ﻣﺎﺋﺎﺭﯨﭗ ﭼﯩﻘﯩﻤﻰ ﺗﯜﭘﻪﻳﻠﯩﺪﯨﻦ ﻧﯘﺭﻏﯘﻧﻠﯩﻐﺎﻥ ﻳﯧﺰﺍ ﺑﺎﻟﯩﻠﯩﺮﻯ ﻳﻪﻧﯩﻼ ﺋﻮﻗﯘﺷﺴﯩﺰ ﻗﺎﻟﻤﺎﻗﺘﺎ

• ﻣﯘﺧﺒﯩﺮﯨﻤﯩﺰ ﻣﯧﻬﺮﯨﺒﺎﻧﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

2002-ﻳﯩﻠﻰ ﻧﻮﻳﺎﺑﯩﺮﺩﺍ ﺋﯘﻳﻐﯘﺭ ﺋﻮﻗﯘﻏﯘﭼﯩﻼﺭ ﺋﯜﺭﯛﻣﭽﯩﺪﯨﻜﻰ 14-ﺋﻮﺗﺘﯘﺭﺍ ﻣﻪﻛﺘﻪﭘﺘﻪ. ﮔﻪﺭﭼﻪ ﺧﯩﺘﺎﻱ ﻗﺎﻧﯘﻧﯩﺪﺍ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺋﯚﺯ ﺋﺎﻧﺎ ﺗﯩﻠﯩﻨﻰ ﺋﯚﮔﯩﻨﯩﺶ ﻫﻮﻗﯘﻗﻰ ﺋﯧﻨﯩﻖ ﺑﻪﻟﮕﯩﻠﻪﻧﮕﻪﻥ ﺑﻮﻟﺴﯩﻤﯘ، ﺧﯩﺘﺎﻱ ﺩﺍﺋﯩﺮﯨﻠﯩﺮﯨﻨﯩﯔ ﺋﯘﻳﻐﯘﺭ ﺋﯧﻠﯩﺪﻩ ﻳﯜﺭﮔﯜﺯﯛﯞﺍﺗﻘﺎﻥ ﻗﻮﺵ ﺗﯩﻠﻠﯩﻖ ﻣﺎﺋﺎﺭﯨﭗ ﺳﯩﻴﺎﺳﯩﺘﻰ ﺋﯘﻳﻐﯘﺭﻻﺭﻧﻰ ﺋﺎﻧﺎ ﺗﯩﻠﯩﻨﻰ ﺋﯚﮔﯩﻨﯩﺸﺘﯩﻦ ﻣﻪﻫﺮﯗﻡ ﻗﺎﻟﺪﯗﺭﻣﺎﻗﺘﺎ. AFP

ﻳﯧﻘﯩﻨﺪﺍ ﺧﯩﺘﺎﻳﺪﺍ، ﺋﯘﻳﻐﯘﺭ ﺋﯧﻠﯩﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺧﯧﻲ ﻟﯘﯕﺠﻴﺎﯓ، ﻟﻴﺎﯞﻧﯩﯔ، ﺋﯩﭽﻜﻰ ﻣﻮﯕﻐﯘﻝ ﯞﻩ ﮔﯘﺋﺎﯕﺸﻰ ﻗﺎﺗﺎﺭﻟﯩﻖ 16 ﺋﯚﻟﻜﯩﻨﯩﯔ ﻳﯧﺰﺍ ﺭﺍﻳﻮﻧﻠﯩﺮﯨﺪﺍ ﻣﺎﺋﺎﺭﯨﭗ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﻣﻪﺧﺴﯘﺱ ﺗﻪﻛﺸﯜﺭﯛﺵ ﺋﯧﻠﯩﭗ ﺑﯧﺮﯨﻠﻐﺎﻥ. ﺗﻪﻛﺸﯜﺭﯛﺵ ﻧﻪﺗﯩﺠﯩﺴﯩﺪﯨﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻣﻪﺯﻛﯘﺭ ﺋﯚﻟﻜﯩﻠﻪﺭﻧﯩﯔ ﻳﯧﺰﯨﻠﯩﺮﯨﺪﺍ، ﻣﺎﺋﺎﺭﯨﭗ ﭼﯩﻘﯩﻤﻰ ﻣﻪﺳﯩﻠﯩﺴﻰ ﺗﯜﭘﻪﻳﻠﯩﺪﯨﻦ، ﺋﺎﺗﺎ - ﺋﺎﻧﯩﻼﺭ ﺑﺎﻟﯩﻠﯩﺮﯨﻨﻰ ﺋﻮﻗﯘﺗﺎﻟﻤﺎﻳﺪﯨﻐﺎﻥ ﻫﻪﻣﺪﻩ ﺑﺎﻟﯩﻼﺭ ﻳﯧﺮﯨﻢ ﻳﻮﻟﺪﺍ ﺋﻮﻗﯘﺷﺘﯩﻦ ﺗﻮﺧﺘﺎﭖ ﻗﺎﻟﯩﺪﯨﻐﺎﻥ ﺋﻪﻫﯟﺍﻝ ﻳﻪﻧﯩﻼ ﺋﯧﻐﯩﺮ ﻫﺎﻟﻪﺗﺘﻪ ﺩﺍﯞﺍﻣﻠﯩﺸﯩﭗ ﻛﻪﻟﮕﻪﻥ.

