ﺋﯜﺭﯛﻣﭽﯩﺪﻩ ﻳﯜﺯ ﺑﻪﺭﮔﻪﻥ ﺋﻮﺕ ﺋﺎﭘﯩﺘﯩﺪﻩ 3 ﺋﻮﺕ ﺋﯚﭼﯜﺭﮔﯜﭼﻰ ﺋﯚﻟﺪﻯ

• ﻣﯘﺧﺒﯩﺮﯨﻤﯩﺰ ﺋﻪﺭﻛﯩﻨﻨﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻳﺪﯨﻜﻰ ﺋﻮﺕ ﻛﻪﺗﻜﻪﻥ ﺑﯩﺮ ﺯﺍﯞﯗﺗﺘﯩﻨﯩﯔ ﻛﯚﺭﯛﻧﯜﺷﻰ. AFP Photo

ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﻣﻪﺭﻛﯩﺰﻯ ﺋﯜﺭﯛﻣﭽﯩﺪﯨﻜﻰ ﭼﺎﺭﺷﻪﻧﺒﻪ ﻛﯜﻧﻰ ﺋﻮﺕ ﺋﺎﭘﯩﺘﻰ ﻳﯜﺯ ﺑﻪﺭﮔﻪﻥ ﺳﻮﺩﺍ ﺳﺎﺭﯨﻴﻰ - ﺩﯦﺨﯘﻱ ﺧﻪﻟﻘﺌﺎﺭﺍ ﺳﻮﺩﺍ ﺳﺎﺭﯨﻴﻰ ﺑﻮﻟﯘﭖ، ﺋﯜﺭﯛﻣﭽﻰ ﺟﻪﻧﻮﺑﯩﻲ ﭘﻮﻳﯩﺰ ﺋﯩﺴﺘﺎﻧﺴﯩﺴﯩﻨﯩﯔ ﻗﺎﺭﺷﯩﺴﯩﺪﯨﻜﻰ 12 ﻗﻪﯞﻩﺗﻠﯩﻚ ﻣﻪﺯﻛﯘﺭ ﺳﺎﺭﺍﻱ ﺋﯜﺭﯛﻣﭽﯩﺪﯨﻜﻰ ﯞﯦﻨﺠﯘﻟﯘﻗﻼﺭﻧﯩﯔ ﻣﯩﻠﯩﭻ ﻣﺎﻟﻼﺭ، ﻛﯩﻴﯩﻢ - ﻛﯧﭽﻪﻙ، ﮔﯩﺮﯨﻢ ﺑﯘﻳﯘﻣﻠﯩﺮﯨﻨﻰ ﺗﻮﭖ ﺗﺎﺭﻗﯩﺘﯩﺶ ﺑﺎﺯﯨﺮﻯ ﺋﯩﺪﻯ.

ﺑﻪﺯﻯ ﺧﻪﯞﻩﺭﻟﻪﺭﺩﻩ ﺋﯩﻜﻜﻰ ﭘﯘﻗﺮﺍﻧﯩﯔ ﭼﯩﻘﯩﻢ ﺑﻮﻟﻐﺎﻧﻠﯩﻘﻰ ﺋﯩﻠﮕﯩﺮﻯ ﺳﯜﺭﯛﻟﻤﻪﻛﺘﻪ

