ﻗﺎﺯﺍﻗﯩﺴﺘﺎﻥ ﺟﺎﻣﺎﺋﻪﺗﭽﯩﻠﯩﻜﻰ ﺋﻮﺳﻤﺎﻥ ﺋﯩﺴﻼﻣﻨﻰ "ﻗﻪﻫﺮﯨﻤﺎﻥ " ﺩﻩﭖ ﺧﺎﺗﯩﺮﯨﻠﯩﺪﻯ (1)

• ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺳﻮﯞﯦﺖ ﺋﯩﺘﺘﯩﭙﺎﻗﻰ ﻳﯩﻤﯩﺮﯨﻠﮕﻪﻧﺪﯨﻦ ﻛﯧﻴﯩﻦ ﻗﺎﺯﺍﻗﯩﺴﺘﺎﻥ، ﻗﯩﺮﻏﯩﺰﯨﺴﺘﺎﻥ، ﺋﯚﺯﺑﯧﻜﯩﺴﺘﺎﻥ ﻗﺎﺗﺎﺭﻟﯩﻖ ﻳﯧﯖﻰ ﻣﯘﺳﺘﻪﻗﯩﻞ ﺩﯙﻟﻪﺗﻠﻪﺭ ﺋﯚﺯ ﺗﺎﺭﯨﺨﯩﻲ ﺷﻪﺧﺴﻠﯩﺮﯨﮕﻪ ﻗﺎﻳﺘﯩﺪﯨﻦ ﺑﺎﻫﺎ ﺑﯧﺮﯨﺸﻜﻪ، ﺗﺎﺭﯨﺨﯩﻲ ﺷﻪﺧﺴﻠﻪﺭﻧﯩﯔ ﻫﯚﺭﻣﯩﺘﯩﻨﻰ ﺗﯩﻜﻠﻪﺷﻜﻪ ﻛﯩﺮﯨﺸﻜﻪﻥ. ﺳﻮﯞﯦﺖ ﺋﯩﺘﺘﯩﭙﺎﻗﻰ ﻛﻮﻣﻤﯘﻧﯩﺴﺘﻠﯩﺮﻯ ﺗﻪﺭﯨﭙﯩﺪﯨﻦ ﺩﯛﺷﻤﻪﻥ ﺩﻩﭖ ﺑﯧﻜﯩﺘﯩﻠﮕﻪﻥ ﺗﺎﺭﯨﺨﯩﻲ ﺷﻪﺧﺴﻠﻪﺭ ﺑﯜﮔﯜﻧﻜﻰ ﻛﯜﻧﺪﻩ ﻫﻪﺭ ﻗﺎﻳﺴﻰ ﻣﯩﻠﻠﻪﺗﻠﻪﺭﻧﯩﯔ ﻗﻪﻫﺮﯨﻤﺎﻧﻠﯩﺮﻯ ﯞﻩ ﺋﯩﺠﺎﺑﯩﻲ ﺷﻪﺧﺴﻠﯩﺮﻯ ﺩﻩﭖ ﻗﺎﺭﯨﻠﯩﺶ ﺑﯩﻠﻪﻥ ﺋﯘﻻﺭﻏﺎ ﺧﺎﺗﯩﺮﻩ ﻫﻪﻳﻜﻪﻟﻠﯩﺮﻯ ﺋﻮﺭﻧﯩﺘﯩﻠﺪﻯ.

ﻗﺎﺯﺍﻗﻼﺭ ﺋﻮﺳﻤﺎﻧﻨﻰ ﻗﻪﻫﺮﯨﻤﺎﻥ ﺩﻩﭖ ﻗﺎﺭﺍﻳﺪﯗ

ﺋﯚﺗﻜﻪﻥ ﺋﻪﺳﯩﺮﻧﯩﯔ 30-40-ﻳﯩﻠﻠﯩﺮﯨﺪﺍ ﺋﯘﻳﻐﯘﺭ ﺋﯧﻠﯩﻨﯩﯔ ﺳﯩﻴﺎﺳﯩﻲ ﺗﺎﺭﯨﺨﯩﺪﺍ ﻣﻪﺷﻬﯘﺭ ﺑﻮﻟﯘﭖ ﺗﻮﻧﯘﻟﻐﺎﻥ ﺗﺎﺭﯨﺨﯩﻲ ﺷﻪﺧﺴﻠﻪﺭﻧﯩﯔ ﺑﯩﺮﻯ ﺋﺎﻟﺘﺎﻱ ﻗﺎﺯﺍﻗﻠﯩﺮﯨﺪﯨﻦ ﭼﯩﻘﻘﺎﻥ ﺋﻮﺳﻤﺎﻥ ﺋﯩﺴﻼﻣﺪﯗﺭ.

ﺋﻮﺳﻤﺎﻥ ﺋﺎﺩﻩﺗﺘﻪ ﺧﯩﺘﺎﻱ ﺗﺎﺭﯨﺨﻠﯩﺮﻯ ﯞﻩ ﺗﻪﺷﯟﯨﻘﺎﺗﻠﯩﺮﯨﺪﺍ "ﺋﻮﺳﻤﺎﻥ ﺑﺎﻧﺪﯨﺖ" ﺩﻩﭖ ﺋﺎﺗﯩﻠﯩﺪﯗ، ﺋﻪﻣﻤﺎ ﺑﯩﺮ ﻗﯩﺴﯩﻢ ﭼﻪﺕ ﺋﻪﻝ ﺗﺎﺭﯨﺨﭽﯩﻠﯩﺮﻯ، ﻣﻪﺳﯩﻠﻪﻥ ﺋﺎﻣﯧﺮﯨﻜﺎ ﺗﺎﺭﯨﺨﺸﯘﻧﺎﺳﻰ ﻟﯩﻨﺪﺍ ﺑﯧﻨﺴﻮﻥ ﻗﺎﺗﺎﺭﻟﯩﻘﻼﺭ ﺋﯘﻧﻰ ﻗﺎﺯﺍﻗﻼﺭﻧﯩﯔ ﻣﯩﻠﻠﯩﻲ ﻗﻪﻫﺮﯨﻤﺎﻧﻰ ﺩﻩﭖ ﻗﺎﺭﺍﭖ، " ﺋﻮﺳﻤﺎﻥ ﺑﺎﺗﯘﺭ" ﺩﻩﭖ ﺗﻪﺭﯨﭙﻠﻪﻳﺪﯗ. ﭼﻪﺕ ﺋﻪﻟﻠﻪﺭﺩﻩ ﻳﺎﺷﺎﻳﺪﯨﻐﺎﻥ ﺑﻮﻟﯘﭘﻤﯘ، ﺗﯜﺭﻛﯩﻴﯩﮕﻪ ﻳﻪﺭﻟﻪﺷﻜﻪﻥ ﺋﻪﻳﻨﻰ ﯞﺍﻗﯩﺘﺘﺎ ﺋﻮﺳﻤﺎﻧﻐﺎ ﺋﻪﮔﯩﺸﯩﭗ، ﺷﯧﯔ ﺷﯩﺴﻪﻳﮕﻪ، ﮔﻮﻣﯩﻨﺪﺍﯕﻐﺎ , ﺋﯘﻧﯩﯖﺪﯨﻦ ﻛﯧﻴﯩﻦ ﻛﻮﻣﻤﯘﻧﯩﺴﺘﯩﻚ ﭘﺎﺭﺗﯩﻴﯩﮕﻪ ﻗﺎﺭﺷﻰ ﻗﻮﺭﺍﻟﻠﯩﻖ ﻫﻪﺭﯨﻜﻪﺗﻠﻪﺭﮔﻪ ﻗﺎﺗﻨﺎﺷﻘﺎﻥ ﻗﺎﺯﺍﻗﻼﺭ ﻫﻪﻡ ﺋﯘﻻﺭﻧﯩﯔ ﺋﻪﯞﻻﺩﻟﯩﺮﻯ ﺋﻮﺳﻤﺎﻥ ﺋﯩﺴﻼﻣﻐﺎ "ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﯩﻨﻘﯩﻼﺑﯩﻨﯩﯔ ﻗﻪﻫﺮﯨﻤﺎﻧﻰ"،" ﺑﺎﺗﯘﺭﻯ" ﺩﻩﭖ ﻳﯘﻗﯩﺮﻯ ﺑﺎﻫﺎ ﺑﯧﺮﯨﺪﯗ.

