ﺋﺎﻓﯧﻨﺎﺩﺍ " ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﯩﻨﻰ ﻳﻪﺗﻜﯜﺯﯛﺵ" ﻧﺎﻣﺎﻳﯩﺸﻰ ﺑﺎﺷﻼﻧﺪﻯ

• ﻣﯘﺧﺒﯩﺮﯨﻤﯩﺰ ﺟﯜﻣﻪﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺋﺎﻓﯩﻨﺎﺩﺍ، ﻛﯩﺸﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﻯ 9 - ﺋﺎﯞﻏﯘﺳﺖ ﻛﯜﻧﻰ، ﻛﻪﯓ ﻛﯚﻟﻪﻣﻠﯩﻚ ﺧﯩﺘﺎﻱ 2008 ﺋﻮﻟﯩﻤﭙﯩﻜﯩﮕﻪ ﻗﺎﺭﺷﻰ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﺎﺭﺩﻯ. Athens : Activists attend the lighting ceremony of a global human rights torch relay in Athens, 09 August 2007. AFP PHOTO / Aris Messinis

1979- ﻳﯩﻠﻰ ﺳﺎﺑﯩﻖ ﺳﻮﯞﯦﺘﻠﻪﺭ ﺋﯩﺘﺘﯩﭙﺎﻗﯩﻨﯩﯔ ﻗﯩﺰﯨﻞ ﺋﺎﺭﻣﯩﻴﯩﺴﻰ ﺋﺎﻓﻐﺎﻧﯩﺴﺘﺎﻧﻐﺎ ﺑﯧﺴﯩﭗ ﻛﯩﺮﺩﻯ. ﺳﻮﯞﯦﺖ ﻗﯩﺰﯨﻞ ﺋﺎﺭﻣﯩﻴﯩﺴﯩﻨﯩﯔ ﺋﺎﻓﻐﺎﻧﯩﺴﺘﺎﻧﻐﺎ ﺑﯧﺴﯩﭗ ﻛﯩﺮﯨﺸﻰ ﺋﺎﻣﯧﺮﯨﻜﺎ ﻗﻮﺷﻤﺎ ﺷﺘﺎﺗﻠﯩﺮﯨﻨﯩﯔ 1980- ﻳﯩﻠﻠﯩﻖ ﻣﻮﺳﻜﯟﺍ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﯩﺸﯩﻨﻰ ﻛﻪﻟﺘﯜﺭﯛﭖ ﭼﯩﻘﺎﺭﺩﻯ، ﺷﯘﻧﯩﯖﻐﺎ ﺟﺎﯞﺍﺑﻪﻥ 1984- ﻳﯩﻠﺪﯨﻜﻰ ﻟﻮﺱ ﺋﺎﻧﺠﯧﻠﯧﺲ ﺋﻮﻟﯩﻤﭙﯩﻜﯩﮕﻪ ﺳﻮﯞﯦﺘﻠﻪﺭ ﺋﯩﺘﺘﯩﭙﺎﻗﯩﻤﯘ ﻗﺎﺗﻨﺎﺷﻤﺎﻳﺪﯨﻐﺎﻧﻠﯩﻘﯩﻨﻰ ﺋﯩﭙﺎﺩﯨﻠﻪﭖ، 1984- ﻳﯩﻠﻠﯩﻖ ﻟﻮﺱ ﺋﺎﻧﺠﯧﻠﯧﺲ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﻐﺎﻥ ﺋﯩﺪﻯ. ﺷﯘﻧﺪﯨﻦ ﺋﯧﺘﯩﺒﺎﺭﻩﻥ ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﯩﺶ ﯞﻩ ﺋﻮﻟﯩﻤﭙﯩﻜﻨﻰ ﺳﯩﻴﺎﺳﯩﻴﻼﺷﺘﯘﺭﯗﺵ ﺋﺎﺗﺎﻟﻐﯘﺳﻰ ﺋﻮﻟﯩﻤﭙﯩﻚ ﻣﻪﻳﺪﺍﻧﯩﺪﯨﻦ ﻏﺎﻳﯩﭗ ﺑﻮﻟﻐﺎﻥ ﺑﻮﻟﺴﯩﻤﯘ، ﺋﻪﻣﻤﺎ ﺧﯩﺘﺎﻱ ﺋﯚﺯ ﯞﺍﻗﺘﯩﺪﺍ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻐﺎ ﺑﻪﺭﮔﻪﻥ ﯞﻩﺩﯨﻠﯩﺮﯨﻨﻰ ﻗﯩﻠﻤﯩﻐﺎﻧﻠﯩﻘﻰ ﺋﯜﭼﯜﻥ، ﻳﯧﻘﯩﻨﺪﯨﻦ ﺑﯘﻳﺎﻥ، 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﯩﺶ ﭘﯩﻜﺮﻯ ﻳﻪﻧﻪ ﺋﻪﯞﺟﯩﮕﻪ ﭼﯩﻘﯩﺸﻘﺎ ﺑﺎﺷﻠﯩﺪﻯ. ﺑﯘﻻﺭﻧﯩﯔ ﺋﯩﭽﯩﺪﯨﻜﻰ ﺋﻪﯓ ﻳﯧﯖﯩﺴﻰ، 9- ﺋﺎﯞﻏﯘﺳﺖ ﮔﺮﯦﺘﺴﯩﻴﯩﻨﯩﯔ ﭘﺎﻳﺘﻪﺧﺘﻰ ﺋﺎﻓﯧﻨﺎﺩﺍ ﺋﯧﻠﯩﭗ ﺑﯧﺮﯨﻠﻐﺎﻥ " ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﻰ " ﻧﻰ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﻰ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ.

