ﺩﯗﻧﻴﺎ ﺋﯘﻳﻐﯘﺭ ﻗﯘﺭﯗﻟﺘﯩﻴﻰ ﻳﺎﺷﻼﺭ ﻛﻮﻣﯩﺘﯧﺘﯩﻨﯩﯔ ﺑﺎﺷﻠﯩﻘﻰ ﺑﻪﺧﺘﯩﻴﺎﺭ ﺷﻪﻣﺸﯩﺪﯨﻨﻨﯩﯔ ﻧﻪﻕ ﻣﻪﻳﺪﺍﻧﺪﯨﻦ ﺭﺍﺩﯨﺌﻮﻣﯩﺰﻏﺎ ﺑﻪﺭﮔﻪﻥ ﻣﻪﻟﯘﻣﺎﺗﯩﻐﺎ ﻗﺎﺭﯨﻐﺎﻧﺪﺍ، ﻛﺎﻧﺎﺩﺍ ﭘﺎﺭﻻﻣﯧﻨﺘﻨﯩﯔ ﺑﯩﺮ ﻗﯩﺴﯩﻢ ﺋﻪﺯﺍﻟﯩﺮﻯ، ﻛﺎﻧﺎﺩﺍ ﺋﯘﻳﻐﯘﺭ ﺑﯩﺮﻟﻪﺷﻤﯩﺴﻰ، ﺗﯩﺒﻪﺗﻠﻪﺭ، ﺧﻪﻟﻘﺌﺎﺭﺍ ﻛﻪﭼﯜﺭﯛﻡ ﺗﻪﺷﻜﯩﻼﺗﻰ ﻓﺎﻟﯘﻧﮕﯘﯓ ﺗﻪﺭﯨﻘﯩﺘﻰ ﯞﻩ ﺧﯩﺘﺎﻱ ﺩﯦﻤﻮﻛﺮﺍﺗﻠﯩﺮﻯ ﻗﺎﺗﺎﺭﻟﯩﻖ ﺗﻪﺷﻜﯩﻼﺕ ﯞﻩ ﮔﯘﺭﯗﭘﭙﯩﻼﺭﻧﯩﯔ ﺋﻮﺭﯗﻧﻼﺷﺘﯘﺭﯗﺷﻰ ﺑﯩﻠﻪﻥ ﺋﯚﺗﻜﯜﺯﯛﻟﮕﻪﻥ ﻧﺎﻣﺎﻳﯩﺸﻘﺎ ﺑﻪﺵ ﻳﯜﺯﺩﯨﻦ ﺋﺎﺭﺗﯘﻕ ﺋﺎﺩﻩﻡ ﻗﺎﺗﻨﺎﺷﻘﺎﻥ ﺑﻮﻟﯘﭖ، ﻧﺎﻣﺎﻳﯩﺸﺘﺎ ﻛﺎﻧﺎﺩﺍﻧﯩﯔ ﺳﺎﺑﯩﻖ ﺩﯙﻟﻪﺕ ﻣﯩﻨﯩﺴﺘﯩﺮﻯ ﺩﯦﯟﯨﺪ ﻛﺎﻟﮕﻮﺭ، ﻛﺎﻧﺎﺩﺍ ﭘﺎﺭﻻﻣﯧﻨﺖ ﺋﻪﺯﺍﺳﻰ ﯞﻩ ﺳﺎﺑﯩﻖ ﺋﻪﺩﻟﯩﻴﻪ ﻣﯩﻨﯩﺴﺘﯩﺮﻯ ﯞﻩ ﺋﯘﻳﻐﯘﺭﻻﺭﻏﺎ ﯞﺍﻛﺎﻟﯩﺘﻪﻥ ﺳﯚﺯ ﻗﯩﻠﻐﺎﻥ ﻣﻮﻧﺘﯩﺮﯨﻴﺎﻝ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺋﻮﻗﯘﻏﯘﭼﯩﺴﻰ ﺋﯘﻳﻐﯘﺭ ﻗﯩﺰﻯ ﻗﻪﻟﺒﯩﻨﯘﺭﻧﯩﯔ ﺋﯘﻳﻐﯘﺭﻻﺭ، ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﺑﺎﺳﺘﯘﺭﯗﺵ ﻫﻪﺭﯨﻜﻪﺗﻠﯩﺮﻯ ﯞﻩ ﻫﯚﺳﻪﻳﯩﻦ ﺟﯧﻠﯩﻞ ﻣﻪﺳﯩﻠﯩﺴﻰ ﻫﻪﻗﻘﯩﺪﯨﻜﻰ ﺳﯚﺯﻟﯩﺮﻯ ﻧﺎﻣﺎﻳﯩﺶ ﻗﺎﺗﻨﺎﺷﻘﯘﭼﯩﻠﯩﺮﯨﻨﯩﯔ ﻗﯩﺰﻏﯩﻦ ﺋﺎﻟﻘﯩﺸﯩﻐﺎ ﺋﯧﺮﯨﺸﻜﻪﻥ.

