ﺋﻮﺕ ﻳﺎﻟﻘﯘﻧﻰ ﻛﯚﺗﯜﺭﯛﭖ ﭼﯩﻘﻘﺎﻥ ﻣﻪﺳﯩﻠﯩﻠﻪﺭ

• ﻣﯘﺧﺒﯩﺮﯨﻤﯩﺰ ﺷﯚﻫﺮﻩﺕ ﻫﻮﺷﯘﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﺧﯩﺘﺎﻳﺪﯨﻜﻰ ﺋﻮﺕ ﻛﻪﺗﻜﻪﻥ ﺑﯩﺮ ﺯﺍﯞﯗﺗﺘﯩﻨﯩﯔ ﻛﯚﺭﯛﻧﯜﺷﻰ. AFP Photo

ﺋﯜﺭﯛﻣﭽﻰ ﺷﻪﻫﯩﺮﯨﺪﯨﻜﻰ ﺩﯨﺨﯘﻱ ﺧﻪﻟﻘﺌﺎﺭﺍ ﺳﻮﺩﺍ ﻣﻪﺭﻛﯩﺰﯨﮕﻪ ﺋﻮﺕ ﻛﻪﺗﻜﻪﻧﺪﯨﻦ ﻛﯧﻴﯩﻦ، ﺧﯩﺘﺎﻱ ﻣﻪﺗﺒﯘﺋﺎﺗﻠﯩﺮﯨﺪﺍ، ﺑﯘ ﺋﺎﭘﻪﺗﻨﯩﯔ ﻣﻪﺳﺌﯘﻟﯩﻴﯩﺘﻰ ﺗﻮﻏﺮﯨﻠﯩﻖ ﺗﯜﺭﻟﯜﻙ ﺋﯩﻨﻜﺎﺳﻼﺭ ﺋﻮﺗﺘﯘﺭﯨﻐﺎ ﭼﯩﻘﻤﺎﻗﺘﺎ. ﺑﯘﻻﺭﻧﯩﯔ ﺋﯩﭽﯩﺪﻩ ﺩﯨﻘﻘﻪﺗﻨﻰ ﺗﺎﺭﺗﯩﺪﯨﻐﯩﻨﻰ، ﺋﯚﺯﯨﻨﻰ ﺋﯜﺭﯛﻣﭽﻰ ﺷﻪﻫﻪﺭﻟﯩﻚ ﻫﯚﻛﯜﻣﻪﺗﻨﯩﯔ ﻛﺎﺩﯨﺮﻯ ﺩﻩﭖ ﺗﻮﻧﯘﺷﺘﯘﺭﻏﺎﻥ ﺑﯩﺮ ﻧﺎﻣﺴﯩﺰ ﺋﺎﭘﺘﻮﺭﻧﯩﯔ ﻳﺎﺯﻏﺎﻧﻠﯩﺮﯨﺪﯗﺭ. ﺋﺎﭘﺘﻮﺭ ﺧﯧﺘﯩﺪﻩ، ﺑﯘ ﻗﯧﺘﯩﻤﻘﻰ ﺋﻮﺕ ﺋﺎﭘﯩﺘﻰ، ﺧﯩﻴﺎﻧﻪﺗﭽﻰ ﺋﻪﻣﻪﻟﺪﺍﺭ ﺑﯩﻠﻪﻥ ﻣﻪﻛﻜﺎﺭ ﺳﻮﺩﯨﮕﻪﺭﻧﯩﯔ ﺷﯧﺮﯨﻜﭽﯩﻠﯩﻜﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﭘﺎﺟﯩﺌﻪﺩﯗﺭ ﺩﻩﭖ ﭘﺎﺵ ﻗﯩﻠﻐﺎﻥ.

ﺩﯨﺨﯘﻳﻨﯩﯔ ﺩﯨﺮﯦﻜﺘﻮﺭﻯ ﯞﺍﯕﻠﯧﭽﯘﻩﻧﻨﯩﯔ ﻗﯘﺩﯨﺴﻰ

ﻣﻪﺯﻛﯘﺭ ﺧﻪﺗﺘﻪ ﭘﺎﺵ ﻗﯩﻠﯩﻨﯩﺸﯩﭽﻪ، ﺩﯨﺨﯘﻱ ﺷﯩﺮﻛﯩﺘﯩﻨﯩﯔ ﺩﯨﺮﯦﻜﺘﻮﺭﯨﻨﯩﯔ ﻗﯩﺰﻯ ﯞﺍﯓ ﻟﯧﭽﯜﻩﻧﻨﯩﯔ ﻛﯧﻠﯩﻨﻰ. ﺩﯨﺨﯘﻱ ﮔﯘﺭﯗﻫﯩﻨﯩﯔ ﻗﻪﺩ ﻛﯚﺗﯜﺭﯛﺵ ﺳﻪﯞﻩﺑﻰ ﻗﯘﺩﺍ-ﺑﺎﺟﯩﻠﯩﻖ ﻣﯘﻧﺎﺳﯩﯟﻩﺗﻜﻪ ﺗﺎﻳﯩﻨﯩﭗ ﺗﯘﺭﯗﭖ ﺩﯙﻟﻪﺗﻨﯩﯔ ﻣﯜﻟﻜﯩﻨﻰ ﭼﺎﯕﮕﯩﻠﯩﻐﺎ ﺋﯧﻠﯩﯟﯦﻠﯩﺶ ﺑﯩﻠﻪﻥ ﺑﺎﺷﻼﻧﻐﺎﻥ. ﺑﯘ ﮔﯘﺭﯗﻫ،ﺩﯙﻟﻪﺕ ﺋﯩﮕﯩﻠﯩﻜﯩﺪﯨﻜﻰ ﺷﯩﻨﺠﺎﯓ ﺗﯜﺭﻟﯜﻙ ﻣﺎﻟﻼﺭ ﺷﯩﺮﻛﯩﺘﯩﻨﻰ ﻣﻪﺟﺒﯘﺭﯨﻲ ﺳﯧﺘﯩﯟﺍﻟﻐﺎﻥ، ﻣﻪﺯﻛﯘﺭ ﺷﯩﺮﻛﻪﺗﻨﯩﯔ ﺋﯩﺸﭽﻰ- ﺧﯩﺰﻣﻪﺗﭽﯩﻠﯩﺮﻯ ﺗﯧﮕﯩﺸﻠﯩﻚ ﻗﯘﺗﻘﯘﺯﯗﺵ ﺧﯩﺮﺍﺟﻪﺗﻠﯩﺮﯨﮕﻪ ﺗﯧﺨﯩﭽﻪ ﺋﯧﺮﯨﺸﻪﻟﻤﯩﮕﻪﻥ.

ﺩﯨﺨﯘﻱ ﮔﯘﺭﯗﻫﻰ ﺳﺎﻫﯩﺒﯩﻨﯩﯔ ﯞﺍﯓ ﻟﯧﭽﯘﻩﻥ ﺑﯩﻠﻪﻥ ﻗﯘﺩﺍ-ﺑﺎﺟﯩﻠﯩﻖ ﻣﯘﻧﺎﺳﯩﯟﯨﺘﻰ ﺳﻪﯞﻩﺑﯩﺪﯨﻦ، ﺋﻮﺕ ﻛﻪﺗﻜﻪﻥ ﺳﻮﺩﺍ ﻣﻪﺭﻛﯩﺰﯨﻨﯩﯔ، ﺋﻮﺕ ﻣﯘﺩﺍﭘﯩﺌﻪﻟﯩﻨﯩﺶ ﺋﺎﺟﯩﺰﻟﯩﻘﯩﻐﺎ ﻛﯚﺯ ﻳﯘﻣﯘﻟﻐﺎﻥ. ﺋﻮﺗﺘﯩﻦ ﻣﯘﺩﺍﭘﯩﺌﻪﻟﯩﻨﯩﺸﻨﻰ ﻧﺎﺯﺍﺭﻩﺕ ﻗﯩﻠﯩﺶ ﺗﺎﺭﻣﺎﻗﻠﯩﺮﻯ، ﻣﻪﺯﻛﯘﺭ ﺳﻮﺩﺍ ﻣﻪﺭﻛﯩﺰﯨﺪﻩ ﺋﺎﺳﺎﻥ ﺋﻮﺕ ﺋﺎﻟﯩﺪﯨﻐﺎﻥ ﻣﺎﺗﯧﺮﯨﻴﺎﻟﻼﺭﻧﯩﯔ ﻛﯚﭘﻠﯜﻛﯩﻨﻰ ﻫﻪﻡ ﺋﺎﻣﺒﺎﺭﻻﺷﺘﯘﺭﯗﻟﯘﺷﯩﻨﯩﯔ ﺋﯚﻟﭽﻪﻣﮕﻪ ﺋﯘﻳﻐﯘﻥ ﺋﻪﻣﻪﺳﻠﯩﻜﯩﻨﻰ ﻛﯚﺭﯛﭖ ﺗﯘﺭﯗﭖ، ﻻﻳﺎﻗﻪﺗﻠﯩﻚ ﻗﯩﻠﯩﭗ ﺑﯧﻜﯩﺘﻜﻪﻥ.