ﺑﯘ ﻧﯚﯞﻩﺗﻠﯩﻚ ﻣﯘﺭﺍﺳﯩﻤﻐﺎ 300 ﮔﻪ ﻳﯧﻘﯩﻦ ﺋﺎﺩﻩﻡ ﻗﺎﺗﻨﺎﺷﻘﺎﻥ

9 ‏- ﺋﺎﯞﻏﯘﺳﺖ ﻛﯜﻧﻰ ﺩﯗﻧﻴﺎﻧﯩﯔ ﻫﻪﺭﻗﺎﻳﺴﻰ ﺟﺎﻳﻠﯩﺮﯨﺪﯨﻦ ﻛﻪﻟﮕﻪﻥ ﻳﯜﺯﻟﯩﮕﻪﻥ ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﺴﻰ ﮔﺮﯦﺘﺴﯩﻴﯩﻨﯩﯔ ﻣﻪﺭﻛﯩﺰﻯ ﺋﺎﻓﯩﻨﺎ ﺷﻪﻫﯩﺮﯨﺪﻩ ﻳﯩﻐﯩﻠﯩﭗ، ﺩﯗﻧﻴﺎﯞﻯ" ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﻰ ﻳﻪﺗﻜﯜﺯﯛﺵ" ﭘﺎﺋﺎﻟﯩﻴﯩﺘﻰ ﺋﯧﻠﯩﭗ ﺑﯧﺮﯨﭗ، ﺧﯩﺘﺎﻳﻨﯩﯔ ﻧﺎﭼﺎﺭ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﻰ ﺋﺎﺷﻜﺎﺭﯨﻠﯩﺪﻯ ﯞﻩ ﺧﻪﻟﻘﺌﺎﺭﺍ ﺟﻪﻣﺌﯩﻴﻪﺗﻨﻰ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﯩﺸﻘﺎ ﭼﺎﻗﯩﺮﺩﻯ. ﻣﻪﺯﻛﯘﺭ ﻧﺎﻣﺎﻳﯩﺸﻨﻰ ﻓﺎﻟﯘﻧﮕﯘﯓ ﻣﯘﺭﯨﺘﻠﯩﺮﻯ ﺋﺎﺳﺎﺳﻠﯩﻖ ﺗﻪﺷﻜﯩﻠﻠﯩﮕﻪﻥ ﺑﻮﻟﯘﭖ، " ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﻰ ﻳﻪﺗﻜﯜﺯﯛﺵ" ﭘﺎﺋﺎﻟﯩﻴﯩﺘﯩﮕﻪ 25 ﺩﯙﻟﻪﺗﺘﯩﻦ ﻛﻪﻟﮕﻪﻥ ﻛﯩﺸﯩﻠﻪﺭ ﻗﺎﺗﻨﺎﺷﻘﺎﻥ.

