ﻣﺎﺋﺎﺭﯨﭗ ﭼﯩﻘﯩﻤﻰ ﺧﯩﺘﺎﻳﺪﺍ ﻧﺎﻫﺎﻳﯩﺘﻰ ﺋﯧﻐﯩﺮ ﻳﯜﻙ ﺑﻮﻟﯘﭖ ﻗﺎﻟﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﻣﻪﻟﯘﻣﺎﺗﻰ
• Download story audio

ﻳﯧﻘﯩﻨﺪﺍ ﺧﯩﺘﺎﻳﺪﺍ ﺋﯧﻼﻥ ﻗﯩﻠﯩﻨﻐﺎﻥ ﺗﻪﺗﻘﯩﻘﺎﺕ ﺧﺎﺭﺍﻛﺘﯧﺮﻟﯩﻚ ﺗﻪﻛﺸﯜﺭﯛﺵ ﺩﻭﻛﻼﺗﯩﺪﯨﻦ ﺋﺎﺷﻜﺎﺭﯨﻠﯩﻨﯩﺸﯩﭽﻪ، ﺧﯩﺘﺎﻳﺪﯨﻜﻰ ﻣﺎﺋﺎﺭﯨﭗ ﭼﯩﻘﯩﻤﻰ ﻛﯩﺮﯨﻤﻰ ﺗﯚﯞﻩﻥ ﺑﻮﻟﻐﺎﻥ ﭘﯘﻗﺮﺍﻻﺭ ﺋﯜﭼﯜﻥ ﺋﻪﯓ ﺋﯧﻐﯩﺮ ﺑﯩﺮ ﻳﯜﻛﻜﻪ ﺋﺎﻳﻼﻧﻐﺎﻥ.

ﺋﺎﻟﯩﻲ ﻣﻪﻛﺘﻪﭘﻨﯩﯔ ﺑﯩﺮ ﻳﯩﻠﻠﯩﻖ ﺋﻮﻗﯘﺵ ﭘﯘﻟﻰ - ﺑﯩﺮ ﺩﯦﻬﻘﺎﻧﻨﯩﯔ 14 ﻳﯩﻠﻠﯩﻖ ﻛﯩﺮﯨﻤﻰ

ﺗﻪﻛﺸﯜﺭﯛﺷﺘﻪ ﻛﯚﺭﺳﯩﺘﯩﻠﯩﺸﯩﭽﻪ، 2004 ‏- ﻳﯩﻠﻰ 10 ‏- ﺋﺎﻳﺪﯨﻦ 2005 ‏- ﻳﯩﻠﻰ 10 ‏- ﺋﺎﻳﻐﺎ ﻗﻪﺩﻩﺭ، ﻳﯧﺰﯨﻼﺭﺩﯨﻜﻰ ﺋﻮﻗﯘﯞﺍﺗﻘﺎﻥ ﺑﺎﻟﯩﺴﻰ ﺑﺎﺭ ﺋﺎﺋﯩﻠﯩﻠﻪﺭﻧﯩﯔ ﻣﺎﺋﺎﺭﯨﭗ ﭼﯩﻘﯩﻤﻰ ﺋﺎﺋﯩﻠﻪ ﻳﯩﻠﻠﯩﻖ ﻛﯩﺮﯨﻤﯩﻨﯩﯔ 33 % ﻧﻰ ﺋﯩﮕﯩﻠﯩﮕﻪﻥ. ﺷﻪﻫﻪﺭﺩﯨﻜﻰ ﺋﻮﻗﯘﯞﺍﺗﻘﺎﻥ ﺑﺎﻟﯩﺴﻰ ﺑﺎﺭ ﺋﺎﺋﯩﻠﯩﻠﻪﺭﻧﯩﯔ ﻣﺎﺋﺎﺭﯨﭙﻘﺎ ﺳﻪﺭﭖ ﻗﯩﻠﻐﺎﻥ ﭘﯘﻟﻰ ﺋﺎﺋﯩﻠﻪ ﻛﯩﺮﯨﻤﯩﻨﯩﯔ 26% ﻧﻰ ﺋﯩﮕﯩﻠﯩﮕﻪﻥ.