ﺋﻮﺕ ﺋﺎﭘﯩﺘﯩﺪﻩ ﺳﻮﺩﺍ ﺳﺎﺭﯨﻴﻰ ﭘﯜﺗﯜﻧﻠﻪﻱ ﯞﻩﻳﺮﺍﻥ ﺑﻮﻟﻐﺎﻥ ﺑﻮﻟﯘﭖ، ﺋﻮﺕ ﺳﻮﺩﺍ ﺳﺎﺭﯨﻴﻰ ﺑﯩﻠﻪﻥ ﺑﯩﺮ ﺑﯩﻨﺎﺩﯨﻜﻰ ﺩﯦﺨﯘﻱ ﻣﯧﻬﻤﺎﻧﺨﺎﻧﯩﺴﻰ ﯞﻩ ﺳﻮﺩﺍ ﺳﺎﺭﺍﻳﻨﯩﯔ ﻳﯧﻨﯩﺪﯨﻜﻰ ﺋﯜﺭﯛﻣﭽﻰ ﻣﯧﻬﻤﺎﻧﺨﺎﻧﯩﺴﯩﻐﺎ ﺗﯘﺗﺎﺷﻘﺎﻥ. ﺑﯩﺰ ﺋﻪﻫﯟﺍﻟﻨﻰ ﺋﯩﮕﯩﻠﻪﺵ ﻣﻪﻗﺴﯩﺘﯩﺪﻩ ﺩﯦﺨﯘﻱ ﻣﯧﻬﻤﺎﻧﺨﺎﻧﯩﺴﯩﻐﺎ ﺗﯧﻠﯧﻔﻮﻥ ﻗﯩﻠﻐﺎﻥ ﺑﻮﻟﺴﺎﻗﻤﯘ، ﻟﯧﻜﯩﻦ ﻣﯧﻬﻤﺎﻧﺨﺎﻧﯩﻨﯩﯔ ﺑﺎﺵ ﺋﺎﭘﭙﺎﺭﺍﺗﯩﺪﺍ ﺗﯧﻠﯧﻔﻮﻧﯩﻤﯩﺰﻧﻰ ﺋﺎﻟﯩﺪﯨﻐﺎﻥ ﺋﺎﺩﻩﻡ ﭼﯩﻘﻤﯩﺪﻯ. ﺧﻪﯞﻩﺭﻟﻪﺭﺩﻩ ﻣﯧﻬﻤﺎﻧﺨﺎﻧﯩﺪﯨﻜﻰ ﺧﯩﺰﻣﻪﺗﭽﻰ ﺧﺎﺩﯨﻤﻼﺭ ﯞﻩ ﻳﻮﻟﯘﭼﯩﻼﺭﻧﯩﯔ ﺳﺎﻻﻣﻪﺕ ﺗﺎﺭﻗﺎﻗﻼﺷﺘﯘﺭﯗﻟﻐﺎﻧﻠﯩﻘﻰ ﺑﯩﻠﺪﯛﺭﯛﻟﻤﻪﻛﺘﻪ.

ﻳﻪﺭﻟﯩﻚ ﻣﻪﺗﺒﯘﺋﺎﺗﻼﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﺋﻮﺕ ﺋﺎﭘﯩﺘﻰ ﭼﺎﺭﺷﻪﻧﺒﻪ ﻛﯜﻧﻰ ﻛﻪﭺ ﺳﺎﺋﻪﺕ 8:00 ﻟﻪﺭﺩﻩ ﺗﯘﺗﺎﺷﻘﺎﻥ ﺑﻮﻟﯘﭖ، ﺋﻮﺕ ﺋﯚﭼﯜﺭﮔﯜﭼﯩﻠﻪﺭ 20 ﺳﺎﺋﻪﺗﻠﯩﻚ ﺟﯩﺪﺩﯨﻲ ﻗﯘﺗﻘﯘﺯﯗﺵ ﻧﻪﺗﯩﺠﯩﺴﯩﺪﻩ ﺋﻮﺗﻨﻰ ﺋﻪﺗﯩﺴﻰ ﺳﺎﺋﻪﺕ 4:00 ﻟﻪﺭﺩﻩ ﺋﺎﺭﺍﻥ ﺗﯩﺰﮔﯩﻨﻠﯩﮕﻪﻥ. ﻟﯧﻜﯩﻦ ﺑﯘ ﺟﻪﺭﻳﺎﻧﺪﺍ 3 ﻧﻪﭘﻪﺭ ﺋﯚﺕ ﺋﯚﭼﯜﺭﮔﯜﭼﻰ ﺧﺎﺩﯨﻢ ﺋﯚﻟﮕﻪﻥ.

