﺭ ﺋﺎﺳﺎﺳﻪﻥ ﺧﻪﻧﺰﯗﻻﺭ ﺑﻮﻟﻐﯩﻨﻰ ﺋﯜﭼﯜﻥ، ﻗﻮﻻﻳﻠﯩﻖ ﻳﺎﺭﯨﺘﯩﺶ ﺋﯜﭼﯜﻥ ﺧﻪﻧﺰﯗﭼﻪ ﺳﯚﺯﻟﻪﻳﺴﯩﺰ. ﺋﯘﻧﺘﯘﯕﻤﺎﯕﻜﻰ، ﺳﯩﺰ ﺩﯙﻟﯩﺘﯩﻤﯩﺰﻧﯩﯔ ﻗﺎﻧﯘﻧﯩﻐﺎ ﺧﯩﻼﭘﻠﯩﻖ ﻗﯩﻠﯩﯟﺍﺗﯩﺴﯩﺰ. ﻗﺎﻧﯘﻥ ﺑﯘﻳﯩﭽﻪ ﺋﯘﻳﻐﯘﺭﭼﻪ ﺳﯚﺯﻟﻪﺵ ﺳﯩﺰﻧﯩﯔ ﻫﻮﻗﯘﻗﯩﯖﯩﺰ ﻫﻪﻡ ﻣﻪﺟﺒﯘﺭﯨﻴﯩﺘﯩﯖﯩﺰ."

ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ ﺋﯘﻳﻐﯘﺭﻻﺭ، ﺑﻮﻟﯘﭘﻤﯘ ﺋﯘﻳﻐﯘﺭ ﺭﻩﻫﺒﯩﺮﻯ ﻛﺎﺩﯨﺮﻻﺭ ﺋﯚﺯ ﺗﯩﻠﯩﻨﻰ ﺋﯚﺯﻯ ﻗﻪﺩﯨﺮﻟﯩﻤﯩﺴﻪ، ﺋﯚﺯﯨﻨﻰ ﺋﯚﺯﻯ ﺳﯚﻳﻤﯩﺴﻪ ﺑﺎﺷﻘﯩﻼﺭﻧﯩﯔ ﻛﯚﺯﮔﻪ ﺋﯩﻠﻤﺎﺳﻠﯩﻘﯩﻨﯩﯔ ﻧﻮﺭﻣﺎﻝ ﺋﻪﻫﯟﺍﻝ ﺑﻮﻟﯘﭖ ﻗﺎﻟﯩﺪﯨﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﯩﺪﯗ. ﺋﺎﭘﺘﻮﺭ ﺑﯩﺮ ﺭﻩﻫﺒﻪﺭ ﺋﯜﭼﯜﻥ ﺋﺎﻧﺎ ﺗﯩﻠﺪﺍ ﺳﯚﺯﻟﻪﺷﻨﯩﯔ ﻳﺎﻟﻐﯘﺯ ﻗﻮﻻﻳﻠﯩﻖ - ﻗﻮﻻﻳﺴﯩﺰﻟﯩﻖ ﻣﻪﺳﯩﻠﯩﺴﯩﻼ ﺋﻪﻣﻪﺱ، ﺑﯩﺮ ﻣﯩﻠﻠﻪﺗﻨﯩﯔ ﺋﯩﺰﺯﻩﺕ ‏ - ﻫﯚﺭﻣﯩﺘﯩﻨﻰ ﻗﻮﻏﺪﺍﺵ ﻣﻪﺳﯩﻠﯩﺴﻰ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﭖ ﻣﯘﻧﺪﺍﻕ ﻳﺎﺯﯨﺪﯗ: " ﺭﻩﺋﯩﺲ ﺋﻪﭘﻪﻧﺪﯨﻢ، ﻗﺎﺯﺍﻗﯩﺴﺘﺎﻥ ﭘﺮﯦﺰﯨﺪﯦﻨﺘﻰ ﻧﯘﺭﺳﯘﻟﺘﺎﻥ ﻧﻪﺯﻩﺭﺑﺎﻳﯩﻔﻨﯩﯔ ﺭﯗﺳﭽﻪ ﺳﻪﯞﯨﻴﯩﺴﻰ ﺳﯩﺰﻧﯩﯔ ﺧﻪﻧﺰﯗﭼﻪ ﺳﻪﯞﯨﻴﻪﯕﯩﺰﺩﯨﻦ ﺗﯚﯞﻩﻥ ﺋﻪﻣﻪﺱ، ﺋﻪﻣﻤﺎ ﺋﯘ ﺭﯗﺳﯩﻴﻪ ﭘﺮﯦﺰﯨﺪﯦﻨﺘﻰ ﯞﯨﻼﺩﯨﻤﯧﺮ ﭘﯘﺗﯩﻦ ﺑﯩﻠﻪﻥ ﻛﯚﺭﯛﺷﻜﻪﻧﺪﻩ، ﺭﯗﺱ ﺗﯩﻠﯩﺪﺍ ﺋﻪﻣﻪﺱ، ﻗﺎﺯﺍﻗﭽﻪ ﮔﻪﭖ ﻗﯩﻠﯩﺪﯗ. ﺋﻪﺗﺮﺍﭘﯩﯖﯩﺰﺩﯨﻜﻰ ﺗﻪﺭﺟﯩﻤﺎﻧﻼﺭ ﺩﻩﻝ ﻣﯘﺷﯘﻧﯩﯔ ﺋﯜﭼﯜﻥ ﺋﺎﺟﺮﯨﺘﯩﻠﻐﺎﻥ. ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ، ﻧﯘﺭ ﺑﻪﻛﺮﯨﻨﯩﯔ ﻳﯩﻐﯩﻨﻼﺭﺩﺍ ﺧﯩﺘﺎﻳﭽﻪ ﺳﯚﺯﻟﯩﺸﯩﻨﻰ، ﺋﯩﺠﺮﺍ ﻗﯩﻠﯩﻨﻤﺎﻳﯟﺍﺗﻘﺎﻥ ﺋﺎﭘﺘﻮﻧﻮﻣﯩﻴﻪ ﻗﺎﻧﯘﻧﻰ ﺋﯩﭽﯩﺪﯨﻜﻰ ﻫﻪﻣﻤﯩﮕﻪ ﺋﺎﻳﺎﻥ ﺑﻮﻟﻐﺎﻥ ﺑﯩﺮ ﻣﯩﺴﺎﻝ ﺳﯜﭘﯩﺘﯩﺪﻩ ﺷﻪﺭﻫﯩﻠﻪﻳﺪﯗ.

ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭙﻨﻰ ﺋﺎﺗﺎﻟﻤﯩﺶ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ ﺩﻩﭖ ﻛﯚﺭﺳﯩﺘﯩﺪﯗ. ﺋﺎﺗﺎﻟﻤﯩﺶ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭙﻨﯩﯔ ﺋﯘﻳﻐﯘﺭ ﺗﯩﻠﻰ ﯞﻩ ﺋﯘﻳﻐﯘﺭ ﻣﻪﺩﻩﻧﯩﻴﯩﺘﯩﻨﻰ ﻳﻮﻗﯩﺘﯩﺶ ﺷﯘﻧﺪﺍﻗﻼ ﻣﯩﻠﻠﯩﻲ ﺗﺎﺭﯨﺨﻨﻰ ﺋﯘﻧﺘﯘﻟﺪﯗﺭﯗﺷﻨﻰ ﻣﻪﻗﺴﻪﺕ ﻗﯩﻠﻐﺎﻧﻠﯩﻘﯩﻨﻰ، ﻫﻪﻗﯩﻘﯩﻲ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭙﻨﯩﯔ ﻫﻪﺭ ﺋﯩﻜﻜﻰ ﺗﯩﻞ، ﻫﻪﺭ ﺋﯩﻜﻜﻰ ﻣﻪﺩﻩﻧﯩﻴﻪﺗﻨﯩﯔ ﺗﻪﯓ ﻣﻪﯞﺟﯘﺕ ﺑﻮﻟﯘﺵ ﯞﻩ ﺗﻪﯓ ﺗﻪﺭﻩﻗﻘﯩﻲ ﻗﯩﻠﯩﺸﻘﺎ ﻳﻮﻝ ﺋﯧﭽﯩﺸﻰ ﻛﯧﺮﻩﻛﻠﯩﻜﯩﻨﻰ ﺑﺎﻳﺎﻥ ﻗﯩﻠﯩﺪﯗ.