ﻗﺎﻻﻳﻤﯩﻘﺎﻥ ﭘﯘﻝ ﻳﯩﻐﯩﺶ، ﺋﺎﺗﺎ ﺋﺎﻧﯩﻼﺭﻧﯩﯔ ﻳﯜﻛﯩﻨﻰ ﺋﺎﺷﯘﺭﻏﺎﻥ

ﺋﯘﻳﻐﯘﺭ ﺋﯧﻠﯩﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ 16 ﺋﯚﻟﻜﯩﺪﻩ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯘ ﻗﯧﺘﯩﻤﻠﯩﻖ ﺗﻪﻛﺸﯜﺭﯛﺷﻜﻪ ﺧﯩﺘﺎﻱ ﻣﻪﺭﻛﯩﺰﯨﻲ ﻛﻮﻣﭙﺎﺭﺗﯩﻴﻪ ﻣﻪﻛﺘﯩﭙﻰ ﻣﻪﺳﺌﯘﻝ ﺑﻮﻟﻐﺎﻥ. ﻣﻪﺯﻛﯘﺭ ﺗﻪﻛﺸﯜﺭﯛﺷﺘﯩﻦ ﻣﻪﻟﯘﻡ ﺑﻮﻟﯘﺷﯩﭽﻪ، ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﻩ ﯞﻩ ﺷﯘﻧﺪﺍﻗﻼ ﺑﯩﺮ ﻗﯩﺴﯩﻢ ﺧﯩﺘﺎﻱ ﺋﯚﻟﻜﯩﻠﯩﺮﯨﺪﻩ، ﺩﯦﻬﻘﺎﻥ ﺑﺎﻟﯩﻠﯩﺮﯨﻨﯩﯔ ﺋﻮﻗﯘﺷﺴﯩﺰ ﻗﯧﻠﯩﺶ ﺋﻪﻫﯟﺍﻟﻰ ﻳﻪﻧﯩﻼ ﻧﺎﻫﺎﻳﯩﺘﻰ ﺋﯧﻐﯩﺮ ﺑﻮﻟﯘﭖ، ﺗﻮﻟﯘﻗﺴﯩﺰ ﺋﻮﺗﺘﯘﺭﯨﻨﻰ ﭘﯜﺗﺘﯜﺭﻣﻪﻳﻼ ﻣﻪﻛﺘﻪﭘﺘﯩﻦ ﺗﻮﺧﺘﺎﭖ ﻗﺎﻟﻐﺎﻥ ﺑﺎﻟﯩﻼﺭ ﺋﻮﺗﺘﯘﺭﺍ ﻫﯧﺴﺎﺏ ﺑﯩﻠﻪﻥ 40% ﻧﻰ ﺋﯩﮕﯩﻠﯩﮕﻪﻥ. ﺑﯩﺮ ﻗﯩﺴﯩﻢ ﻳﯧﺰﯨﻼﺭﺩﺍ، ﻣﻪﺳﯩﻠﻪﻥ ﺧﯧﺒﯩﻲ ﺋﯚﻟﻜﯩﺴﯩﻨﯩﯔ ﯞﯦﻴﺸﻴﻪﻥ ﻧﺎﻫﯩﻴﯩﺴﯩﺪﯨﻜﻰ ﺧﯧﻴﯩﻦ ﺋﻮﺗﺘﯘﺭﺍ ﻣﻪﻛﺘﯩﭙﯩﺪﻩ، 3 ﻳﯩﻠﺪﯨﻦ ﺑﯘﻳﺎﻥ ﺋﻮﻗﯘﺷﺴﯩﺰ ﻗﺎﻟﻐﺎﻥ ﺋﻮﻗﯘﻏﯘﭼﯩﻼﺭﻧﯩﯔ ﻧﯩﺴﺒﯩﺘﻰ 90% ﻛﻪ ﻳﻪﺗﻜﻪﻥ.