ﺑﯜﮔﯜﻥ ﻧﺎﻣﺎﻳﯩﺸﻨﯩﯔ ﺗﻪﺷﻜﯩﻠﻠﯩﮕﯜﭼﯩﻠﯩﺮﯨﻨﯩﯔ ﺑﯩﺮﻯ ﺑﻮﻟﻐﺎﻥ ﻛﺎﻧﺎﺩﺍﻧﯩﯔ ﺳﺎﺑﯩﻖ ﺩﯙﻟﻪﺕ ﻣﯩﻨﯩﺴﺘﯩﺮﻯ ﺩﯦﯟﯨﺪ ﻛﻪﻟﮕﯘﺭ ﺋﻪﭘﻪﻧﺪﻯ ﺭﺍﺩﯨﺌﻮﻣﯩﺰﻏﺎ ﺑﻪﺭﮔﻪﻥ ﺑﺎﻳﺎﻧﺎﺗﯩﺪﺍ ﺑﯜﮔﯜﻧﻜﻰ ﻧﺎﻣﺎﻳﯩﺸﻨﯩﯔ ﻣﻪﻗﺴﯩﺘﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ ": ﺑﯜﮔﯜﻧﻜﻰ ﻧﺎﻣﺎﻳﯩﺸﻨﯩﯔ ﻣﻪﻗﺴﯩﺘﻰ ﺧﯩﺘﺎﻱ ﻫﯚﻛﯜﻣﯩﺘﯩﮕﻪ 32 ﻣﯩﻠﻴﻮﻥ ﻛﺎﻧﺎﺩﺍ ﺧﻪﻟﻘﯩﻨﯩﯔ ﯞﻩ ﺑﯜﮔﯜﻧﻜﻰ ﻧﺎﺭﺍﺯﯨﻠﯩﻖ ﻫﻪﺭﯨﻜﯩﺘﯩﮕﻪ ﻗﺎﺗﻨﯩﺸﯩﯟﺍﺗﻘﺎﻧﻼﺭﻧﯩﯔ، ﻛﯩﺸﯩﻠﯩﻚ ﻫﻮﻗﯘﻕ ﻣﻪﺳﯩﻠﯩﺴﯩﺪﻩ ﺑﻪﺭﮔﻪﻥ ﯞﻩﺩﯨﻠﯩﺮﯨﮕﻪ ﺋﻪﻣﻪﻝ ﻗﯩﻠﯩﺸﻰ ﺗﻮﻏﺮﯨﺴﯩﺪﯨﻜﻰ ﺗﻪﻟﯩﭙﯩﻨﻰ ﻳﻪﻧﻪ ﺑﯩﺮ ﻗﯧﺘﯩﻢ ﺋﻪﺳﻜﻪﺭﺗﯩﺸﺘﯩﻦ ﺋﯩﺒﺎﺭﻩﺕ. ﻟﯧﻜﯩﻦ ﺑﯧﻴﺠﯩﯖﺪﺍ ﺗﯘﺭﯗﯞﺍﺗﻘﺎﻥ ﻫﻪﺭ ﻗﺎﻧﺪﺍﻕ ﺑﯩﺮ ﭼﻪﺗﺌﻪﻟﻠﯩﻚ ﻣﯘﺧﺒﯩﺮ ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ 2008‏ - ﻳﯩﻠﻠﯩﻖ ﺋﻮﻟﯩﻤﭙﯩﻚ ﺗﻪﻧﻬﻪﺭﯨﻜﻪﺕ ﻳﯩﻐﯩﻨﯩﻐﺎ ﺳﺎﻫﯩﺒﺨﺎﻧﯩﻠﯩﻖ ﻗﯩﻠﯩﺶ ﻫﻮﻗﯘﻗﻰ ﺑﯧﻴﺠﯩﯖﻐﺎ ﺑﯧﺮﯨﻠﮕﻪﻧﺪﻩ، ﺧﻪﻟﻘﺌﺎﺭﺍ ﺟﺎﻣﺎﺋﻪﺗﻜﻪ ﺑﻪﺭﮔﻪﻥ ﯞﻩﺩﯨﻠﯩﺮﯨﻨﯩﯔ ﻫﯧﭽﺒﯩﺮﯨﮕﻪ ﺋﻪﻣﻪﻝ ﻗﯩﻠﻤﯩﻐﺎﻧﻠﯩﻘﯩﻨﻰ ﻳﺎﺧﺸﻰ ﺑﯩﻠﯩﺪﯗ."