ﺋﺎﭘﺘﻮﺭ ﻳﻪﻧﻪ، ﺋﯘﻳﻐﯘﺭ ﺭﺍﻳﻮﻧﯩﺪﺍ، ﻣﯩﻠﻠﯩﻲ ﺭﻩﻫﺒﯩﺮﻯ ﻛﺎﺩﯨﺮﻻﺭﻧﻰ ﺗﻪﻳﯩﻨﻠﻪﺷﺘﻪ ﻣﯩﻠﻠﯩﻲ ﻫﯧﺴﺴﯩﻴﺎﺗﺘﯩﻦ ﺧﺎﻟﯩﻲ ﺑﻮﻟﯘﺷﻨﻰ ﺋﯚﻟﭽﻪﻡ ﻗﯩﻠﯩﯟﺍﺗﻘﺎﻧﻠﯩﻘﯩﻨﻰ، ﺑﯘﻧﯩﯔ ﺟﻪﻣﺌﯩﻴﻪﺕ ﺗﻪﺭﻩﻗﻘﯩﻴﺎﺗﻰ ﺋﯜﭼﯜﻥ ﺯﯨﻴﺎﻧﻠﯩﻖ ﺋﯩﻜﻪﻧﻠﯩﻜﯩﻨﻰ ﺗﻪﻛﯩﺘﻠﻪﻳﺪﯗ ﯞﻩ ﻣﯘﻧﺪﺍﻕ ﺩﻩﻳﺪﯗ: ﻣﯩﻠﻠﯩﻲ ﻫﯧﺴﺴﯩﻴﺎﺕ ﺋﯚﺯ ﻣﻪﺩﻩﻧﯩﻴﯩﺘﯩﻨﻰ ﺳﯚﻳﯜﺵ، ﺋﯚﺯ ﺗﺎﺭﯨﺨﯩﻨﻰ ﺳﯚﻳﯜﺵ، ﺋﯚﺯ ﻣﯩﻠﻠﯩﺘﯩﺪﯨﻦ ﭘﻪﺧﯩﺮﻟﯩﻨﯩﺶ ﺩﯦﻤﻪﻛﺘﯘﺭ. ﺋﻪﮔﻪﺭ ﺋﯘﻳﻐﯘﺭﻻﺭﻧﯩﯔ ﺋﯚﺯ ﻣﯩﻠﻠﯩﺘﯩﻨﻰ ﺳﯚﻳﯜﺷﻰ ﺧﺎﺗﺎﻟﯩﻖ ﻫﯧﺴﺎﺑﻼﻧﺴﺎ، ﺋﯘﻧﺪﺍﻗﺘﺎ ﺩﯙﻟﻪﺗﻨﻰ ﺳﯚﻳﯜﺵ ﺑﯩﻠﻪﻥ ﻣﯩﻠﻠﻪﺗﻨﻰ ﺳﯚﻳﯜﺵ ﺑﯩﺮ - ﺑﯩﺮﯨﮕﻪ ﺯﯨﺘﻤﯘ؟ ﺋﯘﻳﻐﯘﺭﻻﺭ ﺑﯘ ﺩﯙﻟﻪﺗﻨﯩﯔ ﭘﯘﻗﺮﺍﺳﻰ ﺋﻪﻣﻪﺳﻤﯘ ﯞﻩ ﻳﺎﻛﻰ ﺑﯘ ﺩﯙﻟﻪﺕ ﺋﯘﻳﻐﯘﺭﻻﺭﻧﯩﯔ ﺩﯙﻟﯩﺘﻰ ﺋﻪﻣﻪﺳﻤﯘ؟"

ﺋﺎﭘﺘﻮﺭ ﻳﻪﻧﻪ ﺑﯘ ﻫﻪﻗﺘﻪ ﻣﯘﻧﺪﺍﻕ ﺩﻩﻳﺪﯗ: " ﻣﯩﻠﻠﯩﻲ ﻫﯧﺴﺴﯩﻴﺎﺕ ﺋﻪﺳﻠﯩﺪﻩ ﺋﯩﻨﺴﺎﻧﯩﻲ ﺑﯩﺮ ﺧﯘﺳﯘﺳﯩﻴﻪﺕ، ﻣﯩﻠﻠﯩﻲ ﻫﯧﺴﺴﯩﻴﺎﺗﻠﯩﻖ ﺑﻮﻟﯘﺵ ﻏﻪﻳﺮﯨﻲ ﻧﻮﺭﻣﺎﻟﻠﯩﻖ ﺋﻪﻣﻪﺱ، ﺋﻪﻛﺴﯩﭽﻪ، ﻣﯩﻠﻠﯩﻲ ﻫﯧﺴﺴﯩﻴﺎﺗﺘﯩﻦ ﺧﺎﻟﯩﻲ ﺑﻮﻟﯘﺵ، ﻏﻪﻳﺮﯨﻲ ﻧﻮﺭﻣﺎﻟﻠﯩﻘﺘﯘﺭ، ﺋﯧﻐﯩﺮ ﻣﻪﻧﯩﯟﯨﻲ ﻛﯧﺴﻪﻟﺪﯗﺭ، ﺋﯘﻳﻐﯘﺭﻻﺭ ﺭﻩﻫﺒﻪﺭ ﺑﻮﻟﯘﺵ ﺋﯜﭼﯜﻥ ﺋﯩﻨﺴﺎﻧﯩﻲ ﺧﯘﺳﯘﺳﯩﻴﯩﺘﯩﺪﯨﻦ ﺋﺎﻳﺮﯨﻠﯩﺸﻰ، ﻏﻪﻳﺮﯨﻲ ﻧﻮﺭﻣﺎﻝ ﺑﯩﺮ ﺋﯩﻨﺴﺎﻥ ﺑﻮﻟﯘﺷﻰ ﺷﻪﺭﺗﻤﯘ؟"

ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ، ﺋﯘﻳﻐﯘﺭ ﺭﺍﻳﻮﻧﯩﺪﯨﻜﻰ ﻫﻪﻗﺴﯩﺰﻟﯩﻘﻼﺭﻧﻰ ﺳﺎﻧﺎﭖ ﯞﻩ ﻳﯧﺰﯨﭗ ﺗﯜﮔﻪﺗﻜﯩﻠﻰ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ، ﺑﯘﻧﯩﯔ ﭘﯩﻜﯩﺮ ﺋﻪﺭﻛﯩﻨﻠﯩﻜﻰ، ﺩﯨﻨﯩﻲ ﺋﯧﺘﯩﻘﺎﺩ ﺋﻪﺭﻛﯩﻨﻠﯩﻜﻰ، ﺗﻪﺑﯩﺌﯩﻲ ﺑﺎﻳﻠﯩﻘﻼﺭﻧﯩﯔ ﺗﻪﻗﺴﯩﻤﺎﺗﻰ ﻣﻪﺳﯩﻠﯩﺴﻰ، ﺋﯘﻳﻐﯘﺭﻻﺭﻧﯩﯔ ﺋﯩﺸﻘﺎ ﺋﻮﺭﯗﻧﻠﯩﺸﯩﺶ ﻣﻪﺳﯩﻠﯩﺴﻰ ﻗﺎﺗﺎﺭﻟﯩﻖ ﻛﯚﭘﻠﯩﮕﻪﻥ ﺳﺎﻫﻪﮔﻪ ﭼﯧﺘﯩﻠﯩﺪﯨﻐﺎﻧﻠﯩﻘﯩﻨﻰ، ﺑﯘ ﻣﻪﺳﯩﻠﯩﻠﻪﺭﻧﻰ ﺗﯩﻠﻐﺎ ﺋﺎﻟﻐﺎﻧﻼﺭﻏﺎ ﺑﯚﻟﮕﯜﻧﭽﯩﻠﯩﻚ ﻗﺎﻟﭙﯩﻘﻰ ﻛﻪﻳﺪﯗﺭﯛﻟﯜﯞﺍﺗﻘﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﯩﺪﯗ.