ﻣﻪﺯﻛﯘﺭ ﺗﻪﻛﺸﯜﺭﯛﺷﺘﻪ ﻳﻪﻧﻪ "ﻛﯚﭖ ﺳﺎﻧﺪﯨﻜﻰ ﺋﺎﺋﯩﻠﯩﻠﻪﺭﻧﯩﯔ ﻧﺎﻣﺮﺍﺕ ﺑﻮﻟﯘﭖ ﻗﯩﻠﯩﺸﻰ ﻣﺎﺋﺎﺭﯨﭗ ﭼﯩﻘﯩﻤﯩﻨﯩﯔ ﻫﻪﺩﺩﯨﺪﯨﻦ ﺗﺎﺷﻘﯩﺮﻯ ﻳﯘﻗﯩﺮﻯ ﺑﻮﻟﻐﺎﻧﻠﯩﻘﯩﺪﯨﻦ" ﺩﻩﭖ ﻛﯚﺭﺳﯩﺘﯩﻠﮕﻪﻥ.

ﺧﯩﺘﺎﻱ ﻫﯚﻛﯜﻣﯩﺘﻰ ﺋﯧﻼﻥ ﻗﯩﻠﻐﺎﻥ ﺳﺎﻧﻠﯩﻖ ﺳﺘﺎﺗﯩﺴﺘﯩﻜﯩﺪﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، 2004 ‏- ﻳﯩﻠﻰ ﺧﯩﺘﺎﻳﺪﯨﻜﻰ ﺷﻪﻫﻪﺭ ﺧﻪﻟﻘﯩﻨﯩﯔ ﻳﯩﻠﻠﯩﻖ ﻛﯩﺮﯨﻤﻰ ﺋﻮﺭﺗﺎ ﻫﯧﺴﺎﺑﺘﺎ 9422 ﺳﻮﻡ ﺋﻪﺗﺮﺍﭘﯩﺪﺍ ﺑﻮﻟﯘﭖ، ﺩﯦﻬﻘﺎﻧﻼﺭﻧﯩﯔ ﻳﯩﻠﻠﯩﻖ ﻛﯩﺮﯨﻤﻰ 2936 ﻳﯜﺋﻪﻥ ﺋﻪﺗﺮﺍﭘﯩﺪﺍ ﺑﻮﻟﻐﺎﻥ. ﻟﯧﻜﯩﻦ ﺑﯩﺮ ﺋﺎﻟﻰ ﻣﻪﻛﺘﻪﭖ ﺋﻮﻗﯘﻏﯘﭼﯩﺴﯩﻨﯩﯔ ﺋﻮﻗﯘﺵ ﭘﯘﻟﻰ، ﺗﯘﺭﻣﯘﺵ ﭘﯘﻟﻰ ﯞﻩ ﻳﺎﺗﺎﻕ ﭘﯘﻟﻰ ﺑﻮﻟﯘﭖ ﺑﯩﺮ ﻳﯩﻠﻠﯩﻖ ﭼﯩﻘﯩﻤﯩﻨﯩﯔ ﺋﯚﺯﻯ 7 ﻣﯩﯔ ﻳﯜﺋﻪﻧﺪﯨﻦ ﺋﺎﺷﯩﺪﯨﻜﻪﻥ ﻫﻪﻣﺪﻩ 4 ﻳﯩﻠﻠﯩﻖ ﺋﻮﻗﯘﺵ ﺋﯜﭼﯜﻥ ﺋﺎﺯ ﺩﯦﮕﻪﻧﺪﻩ 28 ﻣﯩﯔ ﻳﯜﺋﻪﻥ ﺗﯚﻟﯩﺸﻰ ﻛﯧﺮﻩﻙ ﺋﯩﻜﻪﻥ. ﺑﯘ ﺧﯩﻞ ﻫﯧﺴﺎﺑﻼﺵ ﺑﻮﻳﯩﭽﻪ، ﺑﯩﺮ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﺴﯩﻨﯩﯔ 4 ﻳﯩﻠﻠﯩﻖ ﺋﻮﻗﯘﺵ ﭘﯘﻟﻰ ﺷﻪﻫﻪﺭ ﺧﯩﺰﻣﻪﺗﭽﯩﺴﯩﻨﯩﯔ 4 ﻳﯧﺮﯨﻢ ﻳﯩﻠﻠﯩﻖ ﻛﯩﺮﯨﻤﻰ، ﺩﯦﻬﻘﺎﻥ ﺑﯩﭽﺎﺭﯨﻨﯩﯔ 14 ﻳﯩﻠﻠﯩﻖ ﻛﯩﺮﯨﻤﯩﮕﻪ ﺗﻪﯓ ﻛﯧﻠﯩﺪﯨﻜﻪﻥ.

