ﻣﻪﺭﻛﯩﺰﯨﻲ ﺋﺎﺳﯩﻴﺎ ﺋﻮﻣﯘﻣﯩﻲ ﺗﺎﺭﯨﺨﻰ ﭘﯩﻼﻧﻰ ﻣﯘﺯﺍﻛﯩﺮﻩ ﺋﯜﺳﺘﯩﺪﻩ

• ﻣﯘﺧﺒﯩﺮﯨﻤﯩﺰ ﺋﯜﻣﯩﺪﯞﺍﺭﻧﯩﯔ ﺑﯘ ﻫﻪﻗﺘﯩﻜﻰ ﺗﻮﻟﯘﻕ ﻣﻪﻟﯘﻣﺎﺗﻰ
• Download story audio

ﻣﻪﺭﻛﯩﺰﯨﻲ ﺋﺎﺳﯩﻴﺎ ﺭﺍﻳﻮﻧﯩﻨﯩﯔ ﺳﻮﯞﯦﺖ ﺋﯩﺘﺘﯩﭙﺎﻗﻰ ﻳﯩﻤﯩﺮﯨﻠﮕﻪﻧﺪﯨﻦ ﻛﯧﻴﯩﻨﻜﻰ 15 ﻳﯩﻠﻠﯩﻖ ﻣﯘﺳﺘﻪﻗﯩﻠﻠﯩﻖ ﻫﺎﻳﺎﺗﯩﺪﺍ ﺑﯧﺴﯩﭗ ﺋﯚﺗﻜﻪﻥ ﻣﯘﺭﻩﻛﻜﻪﭖ ﺳﯩﻴﺎﺳﯩﻲ، ﺋﯩﻘﺘﯩﺴﺎﺩﯨﻲ ﯞﻩ ﻣﻪﺩﻩﻧﯩﻴﻪﺕ ﺗﻪﺭﻩﻗﻘﯩﻴﺎﺕ ﺟﻪﺭﻳﺎﻧﻠﯩﺮﻯ ﺑﯜﮔﯜﻧﻜﻰ ﻛﯜﻧﺪﻩ ﺭﺍﻳﻮﻧﯩﻨﻰ ﺳﯩﻴﺎﺳﯩﻲ، ﺋﯩﻘﺘﯩﺴﺎﺩﯨﻲ ﺟﻪﻫﻪﺗﺘﯩﻦ ﺑﯩﺮﻟﯩﻜﻜﻪ ﻛﻪﻟﺘﯜﺭﯛﺵ ﺋﯩﺪﯨﻴﯩﻠﯩﺮﯨﻨﻰ ﻣﻪﻳﺪﺍﻧﻐﺎ ﭼﯩﻘﯩﺮﯨﭙﻼ ﻗﺎﻟﻤﺎﺳﺘﯩﻦ ﺑﻪﻟﻜﻰ، ﻳﻪﻧﻪ ﻗﺎﺯﺍﻕ، ﻗﯩﺮﻏﯩﺰ، ﺋﯚﺯﺑﻪﻙ، ﺗﯜﺭﻛﻤﻪﻥ، ﺋﯘﻳﻐﯘﺭ ﯞﻩ ﺑﺎﺷﻘﺎ ﺗﯜﺭﻛﯩﻲ ﻣﯩﻠﻠﻪﺗﻠﻪﺭﻧﯩﯔ ﺗﺎﺭﯨﺨﯩﻲ ﻛﯩﻤﻠﯩﻜﻰ، ﻣﻪﺩﻩﻧﯩﻴﻪﺕ ﻛﯩﻤﻠﯩﻜﻰ ﯞﻩ ﻣﯩﻠﻠﯩﻲ ﻛﯩﻤﻠﯩﻚ ﺟﻪﻫﻪﺗﻠﻪﺭﺩﯨﻜﻰ ﺋﻮﺭﺗﺎﻗﻠﯩﻖ ﺗﯘﻳﻐﯘﻟﯩﺮﯨﻨﻰ ﻳﻮﺭﯗﺗﯘﺵ ﻣﻪﺳﯩﻠﯩﺴﯩﻨﻰ ﻣﻪﺭﻛﯩﺰﯨﻲ ﺋﺎﺳﯩﻴﺎ ﺋﯩﻠﯩﻢ ﺳﺎﻫﻪﺳﻰ ﯞﻩ ﻫﯚﻛﯜﻣﻪﺗﻠﯩﺮﯨﻨﯩﯔ ﺧﯩﺰﻣﻪﺕ ﻛﯜﻥ ﺗﻪﺭﺗﯩﭙﯩﮕﻪ ﻗﻮﻳﺪﻯ.