ﻣﻪﺭﻛﯩﺰﯨﻲ ﻛﻮﻣﭙﺎﺭﺗﯩﻴﻪ ﻣﻪﻛﺘﯩﭙﻰ ﺗﻪﺭﯨﭙﯩﺪﯨﻦ ﺋﯧﻠﯩﭗ ﺑﯧﺮﯨﻠﻐﺎﻥ ﺑﯘ ﻗﯧﺘﯩﻤﻠﯩﻖ ﺗﻪﻛﺸﯜﺭﯛﺷﺘﻪ ﻛﯚﺭﺳﯩﺘﯩﻠﯩﺸﯩﭽﻪ، ﻫﺎﺯﯨﺮ ﻳﯧﺰﯨﻼﺭﺩﺍ، ﻧﯘﺭﻏﯘﻧﻠﯩﻐﺎﻥ ﺋﺎﺗﺎ ‏- ﺋﺎﻧﯩﻼﺭ ﻣﺎﺋﺎﺭﯨﭗ ﭼﯩﻘﯩﻤﯩﻐﺎ ﺋﯧﺸﯩﻨﺎﻟﻤﺎﻱ ﺋﯩﻼﺟﻰ ﻳﻮﻕ ﺑﺎﻟﯩﻠﯩﺮﯨﻨﻰ ﺋﻮﻗﯘﺷﺘﯩﻦ ﺗﯘﺧﺘﯩﺘﯩﯟﺍﻟﯩﺪﯨﻐﺎﻥ ﺋﻪﻫﯟﺍﻝ ﻧﺎﻫﺎﻳﯩﺘﻰ ﺋﻮﻣﯘﻣﻼﺷﻘﺎﻥ. ﺑﯘﻧﺪﺍﻕ ﺑﻮﻟﯘﺷﺘﯩﻜﻰ ﺳﻪﯞﻩﺏ، ﻫﯚﻛﯜﻣﻪﺕ ﺋﻮﻗﯘﺵ ﭘﯘﻟﯩﻨﻰ ﺑﯩﻜﺎﺭ ﻗﯩﻠﯩﺶ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ، ﺋﻮﻗﯘﻏﯘﭼﯩﻼﺭﺩﯨﻦ ﻳﯩﻐﯩﻠﯩﺪﯨﻐﺎﻥ ﺑﺎﺷﻘﺎ ﺗﯜﺭﺩﯨﻜﻰ ﺧﯩﻠﻤﯘ ‏-ﺧﯩﻞ ﭼﯩﻘﯩﻤﻼﺭﻏﺎ ﻳﻮﻝ ﻗﻮﻳﻐﺎﻥ. ﻳﯧﺰﺍ ﻣﺎﺋﺎﺭﯨﭗ ﺋﻮﺭﯗﻧﻠﯩﺮﻯ ﻣﺎﻟﯩﻴﻪ ﻗﯩﻴﯩﻨﭽﯩﻠﯩﻘﯩﻐﺎ ﺩﯗﭺ ﻛﻪﻟﮕﻪﻧﻠﯩﻜﺘﯩﻦ، ﺑﯩﻜﺎﺭ ﻗﯩﻠﯩﻨﻐﺎﻥ ﺋﻮﻗﯘﺵ ﭘﯘﻟﯩﺪﯨﻦ ﻧﻪﭼﭽﻪ ﻫﻪﺳﺴﻪ ﻳﯘﻗﯩﺮﻯ ﺑﻮﻟﻐﺎﻥ ﺑﺎﺷﻘﺎ ﺧﯩﻠﺪﯨﻜﻰ ﺗﯜﺭﻟﯜﻙ ﭼﯩﻘﯩﻤﻼﺭﻧﻰ ﻛﯚﭘﻪﻳﺘﯩﭗ، ﺋﻮﻗﯘﻏﯘﭼﯩﻼﺭ ﯞﻩ ﺋﯘﻻﺭﻧﯩﯔ ﺋﺎﺗﺎ ‏- ﺋﺎﻧﯩﺴﯩﻐﺎ ﺯﻭﺭ ﺑﯧﺴﯩﻢ ﺋﯩﺸﻠﻪﺗﻜﻪﻥ.