ﻣﯘﻧﺎﺳﯩﯟﻩﺗﻠﯩﻚ ﻣﻪﻟﯘﻣﺎﺗﻼﺭﺩﺍ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﺯﯨﺮ ﺧﯩﺘﺎﻳﺪﺍ ﻣﺎﺋﺎﺭﯨﭗ ﭼﯩﻘﯩﻤﻰ ﻫﻪﻣﻤﯩﺪﯨﻦ ﻳﯘﻗﯩﺮﻯ ﺑﻮﻟﯘﭖ ﻫﻪﺗﺘﺎ ﺳﻪﻫﯩﻴﻪ ﭼﯩﻘﯩﻤﻰ ﯞﻩ ﺋﻮﻟﺘﯘﺭﺍﻕ ﺋﯚﻱ ﭼﯩﻘﯩﻤﯩﺪﯨﻨﻤﯘ ﺋﯧﺸﯩﭗ ﻛﻪﺗﻜﻪﻥ. ﻳﯧﻘﯩﻨﻘﻰ 10 ﻳﯩﻠﺪﯨﻦ ﺑﯘﻳﺎﻥ، ﺧﯩﺘﺎﻳﺪﯨﻜﻰ ﺋﺎﻟﯩﻲ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﻳﯩﻠﻠﯩﻖ ﺋﻮﻗﯘﺵ ﻫﻪﻗﻘﻰ ﺩﻩﺳﻠﻪﭘﺘﯩﻜﻰ ﻧﻪﭼﭽﻪ ﻳﯜﺯ ﺳﻮﻣﺪﯨﻦ 7 - 8 ﻣﯩﯔ ﺳﻮﻣﻐﺎ ﻛﯚﭘﯩﻴﯩﭗ 20 ﻫﻪﺳﺴﻪ ﺋﯚﺭﻟﯩﮕﻪﻥ. ﻟﯧﻜﯩﻦ ﺑﯘ 10 ﻳﯩﻞ ﺋﯩﭽﯩﺪﻩ، ﺧﻪﻟﻘﻨﯩﯔ ﻳﯩﻠﻠﯩﻖ ﻛﯩﺮﯨﻤﻰ ﭘﻪﻗﻪﺕ 4 ﻫﻪﺳﺴﻪ ﻛﯚﭘﻪﻳﮕﻪﻥ.