ﻳﻪﻧﻪ ﺑﻪﺯﻯ ﺧﻪﯞﻩﺭﻟﻪﺭﺩﻩ ﺋﯩﻜﻜﻰ ﭘﯘﻗﺮﺍﻧﯩﯔ ﭼﯩﻘﯩﻢ ﺑﻮﻟﻐﺎﻧﻠﯩﻘﻰ ﺋﯩﻠﮕﯩﺮﻯ ﺳﯜﺭﯛﻟﻤﻪﻛﺘﻪ. ﺑﯩﺰ ﺋﯩﻠﮕﯩﺮﯨﻠﯩﮕﻪﻥ ﻫﺎﻟﺪﺍ ﺋﻪﻫﯟﺍﻟﻨﻰ ﺋﯩﮕﯩﻠﻪﺵ ﺋﯜﭼﯜﻥ ﺳﺎﻳﺒﺎﻍ ﺭﺍﻳﻮﻧﯩﺪﯨﻜﻰ ﺋﻮﺕ ﺋﯚﭼﯜﺭﯛﺵ ﭘﻮﻧﻜﯩﺘﯩﻐﺎ ﺗﯧﻠﯧﻔﻮﻥ ﻗﯩﻠﻐﺎﻥ ﺑﻮﻟﺴﺎﻗﻤﯘ، ﻟﯧﻜﯩﻦ ﺗﯧﻠﯧﻔﻮﻧﯩﻤﯩﺰﻧﻰ ﺋﺎﻟﻐﺎﻥ ﺋﻮﺕ ﺋﯚﭼﯜﺭﯛﺵ ﭘﻮﻧﻜﯩﺘﯩﺪﯨﻜﻰ ﺧﺎﺩﯨﻢ ﯞﻩﻗﻪﻧﯩﯔ ﺗﻪﭘﺴﯩﻠﯩﻲ ﺋﻪﻫﯟﺍﻟﻰ ﺗﻮﻏﺮﯨﺴﯩﺪﺍ ﻣﻪﻟﯘﻣﺎﺕ ﺑﯧﺮﯨﺸﻨﻰ ﺭﻩﺕ ﻗﯩﻠﺪﻯ. ﺋﯘ ﺑﯘ ﻫﻪﻗﺘﯩﻜﻰ ﺳﯘﺋﺎﻟﯩﻤﯩﺰﻏﺎ "ﯞﻩﻗﻪ ﺗﻮﻏﺮﯨﺴﯩﺪﺍ ﻣﻪﺧﺴﯘﺱ ﻣﻪﻟﯘﻣﺎﺕ ﺑﯧﺮﯨﺶ ﻳﯩﻐﯩﻨﻰ ﺋﺎﭼﯩﻤﯩﺰ، ﻫﺎﺯﯨﺮﭼﻪ ﺑﯘ ﻣﻪﺳﯩﻠﯩﻨﻰ ﺗﯩﻠﻐﺎ ﺋﯧﻠﯩﺸﻘﺎ ﺑﻮﻟﻤﺎﻳﺪﯗ. ﺋﻮﺕ ﻛﯧﺘﯩﺸﻨﯩﯔ ﺳﻪﯞﻩﺑﻰ ﺗﻪﻛﺸﯜﺭﯛﻟﯜﯞﺍﺗﯩﺪﯗ. ﻫﺎﺯﯨﺮﭼﻪ ﭘﯘﻗﺮﺍﻻﺭﻧﯩﯔ ﺋﯚﻟﮕﻪﻧﻠﯩﻜﻰ ﺗﻮﻏﺮﯨﺴﯩﺪﺍ ﻛﻮﻧﻜﺮﯦﺖ ﻣﻪﻟﯘﻣﺎﺕ ﻛﻪﻟﻤﯩﺪﻯ. ﺑﯘ ﺋﯩﺸﻼﺭﻧﻰ ﺳﻮﺭﯨﻤﺎﯓ. ﺗﻪﭘﺴﯩﻠﯩﻲ ﺋﻪﻫﯟﺍﻟﻼﺭ ﻣﻪﻟﯘﻣﺎﺕ ﺑﯧﺮﯨﺶ ﻳﯩﻐﯩﻨﯩﺪﺍ ﺋﯧﻼﻥ ﻗﯩﻠﯩﻨﯩﺪﯗ " ﺩﻩﭖ ﺟﺎﯞﺍﺏ ﺑﻪﺭﺩﻯ.