ﺗﯜﺭﻛﯩﻴﻪ ﻗﺎﺯﺍﻗﻠﯩﺮﻯ ﺋﺎﺭﯨﺴﯩﺪﯨﻦ ﭼﯩﻘﻘﺎﻥ ﻗﯩﺰﯨﺮﺑﻪﮒ ﻗﺎﺗﺎﺭﻟﯩﻖ ﺑﯩﺮ ﻗﯩﺴﯩﻢ ﺯﯨﻴﺎﻟﯩﻴﻼﺭ ﺋﻮﺳﻤﺎﻥ ﻫﻪﻗﻘﯩﺪﻩ ﻣﻪﺧﺴﯘﺱ ﻛﯩﺘﺎﺑﻼﺭﻧﯩﻤﯘ ﻳﯧﺰﯨﭗ، ﺋﯘﻧﯩﯔ ﻗﺎﺯﺍﻗﻼﺭﻧﯩﯔ ﻗﻪﻫﺮﯨﻤﺎﻧﻰ ﺋﯩﻜﻪﻧﻠﯩﻜﯩﺪﯨﻦ ﺋﯩﺒﺎﺭﻩﺕ ﺋﻮﺭﻧﯩﻨﻰ ﻣﯘﺋﻪﻳﻴﻪﻧﻠﻪﺷﺘﯜﺭﮔﻪﻥ ﺋﯩﺪﻯ.

ﻧﯚﯞﻩﺗﺘﻪ، ﻗﺎﺯﺍﻗﯩﺴﺘﺎﻧﺪﺍ ﺋﻮﺳﻤﺎﻥ ﺋﯩﺴﻼﻣﻨﻰ ﺑﯩﺮ ﭘﯜﺗﯜﻥ ﻗﺎﺯﺍﻕ ﺧﻪﻟﻘﯩﻨﯩﯔ ﻣﯩﻠﻠﯩﻲ ﻗﻪﻫﺮﯨﻤﺎﻧﻠﯩﺮﻯ ﻗﺎﺗﺎﺭﯨﻐﺎ ﻛﯩﺮﮔﯜﺯﯛﺵ، ﺋﯘﻧﯩﯔ ﻧﺎﻣﯩﻨﻰ ﺋﻪﺑﻪﺩﯨﻴﻠﻪﺷﺘﯜﺭﯛﺵ ﻫﻪﻗﻘﯩﺪﯨﻜﻰ ﭘﯩﻜﯩﺮ ﺋﯧﻘﯩﻤﻠﯩﺮﻯ ﺋﯜﺳﺘﯜﻧﻠﯜﻛﻠﻪﺭﮔﻪ ﺋﯧﺮﯨﺸﻜﻪﻥ ﺑﻮﻟﯘﭖ، ﻗﺎﺯﺍﻗﯩﺴﺘﺎﻥ ﻣﯩﻠﻠﻪﺗﭙﻪﺭﯞﻩﺭﻟﯩﺮﻯ ﺋﯘﻧﻰ ﭘﻪﻗﻪﺕ ﺋﯘﻳﻐﯘﺭ ﺋﯧﻠﯩﻨﯩﯔ ﺋﺎﻟﺘﺎﻱ ﯞﯨﻼﻳﯩﺘﻰ ﺗﻪﯞﻩﺳﯩﺪﯨﻜﻰ ﻗﺎﺯﺍﻗﻼﺭﻧﯩﻼ ﺋﺎﺯﺍﺩ ﻗﯩﻠﯩﺶ ﺋﯜﭼﯜﻥ ﻛﯜﺭﻩﺵ ﻗﯩﻠﻐﺎﻥ ﺷﻪﺧﺲ ﺩﻩﭖ ﻗﺎﺭﯨﻤﺎﺳﺘﯩﻦ ﺑﻪﻟﻜﻰ ﺑﯩﺮ ﭘﯜﺗﯜﻥ ﻗﺎﺯﺍﻕ ﺧﻪﻟﻘﯩﻨﯩﯔ ﻣﯘﺳﺘﻪﻣﻠﯩﻜﯩﭽﯩﻠﯩﻜﻜﻪ ﻗﺎﺭﺷﻰ ﺋﺎﺯﺍﺩﻟﯩﻖ ﻛﯜﺭﯨﺸﯩﻨﯩﯔ ﺑﺎﺗﯘﺭﻯ ﺩﻩﭖ ﺋﯧﺘﯩﺮﺍﭖ ﻗﯩﻠﻐﺎﻥ .