ﻛﯚﺯ ﺑﻮﻳﺎﺷﻘﺎ ﭘﯘﻝ ﺑﺎﺭ، ﺋﻪﻣﻪﻟﯩﻲ ﺋﯩﺸﻘﺎ ﭘﯘﻝ ﻳﻮﻕ

ﺋﻮﺕ ﺋﺎﭘﯩﺘﯩﻨﻰ ﺋﯚﺯﯨﻨﯩﯔ ﻧﻪﻕ ﻣﻪﻳﺪﺍﻧﺪﺍ ﻛﯚﺭﮔﻪﻧﻠﯩﻜﯩﻨﻰ ﺗﯩﻠﻐﺎﻥ ﺋﺎﻟﻐﺎﻥ ﺋﺎﭘﺘﻮﺭ، ﺋﻮﺕ ﺋﯚﭼﯜﺭﯛﺵ ﺋﻪﺗﺮﯨﺘﯩﻨﯩﯔ، ﺳﯘ ﭘﯜﺭﻛﯜﺵ ﺗﯘﺭﯗﺑﯩﺴﯩﻨﯩﯔ، 12 ﻗﻪﯞﻩﺗﻠﯩﻚ ﺑﯩﻨﺎﻧﯩﯔ 6 ‏- ﻗﻪﯞﯨﺘﯩﮕﻪ ﺋﺎﺭﺍﻥ ﻳﻪﺗﻜﻪﻧﻠﯩﻜﯩﻨﻰ، ﺋﻮﺕ ﺋﯚﭼﯜﺭﯛﺵ ﺋﺎﭘﺎﺭﺍﺗﻠﯩﺮﯨﺪﯨﻜﻰ ﻗﺎﻻﻗﻠﯩﻖ ﯞﻩ ﺋﺎﺟﯩﺰﻟﯩﻖ ﺳﻪﯞﻩﺑﯩﺪﯨﻦ ﺋﻮﺕ ﺋﺎﭘﯩﺘﯩﻨﯩﯔ 33 ﺳﺎﺋﻪﺕ ﺩﺍﯞﺍﻡ ﻗﯩﻠﻐﺎﻧﻠﯩﻘﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﯞﻩ ﻣﯘﻧﺪﺍﻕ ﺩﯦﮕﻪﻥ: " ﻣﻪﻥ ﺋﯚﺯﯛﻡ ﻣﯘﺷﯘ ﻫﯚﻛﯜﻣﻪﺗﻨﯩﯔ ﺧﯩﺰﻣﻪﺗﭽﯩﺴﻰ، ﺑﯩﺰ ﻛﯚﭖ ﻗﯧﺘﯩﻢ، ﺷﻪﻫﻪﺭﻟﯩﻚ ﻫﯚﻛﯜﻣﻪﺗﻜﻪ، ﺋﯜﺭﯛﻣﭽﯩﺪﻩ ﻳﯜﻛﺴﻪﻙ ﺑﯩﻨﺎﻻﺭﻧﯩﯔ ﻛﯚﭘﯩﻴﯩﭗ ﻛﯧﺘﯩﯟﺍﺗﻘﺎﻧﻠﯩﻘﯩﻨﻰ، ﻳﯜﻛﺴﻪﻙ ﺑﯩﻨﺎﻻﺭﺩﺍ ﺋﻮﺕ ﺋﯚﭼﯜﺭﯛﺵ ﺋﯜﺳﻜﯜﻧﯩﻠﯩﺮﯨﻨﻰ ﺳﯧﺘﯩﯟﯦﻠﯩﺸﻨﻰ ﺩﻭﻛﻼﺕ ﻗﯩﻠﻐﺎﻥ، ﺩﻭﻛﻼﺗﯩﻤﯩﺰ ﺗﻪﺳﺘﯩﻘﻼﻧﻤﯩﺪﻯ."