ﯞﺍﯓ ﻟﯧﭽﯜﻩﻥ ﯞﻩ ﻧﯘﺭ ﺑﻪﻛﺮﻯ ﻧﻪﻕ ﻣﻪﻳﺪﺍﻧﺪﺍ ﻳﯩﺘﻪﻛﭽﯩﻠﯩﻚ ﻗﯩﻠﺪﻯ

ﺷﯩﻨﺨﯘﺍ ﺋﺎﺧﺒﺎﺭﺍﺕ ﺋﺎﮔﯧﻨﺘﻠﯩﻘﻰ ﭘﻪﻳﺸﻪﻧﺒﻪ ﻛﯜﻧﻰ ﺑﻪﺭﮔﻪﻥ ﺑﯩﺮ ﺧﻪﯞﯨﺮﯨﺪﻩ ﺋﻮﺕ ﺗﯘﺗﺎﺷﻘﺎﻥ ﻳﻪﺭﻧﯩﯔ ﺋﯧﻨﯩﻘﻼﻧﻐﺎﻧﻠﯩﻘﯩﻨﻰ، ﺋﻮﺕ ﺑﯩﻨﺎﻧﯩﯔ ﻳﻪﺭ ﺋﺎﺳﺘﻰ 1 - ﻗﻪﯞﯨﺘﯩﺪﻩ ﺑﺎﺷﻼﻧﻐﺎﻧﻠﯩﻘﯩﻨﻰ ﺋﯩﻠﮕﯩﺮﻯ ﺳﯜﺭﮔﻪﻥ ﺑﻮﻟﺴﯩﻤﯘ، ﻟﯧﻜﯩﻦ ﺋﻮﺕ ﻛﯧﺘﯩﺶ ﺳﻪﯞﻩﺑﻰ ﺗﻮﻏﺮﯨﺴﯩﺪﺍ ﻳﻪﻧﯩﻼ ﺑﯩﺮ ﻧﯧﻤﻪ ﺩﯦﻤﯩﮕﻪﻥ. ﺩﯦﺨﯘﻱ ﺧﻪﻟﻘﺌﺎﺭﺍ ﺳﻮﺩﺍ ﺳﺎﺭﯨﻴﻰ ﺑﯩﺮ ﯞﯦﻨﺠﯘﻟﯘﻗﻨﯩﯔ ﺋﯩﮕﯩﺪﺍﺭﭼﯩﻠﯩﻘﯩﺪﯨﻜﻰ ﺑﯩﻨﺎ ﺑﻮﻟﯘﭖ، ﺋﯘ 380 ﻣﯩﻠﻴﻮﻥ ﻳﯜﻩﻥ ﻣﻪﺑﻠﻪﻍ ﺳﯧﻠﯩﭗ ﻗﯘﺭﻏﺎﻥ ﺋﻮﻣﯘﻣﻰ ﻛﯚﻟﯩﻤﻰ 100 ﻣﯩﯔ ﻛﯟﺍﺩﺭﺍﺕ ﻣﯧﺘﯩﺮ ﭼﻮﯕﻠﯘﻗﺘﯩﻜﻰ ﺑﯘ ﺑﯩﻨﺎ 2003 - ﻳﯩﻠﻰ ﺗﯩﺠﺎﺭﻩﺕ ﺑﺎﺷﻠﯩﻐﺎﻥ.

ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﺪﺍ ﺗﻮﭖ ﺗﺎﺭﻗﯩﺘﯩﻠﯩﺪﯨﻐﺎﻥ ﺑﺎﻟﯩﻼﺭ ﻛﯩﻴﯩﻢ ‏- ﻛﯧﭽﻪﻛﻠﯩﺮﯨﻨﯩﯔ %95 ﻧﻰ، ﺑﺎﻟﯩﻼﺭ ﺋﺎﻳﺎﻍ ﻛﯩﻴﯩﻤﻰ ﯞﻩ ﺑﺎﻟﯩﻼﺭ ﺋﻮﻳﯘﻧﭽﯘﻗﻠﯩﺮﯨﻨﯩﯔ % 50 ﻧﻰ ﺩﯦﺨﯘﻱ ﺳﻮﺩﺍ ﺳﺎﺭﯨﻴﻰ ﺗﺎﺭﻗﯩﺘﺎﺗﺘﻰ. ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﺩﺍﺋﯩﺮﯨﻠﻪﺭ ﺩﯦﺨﯘﻱ ﺧﻪﻟﻘﺌﺎﺭﺍ ﺳﻮﺩﺍ ﺳﺎﺭﯨﻴﯩﺪﯨﻜﻰ ﺋﻮﺗﻨﻰ ﺋﯚﭼﯜﺭﯛﺷﻜﻪ 63 ﺋﻮﺕ ﺋﯚﭼﯜﺭﯛﺵ ﻣﺎﺷﯩﻨﯩﺴﻰ، 236 ﺋﻮﺕ ﺋﯚﭼﯜﺭﮔﯜﭼﻰ، 539 ﻧﻪﭘﻪﺭ ﺳﺎﻗﭽﻰ، 420 ﮊﺍﻧﺪﺍﺭﻣﯩﻨﻰ ﺳﻪﭘﻪﺭﯞﻩﺭ ﻗﯩﻠﯩﭙﻼ ﻗﺎﻟﻤﺎﻱ، ﻳﻪﻧﻪ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﭘﺎﺭﺗﻜﻮﻣﯩﻨﯩﯔ ﺳﯧﻜﺮﯨﺘﺎﺭﻯ ﯞﺍﯓ ﻟﯧﭽﯜﻩﻥ ﯞﻩ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﯩﻨﯩﯔ ﻳﯧﯖﻰ ﻣﯘﯞﻩﻗﻘﻪﺕ ﺭﻩﺋﯩﺴﻰ ﻧﯘﺭ ﺑﻪﻛﺮﯨﻠﻪﺭ ﺋﻮﺕ ﺋﯚﭼﯜﺭﯛﺷﻜﻪ ﻧﻪﻕ ﻣﻪﻳﺪﺍﻧﺪﺍ ﻳﯩﺘﻪﻛﭽﯩﻠﯩﻚ ﻗﯩﻠﺪﻯ.