 
ﺑﺎﻳﺎﻧﺎﺗﯩﺪﺍ ﺋﯘﻳﻐﯘﺭﻻﺭﻧﯩﯔ ﺑﯘ ﻧﺎﻣﺎﻳﯩﺸﻘﺎ ﻗﺎﺗﻨﺎﺷﻘﺎﻧﻠﯩﻘﯩﺪﯨﻦ ﻧﺎﻫﺎﻳﯩﺘﻰ ﺧﯘﺭﺳﻪﻥ ﺑﻮﻟﻐﺎﻧﻠﯩﻘﯩﻨﻰ ﺋﯩﭙﺎﺩﯨﻠﯩﮕﻪﻥ ﻛﯧﻠﮕﻮﺭ ﺋﻪﭘﻪﻧﺪﻯ ﺋﯘﻳﻐﯘﺭﻻﺭ ﻣﻪﺳﯩﻠﯩﺴﻰ ﺋﯜﺳﺘﯩﺪﻩ ﺗﻮﺧﺘﯩﻠﯩﭗ ﻣﯘﻧﺪﺍﻕ ﺩﯦﺪﻯ: " ﺋﯘﻳﻐﯘﺭﻻﺭ ﺗﯩﻨﭽﻠﯩﻘﭙﻪﺭﯞﻩﺭ، ﺯﻭﺭﺍﯞﺍﻧﻠﯩﻖ ﻫﻪﺭﯨﻜﻪﺗﻠﯩﺮﯨﻨﻰ ﻗﻮﻟﻠﯩﻤﺎﻳﺪﯨﻐﺎﻥ ﺑﯩﺮ ﺧﻪﻟﻖ. ﺧﯩﺘﺎﻱ ﻫﯚﻛﯜﻣﯩﺘﯩﻨﯩﯔ ﺋﯘﻳﻐﯘﺭﻻﺭﻏﺎ ﻗﺎﺭﺍﺗﻘﺎﻥ ﺳﯩﻴﺎﺳﯩﺘﻰ ﻛﯩﺸﯩﻨﻰ ﻏﻪﺯﻩﭘﻠﻪﻧﺪﯛﺭﯛﺩﯗ. ﻗﻪﺷﻘﻪﺭﺩﻩ 16 ﺧﯩﺘﺎﻱ ﺳﺎﻗﭽﯩﺴﯩﻨﯩﯔ ﺋﯚﻟﺘﯜﺭﯛﻟﮕﻪﻧﻠﯩﻜﻰ ﺋﯘﻳﻐﯘﺭﻻﺭﻧﯩﯔ ﺋﺎﺳﺎﺳﻠﯩﻖ ﺋﯧﻘﯩﻤﯩﻐﺎ ﯞﻩﻛﯩﻠﻠﯩﻚ ﻗﯩﻼﻟﻤﺎﻳﺪﯨﻐﺎﻥ ﺑﯩﺮ ﯞﻩﻗﻪ. ﻟﯧﻜﯩﻦ ﺧﯩﺘﺎﻱ ﻫﯚﻛﯜﻣﯩﺘﻰ ﻫﻪﺭ ﺑﯩﺮ ﺋﯘﻳﻐﯘﺭﻏﺎ ﺗﯧﺮﺭﻭﺭﭼﯩﺪﻩﻙ ﻣﯘﺋﺎﻣﯩﻠﻪ ﻗﯩﻠﻤﺎﻗﺘﺎ. ﺑﯘ ﻧﺎﻫﺎﻳﯩﺘﯩﻤﯘ ﺧﺎﺗﺎ ﺑﯩﺮ ﻗﺎﺭﺍﺵ ﺑﻮﻟﯘﭖ ﺑﯩﺰ ﺑﯘﻧﯩﯖﻐﺎ ﻗﻪﺗﺌﯩﻲ ﻗﺎﺭﺷﻰ ﺗﯘﺭﯨﻤﯩﺰ ."

ﺋﻮﺗﺘﺎﯞﺍﺩﯨﻜﻰ ﺧﯩﺘﺎﻱ ﺑﺎﺵ ﺋﻪﻟﭽﯩﺨﺎﻧﯩﺴﻰ ﺋﺎﻟﺪﯨﺪﺍ ﺋﯚﺗﻜﯜﺯﯛﻟﮕﻪﻥ ﻧﺎﺭﺍﺯﯨﻠﯩﻖ ﻧﺎﻣﺎﻳﯩﺸﻘﺎ ﻛﺎﻧﺎﺩﺍﻧﯩﯔ ﻣﻮﻧﺘﯩﺮﯨﻴﺎﻝ ﺷﻪﻫﯩﺮﯨﺪﯨﻦ ﻛﯧﻠﯩﭗ ﻗﺎﺗﻨﺎﺷﻘﺎﻥ ﺋﻪﺭﻛﯩﻦ ﺋﻪﭘﻪﻧﺪﻯ ﺑﯜﮔﯜﻧﻜﻰ ﻧﺎﻣﺎﻳﯩﺸﺘﯩﻜﻰ ﻫﯧﺴﺴﯩﻴﺎﺗﯩﻨﻰ ﺳﯚﺯﻟﻪﭖ ﺑﻪﺭﺩﻯ.