ﺧﯩﺘﺎﻱ ﯞﻩ ﺋﯘﻳﻐﯘﺭ ﺋﯧﻠﯩﺪﻩ ﺋﺎﻟﯩﻲ ﻣﻪﻛﺘﻪﭘﻠﻪﺭﻧﯩﯔ ﺋﻮﻗﯘﺵ ﺭﺍﺳﺨﻮﺗﻰ ﺑﺎﺭﻏﺎﻧﺴﯧﺮﻯ ﺋﯚﺭﻟﯩﻤﻪﻛﺘﻪ

• ﻣﯘﺧﺒﯩﺮﯨﻤﯩﺰ ﻣﯧﮭﺮﯨﺒﺎﻧﻨﯩﯔ ﺑﯘ ﮬﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﻣﯘﺳﺘﻪﻗﯩﻞ ﺗﻪﺷﻜﯩﻼﺕ ﻣﺎﺋﺎﺭﯨﭗ ﺳﯩﻴﺎﺳﯩﺘﻰ ﺗﻪﺗﻘﯩﻘﺎﺕ ﺋﻮﺭﮔﯩﻨﯩﻨﯩﯔ ﺩﯗﻧﻴﺎﺩﯨﻜﻰ 16 ﺩﯙﻟﻪﺗﺘﻪ ﺋﯧﻠﯩﭗ ﺑﺎﺭﻏﺎﻥ ﺗﻪﻛﺸﯜﺭﯛﺵ ﺩﻭﻛﻼﺗﯩﺪﺍ ﻛﯚﺭﺳﯩﺘﯩﻠﯩﺸﯩﭽﻪ، ﻣﯘﺗﻠﻪﻕ ﺳﺎﻥ ﺑﻮﻳﯩﭽﻪ ﮬﯧﺴﺎﺑﻠﯩﻐﺎﻧﺪﺍ، ﺩﯗﻧﻴﺎﺩﺍ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﺋﻪﯓ ﻳﯘﻗﯩﺮﻯ ﺑﻮﻟﻐﺎﻥ ﺩﯙﻟﻪﺕ ﻳﺎﭘﻮﻧﯩﻴﻪ ﺑﻮﻟﯘﭖ، ﺋﯘﻧﯩﯖﺪﯨﻦ ﻗﺎﻟﺴﺎ ﻳﯧﯖﻰ ﺯﯨﻠﻼﻧﺪﯨﻴﻪ ﯞﻩ ﺋﻪﻧﮕﯩﻠﯩﻴﻪ ﺋﯩﻜﻪﻥ. ﻟﯧﻜﯩﻦ ﻳﯩﻠﻠﯩﻖ ﻛﯩﺮﯨﻢ ﺑﻮﻳﯩﭽﻪ ﮬﯧﺴﺎﺑﻠﯩﻐﺎﻧﺪﺍ، ﺧﯩﺘﺎﻳﺪﺍ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﮬﻪﺭ ﻳﯩﻠﻰ ﺗﯚﻟﻪﻳﺪﯨﻐﺎﻥ ﺋﻮﻗﯘﺵ ﮬﻪﻗﻘﻰ ﮬﺎﺯﯨﺮﻗﻰ ﺯﺍﻣﺎﻥ ﺋﺎﻟﯩﻲ ﻣﻪﻛﺘﻪﭖ ﭼﯩﻘﯩﻤﻰ ﺋﻪﯓ ﻳﯘﻗﯩﺮﻯ ﺑﻮﻟﻐﺎﻥ ﻳﺎﭘﻮﻧﯩﻴﯩﺪﯨﻜﻰ ﺋﻮﻗﯘﺵ ﮬﻪﻗﻘﯩﻨﯩﯔ 3 ﮬﻪﺳﺴﯩﺴﯩﺪﯨﻨﻤﯘ ﻳﯘﻗﯩﺮﻯ ﺋﯩﻜﻪﻥ. ﭼﯜﻧﻜﻰ ﻳﯩﻠﻠﯩﻖ ﻛﯩﺮﯨﻤﻰ 31 ﻣﯩﯔ ﺋﺎﻣﯧﺮﯨﻜﺎ ﺩﻭﻟﻠﯩﺮﻯ ﺑﻮﻟﻐﺎﻥ ﻳﺎﭘﻮﻧﯩﻴﻪ ﺧﻪﻟﻘﻰ ﺗﯚﻟﻪﯞﺍﺗﻘﺎﻥ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﺧﯩﺘﺎﻱ ﭘﯘﻟﯩﻐﺎ ﺳﯘﻧﺪﯗﺭﻏﺎﻧﺪﺍ 110 ﻣﯩﯔ ﻳﯜﺋﻪﻥ ﺑﻮﻟﺴﺎ، ﻳﯩﻠﻠﯩﻖ ﻛﯩﺮﯨﻤﻰ 1000 ﺋﺎﻣﯧﺮﯨﻜﺎ ﺩﻭﻟﻠﯩﺮﯨﻐﯩﻤﯘ ﻳﻪﺗﻤﻪﻳﺪﯨﻐﺎﻥ ﺧﯩﺘﺎﻳﺪﺍ، ﻛﯩﺸﯩﻠﻪﺭﻧﯩﯔ ﮬﻪﺭ ﻳﯩﻠﻰ ﺋﺎﻟﯩﻲ ﻣﻪﻛﺘﻪﭖ ﺋﯜﭼﯜﻥ ﺗﯚﻟﻪﻳﺪﯨﻐﺎﻥ ﭘﯘﻟﻰ 10 ﻣﯩﯔ ﻳﯜﺋﻪﻧﺪﯨﻦ ﺋﺎﺷﯩﺪﯨﻜﻪﻥ. ﻳﻪﻧﻰ ﻳﯩﻠﻠﯩﻖ ﻛﯩﺮﯨﻤﻰ ﺧﯩﺘﺎﻳﺪﯨﻜﯩﻠﻪﺭﺩﯨﻦ ﺋﻮﺗﺘﯘﺯ ﻧﻪﭼﭽﻪ ﮬﻪﺳﺴﻪ ﻳﯘﻗﯩﺮﻯ ﺑﻮﻟﻐﺎﻥ ﻳﺎﭘﻮﻧﯩﻴﻪ ﺧﻪﻟﻘﯩﻨﯩﯔ ﺗﯚﻟﻪﻳﺪﯨﻐﺎﻥ ﺋﻮﻗﯘﺵ ﮬﻪﻗﻘﻰ، ﺧﯩﺘﺎﻱ ﺋﺎﮬﺎﻟﯩﻠﯩﺮﯨﻨﯩﯔ ﻳﯩﻠﻠﯩﻖ ﻛﯩﺮﯨﻤﻰ ﺑﻮﻳﯩﭽﻪ ﮬﯧﺴﺎﺑﻠﯩﻐﺎﻧﺪﺍ ﺋﺎﺭﺍﻥ 3550 ﻳﯜﺋﻪﻥ ﺋﻪﺗﺮﺍﭘﯩﺪﺍ ﺋﯩﻜﻪﻥ.

