ﺋﯩﺴﺘﺎﻧﺒﯘﻟﺪﺍ ﻣﯩﻠﻠﻰ ﻗﻪﻫﺮﯨﻤﺎﻥ ﺋﻮﺳﻤﺎﻥ ﺑﺎﺗﯘﺭﻧﻰ ﺋﻪﺳﻠﻪﺵ ﻳﯩﻐﯩﻨﻰ ﺋﯧﭽﯩﻠﺪﻯ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻦ ﺗﺎﺭﯨﻤﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

8-ﺋﺎﻳﻨﯩﯔ 2-ﻛﯜﻧﻰ ﺋﯩﺴﺘﺎﻧﺒﯘﻝ ﺯﻩﻳﺘﯩﻨﺒﯘﺭﻧﯘ ﺭﺍﻳﻮﻧﻠﯘﻕ ﻫﯚﻛﯜﻣﻪﺗﻨﯩﯔ ﺯﺍﻟﯩﺪﺍ ﻗﻪﻫﺮﯨﻤﺎﻥ ﺋﻮﺳﻤﺎﻥ ﺑﺎﺗﯘﺭﻧﻰ ﺋﻪﺳﻠﻪﺵ ﻧﺎﻣﻠﯩﻖ ﻳﯩﻐﯩﻦ ﺋﯧﭽﯩﻠﺪﻯ. ﺋﻮﺳﻤﺎﻥ ﺑﺎﺗﯘﺭﻧﯩﯔ ﻧﻪﯞﺭﯨﺴﻰ ﺳﯚﺯ ﻗﯩﻠﻐﺎﻥ. photos are by Erkin Tarim / RFA

8-ﺋﺎﻳﻨﯩﯔ 2-ﻛﯜﻧﻰ ﺋﯩﺴﺘﺎﻧﺒﯘﻝ ﺯﻩﻳﺘﯩﻨﺒﯘﺭﻧﯘ ﺭﺍﻳﻮﻧﻠﯘﻕ ﻫﯚﻛﯜﻣﻪﺗﻨﯩﯔ ﺯﺍﻟﯩﺪﺍ 21-ﺋﻪﺳﯩﺮﺩﻩ ﺧﯩﺘﺎﻳﻐﺎ ﻗﺎﺭﺷﻰ ﻣﯘﺟﺎﺩﯨﻠﻪ ﺋﯧﻠﯩﭗ ﺑﺎﺭﻏﺎﻥ ﻣﯩﻠﻠﻰ ﻗﻪﻫﺮﯨﻤﺎﻥ ﺋﻮﺳﻤﺎﻥ ﺑﺎﺗﯘﺭﻧﻰ ﺋﻪﺳﻠﻪﺵ ﻧﺎﻣﻠﯩﻖ ﻳﯩﻐﯩﻦ ﺋﯧﭽﯩﻠﺪﻯ. ﺑﯘ ﻳﯩﻐﯩﻨﻨﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻛﯚﭼﻤﻪﻧﻠﻪﺭ ﺟﻪﻣﺌﯩﻴﯩﺘﻰ ﺋﯘﻳﯘﺷﺘﯘﺭﻏﺎﻥ ﺑﻮﻟﯘﭖ، ﻳﯩﻐﯩﻨﻐﺎ ﺗﯜﺭﻛﯩﻴﻪ - ﻳﺎﯞﺭﯗﭘﺎ ﭘﺎﻻﻣﯧﻨﺘﻪﺭﻟﻪﺭ ﺑﯩﺮﻟﯩﻜﻰ ﺑﺎﺷﻠﯩﻘﻰ، ﺳﺎﺑﯩﻖ ﭘﺎﺭﻻﻣﯧﻨﺖ ﺋﻪﺯﺍﺳﻰ ﭘﺮﻭﻑ. ﺩﺭ. ﻧﻪﯞﺯﺍﺕ ﻳﺎﻟﭽﯩﻨﺘﺎﺵ ﻗﺎﺗﻨﺎﺷﻘﺎﻥ ﯞﻩ ﺳﯚﺯ ﻗﯩﻠﻐﺎﻥ. ﺑﯘﻻﺭﺩﯨﻦ ﺑﺎﺷﻘﺎ ﻳﯩﻐﯩﻨﻐﺎ ﻳﻪﻧﻪ ، ﺯﻩﻳﺘﯩﻨﺒﯘﺭﻧﯘ ﺭﺍﻳﻮﻧﻠﯘﻕ ﻫﯚﻛﯜﻣﻪﺕ ﻣﻪﺳﺌﯘﻟﻠﯩﺮﻯ، ﺋﯩﺴﺘﺎﻧﺒﯘﻟﺪﺍ ﭘﺎﺋﺎﻟﯩﻴﻪﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺋﺎﻣﻤﯩﯟﻯ ﺗﻪﺷﻜﯩﻼﺗﻠﯩﺮﯨﻨﯩﯔ ﻣﻪﺳﺌﯘﻟﻠﯩﺮﻯ ﯞﻩ ﺋﯘﻳﻐﯘﺭ، ﻗﺎﺯﺍﻕ ﻛﯚﭼﻤﻪﻧﻠﻪﺭﺩﯨﻦ ﺑﻮﻟﯘﭖ 200 ﺩﯨﻦ ﺋﺎﺭﺗﯘﻕ ﻛﯩﺸﻰ ﻗﺎﺗﻨﺎﺷﻘﺎﻥ.

ﻳﯩﻐﯩﻨﻨﯩﯔ ﺋﯧﭽﯩﻠﯩﺶ ﻧﯘﺗﻘﯩﻨﻰ ﻳﺎﯞﺭﯗ ‏- ﺋﺎﺳﯩﻴﺎ ﺋﺎﻣﻤﯩﯟﻯ ﺗﻪﺷﻜﯩﻼﺗﻠﯩﺮﻯ ﻓﯧﺪﯨﺮﺍﺗﺴﻴﻮﻧﻰ ﺳﯧﻜﺮﯨﺘﺎﺭﻯ ﺩﺭ. ﺋﻪﻫﻤﻪﺕ ﺗﯜﺭﻛﯚﺯ ﻗﯩﻠﻐﺎﻥ ﺑﻮﻟﯘﭖ، ﻳﯩﻐﯩﻨﺪﺍ ﭘﺮﻭﻑ. ﺩﺭ. ﻧﻪﯞﺯﺍﺕ ﻳﺎﻟﭽﯩﻨﺘﺎﺵ، ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﻛﯚﭼﻤﻪﻧﻠﻪﺭ ﺟﻪﻣﺌﯩﻴﯩﺘﻰ ﺑﺎﺷﻠﯩﯩﻘﻰ ﺧﯩﺰﯨﺮﺑﻪﮒ ﻏﻪﻳﺮﯨﺘﯘﻟﻼﻫ ، ﺋﻮﺳﻤﺎﻥ ﺑﺎﺗﯘﺭﻧﯩﯔ ﻧﻪﯞﺭﯨﺴﻰ ﺋﯚﺭﻛﻪﻥ ﻧﻪﺑﯩﻴﺌﻮﻏﻠﻰ ﻗﺎﺗﺎﺭﻟﯩﻘﻼﺭ ﺋﻮﺳﻤﺎﻥ ﺑﺎﺗﯘﺭﻧﯩﯔ ﻫﺎﻳﺎﺗﻰ ﯞﻩ ﺋﯘ ﻫﻪﻗﻘﯩﺪﻩ ﺋﯧﻠﯩﭗ ﺑﯧﺮﯨﻠﻐﺎﻥ ﺗﻪﺗﻘﯩﻘﺎﺗﻼﺭ، ﺷﻪﺭﻗﯩﻲ ﺗﯜﺭﻛﺴﺘﺎﻧﻨﯩﯔ ﺑﯜﮔﯜﻧﻜﻰ ﯞﻩﺯﯨﻴﯩﺘﻰ ﺗﯧﻤﯩﻠﯩﺮﯨﺪﺍ ﺳﯚﺯ ﻗﯩﻠﻐﺎﻥ. ﺑﯘ ﻳﯩﻐﯩﻦ ﺋﻮﺳﻤﺎﻥ ﺑﺎﺗﯘﺭﻧﯩﯔ ﻧﻪﯞﺭﯨﺴﻰ ﺋﯚﺭﻛﻪﻥ ﻧﻪﺑﯩﻴﺌﻮﻏﻠﯩﻨﯩﯔ ﺗﯜﺭﻛﯩﻴﯩﺪﻩ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺯﯨﻴﺎﺭﯨﺘﻰ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﺋﯚﺗﻜﯜﺯﯛﻟﮕﻪﻥ ﺑﻮﻟﯘﭖ، ﺋﯩﺴﺘﺎﻧﺒﯘﻟﺪﯨﻜﻰ ﺋﯘﻳﻐﯘﺭ ﯞﻩ ﻗﺎﺯﺍﻕ ﻛﯚﭼﻤﻪﻧﻠﻪﺭ ﺑﯘﻧﯩﯖﻐﺎ ﺋﺎﻛﺘﯩﭙﻠﯩﻖ ﺑﯩﻠﻪﻥ ﻗﺎﺗﻨﺎﺷﻘﺎﻥ.

ﺑﯩﺰ ﺑﯘ ﻳﯩﻐﯩﻨﻨﯩﯔ ﺗﻪﭘﺴﯩﻼﺗﻰ ﻫﻪﻗﻘﯩﺪﻩ ﺳﯩﻠﻪﺭﮔﻪ ﺗﯧﺨﯩﻤﯘ ﻛﯚﭖ ﻣﻪﻟﯘﻣﺎﺕ ﺑﯧﺮﯨﺶ ﺋﯜﭼﯜﻥ ﻳﯩﻐﯩﻨﻐﺎ ﻗﺎﺗﻨﺎﺷﻘﺎﻥ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﯞﻩﺧﭙﻰ ﻣﯘﺩﯨﺮﻯ ﻫﺎﻣﯘﺕ ﮔﯚﻛﺘﯜﺭﻙ ﯞﻩ ﻳﯩﻐﯩﻨﺪﺍ ﺳﯚﺯ ﻗﯩﻠﻐﺎﻥ ﻳﺎﯞﺭﯗ ‏- ﺋﺎﺳﯩﻴﺎ ﺋﺎﻣﻤﯩﯟﻯ ﺗﻪﺷﻜﯩﻼﺗﻼﺭ ﻓﯧﺪﯨﺮﺍﺗﺴﻴﻮﻧﻰ ﺳﯧﻜﺮﯨﺘﺎﺭﻯ ﺩﺭ. ﺋﻪﻫﻤﻪﺕ ﺗﯜﺭﻛﯚﺯ ﺋﻪﭘﻪﻧﺪﯨﻠﻪﺭ ﺑﯩﻠﻪﻥ ﺗﯧﻠﯧﻔﻮﻥ ﺯﯨﻴﺎﺭﯨﺘﻰ ﺋﯧﻠﯩﭗ ﺑﺎﺭﺩﯗﻕ.

ﻳﺎﯞﺭﯗ ‏- ﺋﺎﺳﯩﻴﺎ ﺋﺎﻣﻤﯩﯟﯨﻲ ﺗﻪﺷﻜﯩﻼﺗﻼﺭ ﺑﯩﺮﻟﯩﻜﻰ ﺳﯧﻜﺮﯨﺘﺎﺭﻯ ﺩﺭ. ﺋﻪﻫﻤﻪﺕ ﺗﯜﺭﻛﯚﺯ ﺋﻪﭘﻪﻧﺪﻯ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺑﯜﮔﯜﻧﻜﻰ ﻛﯜﻧﺪﯨﻤﯘ ﺋﻮﺳﻤﺎﻥ ﺑﺎﺗﯘﺭ ﺋﯩﺴﻤﯩﺪﯨﻦ ﻗﻮﺭﻗﯘﯞﺍﺗﻘﺎﻧﻠﯩﻘﯩﻨﻰ ﺋﯧﻴﺘﯩﭗ ﻣﯘﻧﺪﺍﻕ ﺩﯦﺪﻯ:" 20-ﺋﻪﺳﯩﺮﺩﻩ ﺧﯩﺘﺎﻳﻐﺎ ﻗﺎﺭﺷﻰ ﺋﻪﯓ ﺑﯜﻳﯜﻙ ﻣﯘﺟﺎﺩﯨﻠﻪ ﺋﯧﻠﯩﭗ ﺑﺎﺭﻏﺎﻥ ﻗﻪﻫﺮﯨﻤﺎﻧﻼﺭﺩﯨﻦ ﺑﯩﺮﻯ ﺋﻮﺳﻤﺎﻥ ﺑﺎﺗﯘﺭﺩﯗﺭ. ﺧﯩﺘﺎﻱ ﻫﯚﻛﯜﻣﯩﺘﻰ ﺋﻮﺳﻤﺎﻥ ﺑﺎﺗﯘﺭﻧﯩﯔ ﺋﯩﺴﻤﯩﺪﯨﻦ ﺑﯜﮔﯜﻧﻤﯘ ﻗﻮﺭﻗﻤﺎﻗﺘﺎ. ﺑﯘﻧﯩﯔ ﺳﻪﯞﻩﺑﻰ ﺋﯘﻻﺭ ﺗﯜﺭﻛﯩﻴﯩﺪﯨﻜﻰ، ﻳﺎﯞﺭﻭﭘﺎﺩﯨﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻧﻠﯩﻖ ﻗﺎﺯﺍﻗﻼﺭﻧﻰ ﺧﯩﺘﺎﻱ ﺋﻪﻟﭽﯩﻠﯩﻜﻠﯩﺮﯨﻨﯩﯔ ﺋﺎﻟﺪﯨﺪﺍ ﺧﯩﺘﺎﻳﻐﺎ ﻗﺎﺭﺷﻰ ﻧﺎﻣﺎﻳﯩﺶ ﻗﯩﻠﻤﯩﺴﯘﻥ، ﺩﻩﭖ ﺋﯧﺴﯩﻞ ﺋﺎﺷﺨﺎﻧﯩﻼﺭﻏﺎ ﭼﺎﻗﯩﺮﯨﭗ ﻣﯧﻬﻤﺎﻥ ﻗﯩﻠﻤﺎﻗﺘﺎ.

ﻫﻪﺭ ﻳﯩﻠﻰ 2-3 ﻗﺎﺯﺍﻗﻨﯩﯔ ﭘﯜﺗﯜﻥ ﭼﯩﻘﯩﻤﯩﻨﻰ ﺑﯧﺮﯨﭗ ﺧﯩﺘﺎﻳﻐﺎ ﺋﺎﭘﯩﺮﯨﭗ ﺋﺎﻳﻼﻧﺪﯗﺭﯨﯟﺍﺗﯩﺪﯗ. ﻳﯧﻘﯩﻨﺪﺍ ﺋﺎﻟﻐﺎﻥ ﻣﻪﻟﯘﻣﺎﺗﻼﺭﻏﺎ ﻗﺎﺭﯨﻐﺎﻧﺪﺍ، ﺑﯘ ﻳﯩﻞ 20 ﻧﻪﭘﻪﺭ ﺋﻪﺗﺮﺍﭘﯩﺪﯨﻜﻰ ﻗﺎﺯﺍﻗﻨﻰ ﺧﯩﺘﺎﻳﻐﺎ ﺋﺎﭘﯩﺮﯨﭗ ﺋﺎﻳﻼﻧﺪﯗﺭﻏﺎﻥ. ﻣﻪﻧﭽﻪ ﺑﯘﻧﯩﯔ ﺳﻪﯞﻩﺑﻰ ﺧﯩﺘﺎﻱ 2008 - ﻳﯩﻠﻰ ﺑﯧﻴﺠﯩﯖﺪﺍ ﺋﯧﭽﯩﻠﯩﺪﯨﻐﺎﻥ ﺋﻮﻟﯩﻤﭙﯩﻚ ﻣﯘﺳﺎﺑﯩﻘﯩﺴﯩﻨﻰ ﻗﺎﺯﺍﻕ ﺗﻪﺷﻜﯩﻼﺗﻠﯩﺮﯨﻨﯩﯔ ﺋﻪﻳﯩﺒﻠﯩﺸﯩﻨﯩﯔ ﺋﺎﻟﺪﯨﻨﻰ ﺋﯧﻠﯩﺶ ﺷﯘﻧﺪﺍﻗﻼ ﺋﯚﺯﯨﻨﯩﯔ ﺋﯩﻨﺴﺎﻥ ﻫﻪﻗﻠﯩﺮﻯ ﺩﻩﭘﺴﻪﻧﺪﯨﻠﯩﺮﯨﻨﻰ ﻳﯧﭙﯩﺸﺘﯩﻦ ﺋﯩﺒﺎﺭﻩﺕ. ﻣﻪﻧﭽﻪ ﭘﯜﺗﯜﻥ ﺩﯗﻧﻴﺎﺩﯨﻜﻰ ﺷﻪﺭﻗﯩﻲ ﺗﯜﺭﻛﯩﺴﺘﺎﻥ ﺗﻪﺷﻜﯩﻼﺗﻠﯩﺮﻯ ﺋﻮﺳﻤﺎﻥ ﺑﺎﺗﯘﺭﻧﯩﯔ ﺋﯩﺶ - ﺋﯩﺰﻟﯩﺮﯨﻨﻰ ﻳﺎﺵ - ﺋﯚﺳﻤﯜﺭﻟﻪﺭﮔﻪ ﯞﻩ ﺩﯗﻧﻴﺎ ﺟﺎﻣﺎﺋﻪﺗﭽﯩﻠﯩﻜﯩﮕﻪ ﺋﺎﯕﻠﯩﺘﯩﺶ ﺋﺎﺭﻗﯩﻠﯩﻖ ﺑﯩﺰﻧﯩﯔ ﻫﻪﻗﻠﯩﻖ ﺩﺍﯞﺍﻳﯩﻤﯩﺰﻧﻰ ﻛﯜﭼﻪﻳﺘﯩﺸﯩﻤﯩﺰ ﻛﯧﺮﻩﻙ." (ﺋﻪﺭﻛﯩﻦ ﺗﺎﺭﯨﻢ)