ﺋﻮﺗﺘﯘﺭﺍ ﺋﺎﺳﯩﻴﺎ ﺋﯘﭼﯘﺭ ﺗﻮﺭﯨﻨﯩﯔ ﺧﻪﯞﯨﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ، ﻗﺎﺯﺍﻗﯩﺴﺘﺎﻧﻨﯩﯔ ﻛﻮﻧﺎ ﭘﺎﻳﺘﻪﺧﺘﻰ ﺋﺎﻟﻤﯘﺗﺎ ﺷﻪﻫﯩﺮﯨﺪﯨﻜﻰ ﺳﺘﯘﺩﯦﻨﺘﻼﺭ ﺳﺎﺭﯨﻴﯩﺪﺍ ﺋﻮﺳﻤﺎﻥ ﺋﯩﺴﻼﻡ ﻧﺎﻣﯩﻐﺎ ﺑﯧﻐﯩﺸﻼﻧﻐﺎﻥ "ﺋﺎﺯﺍﺩﻟﯩﻖ ﺋﯜﭼﯜﻥ ﺟﺎﻥ ﭘﯩﺪﺍ" ﺩﯦﮕﻪﻥ ﻣﺎﯞﺯﯗ ﺋﺎﺳﺘﯩﺪﺍ ﺋﺎﻗﯩﻨﻼﺭﻧﯩﯔ ﺋﯚﻟﻪﯓ ﺋﯧﻴﺘﯩﺶ ﻣﯘﺭﺍﺳﯩﻤﻰ ﺑﻮﻟﯘﭖ ﺋﯚﺗﻜﻪﻥ. ﻣﯘﺭﺍﺳﯩﻤﺪﺍ ﺋﻮﺳﻤﺎﻧﻨﯩﯔ ﻫﺎﻳﺎﺕ ﻣﯘﺳﺎﭘﯩﻠﯩﺮﻯ، ﺋﯧﻠﯩﭗ ﺑﺎﺭﻏﺎﻥ ﺟﻪﯕﻠﯩﺮﻯ، ﺋﺎﺧﯩﺮﻗﻰ ﭘﺎﺟﯩﺌﻪﺳﻰ ﯞﻩ ﺑﺎﺷﻘﺎ ﯞﻩﻗﻪﻟﻪﺭ ﺋﻪﺳﻠﯩﻨﯩﭗ ﺋﯚﺗﯜﻟﮕﻪﻥ .