ﻳﯧﻘﯩﻨﺪﺍ ، ﻗﺎﺯﺍﻗﯩﺴﺘﺎﻧﺪﯨﻜﻰ ﺳﯘﻻﻳﻤﺎﻧﻮﻑ ﻧﺎﻣﯩﺪﯨﻜﻰ ﺷﻪﺭﻗﺸﯘﻧﺎﺳﻠﯩﻖ ﺋﯩﻨﯩﺴﺘﯩﺘﯘﺗﻰ ﺗﯘﻧﺠﻰ ﺑﻮﻟﯘﭖ، ﻣﻪﺭﻛﯩﺰﯨﻲ ﺋﺎﺳﯩﻴﺎ ﺋﻮﻣﯘﻣﯩﻲ ﺗﺎﺭﯨﺨﯩﻨﻰ ﻳﯧﺰﯨﺶ ﭘﯩﻼﻧﻰ ﯞﻩ ﺗﻪﻛﻠﯩﭙﯩﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﭖ، ﻗﺎﺯﺍﻗﯩﺴﺘﺎﻥ ،ﺋﯚﺯﺑﯧﻜﯩﺴﺘﺎﻥ، ﺗﯜﺭﻛﻤﻪﻧﯩﺴﺘﺎﻥ ﯞﻩ ﺗﺎﺟﯩﻜﯩﺴﺘﺎﻥ ﺗﺎﺭﯨﺨﺸﯘﻧﺎﺳﻠﯩﺮﯨﻨﯩﯔ ﺑﺎﺵ ﻗﻮﺷﯘﭖ، ﻣﻪﺯﻛﯘﺭ ﺋﻮﻣﯘﻣﯩﻲ ﺗﺎﺭﯨﺨﻨﻰ ﺑﯩﺮﻟﯩﻜﺘﻪ ﻳﯧﺰﯨﭗ ﭼﯩﻘﯩﺶ ﺋﯩﺪﯨﻴﯩﺴﯩﻨﻰ ﺗﻪﺷﻪﺑﺒﯘﺱ ﻗﯩﻠﺪﻯ.