ﺋﺎﭘﺘﻮﺭ ﻣﺎﻗﺎﻟﯩﺴﯩﺪﻩ ﻳﻪﻧﻪ، ﯞﺍﯓ ﻟﯧﭽﯜﻩﻧﻨﯩﯔ ﻣﯘﻗﯩﻤﻠﯩﻖ ﻫﻪﻣﻤﯩﻨﻰ ﺑﯧﺴﯩﭗ ﭼﯜﺷﯩﺪﯗ ﺩﯦﮕﻪﻥ ﭼﺎﻗﯩﺮﯨﻘﻰ ﺑﯩﻠﻪﻥ ﺧﯘ ﺟﯩﻨﺘﺎﯞ ﺋﯘﻳﻐﯘﺭ ﺭﺍﻳﻮﻧﯩﻨﻰ ﻛﯚﺯﺩﯨﻦ ﻛﻪﭼﯜﺭﮔﻪﻧﺪﻩ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﺷﯩﻨﺠﺎﯕﺪﺍ ﺋﺎﺳﺎﺳﯩﻲ ﯞﻩﺯﯨﭙﻪ ﺋﯩﻘﺘﯩﺴﺎﺩﯨﻲ ﺗﻪﺭﻩﻗﻘﯩﻴﺎﺕ ﺩﯦﮕﻪﻥ ﭼﺎﻗﯩﺮﯨﻘﯩﻨﯩﯔ ﺑﯩﺮ - ﺑﯩﺮﯨﮕﻪ ﺯﯨﺖ ﺋﯩﻜﻪﻧﻠﯩﻜﯩﻨﻰ ﻛﯚﺭﺳﯩﺘﯩﺪﯗ ﯞﻩ ﺭﻩﺋﯩﺲ ﻧﯘﺭ ﺑﻪﻛﺮﯨﻨﯩﯔ ﺧﯘ ﺟﯩﻨﺘﺎﯞﻧﯩﯔ ﭼﺎﻗﯩﺮﯨﻘﻰ ﺑﯘﻳﯩﭽﻪ ﺋﻪﻣﻪﺱ، ﯞﺍﯓ ﻟﯧﭽﯜﻩﻧﻨﯩﯔ ﭼﺎﻗﯩﺮﯨﻘﻰ ﺑﯘﻳﯩﭽﻪ ﺋﯩﺶ ﺗﯘﺗﯘﯞﺍﺗﻘﺎﻧﻠﯩﻘﯩﻨﻰ ﺑﺎﻳﺎﻥ ﻗﯩﻠﯩﺪﯗ.

ﺋﺎﭘﺘﻮﺭ ﻣﺎﻗﺎﻟﯩﺴﯩﻨﯩﯔ ﺋﺎﺧﯩﺮﯨﺪﺍ ﺋﯘﻳﻐﯘﺭﻻﺭﻧﯩﯔ ﻣﯩﻠﻠﯩﻲ ﻣﻪﻧﭙﻪﺋﻪﺗﯩﻨﯩﯔ ﺩﯙﻟﻪﺗﻨﯩﯔ ﻣﻪﻧﭙﻪﺋﻪﺗﯩﮕﻪ ﺧﯩﻼﭖ ﺋﻪﻣﻪﺳﻠﯩﻜﯩﻨﻰ، ﺋﯘﻳﻐﯘﺭ ﻣﻪﻧﭙﻪﺋﻪﺗﯩﻨﻰ ﻗﻮﻏﺪﺍﺵ ﺋﯜﭼﯜﻥ ﺧﻪﻟﻖ ﺋﺎﻣﻤﯩﺴﻰ ﺑﯩﻠﻪﻥ ﺑﯩﺮﻟﯩﻜﺘﻪ ﺯﯨﻴﺎﻟﯩﻴﻼﺭ ﻗﻮﺷﯘﻧﻰ ﯞﻩ ﻣﯩﻠﻠﯩﻲ ﺭﻩﻫﺒﻪﺭﻟﯩﻚ ﻗﺎﺗﻠﯩﻤﻰ ﺗﻪﯓ ﻫﻪﺭﯨﻜﻪﺕ ﻗﯩﻠﯩﺸﻰ ﻛﯧﺮﻩﻛﻠﯩﻜﯩﻨﻰ، ﺭﻩﺋﯩﺲ ﻧﯘﺭ ﺑﻪﻛﺮﯨﻨﯩﯔ ﺋﯘﻳﻐﯘﺭﻏﺎ ﯞﻩﻛﯩﻞ ﺳﯜﭘﯩﺘﯩﺪﻩ ﺭﻩﺋﯩﺴﻠﯩﻜﻜﻪ ﺗﻪﻳﯩﻨﻠﻪﻧﮕﯩﻨﻰ ﺋﯜﭼﯜﻥ ﺋﯘﻳﻐﯘﺭ ﻣﻪﻧﭙﻪﺋﻪﺗﯩﻨﻰ ﻗﻮﻏﺪﺍﺷﺘﺎ ﺑﺎﺵ ﺗﺎﺭﺗﺎﻟﻤﺎﺱ ﻣﻪﺳﺌﯘﻟﯩﻴﯩﺘﻰ ﺑﺎﺭﻟﯩﻘﯩﻨﻰ ﺋﻪﺳﻜﻪﺭﺗﯩﺪﯗ ﯞﻩ ﻣﺎﻗﺎﻟﯩﺴﯩﻨﻰ ﻣﯘﻧﺪﺍﻕ ﺋﺎﺧﯩﺮﻻﺷﺘﯘﺭﯨﺪﯗ: ﺋﻪﮔﻪﺭ ﻣﯩﻠﻠﯩﺘﯩﻤﯩﺰ ﺑﯘ ﻣﻪﺳﯩﻠﯩﻠﻪﺭﻧﯩﯔ ﺳﯚﺯ ﺋﺎﺭﻗﯩﻠﯩﻖ ﻫﻪﻝ ﺑﻮﻟﯘﺷﯩﻐﺎ ﺋﯩﺸﻪﻧﭽﯩﻨﻰ ﻳﻮﻗﯩﺘﯩﭗ ﻗﻮﻳﺴﺎ، ﻫﻪﻕ - ﻫﻮﻗﯘﻗﯩﻨﻰ ﺑﺎﺷﻘﺎ ﻳﻮﻟﻼﺭﺩﯨﻦ ﺋﯩﺰﺩﻩﺷﻜﻪ ﻣﻪﺟﺒﯘﺭ ﺑﻮﻟﯘﭖ ﻗﺎﻟﯩﺪﯗ ﺩﻩﭖ ﺋﺎﮔﺎﻫﻼﻧﺪﯗﺭﯨﺪﯗ.

ﻫﯚﺭﻣﻪﺗﻠﯩﻚ ﺋﻮﻗﯘﺭﻣﻪﻧﻠﻪﺭ، ﻳﯘﻗﯩﺮﯨﺪﺍ ﺑﯩﺰ ﺳﯩﻠﻪﺭﮔﻪ ﯞﻩﺗﻪﻥ ﺋﯩﭽﯩﺪﯨﻜﻰ ﺋﯘﻳﻐﯘﺭ ﺗﻮﺭ ﺑﻪﺗﻠﯩﺮﯨﺪﻩ ﺭﻩﺋﯩﺲ ﻧﯘﺭ ﺑﻪﻛﺮﯨﮕﻪ ﻗﺎﺭﯨﺘﯩﭗ ﻳﯧﺰﯨﻠﻐﺎﻥ ﺑﯩﺮ ﭘﺎﺭﭼﻪ ﺋﻮﭼﯘﻕ ﺧﻪﺗﻨﯩﯔ ﻣﻪﺯﻣﯘﻧﯩﻨﻰ ﺗﻮﻧﯘﺷﺘﯘﺭﺩﯗﻕ.