ﺧﻪﯞﻩﺭﻟﻪﺭﮔﻪ ﻗﺎﺭﯨﻐﺎﻧﺪﺍ، ﯞﻩﻗﻪﺩﻩ ﺋﯚﻟﮕﻪﻥ 3 ﻧﻪﭘﻪﺭ ﺋﻮﺕ ﺋﯚﭼﯜﺭﮔﯜﭼﻰ، ﺋﻮﺕ ﺋﯚﭼﯜﺭﯛﺵ ﺋﻪﺗﺮﯨﺘﯩﺪﻩ ﭘﺮﺍﻛﺘﯩﻜﺎ ﻗﯩﻠﯩﯟﺍﺗﻘﺎﻥ ﺋﻪﺳﻜﻪﺭﻟﻪﺭ ﺑﻮﻟﯘﭖ، ﻳﻪﻧﻪ ﺑﻪﺯﻯ ﺧﻪﯞﻩﺭﻟﻪﺭﺩﻩ ﻫﺎﺯﯨﺮﻏﺎ ﻗﻪﺩﻩﺭ 2 ﭘﯘﻗﺮﺍﻧﯩﯔ ﺋﯚﻟﮕﻪﻧﻠﯩﻜﻰ ﺑﯩﻠﺪﯛﺭﯛﻟﻤﻪﻛﺘﻪ. ﺩﯦﺨﯘﻱ ﺳﻮﺩﺍ ﺳﺎﺭﯨﻴﯩﻨﯩﯔ ﻳﯧﻨﯩﺪﯨﻜﻰ ﺷﻴﺎﯕﻴﯘ ﻣﯧﻬﻤﺎﻧﺨﺎﻧﯩﺴﯩﻨﯩﯔ ﺑﯩﺮ ﺧﺎﺩﯨﻤﻰ ﻣﯘﺧﺒﯩﺮﯨﻤﯩﺰﻧﯩﯔ ﺳﯘﺋﺎﻟﻠﯩﺮﯨﻐﺎ ﺟﺎﯞﺍﺏ ﺑﻪﺭﺩﻯ. ﺋﯘ، " ﺋﻮﺕ ﺋﺎﭘﯩﺘﻰ ﺑﯩﺰﻧﯩﯔ ﺗﯩﺠﺎﺭﯨﺘﯩﻤﯩﺰﮔﻪ ﺑﯩﺮ ﺋﺎﺯ ﺗﻪﺳﯩﺮ ﻗﯩﻠﻐﺎﻧﺪﻩﻙ ﻗﯩﻠﯩﺪﯗ. ﭘﯘﻗﺮﺍﻻﺭﺩﯨﻦ ﻗﺎﻧﭽﯩﻠﯩﻚ ﺋﺎﺩﻩﻡ ﺋﯚﻟﮕﻪﻧﻠﯩﻜﯩﻨﻰ ﺑﯩﻠﻤﻪﻳﻤﻪﻥ. ﻫﺎﺯﯨﺮ ﺋﻪﯓ ﺋﯜﺳﺘﯩﺪﯨﻜﻰ 2 ﻗﻪﯞﻩﺗﺘﻪ ﻳﻪﻧﻪ ﺑﯩﺮ ﺋﺎﺯ ﺋﻮﺕ ﻛﯚﻳﯜﯞﺍﺗﯩﺪﯗ. ﻟﯧﻜﯩﻦ ﻛﯚﭖ ﺋﻪﻣﻪﺱ. ﺋﻮﺕ ﺋﺎﺳﺎﺳﻪﻥ ﺋﯚﭼﯜﺭﯛﯞﯦﻠﯩﻨﺪﻯ. ﻣﻪﻥ 2 ﺋﻮﺕ ﺋﯚﭼﯜﺭﮔﯜﭼﯩﻨﯩﯔ ﺋﯚﻟﮕﻪﻧﻠﯩﻜﯩﻨﻰ ﺋﺎﯕﻠﯩﺪﯨﻢ، ﻟﯧﻜﯩﻦ ﭘﯘﻗﺮﺍﻻﺭﺩﯨﻦ ﺋﯚﻟﮕﻪﻥ - ﺋﯚﻟﻤﯩﮕﻪﻧﻠﯩﻜﯩﻨﻰ ﺑﯩﻠﻤﻪﻳﻤﻪﻥ. ﯞﻩﻗﻪﻧﻰ ﺗﯧﻠﯧﯟﯨﺰﻭﺭﻻﺭﺩﺍ ﺑﯧﺮﯨﯟﺍﺗﯩﺪﯗ. ﺋﻪﻣﻤﺎ ﺋﻮﺕ ﻛﯧﺘﯩﺶ ﺳﻪﯞﻩﺑﻰ ﻫﻪﻗﻘﯩﺪﻩ ﺑﯩﺮ ﻧﯧﻤﻪ ﺩﯦﻤﯩﺪﻯ. ﺷﯘﯕﺎ ﺑﯩﺰ ﺋﻮﺕ ﻛﯧﺘﯩﺶ ﺳﻪﯞﻩﺑﯩﻨﻰ ﺑﯩﻠﻤﻪﻳﻤﯩﺰ " ﺩﻩﭖ ﻛﯚﺭﺳﻪﺗﺘﻰ.