ﺋﺎﭘﺘﻮﺭ، ﻫﯚﻛﯜﻣﻪﺕ ﺋﻪﻣﻪﻟﺪﺍﺭﻟﯩﺮﯨﻨﯩﯔ ﺩﯙﻟﻪﺕ ﻣﺎﻟﯩﻴﯩﺴﯩﻨﻰ ﺟﺎﻳﯩﺪﺍ ﺋﯩﺸﻠﻪﺗﻤﻪﻳﯟﺍﺗﻘﺎﻧﻠﯩﻘﯩﻨﻰ ﭘﺎﺵ ﻗﯩﻠﯩﭗ ﻣﯘﻧﺪﺍﻕ ﺩﯦﮕﻪﻥ: "ﺋﻮﺗﺘﯩﻦ ﻣﯘﺩﺍﭘﯩﺌﻪﻟﯩﻨﯩﺶ ﺋﻪﺳﯟﺍﺑﻠﯩﺮﯨﻨﻰ ﺳﯧﺘﯩﯟﯦﻠﯩﺸﻘﺎ ﭘﯘﻝ ﻳﻮﻕ ﺩﯦﮕﻪﻥ ﺷﻪﻫﻪﺭﻟﯩﻚ ﭘﺎﺭﺗﻜﻮﻡ ﺳﯧﻜﺮﯨﺘﺎﺭﻯ ﻟﻰ، 60 ﻣﯩﻠﻴﻮﻥ ﻳﯜﻩﻥ ﺧﯩﺮﺍﺟﻪﺕ ﺋﺎﺟﺮﯨﺘﯩﭗ، ﺷﻪﻫﻪﺭﻧﯩﯔ ﻛﯚﯞﺭﯛﻙ ﯞﻩ ﻳﻮﻟﻠﯩﺮﯨﻨﻰ ﺋﺎﻗﺎﺭﺗﯩﭗ ‏- ﺳﯩﺮﻻﭖ ﭼﯩﻘﺘﻰ؛ 300 ﻣﯩﻠﻴﻮﻥ ﻳﯜﻩﻥ ﺧﯩﺮﺍﺟﻪﺕ ﻗﯩﻠﯩﭗ، ﻛﻮﭼﺎ ﺭﯨﺸﺎﺗﻜﯩﻠﯩﺮﯨﻨﻰ ﻳﯧﯖﯩﻠﯩﺪﻯ. ﻣﻪﻗﺴﯩﺘﻰ ﺧﻪﻟﻘﻘﻪ ﭘﺎﻳﺪﯨﻠﯩﻖ ﺋﯩﺶ ﻗﯩﻠﯩﺶ ﺋﻪﻣﻪﺱ، ﺋﯚﺯﯨﻨﻰ ﻛﯚﺭﺳﯩﺘﯩﺶ ﯞﻩ ﻫﻮﻗﯘﻗﺘﺎ ﻳﻪﻧﻪ ﺑﯩﺮ ﺑﺎﻟﺪﺍﻕ ﺋﯚﺳﯜﺵ."

ﺋﺎﭘﺘﻮﺭ ﺋﯩﻨﻜﺎﺳﯩﻨﻰ ﻣﯘﻧﺪﺍﻕ ﺋﺎﺧﯩﺮﻻﺷﺘﯘﺭﯨﺪﯗ: "ﻧﯧﻤﻪ ﺋﯜﭼﯜﻥ ﺷﯩﻨﺠﺎﯓ ﺧﻪﻟﻘﻰ ﻧﺎﻣﺮﺍﺗﻠﯩﻘﺘﯩﻦ ﻗﯘﺗﯘﻻﻟﻤﺎﻳﺪﯗ؟ ﻧﯧﻤﻪ ﺋﯜﭼﯜﻥ ﺷﯩﻨﺠﺎﯕﻨﯩﯔ ﺑﯩﺮﯨﻨﭽﻰ ﻗﻮﻝ ﺭﻩﻫﺒﯩﺮﻯ 10 ﻳﯩﻠﺪﯨﻦ ﺑﯧﺮﻯ ﺋﺎﻟﻤﺎﺷﻤﺎﻳﺪﯗ؟ ﺷﯘﻧﭽﻪ ﻛﯚﭖ ﺩﯙﻟﻪﺕ ﻣﯜﻟﻜﯩﻨﻰ ﻳﯘﺗﯘﯞﺍﻟﻐﺎﻧﻼﺭ ﻧﻮﻣﯘﺱ ﻫﯧﺲ ﻗﯩﻠﻤﺎﻳﺪﯗ؟"