ﺋﻮﻣﯘﻣﯩﻲ ﺗﺎﺭﯨﺦ ﻳﯧﺰﯨﺶ ﺋﯩﺪﯨﻴﯩﺴﯩﻨﯩﯔ ﺳﻪﯞﻩﺑﻰ

ﺑﯘ ﭘﯩﻜﯩﺮﻧﻰ ﺋﻮﺗﺘﯘﺭﯨﻐﺎ ﻗﻮﻳﻐﺎﻥ ﻗﺎﺯﺍﻗﯩﺴﺘﺎﻥ ﺗﺎﺭﯨﺨﺸﯘﻧﺎﺳﻠﯩﺮﯨﻨﯩﯔ ﻗﺎﺭﯨﺸﯩﭽﻪ، ﻫﻪﺭ ﻗﺎﻳﺴﻰ ﺟﯘﻣﻬﯘﺭﯨﻴﻪﺗﻠﻪﺭﻧﯩﯔ ﺗﺎﺭﯨﺨﺸﯘﻧﺎﺳﻠﯩﺮﯨﻨﯩﯔ ﺑﯩﺮ ﻳﻪﺭﮔﻪ ﺟﻪﻡ ﺑﻮﻟﯘﺷﻰ ﺋﺎﺳﺎﺳﯩﺪﺍ ﻳﯧﺰﯨﻠﯩﺪﯨﻐﺎﻥ ﻣﻪﺭﻛﯩﺰﯨﻲ ﺋﺎﺳﯩﻴﺎﻧﯩﯔ ﺋﻮﻣﯘﻣﯩﻲ ﺗﺎﺭﯨﺨﻰ ﺭﺍﻳﻮﻧﺪﯨﻜﻰ ﺧﻪﻟﻘﻠﻪﺭﻧﯩﯔ ﺋﻮﺭﺗﺎﻗﻠﯩﻖ ﺗﯘﻳﻐﯘﺳﯩﻨﻰ ﺗﯩﻜﻠﻪﺷﺘﻪ ﻣﯘﻫﯩﻢ ﺋﻪﻫﻤﯩﻴﻪﺗﻜﻪ ﺋﯩﮕﻪ.

ﻗﺎﺯﺍﻗﯩﺴﺘﺎﻥ ﺷﻪﺭﻗﺸﯘﻧﺎﺳﻠﯩﻖ ﺋﯩﻨﺴﺘﯩﺘﯘﺗﯩﻨﯩﯔ ﺋﯩﻠﻤﯩﻲ ﺧﺎﺩﯨﻤﻰ ﺋﺎﺑﻠﻪﺕ ﻛﺎﻣﺎﻟﻮﻓﻨﯩﯔ ﺋﯧﻴﺘﯩﺸﯩﭽﻪ، ﻫﻪﺭ ﻗﺎﻳﺴﻰ ﺗﯜﺭﻛﯩﻲ ﺟﯘﻣﻬﯘﺭﯨﻴﻪﺗﻠﻪﺭﻧﯩﯔ ﻣﯘﺳﺘﻪﻗﯩﻞ ﺩﯙﻟﻪﺗﭽﯩﻠﯩﻜﯩﻨﯩﯔ ﺷﻪﻛﯩﻠﻠﯩﻨﯩﺸﯩﮕﻪ ﺋﻪﮔﯩﺸﯩﭗ، ﻫﻪﺭ ﺑﯩﺮ ﺟﯘﻣﻬﯘﺭﯨﻴﻪﺕ ﺋﯚﺯ ﺩﯙﻟﻪﺗﻠﯩﺮﯨﻨﯩﯔ ﺗﺎﺭﯨﺨﻠﯩﺮﯨﻨﻰ ﻗﺎﻳﺘﯩﺪﯨﻦ ﺗﯘﺭﻏﯘﺯﯗﺵ ﺑﯩﻠﻪﻥ ﺑﯩﺮ ﯞﺍﻗﯩﺘﺘﺎ ﻣﻪﻛﺘﻪﭖ ﺗﺎﺭﯨﺦ ﺩﻩﺭﺳﻠﯩﻜﻠﯩﺮﯨﻨﻰ ﺗﯜﺯﯛﭖ، ﻳﺎﺵ ﺋﻪﯞﻻﺩﻻﺭﻧﯩﯔ ﺋﺎﻳﺮﯨﻢ ﺩﯙﻟﻪﺗﭽﯩﻠﯩﻚ ﯞﻩ ﻣﯩﻠﻠﻪﺗﭽﯩﻠﯩﻚ ﺋﯩﺪﯨﻴﯩﺴﯩﻨﻰ ﺭﺍﯞﺍﺟﻼﻧﺪﯗﺭﺩﻯ. ﻗﺎﺯﺍﻗﯩﺴﺘﺎﻥ ﺋﯚﺯ ﺋﺎﻟﺪﯨﻐﺎ ﻗﺎﺯﺍﻗﯩﺴﺘﺎﻥ ﺗﺎﺭﯨﺨﯩﻨﻰ ﺟﯜﻣﻠﯩﺪﯨﻦ ﻗﺎﺯﺍﻕ ﺗﺎﺭﯨﺨﯩﻨﻰ، ﻗﯩﺮﻏﯩﺰﯨﺴﺘﺎﻥ، ﺋﯚﺯ ﺋﺎﻟﺪﯨﻐﺎ ﻗﯩﺮﻏﯩﺰ ﯞﻩ ﻗﯩﺮﻏﯩﺰﯨﺴﺘﺎﻥ ﺗﺎﺭﯨﺨﯩﻨﻰ ﻳﯧﺰﯨﭗ ﭼﯩﻘﺘﻰ . ﺋﻪﻟﯟﻩﺗﺘﻪ، ﺋﯚﺯﺑﯧﻜﯩﺴﺘﺎﻥ، ﺗﯜﺭﻛﻤﻪﻧﯩﺴﺘﺎﻥ ﻫﻪﻡ ﺗﺎﺟﯩﻜﯩﺴﺘﺎﻧﻤﯘ ﺷﯘﻧﺪﺍﻕ ﻗﯩﻠﺪﻯ. ﺋﯘﻻﺭﻧﯩﯔ ﺗﺎﺭﯨﺦ ﺩﻩﺭﺳﻠﯩﻜﻠﯩﺮﻯ ﯞﻩ ﺗﺎﺭﯨﺦ ﺋﻮﻗﯘﺷﻠﯘﻗﻠﯩﺮﯨﺪﺍ ﻫﻪﻣﻤﯩﺴﻰ ﺋﯚﺯ ﻣﯩﻠﻠﯩﺘﯩﻨﯩﯔ ﺗﺎﺭﯨﺨﯩﻨﻰ ﮔﻪﯞﺩﯨﻠﻪﻧﺪﯛﺭﯛﺷﻜﻪ ﺗﯩﺮﯨﺸﻘﺎﻥ ﺑﻮﻟﯘﭖ، ﻣﻪﺯﻛﯘﺭ ﺗﺎﺭﯨﺨﻼﺭ ﻣﯩﻠﻠﻪﺗﭽﯩﻠﯩﻚ ﺧﺎﻫﯩﺸﻠﯩﺮﯨﻨﯩﯔ ﻛﯜﭼﯩﻴﯩﺸﯩﺪﻩ ﻣﯘﻫﯩﻢ ﺭﻭﻝ ﺋﻮﻳﻨﯩﺪﻯ.

ﻟﯧﻜﯩﻦ، ﻣﻪﺭﻛﯩﺰﯨﻲ ﺋﺎﺳﯩﻴﺎ ﺭﺍﻳﻮﻧﯩﺪﯨﻜﻰ ﺧﻪﻟﻘﻠﻪﺭﻧﯩﯔ ﻗﯘﺩﺭﻩﺕ ﺗﯧﭙﯩﺸﻰ، ﺋﯩﻘﺘﯩﺴﺎﺩﯨﻲ ﺟﻪﻫﻪﺗﻠﻪﺭﺩﯨﻦ ﮔﯜﻟﻠﯩﻨﯩﺸﻰ، ﻫﻪﺭﺑﯩﻲ -ﺳﯩﻴﺎﺳﯩﻲ ﺟﻪﻫﻪﺗﻠﻪﺭﺩﻩ ﺧﻪﻟﻘﺌﺎﺭﺍﻟﯩﻖ ﺗﻪﺳﯩﺮ ﻛﯜﭼﯩﮕﻪ ﺋﯩﮕﻪ ﺑﻮﻟﯘﺷﻰ ﺋﯜﭼﯜﻥ ﺋﯘﻻﺭﻧﯩﯔ ﺋﺎﻳﺮﯨﻢ ﻣﻪﯞﺟﯘﺕ ﺑﻮﻟﯘﺵ ﯞﻩ ﻳﺎﻛﻰ ﺋﺎﻳﺮﯨﻢ ﺗﻪﺭﻩﻗﻘﻰ ﻗﯩﻠﯩﺶ ﻳﻮﻟﯩﻨﻰ ﺗﯘﺗﯩﺸﯩﺪﯨﻦ ﻛﯚﺭﻩ، ﺋﯚﺯﻟﯩﺮﯨﻨﯩﯔ ﺟﯘﻏﺮﺍﭘﯩﻴﯩﯟﻯ، ﺋﯧﺘﻨﯩﻚ، ﻣﻪﺩﻩﻧﯩﻴﻪﺕ ، ﺋﯩﻘﺘﯩﺴﺎﺩ ﯞﻩ ﺑﺎﺷﻘﺎ ﺟﻪﻫﻪﺗﻠﻪﺭﺩﯨﻜﻰ ﻛﯚﭘﻠﯩﮕﻪﻥ ﺋﻮﺧﺸﺎﺷﻠﯩﻘﻠﯩﺮﻯ ﯞﻩ ﺋﻮﺭﺗﺎﻗﻠﯩﻘﻠﯩﺮﯨﻨﻰ ﺟﺎﺭﻯ ﻗﯩﻠﺪﯗﺭﯗﭖ، ﺑﯩﺮ ﮔﻪﯞﺩﯨﮕﻪ ﺋﺎﻳﻠﯩﻨﯩﺸﻨﯩﯔ ﺗﯧﺨﯩﻤﯘ ﭘﺎﻳﺪﯨﻠﯩﻖ ﺋﯩﻜﻪﻧﻠﯩﻜﯩﺪﯨﻦ ﺋﯩﺒﺎﺭﻩﺕ ﻳﻪﻛﯜﻥ ﻗﺎﺯﺍﻗﯩﺴﺘﺎﻥ ﭘﺮﯦﺰﯨﺪﯦﻨﺘﻰ ﻧﯘﺭﺳﯘﻟﺘﺎﻥ ﻧﺎﺯﺍﺭﺑﺎﻳﯧﻒ ﺗﻪﺭﯨﭙﯩﺪﯨﻦ ﻗﺎﻳﺘﯩﺪﯨﻦ ﺋﻮﺗﺘﯘﺭﯨﻐﺎ ﻗﻮﻳﯘﻟﺪﻯ.

ﺑﯩﺮ ﻗﯩﺴﯩﻢ ﻣﻪﺭﻛﯩﺰﯨﻲ ﺋﺎﺳﯩﻴﺎ ﺳﯩﻴﺎﺳﯩﻴﻮﻧﻠﯩﺮﻯ، ﺋﯩﻘﺘﯩﺴﺎﺩﺷﯘﻧﺎﺳﻠﯩﺮﻯ ﯞﻩ ﺯﯨﻴﺎﻟﯩﻴﻠﯩﺮﻯ ﻫﻪﺗﺘﺎ ﭘﯘﻗﺮﺍﻟﯩﺮﻯ ﺑﯘﻧﯩﯖﻐﺎ ﺋﺎﯞﺍﺯ ﻗﻮﺷﯘﭖ, ﺭﺍﻳﻮﻧﻨﯩﯔ ﭘﺎﺭﭼﯩﻠﯩﻨﯩﭗ ﺗﯘﺭﻏﯘﻧﯩﺪﯨﻦ ﻛﯚﺭﻩ ﺑﯩﺮﻟﯩﻜﻜﻪ ﻛﯧﻠﯩﺸﻨﯩﯔ ﺋﯚﺯﻟﯩﺮﻯ ﺋﯜﭼﯜﻥ ﭘﺎﻳﺪﯨﻠﯩﻖ ﺋﯩﻜﻪﻧﻠﯩﻜﯩﻨﻰ ﺷﯘﻧﯩﯖﺪﻩﻙ ﺑﯘﻧﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺋﯜﭼﯜﻥ ﺋﻮﺭﺗﺎﻕ ﺗﺎﺭﯨﺨﯩﻲ ﯞﻩ ﻣﻪﺩﻩﻧﯩﻴﻪﺕ ﻛﯩﻤﻠﯩﻚ ﺗﯘﻳﻐﯘﺳﯩﻨﻰ ﺗﯩﻜﻠﻪﺷﻨﯩﯔ ﻣﯘﻫﯩﻤﻠﯩﻘﯩﻨﻰ ﺗﻮﻧﯘﭖ ﻳﻪﺗﺘﻰ. ﺩﯦﻤﻪﻙ، ﻣﻪﺭﻛﯩﺰﯨﻲ ﺋﺎﺳﯩﻴﺎ ﺋﻮﻣﯘﻣﯩﻲ ﺗﺎﺭﯨﺨﯩﻨﻰ ﻳﯧﺰﯨﺶ ﺋﯩﺪﯨﻴﯩﺴﻰ ﺋﻪﻧﻪ ﺷﯘ ﺋﯩﺪﯨﻴﯩﻠﻪﺭ ﺑﯩﻠﻪﻥ ﺑﺎﻏﻠﯩﻨﯩﺸﻠﯩﻖ ﺑﻮﻟﺴﺎ ﻛﯧﺮﻩﻙ.

ﺗﺎﺭﯨﺦ ﺗﺎﻟﯩﺸﯩﺶ ﺯﯨﻴﺎﻧﻠﯩﻖ

ﺋﯚﺯﺑﯧﻜﯩﺴﺘﺎﻧﻠﯩﻖ ﺷﻪﺭﻗﺸﯘﻧﺎﺱ ﺋﺎﺑﺪﯗﺳﺎﺗﺘﺎﺭ ﺟﯜﻣﻪﻧﻪﺯﻩﺭ ﺋﻪﭘﻪﻧﺪﻯ ﻣﻪﺯﻛﯘﺭ ﺗﺎﺭﯨﺦ ﻣﻪﺳﯩﻠﯩﺴﻰ ﻫﻪﻗﻘﯩﺪﻩ ﺗﻮﺧﺘﯩﻠﯩﭗ، "ﺑﯘ ﻧﺎﻫﺎﻳﯩﺘﻰ ﻣﯘﻫﯩﻢ ، ﺩﻩﻝ ﯞﺍﻗﺘﯩﺪﺍ ﺗﯘﺗﯩﺪﯨﻐﺎﻥ ﺯﯙﺭﯛﺭ ﻣﻪﺳﯩﻠﻪ ﺑﻮﻟﯘﭖ، ﺑﯘﻧﯩﯖﻐﺎ ﺋﺎﻟﻠﯩﻘﺎﭼﺎﻥ ﺗﯘﺗﯘﺵ ﻗﯩﻠﯩﺶ ﻛﯧﺮﻩﻙ ﺋﯩﺪﻯ . ﺑﯘ ﻫﺎﺯﯨﺮﻗﻰ ﻗﻮﺷﻨﺎ ﺩﯙﻟﻪﺗﻠﻪﺭﻧﯩﯔ ﺑﯩﺮ-ﺑﯩﺮﯨﮕﻪ ﻳﯧﻘﯩﻨﻠﯩﺸﯩﺸﯩﻐﺎ ﺧﯩﺰﻣﻪﺕ ﻗﯩﻠﯩﺪﯗ، ﻣﻪﺩﻩﻧﯩﻴﻪﺗﻠﯩﻚ -ﻣﻪﺩﻩﻧﯩﻴﻪﺗﺴﯩﺰ ﺩﯦﮕﻪﻥ ﮔﻪﭘﻠﻪﺭ ﻳﻮﻗﯩﻠﯩﺪﯗ، ﻫﻪﻣﻤﯩﻨﯩﯔ ﻳﯩﻠﺘﯩﺰﻯ ﺑﯩﺮ ﺋﯩﻜﻪﻧﻠﯩﻜﻰ ﻛﯚﺭﯛﯞﺍﻟﻐﯩﻠﻰ ﺑﻮﻟﯩﺪﯗ. ﺋﻪﮔﻪﺭ ﺑﯩﺰ ﭘﺎﻻﻧﭽﻰ ﺑﯩﺰﻧﯩﯖﻜﻰ، ﻗﺎﺯﺍﻗﻼﺭ ﻓﺎﺭﺍﺑﻰ ﺑﯩﺰﻧﯩﯖﻜﻰ، ﺗﺎﺟﯩﻜﻼﺭ ﺋﯩﺒﻨﻰ ﺳﯩﻨﺎ ﺑﯩﺰﻧﯩﯖﻜﻰ ﺩﯦﺴﻪ، ﺋﯘ ﭼﺎﻏﺪﺍ، ﺗﺎﺭﯨﺦ ﺑﯘﺯﯗﻟﯩﺪﯗ. ﺋﯘﻻﺭ ﻫﯧﭻ ﻛﯩﻤﻨﯩﯔ ﺋﻪﻣﻪﺱ، ﺋﯘﻻﺭ ﻫﻪﻣﻤﯩﻤﯩﺰﻧﯩﯔ ﺋﻪﺟﺪﺍﺩﻟﯩﺮﻯ" ﺩﻩﻳﺪﯗ.

ﺑﯩﺮ ﻗﯩﺴﯩﻢ ﻣﻪﺭﻛﯩﺰﯨﻲ ﺋﺎﺳﯩﻴﺎ ﺗﺎﺭﯨﺨﺸﯘﻧﺎﺳﻠﯩﺮﻯ ﺗﺎﺭﯨﺦ ﺗﺎﻟﯩﺸﯩﺶ، ﺑﻮﻟﯘﭘﻤﯘ ﺗﺎﺭﯨﺨﺘﯩﻜﻰ ﻣﻪﺷﻬﯘﺭ ﻣﻪﺩﻩﻧﯩﻴﻪﺕ ﻧﺎﻣﺎﻳﻪﻧﺪﯨﻠﯩﺮﻯ ﻓﺎﺭﺍﺑﻰ، ﻣﻪﻫﻤﯘﺩ ﻗﻪﺷﻘﻪﺭﻯ، ﻳﯜﺳﯜﭖ ﺧﺎﺱ ﻫﺎﺟﯩﭗ، ﺋﯩﺒﯩﻦ ﺳﯩﻨﺎ، ﻧﺎﯞﺍﻳﻰ ﯞﻩ ﺑﺎﺷﻘﯩﻼﺭﻧﻰ ﺋﯚﺯﺍﺭﺍ ﺗﺎﻟﯩﺸﯩﺸﻨﯩﯔ ﭘﺎﻳﺪﯨﺴﯩﺰ ﺋﯩﻜﻪﻧﻠﯩﻜﯩﻨﻰ ﺗﻪﻧﻘﯩﺪ ﻗﯩﻠﯩﺸﯩﭗ، ﻣﻪﺭﻛﯩﺰﯨﻲ ﺋﺎﺳﯩﻴﺎ ﺗﺎﺭﯨﺨﯩﻨﻰ "ﺋﻮﻣﯘﻣﯩﻲ ﺗﯜﺭﻙ ﺗﺎﺭﯨﺨﻰ " ﺩﻩﭖ ﺋﺎﺗﺎﺵ، ﺑﯘ ﺗﺎﺭﯨﺨﻨﻰ ﻳﺎﺯﻏﺎﻧﺪﺍ ﺋﺎﻳﺮﯨﻢ، ﻗﺎﺯﺍﻕ، ﻗﯩﺮﻏﯩﺰ، ﺋﯚﺯﺑﯧﻚ ﯞﻩ ﺑﺎﺷﻘﺎ ﻧﺎﻣﻼﺭﻧﻰ ﺋﺎﺗﯩﻤﺎﻱ، ﺑﻪﻟﻜﻰ "ﺗﯜﺭﻙ" ﺋﯩﺒﺎﺭﯨﺴﯩﻨﻰ ﻗﻮﻟﻠﯩﻨﯩﺸﻨﻰ ﺷﯘﻧﯩﯖﺪﻩﻙ ﻣﻪﻛﺘﻪﭘﻠﻪﺭﺩﻩ ﺑﯘﻧﺪﺍﻕ "ﺋﻮﻣﯘﻣﯩﻲ ﺗﯜﺭﻙ ﺗﺎﺭﯨﺨﻰ" ﺩﻩﺭﺳﻠﯩﻜﻠﯩﺮﯨﻨﻰ ﺋﻮﻗﯘﺗﯘﺵ ﭘﯩﻜﯩﺮﯨﻨﻰ ﺋﻮﺗﺘﯘﺭﯨﻐﺎ ﻗﻮﻳﯘﺷﺘﻰ.

ﺧﻪﯞﻩﺭﻟﻪﺭﺩﯨﻦ ﻗﺎﺭﯨﻐﺎﻧﺪﺍ، ﻧﯚﯞﻩﺗﺘﻪ، ﻗﺎﺯﺍﻗﯩﺴﺘﺎﻧﺪﺍ ﻣﻪﺭﻛﯩﺰﯨﻲ ﺋﺎﺳﯩﻴﺎ ﺋﻮﻣﯘﻣﯩﻲ ﺗﺎﺭﯨﺨﯩﻨﻰ ﻳﯧﺰﯨﺶ ﻣﻪﺳﯩﻠﯩﺴﻰ ﺑﻮﻳﯩﭽﻪ ﺗﺎﺭ ﺩﺍﺋﯩﺮﯨﻠﻪﺭ ﺑﻮﻳﯩﭽﻪ ﻣﯘﻫﺎﻛﯩﻤﻪ ﻳﯩﻐﯩﻨﻠﯩﺮﻯ ﺑﻮﻟﯘﭖ ﺋﯚﺗﻜﻪﻥ ، ﺑﯘ ﻳﯩﻐﯩﻨﻼﺭﺩﺍ ﻣﻪﺯﻛﯘﺭ ﺗﺎﺭﯨﺨﻨﻰ ﻗﺎﻧﺪﺍﻕ ﺋﯘﺳﯘﻝ ﯞﻩ ﻗﺎﻧﺪﺍﻕ ﻣﻪﺯﻣﯘﻧﺪﺍ ﻳﯧﺰﯨﺶ ﺷﯘﻧﯩﯖﺪﻩﻙ ﺗﺎﺭﯨﺨﯩﻲ ﻣﯩﺮﺍﺳﻼﺭ ﯞﻩ ﺗﺎﺭﯨﺨﯩﻲ ﺗﻪﺭﻩﻗﻘﯩﻴﺎﺕ ﺟﻪﺭﻳﺎﻧﻐﺎ ﻗﺎﻧﺪﺍﻕ ﺑﺎﻫﺎ ﺑﯧﺮﯨﺶ ﻫﻪﻡ ﻣﯘﺋﺎﻣﯩﻠﻪ ﻗﯩﻠﯩﺶ ﻫﻪﻗﻘﯩﺪﻩ ﻣﯘﻧﺎﺯﯨﺮﯨﻠﻪﺭ ﺋﯧﻠﯩﭗ ﺑﯧﺮﯨﻠﻐﺎﻥ. (ﺋﯜﻣﯩﺪﯞﺍﺭ)