ﺋﻮﻗﯘﺗﻘﯘﭼﯩﻼﺭﻧﯩﯔ ﻣﺎﺋﺎﺷﻰ ﯞﺍﻗﺘﯩﺪﺍ ﺑﯧﺮﯨﻠﻤﯩﮕﻪﻥ

ﺗﻪﻛﺸﯜﺭﯛﺵ ﺩﻭﻛﻼﺗﯩﺪﺍ ﺋﯧﻴﺘﯩﻠﯩﺸﯩﭽﻪ، ﺧﯩﺘﺎﻳﺪﯨﻜﻰ ﻛﯚﭘﻠﯩﮕﻪﻥ ﻧﺎﻫﯩﻴﻪ ﯞﻩ ﺷﻪﻫﻪﺭﻟﻪﺭﻧﯩﯔ ﻣﺎﺋﺎﺭﯨﭙﻘﺎ ﺋﺎﺟﺮﺍﺗﻘﺎﻥ ﻣﻪﺑﻠﯩﻐﻰ ﺋﯩﻨﺘﺎﻳﯩﻦ ﭼﻪﻛﻠﯩﻚ ﺑﻮﻟﻐﺎﻧﻠﯩﻘﺘﯩﻦ ﻧﯘﺭﻏﯘﻧﻠﯩﻐﺎﻥ ﻳﯧﺰﺍ ﻣﻪﻛﺘﻪﭘﻠﯩﺮﯨﺪﻩ ﺳﯩﻨﯩﭗ ﻳﯧﺘﯩﺸﻤﻪﻳﺪﯨﻐﺎﻥ، ﺋﻮﻗﯘﺗﻘﯘﭼﯩﻼﺭﻧﯩﯔ ﻣﺎﺋﺎﺷﯩﻨﻰ ﺗﺎﺭﻗﯩﺘﯩﭗ ﺑﯧﺮﻩﻟﻤﻪﻳﺪﯨﻐﺎﻥ ﺋﻪﻫﯟﺍﻟﻼﺭ ﻳﻪﻧﯩﻼ ﺋﯧﻐﯩﺮ ﺑﻮﻟﻐﺎﻥ. ﺑﯘﻧﯩﯖﺪﯨﻦ ﺑﺎﺷﻘﺎ ﻳﻪﻧﻪ، ﻳﯧﺰﺍ ﻣﻪﻛﺘﻪﭘﻠﯩﺮﯨﺪﯨﻜﻰ ﺋﻮﻗﯘﺗﻘﯘﭼﯩﻼﺭﻧﯩﯔ ﺳﺎﭘﺎﺳﻰ ﺗﯚﯞﻩﻥ ﺑﻮﻟﯘﭖ، ﺑﯘﻣﯘ ﺋﺎﻻﻫﯩﺪﻩ ﺋﯧﻐﯩﺮ ﺑﯩﺮ ﻣﻪﺳﯩﻠﯩﮕﻪ ﺋﺎﻳﻼﻧﻐﺎﻥ.

ﺧﯩﺘﺎﻱ ﻣﺎﺋﺎﺭﯨﭗ ﻣﯩﻨﯩﺴﺘﯩﺮﻟﯩﻘﯩﻨﯩﯔ ﻣﯘﺋﺎﯞﯨﻦ ﻣﯩﻨﯩﺴﺘﯩﺮﻯ ﻳﺎﯕﺠﯩﻦ ﻣﻪﺭﻛﯩﺰﯨﻲ ﻛﻮﻣﭙﺎﺭﺗﯩﻴﻪ ﻣﻪﻛﺘﯩﭙﯩﻨﯩﯔ ﺑﯘ ﻗﯧﺘﯩﻤﻠﯩﻖ ﺗﻪﻛﺸﯜﺭﯛﺵ ﺩﻭﻛﻼﺗﯩﺪﺍ ﻛﯚﺭﺳﯩﺘﯩﻠﮕﻪﻥ ﻣﻪﺳﯩﻠﯩﻠﻪﺭﻧﯩﯔ ﻫﻪﻗﯩﻘﻪﺗﻪﻥ ﺋﻪﻣﻪﻟﯩﻴﻪﺗﻜﻪ ﺋﯘﻳﻐﯘﻥ ﺋﯩﻜﻪﻧﻠﯩﻜﯩﮕﻪ ﺋﯩﻘﺮﺍﺭ ﺑﻮﻟﯘﭖ، ﺑﯘ ﻫﻪﻗﺘﻪ ﻣﯘﺗﻪﺧﻪﺳﺴﯩﺴﻠﻪﺭ ﺑﯩﻠﻪﻥ ﺑﯩﺮﻟﯩﻜﺘﻪ ﺗﯧﺨﯩﻤﯘ ﭼﻮﯕﻘﯘﺭﻻﭖ ﺗﻪﻛﺸﯜﺭﯛﺵ ﺋﯧﻠﯩﭗ ﺑﺎﺭﯨﺪﯨﻐﺎﻧﻠﯩﻘﯩﻨﻰ ﻣﻪﻟﯘﻡ ﻗﯩﻠﻐﺎﻥ.