ﻣﻪﻛﺘﻪﭘﻠﻪﺭ ﭘﯘﻝ ﺗﯧﭙﯩﺶ ﺋﻮﺭﯗﻧﻠﯩﺮﯨﻐﺎ ﺋﺎﻳﻼﻧﻐﺎﻥ

ﻛﯚﭘﻠﯩﮕﻪﻥ ﺋﺎﻧﺎﻟﯩﺰﭼﯩﻼﺭ "ﺧﯩﺘﺎﻳﺪﯨﻜﻰ ﻣﺎﺋﺎﺭﯨﭗ ﭼﯩﻘﯩﻤﯩﻨﯩﯔ ﺑﯘ ﻗﻪﺩﻩﺭ ﻳﯘﻗﯩﺮﻯ ﺑﻮﻟﯘﭖ، ﺋﯧﻐﯩﺮ ﺑﯩﺮ ﻳﯜﻛﻜﻪ ﺋﺎﻳﻠﯩﻨﯩﭗ ﻗﯧﻠﯩﺸﻰ ﻫﯚﻛﯜﻣﻪﺗﻨﯩﯔ ﻣﺎﺋﺎﺭﯨﭙﻘﺎ ﺋﺎﺟﺮﺍﺗﻘﺎﻥ ﭘﯘﻟﯩﻨﯩﯔ ﺋﯧﻐﯩﺮ ﺩﻩﺭﯨﺠﯩﺪﻩ ﻳﯧﺘﻪﺭﺳﯩﺰ ﺑﻮﻟﯘﯞﺍﺗﻘﺎﻧﻠﯩﻘﯩﺪﯨﻦ" ﺩﻩﭖ ﺗﻪﻛﯩﺘﻠﻪﭖ، ﺧﯩﺘﺎﻳﺪﯨﻜﻰ ﻣﻪﻛﺘﻪﭘﻠﻪﺭﻧﯩﯔ ﺋﯚﺯ ﺋﺎﻟﺪﯨﻐﺎ ﻗﺎﻻﻳﻤﯩﻘﺎﻥ ﭘﯘﻝ ﻳﯩﻐﯩﺪﯨﻐﺎﻥ ﯞﻩ ﻣﺎﺋﺎﺭﯨﭙﻨﻰ ﺑﺎﺯﺍﺭﻻﺷﺘﯘﺭﯗﭖ ﻣﻪﻛﺘﻪﭖ ﺋﻮﺭﯗﻧﻠﯩﺮﯨﻨﻰ ﺋﺎﺩﻩﻡ ﺗﻪﺭﺑﯩﻴﯩﻠﻪﺵ ﺋﻪﻣﻪﺱ ﺑﻪﻟﻜﻰ ﺳﻮﺩﺍ ﻗﯩﻠﯩﺶ ﺳﻮﺭﯗﻧﯩﻐﺎ ﺋﺎﻳﻼﻧﺪﯗﺭﯨﯟﺍﻟﻐﺎﻧﻠﯩﻘﯩﺪﻩﻙ ﻗﯩﻠﻤﯩﺸﻠﯩﺮﯨﻨﻰ ﻗﺎﺗﺘﯩﻖ ﺗﻪﻧﻘﯩﺪﻟﯩﻤﻪﻛﺘﻪ.

ﺋﺎﻣﯧﺮﯨﻜﺎ ﻧﻴﯘﻳﻮﺭﻙ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﭘﺮﻭﻓﯧﺴﺴﻮﺭﻯ ﺷﻴﺎ ﺋﻪﭘﻪﻧﺪﻯ ﺑﯘ ﻫﻪﻗﺘﻪ ﺗﻮﺧﺘﯩﻠﯩﭗ "ﺧﯩﺘﺎﻱ ﻫﯚﻛﯜﻣﯩﺘﻰ ﻣﺎﺋﺎﺭﯨﭙﻘﺎ ﻳﯧﺘﻪﺭﻟﯩﻚ ﻣﻪﺑﻠﻪﻍ ﺳﺎﻟﻤﺎﻱ ﺋﯘﻧﯩﯔ ﺋﯚﺯ ﺋﺎﻟﺪﯨﻐﺎ ﺑﺎﺯﺍﺭﻟﯩﺸﯩﺸﯩﻐﺎ ﻳﻮﻝ ﻗﻮﻳﻐﺎﻧﻠﯩﻘﺘﯩﻦ، ﻛﻪﻣﺒﻪﻏﻪﻝ ﺋﺎﺋﯩﻠﯩﻠﻪﺭﺩﯨﻜﻰ ﻧﯘﺭﻏﯘﻧﻠﯩﻐﺎﻥ ﺑﺎﻟﯩﻼﺭ ﺋﻮﻗﯘﺷﺘﯩﻦ ﻗﺎﻟﯩﺪﯨﻐﺎﻥ ﯞﻩ ﻳﺎﻛﻰ ﺋﺎﻟﯩﻲ ﻣﻪﻛﺘﻪﭘﻜﻪ ﻛﯩﺮﻩﻟﻤﻪﻳﺪﯨﻐﺎﻥ ﺋﻪﻫﯟﺍﻟﻼﺭﻧﻰ ﻛﻪﻟﺘﯜﺭﯛﭖ ﭼﯩﻘﺎﺭﺩﻯ، ﺋﻮﻗﯘﺷﺴﯩﺰ ﻗﺎﻟﻐﺎﻥ ﺑﯘ ﺑﺎﻟﯩﻼﺭ، ﺩﻩﺳﻠﻪﭘﺘﯩﻜﻰ ﺳﺎﯞﺍﺗﺴﯩﺰﻟﯩﻘﺘﯩﻦ ﺋﺎﺧﯩﺮﯨﻐﺎ ﺑﯧﺮﯨﭗ ﻗﺎﻧﯘﻥ ﺑﯩﻠﻤﻪﻳﺪﯨﻐﺎﻥ ﻫﻪﺗﺘﺎ ﺟﻪﻣﺌﯩﻴﻪﺗﺘﻪ ﻗﺎﻻﻳﻤﯩﻘﺎﻧﭽﯩﻠﯩﻖ ﭼﯩﻘﯩﺮﯨﺪﯨﻐﺎﻥ ﻟﯘﻛﭽﻪﻛﻠﻪﺭﮔﻪ ﺋﺎﻳﻠﯩﻨﯩﭗ ﻗﯧﻠﯩﺸﻰ ﻣﯘﻣﻜﯩﻦ، ﺧﯩﺘﺎﻱ ﻫﯚﻛﯜﻣﯩﺘﻰ ﺑﯘﻧﻰ ﺗﻮﻧﯘﭖ ﻳﯧﺘﯩﺸﻰ ﻛﯧﺮﻩﻙ ﺋﯩﺪﻯ. ﭼﯜﻧﻜﻰ ﺑﯘ ﺧﯩﻞ ﺋﻪﻫﯟﺍﻝ ﺧﯩﺘﺎﻱ ﻫﯚﻛﯜﻣﯩﺘﻰ ﺋﯜﭼﯜﻥ ﺑﯩﺮ ﭼﻮﯓ ﺗﻪﻫﺪﯨﺖ ﺑﻮﻟﯘﭖ ﻫﯧﺴﺎﺑﻠﯩﻨﯩﺪﯗ " ﺩﻩﭖ ﻛﯚﺭﺳﻪﺗﺘﻰ:

ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﺧﯩﺘﺎﻱ ﻫﯚﻛﯜﻣﯩﺘﯩﻨﻰ "ﻣﺎﺋﺎﺭﯨﭙﻘﺎ ﻣﻪﺑﻠﻪﻍ ﺳﯧﻠﯩﺸﺘﺎ ﺩﯗﻧﻴﺎﻧﯩﯔ ﺋﺎﺭﻗﯩﺪﺍ، ﻫﻪﺗﺘﺎ ﺋﻪﯓ ﻧﺎﻣﺮﺍﺕ ﺩﯙﻟﻪﺕ ﺋﯘﮔﺎﻧﺪﺍﻧﯩﯖﻤﯘ ﺋﺎﺭﻗﯩﺪﺍ ﻗﺎﻟﻐﺎﻥ" ﺩﻩﭖ ﺋﻪﻳﯩﺒﻠﻪﭖ ﻛﻪﻟﮕﻪﻥ. ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﯩﻨﯩﯔ ﻛﯚﺭﺳﯩﺘﯩﺸﯩﭽﻪ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﻣﺎﺋﺎﺭﯨﭙﻘﺎ ﺋﺎﺟﺮﺍﺗﻘﺎﻥ ﺧﯩﺮﺍﺟﯩﺘﻰ ﺋﯩﺸﻠﻪﭘﭽﯩﻘﯩﺮﯨﺶ ﺋﻮﻣﯘﻣﯩﻲ ﻗﯩﻤﻤﯩﺘﯩﻨﯩﯔ ﭘﻪﻗﻪﺕ 2 % ﻧﻰ ﺋﯩﮕﯩﻠﯩﮕﻪﻥ ﺑﻮﻟﯘﭖ، ﺑﯩﺮﻟﻪﺷﻜﻪﻥ ﺩﯙﻟﻪﺗﻠﻪﺭ ﺗﻪﺷﻜﯩﻼﺗﻰ ﺗﻪﺷﻪﺑﺒﯘﺱ ﻗﯩﻠﻐﺎﻥ ﺋﻪﯓ ﺗﯚﯞﻩﻥ ﺳﺎﻧﻨﯩﯔ 3 ﺗﯩﻦ ﺑﯩﺮﯨﮕﯩﻤﯘ ﻳﻪﺗﻤﯩﮕﻪﻥ. (ﻣﯧﻬﺮﯨﺒﺎﻥ)