" ﺋﯜﺭﯛﻣﭽﯩﺪﻩ ﺳﻪﻧﺪﯗﯕﻠﯘﻗﻼﺭ ﺑﯩﻠﻪﻥ ﯞﯦﻨﺠﯘﻟﯘﻗﻼﺭﻧﯩﯔ ﺑﺎﺯﺍﺭ ﺗﺎﻟﯩﺸﯩﺶ ﻛﯜﺭﯨﺸﻰ ﺋﯚﺗﻜﯜﺭ"

ﯞﯦﻨﺠﯘﻟﯘﻗﻼﺭﻧﯩﯔ ﺋﯘﻳﻐﯘﺭ ﺋﯩﻠﯩﺪﯨﻜﻰ ﺳﻮﺩﺍ ﺗﺎﺭﯨﺨﯩﻨﻰ ﻳﺎﺧﺸﻰ ﺑﯩﻠﯩﺪﯨﻐﺎﻥ ﺋﯜﺭﯛﻣﭽﯩﺪﯨﻜﻰ ﺑﯩﺮ ﺳﻮﺩﯨﮕﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﯞﯦﻨﺠﯘﻟﯘﻗﻼﺭﻧﯩﯔ ﺋﯘﻳﻐﯘﺭ ﺋﯩﻠﯩﻐﺎ ﻛﯧﻠﯩﭗ ﺳﻮﺩﺍ ﻗﯩﻠﯩﺶ ﺗﺎﺭﯨﺨﯩﻲ 1880- ﻳﯩﻠﻼﺭﻏﺎ ﻗﻪﺩﻩﺭ ﻳﻪﻧﻰ ﻣﻪﻧﭽﯩﯔ ﺋﯩﺸﻐﺎﻟﯩﻴﻪﺗﭽﻰ ﺋﻪﻣﻪﻟﺪﺍﺭﻯ ﺯﯗ ﺯﯗﯕﺘﺎﯕﻨﯩﯔ ﻗﻪﺷﻘﻪﺭﯨﻴﻪ ﺩﯙﻟﯩﺘﯩﮕﻪ ﺗﺎﺟﺎﯞﯗﺯ ﻗﯩﻠﯩﺶ ﺩﻩﯞﺭﯨﮕﻪ ﻗﻪﺩﻩﺭ ﺳﻮﺯﯗﻟﯩﺪﯨﻜﻪﻥ. ﺧﯩﺘﺎﻳﻨﯩﯔ 1980 - ﻳﯩﻠﻼﺭﺩﯨﻜﻰ ﺋﯩﺴﻼﻫﺎﺕ ﺩﻩﯞﺭﯨﺪﻩ ﻗﻪﺩ ﻛﯚﺗﻪﺭﮔﻪﻥ ﯞﯦﻨﺠﯘﻟﯘﻗﻼﺭ ﻧﺎﻫﺎﻳﯩﺘﻰ ﺗﯧﺰﻻ ﺋﯘﻳﻐﯘﺭ ﺋﯧﻠﯩﻨﯩﯔ ﺳﻮﺩﺍ ﺑﺎﺯﯨﺮﯨﻨﻰ ﺋﯩﮕﯩﻠﯩﮕﻪﻥ ﺑﻮﻟﯘﭖ، 1990 - ﻳﯩﻠﻼﺭﻏﺎ ﻛﻪﻟﮕﻪﻧﺪﻩ ﯞﺍﯓ ﻟﯧﭽﯜﻩﻥ ﻫﯩﻤﺎﻳﯩﺴﯩﺪﯨﻜﻰ ﺳﻪﻧﺪﯗﯕﻠﯘﻗﻼﺭﻧﯩﯔ ﯞﯦﻨﺠﯘﻟﯘﻗﻼﺭ ﺑﯩﻠﻪﻥ ﺑﺎﺯﺍﺭ ﺗﺎﻟﯩﺸﯩﺶ ﻛﯜﺭﯨﺸﻰ ﺋﯚﺗﻜﯜﺭﻟﻪﺷﻜﻪﻥ. ﺋﯜﺭﯛﻣﭽﯩﺪﯨﻜﻰ ﺑﯘ ﺳﻮﺩﯨﮕﻪﺭ ﺯﺍﺕ، "ﺩﯦﺨﯘﻱ ﺳﻮﺩﺍ ﺳﺎﺭﯨﻴﯩﺪﯨﻜﻰ ﺋﻮﺕ ﺋﺎﭘﯩﺘﻰ ﯞﯦﻨﺠﯘﻟﯘﻗﻼﺭﻏﺎ ﺋﯧﻐﯩﺮ ﺯﻩﺭﺑﻪ ﺑﻮﻟﺪﻯ" ﺩﻩﻳﺪﯗ.