1200 ﺩﯗﻛﯩﻨﻰ ﺑﺎﺭ ﺑﺎﺯﺍﺭﺩﺍ، 5 ﺩﯗﻛﺎﻥ ﺋﯘﻳﻐﯘﺭﻧﯩﯔ

ﺑﯘ ﻗﯧﺘﯩﻤﻘﻰ، ﺋﻮﺕ ﺋﺎﭘﯩﺘﯩﻨﯩﯔ ﺯﯨﻴﯩﻨﯩﻐﺎ ﺋﯘﻳﻐﯘﺭﻻﺭ ﺋﺎﺳﺎﺳﻪﻥ ﺋﯘﭼﺮﯨﻤﯩﻐﺎﻥ. ﺑﯘﻧﯩﯔ ﺳﻪﯞﻩﺑﻰ 1200 ﺩﯨﻦ ﺋﺎﺭﺗﯘﻕ ﺗﯩﺠﺎﺭﻩﺗﭽﯩﺴﻰ ﺑﻮﻟﻐﺎﻥ ﺑﯘ ﺑﺎﺯﺍﺭﺩﺍ، ﭘﻪﻗﻪﺕ 5 ﺩﯗﻛﺎﻥ ﺋﯘﻳﻐﯘﺭﻏﺎ ﺗﻪﯞﻩ. ﺑﯘ ﺋﻪﻫﯟﺍﻟﻨﻰ ﺩﯨﺨﯘﻱ ﺳﻮﺩﺍ ﻣﻪﺭﻛﯩﺰﯨﻨﯩﯔ ﺋﯩﺸﻠﯩﺮﯨﻐﺎ ﺋﺎﻻﻗﯩﺪﺍﺭ ﺑﯩﺮ ﺋﯘﻳﻐﯘﺭ ﺑﯩﺰﮔﻪ ﺋﻪﻫﯟﺍﻟﻼﺭﻧﻰ ﺳﯚﺯﻟﻪﭖ ﺑﻪﺭﺩﻯ.

ﺑﯘ ﺋﯩﻨﻜﺎﺳﺘﯩﻦ ﻣﻪﻟﯘﻡ ﺑﻮﻟﻐﺎﻥ ﺋﯘﻳﻐﯘﺭﻻﺭﻧﯩﯔ ﻣﻪﺯﻛﯘﺭ ﺋﻮﺕ ﺋﺎﭘﯩﺘﯩﺪﻩ ﺋﺎﺳﺎﺳﻪﻥ ﺯﯨﻴﺎﻧﻐﺎ ﺋﯘﭼﺮﯨﻤﯩﻐﺎﻧﻠﯩﻘﻰ ﺑﯩﺮ ﻳﺎﺧﺸﻰ ﺧﻪﯞﻩﺭ ﺑﻮﻟﺴﯩﻤﯘ، ﺋﻪﻣﻤﺎ ﺑﯘ ﺧﻪﯞﻩﺭﻧﯩﯔ ﺋﺎﺭﻗﺴﯩﺪﯨﻜﻰ ﺋﻪﺟﻪﺑﻠﯩﻨﻪﺭﻟﯩﻚ ﯞﻩﺯﯨﻴﻪﺕ ﻛﯚﺯﻩﺗﻜﯜﭼﯩﻠﻪﺭﻧﯩﯔ ﺩﯨﻘﻘﯩﺘﯩﻨﻰ ﺗﺎﺭﺗﯩﺪﯗ. ﺋﯘ ﺑﻮﻟﺴﯩﻤﯘ، ﺋﯘﻳﻐﯘﺭ ﺋﯧﻠﯩﺪﯨﻜﻰ ﺑﯩﺮ ﭼﻮﯓ ﺳﻮﺩﺍ ﺑﺎﺯﯨﺮﯨﺪﺍ، ﻧﻮﭘﯘﺳﻨﯩﯔ ﻳﯧﺮﯨﻤﯩﻨﻰ ﺗﻪﺷﻜﯩﻞ ﻗﯩﻠﯩﺪﯨﻐﺎﻥ ﺋﯘﻳﻐﯘﺭﻻﺭﻧﯩﯔ %1 ﻧﯩﺴﺒﻪﺗﺘﯩﻤﯘ ﺋﻮﺭﯗﻥ ﺋﯩﮕﯩﻠﯩﻴﻪﻟﻤﯩﮕﻪﻧﻠﯩﻜﯩﺪﯗﺭ. (ﺷﯚﻫﺮﻩﺕ ﻫﻮﺷﯘﺭ)