ﺋﯘﻳﻐﯘﺭ ﺋﯧﻠﯩﺪﯨﻜﻰ ﺋﻪﻫﯟﺍﻝ ﺗﯧﺨﯩﻤﯘ ﺋﯧﻐﯩﺮ

ﺧﯩﺘﺎﻱ ﺋﺎﮔﯧﻨﺘﻠﯩﻘﯩﻨﯩﯔ ﺋﯜﺭﯛﻣﭽﯩﺪﯨﻦ ﺑﻪﺭﮔﻪﻥ ﺧﻪﯞﻩﺭﻟﯩﺮﯨﺪﻩ "ﻫﺎﺯﯨﺮ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻧﺎﻣﺮﺍﺕ ﺭﺍﻳﻮﻧﻼﺭﺩﺍ ﺋﻮﻗﯘﺵ ﭘﯘﻟﻰ ﯞﻩ ﻛﯩﺘﺎﭖ ﭘﯘﻟﻰ ﭘﯜﺗﯜﻧﻠﻪﻱ ﺑﯩﻜﺎﺭ ﻗﯩﻠﯩﻨﺪﻯ. ﻫﯚﻛﯜﻣﻪﺗﻨﯩﯔ ﻣﺎﺋﺎﺭﯨﭙﻘﺎ ﺋﺎﺟﺮﺍﺗﻘﺎﻥ ﺧﯩﺮﺍﺟﯩﺘﻰ ﺋﯩﻠﮕﯩﺮﯨﻜﯩﺪﯨﻦ ﻛﯚﭘﻪﻳﺪﻯ" ﺩﻩﭖ ﻛﯚﺭﺳﯩﺘﯩﻠﮕﻪﻥ ﺑﻮﻟﺴﯩﻤﯘ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺑﯩﺮ ﺋﻮﻗﯘﺗﻘﯘﭼﯩﻨﯩﯔ ﻣﻪﻟﯘﻡ ﻗﯩﻠﯩﺸﯩﭽﻪ، ﻫﯚﻛﯜﻣﻪﺕ ﭘﻪﻗﻪﺕ ﺑﯩﺮ ﻗﯩﺴﯩﻢ ﺋﺎﺯ ﺳﺎﻧﺪﯨﻜﻰ ﺋﯩﻨﺘﺎﻳﯩﻦ ﻧﺎﻣﺮﺍﺕ ﻳﯧﺰﯨﻼﺭﺩﯨﻜﻰ ﺋﻮﻗﯘﻏﯘﭼﯩﻼﺭﻧﯩﯔ ﺋﻮﻗﯘﺵ ﻫﻪﻗﻘﯩﻨﻰ ﺑﯩﻜﺎﺭ ﻗﯩﻠﻐﺎﻥ. ﻛﯚﭘﻠﯩﮕﻪﻥ ﺟﺎﻳﻼﺭﺩﺍ ﺋﻮﻗﯘﻏﯘﭼﯩﻼﺭ ﻳﻪﻧﯩﻼ ﺋﻮﻗﯘﺵ ﻫﻪﻗﻘﻰ ﺗﯚﻟﻪﻳﺪﯨﻜﻪﻥ، ﺑﯘﻧﯩﯖﺪﯨﻦ ﺑﺎﺷﻘﺎ ﻳﻪﻧﻪ ﻣﻪﻛﺘﻪﭖ ﺗﻪﺭﯨﭙﯩﺪﯨﻦ ﺑﯧﻜﯩﺘﯩﻠﮕﻪﻥ ﺗﯜﺭﻟﯜﻙ ﻫﻪﻗﻠﻪﺭﻧﻰ ﺗﯚﻟﻪﺷﻜﻪ ﻣﻪﺟﺒﯘﺭ ﺋﯩﻜﻪﻥ. ﺑﯘﻧﯩﯖﺪﯨﻦ ﺑﯩﺰﺍﺭ ﺑﻮﻟﻐﺎﻥ ﺋﺎﺗﺎ ‏- ﺋﺎﻧﯩﻼﺭ ﺑﺎﻟﯩﻠﯩﺮﯨﻨﻰ ﻣﻪﻛﺘﻪﭘﻜﻪ ﺋﻪﯞﻩﺗﻤﻪﻱ، ﺋﻮﻗﯘﺷﺘﯩﻦ ﺗﻮﺧﺘﯩﺘﯩﯟﺍﻟﯩﺪﯨﻜﻪﻥ.