ﮔﺮﯦﺘﺴﯩﻴﻪ ﺋﻮﻟﯩﻤﭙﯩﻚ ﻳﯩﻐﯩﻨﻰ ﺩﯗﻧﻴﺎﻏﺎ ﻛﻪﻟﮕﻪﻥ ﺟﺎﻱ. ﮔﺮﯦﺘﺴﯩﻴﻪ ﭘﺎﻳﺘﻪﺧﺘﻰ ﺋﺎﻓﯧﻨﺎﺩﺍ ﻳﺎﺯﻟﯩﻖ ﯞﻩ ﻗﯩﺸﻠﯩﻖ ﺋﻮﻟﯩﻤﭙﯩﻚ ﻳﯩﻐﯩﻨﯩﻨﯩﯔ ﻣﻪﺷﺌﻪﻝ ﻳﺎﻧﺪﯗﺭﯗﺵ ﻣﯘﺭﺍﺳﯩﻤﻠﯩﺮﻯ ﺋﯧﻠﯩﭗ ﺑﯧﺮﯨﻠﯩﺪﯗ. ﻛﯩﺸﯩﻠﯩﻚ ﻫﻮﻗﯘﻕ ﭘﺎﺋﺎﻟﯩﻴﻪﺗﭽﯩﻠﯩﺮﻯ ﺗﻪﺷﻜﯩﻠﻠﯩﮕﻪﻥ ﭘﻪﻳﺸﻪﻧﺒﻪ ﻛﯜﻧﯩﺪﯨﻜﻰ 3 ﺳﺎﺋﻪﺗﻠﯩﻚ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﯩﻨﻰ ﻳﺎﻧﺪﯗﺭﯗﺵ ﻣﯘﺭﺍﺳﯩﻤﯩﻤﯘ ﺧﯘﺩﺩﻯ ﺋﻮﻟﯩﻤﭙﯩﻚ ﻣﻪﺷﺌﯩﻠﯩﻨﻰ ﻳﺎﻧﺪﯗﺭﯗﺵ ﻣﯘﺭﺍﺳﯩﻤﻰ ﺗﯜﺳﯩﮕﻪ ﻛﯩﺮﮔﻪﻥ ﺑﻮﻟﯘﭖ، ﻗﻪﺩﯨﻤﯩﻲ ﮔﺮﯦﻜﭽﻪ ﻛﯩﻴﯩﻨﮕﻪﻥ ﺑﯩﺮ ﻗﯩﺰ ﻣﻪﺷﺌﻪﻟﻨﻰ ﻳﺎﻧﺪﯗﺭﻏﺎﻥ. ﻣﯘﺭﺍﺳﯩﻤﻐﺎ ﺧﯩﺘﺎﻱ ، ﮔﺮﯦﻜﻠﻪﺭ ﯞﻩ ﺑﺎﺷﻘﺎ ﭼﻪﺗﺌﻪﻟﻠﯩﻜﻠﻪﺭﻧﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ 300 ﮔﻪ ﻳﯧﻘﯩﻦ ﺋﺎﺩﻩﻡ ﻗﺎﺗﻨﺎﺷﻘﺎﻥ.

ﺑﺎﻳﻘﯘﺕ ﻗﯩﻠﯩﺶ ﭼﺎﻗﯩﺮﯨﻘﻰ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ ﻫﻪﺭﯨﻜﻪﺗﻜﻪ ﻛﻪﻟﺘﯜﺭﯛﺷﻰ ﻣﯜﻣﻜﯩﻦ

ﺋﺎﻓﯩﻨﺎﺩﺍ، "ﻛﯩﺸﻠﯩﻚ ﺩﻩﭘﺴﻪﻧﺪﯨﭽﯩﻠﯩﮕﻰ ﺑﯩﻠﻪﻥ ﺑﯧﻴﺠﯩﯔ ﺋﻮﻟﯩﻤﭙﯩﻜﻰ ﺑﯩﺮ ﯞﺍﻗﯩﺘﺘﺎ ﻣﻪﯞﺟﯘﺕ ﺑﻮﻟﯘﭖ ﺗﯘﺭﺍﻟﻤﺎﻳﺪﯗ" ﺩﯦﮕﻪﻥ ﺷﯘﺋﺎﺭ ﺋﺎﻟﺪﯨﺪﺍ، ﺋﻮﻟﯩﻤﭙﯩﻚ ﻣﻪﺷﺌﻪﻟﻰ ﺗﯘﺗﻘﺎﻥ ﺋﺎﻳﺎﻝ. Athens : Women, playing the role of priestesses, hold torches in front of a banner reading "Human rights abuse cannot co-exist with Beijing Olympics" during the lighting ceremony of a global human rights torch relay in Athens, 09 August 2007. AFP PHOTO / Aris Messinis