ﺋﻮﺳﻤﺎﻥ ﻗﺎﺯﺍﻗﻼﺭﻧﻰ ﺋﺎﺯﺍﺩ ﻗﯩﻠﯩﺸﻨﻰ ﻣﻪﻗﺴﻪﺕ ﻗﯩﻠﻐﺎﻥ

ﺑﯘ ﻣﯘﻧﺎﺳﯩﯟﻩﺕ ﺑﯩﻠﻪﻥ ﻗﺎﺯﺍﻕ ﮊﯗﺭﻧﺎﻟﯩﺴﺘﻰ ﺋﺎﻟﯩﻴﻪ ﻗﯩﺰﯨﻠﻘﯘﻟﻮﯞﺍ ﺋﺎﻟﻤﺎﺗﺎﺩﺍ ﭼﯩﻘﯩﺪﯨﻐﺎﻥ "ﺩﯛﺷﻪﻧﺒﯩﮕﯩﭽﻪ " ﺩﻩﭖ ﺋﺎﺗﺎﻟﻐﺎﻥ ﮔﯧﺰﯨﺘﺘﻪ "ﺋﻮﺳﻤﺎﻥ ﺑﺎﺗﯘﺭﻧﯩﯔ ﺋﯧﺘﯩﻠﯩﺸﻰ" ﻣﺎﯞﺯﯗﺳﯩﺪﺍ ﺑﯩﺮ ﭘﺎﺭﭼﻪ ﻣﺎﻗﺎﻟﻪ ﺋﯧﻼﻥ ﻗﯩﻠﯩﭗ، ﺋﻮﺳﻤﺎﻧﻨﯩﯔ ﺋﯚﺗﻜﻪﻥ ﺋﻪﺳﯩﺮﻧﯩﯔ 30-40-ﻳﯩﻠﻼﺭﺩﺍ ﺋﯧﻠﯩﭗ ﺑﺎﺭﻏﺎﻥ ﭘﺎﺋﺎﻟﯩﻴﻪﺗﻠﯩﺮﯨﻨﻰ ﺗﻪﭘﺴﯩﻠﯩﻲ ﺗﻮﻧﯘﺷﺘﯘﺭﻏﺎﻥ ﻫﻪﻣﺪﻩ ﺋﯘﻧﯩﯔ ﻗﺎﺯﺍﻕ ﺧﻪﻟﻘﯩﻨﯩﯔ ﻗﻪﺩﯨﻤﯩﻲ ﻗﻪﻫﺮﯨﻤﺎﻧﻠﯩﺮﯨﻨﯩﯔ ﺋﯩﺰﺑﺎﺳﺎﺭﻯ ﺋﯩﻜﻪﻧﻠﯩﻜﯩﻨﻰ ﻣﯘﺋﻪﻳﻴﻪﻧﻠﻪﺷﺘﯜﺭﯛﭖ، " ﻣﻪﺯﻛﯘﺭ ﺋﺎﺟﺎﻳﯩﭗ ﺋﯩﻨﺴﺎﻥ ﺋﻪﻣﻪﻟﯩﻴﻪﺗﺘﻪ، ﺑﯩﺮﻻ ﯞﺍﻗﯩﺘﺘﺎ ﺑﯩﺮ ﻗﺎﻧﭽﻪ ﻣﯘﺳﺘﻪﺑﯩﺖ ﺋﯩﻤﭙﻪﺭﯨﻴﯩﻠﻪﺭﮔﻪ ﻗﺎﺭﺷﻰ ﺑﺎﺗﯘﺭﻻﺭﭼﻪ ﺋﺎﺗﻠﯩﻨﯩﭗ، ﺋﺎﺧﯩﺮﻯ ﺋﯘﻻﺭ ﺗﻪﺭﯨﭙﯩﺪﯨﻦ ﺋﯚﻟﺘﯜﺭﯛﻟﺪﻯ، ﺋﯘ ﻏﻪﻟﯩﺒﻪ ﻗﯩﻼﻟﻤﺎﻱ ﻗﺎﻟﺪﻯ.

ﺋﻮﺳﻤﺎﻥ ﺋﺎﺯﺍﺩ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺟﯘﻣﻬﯘﺭﯨﻴﯩﺘﯩﻨﯩﯔ ﻗﯘﺭﯗﻟﯘﺷﻰ ﺋﯜﭼﯜﻥ ﺋﺎﻻﻫﯩﺪﻩ ﺗﯚﻫﭙﻪ ﻗﻮﺷﺘﻰ ﻫﻪﻣﺪﻩ ﺧﯘﺩﺩﻯ ﻛﯧﻨﯧﺴﻪﺭ ﺧﺎﻧﻐﺎ ﺋﻮﺧﺸﺎﺵ ﻗﺎﺯﺍﻕ ﺧﻪﻟﻘﯩﻨﯩﯔ ﻣﯘﺳﺘﻪﻗﯩﻠﻠﯩﻘﻰ ﺋﯜﭼﯜﻥ ﺋﯧﻠﯩﭗ ﺑﯧﺮﯨﻠﻐﺎﻥ ﻛﯜﺭﻩﺷﻠﻪﺭﻧﯩﯔ ﻗﯘﺭﺑﺎﻧﻰ ﺑﻮﻟﺪﻯ، ﻣﺎﻧﺎ ﺋﻪﻣﺪﻯ ﻗﺎﺯﺍﻗﯩﺴﺘﺎﻥ ﺋﯚﺯ ﺋﯩﮕﯩﻠﯩﻚ ﻫﻮﻗﯘﻗﯩﻨﻰ ﻗﻮﻟﻐﺎ ﺋﺎﻟﻐﺎﻧﺪﺍ ﺑﯩﺰ ﺗﺎﺭﯨﺨﯩﻤﯩﺰﻧﯩﯔ ﺋﯩﻠﮕﯩﺮﻯ ﺋﯧﻴﺘﺎﻟﻤﯩﻐﺎﻥ ﺑﻮﺷﻠﯘﻗﻠﯩﺮﯨﻨﻰ ﺋﺎﺳﺘﺎ-ﺋﺎﺳﺘﺎ ﺗﻮﻟﺪﯗﺭﯗﯞﺍﺗﯩﻤﯩﺰ، ﺑﯩﺰ ﺋﯘﻧﺘﯘﻟﯘﭖ ﻛﻪﺗﻜﻪﻥ ﻗﻪﻫﺮﯨﻤﺎﻧﻠﯩﺮﯨﻤﯩﺰﻧﯩﯔ ﻧﺎﻣﻠﯩﺮﯨﻨﻰ ﺋﻪﺳﻠﯩﮕﻪ ﻛﻪﻟﺘﯜﺭﯛﺷﯩﻤﯩﺰ ﯞﻩ ﺋﯘﻻﺭﻧﯩﯔ ﻫﯚﺭﻣﯩﺘﯩﻨﻰ ﺗﯩﻜﻠﯩﺸﯩﻤﯩﺰ ﻻﺯﯨﻢ.." ﺩﻩﭖ ﻳﺎﺯﯨﺪﯗ.