ﺋﺎﺩﻩﻣﻨﻰ ﭼﯚﭼﯜﺗﻜﯩﺪﻩﻙ ﺋﻮﻗﯘﺵ ﮬﻪﻗﻘﻰ

ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ "ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﮬﻪﺭ ﻳﯩﻠﻘﻰ ﻣﺎﺋﺎﺭﯨﭗ ﻳﯧﺘﯩﺸﺘﯜﺭﯛﺵ ﺗﻪﻧﻨﻪﺭﻗﯩﻨﯩﯔ 25 ﭘﯩﺮﺳﻪﻧﺘﯩﺪﯨﻦ ﺋﯧﺸﯩﭗ ﻛﻪﺗﻤﻪﺳﻠﯩﻚ ﻛﯧﺮﻩﻙ" ﺩﯦﮕﻪﻥ ﺑﻪﻟﮕﯩﻠﯩﻤﯩﺴﻰ ﺑﻮﻳﯩﭽﻪ ﮬﯧﺴﺎﺑﻠﯩﻐﺎﻧﺪﺍ، ﺗﻪﺑﯩﺌﯩﻲ ﭘﻪﻥ ﺋﻮﻗﯘﻳﺪﯨﻐﺎﻥ ﺋﻮﻗﯘﻏﯘﭼﯩﻼﺭ ﻳﯩﻠﯩﻐﺎ ﻛﯚﭖ ﺑﻮﻟﻐﺎﻧﺪﺍ 3750 ﻳﯜﺋﻪﻥ ﺗﺎﭘﺸﯘﺭﯗﺵ ﻛﯧﺮﻩﻙ ﺋﯩﻜﻪﻥ، ﺋﯩﺠﺘﯩﻤﺎﺋﯩﻲ ﭘﻪﻥ ﺋﻮﻗﯘﻳﺪﯨﻐﺎﻧﻼﺭ ﺑﻮﻟﺴﺎ 3000 ﻳﯜﺋﻪﻥ ﺋﻪﺗﺮﺍﭘﯩﺪﺍ ﺗﯚﻟﯩﺸﻰ ﻛﯧﺮﻩﻙ ﺋﯩﻜﻪﻥ.

ﻟﯧﻜﯩﻦ ﺧﯩﺘﺎﻱ ﻣﺎﺋﺎﺭﯨﭗ ﻛﻮﻣﯩﺘﯧﺘﻰ ﻣﻪﺳﺌﯘﻟﯩﻨﯩﯔ ﮬﯧﺴﺎﺑﻠﯩﺸﯩﭽﻪ، ﮬﺎﺯﯨﺮ ﺧﯩﺘﺎﻳﺪﺍ ﺗﻪﺑﯩﺌﯩﻲ ﭘﻪﻥ ﺋﻮﻗﯘﻏﺎﻧﻼﺭﻧﯩﯔ ﻳﯩﻠﯩﻐﺎ ﺗﯚﻟﻪﻳﺪﯨﻐﺎﻥ ﺋﻮﻗﯘﺵ ﮬﻪﻗﻘﻰ 15 ﻣﯩﯔ ﻳﯜﺋﻪﻥ ﺋﻪﺗﺮﺍﭘﯩﺪﺍ ﺑﻮﻟﯘﭖ، ﺋﯩﺠﺘﯩﻤﺎﺋﯩﻲ ﭘﻪﻥ ﺋﻮﻗﯘﻳﺪﯨﻐﺎﻧﻼﺭﻧﯩﯔ ﺗﯚﻟﻪﻳﺪﯨﻐﯩﻨﻰ ﻳﯩﻠﯩﻐﺎ 12 ﻳﺎﻛﻰ 13 ﻣﯩﯔ ﻳﯜﺋﻪﻥ ﺋﻪﺗﺮﺍﭘﯩﺪﺍ ﺑﻮﻟﻐﺎﻥ. ﺩﯦﻤﻪﻙ، ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﺑﻪﻟﮕﯩﻠﯩﻤﯩﺴﻰ ﻗﯘﺭﯗﻕ ﮔﻪﭖ ﺑﻮﻟﯘﭖ، ﻣﻪﺯﻛﯘﺭ ﺑﻪﻟﮕﯩﻠﯩﻤﻪ ﺋﻮﻗﯘﺵ ﮬﻪﻗﻘﯩﻨﻰ ﺗﯚﯞﻩﻧﻠﯩﺘﯩﺸﺘﻪ ﮬﯧﭽﻘﺎﻧﺪﺍﻕ ﺋﻪﻣﻪﻟﯩﻲ ﺭﻭﻝ ﺋﻮﻳﻨﯩﻤﯩﻐﺎﻥ.