ﻳﯩﻐﯩﻠﯩﺸﻘﺎ ﻗﺎﺗﻨﺎﺷﻘﺎﻥ ﻛﺎﻧﺎﺩﺍﻧﯩﯔ ﺳﺎﺑﯩﻖ ﺗﺎﺷﻘﻰ ﺋﯩﺸﻼﺭ ﻣﯩﻨﯩﺴﺘﯩﺮﻯ ﺩﺍﯞﯨﺪ ﻛﯩﻠﮕﻮﺭ": ﺑﯩﺰ ﺑﯧﻴﺠﯩﯖﺪﯨﻜﯩﻠﻪﺭﻧﯩﯔ ﺩﯨﻘﻘﯩﺘﯩﻨﻰ ﻗﻮﺯﻏﯩﺸﯩﻤﯩﺰ ﻛﯧﺮﻩﻙ. ﺋﯘﻻﺭ ﺑﯘ ﻳﻪﺭﺩﻩ ﺑﯩﺮ ﭼﻮﯓ ﻣﻪﺳﯩﻠﯩﻨﯩﯔ، ﺑﯩﺮ ﺩﯗﻧﻴﺎﯞﻯ ﻣﻪﺳﯩﻠﯩﻨﯩﯔ ﺑﺎﺭﻟﯩﻘﯩﻨﻰ ﺑﯩﻠﻤﻪﻳﺪﯨﻐﺎﻧﺪﻩﻙ ﻗﯩﻠﯩﺪﯗ . ﺑﯘ ﻣﻪﺳﯩﻠﻪ ﭼﻮﻗﯘﻡ ﻫﻪﻝ ﻗﯩﻠﯩﻨﯩﺸﻰ ﻛﯧﺮﻩﻙ. ﺑﺎﻳﻘﯘﺕ ﻗﯩﻠﯩﺸﻘﺎ ﭼﺎﻗﯩﺮﯨﻖ ﻗﯩﻠﺴﺎﻕ ﺋﯘﻻﺭ ﻫﻪﺭﯨﻜﻪﺗﻜﻪ ﻛﯧﻠﯩﺸﻰ ﻣﯘﻣﻜﯩﻦ" ﺩﯦﺪﻯ ﯞﻩ ﺋﺎﻣﯧﺮﯨﻜﯩﻠﯩﻖ ﻛﯩﻨﻮ ﭼﻮﻟﭙﯩﻨﻰ ﺋﯩﺠﺘﯩﻤﺎﺋﯩﻲ ﭘﺎﺋﺎﻟﯩﻴﻪﺗﭽﻰ ﻣﯩﻴﺎ ﻓﺎﺭﯞﻭ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﻗﯩﺮﻏﯩﻨﭽﯩﻠﯩﻖ ﺋﻮﻟﯩﻤﭙﯩﻜﻰ ﺩﻩﭖ ﺋﺎﺗﯩﻐﺎﻧﺪﯨﻦ ﻛﯩﻴﯩﻦ ، ﺧﯩﺘﺎﻳﻨﯩﯔ ﺩﺍﺭﻓﯘﺭ ﻣﻪﺳﯩﻠﯩﺴﯩﺪﻩ ﺗﯩﺰ ﺋﯩﻨﻜﺎﺱ ﻗﺎﻳﺘﯘﺭﻏﺎﻧﻠﯩﻘﯩﻨﻰ، ﺑﯘ ﻗﯧﺘﯩﻢ "ﻗﺎﻧﻠﯩﻖ ﻳﯩﻐﯩﻢ ﺋﻮﻟﯩﻤﭙﯩﻜﻰ" ﻫﻪﻗﻘﯩﺪﻩ ﺳﯚﺯ ﺋﺎﭼﺴﺎ ﺧﯩﺘﺎﻳﻨﯩﯔ ﺑﯘﻧﯩﯖﻐﺎ ﺋﯩﻨﻜﺎﺱ ﻗﺎﻳﺘﯘﺭﯗﺷﻰ ﯞﻩ ﺑﯩﮕﯘﻧﺎﻫ ﺋﺎﺩﻩﻣﻠﻪﺭﻧﻰ ﺋﯩﭽﻜﻰ ﺋﻪﺯﺍ ﺋﯜﭼﯜﻥ ﺋﯚﻟﺘﯜﺭﯛﺷﻨﻰ ﺗﻮﺧﺘﯩﺸﻰ ﻣﯘﻣﻜﯩﻨﻠﯩﻜﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﻛﯩﻠﮕﻮﺭ، " ﺋﺎﺩﻩﻡ ﺋﯩﭽﻜﻰ ﺋﻪﺯﺍ ﻳﯩﻐﯩﻤﻰ" ﺗﯧﻤﯩﻠﯩﻖ ﺩﻭﻛﻼﺗﻨﯩﯔ ﺋﺎﭘﺘﻮﺭﻯ ﺑﻮﻟﯘﭖ، ﺋﯘ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺋﯚﺯ ﻧﯩﺰﺍﻣﻨﺎﻣﯩﻠﯩﺮﯨﻨﯩﯔ ﺩﻩﭘﺴﻪﻧﺪﻩ ﻗﯩﻠﯩﻨﯩﺸﯩﻨﻰ ﻛﯚﺭﻣﻪﺳﻠﯩﻜﻜﻪ ﺳﺎﻟﻐﺎﻧﻠﯩﻘﯩﻨﻰ ﺋﻪﺳﻜﻪﺭﺗﺘﻰ ﯞﻩ ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ ﺟﻪﻛﯘﺱ ﺭﻭﺟﺠﯩﻨﯩﯔ ﺩﯛﺷﻪﻧﺒﻪ ﻛﯜﻧﻰ " ﺋﻮﻟﯩﻤﭙﯩﻚ ﻫﻪﻣﻤﯩﻨﻰ ﻗﯘﺗﻘﯘﺯﯨﺪﯨﻐﺎﻥ ﺩﻭﺭﺍ ﺋﻪﻣﻪﺱ" ﺩﻩﭖ ﺋﯧﻴﺘﻘﺎﻧﻠﯩﺮﯨﻐﺎ ﻗﺎﺭﯨﺘﺎ، " ﺋﯘﻧﯩﯔ ﮔﻪﭘﻠﯩﺮﻯ ﺑﯩﺮ ﺋﻪﺧﻠﻪﺕ، ﺟﻪﻛﯘﺱ ﺭﻭﺟﺠﻰ ﭼﻮﻗﯘﻡ ﺋﻮﻟﯩﻤﭙﯩﻚ ﻧﯩﺰﺍﻣﻨﺎﻣﯩﺴﯩﺪﻩ ﺋﺎﺩﻩﻣﻨﯩﯔ ﻗﻪﺩﺭﻯ ‏- ﻗﯩﻤﻤﯩﺘﻰ ﺗﻪﻛﯩﺘﻠﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﯩﺸﻰ ﻛﯧﺮﻩﻙ " ﺩﯦﺪﻯ.

ﺑﯩﻞ ﺭﯨﭽﺎﺭﺩﺳﻮﻥ": ﺑﯩﺰ ﺋﯘﻻﺭﻏﺎ ﺋﻮﻟﯩﻤﭙﯩﻜﻜﻪ ﺑﺎﺭﻣﺎﻳﻤﯩﺰ ﺩﻩﻳﻤﯩﺰ"

ﮔﻪﺭﭼﻪ ﻫﺎﺯﯨﺮﭼﻪ ﺑﯩﺮﻩﺭ ﺩﯙﻟﻪﺕ 2008- ﻳﯩﻠﻰ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﯩﺶ ﻗﺎﺭﺍﺭﯨﻨﻰ ﺋﺎﻟﻤﯩﻐﺎﻥ ﺑﻮﻟﺴﯩﻤﯘ، 8- ﺋﺎﯞﻏﯘﺳﺖ ﺩﺍﻧﺎ ﺭﻭﺑﺎﻛﻜﯧﺮ ﻗﺎﺗﺎﺭﻟﯩﻖ 8 ﻧﻪﭘﻪﺭ ﺋﺎﻣﯧﺮﯨﻜﺎ ﻗﻮﺷﻤﺎ ﺷﺘﺎﺗﻠﯩﺮﻯ ﺋﺎﯞﺍﻡ ﭘﺎﻻﺗﺎ ﺋﻪﺯﺍﻟﯩﺮﻯ ﻗﺎﺭﺍ ﻻﻳﯩﻬﯩﺴﻰ ﻣﺎﻗﯘﻟﻼﭖ، ﺋﺎﻣﯧﺮﯨﻜﺎ ﭘﺮﯦﺰﯨﺪﯦﻨﺘﻰ ﺟﻮﺭﺟﻰ ﺑﻮﺷﻘﺎ، ﺋﻪﮔﻪﺭ ﺧﯩﺘﺎﻱ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﺪﯨﻦ ﺑﯘﺭﯗﻥ ﺋﯚﺯﻯ ﯞﻩﺩﻩ ﻗﯩﻠﻐﺎﻥ ﻛﯩﺸﯩﻠﯩﻚ ﻫﻮﻗﯘﻗﯩﻨﻰ ﺧﻪﻟﻘﯩﮕﻪ ﺑﻪﺭﻣﯩﺴﻪ، ﺩﺍﺭﻓﯘﺭﺩﺍ ﻗﯩﺮﻏﯩﻨﭽﯩﻠﯩﻖ ﻗﯩﻠﯩﯟﺍﺗﻘﺎﻥ ﺳﯘﺩﺍﻥ ﻫﯚﻛﯜﻣﯩﺘﯩﻨﻰ ﻗﻮﻟﻼﺷﻨﻰ ﺗﻮﺧﺘﺎﺗﻤﯩﺴﺎ ﺑﯧﻴﺠﯩﯔ ﺋﻮﻟﯩﻤﭙﯩﻜﯩﻨﻰ ﺑﺎﻳﻘﯘﺕ ﻗﯩﻠﯩﺸﻨﻰ ﺋﻮﻳﻠﯩﺸﯩﭗ ﻗﻮﻳﯘﺵ ﺗﻪﻛﻠﯩﭙﯩﻨﻰ ﺑﻪﺭﮔﻪﻥ.

ﺑﯘﻧﺪﯨﻦ ﺑﯩﺮ ﻧﻪﭼﭽﻪ ﻫﻪﭘﺘﻪ ﺋﯩﻠﮕﯩﺮﻯ، ﺋﺎﻣﯧﺮﯨﻜﯩﻨﯩﯔ 2008- ﻳﯩﻠﻠﯩﻖ ﭘﺮﯦﺰﯨﺪﯦﻨﺖ ﺳﺎﻳﻠﯩﻤﻰ ﻧﺎﻣﺰﺍﺗﻰ ﺑﯩﻞ ﺭﯨﭽﺎﺭﺩﺳﻮﻥ ﺩﺍﺭﻓﯘﺭ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺸﺘﺎ ﺧﯩﺘﺎﻳﻨﯩﯔ ﺳﯘﺩﺍﻧﺪﯨﻜﻰ ﻛﯜﭼﻠﯜﻙ ﺗﯧﺰﯨﺴﻠﯩﺮﻯ ﺳﻪﯞﻩﺑﻠﯩﻚ، ﺧﯩﺘﺎﻳﻐﺎ ﺗﺎﻳﯩﻨﯩﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻥ ﯞﻩ " ﺋﻪﮔﻪﺭ ﺧﯩﺘﺎﻳﻼﺭ ﺷﯘﻧﺪﺍﻕ ﻗﯩﻠﯩﺸﻨﻰ ﺧﺎﻟﯩﻤﯩﺴﺎ، ﺑﻪﻟﻜﯩﻢ ﺑﯩﺰ ﺋﯘﻻﺭﻏﺎ ﺋﻮﻟﯩﻤﭙﯩﻜﻜﻪ ﺑﺎﺭﻣﺎﻳﻤﯩﺰ ﺩﯦﻴﯩﺸﯩﻤﯩﺰ ﻣﯘﻣﻜﯩﻦ" ﺩﯦﮕﻪﻥ ﺋﯩﺪﻯ.