ﺭﺍﺩﯨﺌﻮﻣﯩﺰﻧﯩﯔ ﺯﯨﻴﺎﺭﯨﺘﯩﻨﻰ ﻗﻮﺑﯘﻝ ﻗﯩﻠﻐﺎﻥ ﺋﯘﻳﻐﯘﺭ ﺯﯨﻴﺎﻟﯩﻴﺴﻰ ﺳﯩﺪﯨﻖ ﻫﺎﺟﻰ ﺋﻪﭘﻪﻧﺪﻯ ﺧﯩﺘﺎﻱ ﯞﻩ ﺋﯘﻳﻐﯘﺭ ﻳﯧﺰﯨﻠﯩﺮﯨﺪﯨﻜﻰ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﻣﺎﺋﺎﺭﯨﭗ ﭼﯩﻘﯩﻤﻰ ﺗﯜﭘﻪﻳﻠﯩﺪﯨﻦ ﺋﻮﻗﯘﺷﺴﯩﺰ ﻗﯧﻠﯩﯟﺍﺗﻘﺎﻧﻠﯩﻘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ "ﺑﯘ ﺧﯩﻞ ﺋﻪﻫﯟﺍﻝ ﺑﯘﻧﺪﯨﻦ ﻛﯧﻴﯩﻦ ﺑﻪﻟﻜﯩﻢ ﺗﯧﺨﯩﻤﯘ ﺋﯧﻐﯩﺮ ﺑﻮﻟﯘﺷﻰ ﻣﯘﻣﻜﯩﻦ" ﻟﯩﻜﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ.

ﺋﯘﺯﯗﻥ ﻳﯩﻞ ﺋﯘﻳﻐﯘﺭ ﺋﯧﻠﯩﻨﯩﯔ ﻣﺎﺋﺎﺭﯨﭗ ﺳﺎﻫﻪﺳﯩﺪﻩ ﺋﯩﺸﻠﯩﮕﻪﻥ ﺳﯩﺪﯨﻖ ﻫﺎﺟﻰ ﺋﻪﭘﻪﻧﺪﻯ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﺎﺋﺎﺭﯨﭗ ﺧﯩﺮﺍﺟﯩﺘﯩﻨﯩﯔ ﻫﻪﺭ ﺯﺍﻣﺎﻥ ﺋﺎﺩﯨﻞ ﺗﻪﻗﺴﯩﻢ ﻗﯩﻠﯩﻨﻤﺎﻳﺪﯨﻐﺎﻧﻠﯩﻘﯩﻨﻰ ﻫﻪﻣﺪﻩ ﺩﺍﯞﺍﻣﻠﯩﻖ ﺑﯘﺯﯗﭖ - ﭼﯧﭽﯩﻠﯩﺪﯨﻐﺎﻧﻠﯩﻘﯩﻨﻰ ﺗﻪﻛﯩﺘﻠﻪﭖ، ﺋﯚﺯﻯ ﺋﯩﺸﻠﯩﮕﻪﻥ ﻣﻪﻛﺘﻪﭘﺘﻪ ﻳﯜﺯ ﺑﻪﺭﮔﻪﻥ ﯞﻩﻗﻪﻟﻪﺭﻧﻰ ﻣﯩﺴﺎﻟﻐﺎ ﺋﯧﻠﯩﭗ" ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭ ﺋﯧﻠﯩﺪﯨﻜﻰ ﻣﺎﺋﺎﺭﯨﭙﻘﺎ ﻫﻪﻗﯩﻘﯩﻲ ﻛﯚﯕﯜﻝ ﺑﯚﻟﯜﺷﻰ ﻫﻪﺭﮔﯩﺰﻣﯘ ﻣﯘﻣﻜﯩﻦ ﺋﻪﻣﻪﺱ " ﺩﻩﭖ ﺑﯩﻠﺪﯛﺭﺩﻯ. (ﻣﯧﻬﺮﯨﺒﺎﻥ)