ﺋﻮﻟﯩﻤﭙﯩﻚ ﻫﻪﻗﯩﻘﻪﺗﻪﻥ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻠﯩﺸﯩﻐﺎ ﺗﯜﺭﺗﻜﻪ ﺑﻮﻟﺪﯨﻤﯘ؟

• ﻣﯘﺧﺒﯩﺮﯨﻤﯩﺰ ﺋﻪﻗﯩﺪﻩﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺑﯩﺮ ﻗﯩﺴﯩﻢ ﺧﺎﺩﯨﻤﻠﯩﺮﻯ، ﺋﻮﻟﯩﻤﭙﯩﻚ ﻣﯘﺭﺍﺳﯩﻤﻰ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﻳﺎﺧﺸﯩﻠﯩﻨﯩﺸﻰ ﺋﯜﭼﯜﻥ ﺗﯜﺭﺗﻜﻪ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ، ﺑﯩﺮﺍﻕ ﺧﻪﻟﻘﺌﺎﺭﺍ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺧﺎﺩﯨﻤﻠﯩﺮﻯ ﺑﻮﻟﺴﺎ ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻨﻰ ﺋﯚﺗﻜﯜﺯﯛﺵ ﺳﺎﻻﻫﯩﻴﯩﺘﯩﮕﻪ ﺋﯧﺮﯨﺸﯩﯟﯨﻠﯩﭙﻼ، ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻼﺵ ﻫﻪﻗﻘﯩﺪﻩ ﺑﻪﺭﮔﻪﻥ ﯞﻩﺩﯨﺴﯩﮕﻪ ﺧﯩﻼﭖ ﻫﻪﺭﯨﻜﻪﺗﻠﻪﺭﻧﻰ ﺋﯩﺰﭼﯩﻞ ﺳﺎﺩﯨﺮ ﻗﯩﻠﯩﭗ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﻣﻪﻛﺘﻪ. ﺋﯘﻧﺪﺍﻗﺘﺎ ﺳﯜﻳﯜﻣﻠﯜﻙ ﺭﺍﺩﯨﺌﻮ ﺋﺎﯕﻠﯩﻐﯘﭼﯩﻼﺭ، ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺕ ﻣﻪﺳﺌﯘﻟﻠﯩﺮﻯ ﯞﻩ ﺋﻪﺯﺍﻟﯩﺮﯨﻨﯩﯔ ﺑﯘ ﻫﻪﻗﺘﯩﻜﻰ ﻗﺎﺭﺍﺷﻠﯩﺮﯨﻨﯩﯔ ﺋﺎﺳﺎﺳﻰ ﺯﺍﺩﻯ ﻧﯧﻤﻪ؟

"ﻳﯩﺮﺍﻗﻨﻰ ﺋﻮﻳﻠﯩﻐﺎﻧﺪﺍ، ﺋﻮﻟﯩﻤﭙﯩﻚ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﻳﺎﺧﺸﯩﻠﯩﻨﯩﺸﻰ ﺋﯜﭼﯜﻥ ﺋﺎﻛﺘﯩﭗ ﺭﻭﻝ ﺋﻮﻳﻨﺎﻳﺪﯗ"

ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﺳﺎﺑﯩﻖ ﺋﯩﺶ ﺑﺎﺷﻘﯘﺭﻏﯘﭼﯩﺴﻰ، ﻧﯚﯞﻩﺗﺘﻪ ﻣﻪﺯﻛﯜﺭ ﻛﻮﻣﯩﺘﯧﺘﻨﯩﯔ ﻗﺎﻧﯘﻥ ﻣﻪﺳﻠﯩﻬﻪﺗﭽﯩﻠﯩﻚ ﯞﻩﺯﯨﭙﯩﺴﯩﻨﻰ ﺋﯚﺗﻪﯞﺍﺗﻘﺎﻥ ﻛﺎﺭﺍﺩﯤ ﺋﻪﭘﻪﻧﺪﻯ ﭼﺎﺭﺷﻪﻧﺒﻪ ﻛﯜﻧﻰ": ﻗﯩﺴﻘﯩﻐﯩﻨﺎ ﯞﺍﻗﯩﺖ ﺋﯩﭽﯩﺪﻩ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﺪﻩ ﻛﻮﻧﻜﺮﯦﺘﻨﻰ ﺑﯩﺮ ﺋﯚﺯﮔﯩﺮﯨﺸﻨﯩﯔ ﻣﻪﻳﺪﺍﻧﻐﺎ ﻛﻪﻟﮕﻪﻧﻠﯩﻜﻰ ﺗﻮﻏﺮﯨﺴﯩﺪﺍ ﺋﯧﻨﯩﻖ ﺑﯩﺮ ﻳﻪﻛﯜﻥ ﭼﯩﻘﯩﺮﯨﺶ ﺋﺎﺳﺎﻥ ﺋﻪﻣﻪﺱ، ﺋﻪﻣﻤﺎ ﻣﯧﻨﯩﯖﭽﻪ ﻳﯩﺮﺍﻗﻨﻰ ﺋﻮﻳﻠﯩﻐﺎﻧﺪﺍ، ﺋﻮﻟﯩﻤﭙﯩﻚ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻗﯩﻨﯩﯔ ﻳﺎﺧﺸﯩﻠﯩﻨﯩﺸﻰ ﺋﯜﭼﯜﻥ ﺋﺎﻛﺘﯩﭗ ﺭﻭﻝ ﺋﻮﻳﻨﺎﻳﺪﯗ" ﺩﯦﺪﻯ.

ﺑﯩﺮﺍﻕ، ﺧﯩﺘﺎﻱ 2001 ‏- ﻳﯩﻠﻰ، 2008 ‏- ﻳﯩﻠﻠﯩﻖ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻨﻰ ﺋﯚﺗﻜﯜﺯﯛﺵ ﺳﺎﻻﻫﯩﻴﯩﺘﯩﮕﻪ ﺋﯧﺮﯨﺸﻜﻪﻧﺪﯨﻦ ﺑﯘﻳﺎﻥ، ﺧﻪﻟﻘﺌﺎﺭﺍ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ، ﺋﯩﺰﭼﯩﻞ ﺗﯜﺭﺩﻩ ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺧﺎﺗﯩﺮﯨﺴﯩﻨﻰ ﻳﯧﻘﯩﻨﺪﯨﻦ ﻛﯚﺯﯨﺘﯩﭗ، ﺧﯩﺘﺎﻳﻨﯩﯔ ﺋﻮﻟﯩﻤﭙﯩﻚ ﺋﯚﺗﻜﯜﺯﯛﺵ ﻫﻮﻗﯘﻗﯩﻐﺎ ﺋﯧﺮﯨﺸﯩﺸﺘﯩﻦ ﺋﯩﻠﮕﯩﺮﻯ، ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻐﺎ ﺑﻪﺭﮔﻪﻥ ﻛﯩﺸﯩﻠﯩﻚ ﻫﻮﻗﯘﻗﻨﻰ ﻳﺎﺧﺸﯩﻼﺵ ﻫﻪﻗﻘﯩﺪﯨﻜﻰ ﭼﯩﺮﺍﻳﻠﯩﻖ ﯞﻩﺩﯨﺴﯩﺪﻩ ﺗﯘﺭﻣﯩﻐﺎﻧﻠﯩﻘﯩﻨﻰ، ﻛﯩﺸﯩﻠﯩﻚ ﻫﻮﻗﯘﻗﻘﺎ ﺧﯩﻼﭘﻠﯩﻖ ﻗﯩﻠﯩﭙﻼ ﻗﺎﻟﻤﺎﺳﺘﯩﻦ، ﺑﻪﻟﻜﻰ ﺳﯩﻴﺎﺳﯩﻲ ﻣﻪﻫﺒﯘﺳﻼﺭﻧﻰ ﺋﯚﻟﯜﻡ ﺟﺎﺯﺍﺳﻰ ﺑﯩﻠﻪﻥ ﻗﻪﺗﻠﻰ ﻗﯩﻠﯩﺸﺘﻪﻙ ﺭﻩﺯﯨﻞ ﻗﯩﻠﻤﯩﺸﻼﺭﻧﯩﻤﯘ ﺳﺎﺩﯨﺮ ﻗﯩﻠﯩﭗ ﻛﯧﻠﯩﯟﺍﺗﻘﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻤﺎﻗﺘﺎ.

ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﻗﺎﻧﯘﻥ ﻣﻪﺳﻠﯩﻬﻪﺗﭽﯩﺴﻰ ﻛﺎﺭﺍﺩﯤ ﺋﻪﭘﻪﻧﺪﻯ ﻳﻪﻧﻪ ﻣﯘﻧﺪﺍﻕ ﺩﻩﻳﺪﯗ": ﻧﯚﯞﻩﺗﺘﻪ ﺩﯗﻧﻴﺎﺩﯨﻜﻰ ﻧﯘﺭﻏﯘﻧﻠﯩﻐﺎﻥ ﺩﯙﻟﻪﺗﻠﻪﺭﻧﯩﯔ ﻛﯩﺸﯩﻠﯩﻚ ﻫﻮﻗﯘﻕ ﺋﻪﻫﯟﺍﻟﻰ ﻛﯩﺸﯩﻨﻰ ﺋﻪﺟﻪﺑﻠﻪﻧﺪﯛﺭﯨﺪﯗ، ﺷﯘﯕﺎ ﺧﯩﺘﺎﻳﻨﻰ ﻛﯩﺸﯩﻠﯩﻚ ﻫﻮﻗﯘﻗﻰ ﻧﺎﭼﺎﺭ ﺑﯩﺮﺩﯨﻦ - ﺑﯩﺮ ﺩﯙﻟﻪﺕ ﺩﯨﻴﯩﺸﻜﯩﻤﯘ ﺑﻮﻟﻤﺎﻳﺪﯗ، ﻟﯧﻜﯩﻦ ﻣﻪﻥ ﺷﯘﻧﯩﯖﻐﺎ ﺋﯩﺸﯩﻨﯩﻤﻪﻧﻜﻰ، ﺋﻪﮔﻪﺭ ﺑﯩﺮ ﺗﺎﺭﯨﺨﯩﻲ ﻧﯘﻗﺘﯩﺪﯨﻦ ﻗﺎﺭﺍﻳﺪﯨﻐﺎﻥ ﺑﻮﻟﺴﺎﻕ، ﺋﻮﻟﯩﻤﭙﯩﻜﻨﯩﯔ ﺑﯩﺮ ﺋﯩﻠﮕﯩﺮﯨﻠﻪﺵ ﭘﯘﺭﺳﯩﺘﻰ ﺋﯩﻜﻪﻧﻠﯩﻜﯩﻨﻰ ﻛﯚﺭﯛﯞﺍﻻﻻﻳﻤﯩﺰ ."

ﻛﺎﺭﺍﺩﯤ ﺋﻪﭘﻪﻧﺪﯨﻨﯩﯔ ﺑﯘ ﺳﯚﺯﻟﯩﺮﯨﮕﻪ ﺭﻩﺩﺩﯨﻴﻪ ﺑﻪﺭﮔﻪﻥ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﯩﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ، ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﺋﻮﻟﯩﻤﭙﯩﻜﻜﻪ ﻗﺎﺭﺷﻰ ﺗﯘﺭﯗﺵ ﮔﯘﺭﯗﭘﭙﯩﺴﯩﻨﯩﯔ ﻳﯧﺘﻪﻛﭽﯩﻠﯩﺮﯨﺪﯨﻦ ﺋﻪﺳﻘﻪﺭﺟﺎﻥ ﺋﻪﭘﻪﻧﺪﻯ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ ﺋﯚﺗﺘﻰ.