ﺑﯘ ﭘﺎﺋﺎﻟﯩﻴﻪﺗﻨﻰ ﺋﻮﺭﯗﻧﻼﺷﺘﯘﺭﻏﯘﭼﯩﻼﺭﻧﯩﯔ ﺑﯩﻠﺪﯛﺭﯛﺷﯩﭽﻪ،، ﻣﻪﺯﻛﯘﺭ " ﻛﯩﺸﯩﻠﯩﻚ ﻫﻮﻗﯘﻕ ﻣﻪﺷﺌﯩﻠﻰ" ﻧﻰ ﻳﻪﺗﻜﯜﺯﯛﺵ ﭘﺎﺋﺎﻟﯩﻴﯩﺘﻰ، ﻳﺎﯞﺭﻭﭘﺎ، ﺋﺎﺳﯩﻴﺎ، ﺷﯩﻤﺎﻟﯩﻲ ﺋﺎﻣﯧﺮﯨﻜﺎ ﯞﻩ ﺋﺎﯞﺳﺘﺮﺍﻟﯩﻴﻪ ﻗﯩﺘﺌﻪﻟﯩﺮﯨﮕﻪ ﺟﺎﻳﻼﺷﻘﺎﻥ 25 ﺩﯙﻟﻪﺗﺘﯩﻜﻰ 100 ﺩﯨﻦ ﺋﺎﺭﺗﯘﻕ ﺷﻪﻫﻪﺭﺩﻩ ﺗﻮﺧﺘﺎﭖ ﺋﯚﺗﯩﺪﯨﻜﻪﻥ.

ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻢ": ﺑﯧﻴﺠﯩﯔ ﺋﻮﻟﯩﻤﭙﯩﻜﻰ ﭼﻮﻗﯘﻡ ﺑﺎﻳﻘﯘﺕ ﻗﯩﻠﯩﻨﯩﺸﻰ ﻛﯧﺮﻩﻙ"

ﻫﺎﺯﯨﺮ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻤﯘ ﺋﻮﻟﯩﻤﭙﯩﻜﻜﻪ ﻗﺎﺭﺷﻰ ﺑﯩﺮ ﻗﺎﺗﺎﺭ ﻧﺎﻣﺎﻳﯩﺶ ﯞﻩ ﺑﺎﺷﻘﺎ ﭘﺎﺋﺎﻟﯩﻴﻪﺗﻠﻪﺭﻧﻰ ﺋﻮﺭﯗﻧﻼﺷﺘﯘﺭﯗﺵ ﭘﯩﻼﻧﻰ ﺑﺎﺭﻟﯩﻘﯩﻨﻰ ﺑﯩﻠﺪﯛﺭﺩﻯ.

-8ﺋﺎﯞﻏﯘﺳﺖ ﺋﺎﻣﯧﺮﯨﻜﺎ ﭘﺎﻳﺘﻪﺧﺘﻰ ﯞﺍﺷﯩﻨﮕﺘﻮﻧﻐﺎ ﺟﺎﻳﻼﺷﻘﺎﻥ ﺧﯩﺘﺎﻱ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﺍ، ﺧﯩﺘﺎﻳﺪﯨﻜﻰ ﻛﯜﻧﺴﺎﻳﯩﻦ ﺋﯧﻐﯩﺮﻟﯩﺸﯩﯟﺍﺗﻘﺎﻥ ﻛﯩﺸﯩﻠﯩﻚ ﻫﻮﻗﯘﻕ ﺩﻩﭘﺴﻪﻧﺪﯨﭽﯩﻠﯩﻜﻨﻰ ﺋﻪﻳﯩﺒﻠﻪﭖ ﺋﯧﻠﯩﭗ ﺑﯧﺮﯨﻠﻐﺎﻥ ﻧﺎﻣﺎﻳﯩﺶ ﺟﻪﺭﻳﺎﻧﯩﺪﺍ ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺭﻩﺋﯩﺴﻰ ﺭﺍﺑﯩﻴﻪ ﻗﺎﺩﯨﺮ ﺧﺎﻧﯩﻤﻤﯘ " ﺋﻪﮔﻪﺭ ﺧﯩﺘﺎﻱ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻼﺷﺘﺎ ﺟﯩﺪﺩﯨﻲ ﻫﻪﺭﯨﻜﻪﺕ ﻗﻮﻟﻼﻧﻤﯩﺴﺎ 2008- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻜﻨﻰ ﭼﻮﻗﯘﻡ ﺑﺎﻳﻘﯘﺕ ﻗﯩﻠﯩﺶ ﻛﯧﺮﻩﻙ" ﺩﻩﭖ ﻛﯚﺭﺳﻪﺗﻜﻪﻥ ﺋﯩﺪﻯ. (ﺟﯜﻣﻪ)