ﻣﯘﻧﺎﺳﯩﯟﻩﺗﻠﯩﻚ ﻣﻪﻟﯘﻣﺎﺗﻼﺭﺩﺍ ﻛﯚﺭﺳﯩﺘﯩﻠﯩﺸﯩﭽﻪ، ﺧﯩﺘﺎﻱ ﮬﯚﻛﯜﻣﯩﺘﻰ 1989 - ﻳﯩﻠﻰ "ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﺗﯜﺯﯛﻣﻰ" ﻧﻰ ﺑﯧﻜﯩﺘﻜﻪﻧﺪﯨﻦ ﺑﯘﻳﺎﻧﻘﻰ 20 ﻳﯩﻞ ﺋﯩﭽﯩﺪﻩ، ﺋﻮﻗﯘﺵ ﮬﻪﻗﻘﯩﻨﯩﯔ ﺋﯚﺭﻟﯩﺸﻰ ﺋﺎﺩﻩﻣﻨﻰ ﭼﯚﭼﯜﺗﻜﯩﺪﻩﻙ ﮬﺎﻟﻪﺗﻜﻪ ﻳﻪﺗﻜﻪﻥ. ﻣﻪﺳﯩﻠﻪﻥ، ﺋﻪﻳﻨﻰ ﭼﺎﻏﺪﯨﻜﻰ ﻳﯩﻠﻠﯩﻖ ﺋﻮﻗﯘﺵ ﮬﻪﻗﻘﻰ 200 ﻳﯜﺋﻪﻥ ﺑﻮﻟﻐﺎﻥ ﺑﻮﻟﺴﺎ، ﮬﺎﺯﯨﺮ 5000 ﻳﯜﺋﻪﻧﺪﯨﻦ 10000 ﻳﯜﺋﻪﻧﮕﯩﭽﻪ ﺑﻮﻟﯘﭖ، 89 - ﻳﯩﻠﻠﯩﺮﯨﺪﯨﻜﻰ ﺋﻮﻗﯘﺵ ﮬﻪﻗﻘﯩﻐﻪ ﺳﯧﻠﯩﺸﺘﯘﺭﯗﻟﻐﺎﻧﺪﺍ، 25 ﮬﻪﺳﺴﯩﺪﯨﻦ 50 ﮬﻪﺳﺴﯩﮕﯩﭽﻪ ﻛﯚﭘﻪﻳﮕﻪﻥ. ﺑﯘ 20 ﻳﯩﻠﺪﯨﻦ ﺑﯘﻳﺎﻥ ﺧﻪﻟﻘﻨﯩﯔ ﻳﯩﻠﻠﯩﻖ ﻛﯩﺮﯨﻤﻰ ﺋﻪﻳﻨﻰ ﭼﺎﻏﺪﯨﻜﯩﺪﯨﻦ ﭘﻪﻗﻪﺕ 4 ﮬﻪﺳﺴﻪ ﺋﯚﺭﻟﯩﮕﻪﻥ ﺑﻮﻟﯘﭖ، ﺑﯘ ﺟﻪﺭﻳﺎﻧﺪﺍ ﺋﯚﺭﻟﯩﮕﻪﻥ ﺋﻮﻗﯘﺵ ﮬﻪﻗﻘﻰ ﺋﯘﻧﯩﯖﺪﯨﻦ 10 ﻧﻪﭼﭽﻪ ﮬﻪﺳﺴﻪ ﺋﯧﺸﯩﭗ ﻛﻪﺗﻜﻪﻥ. ﻳﯧﻘﯩﻨﺪﺍ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯩﺮ ﻗﯧﺘﯩﻤﻠﯩﻖ ﺗﻪﻛﺸﯜﺭﯛﺷﺘﯩﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﺧﯩﺘﺎﻳﺪﺍ ﮬﺎﺯﯨﺮ ﺑﯘ ﺧﯩﻞ ﻳﯘﻗﯩﺮﻯ ﺋﻮﻗﯘﺵ ﮬﻪﻗﻘﯩﮕﻪ ﺋﯩﺸﯩﻨﺎﻻﻳﺪﯨﻐﺎﻧﻼﺭ ﭘﻪﻗﻪﺕ 7.5٪ ﻧﻰ ﺋﯩﮕﯩﻠﯩﮕﻪﻥ.

ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﻧﯩﯔ ﺋﻮﻗﯘﺵ ﮬﻪﻗﻘﻰ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﯨﻦ ﻗﯧﻠﯩﺸﻤﺎﻳﺪﯗ

ﺭﺍﺩﯨﺌﻮﻣﯩﺰﻧﯩﯔ ﮬﻪﻗﺴﯩﺰ ﻟﯩﻨﯩﻴﯩﺴﯩﮕﻪ ﻛﯧﻠﯩﯟﺍﺗﻘﺎﻥ ﺗﯧﻠﯧﻔﻮﻧﻼﺭﺩﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﮬﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﻧﯩﯔ ﺋﻮﻗﯘﺵ ﮬﻪﻗﻘﯩﻤﯘ ﻳﯩﻠﺪﯨﻦ - ﻳﯩﻠﻐﺎ ﺋﯚﺭﻟﯩﻤﻪﻛﺘﻪ ﺋﯩﻜﻪﻥ. ﻣﻪﺳﯩﻠﻪﻥ، ﺑﻪﻟﮕﯩﻠﯩﻤﯩﺪﻩ، ﺋﺎﺩﻩﺗﺘﯩﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﻧﯩﯔ ﻳﯩﻠﻠﯩﻖ ﺋﻮﻗﯘﺵ ﮬﻪﻗﻘﻰ 3000 - 4000 ﻳﯜﺋﻪﻥ ﺩﻩﭖ ﻛﯚﺭﺳﯩﺘﯩﻠﮕﯩﻨﻰ ﺑﯩﻠﻪﻥ، ﻳﺎﺗﺎﻕ ﭘﯘﻟﻰ، ﺋﯘ ﭘﯘﻝ، ﺑﯘ ﭘﯘﻝ ﺩﻩﭖ ﺋﺎﺧﯩﺮﯨﺪﺍ ﻳﻪﻧﯩﻼ، ﺋﻮﻗﯘﻏﯘﭼﯩﻼﺭﻧﯩﯔ ﺗﯚﻟﻪﻳﺪﯨﻐﺎﻥ ﭘﯘﻟﻰ 10000 ﻳﯜﺋﻪﻧﮕﻪ ﺑﺎﺭﯨﺪﯨﻜﻪﻥ. ﺧﯩﺘﺎﻱ ﺋﯚﻟﻜﯩﻠﯩﺮﯨﺪﯨﻜﻰ ﻣﻪﻛﺘﻪﭘﻠﻪﺭﺩﻩ ﺋﻮﻗﯘﺵ ﺗﻮﻏﺮﺍ ﻛﻪﻟﺴﻪ، ﺋﻮﻗﯘﺵ ﮬﻪﻗﻘﻰ 12 ﻣﯩﯔ ﻳﯜﺋﻪﻥ ﺋﻪﺗﺮﺍﭘﯩﺪﺍ ﺑﻮﻟﯘﭖ، ﺋﯘ - ﺑﯘ ﭘﯘﻟﻼﺭ ﺑﯩﻠﻪﻥ ﻗﻮﺷﯘﻟﯘﭖ، 20000 ﻳﯜﺋﻪﻧﮕﻪ ﻳﯧﺘﯩﺪﯨﻜﻪﻥ،

ﺩﯦﮭﻘﺎﻧﻼﺭ ﺑﺎﻟﯩﻠﯩﺮﯨﻨﻰ ﻗﺎﻧﺪﺍﻗﻤﯘ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ ﺋﻮﻗﯘﺗﺎﻟﯩﺴﯘﻥ!

ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ ﺳﺎﻧﻠﯩﻖ ﺳﺘﺎﺗﯩﺴﺘﯩﻜﯩﺴﯩﺪﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﮬﺎﺯﯨﺮ ﺧﯩﺘﺎﻳﺪﯨﻜﻰ ﺩﯦﮭﻘﺎﻧﻼﺭﻧﯩﯔ ﻳﯩﻠﻠﯩﻖ ﻛﯩﺮﯨﻤﻰ 2622 ﻳﯜﺋﻪﻥ ﺑﯘﻟﯘﭖ، ﺋﺎﺩﻩﺗﺘﯩﻜﻰ ﺋﺎﻟﯩﻲ ﻣﻪﻛﺘﻪﭘﻠﻪﺭﻧﯩﯔ ﺋﻮﻗﯘﺵ ﮬﻪﻗﻘﻰ ﺩﯦﮭﻘﺎﻧﻼﺭﻧﯩﯔ ﻳﯩﻠﻠﯩﻖ ﻛﯩﺮﯨﻤﯩﺪﯨﻦ 3 ﮬﻪﺳﺴﻪ ﻳﯘﻗﯩﺮﻯ ﺑﻮﻟﻐﺎﻥ.

ﺩﯦﻤﻪﻙ، ﺋﺎﺩﻩﺗﺘﯩﻜﻰ ﺑﯩﺮ ﺩﯦﮭﻘﺎﻥ ﺋﺎﺋﯩﻠﯩﺴﻰ ﺑﯩﺮ ﻳﯩﻞ ﻳﯩﻤﻪﻱ -ﺋﯩﭽﻤﻪﻱ ﭘﯘﻝ ﻳﯩﻘﻘﺎﻧﺪﯨﻤﯘ، ﺑﺎﻟﯩﺴﯩﻨﻰ ﺋﺎﻟﯩﻲ ﻣﻪﻛﺘﻪﭘﺘﻪ ﺋﻮﻗﯘﺗﯘﺵ ﻣﯘﻣﻜﯩﻦ ﺋﻪﻣﻪﺱ. ﺷﯘﯕﺎ ﮬﺎﺯﯨﺮ ﺩﯦﮭﻘﺎﻥ ﺋﺎﺗﺎ -ﺋﺎﻧﯩﻼﺭﻧﯩﯔ ﺋﯚﺯ ﺑﯚﺭﯨﻜﯩﻨﻰ ﺳﯧﺘﯩﭗ ﺑﺎﻟﯩﺴﯩﻨﻰ ﺋﻮﻗﯘﺗﯩﺪﯨﻐﺎﻥ، ﺋﻮﻗﯘﺗﺎﻟﻤﯩﻐﺎﻧﻼﺭ ﺯﻩﮬﻪﺭ ﺋﯩﭽﯩﭗ ﺋﯚﻟﯜﯞﺍﻟﯩﺪﯨﻐﺎﻥ ﺋﻪﮬﯟﺍﻟﻼﺭ ﺩﺍﯞﺍﻣﻠﯩﻖ ﻳﯜﺯ ﺑﯧﺮﯨﭗ ﺗﯘﺭﻣﺎﻗﺘﺎ.

ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﻯ ﺋﯚﺯﯨﻤﯘ، "ﻗﺎﻥ – ﻳﺎﺷﻘﺎ ﺑﻮﻳﯘﻟﻐﺎﻥ ﺋﺎﻟﯩﻲ ﻣﻪﻛﺘﻪﭖ" ﻧﺎﻣﻠﯩﻖ ﻣﺎﻗﺎﻟﯩﻼﺭﻧﻰ ﺋﯧﻼﻥ ﻗﯩﻠﯩﭗ، ﺧﯩﺘﺎﻱ ﮬﯚﻛﯜﻣﯩﺘﯩﻨﯩﯔ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﺵ ﮬﻪﻗﻘﻰ ﺗﻮﻏﺮﯨﺴﯩﺪﺍ ﺑﯧﻜﯩﺘﻜﻪﻥ ﺳﯩﻴﺎﺳﻪﺗﻠﯩﺮﯨﻨﻰ ﺋﺎﺳﺘﯩﺮﺗﺘﯩﻦ ﻣﻪﺳﺨﯩﺮﻩ ﻗﯩﻠﻐﺎﻥ. (ﻣﯧﮭﺮﯨﺒﺎﻥ)