ﺩﺍﺭﻓﯘﺭ ﻣﻪﺳﯩﻠﯩﺴﻰ ﯞﻩ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﻰ

2008 ‏- ﻳﯩﻠﻠﯩﻖ ﺑﯧﻴﺠﯩﯔ ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻨﯩﯔ ﺋﯚﺗﻜﯜﺯﯛﻟﯜﺷﯩﮕﻪ ﺋﺎﺯﻏﯩﻨﺎ ﯞﺍﻗﯩﺖ ﻗﺎﻟﺪﻯ، ﺧﯩﺘﺎﻳﻨﯩﯔ ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﻰ ﺷﯘﻧﯩﯖﺪﻩﻙ ﺧﯩﺘﺎﻳﻨﯩﯔ ﺧﻪﻟﻘﺌﺎﺭﺍﺩﯨﻜﻰ ﺋﻮﺑﺮﺍﺯﯨﻐﺎ ﺑﯧﺮﯨﻠﮕﻪﻥ ﺗﻪﻧﻘﯩﺪﻟﻪﺭ ﻛﯜﻧﺪﯨﻦ - ﻛﯜﻧﮕﻪ ﻛﯚﭘﯩﻴﯩﺸﻜﻪ ﺑﺎﺷﻠﯩﺪﻯ.

ﺧﻪﻟﻘﺌﺎﺭﺍ ﻛﯩﺸﯩﻠﯩﻚ ﻫﻮﻗﯘﻕ ﺗﻪﺷﻜﯩﻼﺗﻠﯩﺮﻯ، ﻫﻪﺭﻗﺎﻳﺴﻰ ﺩﯙﻟﻪﺗﻠﻪﺭﻧﯩﯔ ﺗﻪﻧﺘﻪﺭﺑﯩﻴﻪ ﻣﺎﻫﯩﺮﻟﯩﺮﯨﻨﻰ ﺋﻮﻟﯩﻤﭙﯩﻜﻨﻰ ﺑﺎﻳﻘﯘﺕ ﻗﯩﻠﯩﺸﻘﺎ ﭼﺎﻗﯩﺮﯨﭗ، ﺋﯘﻻﺭﺩﯨﻦ ﺧﯩﺘﺎﻳﻨﯩﯔ ﺩﺍﺭﻓﯘﺭ ﻗﯩﺮﻏﯩﻨﭽﯩﻠﯩﻘﻰ ﻣﻪﺳﯩﻠﯩﺴﯩﻨﻰ ﻫﻪﻝ ﻗﯩﻠﯩﺶ ﺋﯜﭼﯜﻥ ﺋﻪﻣﻪﻟﯩﻲ ﻫﻪﺭﯨﻜﻪﺕ ﻛﯚﺭﺳﯩﺘﯩﺸﯩﮕﻪ ﺑﯧﺴﯩﻢ ﺋﯩﺸﻠﯩﺘﯩﺸﯩﻨﻰ ﺗﻪﻟﻪﭖ ﻗﯩﻠﺪﻯ. ﺑﯩﺮ ﻗﯩﺴﯩﻢ ﺩﯙﻟﻪﺕ ﻣﺎﻫﯩﺮﻟﯩﺮﻯ" ﺩﺍﺭﻓﯘﺭ ﺋﻪﺗﺮﯨﺘﻰ" ﺩﯦﮕﻪﻥ ﻧﺎﻣﺪﺍ ﺗﻪﺷﻜﯩﻠﻠﯩﻨﯩﭗ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺩﺍﺭﻓﯘﺭ ﻣﻪﺳﯩﻠﯩﺴﯩﻨﻰ ﺑﯩﺮ ﺗﻪﺭﻩﭖ ﻗﯩﻠﯩﺸﺘﺎ ﺋﺎﻛﺘﯩﭗ ﺭﻭﻝ ﺋﻮﻳﻨﯩﺸﯩﻨﻰ ﺗﻪﺷﻪﺑﺒﯜﺱ ﻗﯩﻠﺪﻯ.