ﺋﺎﭘﺘﻮﺭ 1937-1939-ﻳﯩﻠﻠﯩﺮﯨﺪﺍ ﺋﯚﺯﯨﻨﻰ ﺋﯧﺰﯨﻠﮕﻪﻥ ﺧﻪﻟﻘﻠﻪﺭﻧﯩﯔ ﺩﺍﻫﯩﻴﺴﻰ ﺩﻩﭖ ﺋﺎﺗﯩﯟﺍﻟﻐﺎﻥ ﺳﺘﺎﻟﯩﻨﻨﯩﯔ ﻗﺎﺯﺍﻗﯩﺴﺘﺎﻧﺪﺍ ﻗﯩﺰﯨﻞ ﺗﯧﺮﺭﻭﺭﻟﯘﻕ ﺋﯧﻠﯩﭗ ﺑﯧﺮﯨﭗ، ﺳﺎﻧﺴﯩﺰﻟﯩﻐﺎﻥ ﻗﺎﺯﺍﻕ ﻣﯩﻠﻠﻪﺗﭙﻪﺭﯞﻩﺭ ﺯﯨﻴﺎﻟﯩﻴﻠﯩﺮﯨﻨﻰ ﺋﯚﻟﺘﯜﺭﮔﻪﻧﻠﯩﻜﻰ، ﺋﯘﻧﯩﯔ ﺑﯩﻠﻪﻧﻼ ﻗﺎﻟﻤﺎﺳﺘﯩﻦ ﻳﻪﻧﻪ ﺋﯘﻳﻐﯘﺭ ﺋﯧﻠﯩﺪﻩ ﺷﯧﯔ ﺷﯩﺴﻪﻳﮕﻪ ﻳﺎﺭﺩﻩﻣﻠﯩﺸﯩﭗ، ﺷﻪﺭﭘﺨﺎﻥ ﻗﺎﺗﺎﺭﻟﯩﻖ ﻧﯘﺭﻏﯘﻥ ﻗﺎﺯﺍﻕ ﺯﯨﻴﺎﻟﯩﻴﻠﯩﺮﻯ ﯞﻩ ﻣﯩﻠﻠﻪﺗﭙﻪﺭﯞﻩﺭ ﻛﯩﺸﯩﻠﯩﺮﯨﻨﻰ ﺋﻮﻟﺘﯘﺭﮔﻪﻧﻠﯩﻜﻰ ﻗﺎﺗﺎﺭﻟﯩﻖ ﻫﺎﺩﯨﺴﯩﻠﻪﺭﻧﯩﯔ ﺋﻮﺳﻤﺎﻥ ﺋﯩﺴﻼﻣﺪﺍ ﺳﻮﯞﯦﺖ ﺋﯩﺘﺘﯩﭙﺎﻗﯩﻐﺎ ﺟﯜﻣﻠﯩﺪﯨﻦ ﺳﺘﺎﻟﯩﻨﻐﺎ ﻧﯩﺴﺒﻪﺗﻪﻥ ﻗﺎﺭﺷﯩﻠﯩﻖ ﺋﯩﺪﯨﻴﯩﻠﯩﺮﯨﻨﻰ ﭘﻪﻳﺪﺍ ﻗﯩﻠﻐﺎﻧﻠﯩﻘﻰ ﺷﯘﻧﺪﺍﻗﻼ ﺑﯘ ﯞﻩﻗﻪﻟﻪﺭﻧﯩﯔ ﺋﯘﻧﯩﯔ ﻗﺎﺯﺍﻕ ﺧﻪﻟﻘﯩﻨﻰ ﺋﺎﺯﺍﺩ ﻗﯩﻠﯩﺶ ﻏﺎﻳﯩﺴﯩﻨﯩﯔ ﻛﯜﭼﯩﻴﯩﺸﯩﻨﻰ ﺋﯩﻠﮕﯩﺮﻯ ﺳﯜﺭﯛﺵ ﺭﻭﻟﯩﻨﻰ ﺋﻮﻳﻨﯩﻐﺎﻧﻠﯩﻘﯩﻨﻰ ﻛﯚﺭﺳﯩﺘﯩﺪﯗ.