ﻛﯜﺯﻩﺗﻜﯜﭼﯩﻠﻪﺭﻧﯩﯔ ﺋﻪﺳﻜﻪﺭﺗﯩﺸﯩﭽﻪ، ﻣﻪﺯﻛﯘﺭ ﺋﻮﺕ ﺋﺎﭘﯩﺘﻰ ﺋﯘﻳﻐﯘﺭ ﺋﺎﭘﺘﻮﻧﻮﻡ ﺭﺍﻳﻮﻧﻰ ﺑﯩﻠﻪﻥ ﻣﯘﻧﺎﺳﯩﯟﻩﺗﻠﯩﻚ ﻳﻪﻛﻜﻪ ﺗﯩﺠﺎﺭﻩﺗﭽﯩﻠﻪﺭ ﺑﺎﺯﯨﺮﯨﻨﯩﯔ 2 - ﻗﯧﺘﯩﻢ ﺯﻭﺭ ﻛﯚﻟﻪﻣﻠﯩﻚ ﺋﯩﻘﺘﯩﺴﺎﺩﻯ ﺗﺎﻻﭘﻪﺗﻜﻪ ﺋﯘﭼﺮﺍﺵ ﯞﻩﻗﻪﺳﯩﺪﯗﺭ. 2002 - ﻳﯩﻠﻰ ﻗﯩﺮﻏﯩﺰﯨﺴﺘﺎﻧﻨﯩﯔ ﺑﯧﺸﻜﻪﻙ ﺷﻪﻫﯩﺮﯨﺪﯨﻜﻰ ﺗﻮﺭ ﺑﺎﺯﺍ ﺳﻮﺩﺍ ﻣﻪﺭﻛﯩﺰﯨﺪﻩ ﻳﯜﺯ ﺑﻪﺭﮔﻪﻥ ﺳﻪﯞﻩﺑﻰ ﻫﺎﺯﯨﺮﻏﺎ ﻗﻪﺩﻩﺭ ﻧﺎﻣﻪﻟﯘﻡ ﺑﯩﺮ ﺋﻮﺕ ﺋﺎﭘﯩﺘﯩﺪﻩ ﺋﯘﻳﻐﯘﺭ ﺳﻮﺩﯨﮕﻪﺭﻟﻪﺭﻧﯩﯔ ﭘﯜﺗﯜﻥ ﻣﯧﻠﻰ ﻛﯚﻳﯜﭖ ﺗﯜﮔﯩﮕﻪﻥ ﺑﻮﻟﯘﭖ، ﺋﯘﻻﺭﻧﯩﯔ ﺯﯨﻴﯩﻨﯩﻐﺎ ﺋﻪﻳﻨﻰ ﭼﺎﻏﺪﺍ ﻫﯧﭽﻜﯩﻢ ﺋﯩﮕﻪ ﺑﻮﻟﻤﯩﺪﻯ. ﻛﯚﺯﻩﺗﻜﯜﭼﯩﻠﻪﺭ، ﺑﯘ ﻗﯧﺘﯩﻤﻘﻰ ﺋﻮﺕ ﺋﺎﭘﯩﺘﯩﺪﻩ ﯞﯦﻨﺠﯘﻟﯘﻗﻼﺭﻧﯩﯔ ﺯﯨﻴﯩﻨﯩﻨﻰ ﻛﯩﻤﻨﯩﯔ ﺗﯚﻟﻪﻳﺪﯨﻐﺎﻧﻠﯩﻘﻰ ﯞﻩ ﻫﯚﻛﯜﻣﻪﺗﻨﯩﯔ ﺑﯘ ﻣﻪﺳﯩﻠﯩﺪﯨﻜﻰ ﺳﯩﻴﺎﺳﯩﺘﯩﮕﻪ ﺩﯨﻘﻘﻪﺕ ﻗﯩﻠﻤﺎﻗﺘﺎ. (ﺋﻪﺭﻛﯩﻦ)