ﻫﻮﻟﻠﯩﯟﻭﺩﻧﯩﯔ ﻣﻪﺷﻬﯘﺭ ﺭﯨﮋﯦﺴﺴﻮﺭﻯ ﺳﯩﺘﯟﯨﻦ ﺳﭙﯩﻠﺒﯧﺮﮔﻤﯘ، ﺩﺍﺭﻓﯘﺭ ﻣﻪﺳﯩﻠﯩﺴﻰ ﺗﯚﭘﻪﻳﻠﻰ، ﺋﻮﻟﯩﻤﭙﯩﻚ ﻣﯘﺭﺍﺳﯩﻤﯩﻨﯩﯔ ﺋﯧﭽﯩﻠﯩﺶ ﯞﻩ ﻳﯧﭙﯩﻠﯩﺶ ﻣﯘﺭﺍﺳﯩﻤﯩﻨﯩﯔ ﺳﻪﻧﺌﻪﺕ ﺭﯨﻴﺎﺳﻪﺗﭽﯩﻠﯩﻜﯩﻨﻰ ﺭﻩﺕ ﻗﯩﻠﯩﻐﺎﻥ ﺋﯩﺪﻯ.

ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﯩﻨﯩﯔ ﻗﺎﻧﯘﻥ ﻣﻪﺳﻠﯩﻬﻪﺗﭽﯩﺴﻰ ﻛﺎﺭﺍﺩﯤ ﺋﻪﭘﻪﻧﺪﻯ، ﺋﯚﺯﯨﻨﯩﯔ ﺳﺘﯩﯟﯨﻦ ﺋﻪﭘﻪﻧﺪﯨﻨﯩﯔ ﭘﯩﻜﯩﺮﯨﮕﻪ ﻫﯚﺭﻣﻪﺕ ﺑﯩﻠﺪﯛﺭﯨﺪﯨﻐﺎﻧﻠﯩﻘﯩﻨﻰ، ﺑﯩﺮﺍﻕ ﺋﯘﻧﯩﯔ ﺳﯚﺯﻟﯩﺮﯨﮕﻪ ﭘﯜﺗﯜﻧﻠﻪﻱ ﻗﻮﺷﯘﻟﯘﭖ ﻛﻪﺗﻤﻪﻳﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﯩﺪﻯ. ﺩﯗﻧﻴﺎ ﺧﯩﺘﺎﻱ ﺩﯦﻤﻮﻛﺮﺍﺗﯩﻚ ﭘﺎﺭﺗﯩﻴﯩﻠﻪﺭ ﺑﯩﺮﻟﻪﺷﻤﯩﺴﯩﻨﯩﯔ ﺭﻩﺋﯩﺴﻰ ﯞﺍﯓ ﺟﯜﻥ ﺋﻪﭘﻪﻧﺪﻯ، ﺧﻪﻟﻘﺌﺎﺭﺍ ﺋﻮﻟﯩﻤﭙﯩﻚ ﻛﻮﻣﯩﺘﯧﺘﻰ ﻗﺎﻧﯘﻥ ﻣﻪﺳﻠﯩﻬﻪﺗﭽﯩﺴﻰ ﻛﺎﺭﺍﺩﯤ ﺋﻪﭘﻪﻧﺪﯨﻨﯩﯔ ﺳﯚﺯﻟﯩﺮﯨﮕﻪ ﻗﺎﺭﯨﺘﺎ ﺋﯚﺯﯨﻨﯩﯔ ﻗﺎﺭﺍﺷﻠﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ ﺋﯚﺗﺘﻰ. (ﺋﻪﻗﯩﺪﻩ)