ﺋﺎﭘﺘﻮﺭﻧﯩﯔ ﺑﺎﻳﺎﻥ ﻗﯩﻠﯩﺸﯩﭽﻪ , ﻧﻪﺗﯩﺠﯩﺪﻩ، ﺋﻮﺳﻤﺎﻥ 1939-1940-ﻳﯩﻠﻠﯩﺮﻯ ﺋﺎﻟﺘﺎﻳﺪﺍ ﺷﯧﯔ ﺷﯩﺴﻪﻳﮕﻪ ﻗﺎﺭﺷﻰ ﻛﯜﺭﻩﺷﻜﻪ ﺋﺎﺗﻼﻧﻐﺎﻥ، 1941-ﻳﯩﻠﻰ, ﺷﯧﯔ ﺷﯩﺴﻪﻱ ﺳﺘﺎﻟﯩﻨﺪﯨﻦ ﻳﯜﺯ ﺋﯚﺭﯨﮕﻪﻧﺪﯨﻦ ﻛﯧﻴﯩﻦ، ﺳﻮﯞﯦﺖ ﺋﯩﺘﺘﯩﭙﺎﻗﻰ ﺩﻩﺭﻫﺎﻝ ﺋﻮﺳﻤﺎﻧﻐﺎ ﻳﺎﺭﺩﻩﻡ ﺑﯧﺮﯨﭗ، ﺋﯘﻧﯩﯖﺪﯨﻦ ﭘﺎﻳﺪﯨﻠﯩﻨﯩﭗ، ﺷﯧﯔ ﺷﯩﺴﻪﻱ ﯞﻩ ﮔﻮﻣﯩﻨﺪﺍﯕﻐﺎ ﻗﺎﺭﺷﻰ ﻫﻪﺭﯨﻜﻪﺕ ﻗﯩﻠﯩﺶ ﺋﯩﺴﺘﺮﺍﺗﯧﮕﯩﻴﯩﺴﯩﻨﻰ ﺑﻪﻟﮕﯩﻠﯩﮕﻪﻥ .

ﻣﻮﺳﻜﯟﺍ ﺋﻮﺳﻤﺎﻧﻐﺎ ﻳﺎﺭﺩﻩﻡ ﺑﻪﺭﺩﻯ

ﻗﺎﺯﺍﻕ ﮊﯗﺭﻧﺎﻟﯩﺴﺘﻰ ﺋﺎﻟﯩﻴﻪ ﻗﯩﺰﯨﻞ ﻗﯘﻟﻮﯞﺍﻧﯩﯔ ﺋﺎﺭﺧﯩﭗ ﻣﺎﺗﯧﺮﯨﻴﺎﻟﻠﯩﺮﻯ ﯞﻩ ﺗﺎﺭﯨﺨﯩﻲ ﻣﻪﻧﺒﻪﻟﻪﺭﺩﯨﻦ ﻣﯩﺴﺎﻝ ﻛﻪﻟﺘﯜﺭﯛﺷﯩﭽﻪ، 1943-ﻳﯩﻠﻰ 5-ﺋﯚﻛﺘﻪﺑﯩﺮﺩﻩ ﺳﻮﯞﯦﺖ ﺋﯩﺘﺘﯩﭙﺎﻗﻰ ﻛﻮﻣﭙﺎﺭﺗﯩﻴﯩﺴﻰ ﻣﻪﺭﻛﯩﺰﯨﻲ ﻛﻮﻣﯩﺘﯧﺘﻰ ﻳﯩﻐﯩﻦ ﭼﺎﻗﯩﺮﯨﭗ، ﺋﻮﺳﻤﺎﻥ ﺋﯩﺴﻼﻣﻐﺎ ﯞﻩﻛﯩﻞ ﺋﻪﯞﻩﺗﯩﺸﻨﻰ ﻗﺎﺭﺍﺭ ﻗﯩﻠﻐﺎﻥ.

ﭘﺎﺧﻮﻣﻮﻑ ﺑﺎﺷﻠﯩﻐﺎﻥ 40 ﻛﯩﺸﯩﻠﯩﻚ ﻣﻪﺯﻛﯘﺭ ﻣﻮﺳﻜﯟﺍ ﯞﻩﻛﯩﻠﻠﻪﺭ ﺋﯚﻣﯩﻜﻰ ﺋﻮﺳﻤﺎﻥ ﺑﺎﺗﯘﺭ ﺑﯩﻠﻪﻥ ﻛﯚﺭﯛﺷﯜﭖ، ﺋﯘﻧﯩﯔ ﺑﯩﻠﻪﻥ ﺭﻩﺳﻤﯩﻲ ﺳﯚﻫﺒﻪﺗﻠﻪﺷﻜﻪﻥ ﻫﻪﻣﺪﻩ ﺑﯘ ﺋﯘﭼﺮﯨﺸﯩﺸﻨﻰ ﻣﻪﺧﭙﯩﻲ ﺗﯘﺗﯘﺷﻘﺎ ﭘﯜﺗﯜﺷﻜﻪﻥ.

ﻛﯧﻠﯩﺸﯩﻢ ﺑﻮﻳﯩﭽﻪ ﻣﻮﺳﻜﯟﺍ ﻗﻮﺯﻏﯩﻼﯕﭽﯩﻼﺭﻏﺎ ﻫﻪﺭﺑﯩﻲ ﻳﺎﺭﺩﻩﻡ ﺑﯧﺮﯨﺸﻜﻪ ﻛﯩﺮﯨﺸﻜﻪﻥ ﺑﻮﻟﯘﭖ، ﺩﻩﺳﻠﻪﭘﻜﻰ ﻗﻪﺩﻩﻣﺪﻩ 10 ﻣﺎﯞﺯﯗﺭ، ﺋﺎﭘﺘﻮﻣﺎﺕ ﻫﻪﻡ ﻧﻪﭼﭽﻪ ﻣﯩﯔ ﭘﺎﻱ ﺋﻮﻕ ﻗﺎﺗﺎﺭﻟﯩﻖ ﻗﻮﺭﺍﻝ ﻳﺎﺭﺍﻗﻼﺭ ﺑﯩﯟﺍﺳﯩﺘﻪ ﺋﻮﺳﻤﺎﻧﻨﯩﯔ ﻗﻮﻟﯩﻐﺎ ﺑﯧﺮﯨﻠﮕﻪﻥ. ﻟﯧﻜﯩﻦ، ﺋﻮﺳﻤﺎﻥ ﻣﻮﺳﻜﯟﺍﻧﯩﯔ ﻣﻪﻗﺴﯩﺘﯩﻨﯩﯔ ﺑﯘ ﺋﺎﺭﻗﯩﻠﯩﻖ ﺋﯚﺯﯨﻨﻰ ﺗﻮﻟﯘﻕ ﻛﻮﻧﺘﺮﻭﻟﻠﯘﻕ ﺋﺎﺳﺘﯩﻐﺎ ﺋﯧﻠﯩﺶ ﺋﯩﻜﻪﻧﻠﯩﻜﯩﻨﻰ ﺑﯩﻠﯩﭗ، ﺋﯘﻻﺭﻏﺎ ﻗﻪﺭﺯﺩﺍﺭ ﺑﻮﻟﯘﭖ ﻗﺎﻟﻤﺎﺳﻠﯩﻖ ﺋﯜﭼﯜﻥ , ﺟﺎﯞﺍﺏ ﺳﯜﭘﯩﺘﯩﺪﻩ ﻣﻮﺳﻜﯟﺍ ﯞﻩﻛﯩﻠﻠﯩﺮﯨﮕﻪ 38 ﺋﺎﺕ، 8 ﻛﺎﻻ ﯞﻩ 137 ﮔﺮﺍﻡ ﺋﺎﻟﺘﯘﻥ ﺳﻮﻏﺎ ﻗﯩﻠﻐﺎﻥ. (ﺋﯜﻣﯩﺪﯞﺍﺭ)